Leksyon 21: Si Joseph Smith Nagsunod sa Baruganan sa Dinaghan nga Kaminyoon didto sa Nauvoo, ug ang mga Kinabig nga taga-Britanya Mipundok uban sa mga Santos didto sa Amerika
“Leksyon 21: Si Joseph Smith Nagsunod sa Baruganan sa Dinaghan nga Kaminyoon didto sa Nauvoo, ug ang mga Kinabig nga taga-Britanya Mipundok uban sa mga Santos didto sa Amerika,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)
“Leksyon 21,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo
Leksyon 21
Si Joseph Smith Nagsunod sa Baruganan sa Dinaghan nga Kaminyoon didto sa Nauvoo, ug ang mga Kinabig nga taga-Britanya Nagpundok uban sa mga Santos sa Amerika
Pasiuna ug Han-ay sa mga Panghitabo [Timeline]
Sugod niadtong 1840, ang mga Santos nga taga-Britanya mibiya sa ilang mga panimalay aron moapil sa pundok sa mga Santos didto sa Amerika. Pagka-Abril 1841, agig pagsunod sa mga sugo sa Ginoo, si Propeta Joseph Smith mipadayon sa pagtuman sa dinaghan nga kaminyoon pinaagi sa pagpasilyo ngadto kang Louisa Beaman sa Nauvoo. (Sa mga tunga-tungang bahin sa katuigang 1830-1840, si Joseph Smith nakigminyo og asawa alang sa dinaghan nga kaminyoon [plural wife], si Fanny Alger, sa Kirtland, Ohio.) Pagka-Oktubre 24, 1841, gipahinungod ni Orson Hyde ang Balaan nga Yuta [Holy Land] alang sa pagpundok sa mga anak ni Abraham.
Hunyo 6, 1840Ang unang grupo sa mga kinabig nga taga-Britanya mibiya gikan sa England aron makig-uban sa mga Santos didto sa Amerika.
Abril 5, 1841Si Joseph Smith gisilyo ngadto ni Louisa Beaman.
Abril 20, 1841Si Brigham Young ug unom pa ka mga sakop sa Korum sa Napulog Duha ka mga Apostoles mibiya gikan sa ilang mga misyon sa British Isles aron mobalik ngadto sa Nauvoo, Illinois.
Oktubre 24, 1841Gipahinungod ni Orson Hyde ang Balaan nga Yuta.
Mga Basahunon sa Estudyante
Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 36
Mga Sugyot alang sa Pagtudlo
Agig pagsunod sa mga sugo sa Ginoo, si Joseph Smith mituman sa dinaghan nga kaminyoon didto sa Nauvoo
Pahinumdom: Ang leksyon 24 adunay materyal usab mahitungod sa buhat sa dinaghan nga kaminyoon.
Ipasabut nga tingali niadto pang 1831, sa dihang si Propeta Joseph Smith nagtrabaho sa dinasig nga hubad sa Daang Tugon, gipangutana niya ang Langitnong Amahan nganong ang ubang karaang mga propeta ug Israelihanon nga mga hari mihimo man og dinaghan nga kaminyoon (tan-awa sa D&P 132:1; tan-awa usab sa Genesis 16:2; 25: 6; 29:28; Exodo 21:10; 1 Samuel 25:43). Ubos niini nga kahimtang, ang usa ka lalaki maminyo og sobra sa usa ka buhi nga asawa.
Dapita ang usa ka estudyante sa pagbasa og kusog sa Doktrina ug mga Pakigsaad 132:34–38. Hangyoa ang klase sa pagsunod, nga mangita kon unsa ang gipadayag sa Ginoo kang Joseph Smith mahitungod sa baruganan sa dinaghan nga kaminyoon. (Sa dili pa basahon ang mga bersikulo, mahimo nimong ipasabut nga si Abraham unang naminyo kang Sara ug si Agar sulugoon ni Sarah.)
Unsa ang gipadayag sa Ginoo kang Propeta Joseph Smith mahitungod sa baruganan sa dinaghan nga kaminyoon? (Ang Ginoo misugo sa mga lalaki ug mga babaye sa karaang panahon sa pagsunod sa baruganan sa dinaghan nga kaminyoon. Kon gikinahanglan, ipasabut nga ang pulong nga puyo-puyo sa Daang Tugon nagpasabut sa usa ka babaye kinsa legal nga naminyo sa usa ka lalaki apan adunay mas ubos nga sosyal nga kahimtang kay sa asawa. Ang mga puyo-puyo dili kabahin sa buhat sa dinaghan nga kaminyoon sa atong dispensasyon.)
Ipasabut nga si Propeta Joseph Smith nasayud usab nga ang mga kasulatan mirekord og mga higayon nga ang buhat sa dinaghan nga kaminyoon wala dawata sa Ginoo. Sama pananglit, pipila sa mga Nephite misulay sa pagpangatarungan sa ilang sekswal nga mga kalapasan pinaagi sa paghisgot sa mga istorya sa kasulatan mahitungod ni David ug Solomon, kinsa nangasawa og daghan (tan-awa sa Jacob 2:23–24; tan-awa usab sa D&P 132:38–39). Si propeta Jacob mipanghimaraut niini nga mga Nephite tungod sa ilang walay pagtugot nga pagbuhat sa dinaghan nga kaminyoon.
Dapita ang usa ka estudyante sa pagbasa og kusog sa Jacob 2:27–30. Hangyoa ang klase sa pagsunod, nga mangita kon unsay gideklarar ni Jacob mahitungod sa sumbanan sa Ginoo kalabut sa kaminyoon.
Sumala niini nga mga bersikulo, unsaon ninyo pag-summarize sa sumbanan sa Ginoo kalabut sa kaminyoon? (Human motubag ang mga estudyante, isulat ang mosunod nga kamatuoran diha sa pisara: Ang kaminyoon tali sa usa ka lalaki ug usa ka babaye mao ang sumbanan sa Dios gawas kon lahi ang Iyang isugo. [Tan-awa usab sa D&P 49:15–16.])
Sumala sa bersikulo 30, unsa ang usa ka rason nganong ang Ginoo usahay mipasiugda og dinaghan nga kaminyoon? (Ang Ginoo mipasiugda og dinaghan nga kaminyoon sa ubang mga panahon aron sa paghatag og dugang nga mga oportunidad sa Iyang katawhan sa pagpasanay og matarung nga mga anak ngadto Kaniya.)
Ipasabut nga wala madugay human ang Ginoo mipadayag sa baruganan sa dinaghan nga kaminyoon ngadto ni Joseph Smith, gisugo Niya ang Propeta sa pagsunod niini nga baruganan isip kabahin sa ulahing mga adlaw nga pagpahiuli sa “tanang butang” (D&P 132:40, 45; tan-awa usab sa Mga Buhat 3:19–21; D&P 132:46–50). Ang mga indibidwal nga suod ni Joseph Smith mireport nga misulti siya kanila nga usa ka anghel sa Dios ang mipakita kaniya sa tulo ka higayon tali sa 1834 ug 1842, misugo kaniya sa pagsunod sa dinaghan nga kaminyoon (tan-awa sa “Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, topics.ChurchofJesusChrist.org).
Unsa ang nakapahimo niini nga sugo nga lisud sundon?
Dapita ang usa ka estudyante sa pagbasa og kusog sa mosunod nga pamahayag ni Sister Eliza R. Snow (1804–87), kinsa gisilyo ngadto ni Propeta Joseph Smith ug sa wala madugay miserbisyo isip ikaduha nga Kinatibuk-ang Presidente sa Relief Society. Hangyoa ang klase sa pagpaminaw kon unsay gireport ni Eliza mahitungod sa usa ka panagsultihanay tali ni Propeta Joseph Smith ug sa iyang igsoong lalaki nga si Lorenzo Snow.
Imahe
Eliza R. Snow
“Si Propeta Joseph mipahungaw sa iyang gibati [ngadto ni Lorenzo Snow], ug mihulagway sa lisud nga pagsulay sa hunahuna nga iyang nasinati sa pagbuntog sa iyang ngil-ad nga mga pagbati, ang natural nga resulta sa gahum sa edukasyon ug sosyal nga pamatasan, kalabut sa pagpasiugda og dinaghan nga kaminyoon. Nasayud siya sa tingog sa Dios—nasayud siya nga ang sugo sa Labawng Makagagahum ngadto kaniya mao ang pagpadayon—sa pagpakita og ehemplo, ug pag-establisar sa … dinaghan nga kaminyoon. Nasayud siya nga dili lamang ang iyang kaugalingong mga pagpihig ug kanhi mga pagsabut ang pakigbatukan ug buntugon, apan usab ang mga pagpihig sa tibuok Kristiyanong kalibutan; apan ang Dios, nga labaw sa tanan, mihatag sa sugo, ug Siya kinahanglan gayud nga sundon. Apan nagduhaduha ug naglanganlangan ang Propeta, hangtud nga ang usa ka anghel sa Dios mibarug duol kaniya nga mihulbot og espada, ug misulti kaniya nga, gawas kon mopadayon siya ug moestablisar sa dinaghan nga kaminyoon, ang iyang Priesthood pagakuhaon gikan kaniya ug siya pagalaglagon! Kini nga pagpamatuod wala lamang niya gisulti ngadto sa akong igsoon, apan usab ngadto sa uban—usa ka pagpamatuod nga dili malalis [masupak]” (Eliza R. Snow, Biography and Family Record of Lorenzo Snow [1884], 69–70).
Sumala ni Eliza R. Snow, unsa ang nakapahimo niini nga malisud alang sa Propeta nga mosunod sa sugo sa dinaghan nga kaminyoon?
Base sa pamahayag ni Eliza, nganong andam man ang Propeta nga mosunod sa sugo sa pagtuman sa dinaghan nga kaminyoon?
Dapita ang usa ka estudyante sa pagbasa og kusog sa mosunod nga parapo:
“Ang dili kompleto nga ebidensya nagsugyot nga gisunod ni Joseph Smith ang unang sugo sa anghel pinaagi sa pakigminyo og asawa alang sa dinaghan nga kaminyoon, si Fanny Alger, didto sa Kirtland, Ohio, sa mga tunga-tungang bahin sa katuigang 1830–1840. Pipila ka mga Santos sa Ulahing mga Adlaw kinsa nakapuyo sa Kirtland mireport paglabay sa mga dekada nga si Joseph Smith nakigminyo kang Alger, kinsa mipuyo ug mitrabaho diha sa panimalay nga Smith, human nga naangkon niya ang pag-uyon ni Alger ug sa iyang mga ginikanan. Gamay ra ang nahibaloan mahitungod niini nga kaminyoon, ug walay nahibaloan mahitungod sa panagsultihanay tali ni Joseph ug Emma kalabut ni Alger. Human ang kaminyoon ngadto ni Alger natapos sa pagkabulag, daw gikalimtan ni Joseph ang hilisgutan mahitungod sa dinaghan nga kaminyoon hangtud nga nabalhin na ang Simbahan ngadto sa Nauvoo, Illinois” (“Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, topics.ChurchofJesusChrist.org).
Base sa inyong pagbasa sa kapitulo 36 sa Mga Santos: Volume 1, giunsa pagpaila ni Propeta Joseph Smith ang baruganan sa dinaghan nga kaminyoon ngadto sa mga Santos sa Nauvoo? (Pribadong gitudlo ni Joseph Smith ang baruganan sa dinaghan nga kaminyoon ngadto sa piho nga mga indibidwal niadtong tinglarag sa 1840. Sa katapusan, mitanyag siya og kaminyoon sa usa ka babaye nga ginganlan og Louisa Beaman. Gidawat ni Louisa ang tanyag ug gisilyo siya ngadto kang Joseph Smith niadtong Abril 1841.)
Dapita ang usa ka estudyante sa pagbasa og kusog sa mosunod nga istorya ni Lucy Walker. Hangyoa ang klase sa pagpaminaw sa paghulagway ni Lucy kon sa unsang paagi nga nakadawat siya og pagpamatuod sa baruganan sa dinaghan nga kaminyoon sa wala pa isilyo ngadto ni Propeta Joseph Smith:
“Sa dihang unang gihisgutan ni Propeta Joseph Smith ang baruganan sa dinaghan nga kaminyoon ngari kanako gibati nako ang kasuko ug ako siyang gipahibalo niini, tungod kay ang akong mga pagbati ug edukasyon supak [batok] sa bisan unsa niana nga matang. Apan gipaniguro niya kanako nga kini nga doktrina gipadayag sa Ginoo ngadto kaniya, ug nga ako adunay katungod sa pagdawat og pagpamatuod sa balaang gigikanan niini alang sa akong kaugalingon” (Lucy Walker Kimball, affidavit, Disyembre 17, 1902, Church History Library, Salt Lake City).
“Ah, matinud-anon ko nga nag-ampo nga matuman kini nga mga pulong. Hapit na ang kadlawon human sa lain na pod nga gabii nga walay kinatulgan. Samtang nagluhod ko nga mainitong nangamuyo, ang akong kwarto napuno sa balaang impluwensya. Alang kanako ikatandi kini sa mahayag nga bidlisiw sa adlaw nga milusot sa labing itom nga panganud.
“Ang mga pulong sa Propeta natuman gayud. Ang akong kalag napuno sa kalma, matam-is nga kalinaw nga wala nako mabati sukad. Ang dakong kalipay mipuno sa tibuok nakong pagkatawo ug nakadawat ko og usa ka gamhanan ug dili kapugngan nga pagpamatuod sa kamatuoran sa … [dinaghan nga kaminyoon]” (Lucy Walker Kimball, biyograpikanhong sulat, walay petsa, 11, Church History Library, Salt Lake City).
Sa unsang paagi kaha ang kasinatian ni Lucy Walker makatabang sa usa ka tawo karon sa pagpalambo sa iyang pagtuo nga si Joseph Smith ug ang unang mga Santos milihok sumala sa mga sugo sa Dios kalabut sa buhat sa dinaghan nga kaminyoon?
Gipahinungod ni Orson Hyde ang Balaan nga Yuta, ug ang mga kinabig nga taga-Britanya mipundok uban sa mga Santos didto sa Nauvoo
Ipakita ang giandam nga hulagway. Ipasabut nga agig tubag sa tawag ni Propeta Joseph Smith, si Elder Orson Hyde sa Korum sa Napulog Duha ka mga Apostoles mibiyahe ngadto sa Balaang Yuta ug mipahinungod niini niadtong Oktubre 24, 1841, alang sa pagbalik sa mga kaliwat ni Abraham. Ang tibuok nga panaw migahin og sobra sa duha ug tunga ka tuig aron iyang matuman.
Base sa inyong pagbasa sa kapitulo 36 sa Mga Santos: Volume 1, unsa ang giampo ni Orson Hyde samtang iyang gipahinungod ang Balaan nga Yuta? (Nag-ampo siya alang sa katumanan sa mga panagna nga ihatag sa Ginoo ang Balaan nga Yuta ngadto sa mga kaliwat ni Abraham isip usa ka walay katapusan nga kabilin ug mohinumdom sa ilang binhi hangtud sa kahangturan [tan-awa sa Orson Hyde, “Interesting News from Alexandria and Jerusalem,” Millennial Star, Ene. 1842, 133–34].)
Tan-awa ang giandam nga mapa. Ipasabut nga samtang gisugdan ni Orson Hyde ang iyang panaw ngadto sa Balaan nga Yuta, ang ubang mga sakop sa Korum sa Napulog Duha ka mga Apostoles miserbisyo og mga misyon sa British Isles. Samtang ang mga Apostoles miserbisyo sa lain-laing mga rehiyon, nakakaplag sila og daghang mga tawo nga andam modawat sa gipahiuli nga ebanghelyo. Sama pananglit, diha ug libut sa Herefordshire, England, dul-an sa 1,800 ka mga tawo ang nabunyagan sulod sa usa ka tuig. Isip resulta niining talagsaon nga misyon, ang mga miyembro sa Simbahan sa British Isles misaka gikan sa dul-an 1,500 pagka-Enero 1840 ngadto sa 5,814 pagka-Abril 1841, sa dihang ang kadaghanan sa mga Apostoles mibiya sa British Isles aron moadto sa Nauvoo, Illinois.
Dapita ang usa ka estudyante sa pagbasa og kusog sa mosunod nga pamahayag sa Unang Kapangulohan sa 1840. Hangyoa ang klase sa pagpaminaw alang sa giya nga gihatag sa Unang Kapangulohan ngadto sa mga miyembro sa Simbahan niini nga panahon.
“Ang buluhaton nga kinahanglan nga humanon sa katapusan nga mga adlaw mahinungdanon kaayo, ug magkinahanglan sa kusog, kahanas, talento, ug abilidad sa mga Santos, aron kini mokaylap uban niana nga himaya ug kahalangdon nga gihulagway sa mga propeta; ug isip resulta magkinahanglan sa pagpundok sa mga Santos, aron matuman ang mga buluhaton nga ingon ka dako ug kahalangdon.
“Ang buluhaton sa pagpundok nga gipamulong diha sa mga kasulatan gikinahanglan alang sa pagpahinabo sa mga kahimayaan sa katapusan nga dispensasyon. …
“Kadtong mobati nga interesado sa paghimo niini, ug makatabang niining dako nga buluhaton, moingon kami nga paanhia sila niini nga dapit [Nauvoo]” (“To the Saints Scattered Abroad,” Times and Seasons, Okt. 1840, 178–79, josephsmithpapers.org).
Base niini nga pamahayag, unsa nga kamatuoran ang atong makat-unan kon nganong pundukon sa Ginoo ang Iyang katawhan? (Human motubag ang mga estudyante, isulat diha sa pisara ang mosunod nga kamatuoran: Ang Ginoo mopundok sa Iyang katawhan ug moawhag kanila sa paggamit sa ilang mga talento ug kusog sa pagtukod sa Iyang gingharian.)
Sa unsang paagi ang pagpundok sa mga Santos nga adunay lain-laing mga gasa ug mga abilidad makatabang sa Ginoo sa pagtukod sa Iyang gingharian?
Ipakita ang giandam nga hulagway, ug ipasabut nga usa kini ka ehemplo sa matang sa barko nga gigamit sa mga miyembro sa Simbahan sa tunga-tunga ngadto sa ulahing bahin sa mga katuigan sa 1800 aron mobiyahe gikan sa Europa ngadto sa Amerika agi og tubag sa instruksyon sa Unang Kapangulohan nga ang mga Santos maghiusa sa pagpundok. Pagka Hunyo 1840, si John Moon nangulo sa unang grupo sa mga kinabig gikan sa British Isles aron magpundok uban sa mga Santos didto sa Nauvoo.
Unsa nga mga matang sa mga hagit ang nag-uban sa pagpili nga moapil sa pundok sa mga Santos didto sa Amerika?
Dapita ang duha ka mga estudyante sa pagbasa og kusog sa mosunod nga mga istorya ni Robert Crookston ug Priscilla Staines, nga pareho nga mga Santos sa Ulahing mga Adlaw nga taga-Britanya. Hangyoa ang klase sa pagpaminaw sa mga rason nga ang mga kinabig nga taga-Britanya andam nga mopundok uban sa mga Santos didto sa Amerika.
“Kinahanglan namong ibaligya ang tanan namong mga butang sa dako kaayong pagsakripisyo. Apan gusto namong moadto sa Zion ug matudloan sa Propeta sa Dios. Kusog kaayo kanamo ang diwa sa pagpundok nga ang Babelonia walay impluwensya kanamo” (Robert Crookston, kasaysayan sa kaugalingong kinabuhi, mga 1900, 5, Church History Library, Salt Lake City).
“Gibiyaan nako ang panimalay nga akong natawhan aron mopundok ngadto sa Nauvoo. Nag-inusara ko. Usa kadto ka guol nga adlaw sa tingtugnaw sa dihang miadto ko sa Liverpool. Ang grupo nga kauban nako sa paglawig puro estranghero kanako. Sa dihang miabut ko sa Liverpool ug nakita ang dagat nga sa dili madugay mag-ulang tali kanako ug sa tanan nga akong gimahal, halos dili ko makapadayon. Apan gihatag ko na ang tanan alang sa ebanghelyo. Dili na kinahanglang moatras. Akong nahinumduman ang mga pulong sa Manluluwas: ‘Siya nga dili mobiya sa iyang amahan ug inahan, mga igsoon, tungod kanako, dili takus kanako’, ug mituo ko sa iyang saad ngadto niadtong misalikway sa tanan alang kaniya; busa nag-inusara akong nagtinguha sa ganti sa kinabuhing dayon, masaligon sa Dios” (Priscilla Staines, in Edward W. Tullidge, The Women of Mormondom [1877], 288).
Unsa ang mahinungdanon kaninyo niini nga mga istorya?
Pahinumdumi ang mga estudyante nga ang Ginoo nagsugo kanato sa bag-ohay lang nga mga katuigan pinaagi sa Iyang mga propeta sa pagpundok uban sa mga Santos diha sa nasud nga atong gipuy-an (tan-awa sa Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 81).
Sa unsang paagi kita makatabang sa pagtukod sa gingharian sa Ginoo pinaagi sa pagpundok uban sa Iyang mga Santos bisan asa kita nagpuyo? (Samtang magtigum kita, makalig-on, makadasig, ug makatabang kita sa usag usa sa pagtuman sa buhat sa Ginoo.)
Pagpamatuod sa kaimportante sa paggamit sa atong mga talento ug kusog aron sa pagtukod sa gingharian sa Dios niining katapusang dispensasyon. Dapita ang mga estudyante sa paghunahuna kon unsa nga mga talento o mga gasa ang napanalangin kanila. Hangyoa sila sa paghunahuna kon unsay ilang buhaton sa paggamit niadto nga mga talento ug mga gasa aron motabang sa pagtukod sa gingharian sa Dios diha sa ilang gipuy-an.
Awhaga ang mga estudyante nga mangandam alang sa sunod nga klase pinaagi sa pagbasa sa kapitulo 37 sa Mga Santos: Volume 1.
Komentaryo ug Background nga Impormasyon
Ang pagpundok sa katawhan sa Dios karon
Si Presidente Russell M. Nelson mitudlo nga ang indibidwal nga mga Santos kinahanglang magpundok diha sa ilang tagsa-tagsa ka mga nasud:
Imahe
Russell M. Nelson
“Ang pagpili sa pagduol ngadto kang Kristo wala magdepende kon asa ka nagpuyo; nagdepende kini sa indibidwal nga pasalig. Ang mga tawo mahimong ‘pagadad-on sa kasayuran sa Ginoo’ [3 Nephi 20:13] nga dili mobiya sa ilang mga yutang natawhan. Tinuod, sa unang mga adlaw sa Simbahan, ang konbersyon [pagkakabig] sa kasagaran nangahulugan usab og pagbalhin. Pero karon, ang pagpundok nahitabo diha sa kada nasud. Ang Ginoo mimando sa pag-establisar sa Zion sa matag kayutaan diin Iyang gihatag sa Iyang mga Santos ang ilang natawhan ug nasyonalidad. Ang kasulatan nanagna nga ang mga tawo ‘matigum pagbalik ngadto sa kayutaan nga ilang panulundon, ug mapahiluna sa tanan nila nga mga yuta sa saad’ [2 Nephi 9:2]. ‘Ang matag nasud mao ang dapit sa pagpundok alang sa kaugalingon niining katawhan’ [Bruce R. McConkie, sa Conference Report, Mexico City Mexico Area Conference 1972, 45]. Ang dapit sa pagpundok alang sa Brazilian nga mga Santos mao ang Brazil; ang dapit sa pagpundok alang sa Nigerian nga mga Santos mao ang Nigeria; ang dapit sa pagpundok alang sa Korean nga mga Santos mao ang Korea; ug uban pa. Ang Zion mao ‘ang putli og kasingkasing’ [D&P 97:21]. Ang Zion mao ang dapit diin anaa ang matarung nga mga Santos. Ang mga publikasyon, mga komunikasyon, ug mga kongregasyon anaa karon aron sa ingon hapit tanang mga miyembro makahupot sa mga doktrina, mga yawe, mga ordinansa, ug mga panalangin sa ebanghelyo, nga dili magsapayan sa ilang mga nahimutangan.
“Ang espirituhanong seguridad kanunay nga magdepende kon giunsa sa pagpakabuhi sa usa ka tawo, dili kon asa ang usa ka tawo nagpuyo. Ang mga Santos sa matag dapit adunay patas nga pag-angkon sa mga panalangin sa Ginoo” (Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 81).
