Leksyon 4

Paghubad sa Basahon ni Mormon

Pasiuna ug Han-ay sa mga Panghitabo [Timeline]

Human si Joseph Smith nakadawat sa bulawan nga mga palid niadtong Septyembre 1827, miatubang siya sa malisud nga buluhaton sa paghubad ug pagmantala sa rekord. Niadtong Disyembre 1827, sila si Joseph ug Emma mibalhin gikan sa Manchester, New York, ngadto sa Harmony, Pennsylvania, aron nga ang magtiayon makalingkawas sa nagkagrabe nga pagpanggukod ug aron nga si Emma, nga mabdos, makapanganak nga duol sa iyang pamilya. Niadtong Pebrero 1828, si Martin Harris miabut sa Harmony aron sa pagtabang sa Propeta. Pagka-Hunyo, ang Propeta mihubad sa 116 ka pahina nga si Martin Harris isip iyang tigsulat. Si Martin nangayo sa pagtugot ni Joseph sa pagbalik ngadto sa New York ug ipakita ang mga pahina sa manuskrito ngadto sa iyang asawa ug sa uban, apan ang Ginoo midili. Tungod sa kanunay nga paghangyo ni Martin, si Joseph nangutana sa Ginoo makaduha pa, ug ang Ginoo mitugot ni Martin sa pagdala sa manuskrito kon siya mouyon sa piho nga mga kondisyon. Bisan pa, tungod sa pagkadanghag ni Martin, ang manuskrito gikuha sa “dautan nga mga tawo” (D&P 10:8). Tungod niini nga sayop, nawala ang gasa ni Joseph Smith sa paghubad sa makadiyot. Human mabalik ang gasa sa Propeta, ang Ginoo mipadala ni Oliver Cowdery aron sa pagtabang kaniya sa buhat sa paghubad.

Septyembre 22, 1827Nadawat ni Joseph Smith ang bulawan nga mga palid gikan ni anghel Moroni.

Disyembre 1827Sila si Joseph ug Emma Smith mibalhin ngadto sa Harmony, Pennsylvania, diin si Joseph makugihong nagsugod sa paghubad sa Basahon ni Mormon.

Pebrero 1828Si Martin Harris midala sa sinulat sa pipila ka karakter nga gikopya gikan sa bulawan nga mga palid ngadto sa mga eskolar sa Siyudad sa New York.

Hunyo–Hulyo 1828Nawala ni Martin Harris ang 116 ka pahina nga nahubad ni Joseph Smith gikan sa Basahon ni Mormon.

Abril 5, 1829Si Oliver Cowdery miabut sa Harmony, Pennsylvania, aron sa pagtabang ni Joseph Smith sa paghubad sa bulawan nga mga palid.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 5–6

Mga Sugyot alang sa Pagtudlo

Angaya ang pagbahin sa mga leksyon

Angaya ang kada leksyon aron imong magahinan og igong panahon ang labing importanting mga elemento. Kon ikaw mogahin og sobra kaayong panahon sa unang bahin sa leksyon, bation nimong mapugos nga magdali hangtud sa katapusang bahin. Samtang ikaw mag-andam sa pagtudlo, banabanaa pila ka oras ang magahin aron epektibo ang pagtudlo sa kada bahin sa leksyon. Hunahunaa hain nga bahin ang ingon og nanginahanglan og daghang oras alang sa mga estudyante sa paghisgot sa doktrina ug mga baruganan ug sa pagpakigbahin og susamang mga kasinatian.

Si Martin Harris mitabang ni Joseph Smith sa paghubad sa Basahon ni Mormon

Si Joseph Smith nakadawat sa pagkatinugyanan sa mga palid

Ipakita ang gisukip nga imahe. Ipasabut nga kini nga imahe mao ang usa ka paghulagway ni Joseph Smith nga nagdawat sa bulawan nga mga palid sa sayo sa kabuntagon niadtong Septyembre 22, 1827.

• Base sa inyong pagbasa sa kapitulo 5 sa Mga Santos: Volume 1, unsa ang pipila ka mga hagit ang nasinati ni Joseph Smith human niya madawat ang mga palid gikan ni Moroni? (Ang pagpanggukod nga nasinati ni Joseph “nag-anam kapait ug nagkagrabe kay sa kaniadto,” ug daghang mga tawo ang misulay sa pagkawat sa mga palid gikan kaniya [Joseph Smith—Kasaysayan 1:60].)

Ipasabut nga tungod niini nga pagpanggukod ug pagsamok-samok, sila si Joseph ug Emma mibalhin gikan sa Manchester, New York, ngadto sa Harmony, Pennsylvania, niadtong Disyembre 1827 (tan-awa sa Joseph Smith—Kasaysayan 1:60–61). Kini nga pagbalhin nakatugot usab ni Emma, kinsa nagpaabut sa iyang unang anak, nga mahiduol sa iyang pamilya.

Martin Harris

Ipakita ang imahe ni Martin Harris. Ipasabut nga si Martin Harris usa ka tinahud kaayo ug mauswagon nga mag-uuma gikan sa Palmyra, New York, kinsa magulang og 22 anyos kay ni Joseph Smith. Sa sinugdanan si Martin nagduha-duha mahitungod sa iyang nadungog kabahin ni Joseph Smith ug sa bulawan nga mga palid.

Ipakita ang mosunod nga pamahayag, ug dapita ang usa ka estudyante sa pagbasa niini og kusog. Dapita ang klase sa pagsunod, nga mangita unsay nasinati ni Martin Harris nga nakaaghat kaniya sa pagtabang sa buhat sa Ginoo.

Martin Harris

“Miadto ko sa akong kwarto ug nag-ampo sa Dios sa pagpakita kanako kabahin niining mga butanga, ug ako nakigsaad nga kon kini iyang trabaho ug iyang ipakita nako aron, akong ihatag ang akong labing maayong abilidad sa pagdala niini ngadto sa kalibutan. Dayon iyang gipakita kanako nga kini iyang buhat. … Iyang gipakita kini nako pinaagi sa gamay hinagawhaw nga tingog nga nakigsulti sa kalag” (Martin Harris, sa “Mormonism—No. II,” Tiffany’s Monthly, Ago. 1859, 170).

• Unsa ang pipila ka paagi nga si Martin mitabang sa buhat sa Ginoo? (Siguroha nga ang mosunod mahisgutan: Mihatag siya og pinansyal nga tabang aron matabangan sila si Joseph ug Emma nga makabalhin ngadto sa Pennsylvania, gidala niya ang sinulat sa pipila ka karakter nga gikopya gikan sa bulawan nga mga palid ngadto sa mga eskolar sa Siyudad sa New York, ug nagserbisyo siya isip tigsulat samtang ang Propeta mohubad og bahin sa Basahon ni Mormon gikan sa Abril–Hunyo 1828.)

Hangyoa ang mga estudyante sa pagpangita sa kapitulo 5 sa Mga Santos: Volume 1. Dapita ang pipila ka mga estudyante sa pagpuli-puli sa pagbasa og kusog gikan sa pahina 51, sugod sa parapo [paragraph] nga nagsugod sa “usa ka adlaw, si Martin …” ug matapos sa parapo nga nagsugod sa “Human makabiya si Martin …” Hangyoa ang klase sa pagsunod, nga mangita sa hangyo ni Martin kang Joseph.

• Ngano kaha nga mipadayon si Joseph Smith sa paghangyo sa Ginoo sa samang pangutana human makadawat na og tubag?

Nawala ni Martin Harris ang manuskrito, ug ang Ginoo mikasaba ni Joseph Smith

Ipasabut nga human mibiya si Martin Harris sa Harmony, si Emma Smith nanganak sa usa ka batang lalaki, kinsa namatay sa wala madugay human matawo. Si Emma hapit usab mamatay, ug si Joseph migahin sa duha ka semana sa pag-atiman kaniya. Human mabalik ang iyang kahimsog, si Emma mipadayag sa iyang kabalaka mahitungod sa manuskrito. Giawhag niya si Joseph sa pag-adto sa Palmyra aron susihon si Martin.

Hangyoa ang mga estudyante sa pagpangita sa kapitulo 5 sa Mga Santos: Volume 1. Dapita ang pipila ka estudyante sa pagpuli-puli sa pagbasa og kusog gikan sa mga pahina 52–53, sugod sa parapo nga nagsugod sa “Si Joseph misakay og karwahe …” ug padayon hangtud sa katapusan sa kapitulo. Hangyoa ang klase sa pagsunod, nga mangita sa unsay nakat-unan ni Joseph mahitungod sa manuskrito ug sa unsa nga paagi kini nakaapekto kaniya.

Imbis mobasa gikan sa kapitulo 5 sa Mga Santos: Volume 1, ikonsiderar ang pagpakita sa bahin sa “The Work of God,” nga naghulagway sa mga reaksyon ni Martin Harris ug Joseph Smith human sa pagkawala sa 116 ka manuskrito nga mga pahina. Ipasalida ang video gikan sa oras nga 6:52 hangtud 8:35. Kini nga video anaa sa ChurchofJesusChrist.org.

• Ngano kaha nga gibati ni Joseph nga ang tanan nawala?

Ipasabut nga pagkasunod buntag, si Joseph nanamilit sa iyang mga ginikanan ug mibiya padulong sa Harmony. Atol sa misunod nga duha ka bulan, ang mga ginikanan ni Joseph wala makadungog kaniya. Nabalaka kaayo sila mahitungod sa iyang kaayohan ug nakahukom nga mobiyahe ngadto sa Harmony aron susihon siya.

Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–44). Ipasabut nga rekord kini sa unsay gipakigbahin ni Joseph Smith sa iyang inahan kabahin sa iyang pagpauli human mawala ang manuskrito.

Joseph Smith

“Sa akong pagbiya kaninyo … nagsugod ko sa pagpaubos sa akong kaugalingon pinaagi sa gamhanan nga pag-ampo sa atubangan sa Ginoo, … nga kon posible makaangkon unta ako og kalooy sa [Iyang] mga kamot ug mapasaylo sa tanan nga akong nabuhat nga supak sa Iyang kabubut-on” (Joseph Smith, in Lucy Mack Smith, “Lucy Mack Smith, History, 1844–1845,” book 7, mga pahina 8–9, josephsmithpapers.org).

• Unsay atong makat-unan mahitungod ni Joseph Smith gikan niini nga pamahayag?

Ipasabut nga atol niini nga panahon sa paghinulsol, si Joseph Smith nakadawat og pagpadayag nga narekord sa Doktrina ug mga Pakigsaad 3. Dapita ang usa ka estudyante sa pagbasa og kusog sa Doktrina ug mga Pakigsaad 3:5–8. Hangyoa ang klase sa pagsunod, nga mangita sa unsay gisulti sa Ginoo ni Joseph Smith.

• Unsa nga mga pulong niini nga mga bersikulo ang importante kaninyo? (Samtang nagtubag ang mga estudyante, dapita sila sa pagpasabut ngano nga kadto nga mga pulong importante kanila.)

• Sumala sa mga bersikulo 6–7, unsay nakaingon nga si Joseph Smith nakalapas “sa mga sugo ug mga balaod sa Dios”? (Human sa mga tubag sa mga estudyante, isulat ang mosunod nga baruganan diha sa pisara: Ang pagkahadlok sa uban kay sa mahadlok sa Dios mosangpot nga kita makahimo og sala. Kon gikinahanglan, ipasabut ngadto sa mga estudyante nga ang kahadlok niini nga konteksto mahimong magpasabut sa pagtamud o pagtahud.)

• Sa unsa nga mga paagi nga si Joseph Smith nahadlok ni Martin Harris kay sa iyang pagkahadlok sa Dios?

• Unsa ang pipila ka ehemplo kon sa unsa nga paagi nga ang pagkahadlok sa uban kay sa pagkahadlok sa Dios mosangpot nga kita makahimo og sala?

Dapita ang usa ka estudyante sa pagbasa og kusog sa Doktrina ug mga Pakigsaad 3:10. Hangyoa ang klase sa pagsunod, nga mangita unsay gisulti sa Ginoo ni Joseph samtang nagtinguha siya og kapasayloan.

• Kon kamo ang anaa sa dapit ni Joseph, unsa kahay inyong bation sa dihang ang Ginoo mipadayag niini nga mga pulong nganha kaninyo?

• Unsa nga baruganan ang atong makit-an gikan sa tambag sa Ginoo ngadto kang Joseph diha sa bersikulo 10? (Ang mga estudyante kinahanglan nga makakita sa usa ka baruganan nga susama sa mosunod: Ang Dios maloloy-on ug mopasaylo nato kon kita maghinulsol.)

• Ngano kaha nga importante alang nato nga makasabut niini nga baruganan?

Ipamatuod nga kon kita makasala, wala mawala ang tanan tungod kay ang Dios maloloy-on ug andam nga mopasaylo kanato kon kita maghinulsol.

Ang Ginoo mipadala ni Oliver Cowdery aron sa pagtabang sa paghubad sa Basahon ni Mormon

Oliver Cowdery

Ipasabut nga human makahinulsol si Joseph Smith, si Moroni mibalik sa bulawan nga mga palid ug sa Urim ug Thummim ngadto sa Propeta ug misulti kaniya nga makahubad na siya pag-usab. Imbis motabang ni Joseph isip usa ka tigsulat, si Martin Harris nagpabilin sa iyang panimalay didto sa Palmyra, nahasol sa iyang sayop ug sa mga aksyon sa iyang asawa sa pagpakaulaw sa Propeta. Si Emma mitabang ni Joseph isip tigsulat samtang siya nagpadayon sa paghubad. Hinoon, si Moroni misaad ni Joseph nga ang Ginoo mopadala kaniya og laing tigsulat.

Ipakita ang gisukip nga imahe, ug ipasabut nga mao kini ang litrato ni Oliver Cowdery. Pahinumdumi ang mga estudyante nga si Oliver usa ka magtutudlo kinsa nakahibalo mahitungod sa bulawan nga mga palid samtang nagpuyo sa mga ginikanan ni Joseph Smith didto sa Manchester.

Dapita ang usa ka estudyante sa pagbasa og kusog sa mosunod nga mga parapo [paragraph]:

“Nag-ampo si Oliver sa tago aron makahibalo kon unsay iyang nadungog mahitungod sa bulawan nga palid tinuod ba. Gipakita siya sa Ginoo og usa ka panan-awon sa bulawang mga palid ug sa mga paningkamot ni Joseph sa paghubad niini. Usa ka malinawon nga pagbati ang miabut kaniya, ug nasayud siya nga kinahangan siyang moboluntaryo nga mahimong tigsulat ni Joseph.

“Walay gisultihan si Oliver mahitungod sa iyang pag-ampo. Apan sa dihang nahuman na ang ting-eskwela, siya ug ang igsoong lalaki ni Joseph nga si Samuel mibaktas padulong sa Harmony, sobra sa usa ka gatus ka milya ang gilay-on” (Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw, Volume 1, Ang Sumbanan sa Kamatuoran, 1815–1846 [2018], 60).

• Unsay nakapadani ninyo mahitungod kon giunsa pagtuman sa Ginoo ang Iyang saad nga magpadala og tigsulat ngadto ni Joseph?

Ipasabut nga si Joseph ug Oliver nagsugod sa ilang trabaho niadtong Abril 7, 1829, duha ka adlaw human makaabut si Oliver sa Harmony. Sila si Joseph ug Oliver nagtrabaho sa milagroso nga gikusgon, mihuman sa hubad sa katapusang bahin sa Hunyo 1829. Gibana-bana nga si Joseph Smith mikompleto sa hubad sulod sa “saysintay-singko o ubos pa nga adlaw tingtrabaho,” naghubad “og mga walo ka pahina kada adlaw” (Russell M. Nelson, “A Treasured Testament,” Ensign, Hulyo 1993, 61).

Ipakita ang mosunod nga pamahayag ni Propeta Joseph Smith, ug dapita ang mga estudyante sa pagbasa og hilom niini:

Joseph Smith

“Ako mopahibalo kaninyo nga ako mihubad [sa basahon], pinaagi sa gasa ug gahum sa Dios” (pasiuna sa Basahon ni Mormon [1830], iii).

• Unsa ang gipamatuod ni Joseph Smith kabahin sa paghubad sa Basahon ni Mormon? (Human makatubag ang mga estudyante, isulat ang mosunod nga kamatuoran sa pisara: si Joseph Smith mihubad sa Basahon ni Mormon pinaagi sa gasa ug gahum sa Dios.)

Ipakita ang mosunod nga pamahayag ni Elder Neal A. Maxwell (1926–2004) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

Neal A. Maxwell

“Daghan kinsa nagbasa sa Basahon ni Mormon masabtan nga nagtinguha nga mahibalo pa mahitungod sa pagtungha niini, lakip ang aktwal nga proseso sa paghubad. Mao usab kini sa matinud-anon ug maunungon nga si Hyrum Smith. Sa dihang nangutana, giingnan si Hyrum ni Propeta Joseph nga ‘dili tuyo nga sultihan ang kalibutan sa tanang mga detalye sa pagtungha sa Basahon ni Mormon’ ug nga ‘dili angay nga iyang ipakigbahin kini nga mga butang’ [sa “Minutes, 25–26 Oktubre 1831,” Minute Book 2, 13, josephsmithpapers.org;]. Busa igo na ang atong nahibaloan mahitungod sa aktwal nga pagtungha sa Basahon ni Mormon, apan dili kini malukpanon. …

“Bisan unsa ang mga detalye sa proseso, kini nagkinahanglan sa lig-on, personal nga mga paningkamot uban sa tabang sa mga instrumento nga iyang gigamit sa pagdawat og pagpadayag” (Neal A. Maxwell, “By the Gift and Power of God,” Ensign, Ene. 1997, 39).

Dapita ang usa ka estudyante sa pagbasa og kusog sa Joseph Smith—Kasaysayan 1:34–35. Hangyoa ang klase sa pagsunod, nga mangita kon unsay gitudlo ni Moroni ngadto ni Joseph Smith mahitungod sa mga instrumento nga kauban sa bulawan nga mga palid.

• Unsa ang gitudlo ni Moroni kang Joseph Smith mahitungod sa mga instrumento nga kauban sa bulawan nga mga palid? (Ang Dios miandam sa Urim ug Thummim alang sa katuyoan sa paghubad sa mga palid. Ipasabut nga ang Basahon ni Mormon nag-refer sa Urim ug Thummim isip “mga tighubad” [Alma 37:21, 24].)

Ipasabut nga si Oliver Cowdery mipahayag nga sa “pagtan-aw pinaagi” sa Urim ug Thummim, si Joseph “nakahimo sa pagbasa sa Iningles, sa inusab nga Ehiptohanong pinulungan, nga gikulit diha sa mga palid” (“Book of Mormon Translation,” Gospel Topics, topics.ChurchofJesusChrist.org). Ang pipila ka makasaysayanong mga istorya gikan sa mga indibidwal kinsa diha samtang naghubad si Joseph Smith, lakip nila ni Emma Smith ug Martin Harris, nagpakita nga si Joseph usahay migamit og laing instrumento sa paghubad sa Basahon ni Mormon. Kini nga instrumento mao ang usa ka gamay nga bato nga porma og oblong, usahay gitawag nga “bato sa manalagna,” nga nadiskubrihan ni Joseph pipila ka tuig sa wala pa niya makuha ang bulawang mga palid. Kini nga mga istorya nagpakita nga si Joseph mobutang sa mga tighubad o sa bato nga manalagna ngadto sa kalo aron mababagan ang kahayag, nga nakapahimo niya nga mas makakita sa mga pulong nga makita sa instrumento. (Tan-awa sa “Book of Mormon Translation,” topics.ChurchofJesusChrist.org; tan-awa usab sa Richard E. Turley Jr., Robin S. Jensen, ug Mark Ashurst-McGee, “Si Joseph ang Manalagna,” Liahona, Okt. 2015, 10.)

Dapita ang usa ka estudyante sa pagbasa og kusog sa mosunod nga pamahayag ni Elder Neal A. Maxwell:

Neal A. Maxwell

“Dayag lang, ang tinuod nga proseso sa pagpadayag naglakip sa hunahuna ug pagtuo ni Joseph, nga dili makita sa uban sa bisan unsa nga kahimtang. …

“Nganong kita wala nay dugang pag-asoy kalabut sa proseso sa paghubad sa Basahon ni Mormon? Tingali ang hingpit nga proseso wala i-asoy tungod kay kita dili andam sa pagsabut niini, bisan og ihatag. Tingali, usab, buot sa Ginoo nga ang atong pagtuo sa Basahon ni Mormon i-base sa hugot nga pagtuo, bisan og puno kini sa importanting ebidensya. Bisan pa, gitudloan ni Kristo si Mormon, kinsa nagribyu sa kaugalingong mga pagtulun-an sa Manluluwas taliwala sa mga Nephite, sa dili pagrekord sa tanan niini diha sa mga palid tungod kay ‘Ako mosulay sa hugot nga pagtuo sa akong mga katawhan’ (3 Ne. 26:11). Tingali ang mga detalye sa paghubad gipugngan usab tungod kay gituyo nga atong ipaunlod ang atong mga kaugalingon diha sa unod sa basahon kay sa mahimong hilabihan ra ka interesado sa proseso sa atong pagdawat niini” (Neal A. Maxwell, “By the Gift and Power of God,” Ensign, Ene. 1997, 40–41).

• Ngano kaha nga ang pagkahibalo nga ang Basahon ni Mormon gihubad pinaagi sa gasa ug gahum sa Dios mas importante kay sa pagkahibalo sa piho nga mga detalye mahitungod sa proseso sa paghubad?

Likaye ang pagpangagpas

Kinahanglan nga likayan nato ang pagpangagpas mahitungod sa mga detalye nga ang Ginoo wala pa mipadayag o nga wala suportahi sa kasaligan nga mga tinubdan sa kasaysayan. Kon ang mga estudyante magtinguha nga makahibalo pa og dugang mahitungod sa hubad sa Basahon ni Mormon, angay lang nga itudlo kanila ang kasaligan nga mga tinubdan sa impormasyon, lakip sa mosunod: Russell M. Nelson, “A Treasured Testament,” Ensign, Hulyo 1993, 61–65; Neal A. Maxwell, “By the Gift and Power of God,” Ensign, Ene. 1997, 36–41; Richard E. Turley Jr., Robin S. Jensen, ug Mark Ashurst-McGee, “Si Joseph ang Manalagna,” Liahona, Okt. 2015; “Book of Mormon Translation,” Gospel Topics, topics.ChurchofJesusChrist.org.

Hatagi ang matag estudyante og kopya sa gisukip nga handout, “Ang Basahon ni Mormon Gihubad pinaagi sa Gasa ug Gahum sa Dios.” Dapita ang mga estudyante sa pagbasa og kusog sa mga parapo [paragraph] sa handout nga magpares-pares o gagmay nga mga grupo ug dayon hisgutan ang ilang mga tubag sa mga pangutana sa handout.

Ang Basahon ni Mormon Gihubad pinaagi sa Gasa ug Gahum sa Dios

Si Emma Smith, nga mitabang ni Joseph isip tigsulat samtang naghubad siya sa Basahon ni Mormon, mihatag sa mosunod nga pamahayag sa usa ka interbyu uban sa iyang anak nga lalaki, si Joseph Smith III, pipila ka bulan sa wala pa siya mamatay. Samtang basahon ninyo kini nga pamahayag, pangita og ebidensya nga si Emma mituo nga ang Basahon ni Mormon gihubad pinaagi sa gasa ug gahum sa Dios.

Emma Smith

“Si [Joseph Smith] walay manuskrito ni basahon nga mabasa [samtang siya naghubad]. …

“Kon aduna pa siyay bisan unsa nga matang dili unta niya kini matago gikan kanako. …

“Si Joseph Smith … dili makasulat ni makadiktar og klaro ug maayong pagkahan-ay nga sulat; unsa pa kaha ang pagdiktar sa usa ka libro sama sa Basahon ni Mormon. Ug, bisan ako aktibo nga partisipante sa mga talan-awon nga nahitabo, … talagsaon kini kanako, ‘usa ka kahibulongan ug katingalahan,’ ingon man ni bisan kinsa. …

“Akong nahibaloan nga ang Basahon ni Mormon naggikan sa balaanong tinubdan—ako wala gayud magduda bisan gamay sa katinuod niini. Natagbaw ko nga walay tawo nga makadiktar sa mga sinulat diha sa manuskrito gawas kon siya dinasig; tungod kay, sa dihang isip tigsulat ni [Joseph] si [Joseph] modiktar ngari kanako matag karon ug unya; ug inigbalik human og kaon, o human sa mga pagkabalda, mobalik siya kon diin siya mohunong, nga dili magtan-aw sa manuskrito o ipabasa ang bisan asa nga bahin niini ngadto kaniya. Usa kini ka naandang butang nga iyang himoon. Duha-duhaan nga ang usa ka maalamon nga tawo makahimo niini ug alang sa usa nga ignorante kaayo ug walay kaalam sama kaniya, imposible gayud kaayo” (Emma Smith, sa “Last Testimony of Sister Emma,” Saints’ Herald, Okt. 1, 1879, 289–90; tan-awa usab sa “Book of Mormon Translation,” Gospel Topics, topics.ChurchofJesusChrist.org).

• Unsa nga mga pulong gikan sa pamahayag ni Emma ang nagsuporta sa pagpamatuod ni Joseph Smith nga ang Basahon ni Mormon gihubad pinaagi sa gasa ug gahum sa Dios?

• Sa unsa nga paagi nga ang pagkahibalo nga ang Basahon ni Mormon gihubad pinaagi sa gasa ug gahum sa Dios makaimpluwensya sa paagi sa atong paglantaw ug pagtuon sa basahon?

• Giunsa ninyo sa pagkahibalo nga ang Basahon ni Mormon gihubad pinaagi sa gasa ug gahum sa Dios?

Handout: Ang Basahon ni Mormon Gihubad pinaagi sa Gasa ug Gahum sa Dios

Tapusa ang leksyon pinaagi sa pagpakigbahin sa imong pagpamatuod sa katinuod sa Basahon ni Mormon. Dapita ang mga estudyante sa pagpakita sa ilang pasalamat sa Dios alang sa Basahon ni Mormon pinaagi sa pagtuon niini kada adlaw ug paggamit sa mga pagtulun-an niini.

Dapita ang mga estudyante sa pag-andam alang sa sunod nga klase pinaagi sa pagbasa sa kapitulo 7 sa Mga Santos: Volume 1.

Handout: Ang Basahon ni Mormon Gihubad pinaagi sa Gasa ug Gahum sa Dios