“Leksyon 7: Panagpundok ngadto sa Ohio,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)

“Leksyon 7,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo

Leksyon 7

Pagpundok ngadto sa Ohio

Pasiuna ug Han-ay sa mga Panghitabo [Timeline]

Sa tinglarag sa 1830, ang mga misyonaryo nga gitawag sa pagsangyaw ngadto sa mga Lamanite mihapit sa Kirtland, Ohio, nga dapit aron sa pagpaambit sa gipahiuli nga ebanghelyo. Sulod sa mubo nga panahon, sobra sa usa ka gatus ka tawo, lakip ni Sidney Rigdon ug daghang miyembro sa iyang kongregasyon, ang nabunyagan. Pagka-Disyembre 1830, si Joseph Smith nakadawat og usa ka pagpadayag diin ang Ginoo misugo sa mga Santos nga nagpuyo sa New York sa pagpundok ngadto sa Ohio (tan-awa sa D&P 37). Si Joseph Smith ug ang iyang asawa, si Emma, mibiyahe ngadto sa Kirtland, nga miabut pagka-Pebrero 1831. Sa wala pa moabut si Joseph Smith, ang pipila sa mga Santos sa Ohio nalingla sa mini nga espiritwal nga mga pagpakita. Pinaagi sa pagpadayag ngadto sa Propeta, ang Ginoo mitabang sa mga Santos sa pag-ila ug paglikay sa pagpanglingla (tan-awa sa D&P 46; 50).

Oktubre–Nobyembre1830Si Oliver Cowdery, Parley P. Pratt, Ziba Peterson, ug Peter Whitmer Jr. misangyaw sa ebanghelyo sa amihanang-silangang dapit sa Ohio sulod sa pipila ka semana.

Enero 2, 1831Ang ikatulong komperensya sa Simbahan gipahigayon sa Fayette, New York, ug gipahibalo ni Joseph Smith ang pinadayag nga nagsugo sa mga Santos sa pagpundok ngadto sa Ohio (tan-awa sa D&P 37–38).

Pebrero 4, 1831Sila si Joseph ug Emma Smith miabut sa Kirtland, Ohio.

Abril–Mayo 1831Ang mga Santos nga nagpuyo sa New York mibiya padulong sa Kirtland, Ohio.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 10–11

Mga Sugyot alang sa Pagtudlo

Ang Ginoo misugo sa mga Santos nga magpundok ngadto sa Ohio

Isulat ang mosunod nga pamahayag ni Presidente Thomas S. Monson (1927–2018) sa pisara:

“Ang labing dako nga pagsulay niini nga kinabuhi mao ang pagkamasulundon” (Thomas S. Monson, “Ang Pagkamasulundon Makahatag og Panalangin,” Liahona, Mayo 2013, 92).

Ngano kaha nga ang pagkamasulundon ngadto sa Ginoo mao ang dakong pagsulay niini nga kinabuhi?

Hangyoa ang mga estudyante sa paghunahuna mahitungod sa pipila ka mga hagit nga ilang giatubang o tingali atubangon sa pagsunod sa mga baruganan sa ebanghelyo ug sa mga sugo. Dapita sila sa pagpangita og baruganan samtang tun-an nila ang panagpundok sa mga Santos ngadto sa Ohio nga makatabang sa pag-awhag kanila nga matinud-anong mosunod sa Ginoo.

Ipakita ang mapa nga “Misyon ngadto sa mga Lamanite, 1830–1831.”

Pahinumdumi ang mga estudyante nga sa tinglarag sa 1830, si Oliver Cowdery, Peter Whitmer Jr., Ziba Peterson, ug Parley P. Pratt gitawag sa pagsangyaw sa ebanghelyo ngadto sa mga Lamanite, o mga American Indian. Sa ilang pagpadulong ngadto sa kayutaan sa mga Indian sa kasadpan sa Missouri, mihapit sila sa Mentor ug Kirtland, Ohio. Sa panahon sa ilang paghapit, gipaambit nila ang gipahiuli nga ebanghelyo ngadto sa higala ug kanhi ministro ni Parley, si Sidney Rigdon, ug sa daghan pang uban.

Base sa inyong pagbasa sa kapitulo 10 sa Mga Santos: Volume 1, sa unsang paagi nga ang pagsangyaw niini nga mga misyonaryo didto sa Ohio nakaapekto sa bag-ong naorganisar nga Simbahan? (Sobra sa 100 ka tawo ang nabunyagan. Ang paglambo sa Simbahan sa Kirtland mipasayon sa pagpundok sa mga Santos didto sa Ohio.)

Ipasabut nga sa wala madugay human sa misyonaryo nga kalampusan didto sa Ohio, nakadawat si Propeta Joseph Smith og duha ka mga pagpadayag nga makaapekto sa umaabut sa Simbahan. Ang usa mao ang pagpadayag nga nadawat sa Propeta samtang nagtrabaho siya sa iyang dinasig nga paghubad sa Daang Tugon. Ang pinadayag, nga narekord diha sa Basahon ni Moises, misaysay kon sa unsang paagi ang karaang propeta nga si Enoch mipundok og matarung nga katawhan ug mitukod og usa ka dakbayan sa pagkabalaan nga gitawag og Zion, diin “sa pagpadayon sa panahon, gidala ngadto sa langit” (Moises 7:21). Ang pinadayag mipasabut usab nga sa wala pa ang Ikaduhang Pag-anhi, ang katawhan sa Ginoo pagapundukon og usab ug motukod og laing dakbayan sa Zion (tan-awa sa Moises 7:62). Sa laing pinadayag, nga narekord diha sa Doktrina ug mga Pakigsaad 37, ang Ginoo misugo sa mga Santos sa New York sa pagpundok ngadto sa Ohio (tan-awa sa D&P 37:3).

Hangyoa ang mga estudyante nga magpares-pares ug mopakli ngadto sa kapitulo 10 sa Mga Santos: Volume 1. Hangyoa sila sa pagbasa og kusog uban sa ilang pares gikan sa pahina 124, mosugod sa parapo nga nagsugod og “Sa katapusang bahin sa Disyembre …” ug motapos sa parapo diha sa pahina 126 nga nagsugod og “Isip lider sa …” Hangyoa ang mga estudyante sa pagpangita kon sa unsang paagi ang mga Santos sa New York misanong sa mga pinadayag sa Ginoo nga nagsugo kanila sa pagpundok ngadto sa Ohio.

Unsay labing mahinungdanon alang kaninyo mahitungod sa lain-laing mga paagi nga ang mga miyembro sa Simbahan mitubag sa sugo sa Ginoo sa pagpundok ngadto sa Ohio?
Sa unsang paagi kining lain-laing mga reaksyon susama sa mga paagi nga tingali motubag kita sa mga sugo ug tambag nga gihatag pinaagi sa mga propeta sa Ginoo karon?
Unsa nga mga sakripisyo ang gihimo sa mga Santos aron makapundok ngadto sa Ohio? (Tan-awa sa D&P 38:37.)

Ipakita ang mosunod nga pamahayag ni Newel Knight, ug dapita ang usa ka estudyante sa pagbasa niini og kusog. Hangyoa ang mga estudyante sa pagpangita sa unsay andam nga isakripisyo ni Newel Knight ug sa mga Santos sa Colesville aron sa pagsunod sa Ginoo:

“Agig pagsunod sa sugo nga gihatag, ako, kauban sa Colesville Branch, misugod sa pagpangandam sa pag-adto sa Ohio. …

“Sama sa gidahum, napugos kami sa paghimo og dagkong mga sakripisyo sa among kabtangan. …

“Human makahimo sa labing maayong pagpangandam nga among mahimo alang sa panaw, nanamilit kami sa tanan namong gimahal dinhi sa yuta … [ug] misugod kami sa [sayong bahin] sa Abril [1831] padulong sa Ohio” (Newel Knight autobiography and journal, circa 1846–1847, 28–29, Church History Library, Salt Lake City).

Unsa nga mga panalangin ang gisaad sa Ginoo sa mga Santos kon mosunod sila sa Iyang sugo sa pagpundok ngadto sa Ohio? (Ang Ginoo mohatag sa mga Santos og “dagko nga mga katigayunan” kon mosunod sila sa Iyang sugo sa pagpundok ngadto sa Ohio [D&P 38:18; tan-awa usab sa D&P 38:19, 32]. Nagsugyot kini nga ang gisaad sa Ginoo nga mga panalangin mas dagko pa kay sa mga sakripisyo nga gihangyo ang mga Santos sa paghimo.)
Unsa nga baruganan ang atong makat-unan gikan niini nga istorya kalabut sa unsaon kita pagpanalangin sa Ginoo kon andam kitang mohimo og mga sakripisyo sa pagsunod Kaniya? (Ang mga estudyante mahimong mogamit og lain-laing mga pulong, apan siguroa nga moila sila og baruganan nga susama sa mosunod: Kon mosakripisyo kita aron sa pagsunod sa Ginoo, niana mohatag Siya og mga panalangin nga mas dako pa kay sa mga sakripisyo nga atong nahimo. Isulat kini nga baruganan diha sa pisara.)

Dapita ang usa ka estudyante sa pagbasa og kusog sa mosunod nga parapo:

Ang mga Santos wala makasabut sa hingpit sa gidak-on sa mga panalangin nga gisaad sa Ginoo sa panahon nga sila gimandoan sa pagpundok ngadto sa Ohio. Paglabay sa panahon, ang katumanan sa gisaad sa Ginoo nga mga panalangin nahimong klaro: Wala madugay human miabut sa Kirtland, ang Propeta nakadawat sa pinadayag nga narekord diha sa Doktrina ug mga Pakigsaad 42, nga naglatid sa balaod sa Ginoo aron sa pagtabang sa mga Santos sa pagtukod sa Zion. Ang Propeta nakadawat og sobra sa singkwenta pa ka mga pinadayag diha sa Ohio nga naglakip og tambag gikan sa Ginoo ug sa bililhong mga kamatuoran sa ebanghelyo. Ang mga Santos usab “pagatugahan uban sa gahum nga gikan sa kahitas-an” (D&P 38:32) sa dihang nakadawat sila og pagbu-bu sa espiritwal nga mga gasa ug mga pagpakita panahon sa pagtukod, pagpahinungod, ug paggamit sa Templo sa Kirtland. Ang mahinungdanong mga yawe sa pagkapari gipahiuli diha sa Templo sa Kirtland, lakip ang gahum sa pagbugkos sa mga pamilya alang sa kahangturan.

Sa unsang paagi kini nga mga panalangin mas labaw pa kay sa mga sakripisyo nga gihimo sa mga Santos sa New York sa pagsunod sa Ginoo?

Ipakita ang mosunod nga pangutana, ug dapita ang mga estudyante sa pagpamalandong niini ug dayon sa pagsulat og tubag diha sa ilang mga study journal: Unsa nga mga panalangin ang inyong nadawat tungod sa pagpili nga mosakripisyo aron sa pagsunod sa Ginoo?

Human sa igo nga panahon, dapita ang pipila ka mga estudyante sa pagpaambit diha sa klase sa unsay ilang gisulat.

Ipamatuod nga samtang magbaton kita og mahangturong panglantaw, ang mga panalangin nga atong madawat tungod sa atong mga sakripisyo kanunay nga labaw pa kay sa bisan unsang butang nga atong gitugyan (tan-awa sa Giya ngadto sa mga Kasulatan, “Sakripisyo,” scriptures.ChurchofJesusChrist.org). Dapita ang mga estudyante sa paghunahuna kon unsa nga mga sakripisyo ang kinahanglan nilang buhaton aron mas matinud-anong mosunod sa usa ka baruganan sa ebanghelyo o sugo. Awhaga sila sa pagbuhat sa bisan unsang mga pag-aghat nga ilang madawat.

Si Joseph ug Emma Smith nangabut sa Kirtland, Ohio

Ipasabut nga human makadawat sa sugo sa Ginoo nga magpundok ngadto sa Ohio, ang Propeta mibati og “dinaliang panginahanglan nga moadto sa Kirtland” (Mga Santos: Volume 1, 111). Andam nga mosakripisyo aron sa pagsunod sa Ginoo, si Joseph ug Emma mibiya sa Fayette, New York, sa tunga-tunga sa tingtugnaw, bisan og mabdos si Emma ug nagpaalim pa sa dugay-dugay nga pagkasakit. Miabut sila sa Tindahan ni Newel K. Whitney sa Kirtland pagka-Pebrero 4, 1831.

Pagpakita og hulagway sa Tindahan ni Whitney sa Kirtland.

Ipasabut nga si Newel K. Whitney usa ka inila nga negosyante, ug siya ug ang iyang asawa, si Elizabeth Ann (nailhan isip Ann), mga bag-ong kinabig sa Simbahan. Dapita ang usa ka estudyante sa pagbasa og kusog gikan sa pahina 128 sa Mga Santos: Volume 1, mosugod sa parapo nga nagsugod og “Niadtong Pebrero 4, 1831, usa ka balsa …” ug motapos sa parapo diha sa pahina 129 nga nagsugod og “‘ Ako si Joseph …’” Hangyoa ang mga estudyante sa pagpangita kon unsay nahitabo sa dihang si Newel K. Whitney nakahimamat ni Propeta Joseph Smith.

Unsay inyong nakita nga makapaikag o makahuluganon mahitungod sa panagsulti tali sa Propeta ug ni Newel K. Whitney?
Base sa unsay gisulti sa Propeta ngadto ni Newel, unsa ang usa ka rason nga mibisita si Joseph Smith kang Newel ug Ann sa Kirtland?

Ipasabut nga sa panahon nga wala pa sila mabunyagan, si Newel ug Ann Whitney matinguhaong nag-ampo og giya gikan sa Ginoo ug nakadawat og kusganon nga espirituhanong kasinatian. Dapita ang usa ka estudyante nga mobasa og kusog sa mosunod nga istorya ni Ann Whitney:

“Tungang gabii kadto—ang akong bana ug ako anaa sa among balay sa Kirtland, nag-ampo ngadto sa Amahan aron magiyahan sa dihang ang Espiritu mikunsad kanamo ug usa ka panganod ang milandong sa balay. … Usa ka ligdong nga pagtahud ang mituhop kanamo. Nakita namo ang panganod ug mibati sa Espiritu sa Ginoo. Dayon nakadungog kami og usa ka tingog gikan sa panganod nga nag-ingon, ‘Pangandam sa pagdawat sa pulong sa Ginoo, kay kini moabut’” (Elizabeth Ann Whitney, sa Andrew Jenson, Latter-day Saint Biographical Encyclopedia [1901], 1:223; tan-awa usab sa “Newel K. Whitney: A Man of Faith and Service,” Museum Treasures series, Mar. 25, 2015, history.ChurchofJesusChrist.org).

Ipasabut nga ang saad sa Ginoo nga moabut ang Iyang pulong tingali natuman sa usa ka bahin sa dihang ang mga misyonaryo unang misangyaw sa gipahiuli nga ebanghelyo sa dapit sa Kirtland. Agig dugang, si Ann misulti sa iyang bana nga nagtuo siya nga ang pag-abut sa Propeta sa ilang panimalay sa Kirtland mituman niini nga saad. Samtang nagpuyo uban sa mga Whitney, ang Propeta nakadawat sa pinadayag nga narekord diha sa Doktrina ug mga Pakigsaad 41–44. (Tan-awa sa Elizabeth Ann Smith Whitney, “A Leaf from an Autobiography,” Woman’s Exponent, Sept. 1, 1878, 7:51; tan-awa usab sa Jenson, Latter-day Saint Biographical Encyclopedia, 1:224.)

Unsa ang gitudlo niini nga mga istorya kaninyo mahitungod ni Joseph Smith? (Ang mga estudyante mahimong mohatag og pipila ka hustong mga tubag, lakip sa mosunod: Si Joseph Smith usa ka dinasig nga Propeta sa Dios.)
Unsa ang gipadayag niini nga mga istorya mahitungod ni Newel ug Ann Whitney?
Unsa nga baruganan ang atong makat-unan gikan niini nga mga istorya mahitungod sa usa ka paagi nga ang Dios motubag sa atong mga pag-ampo alang sa balaang giya? (Human motubag ang mga estudyante, isulat sa pisara ang mosunod nga baruganan: Samtang mag-ampo kita alang sa balaang giya, ang Dios mahimong mopakita kanato sa mga butang nga kinahanglan natong buhaton pinaagi sa Iyang pinili nga mga sulugoon.)

Aron matabangan ang mga estudyante nga makasabut niini nga baruganan, ipasabut nga ang Langitnong Amahan mahimong motubag sa atong mga pag-ampo ug tinguha alang sa giya samtang magtuon kita sa mga kasulatan ug sa mga pagtulun-an sa mga lider sa Simbahan, maminaw og maayo sa kinatibuk-ang komperensya, ug mangayo og tambag gikan sa lokal nga mga lider sa Simbahan.

Si Joseph Smith nakadawat og pinadayag aron matabangan ang mga Santos nga makaila sa mini nga espiritwal nga mga pagpakita ug makalikay sa pagpanglingla

Ipasabut nga wala madugay human miabut si Propeta Joseph Smith (1805–44) sa Kirtland, nakaobserbar siya nga “pipila ka katingalahan nga mga ideya ug mini nga mga espiritu ang hinay-hinay nga misulod taliwala” sa bag-ong nabunyagan nga mga miyembro sa Simbahan (Manuscript History of the Church, vol. A-1, p. 93, josephsmithpapers.org). Ang uban adunay sayop nga mga pagsabut kalabut sa impluwensya ug mga buhat sa Espiritu Santo.

Pagdapit og duha ka estudyante nga magpuli-puli sa pagbasa og kusog sa mosunod nga mga pamahayag ni John Whitmer ug John Corrill, duha ka nag-unang mga miyembro sa Simbahan. Hangyoa ang klase sa pagpaminaw sa mga ehemplo sa mga linihokan nga nahitabo tali sa pipila ka nag-unang mga kinabig sa Kirtland.

“Ang uban dunay mga panan-awon ug dili makasulti kon unsay ilang nakita, ang uban naghunahuna sa ilang kaugalingon nga kunohay anaa kanila ang espada ni Laban, ug mowara-wara niini [sama sa usa ka sundalo nga nagsakay sa kabayo], ang uban molihok sama sa usa ka Indian nga nag-aksyon nga nagpanit sa ulo sa usa ka tawo, ang uban mopadailos o mopasaguyod … [diha] sa salog, nga sama kapaspas sa bitin. … Sa ingon ang yawa milingla sa pipila ka maayo ug matinuoron nga mga tinun-an (John Whitmer, sa The Joseph Smith Papers, Histories, Volume 2: Assigned Histories, 1831–1847, ed. Karen Lynn Davidson ug uban [2012], 38).

“[Ang pipila sa unang mga kinabig] milihok sa katingalahan nga paagi, … usahay modagan ngadto sa umahan, mopatong sa mga tuod sa kahoy ug didto mosangyaw nga daw gilibutan sa kongregasyon, samtang hingpit nga nakatutok sa mga panan-awon nga tataw nga wala na makabantay sa tanan nga nangagi sa ilang palibut” (John Corrill, sa The Joseph Smith Papers: Histories, Volume 2, Assigned Histories, 1831–1847, ed. Karen Lynn Davidson ug uban [2012], 143).

Unsa kaha ang mga kakuyaw o kadaot ngadto sa Simbahan kon ang ingon nga mga linihokan mipadayon taliwala sa mga Santos?

Ipasabut nga si Propeta Joseph Smith nangutana sa Ginoo kabahin niini nga mga linihokan ug nakadawat sa pinadayag nga narekord diha sa Doktrina ug mga Pakigsaad 50. Dapita ang usa ka estudyante nga mobasa og kusog sa Doktrina ug mga Pakigsaad 50:2–3. Dapita ang klase sa pagsunod, nga mangita kon unsay gipadayag sa Ginoo mahitungod niining katingalahan nga espiritwal nga mga pagpakita.

Unsa ang gisugo sa Ginoo ngadto sa mga Santos kalabut niining espiritwal nga mga pagpakita?
Unsa ang pipila ka paagi nga ang kaaway nagtinguha sa paglingla sa mga miyembro sa Simbahan karon?

Ipakita ang mosunod nga pamahayag ni Propeta Joseph Smith kalabut sa “katingalahan nga mga hunahuna” ug “mini nga mga espiritu” taliwala sa mga Santos, ug dapita ang usa ka estudyante sa pagbasa niini og kusog:

“Uban sa gamay nga pagmatngon, ug piho nga kaalam, ako dayong gitabangan ang mga kaigsoonan sa pagbuntog niini. … Ang mini nga mga espiritu dali nga namatikdan ug nasalikway pinaagi sa kahayag sa pagpadayag” (Joseph Smith, sa Manuscript History of the Church, vol. A-1, p. 93, josephsmithpapers.org).

Unsa nga baruganan ang atong makat-unan gikan sa pamahayag sa Propeta mahitungod sa unsay makatabang sa mga Santos sa Ulahing mga Adlaw nga makaila sa mga bakak ug pagpanglingla? (Human motubag ang mga estudyante, isulat ang mosunod nga baruganan diha sa pisara: Pinaagi sa kahayag sa pagpadayag, makaila kita sa mga bakak ug pagpanglingla.)

Aron matabangan ang mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Presidente James E. Faust (1920–2007) sa Unang Kapangulohan:

“Adunay … igong panalipud batok sa gahum ni Lucifer ug sa iyang mga panon. Kini nga panalipud nag-agad diha sa espiritu sa pag-ila [discernment] pinaagi sa gasa sa Espiritu Santo. Kini nga gasa moabot kanunay pinaagi sa personal nga pagpadayag ngadto niadtong maningkamot sa pagsunod sa mga sugo sa Ginoo ug sa pagsunod sa tambag sa buhing mga propeta” (James E. Faust, “The Great Imitator,” Ensign, Nob. 1987, 35–36).

Ngano kaha nga ang pagsunod sa mga sugo ug tambag sa buhing mga propeta motabang kanato sa pagdawat ug paggamit sa gasa sa pag-ila?
Unsa pay atong mabuhat aron madapit ang kahayag sa pagpadayag aron makaila kita sa mga bakak ug pagpanglingla? (Tan-awa sa D&P 50:21–23, 29–32, 35.)

Tapusa ang leksyon pinaagi sa pagpaambit sa imong pagpamatuod kalabut sa mga baruganan nga gitudlo dinhi niini nga leksyon ug sa pag-awhag sa mga estudyante sa pagsunod niini nga mga baruganan. Dapita ang mga estudyante nga mangandam alang sa sunod nga klase pinaagi sa pagbasa sa kapitulo 12 sa Mga Santos: Volume 1.

Komentaryo ug Background nga Impormasyon

Katingalahan nga mga hunahuna ug mini nga mga espiritu

Mipasabut si Propeta Joseph Smith (1805–44) sa kakuyaw nga gipresentar ngadto sa Simbahan sa relihiyusong paghingapin ug mini nga espiritwal nga mga pagpakita didto sa Kirtland:

“Wala madugay human ang ebanghelyo naestablisar sa Kirtland, ug panahon sa pagkawala sa mga kadagkoan sa simbahan, daghang mini nga mga espiritu ang gipaila, daghang katingalahan nga mga panan-awon ang nakita, ug binuang, madasigon nga mga ideya ang gituohan … , gituyo sa pagpakaulaw sa simbahan sa Dios, sa pagpawagtang sa espiritu sa Dios, ug sa pagdaut ug paglaglag niadtong mahimayaong mga baruganan nga gipalambo alang sa kaluwasan sa tawhanong pamilya (Joseph Smith, “Try the Spirits,” Times and Seasons, Abr. 1, 1842, 747, josephsmithpapers.org).