Leksyon 25: Si Joseph Smith Mitugyan sa mga Yawe sa Gingharian ngadto sa mga Sakop sa Napulog Duha ug Mihatag sa King Follett nga Diskurso
“Leksyon 25: Si Joseph Smith Mitugyan sa mga Yawe sa Gingharian ngadto sa mga Sakop sa Napulog Duha ug Mihatag sa King Follett nga Diskurso,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)
“Leksyon 25,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo
Leksyon 25
Si Joseph Smith Mitugyan sa mga Yawe sa Gingharian ngadto sa mga Sakop sa Napulog Duha ug Mihatag sa King Follett nga Diskurso
Pasiuna ug Han-ay sa mga Panghitabo [Timeline]
Niadtong Enero 1844, mideklarar si Joseph Smith sa iyang kandidatura alang sa pagka-presidente sa Estados Unidos. Niadtong Marso 1844, gihimo ni Joseph ang Konseho sa Kalim-an [Council of Fifty], usa ka organisasyon nga gimugna aron motabang sa “pag-establisar sa gingharian sa Ginoo sa yuta” (Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 [2018], 589). Ang konseho kanunay nga mag-abut aron sa pagdumala sa kampanya nga mapili isip presidente ang Propeta ug sa pagsuhid sa ubang posible nga mga pamuy-anan alang sa mga Santos. Sa tingpamulak usab sa 1844, si Joseph nakigkita sa siyam sa Napulog Duha ka mga Apostoles ug misilyo, o mitugyan, kanila sa tanang mga yawe sa pagkapari [priesthood] nga gikinahanglan aron mapahigayon ang buhat sa Ginoo. Sa katapusang pakigpulong sa Propeta sa kinatibuk-ang komperensya, nga nailhan isip ang King Follett nga diskurso, mitudlo siya mahitungod sa potensyal sa katawhan nga mahimong sama sa Dios.
Enero 29, 1844Gideklarar ni Joseph Smith ang iyang kandidatura alang sa pagka-presidente sa Estados Unidos sa Amerika.
Marso 11, 1844Giorganisar ni Joseph Smith ang Konseho sa Kalim-an.
Tingpamulak sa 1844Gitugyan ni Joseph Smith ang mga yawe sa gingharian sa Dios ngadto sa mga sakop sa Korum sa Napulog Duha ka mga Apostoles.
Abril 7, 1844Si Joseph Smith mihatag sa King Follett nga diskurso.
Mga Basahunon sa Estudyante
Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 42–43
Mga Sugyot alang sa Pagtudlo
Si Joseph Smith nahimong kandidato alang sa pagka-presidente sa Estados Unidos
Ipakita ang giandam nga imahe, ug ipasabut nga kini nga imahe usa ka pahibalo nga gimantala sa usa ka pamantalaan sa Simbahan sa New York niadtong 1844 aron sa pagpahayag og suporta sa kandidatura ni Joseph Smith alang sa pagka-presidente sa Estados Unidos sa Amerika.
Base sa inyong pagbasa sa Mga Santos: Volume 1, unsa ang pipila ka importanting mga panghitabo nga nakatampo sa desisyon ni Joseph Smith nga modagan sa pagka-presidente sa Estados Unidos?
Kon gikinahanglan, pahinumdumi ang mga estudyante nga sa pagka-Nobyembre ug Disyembre 1839, si Joseph Smith ug Elias Higbee nakighimamat sa mga lider sa gobyerno sa Estados Unidos, lakip ni Presidente Martin Van Buren, aron sa pagtinguha og bayad sa pagpang-abuso ug kadaut nga nasinati sa mga Santos sa Missouri. Ang presidente misulti kanila, “Wala akoy mahimo alang kaninyo, mga higala. Kon duna man gani akoy himoon, makigbatok ako sa tibuok estado sa Missouri, ug kini nga estado mokontra kanako sa sunod nga eleksyon” (sa The Joseph Smith Papers, Documents, Volume 7: Septyembre 1839–Enero 1841, ed. Matthew C. Godfrey ug uban [2018], 260). Pagka-Nobyembre 1843, usa ka tuig sa wala pa ang sunod nga eleksyon sa pagka-presidente, si Joseph Smith misulat ngadto sa lima ka mga kandidato sa pagka-presidente, “nanghinaut nga makahibalo kon mosuporta ba sila sa mga paningkamot sa mga Santos pagbawi sa ilang nawala didto sa Missouri” (Mga Santos: Volume 1, 584). Tulo ka kandidato mitubag, apan walay usa nga misaad nga motabang sa mga Santos.
Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–44). Hangyoa ang klase sa pagpaminaw kon unsay gisulti ni Joseph Smith mahitungod sa iyang desisyon nga mahimong kandidato sa pagka-presidente.
Imahe
Joseph Smith
“Dili gayud unta ako mosugot sa sugyot sa akong mga higala nga modagan isip presidente sa Estados Unidos o magkandidato niana nga katungdanan kon ako ug ang akong mga higala nakaangkon lang sa pribilehiyo nga matagamtam ang among relihiyuso ug sibil nga mga katungod isip mga lungsuranon sa Amerika, gani kadto nga mga katungod nga gigarantiya sa Batakang Balaod ngadto sa tanang lungsuranon niini. Apan kini gihikaw kanato isip katawhan gikan pa sa sinugdanan. Ang pagpanggukod gitumong gayud kanato matag karon ug unya gikan sa mga parte sa Estados Unidos nga sama sa kasaba sa dalugdog tungod sa atong relihiyon, ug walay parte sa gobyerno sa pagkakaron ang mitabang alang sa atong kahupayan, ug isip resulta niini nga mga butang akong gibati nga akong katungod ug pribilehiyo nga maangkon ang bisan unsang impluwensya ug gahum nga akong mahimo sa legal nga paagi sa Estados Unidos alang sa pagpanalipud sa nadaut nga pagkainosente” (sa The Words of Joseph Smith, comp. ug ed. Andrew F. Ehat ug Lyndon W. Cook [1991], 320; tan-awa usab sa Manuscript History of the Church, vol. E-1, p. 1886, josephsmithpapers.org).
Sa unsang paagi kaha kini nga pamahayag makatabang kanato nga mas makasabut sa mga rason ni Joseph Smith nga mahimong kandidato sa pagka-presidente?
Ipasabut nga ang Simbahan karon migamit sa mga termino nga relihiyusong kaugalingnan o relihiyusong kagawasan nga nagpasabut sa “katungod sa ‘paggamit’ o pagsunod sa relihiyon [sa usa ka tawo] nga dili hilabtan sa gobyerno o sa uban, gawas kon gikinahanglan aron sa pagpanalipod sa panglawas ug kasiguroan” (“Unsa ang atong gipasabut kon maghisgot kita mahitungod sa relihiyusong kagawasan?” Mga Tubag sa Komon nga mga Pangutana, religiousfreedom.ChurchofJesusChrist.org). Mga unom ka bulan sa wala pa si Joseph Smith ginominar isip kandidato sa pagka-presidente, mihatag siya og usa ka pakigpulong sa Nauvoo nga naglatid sa iyang mga pagbati mahitungod sa relihiyusong kagawasan. Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith gikan niana nga pakigpulong.
Imahe
Joseph Smith
“Kon kini gikapakita nga ako andam nga mamatay alang sa usa ka ‘Mormon,’ ako prangka nga mopahayag sa atubangan sa Langit nga ako ingon ka andam nga mamatay aron pagdepensa sa mga katungod sa Presbyterian, sa Baptist, o sa maayong tawo bisan unsa nga denominasyon; tungod kay ang samang baruganan nga motamak sa mga katungod sa mga Santos sa Ulahing mga Adlaw motamak sa mga katungod sa mga Romano Katoliko, o bisan unsa nga relihiyusong grupo nga dili kaayo inila o sobra ka huyang sa pagdepensa sa ilang kaugalingon.
“Kini mao ang gugma sa kagawasan nga nagdasig sa akong kalag—sibil ug relihiyusong kagawasan sa tibuok katawhan” (Mga Pagtulun-an sa mga Presidente sa Simbahan: Joseph Smith [2007], 417).
Unsa ang labing mahinungdanon alang kaninyo niini nga pamahayag?
Unsa nga baruganan ang atong makat-unan gikan sa ehemplo ug mga pagtulun-an sa Propeta mahitungod sa relihiyusong kagawasan? (Human makatubag ang mga estudyante, isulat diha sa pisara ang mosunod nga baruganan: Ang gugma sa kagawasan makadasig kanato sa pagtabang sa pagpanalipod sa sibil ug relihiyusong kagawasan sa tanang katawhan.)
Ngano kaha nga importante man kanato nga motabang sa pagpanalipud sa sibil ug relihiyusong kagawasan sa tanang katawhan?
Ipasabut nga sa Marso 11, 1844, miorganisar si Joseph Smith og grupo sa mga tawo nga motabang sa pagdumala sa pagtukod sa gingharian sa Dios dinhi sa yuta ug sa pagpanalipud sa mga Santos ug sa ilang relihiyuso nga mga kagawasan. Kini nga grupo nailhan isip ang Konseho sa Kalim-an. Nag-abut sila kanunay niana nga tingpamulak aron motabang sa pagdumala sa kampanya alang sa pagka-presidente sa Propeta ug sa paghisgot sa mga paningkamot sa pagpangita og laing dapit diin ang mga Santos makahimo sa pagpuyo ug pagsimba nga walay pagpanglutos gikan sa uban. Niadtong Abril 1844, ang mga misyonaryo, lakip sa mga sakop sa Korum sa Napulog Duha, gitawag sa pagsangyaw sa ebanghelyo ug sa pag-ugmad og suporta alang sa kandidatura ni Joseph Smith sa pagka-presidente sa tibuok Estados Unidos. Sa wala pa sila mobiya aron magmisyon, ang mga Apostoles kanunay nga nakigkita sa Propeta.
Gitugyan ni Propeta Joseph Smith ang mga yawe sa gingharian ngadto sa mga sakop sa Korum sa Napulog Duha ka mga Apostoles
Ipakita ang giandam nga hulagway ni Joseph Smith nga nakigkita sa mga sakop sa Korum sa Napulog Duha ka mga Apostoles sa Nauvoo. Ipasabut nga sa tingpamulak sa 1844, ang Propeta nakigkita sa siyam ka sakop sa korum ug mihatag kanila og espesyal nga sugo. (Ang tulo ka mga Apostoles nga wala didto tingali dili kaayo matinud-anon nianang panahuna; ang matag usa mi-apostasiya sulod sa pipila ka tuig.) (Tan-awa sa Alexander L. Baugh ug Richard Neitzel Holzapfel, “‘I Roll the Burthen and Responsibility of Leading This Church Off from My Shoulders on to Yours’: The 1844/1845 Declaration of the Quorum of the Twelve Regarding Apostolic Succession,” BYU Studies, vol. 49, nu. 3 [2010], 13–14.)
Bahina ang klase ngadto sa gagmay nga mga grupo ug hatagi ang matag estudyante og kopya sa giandam nga handout, “Gisugo ni Joseph Smith ang Korum sa Napulog Duha ka mga Apostoles sa Pagpadayon sa Buhat sa Gingharian.” Hangyoa ang mga estudyante nga magdungan sa pagbasa sa handout ug hisguti ang ilang mga tubag sa mga pangutana nga anaa sa handout.
Gisugo ni Joseph Smith ang Korum sa Napulog Duha ka mga Apostoles sa Pagpadayon sa Buhat sa Gingharian
Si Presidente Wilford Woodruff (1807–98) mirekord sa mosunod nga istorya nga naghulagway sa usa ka miting nga gipahigayon ni Propeta Joseph Smith uban sa mga Apostoles niadtong tingpamulak sa 1844:
Imahe
Wilford Woodruff
“Si Joseph Smith, ang Propeta sa Dios, mitawag sa Napulog Duha ka mga Apostoles nga magpundok … ug migahin og daghang mga adlaw uban kanamo sa paghatag kanamo sa among mga endowment, ug nagtudlo kanamo niadtong mahimayaong mga baruganan nga gipadayag sa Dios ngadto kaniya. Ug usa niana ka okasyon mibarug siya sa among atubangan sulod sa tulo ka mga oras, namahayag ngari kanamo sa importante ug katapusang dispensasyon nga gipahimutang sa Dios aron mapahigayon dinhi sa yuta niining katapusang mga adlaw. Ang kwarto napuno sa kahayag; ang Propeta nakaangkon og tumang gahum sa Dios, ug ang iyang nawong misanag ug tin-aw kaayo, ug iyang gitapos kadto nga pakigpulong, nga dili-gayud-makalimtan karon o sa kahangturan, uban niining mosunod nga mga pulong:
“‘Mga kaigsoonan, naguol ako pag-ayo sa kahadlok nga ako kuhaon gikan sa yuta uban sa mga yawe sa gingharian sa Dios ngari kanako, nga dili matugyan diha sa mga ulo sa laing mga tawo. Gisilyo sa Dios sa akong ulo ang tanang mga yawe sa gingharian nga kinahanglanon alang sa pag-organisar ug pagtukod sa Simbahan, sa Zion, ug gingharian sa Dios dinhi sa yuta, ug sa pag-andam sa mga Santos alang sa pag-anhi sa Anak sa Tawo. Karon, mga kaigsoonan, nagpasalamat ako sa Dios nga ako buhi pa nga makakita sa adlaw nga ako makahimo sa paghatag kaninyo sa inyong mga endowment [tuga], ug karon akong isilyo diha sa inyong mga ulo ang tanang mga gahum sa Aaronic ug sa Melchizedek nga pagkapari ug ang pagkaapostol, uban sa mga yawe ug mga gahum niini, nga gisilyo sa Dios ngari kanako; ug karon akong ihatag ang responsibilidad, ang kabug-at ug pag-amuma niini nga Simbahan ug gingharian sa Dios diha kaninyo, ug karon ako nagmando kaninyo sa ngalan ni Ginoong Jesukristo sa paglig-on sa inyong mga abaga, ug agaka kini nga Simbahan ug gingharian sa Dios sa atubangan sa langit ug yuta, ug atubangan sa Dios, mga anghel ug mga tawo’” (Mga Pagtulun-an sa mga Presidente sa Simbahan: Wilford Woodruff [2004], 22).
Unsa ang labing mahinungdanon alang kaninyo niini nga istorya?
Nganong kinahanglan man nga ang mga Apostoles maghupot sa mga yawe sa gingharian sa Dios?
Human sa igong panahon, hangyoa ang mga estudyante sa pag-summarize sa mga kamatuoran nga atong makat-unan gikan sa istorya ni Presidente Woodruff. Ang mga estudyante mahimong moila og pipila ka mga kamatuoran, lakip sa mosunod: Gitugyan ni Propeta Joseph Smith ang mga yawe sa gingharian sa Dios ngadto sa mga sakop sa Korum sa Napulog Duha ka mga Apostoles.
Ngano kaha nga mibati si Propeta Joseph Smith og kadinalian sa pagtugyan sa mga yawe sa gingharian sa Dios ngadto sa mga Apostoles? (Ang mga yawe gikinahanglan aron sa pagdumala sa buhat sa Dios dinhi sa yuta, ug si Joseph nabalaka nga basin mawala ang mga yawe kon mamatay siya nga wala kini matugyan ngadto sa uban.)
Unsa ang epekto niini nga panghitabo sa Simbahan karon? (Kon gikinahanglan, tabangi ang mga estudyante nga makasabut nga kini nga mga yawe gigamit karon ubos sa direksyon sa Presidente sa Simbahan pinaagi sa mga sakop sa Unang Kapangulohan ug sa Korum sa Napulog Duha ka mga Apostoles sa pagdumala ug paggiya sa Simbahan ug sa pagtugot sa pagpahigayon sa mga ordinansa sa pagkapari nga gikinahanglan alang sa atong kaluwasan ug kahimayaan.)
Ipasabut nga niadtong 1844 si Joseph Smith nag-atubang og nagkadakong oposisyon—lakip ang gikan sa pipila ka mga miyembro sa Simbahan.
Base sa inyong pagbasa sa kapitulo 42 sa Mga Santos: Volume 1, nganong si William Law, magtatambag ni Joseph Smith sa Unang Kapangulohan, misugod man sa pagsupak sa Propeta? (Sa dihang mihangyo si William Law nga masilyo ngadto sa iyang asawa, nga si Jane, ang Ginoo mipadayag kang Joseph Smith nga si William dili makadawat sa ordinansa nianang panahona tungod kay siya nakasala sa pagpanapaw. Nasuko si William ug misugod sa hilum nga pakigkita sa ubang mga masupilon aron magplano batok sa kinabuhi sa Propeta. [Tan-awa sa Mga Santos: Volume 1, 581–583.])
Unsa nga tabang ang gihatag sa duha ka batan-ong lalaki nga ginganlan og Denison Harris ug Robert Scott ngadto ni Propeta Joseph Smith niini nga panahon? (Mitambong sila sa sekreto nga mga miting ni William Law ug mireport og makatabang nga impormasyon ngadto sa Propeta [tan-awa sa Mga Santos: Volume 1, 522].)
Mihatag si Joseph Smith sa King Follett nga pakigpulong
Ipasabut nga bisan og misupak kang Joseph Smith ang usa ka gamay nga grupo sa mga miyembro sa Simbahan ug nangangkon nga siya usa ka napukan nga propeta, kadaghanan sa mga miyembro sa Simbahan mipadayon sa pagpaluyo kaniya. Niadtong Abril 7, 1844, si Joseph Smith mihatag og pakigpulong sa usa ka kinatibuk-ang komperensya sa Nauvoo. Sa sinugdanan sa iyang pakigpulong, ang Propeta mihisgot sa miyembro sa Simbahan nga si King Follett, kinsa namatay pipila lang ka semana ang milabay. Agi og sangputanan, kini nga pakigpulong kasagarang gitawag nga King Follett nga diskurso.
Ipakita ang mosunod nga mga kinutlo sa mga pagtulun-an ni Propeta Joseph Smith gikan sa King Follett nga diskurso. Dapita ang pipila ka estudyante nga magpuli-puli sa pagbasa og kusog niini nga mga parapo. Hangyoa ang klase sa pagsunod, nga mangita sa mga kamatuoran nga gitudlo ni Joseph Smith.
Imahe
Joseph Smith
“Adunay pipila lamang ka mga tawo sa kalibutan nga nakasabut og husto sa kinaiya sa Dios. Ang kadaghanan sa mga tawo walay nasabtan bisan unsa … kabahin sa ilang relasyon ngadto sa Dios. Wala sila masayud, ni sila nakasabut sa matang niana nga relasyon. …
“Ang Dios Mismo usa ka tawo kaniadto sama kanato karon, ug nahimaya nga tawo, ug naglingkod sa trono sa kalangitan! Mao kana ang mahinungdanong sekreto. Kon ang tabil pagabuksan karon, ug ang halangdong Dios kinsa nagkontrolar niini nga kalibutan pinaagi sa iyang pagtuyok, ug kinsa nagdumala sa tanang mga kalibutan ug sa tanang mga butang pinaagi sa Iyang gahum, magpakita sa Iyang kaugalingon,—ingnon ko, kon kamo makakita Kaniya karon, makakita kamo Kaniya sama sa porma sa usa ka tawo—sama sa inyong mga kaugalingon sa pagkatawo, imahen, ug sa porma gayud sa usa ka tawo. …
“… Sa pagbaton og kahibalo sa Dios, nagsugod kita sa pagkahibalo unsaon sa pagduol Kaniya, ug unsaon sa pagpangutana aron makadawat og tubag. Kon kita makasabut sa kinaiya sa Dios, ug nasayud unsaon sa pagduol ngadto Kaniya, Iyang buksan ang mga kalangitan ngari kanato, ug mosulti kanato mahitungod niining tanan. Kon kita andam na nga moduol ngadto Kaniya, Siya andam nga moduol ngari kanato. …
“Mao kini, ang kinabuhing dayon—nga makaila sa bugtong maalamon og tinuod nga Dios; ug nga kamo kinahanglan makakat-on unsaon nga makahimo sa inyong kaugalingon nga dios, ug aron mahimo nga mga hari ug mga pari ngadto sa Dios, … nga makahimo sa usa ka gamay nga pagtubo, ngadto-ngadto ug magsugod sa gamay ngadto sa pagdako; gikan sa grasya ngadto sa grasya, gikan sa kahimayaan ngadto sa kahimayaan, hangtud nga moabut ang imong pagkabanhaw gikan sa kamatayon, ug makahimo sa pagpuyo diha sa mahangturon nga mga kahayag [celestial nga himaya], nga mahimayaon nga maghari, uban niadtong mga maghari nga may mahangturon nga gahum” (Mga Pagtulun-an sa mga Presidente sa Simbahan: Joseph Smith [2007], 46–48, 264).
Unsa nga mga kamatuoran ang atong makat-unan gikan niini nga mga pagtulun-an? (Ang mga estudyante mahimong moila og pipila ka mga kamatuoran, lakip sa mosunod: Ang Langitnong Amahan usa ka nahimaya nga tawo ug sama kanato sa hitsura ug porma. Pinaagi sa hinay-hinay nga pag-uswag sa katapusan mamahimo kitang sama sa Dios.)
Ipasabut pag-ayo nga dili kita mahimong sama sa Dios pinaagi lamang sa atong personal nga mga paningkamot. Hinoon, kita kinahanglang “[mo]duol kang Kristo ug [mag]hingpit diha kaniya” (Moroni 10:32; tan-awa usab sa D&P 76: 69; Moises 6:57).
Ngano kaha nga importante nga masayud nga ang atong Langitnong Amahan usa ka nahimaya o nahingpit nga tawo ug sama kanato og hitsura ug porma?
Sa unsang paagi ang pagkasayud nga mahimo kitang mouswag sa hinay-hinay ug sa katapusan mahimong sama sa Dios makaapekto sa mga pagpili nga atong himoon?
Unsa ang pipila ka paagi nga ang ebanghelyo ni Jesukristo motabang kanato sa hinay-hinay nga pag-uswag? (Ilista diha sa pisara ang mga tubag sa mga estudyante. Ang mga estudyante mahimong mohisgut nga ang ebanghelyo ni Jesukristo naghimong posible alang kanato nga mabuntog ang atong mga kahuyang ug mga sala samtang mopakita kita og pagtuo kang Jesukristo ug mangamuyo sa Iyang tabang, maghinulsol sa atong mga sala, ug motuman sa Iyang mga sugo.)
Kanus-a kamo mibati nga gitabangan kamo sa Langitnong Amahan sa hinay-hinay nga pag-uswag aron mahimong mas sama Kaniya?
Ipamatuod nga pinaagi sa hinay-hinay nga pag-uswag sa katapusan mamahimo kitang sama sa Dios. Dapita ang mga estudyante sa pagsunod sa mga kamatuoran nga inyong gihisgutan pinaagi sa pagpili og usa ka paagi nga magtinguha sila nga mas mahimong sama sa Langitnong Amahan ug sa pagsulat og plano nga maglatid kon unsaon nila sa paghimo niana.
Dapita ang mga estudyante nga mangandam alang sa sunod nga klase pinaagi sa pagbasa sa kapitulo 44 sa Mga Santos: Volume 1.
Imahe
Handout: Gisugo ni Joseph Smith ang Korum sa Napulog Duha ka mga Apostoles sa Pagpadayon sa Buhat sa Gingharian