Gituman ni Jesukristo ang Tanang Pagkamatarung

Pasiuna

Gipuy-an ni Jesukristo ang usa ka hingpit nga kinabuhi pinaagi sa pagtugyan ngadto sa kabubut-on sa Langitnong Amahan sa tanang butang. Mipamatuod ang modernong mga propeta: “Bisan og walay sala, [si Jesukristo] gibunyagan aron sa pagtuman sa tibuok pagkamatarung” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2). Sama sa Manluluwas, matuman nato ang pagkamatarung kon motugyan kita ngadto sa mga ordinansa ug mga pakigsaad sa walay katapusang ebanghelyo. Kini nga leksyon magsuhid kon sa unsang paagi mitugyan ang Manluluwas ngadto sa walay katapusang ebanghelyo ug kon sa unsang paagi nato masunod ang Iyang ehemplo.

Pagbasa sa Background

Robert D. Hales, “The Covenant of Baptism: To Be in the Kingdom and of the Kingdom,” Ensign, Nob. 2000, 6–9.

Mga Sugyot alang sa Pagtudlo

Mateo 3:13–17; 2 Nephi 31:4–9

Ang bunyag ni Jesukristo

Ipahunahuna sa mga estudyante ang mosunod nga sitwasyon:

Atol sa pagpakig-istorya sa usa ka higala mahitungod sa relihiyon, nahisgutan ang mahitungod sa bunyag. Human ninyo mapasabut kon nganong bunyagan kita, nangutana ang inyong higala, “Akong nasabtan nga bunyagan ta aron malimpyuhan sa sala. Apan perpekto si Jesus; wala man siyay sala. Nganong gibunyagan pa man Siya?”

Hatagi og panahon ang mga estudyante sa pagkonsiderar niini nga pangutana, dayon dapita sila sa pagtubag.

Human sa pipila ka diskusyon, dapita ang usa ka estudyante sa pagbasa og kusog sa Mateo 3:13–17, o ipasalida ang “The Baptism of Jesus” (2:55) gikan sa Bible Videos nga The Life of Jesus Christ. (I-download ug i-preview ang video sa dili pa magklase.) Kon ipasalida nimo ang video, dapita ang mga estudyante sa pagsunod gamit ang ilang mga kasulatan.

Human mapasalida ang video, ipangutana:

Unsa ang gihatag ni Jesus nga rason sa Iyang pagpabunyag? (Ikonsiderar nga isulat sa pisara ang mosunod nga doktrina: Gibunyagan si Jesukristo aron sa pagtuman sa [tanang] pagkamatarung.)
Unsa kaha ang buot ipasabut nga gibunyagan si Jesus “sa pagtuman sa [tanang] pagkamatarung”? (Mateo 3:15).

Aron matabangan ang mga estudyante nga matubag kining pangutana, hatagi sila’g panahon sa pagsiksik sa ilang mga kasulatan. Mahimo kang mosugyot nga isulat nila ang 2 Nephi 31:4–9 sa margin sa ilang mga kasulatan tupad sa Mateo 3:15. Ipabasa og hilum sa mga estudyante ang 2 Nephi 31:5–6, nga timan-an unsay gipangutana ni Nephi. Human sa igong panahon, ipasabut nga gitubag ni Nephi kini nga pangutana sa 2 Nephi 31:7–9. Dapita ang usa ka estudyante sa pagbasa og kusog niini nga mga bersikulo, ug hangyoa ang klase sa pagsunod ug pag-identify sa mga paagi giunsa sa pagtuman sa Manluluwas ang tanang pagkamatarung pinaagi sa pagpabunyag. Mahimo nimong isugyot nga ilang markahan unsay ilang nakit-an. Samtang ipaambit sa mga estudyante unsay ilang na-identify, isulat sa pisara ang mosunod nga mga pamahayag:

Gipaubos Niya ang iyang kaugalingon sa atubangan sa Amahan.

Misaksi Siya sa Amahan nga sundon Niya ang Iyang mga sugo.

Gipakita Niya sa mga tawo ang ganghaan diin sila makasulod sa celestial nga gingharian.

Gipakita Niya ang usa ka ehemplo para kanato.

(Pahinumdom: Kini nga kalihokan magtugot nga mapraktis sa mga estudyante ang kahanas sa pagtuon sa kasulatan sa paghimo og mga lista, sa pagtabang nila nga maka-identify og key points nga gustong ipasabut sa tigsulat sa kasulatan.)

Pahinumdumi ang mga estudyante mahitungod sa gipangutana ni Nephi (tan-awa sa bersikulo 6). Dayon ipangutana:

Sa paghunahuna sa mga item nga naa sa pisara, sa unsang paagi ang bunyag ni Jesukristo nakahatag og ehemplo kon unsay ipasabut sa pagkamatarung?

Samtang motubag ang mga estudyante, siguroa nga ma-identify ug mahisgutan ang mosunod nga mga ideya (mahimo nimong pulihan niini ang mga item nga naa sa pisara):

Ang pagkamatarung maglakip sa mapaubsanong pagpahiuyon sa kabubut-on sa Amahan.

Ang pagkamatarung maglakip sa pagpakigsaad uban sa Amahan sa pagsunod sa Iyang mga sugo.

Ang pagkamatarung maglakip sa pagdawat sa mga ordinansa sa kaluwasan.

Ang pagkamatarung maglakip sa pagsundod sa ehemplo nga gitakda ni Jesukristo.

Pangutan-a ang klase:

Sa unsang paagi atong magamit sa kaugalingon natong kinabuhi ang ehemplo ni Jesus sa pagkamatarung?

Ipamatuod sa imong klase nga, sama nato, si Jesus ubos sa tanang mga kinahanglanon ug mga kondisyon sa plano sa Langitnong Amahan. Ang hingpit Niya nga kinabuhi usa ka ehemplo nga angay natong tinguhaon nga masunod.

2 Nephi 31:10–21

Pagsunod sa ehemplo sa Manluluwas

Dapita ang usa ka estudyante sa pagbasa og kusog sa 2 Nephi 31:10–12. Pangutan-a ang klase:

Sa bersikulo 10, unsa nga imbitasyon ang gihatag sa Manluluwas kanatong tanan?
Sumala niini nga mga bersikulo, unsay giingon ni Jesus nga angay natong buhaton sa pagsunod Kaniya?

Ipabasa og hilum sa mga estudyante ang 2 Nephi 31:16–17. Dayon ipangutana:

Unsa pay angay natong buhaton aron masunod ang ehemplo sa Manluluwas?
Unsay buot ipasabut sa paglahutay hangtud sa katapusan ug pagsunod “sa ehemplo sa Anak sa buhi nga Dios”? (bersikulo 16). (Mahimo nimong hatagan og emphasis ang pulong nga buhata sa bersikulo 17. Ipasabut usab ang mosunod nga baruganan: Kon sundon nato ang ehemplo ni Jesukristo; matuman nato ang tanang pagkamatarung, sama sa Iyang gihimo.)

Pasabta ang mga estudyante nga ang kasulatan nga ilang gibasa sa 2 Nephi 31 naglangkob sa kahulugan sa walay katapusang ebanghelyo, nga giestablisar sa Langitnong Amahan sa wala pa buhata ang kalibutan.

Dapita ang mga estudyante nga i-analisar ang Mga Taga-Roma 6:3–6, nga mangita sa mahinungdanon nga mga pulong o mga pulong nga nagmatuod nga ang pagsunod sa ehemplo ni Jesukristo nagkinahanglan og sobra pa kay sa pagpabunyag. Mahimo nimong isugyot nga markahan sa mga estudyante ang ilang mga nakit-an.

Hatagi ang mga estudyante og kopya sa mosunod nga pamahayag ni Elder Robert D. Hales sa Korum sa Napulog Duha ka mga Apostoles, ug ipabasa kini nila og hilum. Dapita sila sa pagkonsiderar sa unsang paagi ang kaugalingon nilang mga bunyag miimpluwensya sa ilang kinabuhi.

“Kon kita nakasabut sa atong pakigsaad sa bunyag ug sa gasa sa Espiritu Santo, kini mousab sa atong kinabuhi ug moestablisar sa atong hingpit nga pagkamaunungon sa gingharian sa Dios. Kon ang mga tintasyon moabut, kon kita maminaw, ang Espiritu Santo mopahinumdom nato nga kita misaad sa paghinumdom sa atong Manluluwas ug pagtuman sa mga sugo sa Dios. …

“Kon sundon nato ang ehemplo ni Jesus, gipakita usab nato nga maghinulsol kita ug magmasulundon sa pagtuman sa mga sugo sa atong Amahan sa Langit. Gipaubos nato ang atong kaugalingon uban ang usa ka masulub-ong kasingkasing ug mahinulsulong espiritu samtang atong giila ang atong mga sala ug magtinguha og kapasayloan sa atong mga kalapasan (tan-awa sa 3 Ne. 9:20). Nakigsaad kita nga kita andam nga modala sa atong kaugalingon sa pangalan ni Jesukristo ug sa kanunay mohinumdom Kaniya. …

“… Akong pag-ampo nga ang matag usa kanato isip mga miyembro sa Iyang gingharian makasabut nga ang atong bunyag ug kumpirmasyon mao ang ganghaan pasulod sa Iyang gingharian. Kon mosulod kita, nakigsaad kita nga mosulod sa Iyang gingharian—sa kahangturan!” (“The Covenant of Baptism: To Be in the Kingdom and of the Kingdom,” Ensign, Nob. 2000, 7–8, 9).

Ipangutana sa mga estudyante ang mosunod:

Sa unsang paagi ang pagpabunyag nakatabang ninyo nga masunod ang ehemplo ni Jesukristo sa pagtuman sa tanang pagkamatarung?

Hatagi og panahon ang mga estudyante nga mapamalandungan kon unsa kamaayo ang pagsunod nila sa mga sumbanan sa pagkamatarung nga gipakita sa Manluluwas atol sa pagbunyag Kaniya. Hangyoa ang mga estudyante nga pamalandungan kon unsa pay ilang mahimo aron ikapakita ang pagkamasulundon ngadto sa Langitnong Amahan.

Mga Basahunon sa Estudyante

Mateo 3:13–17; 2 Nephi 31:4–21.
Robert D. Hales, “The Covenant of Baptism: To Be in the Kingdom and of the Kingdom,” Ensign, Nob. 2000, 6–9.