Mipakita ngadto ni Joseph Smith ang Amahan ug ang Anak

Pasiuna

“Ang Buhi nga Kristo: Ang Pagpamatuod sa mga Apostoles” nag-ingon nga: “Sa kalibutan karon, [Si Jesukristo] ug ang Iyang Amahan nagpakita ngadto sa batang lalaki nga si Joseph Smith, sinugdanan sa dugay nang gisaad nga ‘kapaigoan sa kahingpitan sa mga panahon’ (Mga Taga-Efeso 1:10)” (Ensign o Liahona, Abr. 2000, 3). Kini nga leksyon mag-focus sa mahinungdanong tahas sa Unang Panan-awon sa doktrina sa Ang Simbahan ni Jesukristo sa mga Santos sa Ulahing mga Adlaw ug ang kalambigitan sa Manluluwas niana nga panan-awon. Kini nga leksyon maghatag usab og emphasis nga ang pagtuon sa Unang Panan-awon mopalig-on sa atong pagtuo sa Dios nga Amahan ug ni Jesukristo.

Background nga Basahunon

Gordon B. Hinckley, “Ang Kahibulongang Tukuranan sa Atong Pagtuo,” Ensign o Liahona, Nob. 2002, 78–81.
Dieter F. Uchtdorf, “Ang mga Bunga sa Unang Panan-awon,” Liahona, Mayo 2005, 36–38.
Neil L. Andersen, “Joseph Smith,” Liahona, Nov. 2014, 28–31.

Mga Sugyot alang sa Pagtudlo

Joseph Smith—Kasaysayan 1:14–17

Nakita ni Joseph Smith ang Dios nga Amahan ug ang Iyang Anak, si Jesukristo

I-establisar ang kinatibuk-ang panabut niini nga leksyon pinaagi sa daklit nga pagribyu sa Joseph Smith—Kasaysayan 1:5–12. Dayon hangyoa ang mga estudyante nga ipahisama kini nga tudling sa atong panahon pinaagi sa pagtutok sa mga similaridad tali sa kasinatian ni Joseph Smith sa pagpangita sa kamatuoran ug sa mga kasinatian niadtong nagpangita og kamatuoran sa panahon nato karon. (Ang mga tubag kinahanglang maglakip sa mosunod: Dunay grabing panagbingkil tali sa lahi-lahi nga simbahan. Wala mahibaloi ni Joseph Smith kon hain nga simbahan ang tinuod pinaagi sa pangatarungan o kaalam. Gihubad sa lahi nga paagi sa relihuyusong mga lider ang mao gihapong mga tudling.)

Dapita ang usa ka estudyante sa pagbasa og kusog sa Joseph Smith—Kasaysayan 1:14–15. Dayon pangutan-a ang klase:

Ngano kaha nga naningkamot man si Satanas nga pugngan ang pag-ampo ni Joseph Smith? (Ang mga tubag mahimong maglakip sa mosunod: Nakaila na si Satanas ni Joseph Smith didto pa sa premortal nga kalibutan ug nahibalo nga ang giorden daan nga misyon ni Joseph Smith mao ang pagtabang nga mapahiuli ang kamatuoran dinhi sa kalibutan. Gipaningkamutan ni Satanas nga dili kini manghitabo.)

Ipabasa og hilum sa mga estudyante ang Joseph Smith—Kasaysayan 1:16–17 ug ipasulat ang mga doktrina nga anaa sa pagpamatuod ni Joseph Smith. Human sa igong panahon, dapita ang mga estudyante nga ipaambit ang mga doktrina nga ilang nakita.

Ikonsiderar ang pag-display sa mosunod nga pamahayag ni Elder Christoffel Golden sa Seventy:

“Gisulat sa Propeta: ‘Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!’ [Joseph Smith—Kasaysayan 1:17].

“Kining kasinatian ni Joseph, gisundan sa daghan pang panan-awon ug pagpadayag, nagpadayag nga ang Dios anaa gayud; ang Amahan ug Iyang Anak, si Jesukristo, duha ka managlahing binuhat; ang tawo gilalang sa panagway sa Dios; ang atong Langitnong Amahan sa tinuod mao ang Amahan ni Jesukristo; padayon sa pagpadayag ang Dios sa Iyang kaugalingon ngadto sa tawo; ang Dios anaa sa duol ug nagpangga kanato; ug Siya motubag sa atong pag-ampo” (“Ang Amahan ug ang Anak,” Liahona, Mayo 2013, 100).

Sa unsang paagi ninyo mahulagway ang kaimportante sa Unang Panan-awon ni Joseph Smith sa teyolohiya [relihiyusong pagtuon] sa mga Santos sa Ulahing mga Adlaw? (Samtang magtubag ang mga estudyante, hatagi og gibug-aton ang mosunod: Ang panan-awon ni Joseph Smith bahin sa Amahan ug sa Anak mipahiuli sa kalibutan sa daghang importante nga mga kamatuoran.)
Unsaon ninyo sa paghulagway ang kamahinungdanon sa Unang Panan-awon ni Joseph Smith ngadto sa mga tigpangita sa kamatuoran karon?

I-display ang mosunod nga pamahayag ni Presidente Gordon B. Hinckley (1910–2008) ug dapita ang usa ka estudyante sa pagbasa niini og kusog:

“Ang tibuok natong kahimtang isip mga miyembro sa Simbahan ni Jesukristo sa mga Santos sa Ulahing mga Adlaw nag-agad sa katinuod niining mahimayaon nga Unang Panan-awon. … Walay atong mabasehan sa atong doktrina, walay atong ikatudlo, walay atong masunod nga mas dako og importansya kay sa niining nagsugod nga pamahayag. Ako nagtuo nga kon si Joseph Smith nakigsulti sa Dios Amahan ug sa Iyang Pinalanggang Anak, nan ang tanan nga iyang gipamulong tinuod. Kini mao ang hitabo nga nag-abli sa ganghaan nga naggiya ngadto sa dalan sa kaluwasan ug kinabuhing dayon” (“What Are People Asking about Us?” Ensign, Nob. 1998, 71).

Ngano nga ang “kinatibuk-an natong kahimtang isip mga miyembro sa Simbahan ni Jesukristo sa mga Santos sa Ulahing mga Adlaw” mag-agad man sa katinuod sa Unang Panan-awon? (Kinahanglang masabtan sa mga estudyante nga kon sayop pa ang istorya ni Joseph Smith, wala unta mahitabo ang Pagpahiuli sa Simbahan ni Jesukristo; apan, kon tinuod ang istorya ni Joseph Smith, niana nahitabo ang Pagpahiuli ug tinuod ang gipahiuli nga ebanghelyo.)
Giunsa ninyo pagbaton og pagpamatuod sa katinuod sa Unang Panan-awon?

Dapita ang mga estudyante nga sugdan nila sa paghunahuna kon unsa kaha ang ilang buhaton aron makakita og bag-ong kumpirmasyon sa katinuod sa Unang Panan-awon. Ikonsiderar ang pagpaambit sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

“Sa kabatan-onan nga naminaw karon o makabasa niining mga pulong sa umaabut nga mga adlaw, mohatag ko ninyo og piho nga hagit: Pagbaton og personal nga pagsaksi bahin ni Propeta Joseph Smith. … Basaha ang pagpamatuod ni Propeta Joseph Smith sa Perlas nga Labing Bililhon. … Kini ang kaugalingong pagpamatuod ni Joseph sa unsay tinuod nga nahitabo. Basaha kini kanunay. Ikonsiderar ang pagrekord sa pagpamatuod ni Joseph Smith sa inyong kaugalingong tingog, pagpaminaw niini kanunay, ug pagpaambit niini sa mga higala. Ang pagpaminaw sa pagpamatuod sa Propeta sa inyong kaugalingong tingog makatabang nga moabut ang pagsaksi nga inyong gitinguha” (“Joseph Smith,” Liahona, Nob. 2014, 30-31).

Sa dili pa magpadayon, ipasabut sa mga estudyante nga ang Unang Panan-awon dili lamang mao ang panahon nga mibisita ang Manluluwas ni Joseph Smith ug sa uban niini nga dispensasyon. Sama pananglit, mipakita si Jesukristo kang Joseph Smith ug sa ubang mga lider sa Simbahan sa makadaghang higayon sa sayo nga mga adlaw sa Pagpahiuli (para sa pananglitan, tan-awa sa D&P 76:22–24; 110:1–10).

Joseph Smith—Kasaysayan 1:17–20

“Kini mao ang Akong Hinigugmang Anak. Paminaw Kaniya!”

Iparibyu sa mga estudyante ang Joseph Smith—Kasaysayan 1:17, ug pangutan-a sila kon unsay gihimo sa Langitnong Amahan dihang mipakita Siya ni Joseph Smith. (Gipaila Niya ang Iyang Anak.) Mahimo usab nimong pangutan-on ang mga estudyante kon nakahunahuna na ba sila nganong importante kini nga piho nga bahin sa Unang Panan-awon. Basaha ngadto sa imong mga estudyante ang mosunod nga mga pamahayag ni Presidente Joseph Fielding Smith (1876–1972):

“Ang tanang pagpadayag sukad pa sa pagkapukan miabut pinaagi ni Jesukristo. … Ang Amahan wala gayud sukad makigsabut og tawo sa direkta ug personal nga paagi sukad pa sa pagkapukan, ug wala gayud siya mopakita gawas sa pagpaila ug paghatag og pamatuod sa Anak” (Doctrines of Salvation, comp. Bruce R. McConkie, 3 vols. [1954–56], 1:27).

“Dihang didto si Adan sa Tanaman sa Eden, didto siya sa presensya sa Dios nga atong Mahangturong Amahan. Human sa iyang pagkapukan, gipalayas siya palayo sa presensya sa Amahan. … Dayon, sumala sa mga kasulatan, si Jesukristo nahimong Manlalaban para ni Adan ug sa iyang mga anak [tan-awa sa 1 Juan 2:1; D&P 29:5; 110:4], ug Tigpataliwala usab [1 Timoteo 2:5; Mga Hebreohanon 9:15] nagbarug taliwala sa katawhan ug sa Mahangturong Amahan, nangamuyo alang kanato. Sukad nianang higayuna si Jesukristo ang misugo sa iyang mga sulugoon sa kalibutan ug mihatag og pagpadayag ug giya ngadto sa mga propeta. Kon mangingilad man si Joseph Smith … dili unta siya moingon nga ang Amahan ang mipaila sa Anak, ug mihangyo kaniya nga adto mangutana sa Anak ug ang Anak ang mihatag sa tubag” (Answers to Gospel Questions, comp. Joseph Fielding Smith Jr., 5 vols. [1957–66], 3:58).

Sa Unang Panan-awon, dihang nangutana si Joseph asa nga sekta ang eksakto, kinsa man nga Personahe ang mitubag sa iyang pangutana?
Sumala ni Presidente Joseph Fielding Smith, nganong importante man ni Joseph Smith nga irekord nga ang Langitnong Amahan mipaila ni Jesukristo ug nga si Jesukristo mao ang mitubag sa mga pangutana ni Joseph? (Kinahanglang masabtan sa mga estudyante ang mosunod nga kamatuoran: Sukad sa Pagkapukan ni Adan ug Eva, ang tanang pagpadayag miabut pinaagi ni Jesukristo.)
Sa unsang paagi ang pagkasabut niini nga sundanan sa pagpadayag makaimpluwensya sa imong pagsalig sa katinuod sa gisaysay sa Propeta bahin sa iyang panan-awon?

Ang Unang Panan-awon makatabang nga mapalambo nato ang atong pagtuo kang Jesukristo

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

“Mao kining paagiha kon giunsa sa pagpanalangin sa Unang Panan-awon ni Joseph Smith ang atong kaugalingong personal nga mga kinabuhi, ang mga kinabuhi sa mga pamilya, ug sa katapusan ang tibuok tawhanong pamilya—mituo kita kang Jesukristo pinaagi sa pagpamatuod ni Propeta Joseph Smith. Ang mga propeta ug mga apostoles sa tibuok kasaysayan sa katawhan adunay balaang mga pagpakita nga sama sa kang Joseph. …

“… Tanan niining mga pagpakita, karaan ug moderno, midala niadtong kinsa mituo ngadto sa balaang tinubdan sa tanang pagkamatarung ug paglaum—ngadto sa Dios, ang atong Langitnong Amahan, ug ngadto sa Iyang Anak, nga si Jesukristo. …

“Pinaagi sa atong hugot nga pagtuo diha sa personal nga pagsaksi ni Propeta Joseph ug sa pagkatinuod sa Unang Panan-awon, pinaagi sa pagtuon ug pag-ampo, nga tulukibon ug kinasingkasing, mapanalanginan kita og usa ka lig-ong konbiksyon sa Manluluwas sa kalibutan, kinsa namulong ngadto kang Joseph ‘sa buntag sa usa ka matahum, maayo nga panahon, sayo sa tingpamulak sa mil otso siyentos bayente’ (Joseph Smith—Kasaysayan 1:14)” (“Ang mga Bunga sa Unang Panan-awon,” Liahona, Mayo 2005, 38).

Sumala ni Presidente Uchtdorf, unsa nga panalangin ang moabut gumikan sa pagkat-on mahitungod sa Unang Panan-awon? (Bisan mogamit sila og lain-laing mga pulong, kinahanglang mahibaloan nila ang mosunod nga baruganan: Samtang makakat-on kita kabahin sa Unang Panan-awon, atong mapalambo ang mas dakong pagtuo sa Dios nga Amahan ug sa Iyang Anak, si Jesukristo.)
Sa unsang paagi ang pagkat-on mahitungod sa pagbisita sa Amahan ug sa Anak mopadako sa atong pagtuo Kanila? (Ang mga tubag posibling maglakip sa mosunod: Ang Unang Panan-awon usa ka lahi nga saksi nga Sila buhi; naghatag kini kanato og kasiguroan nga Sila naghunahuna sa mga kalihokan sa tawo; ebidensya kini nga Sila maminaw ug motubag sa mga pag-ampo.)
Unsa ang gidala nga tahas sa Unang Panan-awon diha sa inyong pagpamatuod sa Pagpahiuli?
Unsa man ang pwede ninyong himoon sa moabut nga semana aron malig-on o makadawat og kumpirmasyon sa inyong pagpamatuod sa Unang Panan-awon?

Hagita ang mga estudyante sa paggahin og panahon sa moabut nga mga adlaw nga pamalandungan ug iampo ang mahitungod sa Unang Panan-awon. Dapita sila nga isulat ang naa nilang mga hunahuna ug mga pagbati mahitungod sa sagradong kasinatian ni Joseph Smith.

Mga Basahunon sa Estudyante

Joseph Smith—Kasaysayan 1:5–26.
Dieter F. Uchtdorf, “Ang mga Bunga sa Unang Panan-awon,” Liahona, Mayo 2005, 36–38.
Neil L. Andersen, “Joseph Smith,” Liahona, Nov. 2014, 28–31.