Pasiuna sa Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (Religion 341)

Ang Atong Katuyoan

Ang Tumong sa Seminaries and Institutes of Religion namahayag:

“Ang atong katuyoan mao ang pagtabang sa mga batan-on ug mga young adult nga makasabut ug makasalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], 1).

Aron makab-ut ang atong katuyoan, motudlo kita sa mga estudyante sa doktrina ug mga baruganan sa ebanghelyo nga makita diha sa mga kasulatan ug sa mga pulong sa mga propeta. Ang doktrina ug mga baruganan gitudlo sa paagi nga mogiya ngadto sa pagkasabut ug pagkalig-on. Kita motabang sa mga estudyante nga sila makatuman sa ilang tahas sa proseso sa pagkat-on ug moandam kanila sa pagtudlo sa ebanghelyo ngadto sa uban.

Aron sa pagtuman niini nga mga tumong, ikaw ug ang mga estudyante nga imong gitudloan giawhag sa paglakip sa mosunod nga Mga Sukaranan sa Pagtudlo ug Pagkat-on sa Ebanghelyo samtang dungan kamo nga magtuon sa mga kasulatan:

• “Magtudlo ug magkat-on pinaagi sa Espiritu.

• “Mag-ugmad og usa ka palibut sa pagkat-on sa gugma, pagtahud, ug katuyoan.

• “Magtuon sa mga kasulatan matag adlaw, ug magbasa sa basahon alang sa tun-anan.

• “Mosabut sa konteksto ug sa sulod sa mga kasulatan ug sa mga pulong sa mga propeta.

• “Moila, mosabut, ug mobati sa kamatuoran ug sa importansya, ug mogamit sa doktrina sa ebanghelyo ug mga baruganan.

• “Mopasabut, mopakigbahin, ug mopamatuod sa mga doktrina ug mga baruganan sa ebanghelyo” (Gospel Teaching and Learning, 10).

Kining Mga Sukaranan sa Pagtudlo ug Pagkat-on sa Ebanghelyo gitumong sa “pag-awhag sa mga estudyante nga mahimong aktibo sa ilang tahas sa pagkat-on sa ebanghelyo ug mopalambo sa abilidad sa mga estudyante sa pagsunod sa ebanghelyo ug sa pagtudlo niini ngadto sa uban” (Gospel Teaching and Learning, 10). Ang mga sugyot sa pagtudlo nga gihatag diha sa mga leksyon niining materyal sa magtutudlo nagpakita og mga paagi sa pagkab-ot niini nga mga sangputanan sa imong pagtudlo.

Agig dugang sa pag-apil ug pagtuman sa gihisgutan nga mga sangputanan, kinahanglang imong tabangan ang mga estudyante nga magmatinud-anon sa ebanghelyo ni Jesukristo ug makat-on sa pag-ila sa kamatuoran gikan sa sayop. Ang mga estudyante mahimong adunay mga pangutana mahitungod sa doktrina, kasaysayan, o posisyon sa Simbahan kabahin sa sosyal nga mga isyu. Makaandam ka sa mga estudyante sa pagtubag sa ingon nga mga pangutana pinaagi sa pagtabang kanila sa paggamit sa mga baruganan sa pag-angkon og espirituhanong kahibalo ug sa pagpalambo og doctrinal mastery. (Tan-awa sa Doctrinal Mastery Core Document [2018].)

Si Presidente M. Russell Ballard sa Korum sa Napulog Duha ka mga Apostoles mihatag sa mosunod nga tambag aron sa paggiya sa mga magtutudlo samtang sila maningkamot sa pagtabang sa mga estudyante nga makadawat og mga tubag sa ilang mga pangutana:

“Para kamo makasabut sa doktrinal ug makasaysayanong konteksto sa mga kasulatan ug sa atong kasaysayan, kinahanglan magtuon kamo sa ‘labing maayo nga mga basahon,’ sumala sa gisugo sa Ginoo [tan-awa sa D&P 88:118]. Ang ‘labing maayo nga mga basahon’ naglakip sa mga kasulatan, sa mga pagtulun-an sa modernong mga propeta ug mga apostoles, ug sa labing maayo nga LDS scholarship nga anaa. Pinaagi sa makugihon ninyong paningkamot sa pagkat-on pinaagi sa pagtuon ug pagtuo, matabangan nimo ang imong mga estudyante sa pagkat-on og mga kahanas ug mga kinaiya nga gikinahanglan sa pag-ila tali sa kasaligang mga impormasyon nga makaawhag nila ug sa kulang sa mga kamatuoran ug dili hustong mga interpretasyon sa doktrina, kasaysayan, ug mga binuhatan nga makaluya kanila. …

“Sa pagtudlo sa imong mga estudyante ug sa pagtubag sa ilang mga pangutana, mopasidaan ko nimo ayaw isugilon ang mga istorya nga giingon nga makapasiugdag pagtuo o tabi-tabi o mga napapas nang panabut ug pagpasabut sa atong doktrina ug binuhatan kaniadto. Kanunay nga maalamon nga himoong usa ka batasan ang pagtuon sa pulong sa buhing mga propeta ug mga apostoles; magsunod kanunay sa bag-ong mga isyu, polisiya, ug mga pamahayag sa Simbahan pinaagi sa mormonnewsroom.org ug LDS.org; ug konsultahon ang mga buhat sa lehitimo, mahunahunaon, ug matinud-anong mga LDS scholars sa pagsiguro nga dili nimo matudlo ang mga butang nga dili tinuod, kinaraan, o mga katingad-an, ug lahi” (M. Russell Ballard, “Ang mga Oportunidad ug Responsibilidad sa mga Teacher sa CES sa ika 21 nga Siglo” [gabii kauban sa usa ka General Authority, Peb. 26, 2016]).

Talagsaong mga Aspeto Niini nga Kurso

Ang Kasaysayan sa mga Santos sa Ulahing mga Adlaw: 1815–1846 (Religion 341) lahi gikan sa ubang mga kurso sa institute sa pipila ka paagi. Wala kini gibase sa sunod-sunod nga pagtuon sa teksto sa kasulatan (sama sa Doktrina ug mga Pakigsaad), ni kini gibase sa pagtuon nga adunay tema sa Pagpahiuli (sama sa kurso sa Bato sa Pamag-ang [Cornerstone] nga Mga Pundasyon sa Pagpahiuli. [Religion 225]). Hinoon, kini nga kurso mao ang kronolihiya nga pagtuon sa kasaysayan sa Ang Simbahan ni Jesukristo sa mga Santos sa Ulahing mga Adlaw, sugod sa importante nga mga panghitabo nga misangpot ngadto sa pagka-organisar sa Simbahan niadtong 1830 ug gitapos uban sa pagpahinungod sa Templo sa Nauvoo niadtong 1846.

Bisan og kini nga kurso gidesinyo aron sa pagtabang sa mga estudyante sa pagtuon ug pagpasalamat sa kasaysayan sa Simbahan, importante nga hinumduman nga ang katuyoan gayud niini nga kurso mao ang pagtuman sa mga Tumong sa Seminaries and Institutes of Religion. Sa laing mga pulong, ang tuyo niini nga kurso dili lamang sa pagpaapil sa mga estudyante sa inantigo nga pagtuon sa kasaysayan sa Simbahan apan aron sa pagtabang kanila nga makat-on ug makagamit sa mga pagtulun-an sa ebanghelyo ni Jesukristo ug mahimong mas sama sa ilang Langitnong Amahan.

Kining materyal sa magtutudlo mao ang imong unang kapanguhaan aron matabangan ka sa pag-andam ug sa pagtudlo og epektibo nga leksyon. Ang mga leksyon sa materyal sa magtutudlo nagpresentar og makasaysayanong impormasyon nga makita sa Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw, Volume 1, Ang Sumbanan sa Kamatuoran, 1815–1846; The Joseph Smith Papers; ug lain-laing mga autobiograpiya, sa narekord nga mga handumanan, mga sulat, ug sa ubang unang mga kapanguhaan nga gihimo sa mga indibidwal kinsa adunay kabahin sa unang mga panghitabo sa kasaysayan sa Simbahan. Ang gitudlo nga basahunon sa mga estudyante alang niini nga kurso gikuha gikan sa Mga Santos: Volume 1.

Ang matag leksyon sa kinatibuk-an naghisgot sa sulod sa tukma nga basahunon sa estudyante sa Mga Santos: Volume 1. Hinoon, sa pipila ka mga higayon, ang mga leksyon dili maghisgot sa tanang mga panghitabo sa tukma nga basahunon diha sa Mga Santos: Volume 1 o mahimong maghatag og gibug-aton sa mga panghitabo nga wala mahisguti sa Mga Santos: Volume 1 o gihisgutan lamang sa daklit. Samtang ang mga estudyante mobasa sa Mga Santos: Volume 1 sa gawas sa klase, dungan nilang masundan ang pipila ka aspeto sa istorya pinaagi sa daghang mga kapitulo. Kini makatabang nila nga makasabut sa kinatibuk-an nga linya sa istorya ug gilapdon sa kasaysayan sa Simbahan. Sa klase, ang mga estudyante mas makaapil og maayo sa direkta nga makasaysayanong mga istorya, mga kasulatan, doktrina, ug mga baruganan ug adunay oportunidad sa pagpakigbahin sa ilang mga hunahuna, mga kasinatian, ug mga pagpamatuod uban sa usag usa. Samtang ang mga estudyante magbasa sa gawas sa klase ug moapil sa klase, makakuha sila og kaayohan gikan sa duha ka paagi.

Pagpangandam sa Leksyon

Ang Ginoo misugo nga ang mga kamatuoran sa Iyang ebanghelyo kinahanglan nga itudlo sumala sa “gimando pinaagi sa Espiritu,” nga “ihatag … pinaagi sa pag-ampo diha sa hugot nga pagtuo” (D&P 42:13–14). Samtang ikaw mag-andam sa matag leksyon, sa mainampoong paagi tinguhaa ang giya sa Espiritu.

Isip kabahin sa imong pagpangandam, tun-i ang gitudlo nga basahunon sa estudyante alang sa matag leksyon. Kini makatabang kanimo nga makapamilyar sa pipila ka makasaysayanong impormasyon nga gihisgutan sa matag leksyon ug makatabang usab kanimo sa pagpaabut ug pag-andam sa pagtubag sa mga pangutana sa mga estudyante mahitungod niana nga impormasyon.

Sunod, ribyuha pag-ayo ang materyal sa magtutudlo nga gihatag sa matag leksyon. Ang mga sugyot sa pagtudlo makatabang nimo ug sa imong mga estudyante sa paglakip og daghan sa Mga Sukaranan sa Pagtudlo sa Ebanghelyo ug Pagkat-on ngadto sa matag leksyon. Pananglitan, ang Ginoo misugo nga kadtong kinsa motudlo sa Iyang ebanghelyo nga “magtudlo sa mga baruganan sa akong ebanghelyo” (D&P 42:12). Niini nga kurso, ang doktrina ug mga baruganan unang makita gikan sa mga kasulatan ug sa mga pulong sa mga propeta sa ulahing mga adlaw, bisan og ang gihulagway nga mga baruganan gikuha usab gikan sa lain-laing makasaysayanong mga kapanguhaan. Agig dugang sa mga estudyante nga makahimo sa pag-ila sa doktrina ug mga baruganan, importante nga ang mga estudyante makasabut niini, mobati sa kamatuoran niini ug sa kaimportante pinaagi sa saksi sa Espiritu Santo, ug mogamit niini sa ilang kinabuhi.

Mahimo kang mopili nga gamiton ang tanan o pipila sa mga gisugyot sa piho nga leksyon, ug mahimo nimong ipahiangay ang gisugyot nga mga ideya sumala sa direksyon sa Espiritu ug sa mga panginahanglan ug mga sirkumstansya sa mga estudyante nga imong tudloan. Kon mogamit sa mga sugyot sa pagtudlo o pagpuli og imong kaugalingong mga ideya, siguroha sa pagkonsiderar unsa nga sukaranang sangputanan sa usa ka piho nga sugyot sa pagtudlo ang gitumong nga mahisgutan, ug pagpili og alternatibo nga ideya sa pagtudlo nga makahatag og sama nga sangputanan.

Samtang magplano ka sa matag leksyon, mahimong madiskubrihan nimo nga wala kay igong panahon sa usa ka klasehan aron magamit ang tanang mga sugyot sa pagtudlo sa materyal sa magtutudlo. Tinguhaa ang direksyon sa Espiritu ug mainampuong ikonsiderar ang mga panginahanglan sa imong mga estudyante samtang imong tinuon kon unsa nga bahin sa hut-ong sa kasulatan ang hatagan og gibug-aton aron matabangan ang mga estudyante nga mobati sa kamatuoran ug kaimportante sa mga kamatuoran sa ebanghelyo ug gamiton kini diha sa ilang kinabuhi. Kon kulang ang oras, mahimo nimong ipahiangay ang ubang bahin sa leksyon pinaagi sa daklit nga pag-summarize og usa ka kalihokan o pinaagi sa paggiya sa mga estudyante nga daling mailhan ang usa ka baruganan o doktrina sa dili pa mopadayon sa sunod nga bahin sa leksyon.

Kon magkonsiderar unsaon sa pagpahaum sa mga materyal sa leksyon, siguroha sa pagsunod niini nga tambag gikan ni Presidente Dallin H. Oaks sa Unang Kapangulohan:

“Presidente [Boyd K.] Packer kanunayng nagtudlo, sa akong pandungog, nga una natong hangupon, dayon atong ipahiangay. Kon tinud-anay natong gitutokan ang gitakda nga leksyon nga atong ihatag, nan makasunod kita sa Espiritu nga mopahiangay niini” (“A Panel Discussion with Elder Dallin H. Oaks” [Seminaries and Institutes of Religion satellite broadcast, Ago. 7, 2012]).

Atol sa imong pagpangandam sa leksyon, mahimo nimong gamiton ang Notes tools diha sa ChurchofJesusChrist.org o diha sa Gospel Library app alang sa mga mobile device. Makagamit ka niini nga mga himan sa pagmarka sa mga kasulatan, mga pakigpulong sa komperensya, mga artikulo sa mga magasin sa Simbahan, ug mga leksyon. Makahimo ka usab sa pagdugang ug pag-save og mga mugbong mga sulat aron magamit sa imong mga leksyon. Aron mas makat-on pa kon unsaon sa paggamit niini nga mga himan, tan-awa sa Notes help page sa ChurchofJesusChrist.org.

Giunsa sa Pag-organisar Kini nga Materyal sa Magtutudlo

Ang Religion 341 gihimo isip usa ka semester nga kurso. Kini nga materyal sa magtutudlo naglakip sa 28 ka leksyon. Ang matag leksyon gitumong nga itudlo atol sa 50 minutos nga sesyon sa klase. Kon ang imong klase mag-abut kaduha matag semana, pagtudlo og usa ka leksyon matag sesyon sa klase. Kon ang imong klase magkita kausa lang sa matag semana sulod sa 90 hangtud sa 100 ka minuto, girekomendar nga ikaw motudlo og duha ka leksyon alang sa matag sesyon sa klase.

Ang mga leksyon niini nga materyal sa magtutudlo naglangkob sa mosunod nga mga bahin:

Pasiuna ug Han-ay sa mga Panghitabo [Timeline]

Ang matag leksyon magsugod sa mubo nga pasiuna sa mga panghitabo sa kasaysayan sa Simbahan nga pagatun-an niana nga leksyon. Agig dugang, ang matag pasiuna giubanan sa usa ka timeline. Ang timeline mohatag nimo og kinatibuk-ang pagpasabut sa mga panghitabo sa kasaysayan sa Simbahan nga may kalabutan sa leksyon.

Mga Basahunon sa Estudyante

Gawas sa leksyon 1, ang gitudlo nga mga basahunon sa estudyante alang sa matag leksyon gilista sunod gyud dayon sa pasiuna ug han-ay sa mga panghitabo [timeline]. Awhaga ang mga estudyante sa pag-andam alang sa matag klase pinaagi sa pagkompleto sa mga basahunon sa estudyante gikan sa Mga Santos: Volume 1 sa dili pa moanha sa klase. Kini makatabang sa mga estudyante nga matuman ang ilang katungdanan sa proseso sa pagkat-on. Daghang mga leksyon naghatag og mga sugyot unsaon nimo sa pagsunod sa gitudlo nga mga basahunon sa estudyante pinaagi sa pagdapit sa mga estudyante sa pagpakigbahin unsay ilang nakat-unan. Agig dugang, ang matag leksyon (gawas sa leksyon 28) nagtapos uban sa imbitasyon alang sa mga estudyante sa pag-andam alang sa sunod nga klase pinaagi sa pagkompleto sa gitudlo nga mga basahunon sa estudyante.

Mga Sugyot alang sa Pagtudlo

Ang dakong bahin sa matag leksyon naglakip og mga giya ug mga ideya unsaon nimo sa pagtudlo sa piho nga mga kasaysayan sa Simbahan, lakip sa makasaysayanong impormasyon, mga pakisayran sa kasulatan, mga pangutana, mga kinutlo, mga mapa, mga imahe, mga diagram, mga kalihokan, ug mga handout. Kini nga mga ideya nagpakita unsaon sa pag-apil sa Mga Sukaranan sa Pagtudlo ug Pagkat-on sa Ebanghelyo diha sa imong pagtudlo aron matabangan ang mga estudyante nga mapalig-on ang ilang pagkakabig ngadto sa Ginoo ug sa Iyang ebanghelyo.

Summary base sa Konteksto

Ang makasaysayanong impormasyon ug mga ideya sa pagtudlo nga gipresentar sa matag leksyon sa kasagaran gibahin-bahin ngadto sa mas gagmay nga mga bahin. Ang matag bahin magsugod uban sa usa ka ulohan nga naghatag og summary base sa konteksto sa mga panghitabo nga gihisgutan niana nga bahin sa leksyon.

Doktrina ug mga Baruganan

Diha sa sulod sa matag leksyon, makita nimo nga ang mahinungdanong doktrina ug mga baruganan gipaklaro pinaagi sa pagpabaga sa letra. Kini nga doktrina ug mga baruganan anaa sa kurikulum tungod kay kini mao ang importante nga mga kamatuoran nga makatabang sa mga estudyante nga molig-on ang ilang relasyon sa Ginoo, o kini magamit sa mga panginahanglan ug mga sirkumstansya sa mga estudyante karon. Si Presidente Henry B. Eyring sa Unang Kapangulohan mitambag: “Samtang mag-andam ka og leksyon, pangitaa diha ang makapakabig nga mga baruganan. … Ang makapakabig nga baruganan mao kanang moresulta ngadto sa pagkamasulundon sa kabubut-on sa Dios” (“Converting Principles” [gabii uban sa usa ka General Authority, Peb. 2, 1996], 1). Hibaloi nga kini nga materyal sa magtutudlo wala mosulay sa pag-ila sa tanang doktrina ug mga baruganan nga mahimong itudlo sa pagtuon sa kasaysayan sa Simbahan.

Ang mga sugyot sa pagtudlo niini nga materyal naghatag sa mga estudyante og daghang oportunidad sa pag-ila sa doktrina ug mga baruganan. Ang mga leksyon nagsugyot usab og mga dapit diin ikaw isip magtutudlo mopili sa pag-ila og usa ka doktrina o baruganan. Samtang ang mga estudyante moila sa mga kamatuoran nga ilang nadiskobrehan, pagmainampingon sa dili pagsugyot nga sayop ang mga tubag sa mga estudyante tungod lang kay ang mga pulong nga ilang gigamit sa pagpahayag niini lahi kay sa gigamit sa manwal o tungod kay sila miila og usa ka kamatuoran nga wala mahisguti sa kurikulum. Hinoon, kon ang pamahayag sa usa ka estudyante mas sakto o sayop ang doktrina, sa mabination nga paagi klaruha o korihii ang iyang pagsabut samtang magpadayon ang gugma ug pagsalig.

Mga Tabang sa Pagtudlo

Ang mga tabang sa pagtudlo gilakip uban sa mga sugyot sa pagtudlo sa matag leksyon. Kining tabang sa pagtudlo nagpasabut sa Mga Sukaranan sa Pagtudlo ug Pagtuon sa Ebanghelyo ug nagtanyag og giya sa epektibo nga paggamit sa lain-laing mga paagi sa mga kahanas, ug mga paagi sa pagtudlo. Samtang masabtan nimo ang mga baruganan nga anaa sa mga tabang sa pagtudlo, pangita og mga paagi nga kanunay kini nga magamit sa imong pagtudlo.

Dugang nga mga Ideya sa Pagtudlo

Ang Dugang nga mga Ideya sa Pagtudlo makita diha sa katapusan sa pipila ka mga leksyon. Naghatag kini og mga sugyot alang sa mga kalihokan sa pagtudlo, doktrina ug mga baruganan nga mahimong wala mailhi o mahatagan og gibug-aton sa importanting bahin sa leksyon. Naghatag usab kini og dugang nga mga kapanguhaan, sama sa mga video nga nagpakita og piho nga mga panghitabo sa kasaysayan sa Simbahan. Kinahanglang dili ka mobati nga obligado nga mogamit niining mga ideya sa pagtudlo. Hinoon, kinahanglang mohimo ka og desisyon kon mogamit ba niini nga mga sugyot base sa oras nga gitagal, sa mga panginahanglan sa imong mga estudyante, ug sa giya sa Espiritu.

Gipaabut sa Estudyante alang sa Kredito sa Gradwasyon

Aron makadawat og kredito sa gradwasyon sa institute, ang mga estudyante gkinahanglan nga motambong og dili mominus 75 porsinto sa mga klase, mobasa sa basahon alang sa kurso (Mga Santos: Volume 1), ug mokompleto sa Gipalambo nga Kasinatian sa Pagkat-on.

Pagpahiangay sa mga Leksyon alang Niadtong adunay mga Kakulangan

Samtang mangandam ka sa pagtudlo, pagmahunahunaon sa mga estudyante nga adunay piho nga mga panginahanglan. I-adjust ang mga kalihokan ug mga gipaabut aron matabangan sila nga molampus. Pangita og mga paagi sa pagtabang nila nga mobati nga gihigugma, gidawat, ug nahilakip. Amumahi ang relasyon sa pagsalig.

Alang sa dugang nga mga ideya ug mga kapanguhaan, konsultaha ang pahina sa Disability Resources sa churchofjesuschrist.org/life/disability ug ang Seminaries and Institutes of Religion nga manwal sa polisiya sa seksyon nga giulohan og “Gipahiangay nga mga Klase ug mga Programa alang sa mga Estudyante nga adunay mga Kakulangan”