Leksyon 10: Si Joseph Smith Nagpangadto-nganhi sa Ohio ug Missouri, Mipadayon sa Paghubad sa Biblia, ug Mibalhin ngadto sa Kirtland
“Leksyon 10: Si Joseph Smith Nagpangadto-nganhi sa Ohio ug Missouri, Mipadayon sa Paghubad sa Biblia, ug Mibalhin ngadto sa Kirtland,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)
“Leksyon 10,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo
Leksyon 10
Si Joseph Smith Nagpangadto-nganhi sa Ohio ug Missouri, Mipadayon sa Paghubad sa Biblia, ug Mibalhin ngadto sa Kirtland
Pasiuna ug Han-ay sa mga Panghitabo [Timeline]
Agig pagsunod sa sugo sa Ginoo, niadtong Abril 1, 1832, si Propeta Joseph Smith ug ang uban mibiya padulong sa Missouri aron sa pagpahigayon sa buluhaton sa Simbahan (tan-awa sa D&P 78:9). Sa dihang mibalik si Joseph Smith gikan sa Missouri pagka-Hunyo 1832, mipuyo na usab siya sa Hiram, Ohio, ug mitrabaho sa paghubad sa Biblia. Pagka-Septyembre 1832, si Joseph Smith ug ang iyang pamilya mibalhin ngadto sa mga lawak sa ibabaw sa Tindahan ni Newel K. Whitney sa Kirtland, Ohio. Ang ibabaw nga mga lawak sa tindahan maoy nagsilbing punoang buhatan sa Simbahan hangtud sa Pebrero 1834. Niining panahona, si Propeta Joseph Smith mipadayon sa iyang paghubad sa Biblia ug nakadawat og dugang nga mga pagpadayag nga migiya sa Simbahan sa paglambo niini.
Abril–Hunyo, 1832Si Propeta Joseph Smith mibiyahe padulong ug gikan sa Missouri.
Hulyo 1832Nakompleto ni Joseph Smith ang iyang inisyal nga paghubad sa Bag-ong Tugon ug mipadayon sa iyang paghubad sa Daang Tugon.
Septyembre 12, 1832Giestablisar ni Joseph Smith ang iyang pinuy-anan ug ang punoang buhatan sa Simbahan diha sa Tindahan ni Whitney sa Kirtland, Ohio.
Pebrero 2, 1833Nahuman ni Joseph Smith ang iyang paghubad ug pagribyu sa Bag-ong Tugon.
Hulyo 2, 1833Nahuman ni Joseph Smith ang iyang paghubad sa Daang Tugon.
Mga Basahunon sa Estudyante
Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 15
Mga Sugyot alang sa Pagtudlo
Agig pagsunod sa sugo sa Ginoo, si Joseph Smith mibiyahe padulong ug gikan sa Missouri
Ipakita ang giandam nga hulagway, ug ipasabut nga nagpakita kini ni Emma Smith nga nagkugos sa iyang sinagop nga anak nga babaye, si Julia, sa gabii nga si Joseph Smith gipapilitan og alkitran ug mga balahibo.
Base sa inyong pagbasa sa Mga Santos: Volume 1, unsa ang nahitabo sa kaluha ni Julia, nga si Joseph? (Ang masuso, kinsa masakiton, namatay wala madugay human nga si Joseph Smith gipapilitan og alkitran ug mga balahibo. Ang pagkabantang ngadto sa bugnaw nga hangin atol sa pag-ataki malagmit nga nakatampo sa kamatayon sa masuso.)
Pahinumdumi ang mga estudyante nga pagka-Abril 1, 1832, tulo ka adlaw human sa kamatayon sa iyang anak nga lalaki ug pito ka adlaw human siya gipapilitan og alkitran ug mga balahibo, si Joseph Smith misunod sa sugo sa Ginoo sa pagbiyahe og 1,287 ka kilometro gikan sa Ohio padulong sa Missouri aron “molingkod diha sa konseho uban sa mga santos” sa Distrito sa Jackson (D&P 78:9).
Dapita ang usa ka estudyante sa pagbasa og kusog sa mosunod nga parapo [paragraph] mahitungod sa panaw sa Propeta pabalik sa Ohio:
Pagka-Mayo 6, 1832, si Propeta Joseph Smith, Sidney Rigdon, ug Bishop Newel K. Whitney misugod sa ilang panaw pabalik sa Ohio pinaagi sa karwahe. Sa dihang duol na sila sa Greenville, Indiana, ang mga kabayo nahadlok. Nahadlok alang sa ilang kinabuhi, pipila sa mga pasahero nanglukso pagawas sa karwahe. Malampusong nakalukso si Joseph, apan sa paglukso ni Newel, nasangit ang iyang tiil diha sa ligid, ug ang iyang bitiis ug tiil nagkabali-bali sa pipila ka mga dapit. Mipadayon si Sidney sa panaw pabalik sa Kirtland dala ang balita sa aksidente samtang si Joseph nagpabilin sa Greenville uban ni Newel, kansang pagkaangol grabe kaayo nga dili siya makahimo sa pagbangon gikan sa higdaanan sulod sa pipila ka semana. (Tan-awa sa Manuscript History of the Church, vol. A-1, p. 215–16, josephsmithpapers.org.)
Bahina ang klase ngadto sa tulo o sobra pa nga mga grupo. Hatagi ang matag grupo og usa sa giandam nga mga handout mahitungod sa unsay nahitabo samtang didto sa Greenville ang Propeta. Hangyoa ang mga grupo sa pagbasa og dungan sa ilang handout ug sa paghisgot sa ilang mga tubag sa mga pangutana nga anaa sa handout.
Panahon sa iyang pag-istar sa Greenville, si Propeta Joseph Smith mibisita sa kakahoyan gawas sa lungsod hapit kada adlaw aron mag-ampo ug mamalandong. Gihulagway ni Joseph diha sa usa ka sulat ngadto sa iyang asawa, si Emma, ang pipila sa unsay iyang gihunahuna ug gibati samtang namalandong ug nag-ampo siya:
Imahe
Joseph Smith
“Miduaw sa akong hunahuna ang tanang nanglabay nga higayon sa akong kinabuhi ug ako nag-inusara nga nagmagul-anon ug nagpatulo sa mga luha sa kaguol sa akong kabuang sa pagtugot sa kaaway sa akong kalag nga makabaton og dakong gahum batok kanako sama kaniadto sa una nga nanglabay’ng mga panahon. Apan ang Dios maloloy-on ug nakapasaylo sa akong mga sala. …
“… Ako andam sa pagsanong sa iyang pagtawag. Ako nagtinguha nga ikauban si Kristo. Ako wala mag-isip sa akong kinabuhi nga bililhon kanako [gawas] sa pagbuhat sa iyang kabubut-on” (Mga Pagtulun-an sa mga Presidente sa Simbahan: Joseph Smith [2007], 292).
Unsa nga mga leksyon ang atong makat-unan gikan sa ehemplo ni Joseph Smith?
Sa unsang mga paagi nga gipakita niini nga sulat nga andam si Joseph Smith sa pagbuhat sa bisan unsa nga gisugo sa Dios kaniya?
Handout 2: Usa ka Panalangin sa Pagkapari [Priesthood]
Panahon sa iyang pag-istar sa Greenville, si Propeta Joseph Smith tingali gihiloan sa dili matino nga paagi. Usa ka gabii misugod siya sa pagsuka og grabe kaayo nga nahiwi ang iyang apapangig. Giduso ni Joseph sa iyang mga kamot ang iyang apapangig pabalik sa pwesto ug dali nga miadto sa higdaanan ni Bishop Newel K. Whitney. Si Newel mihatag ni Joseph og panalangin sa pagkapari, ug naayo si Joseph diha-diha dayon. (Tan-awa sa Mga Pagtulun-an sa mga Presidente sa Simbahan: Joseph Smith [2007], 288.) Ang kasaysayan ni Joseph Smith naglakip sa mosunod nga pamahayag sa pagpasalamat: “Salamat ngadto sa akong Langitnong Amahan tungod sa iyang pagpataliwala alang kanako niining kritikal nga higayon, sa pangalan ni Jesukristo; Amen” (Manuscript History of the Church, vol. A-1, p. 215, josephsmithpapers.org).
Unsa ang atong makat-unan gikan niini nga istorya mahitungod sa relasyon ni Joseph Smith ngadto sa Dios?
Kanus-a ninyo gibati nga ang Langitnong Amahan mipataliwala aron sa pagtabang kaninyo sa kritikal nga mga higayon?
Human sa mga upat ka semana nga pag-atiman kang Bishop Newel K. Whitney sa Greenville, gibati ni Propeta Joseph Smith nga kinahanglan nilang mobiya ug motapos sa biyahe pabalik sa Ohio. Hinoon, ang kagrabe sa angol ni Newel makapalisud sa pagbiyahe. Ang kasaysayan ni Joseph Smith namahayag:
“Miadto ko sa kwarto [ni Newel] human molakaw didto sa kakahoyan, ug gisultihan [si Newel] kon uyon ba siya nga mopauli na pagkabuntag, mosakay mi og karomata padulong sa suba, nga mga pito ka kilometro, ug didto adunay ferry-boat nga naghulat nga daling modala kanamo sa pagtabok, diin makakita kami og [kabayo] nga direktang modala kanamo sa dunggoanan, diin makakita kami og barko nga maghulat, ug wala pay alas 10 mobiyahe na kami diha sa suba ug malampusong makabiyahe pauli. Nagmaisugon siya ug misulti kanako nga mouban siya. Misugod kami pagkasunod buntag ug nahitabo gayud ang tanan sumala sa plano” (Manuscript History of the Church, vol. A-1, p. 215, josephsmithpapers.org).
Kon kamo ang naa sa lugar ni Newel, unsa kaha ang inyong mahunahuna mahitungod sa Propeta human niini nga kasinatian?
Unsa ang nakalig-on sa inyong kombiksyon nga ang mga pulong sa mga propeta sa Ginoo matuman?
Human sa igong panahon, hangyoa ang usa ka estudyante sa matag grupo sa pag-summarize sa panghitabo nga ilang nabasahan diha sa ilang mga handout alang sa klase.
Unsa ang inyong nakat-unan mahitungod sa kinaiya ni Joseph Smith gikan niini nga mga istorya?
Unsa nga mga baruganan o mga kamatuoran ang atong makat-unan gikan niini nga mga istorya? (Ang mga estudyante mahimong moila og pipila ka mga baruganan o mga kamatuoran, lakip sa mosunod: Atong mapalig-on ang atong relasyon sa Langitnong Amahan pinaagi sa paggahin og panahon sa pag-ampo ug pagpamalandong. Pinaagi sa pagtuo diha sa Ginoo ug sa gahum sa pagkapari, mamahimo kitang maayo. Ang mga pulong sa mga propeta sa Ginoo matuman.)
Mibalik si Joseph Smith sa Hiram, Ohio, ug mipadayon sa iyang paghubad sa Bag-ong Tugon
Ipasabut nga human mibalik si Joseph Smith sa Hiram, Ohio, niadtong Hunyo 1832, mipadayon siya sa iyang paghubad sa Bag-ong Tugon. Si Joseph Smith “gisugo sa Dios sa paghubad ug pagtamud niini ingon nga bahin sa iyang balaan nga tawag ingon nga usa ka propeta” (Giya ngadto sa mga Kasulatan, “Hubad ni Joseph Smith (HJS),” scriptures.ChurchofJesusChrist.org; tan-awa usab sa D&P 35:17–20; Manuscript History, vol. A-1, p. 175).
Isulat sa pisara ang mosunod nga kamatuoran: Ang Ginoo misugo ni Joseph Smith sa paghimo og dinasig nga hubad sa Biblia.
Aron matabangan ang mga estudyante nga makasabut sa usa sa mga katuyoan sa Hubad ni Joseph Smith, dapita ang usa ka estudyante sa pagbasa og kusog sa 1 Nephi 13:28–29, 34. Hangyoa ang klase sa pagpangita kon unsay nakita ni Nephi sa iyang panan-awon mahitungod sa Biblia ug sa unsang paagi kini adunay kalabutan sa hubad ni Joseph Smith sa Biblia.
Sa unsang paagi nga ang panan-awon ni Nephi makatabang kanato nga masabtan ang usa sa mga katuyoan sa Hubad ni Joseph Smith sa Biblia? (Usa ka katuyoan sa Hubad ni Joseph Smith sa Biblia mao ang pagpahiuli sa “yano ug bililhon nga mga bahin sa ebanghelyo” [1 Nephi 13:34]. Tan-awa usab sa Moises 1:23, 40–41.)
Dapita ang usa ka estudyante sa pagbasa og kusog sa mosunod nga parapo:
Si Propeta Joseph Smith wala “mohubad” sa Biblia diha sa tradisyunal nga kahulugan sa pulong. Wala siya magtuon og karaang mga pinulongan aron makahubad sa orihinal nga teksto ngadto sa Iningles. Hinoon, ang Hubad ni Joseph Smith mao ang “inusab o hinubad sa King James Version sa Biblia nga Ingles” (Giya ngadto sa mga Kasulatan, “Hubad ni Joseph Smith (HJS),” scriptures.ChurchofJesusChrist.org). Ang mga pag-usab mahimong nagrepresentar sa pipila ka lain-laing matang sa kausaban, lakip sa “pagpahiuli sa orihinal nga teksto, pagpahiangay sa mga panagsumpaki sa sulod mismo sa Biblia, ug dinasig nga komentaryo” ni Propeta Joseph Smith (“Translation and Historicity of the Book of Abraham,” Gospel Topics, topics.ChurchofJesusChrist.org; tan-awa usab sa Robert J. Matthews, “A Plainer Translation”: Joseph Smith’s Translation of the Bible: A History and Commentary [1985], 253).
Ipakita ang giandam nga han-ay sa mga panghitabo, ug ipasabut nga misugod si Joseph Smith sa paghubad sa Biblia niadtong Hunyo 1830. Gikan sa Hunyo 1830 hangtud sa Marso 1831, ang Propeta mihubad sa Genesis 1–24. Ang basahon ni Moises diha sa Perlas nga Labing Bililhon maoy usa ka kinutlo niana nga paghubad. Pag-assign sa matag estudyante og usa o sobra pa nga mga kapitulo gikan sa basahon ni Moises. Hangyoa sila sa pagribyu sa mga ulohan sa kapitulo, nga mangita sa mga kamatuoran nga napahiuli pinaagi ni Propeta Joseph Smith.
Unsa nga mga kamatuoran ang gipahiuli sa Propeta nga makita diha sa basahon ni Moises? (Ang Propeta mipahiuli og mahinungdanong mga kamatuoran mahitungod sa relasyon sa Dios ngadto sa katawhan, lakip ang Iyang buhat ug himaya sa pagpahinabo sa atong pagka-imortal ug kinabuhing dayon, ang premortal nga kinabuhi, ang Paglalang, ang Pagkapukan ni Adan ug Eva, ug ang Pag-ula ni Jesukristo. Gipahiuli usab niya ang mga kamatuoran kalabut ni Enoch ug sa iyang katawhan, ni Noe ug ang Lunop, ug ang katapusang mga adlaw ug ang katapusan sa kalibutan.)
Sumala sa han-ay sa mga panghitabo, kanus-a man gisugo sa Ginoo ang Propeta nga sugdan ang paghubad sa Bag-ong Tugon?
Ipasabut nga samtang si Propeta Joseph Smith mihubad sa Bag-ong Tugon, nakadawat siya og dugang nga mga pagpadayag, sama sa Doktrina ug mga Pakigsaad 76, 77, ug 91. Nahuman sa Propeta ang iyang inisyal nga hubad sa Bag-ong Tugon pagka-Hulyo 1832 ug dayon mipadayon sa iyang paghubad sa Daang Tugon. Nakompleto niya ang iyang paghubad sa Daang Tugon sa pagka-Hulyo 1833, bisan tuod mihimo siya og pipila ka dugang nga mga koreksyon ug mga kausaban sa wala madugay. Nahuman siya sa pagpangusab sa iyang hubad sa Bag-ong Tugon sa pagka-Pebrero 1833.
Ipamatuod nga ang hubad ni Joseph Smith sa Biblia usa ka importante nga bahin sa Pagpahiuli tungod kay mipahiuli kini sa daghang mga kamatuoran nga gikinahanglan alang sa atong kaluwasan (tan-awa sa D&P 35:20).
Si Joseph Smith ug ang iyang pamilya mibalhin og balik sa Kirtland, Ohio
Ipakita ang giandam nga mapa, “Ang New York, Pennsylvania, ug Ohio nga Dapit sa Estados Unidos.” Ipasabut nga sa pagka-Septyembre 1832, ang Propeta ug ang iyang pamilya mibalhin gikan sa Hiram, Ohio, balik ngadto sa Kirtland ug mipuyo diha sa Tindahan ni Whitney.
Pagpakita og hulagway sa Tindahan ni Whitney, ug ipasabut nga ang pamilya nga Smith mipuyo dinhi ug nga gigamit ni Joseph Smith ang ubang mga lawak sa ibabaw sa tindahan isip punoang buhatan sa Simbahan sa misunod nga 17 ka bulan. Sa tinglarag sa 1832, pipila ka bag-ong mga kinabig, lakip ni Brigham Young, miabut sa Kirtland aron makighimamat sa Propeta.
Dapita ang usa ka estudyante sa pagbasa og kusog sa mosunod nga pamahayag ni Presidente Brigham Young (1801–77):
Imahe
Brigham Young
“Miadto kami sa balay sa amahan [ni Joseph] ug nahibaloan nga [si Joseph] didto sa kakahoyan, namutol. Dali kaming miadto sa kakahoyan, diin among nakita ang Propeta, ug duha o tulo sa iyang mga igsoon, namutol ug nanghakot og kahoy. Dinhi nahingpit ang akong kalipay sa pribilehiyo nga makiglamano sa Propeta sa Dios, ug nakadawat sa siguradong pagpamatuod, pinaagi sa Espiritu sa panagna, nga siya mao gayud ang unsay pagtuo sa mga tawo kaniya, isip usa ka tinuod nga Propeta. Nalipay siya nga makakita kanamo, ug miabi-abi kanamo. Sa wala madugay mibalik kami ngadto sa iyang balay, nga iya kaming giubanan.
“Pagka-gabii pipila sa mga kaigsoonan miabut, ug nagsultihanay kami mahitungod sa mga butang sa gingharian. Gihangyo ko niya nga mag-ampo; diha sa akong pag-ampo namulong ko og lahi nga pinulongan. Sa dihang mibarug kami gikan sa among pagluhod ang mga kaigsoonan mialirong kaniya, ug nangutana sa iyang opinyon mahitungod sa gasa sa pinulongan nga anaa kanako. Misulti siya kanila nga mao kadto ang putli nga pinulongan ni Adan. Ang uban miingon kaniya nga nagdahum sila nga iyang ipanghimaraut ang gasa nga anaa ni brother Brigham, apan miingon siya, ‘Dili, gikan kini sa Dios, ug moabut ang panahon nga si brother Brigham Young ang modumala niining Simbahan.’ Ang ulahing bahin niini nga pagsultihanay nahitabo nga wala ako” (“History of Brigham Young,” Millennial Star, Hulyo 1863, 439).
Unsa ang labing mahinungdanon alang kaninyo niini nga istorya?
Unsa kaha ang gipasabut nga si Brigham Young nakadawat og sigurado nga pagpamatuod “pinaagi sa Espiritu sa panagna” nga si Joseph Smith usa ka propeta? (Kon gikinahanglan, tabangi ang mga estudyante nga makasabut nga “ang Espiritu sa panagna” usa ka pagpakita sa Espiritu Santo [tan-awa sa Alma 5:47].)
Isulat ang mosunod nga baruganan diha sa pisara: Mahimo kitang mahibalo pinaagi sa gahum sa Espiritu Santo nga si Joseph Smith usa ka propeta sa Dios.
Ipasabut nga bisan tuod wala kitay oportunidad nga makahimamat ni Joseph Smith niini nga kinabuhi sama ni Brigham Young, makadawat gihapon kita og pagpamatuod nga siya usa ka propeta. Dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:
Imahe
Neil L. Andersen
“Ang pagpamatuod bahin ni Propeta Joseph Smith moabut nga lahi sa matag usa nato. Mahimong moabut kini samtang nagluhod kamo sa pag-ampo, naghangyo sa Dios sa pagmatuod nga siya tinuod nga propeta. Mahimong moabut kini samtang nagbasa kamo sa asoy sa Propeta bahin sa Unang Panan-awon. Usa ka pagpamatuod mahimong motuhop diha sa inyong kalag samtang magbalik-balik kamo og basa sa Basahon ni Mormon. Mahimong moabut kini samtang magpamatuod kamo bahin sa Propeta o samtang magbarug kamo sa templo ug makaamgo nga pinaagi ni Joseph Smith ang balaang gahum sa sealing gipahiuli sa yuta. Uban sa hugot nga pagtuo ug tinuod nga katuyoan, ang inyong pagpamatuod kang Propeta Joseph Smith malig-on” (Neil L. Andersen, “Joseph Smith,” Liahona, Nob. 2014, 30).
Unsa ang nakatabang kaninyo nga masayud nga si Joseph Smith usa ka propeta sa Dios?
Ipaambit ang imong pagpamatuod kon sa unsang paagi nga nahibaloan nimo nga si Joseph Smith usa ka propeta. Dapita ang mga estudyante sa pagbuhat sa unsay gikinahanglan aron makadawat o malig-on ang ilang pagpamatuod nga si Joseph Smith usa ka propeta sa Dios.
Ipakita ang giandam nga hulagway sa usa sa mga lawak sa ibabaw sa Tindahan ni Whitney, diin ang Tulunghaan sa mga Propeta gipahigayon gikan sa Enero hangtud sa Abril 1833.
Base sa inyong pagbasa sa kapitulo 15 sa Mga Santos: Volume 1, unsa ang pipila sa mga pinadayag nga nadawat ni Propeta Joseph Smith samtang nagpuyo siya didto sa Tindahan ni Whitney? (Ang Propeta nakadawat og pinadayag mahitungod sa pagkapari [tan-awa sa D&P 84]; usa ka panagna mahitungod sa gubat, lakip na ang Gubat nga Sibil sa Estados Unidos [tan-awa sa D&P 87]; ang sugo sa pagtukod og templo didto sa Ohio ug sa pag-establisar sa Tulunghaan sa mga Propeta [tan-awa sa D&P 88]; ug ang pinadayag nga nailhan isip ang Pulong sa Kaalam [tan-awa sa D&P 89].)
Tapusa ang leksyon pinaagi sa pagpamatuod sa mga kamatuoran nga inyong gihisgutan. Awhaga ang mga estudyante sa pagsunod sa bisan unsang pag-aghat nga tingali ilang nadawat aron molihok sumala niini nga mga kamatuoran.
Dapita ang mga estudyante nga mangandam alang sa sunod nga klase pinaagi sa pagbasa sa mga kapitulo16–17 sa Mga Santos: Volume 1.
