Leksyon 15

Ang Unang Misyon ngadto sa Great Britain

Pasiuna ug Han-ay sa mga Panghitabo [Timeline]

Milihok ubos sa inspirasyon, sa sayong bahin sa Hunyo 1837 si Propeta Joseph Smith mitawag ni Elder Heber C. Kimball sa Korum sa Napulog Duha ka mga Apostoles sa pagserbisyo og misyon ngadto sa England. Gikuyogan sa kaubang Apostol nga si Orson Hyde ug lima pa ka mga misyonaryo, si Heber miabut sa Liverpool, England, sa tunga-tunga sa Hulyo. Human mangayo sa giya sa Ginoo, ang mga misyonaryo mibati nga nadasig sa pagbiyahe ngadto sa Preston, England, diin nakaangkon sila og dakong kalampusan sa pagsangyaw sa ebanghelyo. Sa wala pa ang ilang unang mga bunyag sa England, ang mga misyonaryo nakasinati og komprontasyon sa mga puwersa sa kaaway. Nakasinati usab sila og oposisyon gikan sa mga lider sa ubang mga simbahan. Hinoon, pinaagi sa tabang ug gahum sa Espiritu, ang mga misyonaryo nakakabig og mga usa ka libo ug lima ka gatus ngadto sa duha ka libo ka mga tawo ug nakaestablisar og mga branch sa Simbahan sa Preston, ug sa naglibut nga mga lungsod ug mga baranggay.

Sayong bahin sa Hunyo 1837Pinaagi sa pagpadayag ngadto kang Joseph Smith, ang Ginoo mitawag kang Heber C. Kimball aron sa pagserbisyo og misyon ngadto sa England.

Hulyo 19 o 20, 1837Si Heber C. Kimball ug Orson Hyde, inubanan og lima pa ka mga misyonaryo, miabut sa Liverpool, England.

Hulyo 30, 1837Ang unang mga kinabig sa England nabunyagan.

Agosto 6, 1837Ang unang branch sa Simbahan sa England giorganisar diha sa Preston.

Mayo 22, 1838Si Heber C. Kimball miuli sa Kirtland, Ohio, gikan sa iyang misyon sa England.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 24–25

Mga Sugyot alang sa Pagtudlo

Ang Ginoo mitawag ni Heber C. Kimball sa pagsangyaw sa ebanghelyo ngadto sa England

Paggamit sa mga imahe

Ang mga imahe, lakip sa mga mapa ug mga tsart, makatabang sa mga estudyante sa paghanduraw sa mga tawo, mga dapit, mga panghitabo, ug mga butang nga ilang gitun-an mahitungod sa kasaysayan sa Simbahan. Siguroa nga ang imong paggamit sa mga imahe makasuporta imbis nga makalinga gikan sa katuyoan sa leksyon.

Ipakita ang giandam nga mga imahe sa gawas ug sulod sa Templo sa Kirtland.

Dapita ang usa ka estudyante sa pagbasa og kusog sa mosunod nga mga pamahayag ni Presidente Heber C. Kimball (1801–68) sa Unang Kapangulohan, nga kaniadto sakop sa Korum sa Napulog Duha ka mga Apostoles:

“[Sa sayong bahin sa Hunyo 1837], … si Propeta Joseph miduol kanako, samtang naglingkod ko diha sa atubangan, ibabaw sa lamesa sa sakrament … [sa Templo sa Kirtland], ug, naghunghong kanako, miingon, ‘Brother Heber, ang Espiritu sa Ginoo mihunghong kanako: “Paadtoa ang akong sulugoon nga si Heber ngadto sa England ug ipasangyaw ang akong Ebanghelyo, ug paablihi ang pultahan sa kaluwasan ngadto niana nga nasud”’” (Heber C. Kimball, sa Orson F. Whitney, Life of Heber C. Kimball [1888], 116).

“Ang ideya nga matudlo ako ngadto sa ingon ka importante nga katungdanan ug misyon daw hapit dili nako maagwanta; gibati nako ang akong kahuyang ug pagkadili takus ug hapit na masanapan sa buluhaton … , ug dili ako makapugong sa pag-ingon: O Ginoo, tawo ako nga ‘yungit og dila’ ug dili gayud angayan sa ingon nga buhat. Unsaon nako sa pagsangyaw niana nga dapit, nga naila kaayo sa tibuok kristiyanong kayutaan tungod sa [pagkat-on], kahibalo, ug debosyon?” (Journal of Heber C. Kimball, ed. R. B. Thompson [1840], 10).

• Nganong gibati man ni Heber nga “dili angayan” nga mosangyaw sa ebanghelyo isip misyonaryo sa England?

• Nganong mobati man kita usahay nga dili angayan nga mobuhat sa usa ka calling o buluhaton gikan sa Ginoo ug sa Iyang mga sulugoon?

Ipasabut nga agig dugang sa mga pagbati ni Heber nga dili angayan, ang lisud nga mga kahimtang sa Kirtland panahon sa iyang tawag sa misyon [mission call] tingali nakapalisud usab kang Heber sa pagbiya aron mosangyaw sa ebanghelyo sa gawas sa nasud.

• Base sa inyong pagbasa sa mga kapitulo 24–25 sa Mga Santos: Volume 1 ug sa unsay atong gihisgutan sa leksyon 14, unsa ang mga kahimtang nga anaa sa Kirtland, Ohio, niadtong 1837 nga nakapalisud pag-ayo kang Heber sa pagserbisyo og misyon niadto nga panahon? (Kon gikinahanglan, pahinumdumi ang mga estudyante sa pinansyal nga krisis nga nakaapekto sa mga Santos sa Kirtland ug sa apostasiya sa daghang mga miyembro sa Simbahan, lakip sa ubang mga lider sa Simbahan, kinsa dayag nga misupak sa pagpangulo ni Joseph Smith.)

Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–44):

“Niini nga kahimtang … ang Dios mipadayag ngari kanako og usa ka bag-o nga butang nga kinahanglan buhaton alang sa kaluwasan sa Iyang Simbahan” (Mga Pagtulun-an sa mga Presidente sa Simbahan: Joseph Smith [2007], 397).

Ipasabut nga ang Dios mipadayag nga si Joseph Smith kinahanglang mopadala og mga misyonaryo aron sa pagsangyaw sa ebanghelyo didto sa England.

• Sa unsang paagi kaha ang pagpadala og mga misyonaryo sa England atol niining lisud nga panahon makatabang sa pagdala og kaluwasan sa Simbahan sa Ginoo? (Kon gikinahanglan, ipasabut nga si Presidente Spencer W. Kimball mitudlo nga ang misyonaryo nga buhat mao ang naghatag og kinabuhi sa Simbahan: “Kon walay mga kinabig, ang Simbahan mokupos ug mamatay” [“When the World Will Be Converted,” Ensign, Okt. 1974, 4].)

Ipakita ang mosunod nga pamahayag ni Presidente Heber C. Kimball, ug dapita ang usa ka estudyante sa pagbasa niini og kusog. Hangyoa ang klase sa pagpangita kon unsay nakatabang ni Heber nga makabaton og pagtuo aron modawat sa iyang tawag sa misyon.

“Mibati sa akong kaugalingong kahuyang ug pagkadili angayan sa ingon nga buluhaton, nakaduso kini kanako nga hugtanong mag-ampo ngadto sa Ginoo alang sa kaalam ug nianang kahupayan ug suporta nga gikinahanglan kaayo nako. …

“… Naningkamot ko nga mosalig sa Dios, nagtuo nga motabang siya kanako sa pagsangyaw sa kamatuoran, mohatag kanako sa unsay akong isulti, ug nga mohatag siya og tabang sa panahon sa panginahanglan” (Journal of Heber C. Kimball, ed. R. B. Thompson [1840], 15).

• Unsay nakatabang ni Heber aron makabaton og pagtuo nga moserbisyo sa iyang misyon, bisan pa sa iyang mga kahadlok ug mga pagbati sa pagkadili angay?

• Unsa ang pipila ka mga baruganan nga atong makat-unan gikan sa pagtuo ug ehemplo ni Heber? (Ang mga estudyante mahimong moila og pipila ka mga baruganan, apan siguroa nga moila sila og baruganan nga susama sa mosunod: Kon mosalig kita sa Ginoo bisan pa sa atong mga kahadlok ug mga kakulangan, mosuporta Siya kanato uban sa Iyang gahum ug mopasarang kanato aron sa pagbuhat sa Iyang buluhaton. Isulat kini nga baruganan diha sa pisara.)

Hangyoa ang mga estudyante sa pagpangita og ebidensya sa nahabilin nga bahin sa leksyon nga ang Dios misuporta ug mitabang ni Heber panahon sa iyang misyon.

Ipasabut nga wala kaabut og duha ka semana human madawat ang iyang tawag sa misyon, si Heber mibiya padulong sa England. Usa sa iyang mga kaila, si Robert B. Thompson, mihulagway sa iyang nasaksihan diha sa panimalay sa mga Kimball sa adlaw nga mibiya si Heber. Dapita ang usa ka estudyante sa pagbasa og kusog sa mosunod nga istorya:

“Misulod ko sa balay [sa mga Kimball] sa walay paghunahuna, tungod kay ang pultahan abli og gamay. Sa akong pagsulod, nahingangha ko sa akong nakita. Mobiya na unta ako, naghunahuna nga nanginlabut ko, apan mora ko og natiurok sa akong nahimutangan. [Si Heber] … mibu-bu sa kinahiladman sa iyang mga pagbati ngadto sa [Dios, nangamuyo] … nga Siya … mohatag unta sa gikinahanglan sa iyang kapikas ug sa gagmayng mga bata samtang wala siya. Dayon siya … mipandong sa iyang mga kamot diha kanila, sa tagsa-tagsa, mibilin og panalangin sa usa ka amahan diha [kanila], ug mitugyan kanila ngadto sa pagtagad ug pagpanalipod sa Dios, samtang naningkamot siya sa pagsangyaw sa ebanghelyo sa lagyo nga mga dapit. Samtang nagbuhat siya niini, ang iyang tingog daw dili na madungog tungod sa mga pagbakho niadtong anaa sa palibut, kinsa pakyas sa paningkamot nga dili makahilak. … Napugos siya sa paghunong matag karon ug unya, samtang ang dagkong mga luha midagayday sa iyang mga aping. … Dili nako mapugngan ang akong gibati, … [ug] nakahilak ko, ug miduyog ang akong mga luha uban kanila; sa samang higayon, gibati nako ang kamapasalamaton nga nakaangkon ko sa pribilehiyo nga makasaksi sa ingon nga talan-awon. Walay bisan unsa, naghunahuna ko, nga makaagni nianang tawhana … sa pagbiya gikan … sa iyang kapikas ug mga anak kinsa gimahal niya pag-ayo—walay lain gawas sa usa ka pagbati sa katungdanan ug gugma sa Dios, ug pagkalambigit sa iyang kawsa” (Robert B. Thompson, sa Journal of Heber C. Kimball, ed. R. B. Thompson [1840], v–vi).

Dapita ang mga estudyante sa paghanduraw nga anaa sa samang sitwasyon ni Heber, sa iyang asawa, si Vilate, o usa sa ilang mga anak, ug pangutan-a:

• Unsa nga mga hagit ang girepresentar niini nga misyon sa England diha kaninyo ug sa inyong pamilya?

Ang mga misyonaryo misangyaw sa ebanghelyo ug miestablisar sa Simbahan sa Preston, England, ug sa palibut nga mga lungsod

Ipakita ang giandam nga mapa. Ipasabut nga si Heber, inubanan ni Orson Hyde, Willard Richards, Joseph Fielding, John Goodson, Isaac Russell, ug John Snider, mibiyahe sakay sa barko gikan sa New York padulong sa Liverpool, England, miabut sa tunga-tungang bahin sa Hulyo 1837.

Bahina ang klase ngadto sa mga grupo nga tag-duha o tag-tulo. Hatagi ang matag grupo og kopya sa giandam nga handout, “Pagpangayo og Direksyon gikan sa Ginoo,” ug hangyoa sila sa pagbasa sa handout ug sa paghisgot sa ilang mga tubag sa mga pangutana nga anaa sa handout diha sa ilang mga grupo.

“Pagpangayo og Direksyon gikan sa Ginoo”

Basaha ang mosunod nga pamahayag ni Presidente Heber C. Kimball (1801–68) sa Unang Kapangulohan, nga kaniadto sakop sa Korum sa Napulog Duha ka mga Apostoles, ug hisguti ang mga pangutana nga nagsunod.

“Ang panahon nga didto kami sa Liverpool gigahin diha sa konseho, ug sa pagpangayo og direksyon gikan sa Ginoo, aron magiyahan kami ngadto sa mga dapit diin labi kaming mapuslanon sa pagsangyaw sa ebanghelyo, ug sa pag-establisar, ug pagpakatap sa iyang gingharian; samtang nagbuhat niini, ang espiritu sa Ginoo, ang kusganong gahum sa Dios miuban kanamo, ug gibati namo nga naglig-on pag-ayo, ug ang determinasyon sa pagpadayon, mabuhi o mamatay man, pasidunggan o sawayon man, gipakita namong tanan. …

“Mibati nga gigiyahan sa espiritu sa Ginoo aron moadto sa Preston … misugod kami sa pagbiyahe padulong niana nga dapit” (Journal of Heber C. Kimball, ed. R. B. Thompson [1840], 15–16).

• Sa unsang paagi kini nga istorya naghulagway sa baruganan nga “Kon mosalig kita sa Ginoo bisan pa sa atong mga kahadlok ug mga kakulangan, mosuporta Siya kanato ug mopasarang kanato sa pagbuhat sa Iyang buhat”?

• Unsa pa nga mga baruganan ang atong makat-unan gikan sa mga paningkamot niini nga mga misyonaryo sa pagtinguha sa direksyon sa Ginoo?

Dapita ang pipila ka estudyante sa pagreport sa mga tubag sa ilang grupo ngadto sa klase. Gamita ang mga tubag sa mga estudyante sa ikaduhang pangutana diha sa handout sa pagsulat og usa ka baruganan diha sa pisara nga susama sa mosunod: Samtang magtinguha kita og giya gikan sa Ginoo, mogiya Siya kanato pinaagi sa Espiritu aron masayud unsaon sa pagtuman sa Iyang buluhaton.

Hangyoa ang mga estudyante sa pagpakli ngadto sa kapitulo 24 sa Mga Santos: Volume 1. Dapita ang pipila ka estudyante nga magpuli-puli sa pagbasa og kusog gikan sa pahina 317, mosugod sa parapo nga nagsugod og “Ang mga misyonaryo ngadto sa England midunggo …” ug motapos sa parapo diha sa pahina 319 nga nagsugod og “Ang pagsangyaw mao ang panginabuhian ni James …” Hangyoa ang klase sa pagsunod, nga mangita og usa ka paagi nga giandam sa Ginoo aron ang ebanghelyo masangyaw sa Preston.

Ipasabut nga human ang mga misyonaryo misangyaw diha sa pulpito ni Reverend Fielding sa Vauxhall chapel, daghang mga miyembro sa kongregasyon ni Reverend Fielding midawat sa maayong paagi sa mensahe sa mga misyonaryo.

Ipakita ang mosunod nga pamahayag ni Presidente Heber C. Kimball, ug dapita ang usa ka estudyante sa pagbasa niini og kusog:

“Si [Reverend] Mr. Fielding, kinsa mabinationg midapit kanamo sa pagsangyaw diha sa iyang chapel, human masayud nga medyo daghan sa iyang mga sakop ang mituo sa among pagpamatuod ug nga ang uban gusto nga magpabunyag, wala na mopasulod kanamo ug wala na motugot nga mosangyaw kami diha sa iyang chapel. …

“… Hinoon, ang iyang kongregasyon wala mosunod sa iyang gibuhat, tungod kay dugay na silang nag-ampo alang sa among pag-abut, ug… sa dakong bahin andam na sila sa pagdawat sa ebanghelyo. … Tungod kay karon wala na kami masangyawan nga pangpubliko nga dapit, misugod kami sa pagsangyaw sa pribado nga mga balay, diin daghang balay sa komunidad ang mitugot sa among pagsangyaw” (Journal of Heber C. Kimball, ed. R. B. Thompson [1840], 17, 18).

• Sa unsang paagi gihulagway niini nga asoy nga ang Ginoo midasig sa mga misyonaryo sa pag-adto ngadto sa Preston?

Ipasabut nga mga usa ka semana human sa pag-abut sa Preston, ang mga misyonaryo nangandam sa pagbunyag og pipila ka mga tawo kinsa midawat sa gipahiuli nga ebanghelyo. Sayo sa buntag sa adlaw nga ipahigayon kining unang mga bunyag sa England, ang mga misyonaryo nakasinati og makahahadlok nga engkwentro sa mga pwersa sa kaaway.

Dapita ang usa ka estudyante sa pagbasa og kusog sa mosunod nga istorya ni Presidente Heber C. Kimball:

“Sa dayon nang pagsubang sa adlaw, si Brother Russel[l] … mitawag kanamo [Heber C. Kimball ug Orson Hyde] sa pagbangon ug pag-ampo alang kaniya, kay siya … gitakbuyan og dautan nga mga espiritu. … Diha-diha dayon mibangon kami ug mipatong sa among mga kamot diha kaniya ug nag-ampo nga ang Ginoo malooy sa iyang sulugoon ug mobadlong sa yawa; samtang naghimo niini, gihapak ako og kusog kaayo nga pwersa sa dili makita nga gahum ug natumba nga walay umoy diha sa salog. … [Usa ka panan-awon ang nabuksan diha sa among mga hunahuna ug kami] tataw nga nakakita sa dautang mga espiritu kinsa nagbula ang mga baba ug gikagot ang ilang mga ngipon nganha kanamo. … Gisingot ko pag-ayo, ug ang akong sinina basa kaayo nga daw gihaw-as ko gikan sa suba. … Pinaagi [niini nga kasinatian] akong nakat-unan ang gahum sa kaaway [ug] ang iyang pagdumot batok sa mga sulugoon sa Dios ug nakaangkon og gamayng pagsabut sa dili makita nga kalibutan. Hinoon, ang Ginoo miluwas kanamo gikan sa kalagut sa among espiritwal nga mga kaaway ug hilabihan nga mipanalangin kanamo nianang adlawa, ug kalipay nako nga … mobunyag sa siyam ka mga indibidwal” (Journal of Heber C. Kimball, ed. R. B. Thompson [1840], 19).

• Ngano kaha nga ang kaaway ug ang iyang panon mipakita man sa ilang mga kaugalingon niining piho nga panahon?

Dapita ang usa ka estudyante sa pagbasa og kusog sa mosunod nga istorya sa diskusyon ni Heber C. Kimball uban ni Propeta Joseph Smith kalabut sa engkwentro ni Heber sa kaaway. Hangyoa ang mga estudyante sa pagpaminaw sa usa ka baruganan nga gitudlo sa Propeta kang Heber.

“Paglabay sa katuigan, samtang nagsaysay sa kasinatian nianang ngil-ad nga buntag ngadto ni Propeta Joseph, nangutana si Heber kaniya kon unsa ang gipasabut niining tanan, ug kon aduna bay bisan unsang sayop diha kaniya nga makaangkon siya sa ingon nga pagpakita.

“‘Dili, Brother Heber,’ mitubag siya, ‘nianang higayuna duol kaayo ka sa Ginoo; tabil lamang ang nag-ali tali kanimo ug Kaniya, apan dili ka makakita Kaniya. Pagkadungog nako niini, dako kaayo ang akong kalipay, kay niana nasayud ako nga ang buhat sa Dios migamut na niana nga yuta. Mao kana ang hinungdan nga ang yawa nakig-away [batok] kanimo.’

“Si Joseph dayon misaysay og pipila ka kaugalingon niyang kasinatian, sa daghan niyang mga pakigharong batok sa dautan, ug miingon: ‘Kon ang usa ka tawo magkaduol sa Ginoo, ang mas dakong gahum ipakita sa kaaway aron mapugngan ang katumanan sa Iyang mga katuyoan’” (Orson F. Whitney, Life of Heber C. Kimball [1888], 145–46).

• Unsa ang gisugyot sa Propeta nga usa ka rason nganong ang gahum sa kaaway gitumong batok sa mga misyonaryo sa England?

• Unsa nga baruganan ang atong mailhan gikan sa engkwentro sa mga misyonaryo sa kaaway ug sa mga pagtulun-an sa Propeta kabahin niini? (Ang mga estudyante kinahanglang moila og baruganan nga susama sa mosunod: Ang kaaway molihok batok kanato samtang magtinguha kita nga mopaduol sa Ginoo ug mobuhat sa Iyang kabubut-on.)

Aron matabangan ang mga estudyante nga dugang nga makasabut niining baruganan, dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Sa dili pa ang importanting mga higayon, sa tinuod sa dili pa ang dagkong espirituhanong mga higayon, mahimong adunay moabut nga kalisdanan, oposisyon, ug kangitngit. Ang kinabuhi adunay pipila niana nga mga higayon alang kanato, ug usahay moabut kini samtang hapit na kita mohimo og importanting desisyon o importanting lakang sa atong kinabuhi” (Jeffrey R. Holland, “Cast Not Away Therefore Your Confidence,” Ensign, Marso 2000, 7).

• Unsay mga ehemplo sa espiritwal nga mga higayon, importanting mga desisyon, ug mahinungdanong mga lakang sa atong kinabuhi nga mahimong mag-atubang kita og oposisyon gikan sa kaaway?

• Sa unsang paagi nga makatabang niini nga mga higayon ang paghinumdom nga ang kaaway mobalda sa atong mga paningkamot nga mopaduol sa Ginoo ug mobuhat sa Iyang kabubut-on?

• Unsa nga giya ug tambag ang gihatag sa Ginoo aron motabang kanato sa pagsukol o pagbuntog sa ingon nga oposisyon? (Kon gikinahanglan, ipabasa sa mga estudyante ang Doktrina ug mga Pakigsaad 10:5; 1 Nephi 15:24; ug 3 Nephi 18:18.)

Ipasabut nga human makapuyo sa Preston og sobra sa usa ka semana, ang mga misyonaryo nadasig usab sa pagbisita sa palibut nga mga dapit. Si Willard Richards ug John Goodson nagmalampuson sa pagsangyaw sa ebanghelyo sa Bedford, ug si Isaac Russell ug John Snider didto sa Alston nagsangyaw. Si Joseph Fielding ug Orson Hyde mitrabaho uban ni Heber C. Kimball diha ug libut sa Preston. Bisan pa sa oposisyon gikan sa pipila ka mga ministro, ang mga misyonaryo gigiyahan sa Espiritu ngadto sa mga panimalay niadtong andam na nga modawat sa kamatuoran.

Dapita ang usa ka estudyante sa pagbasa og kusog sa mosunod nga istorya ni Presidente Heber C. Kimball:

“Miadto ko ug mipahigayon sa misyon sumala sa mga pulong sa Propeta sa buhi nga Dios ug nawala og onse ka bulan ug duha ka adlaw sa Kirtland, … diin sa maong panahon adunay mga duha ka libo ka kalag ang nadugang sa simbahan ug gingharian sa Dios, uban sa tabang nilang Elder Willard Richards, Orson Hyde, ug Joseph Fielding. …

“Ang Dios hilabihan nga mipanalangin ug mipauswag kanako. … Kabus ug huyang ako ug gamay ra kaayo og nahibaloan kalabut niini nga buhat sa ulahing mga adlaw: ang akong kahibalo mitugbang ra sa akong kasinatian. Sa samang higayon igo ang akong nahibaloan, pinaagi sa tabang sa Espiritu Santo, aron sa paglibug sa maalamon ug pagbaliwala sa binuang nga mga butang niini nga kalibutan. Gigamit sa Dios ang huyang nga mga instrumento sama kanako aron sa pagpahinabo sa iyang mahinungdanon nga mga katuyoan” (Heber C. Kimball, “Sermon,” Deseret News, Dec. 2, 1857).

Hisguti ang unang baruganan nga imong gisulat sa pisara. Dapita ang mga estudyante sa paghunahuna og usa ka higayon dihang ang Ginoo misuporta kanila sa Iyang gahum ug mipasarang kanila sa pagbuhat sa Iyang buhat samtang mosalig sila diha Kaniya. Hangyoa ang pipila ka mga estudyante sa pagpaambit sa ilang kasinatian diha sa klase. Ikonsiderar ang pagpakigbahin sa imong kaugalingong kasinatian.

Awhaga ang mga estudyante nga mosalig sa Ginoo, magtinguha sa Iyang giya, ug motuo nga Siya mosuporta ug mogiya kanila sa pagtuman sa Iyang buhat. Hangyoa ang mga estudyante sa pagsulat diha sa ilang mga study journal kon unsay ilang buhaton aron madugangan ang ilang pagsalig sa Ginoo ug mas maayong motinguha sa Iyang giya.

Dapita ang mga estudyante nga mangandam alang sa sunod nga klase pinaagi sa pagbasa sa mga kapitulo 26–28 sa Mga Santos: Volume 1.

Komentaryo ug Background nga Impormasyon

Joseph Smith ug Fanny Alger

Kon ang mga estudyante adunay mga pangutana mahitungod sa kaminyoon ni Joseph Smith ngadto ni Fanny Alger, ikonsiderar ang pagpaambit sa mosunod:

“Kon ang Dios mosugo og lisud nga buluhaton, usahay mopadala Siya og dugang nga mga mensahero aron sa pag-awhag sa Iyang katawhan sa pagsunod. Nahisubay niini nga sundanan, si Joseph misulti sa iyang mga kaubanan nga usa ka anghel mipakita kaniya sa tulo ka higayon gikan sa 1834 hangtud 1842 ug misugo kaniya nga ipadayon ang dinaghan nga kaminyoon sa dihang nagduha-duha siya sa pagtuman niini. Panahon sa ikatulo ug katapusang pagpakita, ang anghel miabut nga nagdala og hinulbot nga espada, mihulga sa paglaglag kang Joseph gawas kon siya mopadayon ug hingpit nga mosunod sa sugo.

“Ang dili kompleto nga ebidensya nagsugyot nga gisunod ni Joseph Smith ang unang sugo sa anghel pinaagi sa pagpakigminyo og dugang nga asawa, si Fanny Alger, sa Kirtland, Ohio, sa tunga-tunga sa 1830. Pipila ka mga Santos sa Ulahing mga Adlaw kinsa nagpuyo sa Kirtland mireport paglabay sa mga dekada nga giminyoan ni Joseph Smith si Alger, kinsa nagpuyo ug mitrabaho sulod sa panimalay sa mga Smith, human naangkon ni Joseph Smith ang iyang pag-uyon ug pag-uyon sa iyang mga ginikanan” (“Plural Marriage in Kirtland and Nauvoo,” Gospel Topics, topics.ChurchofJesusChrist.org).

Ipasabut nga dili klaro kon unsa ang nasabtan o gituohan ni Oliver Cowdery mahitungod sa sugo sa Ginoo, apan miabut ang punto nga misugod siya sa paghimo og sayop nga mga pasangil kalabut sa relasyon ni Propeta Joseph Smith kang Fanny Alger. Ang hilisgutan nga dinaghan nga kaminyoon mas detalyadong hisgutan diha sa mga leksyon 21 ug 24.