“Leksyon 13: Ang Templo sa Kirtland,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)

“Leksyon 13,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo

Leksyon 13

Ang Templo sa Kirtland

Pasiuna ug Han-ay sa mga Panghitabo [Timeline]

Pagka-Disyembre 1830, ang Ginoo misugo sa mga Santos nga magpundok ngadto sa Ohio (tan-awa sa D&P 37), ug misaad Siya sa wala madugay nga didto sila “pagatugahan uban sa gahum nga gikan sa kahitas-an” (D&P 38:32). Pagka-Disyembre 1832, ang Ginoo misugo sa mga Santos sa pagtukod og “usa ka balay sa Dios”—usa ka templo—sa Kirtland (D&P 88:119). Pagka-Hunyo 1833 gamay ra ang ilang nahimong kauswagan ug gibadlong sa Ginoo (tan-awa sa D&P 95:1–3). Human mabadlong, ang mga Santos misugod dayon sa pagtrabaho sa templo, nga nagkinahanglan og dakong paningkamot ug mga sakripisyo. Pagka-Enero 21, 1836, si Propeta Joseph Smith nakadawat og panan-awon sa celestial nga gingharian diha sa hapit na mahuman nga templo. Ang Propeta mipahinungod sa templo pagka-Marso 27 (tan-awa sa D&P 109), ug pagka-Abril 3, ang Ginoo mipakita diha sa templo ug midawat niini isip Iyang balay (tan-awa sa D&P 110:7). Si Moises, Elias, ug Elijah mipakita usab ug mitugyan sa mga yawe sa pagkapari ngadto ni Joseph Smith ug Oliver Cowdery.

Disyembre 1832Ang Ginoo misugo sa mga Santos sa pagtukod og templo (tan-awa sa D&P 88:119).

Sayong bahin sa Hunyo, 1833Ang mga Santos misugod sa pagtukod sa Templo sa Kirtland.

Enero 21, 1836Si Joseph Smith nakadawat og panan-awon sa celestial nga gingharian (tan-awa sa D&P 137).

Marso 27, 1836Gipahinungod ni Joseph Smith ang Templo sa Kirtland.

Abril 3, 1836Gidawat ni Jesukristo ang Templo sa Kirtland, ug si Moises, Elias, ug Elijah mitugyan sa mga yawe sa pagkapari ngadto ni Joseph Smith ug ni Oliver Cowdery.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 20–21

Mga Sugyot alang sa Pagtudlo

Ang mga Santos sa Kirtland misanong sa sugo sa pagtukod og balay sa Dios

Ipakita ang giandam nga hulagway, ug ipasabut nga usa kini ka litrato sa Templo sa Kirtland. Ipasabut nga ang Ginoo misugo sa mga Santos sa pagtukod sa Templo sa Kirtland sa pinadayag nga narekord diha sa Doktrina ug mga Pakigsaad 88:1–126, nga nadawat ni Propeta Joseph Smith niadtong Disyembre 1832.

Dapita ang usa ka estudyante sa pagbasa og kusog sa Doktrina ug mga Pakigsaad 88:119. Hangyoa ang klase sa pagpaminaw kon giunsa sa Ginoo paghulagway ang “balay”, o templo, nga Iyang gisugo kanila nga tukoron.

Unsay labing impresibo alang kaninyo niini nga paghulagway sa “balay” nga gisugo ang mga Santos sa pagtukod?

Ipasabut nga pagka-Hunyo 1833—unom ka bulan human ang mga Santos sa Ohio gisugo sa pagtukod og balay sa Dios—wala kaayo silay nahimong kauswagan sa pagtukod sa templo. Dapita ang usa ka estudyante sa pagbasa og kusog sa Doktrina ug mga Pakigsaad 95:3, 8, 11–14. Hangyoa ang klase sa pagsunod, nga mangita sa unsay gisulti sa Ginoo mahitungod sa ilang paningkamot.

Sa bersikulo 3, unsay gisulti sa Ginoo mahitungod sa kakulang sa pag-uswag sa mga Santos sa pagtukod sa templo?
Unsa nga baruganan ang atong masabtan gikan sa bersikulo 11 base sa gisaad sa Ginoo ngadto sa Iyang mga Santos? (Human motubag ang mga estudyante, isulat ang mosunod nga baruganan diha sa pisara: Samtang mosunod kita sa mga sugo, makaangkon kita og gahum sa pagtuman sa kabubut-on sa Ginoo.)
Sa mga bersikulo 13–14, unsa ang gisaad sa Ginoo nga buhaton nga makatabang sa mga Santos sa pagtukod sa templo?

Dapita ang usa ka estudyante sa pagbasa og kusog sa mosunod nga duha ka mga parapo. Hangyoa ang klase sa pagpaminaw kon giunsa sa Ginoo pagtuman ang Iyang saad.

“Pipila ka adlaw [human nadawat ang pinadayag nga narekord diha sa Doktrina ug mga Pakigsaad 95], ang Ginoo mituman sa Iyang saad, mipakita ni Joseph Smith ug sa iyang mga magtatambag sa Unang Kapangulohan og usa ka talagsaong panan-awon diin ilang nakita ang detalyadong mga plano alang sa templo. Si Frederick G. Williams, ang Ikaduhang Magtatambag sa Unang Kapangulohan, sa kadugayan nahinumdom: ‘Si Joseph [Smith] nakadawat sa pulong sa Ginoo nga dad-on ang iyang duha ka mga magtatambag, si [Frederick G.] Williams ug [Sidney] Rigdon, ngadto sa atubangan sa Ginoo, ug nga Siya mopakita kanila sa plano o modelo sa balay nga pagatukuron. Nangluhod dayon kami, misangpit sa Ginoo, ug ang gambalay [building] mitunga sa gilay-on nga igong makita, ako ang unang nakakita niini. Unya kaming tanan mitan-aw niini. Human namo matan-aw og maayo ang gawas nga bahin, ang gambalay ingon nga sa diha gayud sa among atubangan’ [Frederick G. Williams, gikutlo ni Truman O. Angell, sa Truman Osborn Angell, Kasaysayan sa Kaugalingong Kinabuhi 1884, 14–15, Church Archives, Ang Simbahan ni Jesukristo sa mga Santos sa Ulahing mga Adlaw, Salt Lake City, Utah]” (Mga Pagtulun-an sa mga Presidente sa Simbahan: Joseph Smith [2007], 327).

“Usa ka sukaranang pangutana nga natubag niini nga panan-awon mao ang problema kon unsa nga mga materyal ang gamiton sa pagtukod sa balay. Nahinumdom si Lucy Mack Smith og usa ka miting sa konseho diin nahukman nga ang usa ka gambalay nga tabla mahal ra kaayo; gisugyot hinoon ang usa ka balay nga troso. Mipahinumdom si Joseph kanila nga ‘wala sila maghimo og balay alang sa ilang kaugalingon o alang kang bisan kinsang tawo apan usa ka balay alang sa Dios.’ Miingon siya, ‘Ug kita ba, mga kaigsoonan, magtukod og balay alang sa Atong Dios nga hinimo sa mga troso? Dili, mga igsoon, aduna akoy mas maayong plano kay niana. Ako adunay plano sa balay sa Ginoo nga hinatag niya mismo.’ Nahinumdom si Lucy nga si Joseph miingon nga kini nga plano mopakita kanila ‘sa kalainan tali sa atong labing maayong mga ideya ug sa iyang mga Ideya.’ Ang kaigsoonan ‘nangalipay’ sa dihang gihulagway ni Joseph ang tibuok plano, nga nagkonsiderar og istraktura nga hinimo sa bato. [Lucy Mack Smith, “Lucy Mack Smith, History, 1844–1845,” basahon 14, pahina 1, josephsmithpapers.org.]” (Lisa Olsen Tait ug Brent Rogers, “A House for Our God,” sa Revelations in Context, ed. Matthew McBride ug James Goldberg [2016], 167, o history.ChurchofJesusChrist.org).

Sumala niini nga mga istorya, giunsa man pagtuman sa Ginoo ang Iyang saad nga motabang sa mga Santos sa pagtuman sa Iyang kabubut-on?

Ipakita ang giandam nga hulagway sa pagtukod sa Templo sa Kirtland. Ipasabut nga “niadtong ting-init sa 1833, dihay 150 lamang ka mga miyembro sa Simbahan nga nagpuyo sa dapit [sa Kirtland],” ug nag-atubang sila og daghang mga babag samtang naningkamot sila sa pagtukod sa templo (Lisa Olsen Tait ug Brent Rogers, “A House for Our God,” 169).

Bahina ang klase ngadto sa gagmay nga mga grupo nga adunay duha o tulo ka estudyante. Hatagi ang matag grupo og usa sa giandam nga mga handout mahitungod sa mga kalisdanan nga giatubang sa mga Santos sa pagtukod sa templo ug sa pipila ka mga paagi nga nabuntog nila kadto nga mga kalisdanan. Hangyoa ang mga grupo sa pagbasa og dungan sa ilang handout ug sa paghisgot sa ilang mga tubag sa pangutana nga anaa sa handout.

Handout 1: Pag-atubang sa “Kawad-on ug Kalisud”

Si Presidente Heber C. Kimball (1801–68) sa Unang Kapangulohan, kinsa nagserbisyo kaniadto isip sakop sa Korum sa Napulog Duha ka mga Apostoles, misulat mahitungod sa iyang pagbalik ngadto sa Kirtland human sa iyang misyon sa silangang bahin sa Estados Unidos:

“Sa dihang miabut ko sa Kirtland ang mga kaigsoonan nagtrabaho sa pagtukod sa balay sa Ginoo. … Ang simbahan anaa sa kahimtang sa kawad-on ug kalisud, diin isip sangputanan mora og imposible nga matuman ang sugo [sa pagtukod og templo]” (“Extract from the Journal of Elder Heber C. Kimball,” Times and Seasons, Ene. 15, 1845, 771).

Niadtong Enero 1835, ang miyembro sa Simbahan nga si John Tanner miabut sa Kirtland gikan sa New York. Miabut siya tungod sa usa ka pag-aghat nga iyang nadawat:

“Nakadawat siya og pagdasig pinaagi sa usa ka damgo o panan-awon sa gabii, nga siya gikinahanglan ug kinahanglan gayud nga molakaw dayon ngadto sa Simbahan sa Kasadpan. …

“Sa iyang pag-abut sa Kirtland, iyang nahibaloan nga sa panahon nga nadawat niya ang impresyon nga kinahanglang moadto dayon siya sa Simbahan, si Propeta Joseph Smith ug pipila sa kaigsoonan nanagpundok sa miting sa pag-ampo ug mihangyo sa Ginoo nga padad-an sila og usa o pipila ka kaigsoonan nga adunay mga kapanguhaan sa pagtabang kanila nga mabayaran ang prenda sa umahan diin ang templo gitukod.

“Sa adlaw human sa iyang pag-abut sa Kirtland, … gipahibalo [siya] nga hapit na maremati ang prenda sa nahisgutan nga umahan. Pagkasayud niini gipahulam dayon niya ang propeta og duha ka libo ka dolyares ug gihatagan siya og sulat nga bayaran kini apil ang tubo, ug ang maong kantidad gigamit sa paglukat sa umahan” (“Sketch of an Elder’s Life,” Scraps of Biography (1883), 12; tan-awa usab sa Ang Atong Panulundon: Usa ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw [1996], 40–41).

Sa unsang mga paagi kini nga istorya naghulagway sa baruganan nga gitudlo diha sa Doktrina ug mga Pakigsaad 95:11?

Handout 1: Pag-atubang sa “Kawad-on ug Kalisud”

mga tawo nga nagtrabaho sa Templo sa Kirtland

Handout 2: “Ang mga Lalaki, mga Babaye, ug Bisan ang mga Bata, Mitrabaho uban sa Tanan Nilang Kusog”

Human sa igong panahon, hangyoa ang usa ka estudyante gikan sa grupo nga nagtuon sa handout 1 ug usa ka estudyante gikan sa grupo nga nagtuon sa handout 2 sa pag-summarize sa impormasyon diha sa ilang mga handout alang sa klase. Dapita sila sa pagpasabut kon giunsa sa mga Santos sa pagbuntog sa kalisdanan nga ilang nasinati samtang misunod sila sa sugo sa pagtukod sa templo. Dayon pangutan-a ang klase:

Kanus-a kamo nakadawat og gahum aron matuman ang kabubut-on sa Ginoo samtang nagsunod sa Iyang mga sugo?

Gipahinungod ni Joseph Smith ang Templo sa Kirtland ngadto sa Ginoo

Ipasabut nga pagka-Enero 1836, si Propeta Joseph Smith ug ang uban misugod na sa paggamit sa nakompleto nga mga bahin sa templo.

Hangyoa ang mga estudyante sa pagpakli ngadto sa kapitulo 21 sa Mga Santos: Volume 1. Dapita ang pipila ka estudyante nga magpuli-puli sa pagbasa og kusog gikan sa pahina 264, mosugod sa parapo nga nagsugod og “Sa kahapunon sa Enero 21 …” ug motapos sa parapo diha sa pahina 266 nga nagsugod og “Napuno sa Espiritu …” Hangyoa ang klase sa pagpangita sa unsay gipadayag sa Ginoo ngadto sa Propeta diha sa templo.

Sa unsang paagi kini nga mga pinadayag mahitungod sa gagmayng mga bata ug kadtong mga namatay nga walay kahibalo sa ebanghelyo makatabang kanato nga mas makasabut sa kaangayan, kalooy, ug gugma sa Langitnong Amahan?

Ipasabut nga sa Marso 27, 1836, ang mga Santos nagpundok sa Templo sa Kirtland alang sa pagpahinungod niini. Ang Ginoo mipadayag og pagpahinungod nga pag-ampo ngadto ni Joseph Smith, Oliver Cowdery, ug sa uban usa ka adlaw sa wala pa kini, ug ila kining gipaimprinta alang sa pagpahinungod (tan-awa sa D&P 109, ulohan sa seksyon).

Dapita ang usa ka estudyante sa pagbasa og kusog sa Doktrina ug mga Pakigsaad 109:22. Hangyoa ang klase sa pagpaminaw kon unsa ang giampo ni Propeta Joseph Smith diha sa pagpahinungod nga pag-ampo.

Base sa bersikulo 22, unsa nga mga panalangin ang mahimo natong madawat kon mosimba kita sa Ginoo diha sa templo? (Human motubag ang mga estudyante, isulat ang mosunod nga baruganan sa pisara: Samtang mosimba kita sa Ginoo diha sa templo, mahimo kitang masangkapan sa Iyang gahum, modala sa Iyang ngalan nganha kanato, modawat sa Iyang himaya, ug mapanalipdan sa mga anghel.)
Base sa inyong pagbasa sa kapitulo 21 sa Mga Santos: Volume 1, unsa ang pipila ka espiritwal nga mga pagpakita nga nasinati sa mga Santos sa wala pa, atol sa, ug human sa pagpahinungod sa Templo sa Kirtland? (Kon gikinahanglan, ipasabut nga daghan ang mibati og hilabihan nga pagbu-bu sa Espiritu, ang uban nakakita og hayag nga panganod ug usa ka dakong gilis sa kalayo ibabaw sa templo, ang uban nakakita sa Manluluwas, ug ang uban nakakita og mga anghel.)

Ang Manluluwas mipakita didto saTemplo sa Kirtland

Ipakita ang giandam nga hulagway. Ipasabut nga pagka-Dominggo, Abril 3, 1836—usa ka semana human sa pagpahinungod sa Templo sa Kirtland—ang Manluluwas mipakita ngadto ni Propeta Joseph Smith ug Oliver Cowdery sa sulod sa templo ug midawat niini isip Iyang balay (tan-awa sa D&P 110:1–8).

Dapita ang usa ka estudyante sa pagbasa og kusog sa mosunod nga pamahayag ni Presidente James E. Faust (1920–2007) sa Unang Kapangulohan. Hangyoa ang klase sa pagpaminaw kon kinsa pa ang mipakita kang Joseph Smith ug Oliver Cowdery niana nga okasyon.

“Si Moises nagpakita ug mihatag ni Propeta Joseph Smith ug Oliver Cowdery sa mga yawe sa pagpundok sa Israel. Human niini, si Elias nagpakita ug mihatag sa ebanghelyo ni Abraham, nga sa ‘among binhi sa tanan nga mga kaliwatan nga mosunod kanamo pagapanalanginan gayud’ [D&P 110:12]. Human niini, si Elijah ang propeta nagpakita ug mihatag kanila sa mga yawe niini nga dispensasyon, lakip ang gahum sa pagbugkos, aron mabugkos didto sa langit niana nga nabugkos dinhi sa yuta sulod sa mga templo [tan-awa sa D&P 110:13–16]. Sa ingon, ang mga propeta sa nangaging mga dispensasyon sa ebanghelyo mihatag sa ilang mga yawe ngadto ni Propeta Joseph Smith niini nga, ang ‘dispensasyon sa kahingpitan sa mga panahon’ nga gipamulong ni Apostol Pablo ngadto sa mga taga-Efeso [Mga Taga-Efeso 1:10]” (James E. Faust, “Ang Pagpahiuli sa Tanang mga Butang,” Liahona, Mayo 2006, 62).

Sa unsang mga paagi nga napanalanginan kita karon tungod sa mga yawe sa pagkapari nga gitugyan ngadto ni Joseph Smith ug Oliver Cowdery didto sa Templo sa Kirtland? (Sama pananglit, ang mga estudyante mahimong mohisgot nga ang gahum sa pagbugkos nga gipahiuli ni Elijah mobugkos o mosilyo sa matarung nga magtiayon ug mga sakop sa pamilya ngadto sa usag usa hangtud sa kahangturan.)

Hisguti ang baruganan diha sa pisara: “Samtang mosimba kita sa Ginoo diha sa templo, mahimo kitang masangkapan sa Iyang gahum, modala sa Iyang ngalan nganha kanato, modawat sa Iyang himaya, ug mapanalipdan sa mga anghel.” Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka mga Apostoles. Hangyoa ang klase sa pagpaminaw kon unsa nga matang sa gahum ang mahimo natong madawat samtang mosimba kita sa Ginoo diha sa templo.

“Sa balay sa Ginoo, ang matinud-anong mga miyembro sa Simbahan mahimong tugahan ‘uban sa gahum gikan sa kahitas-an’ [D&P 95:8], gahum nga makapahimo nato sa pagbatok sa tintasyon, pagtahud sa mga pakigsaad, pagsunod sa mga sugo sa Ginoo, ug paghatag og mainiton, walay kahadlok nga pagpamatuod sa ebanghelyo ngadto sa pamilya, mga higala, ug mga silingan” (Joseph B. Wirthlin, “Cultivating Divine Attributes,” Ensign, Nob. 1998, 27).

Dapita ang mga estudyante sa pagpamalandong kon sa unsang paagi nga napanalanginan sila og gahum samtang misimba sila diha sa templo. Dapita ang pipila ka mga estudyante sa pagpakigbahin sa ilang mga hunahuna diha sa klase. (Pahinumdumi sila nga dili ipaambit ang bisan unsa nga hilabihan ka personal o sagrado.) Mahimo ka usab nga mopaambit og kasinatian ug imong pagpamatuod.

Awhaga ang mga estudyante nga kanunay nga mosimba sa Ginoo diha sa templo kutob sa itugot sa ilang mga kahimtang aron masangkapan sila sa Iyang gahum.

Dapita ang mga estudyante nga mangandam alang sa sunod nga klase pinaagi sa pagbasa sa mga kapitulo 22–23 sa Mga Santos: Volume 1.