Leksyon 2

Unang Panan-awon ni Joseph Smith

Pasiuna ug Han-ay sa mga Panghitabo [Timeline]

Sa iyang kabatan-on, si Joseph Smith nagtinguha nga makasabut unsay iyang kinahanglan nga buhaton sa pagdawat og kaluwasan ug unsa nga simbahan nga iyang apilan. Samtang nagbasa sa Biblia, nadasig siya sa pagpangutana sa Dios alang sa direksyon. Sa dihang si Joseph Smith nag-ampo didto sa kakahoyan duol sa iyang panimalay, ang Dios Amahan ug si Jesukristo nagpakita ug nakigsulti kaniya. Human makasinati niini nga panan-awon, si Joseph Smith mipamatuod sa katinuod niini bisan kon ang uban dili motuo kaniya ug migukod kaniya (tan-awa sa Joseph Smith—Kasaysayan 1:27).

Disyembre 23, 1805Si Joseph Smith natawo sa Vermont.

Tingtugnaw sa 1816–17Ang pamilya ni Joseph Smith mibalhin ngadto sa Palmyra, New York.

Mga Enero 1819Ang pamilya ni Joseph Smith mibalhin ngadto sa usa ka umahan sa Manchester, New York.

Tingpamulak sa 1820Si Joseph Smith nakakita ug nakigsulti sa Dios nga Amahan ug ang Iyang Anak, si Jesukristo.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 1–2

Mga Sugyot alang sa Pagtudlo

Tabangi ang mga estudyante nga matuman ang ilang katungdanan sa espirituhanon nga pagkat-on

Ang espirituhanon nga pagkat-on nagkinahanglan og paningkamot sa kabahin sa tigkat-on. Si Elder David A. Bednar sa Korum sa Napulog Duha ka mga Apostoles mitudlo: “Ang usa ka nagkat-on nga naggamit sa kabubut-on pinaagi sa paglihok sumala sa saktong mga baruganan mibukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 64). Ikaw makatabang sa mga estudyante nga makatuman sa ilang katungdanan sa proseso sa pagkat-on pinaagi sa pagdapit kanila nga magmakugihon sa pagtuon, pagpamalandong, pagtudlo, pagpamatuod sa, ug pagsunod sa balaan nga kamatuoran.

Si Joseph Smith nagtinguha nga makasabut unsay iyang kinahanglan nga buhaton aron makadawat og kaluwasan ug unsa nga simbahan ang iyang apilan

Isulat ang mosunod nga mga pulong diha sa pisara: Gubat sa mga pulong ug kagubot sa mga opinyon.

• Unsa nga mga hunahuna o mga imahe ang moabut sa inyong hunahuna sa mga pulong “gubat sa mga pulong ug kagubot sa mga opinyon?

Kon gikinahanglan, ipasabut nga si Joseph Smith migamit niini nga mga pulong sa paghulagway sa relihiyoso nga mga pagdebate nga iyang nasaksihan sa dihang siya nag-edad og 12 ug 14 (tan-awa sa Joseph Smith—Kasaysayan 1:9–10).

• Unsa ang pipila ka ehemplo kon sa unsa nga paagi nga ang mga tawo anaa sa gubat sa mga pulong ug kagubot sa mga opinyon sa atong panahon?

• Sa unsa nga paagi nga kini nga gubat sa mga pulong ug kagubot sa mga opinyon makapalisud sa pagpangita o pag-ila sa kamatuoran?

Dapita ang mga estudyante sa pagpangita sa mga baruganan ug doktrina samtang sila magtuon mahitungod sa pagsiksik ni Joseph Smith alang sa kamatuoran nga makatabang nila sa pagpangita ug pag-ila sa kamatuoran.

Ipakita ang gisukip nga mapa, “Amihanang silangang Estados Unidos.”

mapa sa amihanang silangang Estados Unidos

Ipasabut nga sa dihang si Joseph Smith nag-edad og 11 anyos, ang iyang pamilya mibalhin gikan sa Vermont ngadto sa Palmyra, New York. Paglabay og kapin sa usa ka tuig, ang mga Smith nakigsabut nga mopalit og gatusan ka ektarya nga yuta nga naay kakahoyan didto sa Manchester, habagatan sa Palmyra. Ang pamilya miandam sa yuta nga umahon ug sa katapusan mitukod og balay nga troso diha niini. (Mahimo nimong ipakita ang imahe sa pamilyang Smith nga mitukod pag-usab sa balay nga troso.)

Balay nga troso sa Smith

Ipasabut nga sa rehiyon diin ang pamilyang Smith nagpuyo, dihay “talagsaon nga kasamok mahitungod sa relihiyon” panahon sa kabatan-unan ni Joseph (Joseph Smith—Kasaysayan 1:5). Ipakita ang mosunod nga pamahayag nga girekord ni Propeta Joseph Smith (1805–44), sa iyang 1832 nga kasaysayan, ug dapita ang usa ka estudyante sa pagbasa niini og kusog:

Joseph Smith

“Sa mga edad nga napulog duha ka tuig, ang akong hunahuna seryosong nadani sa tanang importante nga mga pagpakabana alang sa akong imortal nga kalag. …

“… Namalandong ako og daghang mga butang sa akong kasingkasing mahitungod sa sitwasyon sa kalibutan—ang panagbingkil ug pagkabahin, ang pagkadautan ug pagkasalawayon, ug ang kangitngit nga mituhop sa mga hunahuna sa katawhan. Ang akong hunahuna nahasul pag-ayo, kay ako mibati nga sad-an tungod sa akong mga sala. … Akong gibati nga magbangutan alang sa akong kaugalingong mga sala ug alang sa mga sala sa kalibutan” (“Joseph Smith’s Accounts of the First Vision,” Gibana-bana sa ting-init niadtong 1832 nga Kasaysayan, josephsmithpapers.org).

Ipasabut nga ang pagpakabana ni Joseph alang sa kaayohan sa iyang kalag nakapaawhag niya sa pagtambong og mga miting sa lain-laing relihiyoso nga mga denominasyon atol sa misunod nga duha ka tuig sa iyang kinabuhi.

• Sa unsa nga paagi nga ang mga pangangkon sa lain-lain relihiyoso nga mga denominasyon nakasalmot sa kalibug ni Joseph? (Kon gikinahanglan, mahimong imong i-refer ang mga estudyante sa Joseph Smith—Kasaysayan 1:5–10.)

I-follow up ang gitudlo nga mga basahunon sa estudyante

Paghimo og makahuluganon nga mga oportunidad diha sa klase alang sa mga estudyante sa pagpakigbahin unsay ilang nakat-unan gikan sa gitudlo nga mga basahunon sa estudyante. Ang pagbuhat sa ingon makapaaghat sa mga estudyante sa pagkompleto sa ilang gitudlo nga mga basahunon sa dili pa ang klase ug moanha sa klase nga andam sa “pagtudlo sa usag usa” (D&P 88:77).

• Base sa inyong gibasa sa kapitulo 1 sa Mga Santos: Volume 1, sa unsa nga paagi nga ang pagsiksik ni Joseph alang sa kamaturoan sa nagkalain-laing relihiyoso nga mga denominasyon migiya niya nga makaangkon og importante nga kasinatian sa mga kasulatan?

Mahimo nimong ipakita ang mosunod nga pamahayag ni Elder B. H. Roberts (1857–1933) ug modapit og usa ka estudyante sa pagbasa niini og kusog:

B. H. Roberts

“Si Reverend Mr. Lane sa simbahan nga Methodist miwali sa hilisgutan, ‘Unsa nga simbahan ang akong apilan?’ Iyang gikutlo ang [Santiago 1:5]. …

“Ang pulong nakahatag og lawom nga impresyon sa hunahuna ni [Joseph Smith]. Gibasa niya kini sa iyang pagpauli, ug namalandong niini pag-ayo” (B. H. Roberts, A Comprehensive History of the Church, 1:52–53; tan-awa usab sa Mga Santos: Volume 1, 12–13).

Ipares-pares ang mga estudyante ngadto sa ginagmayng grupo. Hangyoa sila sa pagtuon sa Joseph Smith—Kasaysayan 1:11–16 sa ilang kapares o mga grupo, nga mangita sa mga baruganan nga atong makat-unan gikan sa kasinatian ni Joseph Smith nga makatabang nato sa atong pagsiksik sa kamatuoran. Dapita ang mga estudyante sa pagkonsiderar nga markahan ang unsay ilang nakit-an.

Human ang mga estudyante dunay igong panahon sa pagtuon ug paghisgot sa mga bersikulo 11–16, dapita ang pipila ka estudyante sa pag-report og baruganan nga ilang nailhan. Sa ilang pagbuhat sa ingon, ikonsiderar ang paghangyo kanila sa pagpasabut sa unsa nga paagi kana nga baruganan makatabang nato sa atong pagsiksik sa kamatuoran.

Kon ang mga estudyante dili mohisgot niini, ipasabut ang mosunod nga baruganan nga gitudlo sa Santiago 1:5 (sumala sa narekord sa Joseph Smith—Kasaysayan 1:11): Kon kita mangayo sa Dios, Siya mohatag nato sa kaalam nga atong gitinguha. Ipakita ang mosunod nga pamahayag ni Presidente Henry B. Eyring sa Unang Kapangulohan, ug dapita ang usa ka estudyante sa pagbasa niini og kusog:

Henry B. Eyring

“Ang paghukom ug lohikal nga hunahuna lang sa tawo dili igo aron matubag ang importante nga mga pangutana sa kinabuhi. Nagkinahanlan kita og pagpadayag gikan sa Dios” (Henry B. Eyring, “Padayon nga Pagpadayag,” Liahona, Nob. 2014, 70).

• Unsa ang pipila ka mga paagi nga kamo napanalanginan pinaagi sa pagkahibalo nga ikaw makapangutana sa Dios ug makadawat og kaalam pinaagi sa pagpadayag?

Awhaga ang mga estudyante sa pagpangutana sa Dios kon sila nagkinahanglan sa kaalam ug pagpadayag.

Ang Langitnong Amahan ug ang Iyang Anak, nga si Jesukristo, nagpakita ngadto ni Joseph Smith agig tubag sa iyang pag-ampo

Dapita ang pipila ka estudyante nga magpuli-puli sa pagbasa og kusog sa Joseph Smith—Kasaysayan 1:17–19. Hangyoa ang klase sa pagsunod, nga mangita kon sa unsa nga paagi nga natubag ang pag-ampo ni Joseph Smith.

• Unsa nga mga kamatuoran ang atong makita gikan sa mga bersikulo 17–19? (Ang mga estudyante mahimong moila sa pipila ka kamatuoran, lakip sa mosunod: ang Dios Amahan ug ang Iyang Anak, nga si Jesukristo, nagpakita ug nakigsulti ni Joseph Smith. Isulat kini nga kamatuoran sa pisara.)

I-refer ang mga pulong nga “Gubat sa mga pulong ug kagubot sa mga opinyon.

• Sa unsa nga paagi nga ang kahibalo sa panan-awon ni Joseph Smith sa Langitnong Amahan ug ni Jesukristo makatabang nato sa pagbuntog sa kalibug nga miresulta gikan sa gubat sa mga pulong ug kagubot sa mga opinyon sa atong panahon?

Ipasabut nga agig dugang sa istorya sa Unang Panan-awon nga narekord niadtong 1838 ug sa wala madugay namantala sa Joseph Smith—Kasaysayan, si Propeta Joseph Smith mirekord usab sa istorya sa iyang 1832 nga kasaysayan, midiktar og istorya alang sa iyang journal niadtong 1835, ug midiktar og laing istorya niadtong 1842 sa usa ka sulat nga gisulat ngadto sa usa ka editor sa pamantalaan nga ginganlan og John Wentworth. Usab adunay lima ka segunda mano nga mga paghulagway sa Unang Panan-awon nga girekord sa mga kadungan ni Joseph Smith (tan-awa sa “First Vision Accounts,” Gospel Topics, topics.ChurchofJesusChrist.org).

I-pakita ang mosunod nga pamahayag ug dapita ang usa ka estudyante sa pagbasa niini og kusog:

“Ang nagkalain-laing mga saysay sa Unang Panan-awon nagsulti og makanunayon nga istorya, bisan kon managlahi kini sa gihatagan og gibug-aton ug detalye. Ang mga magsasaysay naglaum nga kon ang indibidwal mosulti og usa ka kasinatian sa daghang mga sitwasyon sa lain-laing tigpaminaw sa daghang katuigan, ang matag istorya mohatag og gibug-aton sa lain-laing mga aspeto sa kasinatian ug maglakip og lahi nga mga detalye. Sa pagkatinuod, ang kalainan nga susama sa mga istorya sa Unang Panan-awon anaa sa nagkalain-laing mga saysay sa kasulatan kabahin sa panan-awon ni Pablo diha sa dalan sa Damasco ug sa kasinatian sa mga Apostoles didto sa Bukid saTranspigurasyon. Apan bisan pa sa kalainan, adunay importanting pagkamakanunayon sa tanang mga istorya sa Unang Panan-awon. Ang pipila sayop nga nakiglalis nga ang bisan unsang kausaban diha sa pagsaysay og balik sa istorya usa ka ebidensya nga kini bakak. Hinoon, ang buhong nga rekord sa kasaysayan makapahimo nato sa pagkat-on og dugang mahitungod niining talagsaong hitabo kay kon kini wala pa kaayo mahimoi og dokumento” (“First Vision Accounts,” Gospel Topics, topics.ChurchofJesusChrist.org).

Aron matabangan ang mga estudyante nga makasabut sa kasinatian ni Joseph Smith sa pagkakita ug pagpakigsulti sa Langitnong Amahan ug ni Jesukristo, bahina ang klase ngadto sa tulo ka grupo, ug hatagi ang matag estudyante og kopya sa gisukip nga handout, “Dugang nga Istorya sa Unang Panan-awon ni Joseph Smith.” Itudlo ang matag grupo nga magtuon sa usa sa mga istorya sa Unang Panan-awon nga anaa sa handout, nga mangita sa mga detalye nga makatabang nila nga mas makasabut unsay nahitabo atol sa Unang Panan-awon. Dapita ang mga estudyante nga ikonsiderar ang pagmarka sa mga detalye nga importante kanila.

Dugang nga mga Istorya sa Unang Panan-awon nga Gihatag ni Joseph Smith

Kasaysayan, Gibana-bana sa Ting-init 1832

Sagrado nga Kakahoyan

“Nag-ampo ako ngadto sa Ginoo alang sa kalooy, kay walay lain nga akong kaduolan ug makapangayo og kalooy. Ug ang Ginoo nakadungog sa akong pag-ampo sa kamingawan, ug samtang nagtawag sa Ginoo, sa nag-edad ako og dise-sais anyos, usa ka dako nga gilis sa kahayag labaw sa kahayag sa adlaw sa udtong tutok mikanaog gikan sa ibabaw ug midapat kanako. Napuno ako uban sa espiritu sa Dios, ug ang Ginoo miabli sa mga langit diri kanako ug akong nakita ang Ginoo.

“Ug siya namulong nari kanako, nag-ingon, ‘Joseph, akong anak, ang imong mga sala gipasaylo na. Lakaw, magalakaw kamo sa akong kabalaoran, ug pagabantayan ninyo ang akong mga sugo, ug pagabuhaton ninyo sila. Tan-awa, Ako mao ang Ginoong Dios sa himaya. Ako gilansang sa krus alang sa kalibutan, aron kadtong tanan nga motuo sa akong ngalan mahimo nga makaangkon og kinabuhing dayon. Tan-awa, ang kalibutan naglunang sa sala niining higayuna, ug walay usa ang nagbuhat og maayo, wala, bisan usa. “Mipalayo sila sa ebanghelyo ug wala magbantay sa akong mga sugo. Sila nagpaduol ngari kanako uban sa ilang mga ngabil, apan ang ilang mga kasingkasing layo gikan kanako. Ug ang akong kasuko napukaw batok sa mga lumulupyo sa yuta, sa pagbisita kanila sumala sa ilang pagkadili diosnon ug sa pagpahinabo diin gipamulong pinaagi sa ba-ba sa mga propeta ug mga apostoles. Moanha na ako sa dili madugay, ingon nga nahisulat mahitungod kanako, diha sa mga panganod sa langit, gisul-uban sa gahum ug dako nga himaya sa akong Amahan.’

“Ang akong kalag napuno sa gugma ug sulod sa daghang mga adlaw nagmaya ako uban sa hingpit nga kalipay.”

Journal, Nobyembre 9–11, 1835

“Nangamuyo ako sa Ginoo sa kusganon nga pag-ampo. Usa ka dako nga gilis sa kalayo mipakita ibabaw sa akong ulo. Kini mitugdon diha kanako ug mipuno kanako sa dili mahulagway nga kalipay. Usa ka personahe mipakita taliwala niining dako nga gilis sa kalayo, nga mikatap sa palibut apan walay bisan unsa nga nasunog. Laing personahe dayon mipakita sama sa nahauna. Siya miingon kanako, ‘Ang imong mga sala gipasaylo na.’ Mipamatuod siya kanako nga si Jesukristo mao ang anak sa Dios. Ug nakakita ako og daghang mga anghel niini nga panan-awon.”

“Kasaysayan sa Simbahan,” Marso 1, 1842 (Wentworth Letter)

“Miadto ko sa sekreto nga dapit sa kakahoyan ug nagsugod sa pagtawag sa Ginoo. Samtang mainiton akong nangamuyo, ang akong hunahuna gidala palayo gikan sa mga butang nga naglibut kanako, ug naputos ako sa usa ka langitnong panan-awon ug nakakita og duha ka mahimayaong mga personahe kinsa sama gayud og hitsura sa usag usa, ug panagway, gialirongan sa usa ka kahayag nga mibuntog sa adlaw sa udtong tutok. Sila miingon kanako nga ang tanan nga relihiyosong mga denominasyon nagtuo sa sayop nga mga doktrina, ug nga wala niini ang giila sa Dios isip iyang simbahan ug gingharian. Ug ako piho nga gisugo nga ‘dili monunot kanila,’ ug sa samang higayon nakadawat og saad nga ang kahingpitan sa ebanghelyo ipahibalo kanako sa umaabut nga panahon.”

(“Joseph Smith’s Accounts of the First Vision,” josephsmithpapers.org.)

Handout: Dugang nga mga Istorya sa Unang Panan-awon nga Gihatag ni Joseph Smith

Human makabaton ang mga estudyante og igong panahon sa pagtuon, dapita ang mga estudyante gikan sa matag grupo sa pag-report unsay ilang nakita nganha sa klase.

• Sa unsa nga paagi nga ang mga detalye gikan sa nagkalain-laing mga istorya nga atong gihisgutan makatabang nimo nga mas makasabut sa kasinatian ni Joseph Smith sa Unang Panan-awon?

• Base niini nga mga istorya, sa unsa nga paagi nga ang mensahe sa Manluluwas makatabang ni Joseph sa iyang mga kabalaka mahitungod sa kaayohan sa iyang kalag?

Dapita ang mga estudyante sa pagpamalandong sa mosunod nga pangutana ug sa pagkonsiderar sa pagrekord sa ilang mga tubag diha sa ilang mga study journal:

• Giunsa ninyo sa pagkahibalo nga si Joseph Smith nakakita ug nakigsulti sa Langitnong Amahan ug ni Jesukristo?

• Sa unsang paagi ang inyong pagpamatuod sa Unang Panan-awon nakaapekto sa inyong kinabuhi?

Dapita ang usa o daghang mga estudyante sa pagpakigbahin sa ilang mga tubag uban sa klase kon gibati nila nga komportable ang pagbuhat sa ingon.

Si Joseph Smith mipamatuod sa katinuod sa Unang Panan-awon

Ipasabut nga ang usa ka tigsangyaw ug ang uban sa komunidad ni Joseph Smith misalikway sa iyang pagpamatuod ug migukod kaniya sa dihang gisultihan niya sila mahitungod sa panan-awon nga iyang nasinati (tan-awa sa Joseph Smith—Kasaysayan 1:21–23).

Dapita ang usa ka estudyante sa pagbasa og kusog sa Joseph Smith—Kasaysayan 1:24–25. Hangyoa ang klase sa pagsunod, nga mangita kon giunsa pagtubag ni Joseph Smith sa dihang ang mga tawo mipili nga dili motuo sa iyang pagpamatuod. Dapita ang mga estudyante nga ikonsiderar ang pagmarka sa mga pulong nga importante alang kanila.

• Unsa nga mga pulong niini nga mga bersikulo 24–25 ang importante alang kaninyo? Ngano?

• Unsa nga mga baruganan ang atong makat-unan gikan sa ehemplo ni Joseph Smith nga magpabilin nga matinud-anon sa iyang pagpamatuod? (Ang mga estudyante mahimong moila sa mga baruganan sama sa mosunod: Ang kahibalo nga atong madawat gikan sa Dios tinuod bisan kon ang kalibutan mosalikway niini. Makapili kita nga magpabilin nga matinud-anon sa atong pagpamatuod bisan kon kita gikasilagan ug gigukod sa pagbuhat sa ingon. Wala nato mapahimuot ang Dios ug ubos kita sa panghimaraut kon kita dili magpabilin nga matinud-anon sa pagpamatuod nga Iyang gihatag kanato.)

Itudlo nga sama sa panahon ni Joseph Smith, adunay mga tawo karon kinsa nagtinguha sa pagpahuyang sa kamatuoran sa pagpamatuod ni Joseph Smith sa Unang Panan-awon. Ipakita ang mosunod nga pamahayag ni Presidente Gordon B. Hinckley (1910–2008), kabahin sa Unang Panan-awon, ug dapita ang usa ka estudyante sa pagbasa niini og kusog.

Gordon B. Hinckley

“Sulod sa kapin sa usa ka siglo ug tunga, ang mga kaaway, mga kritiko, ug pipila nga mga eskolar migahin sa ilang kinabuhi nga naningkamot sa pagsupak sa pagkabalido niana nga panan-awon. Siyempre wala sila makasabut niini. Ang mga butang sa Dios masabtan pinaagi sa Espiritu sa Dios. Walay laing ikatandi sa gidak-on sukad ang Anak sa Dios nakalakaw sa yuta panahon sa pagkamortal. Kon wala kini isip pundasyon nga bato sa atong tinuhoan ug organisasyon, wala kitay bisan unsa. Uban niini, naa nato ang tanan.

“Daghan na ang nahisulat, daghan pa ang isulat, sa paningkamot sa pagpasabut niini. … Apan ang pagpamatuod sa Balaan nga Espiritu, nga nasinati nga dili maihap sa daghang mga tawo sa milabayng katuigan sukad kini nahitabo, nagsaksi nga kini tinuod, nga kini nahitabo sama sa gisulti ni Joseph Smith nga kini nahitabo” (Gordon B. Hinckley, “Four Cornerstones of Faith,” Ensign, Peb. 2004, 5).

• Sa unsa nga mga paagi nga ang Unang Panan-awon ni Joseph Smith usa ka “pundasyon nga bato” alang sa atong tinuohan?

• Unsay atong mahimo aron makatabang nato nga magpabilin nga matinud-anon sa atong pagpamatuod sa Unang Panan-awon?

Ipakigbahin ang imong pagpamatuod bahin sa mga kamatuoran nga gihisgutan niini nga leksyon. Awhaga ang mga estudyante sa pagsunod niini nga mga kamatuoran.

Dapita ang mga estudyante sa pag-andam alang sa sunod nga klase pinaagi sa pagbasa sa mga kapitulo 3–4 sa Mga Santos: Volume 1.

Handout: Dugang nga mga Istorya sa Unang Panan-awon nga Gihatag ni Joseph Smith