Leksyon 20: Nangalagad ang Manluluwas ngadto sa Iyang ‘Uban nga Karnero’
20
Nangalagad ang Manluluwas ngadto sa Iyang “Uban nga Karnero”
Pasiuna
Sigun sa gisaksi diha sa “Ang Buhi nga Kristo: Ang Pagpamatuod sa mga Apostoles,” ang Manluluwas “usab nangalagad sa Iyang ‘laing karnero’ (Juan 10:16) sa karaang America” (Liahona, Abr. 2000, 3; tan-awa usab sa 3 Nephi 11:1–17). Kon tun-an nato ang rekord sa Basahon ni Mormon mahitungod sa pangalagad sa Manluluwas, atong makat-unan kon giunsa Niya sa pagpangalagad sa Iyang mga disipulo sa matag nasud ug sa pagtinguha nga mabayaw ug maalimahan sila sa tinagsa-tagsa.
Background nga Basahunon
Ronald A. Rasband, “One by One,” Ensign, Nob. 2000, 29–30.
Gitudloan ni Jesukristo ang mga Judeo mahitungod sa Iyang “uban nga mga karnero”
Imahe
map of world
Pag-display og globe o mapa sa kalibutan, ug pagdapit og usa ka estudyante nga pangitaon kon asa gihimo ni Jesukristo ang Iyang pagpangalagad tali sa mga Judeo (ang modernong adlaw nga nasud sa Israel sa Middle East). Hangyoa ang mga estudyante sa pagpakli sa Juan 10 ug ipasusi ug maayo ang pipila ka bersikulo, nga mangita unsay gitudlo ni Jesus mahitungod sa Iyang kaugalingon ug sa Iyang relasyon niadtong mga misunod Kaniya. Hangyoa sila sa pagreport kon unsay ilang nakit-an. (Kinahanglang mareport sa mga estudyante nga Siya ang Maayong Magbalantay, nga nakaila Siya sa Iyang mga karnero, nakaila sila sa Iyang tingog, ug Siya ang mopundok kanila ngadto sa Iyang toril, ug uban pa). Dayon dapita ang usa ka estudyante sa pagbasa og kusog sa Juan 10:14–16 samtang magsunod ang klase. Pangutan-a ang mga estudyante:
Unsay gisulti sa Manluluwas mahitungod sa Iyang “ubang mga karnero”?
Kinsa ang “ubang mga karnero” nga gipasabut ni Jesukristo?
Dapita ang pipila ka estudyante nga magpuli-puli sa pagbasa og kusog sa 3 Nephi 15:16–21. Dayon ipangutana:
Unsa ang importanting mga kamatuoran ang gipadayag ni Jesus ngadto sa mga Nephite mahitungod sa Iyang “ubang mga karnero”? (Usa ka kamatuoran mao nga dihang namulong si Jesus sa mga Judeo mahitungod sa “ubang mga karnero,” nag-refer siya sa ubang mga tawo kinsa misunod Kaniya, lakip ang mga kaliwatan ni Lehi nga nagpuyo sa kontinente sa America.)
Ngano nga ang mga Judeo sa Jerusalem wala man mahibalo mahitungod sa Iyang “ubang mga karnero”?
Itudlo ang America diha sa mapa, ug dayon ipabasa og hilum sa mga estudyante ang 3 Nephi 16:1–3 ug ang Mosiah 27:30. Human sa igong panahon, ipangutana:
Asa pang dapita ang giingon sa Manluluwas nga ipakita Niya ang iyang kaugalingon sa Iyang katawhan?
Nganong importante man ang pagkahibalo nga ang Manluluwas mobisita sa Iyang “mga karnero” sa ubang mga nasud? (Ipaklaro nga bisan og ang Manluluwas nakabisita na sa ubang tawo o mga nasud nga personal gayud, sa kasagaran mopakita ang Manluluwas sa Iyang kaugalingon pinaagi sa pagpangalagad sa Espiritu Santo. Ipasabut og maayo sa mga estudyante nga pinaagi sa pagpangalagad sa Iyang mga karnero, nagtabang si Jesus nga matuman ang Iyang pakigsaad sa Amahan sa pagpundok nila og balik sa Iyang presensya.)
Ipamatuod nga gihigugma ni Jesukristo ang tanan kanato ug mopakita sa Iyang kaugalingon ngadto sa tanan kinsa giila nga Iyang mga karnero. Tinguha Niya nga mapundok ang tanang anak sa Langitnong Amahan, bisan asa man sila, balik sa presensya sa Amahan.
Gipangalagaran ni Jesukristo sa tinagsa-taga ang Iyang mga sumusunod
Basaha og kusog ang 3 Nephi 11:8–17, ug dapita ang mga estudyante sa pagsunod ug paghunahuna o pag-visualize nga daw naa sila sa templo sa yuta sa Bountiful. Human sa imong pagbasa, pangutan-a ang mga estudyante unsay nakapainteres kaayo kanila mahitungod sa mga pulong ug buhat sa Manluluwas niini nga mga bersikulo. Kon gikinahanglan, pangutan-a ang uban o ang tanan sa mosunod:
Unsa kaha ang gusto ni Jesukristo nga makat-unan sa dakong pundok sa katawhan didto sa templo mahitungod Kaniya nianang adlawa? (Tali sa uban pang kamatuoran, kinahanglang mahibaloan sa mga estudyante ang mosunod: Gipangalagaran sa Manluluwas “sa tinagsa-tagsa” ang Iyang mga sumusunod [3 Nephi 11:15; tan-awa usab sa 3 Nephi 17:21].)
Sa pagkonsiderar nga dunay 2,500 nga tawo sa dakong pundok (tan-awa sa 3 Nephi 17:25), unsay gikatudlo sa pagdapit sa Manluluwas sa matag tawo nga hikapon ang mga samad sa Iyang kilid, mga kamot, ug mga tiil bahin sa Iyang kabalaka sa matag usa kanato?
Sa unsang paagi ang pagdapit ni Jesukristo sa 3 Nephi 11:14 magamit sa matag usa kanato karon?
Sa unsang paagi kaha ang pagkakita ug pagkahikap sa mga samad sa Manluluwas makaapekto kaninyo?
Alang sa usa ka pananglitan sa gihulagway nga interes sa Manluluwas ngari nato sa tinagsa-tagsa, mahimo nimong ipaambit ang mosunod nga kasinatian, sa gisugilon ni Elder Ronald A. Rasband sa Kapangulohan sa Seventy:
Imahe
Elder Ronald A. Rasband
“Atol sa katapusang mga bulan sa among misyon … , nasinati namo ang usa ka hitabo nga nagtudlo og balik niini nga halawom nga baruganan nga ang matag usa kanato nailhan ug gihigugma sa Dios.
“Si Elder Neal A. Maxwell moadto sa New York City para sa pipila ka buluhaton sa Simbahan, ug gipahibalo kami nga gusto sab Niya nga maghimo kami og mission conference. Nalipay kaayo mi nga makabaton niini nga oportunidad nga makadungog gikan sa usa ka pinili sa Ginoo nga sulugoon. Gipapili ko og usa sa among mga misyonaryo nga maoy mohatag sa opening prayer para sa miting. Pwede ra gyud kong modiretso ra og tawag og usa sa mga misyonaryo para sa pag-ampo, apan mibati ko nga kinahanglan kong mamalandong ug mainampuon sa pagpili kinsa ang gusto sa Ginoo nga akong hangyoon. Sa pagtan-aw nako sa listahan sa ngalan sa mga misyonaryo, usa ka ngalan nga klaro kaayo nakong nakita: Elder Joseph Appiah Taga-Accra, Ghana. Siya ang tawo nga akong gibati nga gusto sa Ginoo nga akong paampuon atol sa miting.
“Sa wala pa ang mission conference, may regular kong interbyu ni Elder Appiah ug gisultihan siya sa pag-aghat nga akong nadawat para siya ang mag-ampo. Uban sa katingala ug pagpaubos nga diha sa iyang mga mata, nagsugod siya sa hilabihang pagbakho. Daw nasurprisa ko niini nga reaksyon, misugod ko sa pag-ingon niya nga ok ra kon dili siya ang mag-ampo, dihang giingnan ko niya nga ganahan kaayo siyang mohalad sa pag-ampo, kay ang iyang emosyon naggikan sa iyang gugma kang Elder Maxwell. Giingnan ko niya nga kini nga Apostol espesyal kaayo sa mga Santos sa Ghana ug sa kaugalingon niyang pamilya. Si Elder Maxwell ang mitawag sa iyang amahan sa pagka-district president sa Accra ug maoy nag-seal sa iyang mama ug papa sa Salt Lake Temple.
“Karon, wala gyud koy nahibaloan bisan unsa niining bag-o lang nakong gisaysay mahitungod niini nga misyonaryo o sa iyang pamilya, apan ang Ginoo midasig gayud sa usa ka mission president para sa usa ka misyonaryo aron mahatag ang tibuok kinabuhi nga panumduman ug makalig-on sa pagpamatuod nga kasinatian” (“One by One,” Ensign, Nob. 2000, 29–30).
Hatagi ang mga estudyante og panahon nga makaadto sila og balik sa 3 Nephi 11:15–17. Dayon ipangutana:
Kanus-a kamo mibati nga ang Langitnong Amahan ug si Jesukristo nakaila kaninyo sa personal?
Unsay gihimo sa dakong pundok sa katawhan didto sa templo human nila nadawat ang personal, indibidwal nga mga pagsaksi sa kabalaan sa Manluluwas?
Pangutan-a ang mga estudyante kon duna bay gustong mopamatuod bahin sa Manluluwas ug sa gugma nga ilang gibati gikan Kaniya. Ipamatuod nga bisan og wala nato mahikap sa pisikal ang mga kamot ug tiil sa Manluluwas, sa gihapon mangalagad Siya kanato sa personal nga paagi. Awhaga ang mga estudyante sa pagpamalandong kon sa unsang paagi mapasalamatan nila ang Langitnong Amahan ug si Jesukristo alang sa gugma nga personal nilang gibati gikan Kanila.
Aron matabangan ang mga estudyante nga mahibaloan ang ubang importante nga aspeto sa pagpangalagad sa Manluluwas tali sa mga Nephite, hatagi sila og pipila ka minutos sa pagpangita gamit ang ulohan sa kapitulo sa 3 Nephi 11–28. Ipapangita sa klase ug ipasulat ang importanting mga elemento sa pagpangalagad sa Manluluwas tali sa mga Nephite. Samtang mangita ang mga estudyante, libuta sa paglakaw-lakaw ang kwarto ug obserbahi ang ilang mga nakit-an. Kon dunay maglisud sa pagtubag, awhaga sila sa pagpangita sa usa sa mosunod nga mga tudling (teacher ra ang mogamit sa mga pulong nga naa sa parenthesis):
3 Nephi 11:19–27 (mihatag sa awtoridad sa priesthood sa Iyang mga disipulo)
3 Nephi 19:19–29 (nag-ampo alang sa napulog duha ka mga disipulo nga Nephite)
3 Nephi 20:24–29 (mitudlo bahin sa pakigsaad sa Amahan sa pagpundok sa Israel)
3 Nephi 23 (misugo nga ang pihong mga kasulatan madugang sa rekord sa mga Nephite)
3 Nephi 27:1–10 (misugo nga tawagon sa Iyang ngalan ang Simbahan)
Human sa igo nga panahon, dapita ang mga estudyante nga ipaambit unsay ilang nakit-an sa ilang pagsiksik sa kasulatan. Samtang nagpasabut ang mga estudyante sa mga elemento sa pagpangalagad sa Manluluwas nga ilang napangita, ikonsiderar ang paggamit sa pipila o sa tanang mosunod nga mga pangutana alang sa pagpadayon sa diskusyon sa klase:
Unsa kaha ang epekto niini nga aspeto sa pangalagad sa Manluluwas ngadto sa katawhan?
Nganong makatabang man kaha ang pag-ila ug pagtuon sa unsay nahimo ni Jesukristo isip lider o magtutudlo?
Dapita ang mga estudyante nga pamalandungan ang mosunod nga pangutana ug isulat ang ilang mga hunahuna:
Sa pagkonsiderar kon unsay atong natun-an karon, sa inyong pagbati unsa man kaha ang ipabuhat sa Langitnong Amahan kaninyo aron masunod ang ehemplo ni Jesukristo sa inyong pag-alagad sa mga tawo sa inyong palibut, lakip sa mga estranghero, pamilya, mga higala, o niadtong inyong gialagaran sa inyong calling sa Simbahan?
Tapusa pinaagi sa paghatag sa imong pagpamatuod sa mga kamatuoran nga gitudlo sa klase karon.