Leksyon 8

Ang Dapit alang sa Dakbayan sa Zion

Pasiuna ug Han-ay sa mga Panghitabo [Timeline]

Diha sa Basahon ni Mormon ug pinaagi sa mga pinadayag nga gihatag ngadto ni Propeta Joseph Smith, ang Ginoo mihatag og mga kamatuoran kalabut sa dakbayan sa Zion sa katapusang mga adlaw. Panahon sa ting-init sa 1831, si Joseph Smith ug ang ubang mga Santos mibiyahe gikan sa Ohio padulong sa Distrito sa Jackson, Missouri, nga maoy gitudlo sa Ginoo nga “ang tunga-tunga nga dapit” alang sa dakbayan sa Zion ug sa templo niini (D&P 57:3). Human napahinungod ang yuta alang sa dakbayan sa Zion ug ang dapit alang sa mahimutangan sa templo, si Joseph Smith, Sidney Rigdon, Oliver Cowdery, ug ang pipila sa mga anciano [elder] mibalik ngadto sa Ohio samtang ang uban, sama ni Bishop Edward Partridge, nagpabilin sa Missouri aron motabang sa pag-establisar sa Zion.

Hunyo–Hulyo, 1831Si Joseph Smith ug ang ubang mga Santos mibiyahe gikan sa Ohio padulong sa Distrito sa Jackson, Missouri.

Hulyo 20, 1831Gitudlo sa Ginoo ang Independence, Missouri isip ang tunga-tunga nga dapit sa Zion diin usa ka templo ang pagatukuron.

Agosto 2, 1831Ang yuta sa Zion gihalad ug gipahinungod alang sa pagpundok sa mga Santos.

Agosto 3, 1831Usa ka dapit alang sa templo sa Independence, Missouri, gipahinungod.

Agosto 9, 1831Si Joseph Smith ug ang uban mibiya sa Missouri aron mobalik sa Ohio.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 12

Mga Sugyot alang sa Pagtudlo

Pagpahiangay sa mga sugyot sa pagtudlo

Mahimo kang mopili nga gamiton ang tanan o pipila sa mga sugyot sa pagtudlo sulod sa matag leksyon, o mahimo nimong ipahiangay ang mga sugyot sumala sa giya sa Espiritu ug sa mga panginahanglan ug mga kahimtang sa mga estudyante nga imong tudloan. Kon mopahiangay sa mga sugyot sa pagtudlo o mopuli niini og kaugalingon nimong mga ideya, ikonsiderar ang gituyo nga resulta sa matag sugyot sa pagtudlo, ug pagpili og alternatibong ideya sa pagtudlo nga makahatag og samang resulta.

Ang Ginoo mipadayag og mga kamatuoran mahitungod sa dakbayan sa Zion sa katapusang mga adlaw

Isulat ang mosunod nga pangutana diha sa pisara: Unsa ang Zion?

Dapita ang mga estudyante sa paghisgot sa ilang mga tubag diha sa mga grupo nga tinagurha o tinagutlo. Dayon hangyoa ang usa o daghan pa nga mga estudyante sa pagreport sa ilang mga tubag ngadto sa tibuok klase. Kon gikinahanglan, tabangi ang mga estudyante nga makasabut nga ang Zion nagpasabut sa “putli og kasingkasing” (D&P 97:21). Ang Zion nagpasabut usab sa “usa ka dapit diin nagpuyo ang putli og kasingkasing” (Giya ngadto sa mga Kasulatan, “Zion,” scriptures.ChurchofJesusChrist.org).

Dapita ang usa ka estudyante sa pagbasa og kusog sa mosunod nga parapo [paragraph]:

Bisan sa wala pa maorganisar ang Simbahan, si Propeta Joseph Smith nakadawat og daghang mga pagpadayag diin ang Ginoo misugo sa mga indibidwal nga “[ma]ningkamot sa pagdala ug pagtukod sa kahimoan sa Zion” (D&P 6:6; 11:6; 12:6; tan-awa usab sa D&P 14:6). Tungod kay ang mga panagna mahitungod sa Zion (gitawag usab nga ang Bag-ong Jerusalem) makita diha sa Biblia, ang konsepto sa Zion dili bag-o alang niining mga tawhana (tan-awa sa Isaias 33:20; 52:1, 8; Pinadayag 21:1–4). Human namantala ang Basahon ni Mormon, nakadiskubre ang mga Santos og dugang nga mga panagna mahitungod sa Zion. Ilang nakat-unan nga ang mga matarung magpundok ug motukod sa dakbayan sa Zion ug nga ang Ginoo maanaa taliwala kanila. Nakat-unan usab nila nga ang dakbayan sa Bag-ong Jerusalem pagatukuron diha sa kontinente sa Amerika. (Tan-awa sa 3 Nephi 21:20–25; Ether 13:1–11.) Si Joseph Smith nakadawat og pinadayag niadtong Septyembre 1830 diin ang Ginoo misugo kang Oliver Cowdery nga “moadto ngadto sa mga Lamanite ug mosangyaw sa akong ebanghelyo ngadto kanila; ug … [mo]himo sa akong simbahan nga pagatukuron diha kanila” (D&P 28:8). Gipasabut usab sa Ginoo niini nga pinadayag nga ang dapit alang sa dakbayan sa Zion maanaa “ngadto sa mga Lamanite (sa The Joseph Smith Papers, Documents, Volume 1: July 1828–June 1831, ed. Michael Hubbard MacKay ug uban [2013], 186).

Pahinumdumi ang mga estudyante nga niadtong Pebrero 1831, si Joseph ug Emma Smith mibalhin gikan sa New York ngadto sa Kirtland, Ohio. Pagka-Marso 1831, ang Propeta nakadawat og laing pinadayag kalabut sa Zion. Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 45:64–71. Hangyoa ang klase sa pagpangita kon unsay nakat-unan sa mga Santos mahitungod sa dakbayan sa Zion.

• Unsa ang labing mahinungdanon alang kaninyo niini nga mga bersikulo?

• Unsa nga kamatuoran ang atong makat-unan gikan niini nga mga bersikulo kon sama sa unsa ang dakbayan sa Zion? (I-summarize ang mga tubag sa mga estudyante pinaagi sa pagsulat sa mosunod nga kamatuoran diha sa pisara: Ang dakbayan sa Zion mahimong usa ka dapit sa kalinaw ug kasiguroan, ug ang himaya sa Ginoo maanaa didto.)

• Ngano kaha nga kini nga mga detalye mahitungod sa dakbayan sa Zion nakadugang sa kahinam ug paghinangup sa unang mga Santos?

Tabangi ang mga estudyante nga makasabut sa doktrina ug mga baruganan

Human ang mga estudyante moila sa doktrina ug mga baruganan, mahimo nimo silang tabangan sa pag-analisar sa doktrina ug mga baruganan aron ang mga estudyante mas makasabut sa kahulugan niini. Ang pagsabut og doktrina o baruganan sa ebanghelyo nangahulugan nga ang mga estudyante nakatugkad sa doktrina o baruganan, sa relasyon niini ngadto sa ubang mga kamatuoran diha sa plano sa Ginoo, ug sa unsang mga kahimtang nga mahimong magamit kini sa ilang mga kinabuhi.

Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–44). Hangyoa ang klase sa pagpaminaw kon unsa ang iyang gitudlo mahitungod sa pag-establisar sa Zion sa ulahing mga adlaw.

“Ang pagtukod sa Zion mao ang katuyoan nga nakapaikag sa katawhan sa Dios sa matag panahon; usa kini ka tema diin ang mga propeta, mga pari ug mga hari nagpakabuhi uban sa talagsaong kahimuot; ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabut nga ilang giawit ug gisulat ug gipanagna kining atong panahon; apan namatay sila nga wala makakita sa mga panghitabo sa atong kapanahunan; kita ang gikahimut-an nga mga katawhan nga gipili sa Dios aron sa pagdala sa Ulahing mga adlaw nga kahimayaan; anaa ra kanato ang pagtan-aw niini, pag-apil ug pagtabang sa pagpalambo sa Ulahing mga adlaw nga kahimayaan.

“Bisan asa nga dapit diin ang mga Santos nagpundok mao ang Zion, diin ang matag matarung nga tawo magtukod og dapit sa kaluwasan alang sa ilang mga anak.

“Atua didto sa nagkalain-laing dapit ang usa ka Stake [sa Zion] alang sa panagpundok sa mga Santos. … Didto ang inyong mga anak mapanalanginan, ug kamo sa taliwala sa inyong mga kahigalaan mapanalanginan. …

“… Ang panahon nagkaduol na, diin ang tawo dili makakaplag og kalinaw gawas lamang diha sa Zion ug sa mga stake niini” (Mga Pagtulun-an sa mga Presidente sa Simbahan: Joseph Smith [2007], 221).

• Sumala niini nga pamahayag ni Propeta Joseph Smith, diin man makatagamtam ang mga indibidwal sa mga panalangin sa Zion? (Siguroa nga ang mga estudyante makasabut nga ang mga panalangin sa Zion, lakip ang kalinaw ug kasiguroan, maanaa dili lamang sa dakbayan sa Zion apan usab sa mga stake sa Zion nga naestablisar sa tibuok kalibutan.)

Ipasabut nga sa usa ka komperensya sa Simbahan nga gipahigayon niadtong Hunyo 1831, ang Ginoo mipadayag og dugang nga impormasyon mahitungod sa dakbayan sa Zion. Niini nga pinadayag, nga karon narekord diha sa Doktrina ug mga Pakigsaad 52, ang Ginoo misugo ni Joseph Smith, Sidney Rigdon, Bishop Edward Partridge, ug 25 pa ka mga misyonaryo sa pagbiyahe ngadto sa Missouri, diin didto ipahigayon ang mosunod nga komperensya sa Simbahan ug ang dapit alang sa dakbayan sa Zion ipadayag (tan-awa sa D&P 52:1–5; tan-awa usab sa Matthew McBride, “Ezra Booth and Isaac Morley,” sa Revelations in Context, ed. Matthew McBride ug James Goldberg [2016], 130–31, o history.ChurchofJesusChrist.org). Sa nagsunod nga mga pagpadayag, tulo ka dugang nga mga misyonaryo ang gitawag usab sa pagbiyahe ngadto sa Missouri (tan-awa sa D&P 53:5; 55:5–6).

Si Propeta Joseph Smith ug ubang mga miyembro sa Simbahan mibiyahe ngadto sa Missouri

Ipakita ang mapa nga “Pipila ka Importanting mga Dapit sa Sayong Bahin sa Kasaysayan sa Simbahan.”

Dapita ang mga estudyante sa pagpangita sa Colesville, New York, ug Kirtland, Ohio, diha sa mapa.

• Base sa inyong pagbasa sa kapitulo 12 sa Mga Santos: Volume 1, unsa ang nahitabo sa mga Santos nga gikan sa Colesville human sila miabut sa Ohio? (Mipuyo sila sulod sa mubong panahon diha sa umahan ni Leman Copley sa Thompson, Ohio, hangtud nga gipapahawa sila ni Leman. Gipadayag dayon sa Ginoo nga ang mga Santos sa Colesville mopanaw ngadto sa yuta sa Zion sa Missouri ug manimuyo didto.)

Dapita ang mga estudyante sa pagpangita sa Independence, Missouri, diha sa mapa nga “Pipila ka Importanting mga Dapit sa Sayong Bahin sa Kasaysayan sa Simbahan.”

Paghangyo og usa ka estudyante sa pagbasa og kusog sa mosunod nga istorya ni Newel Knight, usa sa mga Santos sa Colesville, kalabut sa kahimtang sa iyang inahan, si Polly Knight, panahon sa ilang panaw ngadto sa Missouri:

“Misakay [kami] sa [usa ka bapor] … padulong sa Independence. Lisud kaayo ang panglawas sa akong inahan ug ingon na kini niini sulod sa dugay-dugay na nga panahon. Apan dili siya mosugot nga mohunong sa pagbiyahe; ang iyang bugtong o labing dakong tinguha mao ang makatunob sa yuta sa Zion ug malubong ang iyang lawas niana nga yuta. Miadto ko sa baybayon ug mipalit og mga kahoy aron himoong lungon sa higayon nga siya mamatay sa dili pa kami moabut sa among destinasyon, paspas kaayo siya nga naluya” (Newel Knight, Newel Knight autobiography and journal, circa 1846–1847, Church History Library, Salt Lake City).

• Unsa ang atong makat-unan mahitungod sa pagtuo ni Polly Knight gikan niini nga istorya?

Hangyoa ang mga estudyante nga mopakli ngadto sa kapitulo 12 sa Mga Santos: Volume 1. Dapita ang pipila ka estudyante nga magpuli-puli sa pagbasa og kusog gikan sa pahina 147, mosugod sa parapo nga nagsugod og “Wala madugay human mibiya ang mga Santos …” ug motapos sa parapo nga nagsugod og “Apan sa dihang miabut sila sa lungsod …” Hangyoa ang klase sa pagsunod, nga mangita kon unsay reaksyon sa ubang mga Santos sa dihang miabut sila sa Independence, Missouri.

• Nganong nawad-an man sa kadasig ang ubang mga Santos sa dihang miabut sila sa Independence, Missouri?

• Unsa kaha ang inyong reaksyon kon naglaum kamo og dako nga pamuy-anan sa mga kinabig ug nakakaplag hinoon og hilit nga baranggay nga dunay pipila lang ka mga miyembro?

Ang Ginoo mitudlo sa Independence, Missouri, isip ang tunga-tunga nga dapit alang sa dakbayan sa Zion

Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 57 ug sa mga bersikulo 1–3. Hangyoa ang klase sa pagsunod, nga mangita sa mga pangutana sa Propeta mahitungod sa Zion ug sa tubag sa Ginoo.

• Unsa ang gipadayag sa Ginoo mahitungod sa Zion?

• Sa unsang paagi kini nga pagpadayag nakatabang niadtong nawad-an sa kadasig tungod sa unsay ilang nakit-an didto sa Independence?

Ipakita ang giandam nga hulagway ni Bishop Edward Partridge.

Dapita ang usa ka estudyante sa pagbasa og kusog sa mosunod nga parapo:

Si Bishop Edward Partridge mibiyahe ngadto sa Missouri nga naghunahuna nga hapit na siya mouli sa iyang pamilya sa Ohio. Hinoon, pagka-Hulyo 20, si Joseph Smith nakadawat og pagpadayag nga nagsugo kang Bishop Partridge nga magpabilin ug manimuyo sa Independence sa pagtuman sa iyang tahas isip bishop (tan-awa sa D&P 57:7, 14–15). Wala madugay human niini nga pagpadayag, si Edward Partridge ug si Propeta Joseph Smith nagkasumpaki kalabut sa yuta nga paliton alang sa mga Santos sa Missouri. Gibati ni Bishop Partridge nga mas maayo ang ubang luna sa yuta. Pagka-Agosto 1, 1831, nadawat ni Propeta Joseph Smith ang pinadayag nga narekord diha sa Doktrina ug mga Pakigsaad 58. Dinhi niini nga pinadayag, ang Ginoo misugo kang Edward nga maghinulsol ug mobarug sa iyang katungdanan isip bishop sa Missouri (tan-awa sa D&P 58:14–18).

• Base sa inyong pagbasa sa kapitulo 12 sa Mga Santos: Volume 1, sa unsang paagi mitubag sa katapusan si Edward Partridge sa sugo sa Ginoo nga siya ug ang iyang pamilya manimuyo sa Missouri? (Si Edward Partridge matinud-anong misunod niini nga sugo, bisan tuod nagkinahanglan kini sa iyang pamilya sa paghimo og dagkong mga sakripisyo aron motipon kaniya sa Missouri.)

Ipasabut nga sa pinadayag nga narekord diha sa Doktrina ug mga Pakigsaad 58, ang Ginoo mihatag og dugang nga mga instruksyon ug mga saad ngadto niadtong motabang sa pagtukod sa Zion. Dapita ang usa ka estudyante sa pagbasa og kusog sa Doktrina ug mga Pakigsaad 58:2–4. Hangyoa ang klase sa pagsunod, nga mangita sa pipila sa mga saad sa Ginoo.

• Unsa nga mga kamatuoran ang atong makat-unan gikan niini nga mga bersikulo? (Ang mga estudyante mahimong moila og pipila ka mga kamatuoran, lakip sa mosunod: Kon magpabilin kitang matinud-anon panahon sa kalisdanan, niana mosunod ang mga panalangin. Dili nato makita sa atong kinaiyanhong mga mata ang plano sa Dios sa pagpahinabo sa himaya sa Zion. Isulat kini nga mga kamatuoran diha sa pisara.)

• Sa unsang paagi kaha kini nga mga kamatuoran nakatabang sa mga Santos sa ilang mga paningkamot sa pagtukod sa Zion sa Distrito sa Jackson, Missouri?

Bahina ang mga estudyante nga magpares o sa gagmay nga mga grupo, ug hatagi ang matag estudyante og kopya sa giandam nga handout, “‘Human sa Daghan nga Kalisdanan Moabut ang mga Panalangin’ (D&P 58:4).” Dapita ang mga estudyante sa pagbasa og kusog sa handout diha sa ilang mga parisan o mga grupo ug dayon hisgutan ang ilang mga tubag sa mga pangutana nga anaa sa katapusan sa handout.

“Human sa Daghan nga Kalisdanan Moabut ang mga Panalangin” (D&P 58:4)

Ang Colesville Branch, lakip ni Polly Knight ug sa iyang anak nga si Newel, miabut sa Distrito sa Jackson, Missouri, sa saktong panahon aron makaapil sa pagpahinungod sa yuta sa Zion alang sa pagpundok sa mga Santos. Mihinumdom si Newel Knight:

“Sa ikaduhang adlaw sa Agosto, si Brother Joseph Smith Jr., ang Propeta sa Dios, mitabang sa Colesville Branch sa pagpahimutang sa unang troso isip pundasyon alang sa … Zion sa Lungsod sa Kaw, mga baynte ka kilometro sa kasadpan sa Independence. Ang troso gipas-an sa napulog duha ka mga lalaki, agi og pasidungog sa napulog duha ka mga tribo sa Israel. Sa samang higayon, pinaagi sa pag-ampo, ang yuta sa Zion gihalad ug gipahinungod ni Elder Sidney Rigdon alang sa pagpundok sa mga Santos. Usa gayud kini ka panahon sa kalipay ug kamaya alang sa mga Santos [kinsa] nakasaksi niini. …

“Sa ikatulong adlaw sa Agosto ang luna alang sa templo, medyo sa kasadpan sa … Independence, gipahinungod” (Newel Knight autobiography and journal, circa 1846–1847, Church History Library, Salt Lake City).

Ang mga anciano [elder] nga mitambong sa pagpahinungod adunay nagkalain-laing mga reaksyon sa kalihokan:

“Ang pipila sa mga anciano, sama ni Reynolds Cahoon, nakakita og makapahinam nga mga posibilidad niining simbolikanhon nga mga sinugdanan. ‘Didto ang akong mortal nga mga mata nakakita og mahinungdanon ug talagsaon nga mga butang,’ misulat siya, ‘nga wala ko magtuo nga makakita ako og sama niini dinhi sa kalibutan.’ Apan wala makadayeg si Ezra Booth sa gamay nga pagsugod. ‘Makapakuryuso’ kadto, miingon siya, ‘apan dili takus nga moadto og Missouri aron lang makita’” (Matthew McBride, “Ezra Booth and Isaac Morley,” sa Revelations in Context, ed. Matthew McBride ug James Goldberg [2016], 132–33, o history.ChurchofJesusChrist.org).

Pagka-Agosto 7, upat ka adlaw human gipahinungod ang luna alang sa templo, namatay si Polly Knight. Ang iyang anak nga si Newel mihulagway sa mga kahimtang sa iyang kamatayon:

“Hilum siya nga nakatulog, diha sa kamatayon nagmaya sa bag-o ug walay katapusan nga pakigsaad sa ebanghelyo ug nagdayeg sa Dios nga nakakita pa siya sa yuta sa Zion ug nga ang iyang lawas mopahulay sa kalinaw, human sa iyang mga pag-antus tungod sa pagpanglutos sa mga dautan” (Newel Knight autobiography and journal, circa 1846–1847, Church History Library, Salt Lake City).

• Ngano kaha nga ang mga pagbati ni Polly Knight kalabut sa pagpahinungod sa yuta sa Zion lahi kaayo sa mga pagbati ni Ezra Booth?

• Unsa nga mga panalangin ang miabut kang Polly Knight tungod kay nagpabilin siyang matinud-anon panahon sa kalisdanan? (Tan-awa sa D&P 59:1–2, nga gipadayag sa Ginoo sa adlaw sa lubong ni Polly.)

• Unsa nga mga kasinatian ang nakatabang kaninyo nga mahibalo nga ang Ginoo mopanalangin niadtong magpabilin nga matinud-anon panahon sa kalisdanan?

Human ang mga estudyante adunay igong panahon sa pagkompleto sa kalihokan sa handout, ipakita ang giandam nga hulagway. Ipasabut nga hulagway kini sa Suba sa Missouri ug nga si Propeta Joseph Smith ug ang uban nagkampo sa daplin niini nga suba sa usa ka dapit nga gitawag og McIlwaine’s Bend samtang nagbiyahe pabalik sa Ohio niadtong Agosto 1831.

• Base sa inyong pagbasa sa kapitulo 12 sa Mga Santos: Volume 1, unsa nga mga hagit ang nasinati ni Joseph Smith, Oliver Cowdery, Sidney Rigdon, ug ubang mga elder panahon sa ilang panaw pabalik sa Ohio? (Ang ubang mga sakayan hapit matikyaob tungod sa kusog nga mga sulog ug naunlod nga mga kahoy diha sa Suba sa Missouri.)

• Unsa ang reaksyon ni Ezra Booth ug sa uban pa nga mga elder niini nga mga hagit? (Sa sinugdanan gisaway nila ang ilang mga lider. Wala madugay, samtang nagkampo sila sa daplin sa suba, kadaghanan sa mga lalaki nagkauli ang buot pinaagi sa diskusyon ug pagpangayo og pasaylo, apan si Ezra Booth nagpabilin nga nanghinaway kang Joseph Smith ug sa uban.)

Mahimo nimong tapuson pinaagi sa pagribyu sa mga kamatuoran nga nahisgutan niini nga leksyon. Ipaambit ang imong pagpamatuod nga isip mga miyembro sa Simbahan sa Ginoo karon, aduna kitay oportunidad ug responsibilidad sa pag-establisar sa Zion bisan asa kita nagpuyo ug nga ang Ginoo mopanalangin kanato samtang magpabilin kitang matinud-anon panahon sa kalisdanan. Dapita ang mga estudyante nga lihukon kini nga mga kamatuoran.

Awhaga ang mga estudyante nga mangandam alang sa sunod nga klase pinaagi sa pagbasa sa mga kapitulo13–14 sa Mga Santos: Volume 1.