Mga Seminary ug mga Institute
Leksyon 3: Si Jehova ug ang Iyang Premortal nga Pagpangalagad

3

Si Jehova ug ang Iyang Premortal nga Pagpangalagad

Pasiuna

Sumala pa sa modernong mga propeta, si Jeskristo “nagtudlo sa mga kamatuoran sa kahangturan, ang pagkatinuod sa atong kinabuhi sa wala pa dinhi sa yuta, ang katuyoan sa atong kinabuhi dinhi sa yuta, ug ang kahimoan alang sa anak nga mga lalaki ug anak nga mga babaye sa Dios sa umaabut nga kinabuhi” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2). Niini nga leksyon, makat-unan sa mga estudyante nga sa kinabuhi sa wala pa dinhi sa yuta, ang ilang pagtuo nga si Jehova (Jesukristo) ang mohimo sa Pag-ula maoy nagtabang nila nga mabuntog si Satanas sa Gubat didto sa Langit. Makita usab sa mga estudyante nga didto sa premortal nga kalibutan, dako kaayo og labaw si Jehova kay sa tanang anak sa Dios kabahin sa tanang balaang mga hiyas.

Pagbasa sa Background

  • Richard G. Scott, “Jesus Christ, Our Redeemer,” Ensign, Mayo 1997, 53–54, 59.

  • “The Father and the Son: A Doctrinal Exposition by the First Presidency and the Quorum of the Twelve Apostles,” Ensign, Abr. 2002, 13–18.

Mga Sugyot alang sa Pagtudlo

Pinadayag 12:7–11; Moises 4:3

Ang tahas ni Jehova sa Gubat sa Langit

Isulat sa pisara ang pulong nga gubat, ug pangutan-a ang mga estudyante unsa nga mga imahe ang ilang mahunahunaan kon maghunahuna sila og gubat. Dayon dapita sila sa pagpakli ngadto sa Pinadayag 12:7, 9 us sa pag-ila sa gubat nga gihulagway didto (ang Gubat sa Langit). Hangyoa ang mga estudyante nga ipasabut unsay ilang pagsabut sa nanghitabo niana nga gubat.

I-display ang mosunod nga pamahayag ni Elder Bruce R. McConkie (1915–85) nga sakop sa Korum sa Napulog Duha ka mga Apostoles, ug pagdapit og estudyante nga mobasa niini og kusog:

Elder Bruce R. McConkie

“Unsa nga matang sa gubat [ang Gubat sa Langit]? Ang mao gihapong matang nga mipatigbabaw sa kalibutan; ang bugtong matang nga mapasiugdahan ni Satanas ug sa espiritung mga binuhat—usa ka gubat sa mga pulong, kagubot mahitungod sa opinyon, kasamok mahitungod sa mga ideya; gubat tali sa kamatuoran ug kasaypanan” (Doctrinal New Testament Commentary, 3 vols. [1965–73], 3:518).

Pangutan-a ang mga estudyante:

  • Sumala ni Elder McConkie, sa unsang paagi ang Gubat sa Langit susama sa gubat nga gipasiugdahan ni Satanas batok sa mga anak sa Dios dinhi sa mortalidad?

Pagdapit og usa ka estudyante sa pagbasa og kusog sa Pinadayag 12:10 ug ang laing estudyante mobasa og kusog sa Moises 4:3. Mahimo nimong isugyot nga i-cross reference kining duha ka tudling pinaagi sa pagsulat sa Moises 4:3 diha sa margin sa ilang mga kasulatan tupad sa Pinadayag 12:10 ug vice versa. Ipasabut nga “ang magsusumbong batok sa atong kaigsoonan” (Pinadayag 12:10) mao si Satanas. Dayon ipangutana:

  • Sumala sa Moises 4:3, giunsa sa pagpapahawa si Satanas sa premortal nga kalibutan?

Hangyoa ang mga estudyante sa pagbasa og hilum sa Pinadayag 12:11. Tabangi nga masulti nila ang usa ka baruganan nga gitudlo niini nga bersikulo pinaagi sa pagpangutana sa mosunod:

  • Unsaon man ninyo sa pag-summarize ang gitudlo sa bersikulo 11 mahitungod sa mga epekto sa Pag-ula ni Jesukristo? (Kinahanglang ma-identify sa mga estudyante ang mosunod nga kamatuoran: Tungod kay napiho man nga makompleto ni Jesukristo ang Pag-ula, ang mga epekto niini didto nang daan sa premortal pa nga kalibutan. Siya ang gipasabut nga “gipatay nga Cordero.gikan sa katukuran sa kalibutan” [Pinadayag 13:8; tan-awa usab sa Mosiah 4:7; Moises 7:47].)

  • Unsaon ninyo sa paggamit ang narekord sa Pinadayag 12:11 aron sa pagtabang sa inyong personal nga pakiggubat batok ni Satanas niining kinabuhia? (Human motubag ang mga estudyante, isulat sa pisara ang mosunod nga baruganan: Mabuntog nato si Satanas pinaagi sa pagsalig kang Jesukristo, nga maoy mihimo sa Pag-ula, ug pinaagi sa pagpamatuod ug pagkamatinuoron sa atong pagpamatuod.)

Abraham 3:15–25; Doktrina ug mga Pakigsaad 138:55–56

Milabaw gayud si Jehova kanato sa tanang butang

Sultihi ang mga estudyante nga didto sa premortal nga kinabuhi, nangandam na kita sa pag-anhi sa kalibutan. I-display ang mosunod nga pamahayag ni Propeta Joseph Smith (1805–44), ug hangyoa ang usa ka estudyante sa pagbasa niini og kusog:

Prophet Joseph Smith

“Ang Dios mismo sa kaugalingon, nakakita nga siya anaa sa taliwala sa mga espiritu [o mga espiritu nga binuhat] ug kahimayaan, tungod kay siya mas labaw pa ka maalamon, nakakita nga angayan sa pagmugna og mga balaod diin ang uban makabaton og kahigayunan sa pag-uswag sama sa iyang kaugalingon. Ang pakigsuod nga atong naangkon uban sa Dios nagbutang kanato sa sitwasyon nga mouswag diha sa kahibalo. Aduna siyay gahum sa pagmugna og mga balaod aron sa pagtudlo sa mas huyang nga salabutan, nga unta mahimo silang mahimaya uban sa iyang kaugalingon” (Mga Pagtulun-an sa mga Presidente sa Simbahan: Joseph Smith [2007], 251).

I-follow up pinaagi sa pagpangutana sa mga mosunod:

  • Unsa ang inyong nakat-unan gikan sa pamahayag ni Joseph Smith mahitungod sa tinguha sa Langitnong Amahan para kanato? (Gusto sa Langitnong Amahan nga molambo ug motubo ang atong espiritwalidad—nga mas mahisama Kaniya.)

Isulat sa pisara ang mosunod nga mga pangutana, ug hangyoa ang mga estudyante nga tun-an ang Abraham 3:24–25 sa pagdiskubre sa mga tubag:

  • Kinsa ang “usa nga nagtindog uban kanila nga sama sa Dios”? (bersikulo 24).

  • Unsa nga tahas ang iyang gidala?

  • Unsay giingon niya nga katuyoan sa mortalidad?

Human sa igo nga panahon, hangyoa ang mga estudyante sa pagpaambit sa ilang mga tubag ngadto sa klase. Dayon dapita ang mga estudyante sa pag-search sa Doktrina ug mga Pakigsaad 138:55–56 para sa mga panabut mahitungod sa unsay nahimo sa pag-andam sa mga anak sa Dios aron molampus sa mortalidad. Aron matabangan ang mga estudyante sa pagpahisama niining tudling diha sa ilang kaugalingon, pangutan-a:

  • Sumala niini nga mga bersikulo, giunsa nato sa pag-andam aron maanhi sa kalibutan?

Dapita ang mga estudyante sa pagpamalandong og makadiyot kon unsang mga hiyas ang gibatunan sa Manluluwas sa premortal nga kalibutan. Dapita ang usa ka estudyante sa pagbasa og kusog sa Abraham 3:19, 21. Hangyoa ang klase sa pagsunod, nga mangita sa kon unsay gitudlo mahitungod kang Jesukristo. Human motubag ang mga estudyante, hatagi ang mga estudyante og kopya sa mosunod nga pamahayag ni Elder Neal A. Maxwell (1926–2004) ug ni Elder Bruce R. McConkie (1915–85) sa Korum sa Napulog Duha ka mga Apostoles. Ipabasa nila ang mga pamahayag ug sa pagmarka sa mga pulong nga nagtudlo mahitungod sa Manluluwas:

Elder Neal A. Maxwell

“Pinaagi sa salabutan ug sa kahimoan, dako og labaw si [Jesukristo] sa tinagsa ug sa dinaghang kapasidad ug mga kalampusan sa tanang buhi kaniadto, karon ug sa umaabut! (Tan-awa sa Abr. 3:19.)” (Neal A. Maxwell, “O, Divine Redeemer,” Ensign, Nob. 1981, 8).

Elder Bruce R. McConkie

“Kay ubos man sa balaod, ug tungod sa kabubut-on, ang tanang espiritu sa katawhan, samtang didto pa sa iyang Mahangturong Presensya, mipalambo og mga potensyal, talento, kapasidad, ug mga abilidad sa bisan unsang matang, ug ang-ang. Atol sa taas nga pagpakabuhi didto, ang walay kinutubang mga talento ug mga abilidad naporma. …

“Gitugahan kitang tanan sa Ginoo og kabubut-on: gihatagan ta Niya og mga balaod nga maghimo nga kita molambo og mouswag ug mahimong sama kaniya; ug mitambag siya ug miawhag kanato nga ipadayon ang dalan padulong sa himaya ug kahimayaan. Siya mismo ang lawas ug hulagway sa tanang maayo nga butang. Ang tanang kinaiya ug hiyas nga angay tinguhaon anaa kaniya sa mahangturon niyang kahingpitan. Ang tanan sa masulundon niyang mga anak nahimong sama kaniya sa lain-laing pamaagi. Dunay dagkong kalainan ug ang-ang sa talento ug abilidad tali kanato didto sama sab karon dinhi. May pipila nga milabaw sa ubang paagi, ang uban sa laing paagi usab. Ang Unang Natawo milabaw kanatong tanan sa tanang butang” (Bruce R. McConkie, The Mortal Messiah, 4 vols. [1979–81], 1:23).

I-follow up pinaagi sa pagpangutana sa mga estudyante unsay para nila importante kaayo niini nga pamahayag. Kon gikinahanglan, pangutan-a:

  • Unsay inyong nakat-unan gikan niining duha ka Apostoles mahitungod sa mga talagsaon nga hiyas ni Jehova sa premortal nga kalibutan? (Kinahanglang masabtan sa mga estudyante nga sa premortal nga kalibutan, milabaw si Jehova sa daghang kapasidad ug mga kalampusan sa tanang anak sa Langitnong Amahan.)

Hatagi ang mga estudyante og pipila ka minutos nga mapamalandungan ang premortal nga pangalagad sa Manluluwas ug sa pagsulat og bisan unsa nga naa nilang mga hunahuna ug pagbati. Dapita ang pipila kanila nga mopaambit sa klase unsay ilang gisulat. Tapusa ang leksyon pinaagi sa pag-awhag sa mga estudyante sa paghunahuna kon sa unsang paagi ang pagkahibalo sa premortal nga pagpangalagad ug sa mga talagsaong hiyas sa Manluluwas makatabang nga mabatunan nila ang mas dakong gugma ug pagtuo Kaniya.

Mga Basahunon sa Estudyante