Leksyon 27: Si Jesukristo Mao ang Kahayag, Kinabuhi, ug Paglaum sa Kalibutan
27
Si Jesukristo Mao ang Kahayag, Kinabuhi, ug Paglaum sa Kalibutan
Pasiuna
Si Jesukristo “ang kahayag, ang kinabuhi, ug ang paglaum sa kalibutan” (“Ang Buhi nga Kristo: Ang Pagpamatuod sa Buhing mga Apostoles,” Ensign o Liahona, Abr. 2000, 3). Kini nga leksyon makatabang sa mga estudyante aron makasabut nga kon moduol sila kang Kristo, madawat nila ang nagtubo nga paglaum alang sa kinabuhing dayon ug mabatunan nila ang dugang nga determinasyon sa paglahutay sa mga pagsulay sa kinabuhi.
Background nga Basahunon
Dieter F. Uchtdorf, “Ang Paglaum sa Kahayag sa Dios,”Liahona, Mayo 2013, 70, 75–77.
Dieter F. Uchtdorf, “Ang Walay Kinutuban nga Gahum sa Paglaum,”Liahona, Nob. 2008, 21–24.
Basaha og kusog ang mosunod nga pamahayag ni Presidente Dieter F. Uchtdorf sa Unang Kapangulohan. Hangyoa ang klase sa pagpaminaw sa mga kahimtang nga maghatud sa usa ka tawo sa pagbati nga daw gilibutan sila sa kangitngit:
Imahe
President Dieter F. Uchtdorf
“Akong gihambin ang painting nga naa sa akong opisina nga giulohan og Entrada padulong sa Kahayag. Gihimo kini sa akong amigo, ang Danish artist nga si Johan Benthin, nga unang presidente sa stake sa Copenhagen, Denmark.
“Ang painting nagpakita sa ngitngit nga lawak nga abli ang pultahan diin ang suga nagsiga. Nakapainteres nako nga ang suga gikan sa pultahan wala modan-ag sa tibuok lawak—diha ra sa dapit atubangan sa pultahan.
“Alang nako, ang kangitngit ug kahayag niining painting ang simbolo sa kinabuhi. Kabahin sa atong pagkamortal nga usahay mobati nga daw gilibutan kita sa kangitngit. Tingali nawad-an kita sa atong minahal; ang anak nagpabadlong; tingali kita dunay makahasol nga sakit; dunay mga hagit sa panarbaho ug kahasol tungod sa pagduha-duha o kahadlok; o tingali mibati kita nga nag-inusara o walay nagmahal.
“Apan bisan kon mibati kita nga nawala taliwala sa atong kahimtang karon, ang Dios nagsaad og paglaum sa Iyang kahayag—Siya nagsaad sa pagdan-ag sa dalan ug sa paggiya kanato pagawas sa kangitngit” (“Ang Paglaum sa Kahayag sa Dios,”Liahona, Mayo 2013, 70).
Unsa ang pipila ka kahimtang nga maoy hinungdan diin ang tawo mobati nga gilibutan siya sa kangitngit?
Unsay gisulti ni Presidente Uchtdorf nga mahimo sa Dios kon mobati man kita og sama niini?
Human makatubag ang mga estudyante, pasabta nga kini nga leksyon magtutok kon sa unsang paagi madawat nato ang kahayag sa paglaum gikan sa Dios, bisan sa unsang mga kahimtang.
Ipabasa og kusog sa usa ka estudyante ang Juan 1:1–5. Dapita ang klase sa pagsunod, nga mangita sa mga pulong ug hugpong sa mga pulong nga gigamit ni Juan sa paghulagway sa Manluluwas. Samtang mo-report ang mga estudyante sa ilang nakit-an, isulat sa pisara ang mosunod: Si Jesukristo ang Kahayag sa Kalibutan.
Aron matabangan ang mga estudyante nga mapalawman pa ang ilang panabut niini nga doktrina, ipabasa nila og hilum ang Juan 1:6-9. Dayon ipangutana:
Unsay gitudlo niini nga mga bersikulo mahitungod sa tahas ni Jesukristo isip Kahayag sa Kalibutan?
Sa unsang paagi ang Juan 12:46 ug ang Doktrina ug mga Pakigsaad 84:46 makatabang aron imong masabtan sa unsang paagi si Jesukristo mamahimong Kahayag sa Kalibutan sa tanang indibidwal?
Sultihi ang mga estudyate nga diha sa mga kasulatan, ang kahayag “nga nagaiwag sa matag usa ka tawo” (Juan 1:9), o ang Kahayag ni Kristo, “usahay gitawag nga Espiritu sa Ginoo, ang Espiritu sa Dios, ang Espiritu ni Kristo, o ang Kahayag sa Kinabuhi” (Matinud-anon sa Tinuhoan: Usa ka Pakisayran sa Ebanghelyo [2004], 66). Ang Kahayag ni Kristo gihulagway sa Doktrina ug mga Pakigsaad 88.
Ipares-pares ang mga estudyante sa ilang pagtrabaho. Patun-a sila sa Doktrina ug mga Pakigsaad 88:6–13 ug ipapangita kon sa unsang paagi nga si Jesukristo mao ang tinubdan sa kahayag ug kinabuhi. Human sa igong panahon, ipangutana ang mosunod:
Sa unsang paagi ang Kahayag ni Kristo miimpluwensya sa tanang minugna sa Langitnong Amahan?
Unsa ang gisulti niining narekord nga mga kamatuoran nga mahimo sa Kahayag ni Kristo para sa usa ka indibidwal?
Nganong makatabang ang pagkasabut nga ang kahayag nga nagdumala sa uniberso “sama ra nga kahayag nga nakapadugang sa atong mga salabutan”? (D&P 88:11).
I-display ang mosunod nga pamahayag ni Presidente Dieter F. Uchtdorf, ug ipabasa kini og kusog sa usa ka estudyante:
Imahe
President Dieter F. Uchtdorf
“Ang kahayag sa Dios tinuod. Kini maangkon natong tanan! Mohatag kini og kinabuhi sa tanang butang [tan-awa sa D&P 88:11–13]. Kini dunay gahum sa pag-alim sa lawom nga samad. Kini ang tambal sa pag-inusara ug sakit sa atong mga kalag. Sa mga tudling sa kawalay paglaum, makatisok kini sa liso sa mas hayag nga paglaum. Makadan-ag kini sa kinahiladmang walog sa kasubo. Makalamdag kini sa dalan ug makagiya nato tabok sa kangitngit paingon sa saad sa bag-ong banag-banag.
“Kini ‘ang Espiritu ni Jesukristo,’ nga naghatag og ‘kahayag ngadto sa matag tawo nga mianhi nganhi sa kalibutan’ [D&P 84:45–46]” (“Ang Paglaum sa Kahayag sa Dios,” Mayo 2013, 75).
Hisguti ang mosunod nga mga pangutana sa imong klase:
Sumala ni Presidente Uchtdorf, unsa nga mga panalangin ang naggikan sa kahayag nga gitanyag sa Amahan sa Langit kanato pinaagi ni Jesukristo?
Kanus-a kamo nakasinati sa mga panalangin nga gihisgutan ni Presidente Uchtdorf?
Isulat sa pisara ang mosunod nga dili kompleto nga pamahayag:
Ang Kahayag sa Kalibutan naghatag og …
Dapita ang mga estudyante sa pagbasa og balik sa Doktrina ug mga Pakigsaad 88:13, nga mangita sa mga pulong nga mokompleto sa pamahayag nga naa sa pisara. Ipangutana:
Sa unsang paagi ang tahas sa Manluluwas isip Kahayag sa Kalibutan may kalabutan sa Iyang tahas isip ang Kinabuhi sa Kalibutan?
Sa unsang mga paagi ang kahayag may relasyon sa kinabuhi? (Mahimo nimong ipasabut nga si Jesus mao ang “kinabuhi sa kalibutan tungod kay ang iyang pagkabanhaw ug iyang pag-ula miluwas kanato gikan sa pisikal ug espiritwal nga kamatayon” [Dallin H. Oaks, “The Light and Life of the World,” Ensign, Nob. 1987, 65].)
Unsa kahay resulta kon ang kahayag ug gahum sa Manluluwas mohunong sa pagsuporta sa tanang butang? (Wala nay kinabuhi.)
Ipasabut nga ang mga kasulatan naghatag og mga ehemplo kon sa unsang paagi si Jesus mao ang tinuoray nga Kahayag sa Kalibutan. Niadtong namatay ang Manluluwas, dunay tulo ka adlaw nga kangitngit, nagsimbolo nga ang Kahayag sa Kalibutan mibiya sa kalibutan (tan-awa sa 3 Nephi 8:20–23). Sa laing bahin, ang pagkatawo sa Manluluwas gidunganan og bitoon ug labihang kahayag sa kalangitan ug usab tulo ka adlaw nga kahayag (tan-awa sa Helaman 14:3–5; 3 Nephi 1:15, 21).
Pasabta ang mga estudyante nga ang termino nga paglaum dunay daghang kahulugan. Sa konteksto sa ebanghelyo ni Jesukristo, ang paglaum mao ang “masaligon nga pagpaabut ug paghandom alang sa gisaad nga mga panalangin sa pagkamatarung” (Giya ngadto sa mga Kasulatan, “Paglaum”; scriptures.lds.org). Ang Manluluwas usahay tawagon og “ang paglaum sa kalibutan” tungod kay ang gisaad nga mga panalangin sa pagkamatarung moabut kanato pinaagi Kaniya” (“Ang Buhi nga Kristo: Ang Pagpamatuod sa mga Apostoles,”Liahona, Abr. 2000, 3).
I-display sa pisara ang mosunod nga mga pangutana ug mga pakisayran sa kasulatan, o isulat kini sa pisara:
Bahina ang klase ngadto sa gagmayng mga grupo. Dapita ang mga grupo nga tun-an ang matag scripture passage, mangita sa importanting mga pulong ug hugpong sa mga pulong mahitungod sa paglaum, ug sa paghisgot sa ilang mga tubag sa mga pangutana. Human sa igong panahon, hangyoa ang grupo sa paghimo og usa o duha ka mga pamahayag sa doktrina o baruganan nga nag-summarize unsay ilang nakat-unan mahitungod sa doktrina sa paglaum. Dapita ang mga grupo sa pagpaambit sa ilang mga pamahayag diha sa klase. Siguradoa nga masabtan sa mga estudyante nga ang paglaum mao ang pagbaton og pagsalig, nga pinaagi sa Pag-ula ni Jesukristo ug pagkamasulundon sa mga sugo, madawat nato ang mga gisaad nga panalangin sa Dios, lakip ang mahangturong kinabuhi. Kon itugot sa oras, mahimo ninyong hisgutan ang mosunod nga mga pangutana:
Unsay gipasabut diha ninyo sa pulong nga kasiguroan nga naa sa mga pulong nga “tingali uban sa kasiguroan molaum alang sa maayo nga kalibutan” (Ether 12:4)? (Kasiguroan, kamasaligon, o kasiguradoan. Mahimong mosugyot ka nga isulat sa mga estudyante kini nga depinisyon diha sa margin sa ilang mga kasulatan tupad sa Ether 12:4.)
Sa unsang paagi ang paglaum, sigun sa gihulagway niini nga mga bersikulo, mamahimong “kalig-on ngadto sa mga kalag sa mga tawo” ug makatabang nga kita “lig-on ug makanunayon, sa kanunay puno sa maayo nga mga buhat”? (Ether 12:4).
I-display ang mosunod nga pamahayag, ug ipabasa kini og kusog sa usa ka estudyante:
“Kon aduna kitay paglaum, mosalig kita sa mga saad sa Dios. Aduna kitay igong kasiguroan nga kon kita mohimo og ‘mga buluhaton sa pagkamatarung,’ kita ‘makadawat sa [atong] ganti, gani ang kalinaw niini nga kalibutan, ug kinabuhi nga dayon sa kalibutan nga umaabut’ (D&P 59:23). Gitudlo ni Mormon nga ang ingon niana nga paglaum moabut lamang pinaagi sa Pag-ula ni Jesukristo [tan-awa sa Moroni 7:41]” (Matinud-anon sa Tinuhoan: Usa ka Pakisayran sa Ebanghelyo [2004], 103).
Sa unsang paagi ang atong pagtuo kang Jesukristo ug sa Iyang Pag-ula mahinungdanon alang sa pagpalambo og tinuod nga paglaum? Sa unsang paagi kini makatabang kaninyo sa pagsabut nganong si Jesukristo mao ang paglaum sa kalibutan? (Kon maglaum kita kang Jesukristo, makita nato ang lapas pa sa atong mortal nga mga kasamok ug kasubo ug matutukan nato ang mga panalangin nga anaa pinaagi sa Iyang Pag-ula, sama sa pagkabanhaw ug kinabuhing dayon.)
Unsa kahay inyong buhaton aron magpakabuhi uban sa mas dako nga paglaum niining kinabuhia?
Kon gidasig sa Espiritu Santo mahimo nimong hangyoon ang mga estudyante nga ipaambit nila ang panahon dihang ang ilang paglaum sa pagkabanhaw ug kinabuhing dayon pinaagi ni Jesukristo usa ka panalangin sa ilang kaugalingon o sa uban.