Mahitungod sa Manluluwas nga si Jesukristo, mipahayag si Propeta Joseph Smith: “Ug karon, human sa daghan nga mga pagpamatuod nga gihatag mahitungod kaniya, kini mao ang pagpamatuod, ang katapusan sa tanan, nga kami naghatag kaniya: Nga siya buhi!” (D&P 76:22). Ang katuyoan niini nga leksyon mao ang pagtabang nga masabtan sa mga estudyante nga buhi ang Manluluwas karon, nga Siya ang atong Manlalaban sa Amahan, ug nga pinaagi sa hugot nga pagtuo Kaniya mamahimo kitang “anak nga mga lalaki ug anak nga mga babaye sa Dios” (D&P 76:24; tan-awa usab sa Mga Taga-Galacia 3:26).
Basaha og kusog ang mosunod nga istorya bahin sa usa ka kasinatian ni Presidente Lorenzo Snow (1814–1901), sigun sa gisaysay sa iyang apo nga babaye nga si Alice Pond:
Imahe
President Lorenzo Snow
“‘Diha sa dako nga koridor padulong ngadto sa lawak sa celestial, naglakaw ako nga una og pipila ka mga lakang ni lolo sa diha nga gipahunong niya ako ug miingon: “Kadiyot lang, Allie, gusto kong mosulti kanimo og usa ka butang. Dinhi gayud nga dapit nga ang Ginoong Jesukristo mipakita kanako sa diha nga si Presidente Woodruff namatay. Siya misugo kanako sa pagpadayon ug sa paghan-ay og usab sa Unang Kapangulohan sa Simbahan diha-diha dayon ug sa dili paghulat sama sa gihimo human sa kamatayon sa naunang mga presidente, ug nga ako ang mopuli ni Presidente Woodruff.”
“‘Dayon si lolo mipaduol og usa ka lakang ug mituyhad sa iyang wala nga kamot ug miingon: “Siya dinhi gayud nagtindog, mga tulo ka pye gikan sa sawog. Ingon og nagtindog Siya diha sa usa ka palid sa solido nga bulawan.”
“‘Misulti kanako si lolo unsa ka mahimayaon nga personahe ang Manluluwas ug gihulagway ang Iyang mga kamot, mga tiil, panagway ug ang matahum nga puting saput, ang tanan usa ka himaya sa pagkaputi ug pagkahayag nga hapit dili siya makatan-aw Kaniya.
“‘Dayon si [lolo] mihimo og laing lakang paduol ug mibutang sa iyang tuo nga kamot sa akong ulo ug miingon: “Karon, apong babaye, gusto ko nga hinumduman nimo nga kini mao ang pagpamatuod sa imong lolo, nga siya misulti kanimo sa iyang kaugalingong ba-ba nga siya nakakita gayud sa Manluluwas, dinhi sa Templo, ug nakigsulti Kaniya nga nag-inatubangay”’ [Alice Pond, in LeRoi C. Snow, “An Experience of My Father’s,” Improvement Era, Sept. 1933, 677]” (Teachings of Presidents of the Church: Lorenzo Snow [2012], 281).
Unsay inyong mga nahunahuna dihang naminaw kamo niini nga istorya?
Sultihi ang mga estudyante nga ang Doktrina ug mga Pakigsaad naglangkob og duha ka istorya bahin sa Manluluwas nga mipakita sa mga tawo sa ulahing mga adlaw: ang usa mao ang pagpakita Niya ni Joseph Smith ug ni Sidney Rigdon sa Hiram, Ohio (tan-awa sa D&P 76), ug ang lain sa Iyang pagpakita ngadto ni Joseph Smith ug ni Oliver Cowdery sa Kirtland Temple (tan-awa sa D&P 110). Isulat ang mosunod nga tulo ka mga pangutana sa pisara:
Unsay ilang nakita? Unsay ilang nadungog? Unsay ilang nakat-unan?
Dapita ang klase sa pagpangita og mga tubag niini nga mga pangutana diha sa mga kasulatan. Ipabasa sa katunga sa klase ang Doktrina ug mga Pakigsaad 76:19–24 ug ang laing katunga sa pagbasa sa Doktrina ug mga Pakigsaad 110:1–4. Human sa igong panahon, dapita ang klase nga ipaambit unsay ilang nakit-an. Isulat sa pisara unsay ilang mga nakit-an ubos sa tukma nga mga pangutana. Dayon ipangutana:
Unsa ang gitudlo niini nga mga bersikulo mahitungod ni Jesukristo? (Posibling lahi-lahi ang maila nga doktrina sa mga estudyante, lakip sa mosunod: Si Jesukristo usa ka buhi, nahimaya nga binuhat; ang atong Langitnong Amahan ug si Jesukristo managlahi nga mga personahe; nga pinaagi sa pagtuo kang Jesukristo ug pagdawat sa Iyang ebanghelyo, mamahimo kitang anak nga mga lalaki ug anak nga mga babaye sa Dios; ug si Jesukrito maoy atong Manlalaban sa Amahan.)
Hatagi og oportunidad ang mga estudyante nga makapaambit sa ilang pagpamatuod bahin niini nga mga doktrina pinaagi sa pagpangutana sa mosunod:
Hain niini nga mga kamatuoran ang makahuluganon kaninyo? Ngano man?
Sultihi ang mga estudyante nga ang nahibilin sa leksyon mag-focus sa duha ka doktrina nga makita diha sa mga tudling nga ilang gibasa: “Si Jesukristo maoy atong Manlalaban sa Amahan” ug “Pinaagi sa atong pagtuo kang Jesukristo ug pagdawat sa Iyang ebanghelyo, mamahimo kitang anak nga mga lalaki ug anak nga mga babaye sa Dios.”
Isulat sa pisara ang pulong nga manlalaban ug pangutan-a ang mga estudyante kon kahibalo ba sila unsay buot ipasabut niini. (Kon gikinahanglan, pasabta unsa ang manlalaban pinaagi sa pagpasabut nga nagpasabut kini sa usa ka tawo nga mosuporta o mohangyo para sa laing tawo.) Dapita ang mga estudyante sa pagbasa og hilum sa Doktrina ug mga Pakigsaad 110:4. Dayon ipangutana:
Sa unsang paagi ang Manluluwas magsilbi nga maoy manlalaban? (Kon mopaambit na ang mga estudyante sa ilang mga hunahuna, pangita og mga oportunidad sa pagpamatuod nga si Jesukristo mao ang atong Manlalaban ngadto sa Langitnong Amahan.)
I-display ang mosunod nga mga pangutana, o isulat kini sa pisara:
Unsa man ang nakapasarang ni Jesukristo aron mahimo natong Manlalaban?
Unsa nga pagtagad ang gihangyo ni Jesus sa Amahan sa paghangyo Niya para kanato?
Patrabahoa nga may kapares ang mga estudyante ug ipapangita ang mga tubag niini nga mga pangutana sa Mga Hebreohanon 4:15; Doktrina ug mga Pakigsaad 29:5; 38:4; ug 45:3–5. Human mabasa sa mga estudyante ang mga tudling ug mahisgutan ang mga pangutana nga naa sa pisara, pagdapit og pipila nga moboluntaryo aron mopaambit sa ilang mga tubag diha sa klase.
Samtang ipasabut sa mga estudyante ang ilang nakat-unan, isiguro nga masabtan nila ang mosunod: kwalipikado si Jesukristo nga mohangyo para kanato atubangan sa Amahan tungod kay hingpit ang Iyang pagkamatarung ug sa ingon niana mahimo Siyang motagbaw sa gipangayo sa kaangayan para sa atong mga sala. Kwalipikado Siya nga mohangyo para kanato tungod sa maayo Niyang mga buhat, sa hingpit Niyang kinabuhi, ug sa Iyang dugo. nga Iyang giula alang kanato. Walay maayong buhat nga atong nahimo nga magtugot nato nga makahangyo para sa atong kaugalingon (tan-awa sa Alma 22:14).
Dapita ang usa ka estudyante sa pagbasa og kusog sa Doktrina ug mga Pakigsaad 45:3-5 samtang magsunod ang klase. Ipasabut nga ang buhat sa Langitnong Amahan ug himaya mao ang kahimayaan sa Iyang mga anak. Sa ingon niana, samtang mohangyo si Jesus para niadtong mga motuo Kaniya, gitabangan Niya nga matuman ang buhat sa Amahan samtang naghatag usab og himaya sa Amahan (tan-awa usab sa Mateo 10:32).
Aron matabangan ang mga estudyante nga masabtan ang buhat ni Jesukristo isip atong Manlalaban, dapita sila sa pagbasa sa mga pulong ni Zenos sa Alma 33:3–10. Hangyoa sila sa pag-ila sa mga pulong nga gibalik-balik ni Zenos (gipalahi-lahi nga “ikaw maloloy-on” ug “ikaw nakadungog sa akong pag-ampo”). Dayon ipangutana:
Unsay nakat-unan ni Zenos mahitungod sa Dios pinaagi sa iyang mga kasinatian pinaagi sa sinserong pag-ampo?
Dapita ang mga estudyante sa pagbasa og kusog sa Alma 33:11. Dayon pangutan-a ang klase:
Kinsa ang gihatagan og pasidungog ni Zenos tungod sa dako kaayong kalooy sa Langitnong Amahan?
Nganong ang Dios nga Amahan wala na mohukom kanato?
Sa unsang paagi ang mga pagtulun-an ni Zenos nakatabang ninyo nga mas makasabut ug makadayeg sa tahas sa Manluluwas isip Manlalaban sa kaugalingon ninyong kinabuhi?
I-display ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
Imahe
Elder D. Todd Christofferson
“Dakong kahulugan ngari nako, nga ako bisan unsa nga higayon ug sa bisan unsang kahimtang makaduol pinaagi sa pag-ampo sa trono sa grasya, nga ang akong Langitnong Amahan maminaw sa akong pangamuyo, nga ang akong Manlalaban, kinsa wala makabuhat og sala, kansang dugo gipaagas, mohangyo alang kanako. (Tan-awa sa D&P 45:3–5.)” (“I Know in Whom I Have Trusted,” Ensign, Mayo 1993, 83).
Paghangyo og usa ka estudyante nga ipasabut niya pinaagi sa kaugalingon niyang mga pulong ang baruganan nga gipangtudlo ni Elder Christofferson. Dayon ipangutana:
Sa unsa kahang paagi nga ang pagbaton og personal nga pagpamatuod niini nga pagtulun-an makatabang atol sa panahon sa imong mga kaluya?
Pinaagi sa pagtuo kang Jesukristo ug pagdawat sa Iyang ebanghelyo, mamahimo kitang anak nga mga lalaki ug anak nga mga babaye sa Dios
Dapita ang usa ka estudyante sa pagbasa og kusog sa Doktrina ug mga Pakigsaad 76:24, ug hangyoa ang klase sa pagsunod. Ipasabut ang mga pulong nga “pinaagi kaniya, ug, ngadto kaniya, ug tungod kaniya … [kita] ang anak nga mga lalaki ug anak nga mga babaye sa Dios.”
Pangutan-a ang mga estudyante:
Unsay buot ipasabut sa pagkahimong “anak nga mga lalaki ug anak nga mga babaye sa Dios”? (D&P 76:24; tan-awa usab sa D&P 25:1).
Siguroa nga masabtan sa mga estudyante nga bisan og kitang tanan espiritung mga anak sa Langitnong Amahan, ang termino nga “anak nga mga lalaki ug anak nga mga babaye sa Dios” piho nga nagpasabut niadtong mga “natawo pag-usab.” Sultihi ang mga estudyante nga ang Basahon ni Mormon mihulagway sa proseso sa pagpakatawo pag-usab.
I-display ang mosunod nga tsart o kopyaha kini sa pisara (ayaw iapil ang materyal nga naa sa parentheses):
Unsa ang andam nga buhaton sa katawhan ni Haring Benjamin?
Unsa ang resulta sa ilang gipangbuhat?
(Misulod sa pakigsaad nga mosunod sa tanang sugo sa Dios)
(Modala diha kanila sa ngalan ni Kristo)
(Mopakita og pagtuo kang Kristo)
(Nausab ang ilang mga kasingkasing)
(Natawo sila kang Kristo)
(Si Kristo nahimo nga ilang Amahan sa Pakigsaad)
Sa daklit i-summarize ang mensahe ni Haring Benjamin diha sa Mosiah 2–4. Dayon ipasabut nga ang mga pulong ni Haring Benjamin dunay mahinuklugong epekto sa iyang katawhan, ug ang Espiritu sa Ginoo nakahimo og “dakong kausaban” sa ilang kasingkasing (tan-awa sa Mosiah 5:2). Dapita ang mga estudyante nga magpares sa pagtuon sa Mosiah 5:2–8, 15, nga mangita sa mga tubag sa mga pangutana nga naa sa tsart. Human sa igong panahon, hangyoa nga ipaambit sa mga estudyante unsay ilang nakit-an. Dayon ipangutana:
Sigun sa unsay inyong nakat-unan mahitungod sa katawhan ni Haring Benjamin, sa unsang paagi mamahimo kamong anak nga lalaki o anak nga babaye ni Kristo? (Kinahanglang mapahayag sa mga estudyante ang mosunod nga baruganan: Kon dawaton nato si Jesukristo ug mohimo og tumanon ang mga pakigsaad sa pagsunod sa mga sugo sa Dios, mamahimo kitang anak nga mga lalaki ug anak nga mga babaye ni Kristo.)
Samtang hisgutan sa mga estudyante kini nga mga bersikulo, tingali posibling magkinahanglan sila og tabang sa pagsabut sa doktrina nga kita mamahimong mga anak ni Kristo. Basaha og kusog ang mosunod nga pagtulun-an gikan ni Presidente Joseph Fielding Smith (1876–1972):
Imahe
President Joseph Fielding Smith
“Ang Manluluwas mamahimo natong Amahan … tungod kay siya naghatag kanato og kinabuhi, kinabuhing dayon, pinaagi sa pag-ula nga iyang gibuhat alang kanato. …
“… Nahimo kitang mga anak, anak nga mga lalaki ug anak nga mga babaye ni Jesukristo, pinaagi sa atong pakigsaad nga magmasulundon kaniya” (Doctrines of Salvation, comp. Bruce R. McConkie, 3 vols. [1954–56], 1:29).
Sumala sa Mosiah 5:15, unsa nga mga panalangin ang atong madawat isip anak nga mga lalaki o anak nga mga babaye ni Jesukristo?
Unsa ang inyong mga hunahuna ug mga pagbati mahitungod sa pagkahimong anak nga lalaki o anak nga babaye ni Jesukristo?
Sa imong pagtapos sa leksyon, awhaga ang mga estudyante sa pagpamalandong kon sa unsang paagi ang ilang kinabuhi napanalanginan gumikan sa pagkahibalo nga buhi ang Manluluwas, nga nagsilbi Siya nga atong Manlalaban ngadto sa Amahan, ug nga kita mamahimong anak nga mga lalaki o anak nga mga babaye sa pakigsaad kang Kristo.