Semana 2: Gipadayon ni Jesukristo ang Paghimo og mga Kaayuhan
11
Gipadayon ni Jesukristo ang Paghimo og mga Kaayuhan
Pasiuna
Gitudlo diha sa “Ang Buhi nga Kristo: Ang Pagpamatuod sa mga Apostoles” nga “[Si Jesus] mipadayon sa paghimog mga kaayohan’ (Mga Buhat 10:38), apan siya gitamay tungod niini” (Ensign o Liahona, Abr. 2000, 2). Isip mga disipulo ni Jesukristo, kinahanglan nga mosunod kita sa Iyang ehemplo sa paghimo og kaayohan bisan sa posiblidad nga lutuson. Niini nga leksyon, hisgutan sa mga estudyante nganong tagdon man nato kadtong dili motagad kanato tungod sa atong mga gituohan pinaagi sa susamang gugma ug pagtahud nga gipakita ni Jesus sa Iyang mga manglulutos. Kon sundon nato ang ehemplo sa Manluluwas, mapanalanginan kita og kaisug sa pagpakabuhi ug pagpanalipud sa atong pagtuo ug matabangan nato ang uban para mas maduol sa Ginoo.
Pagbasa sa Background
Dallin H. Oaks, “Paghigugma sa Uban ug Pagpakabuhi nga may mga Panaglahi,”Liahona, Nob. 2014, 25–28.
Jeffrey R. Holland, “Ang Bili—ug mga Panalangin—sa Pagkadisipulo,”Liahona, Mayo 2014, 6–9.
Robert D. Hales, “Kristohanon nga Kaisug: Ang Bugti sa Pagkadisipulo,”Liahona, Nob. 2008, 72–75.
Gilutos si Jesukristo tungod sa paghimo og mga kaayohan
Sugdi ang klase pinaagi sa pagpangutana sa mga estudyante sa mosunod:
Kon hunahunaon ninyo ang pagka-ehemplo sa kinabuhi sa Manluluwas, unsa sa tanan Niyang gihimo nga kaayohan ang importante kaayo kaninyo?
Human makatubag ang mga estudyante, basaha (o ipaambit sa kaugalingon nimong mga pulong) ang mosunod nga istorya nga gisugilon ni Elder Jeffrey R. Holland sakop sa Korum sa Napulog Duha ka mga Apostoles:
Imahe
Elder Jeffrey R. Holland
“Uban sa pagdayeg ug pag-awhag alang sa tanan kinsa kinahanglan nga magpabiling lig-on niining ulahing mga adlaw, ako moingon sa tanan ug ilabi na sa kabatan-onan sa Simbahan nga kon wala pa kamo tawaga, moabut ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay sa personal nga mga pang-abuso tungod kay kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Ang maong higayon magkinahanglan og kaisug ug maayong pamatasan sa inyong bahin.
“Pananglit, usa ka sister missionary misulat bag-o lang ngari nako: ‘Ang akong kompanyon ug ako nakakita og tawo nga naglingkod sa plasa sa lungsod nga naniudto. Sa among pagduol, mitan-aw siya ug nakita ang among mga missionary name tag. Lain kaayo ang iyang tinan-awan, mitindog siya ug mihunat sa pagsumbag nako. Nakahupo dayon ko, pero iyang gitutho ang iyang gikaon diri nako ug nagsugod sa pagpamalikas kanamo. Mipalayo mi nga walay gisulti. Pagtrapo na nako sa akong nawong, nahikapan nako ang dinugmok nga patatas nga miigo sa luyo sa akong ulo. Usahay lisud nga mahimong misyonaryo kay diha-diha gusto unta akong mobalik, liaban kadtong gamayng tawo, ug ingnon, “NGANO MAN KA!” Apan wala ko kini buhata’” (“Ang Bili—ug mga Panalangin—sa Pagkadisipulo,”Liahona, Mayo 2014, 6).
Ipabasa og hilum sa mga estudyante ang Mateo 5:43–47, nga mangita sa baruganan nga gitudlo ni Jesus sa Iyang Wali sa Bukid nga gibuhat niining mga sister missionaries. (Mahimo nimong isugyot nga, samtang nagbasa ang mga estudyante, nga praktison nila ang pagpahanas sa pagtuon sa kasulatan [scripture study skill] nga mao ang pagpuli sa pangalan aron ma-personalize nila ang mensahe niini nga mga bersikulo. Aron mapraktis kini nga kahanas, kinahanglang ipuli sa mga estudyante ang kaugalingon nilang pangalan para sa mga pulong nga kamo ug kaninyo.)
Unsa ang baruganan nga gitudlo ni Jesus niini nga mga bersikulo? (Mahimong mogamit ang mga estudyante og lahi-lahing mga pulong, apan kinahanglan nga ma-identify nila ang mosunod nga baruganan: Kon anaa kita sa pagsunod sa mga pagtulun-an ni Jesukristo, kinahanglan nga magkat-on kita sa paghigugma sa atong mga kaaway ug magmabination sa mga tawo nga milutos kanato.)
Unsa ang nakapalisud sa pagsunod niini nga baruganan sa ebanghelyo?
Ipasabut nga bisan og gidawat ang Manluluwas sa daghang katawhan sa Galilea ug sa Judea, ug nakita sa daghan ang maayo Niyang mga buhat isip saksi sa Iyang kabalaan, gibugal-bugalan ug gilutos Siya tungod sa Iyang mga maayong buhat.
Sa pisara, isulat ang mosunod nga mga tudling sa kasulatan ubos sa “Si Jesus mipadayon sa paghimog mga kaayohan”:
Bahina ang klase sa ginagmay nga grupo, ug i-assign ang matag grupo nga tun-an ang usa sa mga tudling nga gilista sa pisara. Ipa-identify sa mga estudyante diha sa matag tudling ang gihimong mga kaayohan ni Jesus ug unsay reaksyon sa mga tawo niini. Human sa igong panahon, ipareport sa mga estudyante kon unsay ilang nadiskubrihan. Ipasabut nga kining nagsunod-sunod nga tudling nagpadayag og usa ka sundanan sa kinabuhi sa Ginoo diin kita makakat-on. Ipangutana ang mosunod:
Unsay inyong namatikdan mahitungod sa reaksyon sa Manluluwas bahin sa pagpanglutos nga Iyang nasinati?
Awhaga ang mga estudyante nga ihulagway nila sa ilang hunahuna ang hitabo nga giistorya diha sa scripture passage nga ilang natun-an. Dayon ipangutana:
Unsa kaha ang inyong mga mahunahuna o pagbati kon nakasaksi pa mo kang Jesus niana nga okasyon?
Unsa kaha ang gusto ni Jesus nga inyong makat-unan gikan sa Iyang mga pulong ug mga gihimo nianang higayuna? (Ang mosunod mao ang usa ka baruganan nga mahimong ma-identify sa mga estudyante: Kon maningkamot kita sa pagsunod sa ehemplo sa Manluluwas sa paghimo og kaayohan, usahay gikinahanglan nato nga makalahutay sa pagpanglutos.)
Sultihi ang mga estudyante nga sa Iyang Wali sa Bukid, gitambagan ni Jesukristo ang Iyang mga disipulo unsaon sa pag-atubang ang mga pagpanglutos. Kopyaha sa pisara ang mosunod nga mga pulong ug mga scripture reference, ug i-assign ang matag estudyante sa pagbasa og pinakaminus usa sa mga tudling. Ipa-identify sa mga estudyante diha sa tudling nga ilang gibasa ang usa ka baruganan nga gitudlo ni Jesus nga makagiya kanila sa ilang pakig-atubang sa uban.
Human sa igo nga panahon, hangyoa ang mga estudyante nga ipasabut ang nakit-an nilang mga baruganan ug sa unsang paagi kini ilang magamit sa atong pakigrelasyon sa ubang mga tawo. Samtang ipaambit sa mga estudyante ang mga baruganan nga ilang na-identify sa Mateo 5:21–24, mahimo nimong ipasabut nga sa 3 Nephi 12:22 ug sa Joseph Smith Translation sa Mateo 5 wala iapil ang mga pulong “nga walay hinungdan” (Mateo 5:22; tan-awa usab sa Joseph Smith Translation, Matthew 5:24). (Samtang motubag ang mga estudyante, hatagi og gibug-aton ang mosunod nga kamatuoran: Gilauman sa Langitnong Amahan nga sundon nato ang ehemplo ni Jesukristo kon lutuson man kita tungod sa atong mga gituohan.)
I-display ang mosunod nga mga pamahayag ni Elder Jeffrey R. Holland ug ni Elder Dallin H. Oaks sakop sa Korum sa Napulog Duha ka mga Apostoles:
Imahe
Elder Jeffrey R. Holland
“Panalipdi ang inyong mga gipangtuohan uban sa maayong pamatasan ug kamanggiloy-on, panalipdi kini” (Jeffrey R. Holland, Ang Bili—ug mga Panalangin—sa Pagkadisipulo,”Liahona, Mayo 2014, 9).
Imahe
Elder Dallin H. Oaks
“Ang mga sumusunod ni Kristo kinahanglan nga maoy ehemplo sa kabuotan. Kinahanglang higugmaon nato ang tanan, maminaw og maayo, ug magpakabana sa sinsero nilang mga gituohan. Bisan og supak kita, kinahanglan dili kita makapasakit. Ang atong baruganan ug pagpamulong bahin sa kontrobersyal nga mga hilisgutan kinahanglang dili makagubot. Kinahanglan maayo kita sa pagpasabut sa atong baruganan ug sa paggamit sa atong impluwensya. …
“Kon ang popular nga mga opinyon mosukwahi sa atong mga sumbanan, kinahanglang dawaton nato ang dili maayong mga resulta diha sa kamabination ug magbinuotan sa atong mga kaaway” (Dallin H. Oaks, “Paghigugma sa Uban ug Pagpakabuhi nga may mga Panaglahi,”Liahona, Nob. 2014, 27).
Hisguti kauban sa mga estudyante ang mga hagit ug mga panalangin sa pagsunod sa mosunod nga tambag ni Elder Holland ug Elder Oaks. Dayon dapita ang usa ka estudyante sa pagbasa og kusog sa Mateo 5:9–12.
Sumala niini nga mga bersikulo, unsang mga saad ang gihimo ni Jesus nga makapasayon sa pagsanong sa Kristohanong pamaagi kon lutuson kita tungod sa relihiyuso natong mga gituohan?
Dapita ang mga estudyante sa pagpamalandong kon unsaon nila sa pag-apply ang usa o daghan pang mga pagtulun-an sa Wali sa Bukid sa Manluluwas sa kasamtangan nilang relasyon o sa unsang paagi kaha unta kini ilang nagamit sa nangaging kasinatian. Pangutan-a kon duna bay mga estudyante nga gustong mopaambit sa ilang mga hunahuna diha sa klase.
Hatagi og kopya ang mga estudyante sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:
Imahe
Elder Robert D. Hales
“Ang uban nga mga tawo nagtuo nga ang mga tubag sama sa pagpakahilum, kamapuanguron, pagpasaylo, ug paghatag og yano nga pagpamatuod mao ang mga tubag nga uyon-uyon lang o huyang. Apan, ang ‘paghigugma sa [atong] mga kaaway, pagpanalangin kanila nga nanghimaraut [kanato], pagbuhat og maayo kanila nga nasilag [kanato], ug pag-ampo alang sa magalutos [kanato],’ (Mateo 5:44) nagkinahanglan og hugot nga pagtuo, kalig-on, ug labaw sa tanan, Kristohanong kaisug. …
“Kon dili kita mobalus—kon atong itunol ang pikas natong aping ug mopalayo sa mga pagbati sa kasuko—kita usab nagbarug uban sa Manluluwas. Atong gipakita ang Iyang gugma, nga mao lamang ang bugtong gahum nga makabuntog sa kaaway ug makatubag sa mga tig-akusar kanato sa walay pagbalus og akusar kanila. Dili kana kahuyang. Kana mao ang Kristohanong kaisug. …
“Samtang kita motubag sa uban, ang matag sitwasyon managlahi. “Maayo na lang, ang Ginoo nasayud sa mga kasingkasing sa mga tig-akusar kanato ug unsaon nato sila sa pagtubag sa maayong paagi. Samtang ang tinuod nga disipulo mangayo og giya sa Espiritu, makadawat sila og inspirasyon gikan sa matag panag-abut. Ug sa matag panag-abut, ang tinuod nga mga disipulo motubag sa mga paagi nga modapit sa Espiritu sa Ginoo. …
“Isip tinuod nga mga disipulo, ang una natong hunahunaon mao gayud ang kaayohan sa uban, dili personal nga kaayohan. Ang mga pangutana ug mga pagsaway naghatag kanato og oportunidad sa pagtabang ngadto sa uban ug mopakita nga sila importante sa atong Langitnong Amahan ug kanato. Ang atong tumong mao nga tabangan sila nga makasabut sa kamatuoran, dili ang pagdepensa sa atong kahusto sa usa ka debate sa teyolohiya. Ang atong kinasingkasing nga pagpamatuod mao ang pinakagamhanan nga tubag nga atong mahatag sa mga tig-akusar kanato” (“Krishohanong Kaisug: Ang Bugti sa Pagkadisipulo,”Liahona, Nob. 2008, 72, 73–74).
Hatagi ang mga estudyante og panahon sa pagbasa ug pag-highlight sa mga baruganan nga gitudlo ni Elder Hales. Dapita sila sa pagpaambit kon unsay ilang nakat-unan. Kon gikinahanglan, hisguti ang pipila ka nagsunod nga mga pangutana:
Sa unsang paagi ang atong mga gipangbuhat ngadto sa ubang tawo makaapekto sa ilang relasyon sa Dios? (Tabangi nga ma-identify sa mga estudyante ang mosunod nga baruganan: Kon sundon nato ang ehemplo ni Kristo nga mosanong inubanan sa gugma ug kamabination niadtong mosupak kanato, mapalig-on nato ang ilang relasyon sa Dios ingon man sa atoa.)
Sa unsang paagi ang atong pagtagad sa uban sa ingon niini nga paagi usa ka bahin sa pakigsaad sa bunyag nga atong gihimo uban sa Langitnong Amahan? (Usa kini ka importanting paagi sa pagbarug isip mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit [tan-awa sa Mosiah 18:9].)
Pangutan-a ang mga estudyante kon may mga kasinatian ba sila diin ang pagsunod sa ehemplo sa Manluluwas ug mga pagtulun-an nagtugot nga matabangan nila ang uban nga mas maduol sa Ginoo. Dapita ang pipila ka estudyante sa pagpaambit sa ilang mga kasinatian.
Awhaga ang mga estudyante sa pagsusi sa ilang relasyon ngadto sa uban, mag-identify og usa nga pweding palamboon, ug sa pagsulat unsaon nila sa paggamit ang mga baruganan nga gihisgutan karon bahin niana nga relasyon.