Leksyon 22: Giorganisar ni Joseph Smith ang Relief Society ug Gipahigayon ang Tuga sa Templo [Temple Endowment]
“Leksyon 22: Giorganisar ni Joseph Smith ang Relief Society ug Gipahigayon ang Tuga sa Templo,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)
“Leksyon 22,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo
Leksyon 22
Si Joseph Smith miorganisar sa Relief Society ug Nangalagad sa Tuga sa Templo
Pasiuna ug Han-ay sa mga Panghitabo [Timeline]
Giorganisar ni Joseph Smith ang Female Relief Society sa Nauvoo niadtong Marso 17, 1842. Si Emma Smith gitawag nga moserbisyo isip unang presidente sa organisasyon, usa ka katumanan sa pinadayag nga gihatag mga tuig na ang milabay (tan-awa sa D&P 25:7). Niadtong Mayo 4, 1842, unang gipahigayon ni Propeta Joseph Smith ang tuga sa templo ngadto sa siyam ka mga lider sa Simbahan sa ibabaw nga lawak sa iyang Red Brick Store.
Marso 17, 1842Ang Female Relief Society sa Nauvoo giorganisar.
Mayo 4, 1842Gipasiugdahan ni Joseph Smith ang tuga sa templo ngadto sa siyam ka mga lider sa Simbahan.
Septyembre 28, 1843Nadawat ni Emma Smith ang tuga sa templo.
Mga Basahunon sa Estudyante
Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 37
Mga Sugyot alang sa Pagtudlo
Giorganisar ni Propeta Joseph Smith ang Relief Society
Ipakita ang giandam nga hulagway. Ipasabut nga sa usa ka pinadayag nga gihatag ngadto ni Propeta Joseph Smith niadtong Enero 1841, misugo ang Ginoo sa mga Santos sa pagtukod og templo sa Nauvoo (tan-awa sa D&P 124:25–28). Si William Weeks, kinsa mao ang labaw nga arkitekto sa Templo sa Nauvoo, mihimo niini nga drowing niadtong 1841 agig pagpangandam alang sa pagtukod sa templo.
Base sa inyong pagbasa sa kapitulo 37 sa Mga Santos: Volume 1, sa unsang paagi misugyot ang duha ka babaye nga Santos sa Ulahing mga Adlaw nga motampo ngadto sa pagtukod sa templo? (“Si Margaret [Cook] nakamatikod nga daghan sa mga trabahante [sa pagtukod sa templo] kulang og mga sapatos, mga karsones, ug mga sinina. Misugyot siya ngadto ni Sarah [Kimball] nga magtinabangay sila aron makahatag og bag-ong mga sinina alang sa mga trabahante. Miingon si Sarah nga mosuplay siya sa mga materyal alang sa mga sinina kon si Margaret ang motahi. Mahimo usab silang mangayo og tabang sa ubang mga babaye sa Nauvoo ug mag-organisar og kapunongan nga modumala sa trabaho” [Saints: Volume 1, 510–11].)
Unsay gisangputan niini nga mga diskusyon ug mga paningkamot sa katapusan? (Ang pag-organisar sa Relief Society.)
Bahina ang mga estudyante sa mga grupo nga magtinagurha o tinagutlo, ug hatagi sila og mga kopya sa giandam nga handout, “Pag-organisar sa Relief Society.” Hangyoa ang mga estudyante sa pagbasa sa handout sa ilang mga grupo ug markahan ang mga detalye mahitungod sa pag-organisar sa Relief Society nga labing mahinungdanon kanila. Dapita sila sa paghisgot sa ilang mga tubag sa mga pangutana nga anaa sa handout diha sa ilang mga grupo.
Ang Red Brick Store ni Joseph Smith sa Nauvoo, Illinois
Si Sarah M. Kimball midapit og mga napulog duha ka mga babaye nga mag-abut sa iyang panimalay aron maghisgot kon sa unsang paagi nga makatampo sila sa pagtukod sa Templo sa Nauvoo. Usa ka summary niana nga hitabo makita sa mosunod nga kinutlo gikan sa Anak nga mga Babaye sa Akong Gingharian:
“Niadto nga panahon, naandan kaayo nga buluhaton sa mga babaye ang paghimo og kaugalingon nila nga mga organisasyon, sa kasagaran adunay mga konstitusyon o mga pamalaod—mga lagda aron sa pagdumala sa mga organisasyon. Ang mga babaye nga nag-abut sa balay ni Sarah Kimball nakahukom sa pag-establisar og usa ka konstitusyon ug pamalaod, ug si Eliza R. Snow midawat sa responsibilidad sa pagsulat niini. Dayon ang mga babaye mihangyo kang Joseph Smith sa pagribyu niini ug sa pagsulti unsay iyang hunahuna kabahin niini. Human kini mabasa sa Propeta, miingon siya nga kini ang ‘labing nindot nga sukad iyang nakita. “Apan,” miingon siya, “kini dili mao ang inyong gusto. Sultihi ang mga sister nga ang ilang mga halad gidawat sa Ginoo, ug siya adunay butang nga mas maayo alang kanila kay sa sinulat nga konstitusyon. Gidapit ko silang tanan sa pakigkita kanako ug sa pipila sa mga kaigsoonan … sunod Huwebes sa hapon, ug akong i-organisar ang mga babaye ubos sa priesthood subay sa sumbanan sa priesthood”’ [Sarah M. Kimball, “Auto-biography,” Woman’s Exponent, Sept. 1, 1883, 51]. …
“Niana nga misunod nga Huwebes, niadtong Marso 17, 1842, bayente ka mga babaye nagtigom didto sa ibabaw nga andana sa gambalay [building], sagad nga gitawag og “red brick store,” diin si Propeta Joseph Smith nag-opisina ug nagnegosyo aron isuporta sa iyang pamilya. Nagtigom sila ubos sa direksyon ni Joseph Smith ug sa duha ka sakop sa Korum sa Napulog Duha ka mga Apostoles, sila si Elder John Taylor ug Willard Richards.
“Imbis nga iparehas ang organisasyon sa Santos sa Ulahing mga Adlaw nga mga babaye ngadto sa mga kapunongan sa kababayen-an nga komon ug nailhan niana nga panahon, si Propeta Joseph Smith miorganisar niini sa dinasig ug awtorisado nga pamaagi. …
“… Si Propeta Joseph Smith namahayag, ‘Ang Simbahan wala gayud maorganisar sa hingpit hangtud ang mga kababayen-an na-organisar’ [Mga Pagtulun-an sa mga Presidente sa Simbahan: Joseph Smith, (2007), 545]. Si Sister Eliza R. Snow, [kinsa wala madugay miserbisyo isip] ang ikaduha nga kinatibuk-ang presidente sa Relief Society, mipasabut niini nga pagtulun-an. Miingon siya: ‘Bisan tingali og moderno ang pangalan, ang institusyon nanukad sa karaan. Gisultihan kita sa atong namartir nga propeta nga ang sama nga organisasyon diha na sa karaan nga simbahan’ [Eliza R. Snow, “Female Relief Society,” Deseret News, Abr. 22, 1868, 1]” (Anak nga mga Babaye sa Akong Gingharian [2017], 13–15, 7–8).
Unsa ang labing mahinungdanon kaninyo mahitungod sa pag-organisar sa Relief Society?
Base sa mga pamahayag niini nga handout, unsa nga mga kamatuoran ang atong makat-unan mahitungod sa Relief Society?
Human sa igong panahon, hangyoa ang mga estudyante sa pagreport sa mga kamatuoran nga ilang nailhan. Mahimo silang maghisgot og pipila ka mga kamatuoran, lakip sa mosunod: Ang Relief Society nanukad sa karaan ug balaanong dinasig nga bahin sa Pagpahiuli sa Simbahan ni Jesukristo. Ang Relief Society giorganisar ubos sa priesthood ug subay sa sumbanan sa priesthood.
Sa unsang mga paagi nga ang Relief Society usa ka mahinungdanong bahin sa gipahiuli nga Simbahan ni Jesukristo?
Unsa kaha ang gipasabut nga ang Relief Society giorganisar ubos sa priesthood ug subay sa sumbanan sa priesthood?
Aron matabangan ang mga estudyante nga makasabut unsay gipasabut nga ang Relief Society giorganisar ubos sa priesthood ug subay sa sumbanan sa priesthood, dapita ang usa ka estudyante sa pagbasa og kusog sa mosunod nga pamahayag ni Presidente Dallin H. Oaks sa Unang Kapangulohan:
Imahe
Dallin H. Oaks
“Sa pakigpulong ngadto sa Relief Society, si Presidente Joseph Fielding Smith, nga nianang higayuna Presidente sa Korum sa Napulog Duha ka mga Apostoles, miingon niini: “Samtang ang mga sister wala hatagi og Priesthood, wala kini ihatag kanila, wala kana magpasabut nga ang Ginoo wala mohatag nila og awtoridad. … Ang usa ka tawo mahimong gihatagan og awtoridad, o ang usa ka sister, aron paghimo sa piho nga mga butang sa Simbahan nga mahinungdanon ug gikinahanglan gayud sa atong kaluwasan, sama sa buhat nga gihimo sa atong mga sister diha sa Balay sa Ginoo. Gihatagan sila og awtoridad sa paghimo sa mahinungdanon ug talagsaon nga mga butang, sagrado ngadto sa Ginoo, ug ingon ka mahinungdanon sama gayud sa mga panalangin nga gihatag sa kalalakin-an nga naghupot sa Priesthood’ [Joseph Fielding Smith, “Relief Society—an Aid to the Priesthood,” Relief Society Magazine, Ene. 1959, 4].
“Nianang talagsaong pakigpulong, si Presidente Smith mibalik-balik og sulti nga ang kababayen-an gihatagan og awtoridad. Ngadto sa kababayen-an miingon siya, ‘Makasulti kamo nga may awtoridad, kay ang Ginoo mihatag ninyo og awtoridad.’ Miingon usab siya nga ang Relief Society ‘[gi]hatagan og gahum ug awtoridad sa paghimo og daghang dagkong mga butang. Ang buhat nga ilang gibuhat gihimo nga may balaanong awtoridad.’ Ug, siyempre, ang buhat sa Simbahan nga gibuhat sa kababayen-an o kalalakin-an, sa templo man o sa mga ward o mga branch, gihimo ubos sa direksyon nianang naghupot sa mga yawe sa priesthood. Busa, kon maghisgot bahin sa Relief Society, si Presidente Smith mipasabut, ‘[Ang Ginoo] mihatag kanila niining importante nga organisasyon diin sila adunay awtoridad sa pagserbisyo ubos sa mga pagdumala sa mga bishop sa ward … , motabang sa espirituhanon ug temporal nga kinahanglanon sa atong katawhan’ [Joseph Fielding Smith, “Relief Society—an Aid to the Priesthood,” 4, 5].
Busa, ginaingon nga ang Relief Society dili lang usa ka klase alang sa kababayen-an apan usa ka butang nga sila nahisakop—balaanong gi-establisar nga sumpay sa priesthood” (Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 50–51).
Sa unsang paagi kini nga mga pamahayag makatabang kanato nga mas makasabut nga ang Relief Society giorganisar ubos sa priesthood ug subay sa sumbanan sa priesthood?
Hangyoa ang mga estudyante sa pagpangita sa kapitulo 37 sa Mga Santos: Volume 1. Dapita ang pipila ka mga estudyante nga magpuli-puli sa pagbasa og kusog gikan sa pahina 512, sugod sa parapo nga nagsugod og “Human ang tanan makakanta …” ug matapos sa parapo sa pahina 514 nga nagsugod og “Ang matag sakop kinahanglang …” Hangyoa ang klase sa pagsunod, nga mangita kon unsay nahitabo ug gihisgutan sa adlaw nga naorganisar ang Relief Society.
Unsa ang labing importante kaninyo niini nga istorya?
Unsa ang pipila ka mga paagi nga ang kababayen-an sa Relief Society nakahimo og “butang nga dili ordinaryo” sa pagpanalangin kaninyo o sa inyong kaila?
Dapita ang usa ka estudyante sa pagbasa og kusog sa mosunod nga parapo:
“Ang mga sister sa Nauvoo nanghugyaw nga makaapil sa Relief Society. Mahinamon silang mohatag og temporal ug espiritwal nga tabang pinaagi sa organisado, awtorisado nga pamaagi. Sila usab nakamatikod sa dili hitupngan nga oportunidad nga matudloan sa usa ka propeta agi og pangandam alang sa mas taas nga espirituhanong kahibalo ug sa mga panalangin sa templo. Ganahan sila nga magkahiusa sila sa usag usa ug sa ilang mga kaigsoonan sa priesthood niining talagsaon nga mga katuyoan. …
“… Bulahan ang mga sister nga matudloan ni Propeta Joseph Smith sa unom nila ka mga miting. Samtang nagtudlo siya, ilang gibati ang hilabihan nga pagbubu sa Espiritu. …
“Si Joseph Smith mitudlo og mga baruganan nga nakatabang sa mga sister sa Relief Society sa ‘paghupay sa kabus’ ug ‘pagluwas sa mga kalag’—pasiunang mga baruganan diin ang kapunongan natukod. … Sukad niadtong una nga mga miting sa Relief Society, ang mga sister migamit sa mga pagtulun-an sa Propeta diha sa ilang mga paningkamot nga mapalambo ang ilang pagtuo ug personal nga pagkamatarung, naglig-on sa mga pamilya ug panimalay, ug sa pagpangita ug pagtabang niadtong nanginahanglan” (Anak nga mga Babaye sa Akong Gingharian [2017], 18–20).
Ikonsiderar ang pagdapit og pipila ka mga estudyante sa pagpaambit sa ilang pagpamatuod mahitungod sa Relief Society isip balaanong dinasig nga bahin sa Simbahan sa Manluluwas. Awhaga ang mga sister nga aktibong moapil sa Relief Society sa ilang mga branch, mga ward, mga district, ug mga stake.
Gipahigayon ni Propeta Joseph Smith ang tuga sa templo sa Nauvoo
Ipakita ang giandam nga hulagway, ug ipasabut nga litrato kini sa ibabaw nga lawak sa gitukod og usab nga Red Brick Store sa Nauvoo, Illinois. Niadtong Mayo 4, 1842, sa dugay pa mahuman ang Templo sa Nauvoo, si Propeta Joseph Smith mipasiugda sa tuga sa templo ngadto sa usa ka gamay nga grupo sa mga lider sa Simbahan didto sa ibabaw nga lawak sa iyang Red Brick Store, diin gihan-ay agig pagpangandam alang sa seremonya sa pagtuga. Bisan kon wala kita masayud kanus-a gyud nakadawat si Propeta Joseph Smith og panabut sa tuga sa templo, nasayud kita nga iya kining nadawat pinaagi sa pagpadayag (tan-awa sa Russell M. Nelson, “Personal Preparation for Temple Blessings,” Ensign, Mayo 2001, 33).
Dapita ang usa ka estudyante sa pagbasa og kusog sa mosunod nga istorya. Hangyoa ang klase sa pagpaminaw kon giunsa paghulagway sa kasaysayan ni Joseph Smith ang ordinansa sa pagtuga nga iyang gipahigayon niadtong Mayo 4, 1842:
Imahe
Joseph Smith
“Akong gigahin ang adlaw diha sa ibabaw nga bahin sa tindahan, … sa konseho uban ni Heneral James Adams, sa Springfield, Patriarch Hyrum Smith, nila ni Bishop Newel K. Whitney ug George Miller, ug Presidente Brigham Young ug nila ni Elder Heber C. Kimball ug Willard Richards, nagtudlo kanila sa mga baruganan ug kapunongan sa Pagkapari [Priesthood], mihimo sa mga paghugas ug mga pagdihog, mga pagtuga ug mga pagtugyan sa mga yawe kalabut sa Aaronic nga Pagkapari, ug hangtud ngadto sa pinakataas nga kapunongan sa Melchizedek nga Pagkapari, nagpresentar sa han-ay mahitungod sa Karaan nga mga Panahon, ug ang tanan niadto nga mga plano ug mga baruganan diin si bisan kinsa makahimo sa pag-angkon sa kahingpitan niadtong mga panalangin nga giandam na alang sa Simbahan sa Unang Natawo, ug moduol ug magpabilin diha sa presensya sa Elohim diha sa mahangturong mga kalibutan. Niini nga konseho gipalihok ang karaang paghan-ay sa mga butang sa pinaka-unang higayon niining katapusang mga adlaw.
“Ug ang mga pamahayag nga akong gihimo dinhi niini nga mga konseho mao ang mga butang nga espirituhanon, ug mga butang nga madawat lamang sa mga espirituhanon og panghunahuna: ug walay laing gipahibalo niining mga tawhana kon dili unsa ang ipahibalo ngadto sa tanan nga mga Santos sa katapusang mga adlaw, sa labing madali kon sila andam na sa pagdawat niini, ug usa ka tukma nga dapit ang giandam aron paghatag niini, bisan ngadto sa pinakahuyang sa mga Santos; busa himoa nga ang mga Santos, magmakugihon sa pagtukod sa Templo, ug sa tanan nga mga balay diin sila [gimandoan, o mandoan unya, sa Dios sa pagtukod]” (Mga Pagtulun-an sa mga Presidente sa Simbahan: Joseph Smith, [2007], 501–502).
Unsa ang inyong nakita nga makapaikag o mahinungdanon niini nga istorya?
Ipasabut nga ang pulong nga Eloheim (mas komon nga gisulat isip Elohim) maoy usa ka Hebreohanong pulong nga nagpasabut og “Dios” o “mga dios.” Niini nga konteksto, ang termino nga “sa Eloheim” naglakip sa Langitnong Amahan ug ni Jesukristo (tan-awa sa Giya ngadto sa mga Kasulatan, “Elohim,” scriptures.ChurchofJesusChrist.org).
Unsa man ang gitudlo kanato sa mga pulong nga “moduol ug magpabilin diha sa presensya sa Elohim diha sa mahangturong mga kalibutan” mahitungod sa katuyoan sa ordinansa sa tuga sa templo? (Human motubag ang mga estudyante, isulat ang mosunod nga kamatuoran diha sa pisara: Ang tuga sa templo nag-andam kanato sa pagduol ug pagpabilin diha sa presensya sa Langitnong Amahan ug ni Jesukristo.)
Dapita ang usa ka estudyante sa pagbasa og kusog sa mosunod nga pamahayag ni Presidente Russell M. Nelson:
Imahe
Russell M. Nelson
“Sa templo atong madawat ang tuga, nga, sa literal nga pagkasulti, usa ka gasa. Sa pagdawat niini nga gasa, kinahanglan natong masabtan ang kahulugan niini ug ang kaimportante sa pagtuman sa sagradong mga pakigsaad. Ang matag ordinansa sa templo ‘dili lamang usa ka ritwal nga kinahanglang masinati, usa kini ka paghimo og maligdong nga saad’ [Gordon B. Hinckley, Teachings of Gordon B. Hinckley (1997), 638].
“Ang tuga sa templo gihatag pinaagi sa pagpadayag. Busa, kini labing masabtan pinaagi sa pagpadayag, madasigong gitinguha uban sa putli nga kasingkasing [tan-awa sa Moroni 10:4–5]. Si Presidente Brigham Young miingon, ‘Ang inyong tuga mao, ang pagdawat sa tanan niana nga mga ordinansa sa balay sa Ginoo, nga kinahanglanon ninyo, human kamo mobiya niining kinabuhia, aron sa pagtugot kaninyo nga makabalik ngadto sa presensya sa Amahan, … ug maangkon ang inyong mahangturong kahimayaan’ [Discourses of Brigham Young, sel. John A. Widtsoe (1941), 416]. …
“… Ang pagkamasulundon sa mga pakigsaad sa templo mopasarang kanato alang sa kinabuhing dayon, ang labing mahinungdanong gasa sa Dios ngadto sa tawo [tan-awa sa D&P 14:7]. Ang kinabuhing dayon labaw pa kay sa pagka-imortal. Ang kinabuhing dayon mao ang kahimayaan sa kinatas-an nga langit—ang matang sa kinabuhi nga gipuy-an sa Dios” (Russell M. Nelson, “Personal Preparation for Temple Blessings,” Ensign, Mayo 2001, 33).
Sa unsang paagi kini nga pamahayag makatabang kanato nga makasabut sa kaimportante sa pagdawat sa tuga sa templo ug pagtuman sa mga pakigsaad nga atong gihimo sa templo?
Ipasabut nga sulod sa duha ka tuig sa wala pa ang iyang kamatayon niadtong Hunyo 1844, si Propeta Joseph Smith mipasiugda sa mga ordinansa sa templo “ngadto sa pipila ka dosena nga mga lalaki ug mga babaye, kinsa kanunay nga nagtigum aron sa pag-ampo ug sa pag-apil sa mga seremonya sa templo samtang nagpaabut sila sa pagkahuman sa Templo sa Nauvoo niadtong Disyembre 1845” (“Joseph Smith’s Teachings about Priesthood, Temple, Women,” Gospel Topics, topics.ChurchofJesusChrist.org). Nadawat ni Emma Smith ang tuga sa templo niadtong Septyembre 28, 1843. Siya ang pinakaunang babaye nga nakadawat sa tuga ug dayon mitabang sa ubang mga sister nga makadawat sa sama nga ordinansa (tan-awa sa The First Fifty Years of Relief Society, ed. Jill Mulvay Derr ug uban pa [2016], xxviii, 9–10).
Unsa ang mga paagi nga napanalanginan kamo pinaagi sa mga ordinansa sa templo ug sa pagpahigayon og mga ordinansa sa templo alang sa inyong mga katigulangan?
Ipamatuod nga ang tuga sa templo mag-andam kanato nga maanaa sa presensya sa Langitnong Amahan ug ni Jesukristo. Awhaga ang mga estudyante nga kanunay nga mosimba sa Ginoo diha sa templo kutob sa itugot sa ilang panahon ug mga kahimtang.
Awhaga ang mga estudyante nga mangandam alang sa sunod nga klase pinaagi sa pagbasa sa mga kapitulo 38–39 sa Mga Santos: Volume 1.
Komentaryo ug Background nga Impormasyon
Ang pagpundok sa katawhan sa Dios karon
Sa ilang pagbasa sa kapitulo 37 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), ang mga estudyante dugang nga makat-on mahitungod sa buhat sa dinaghan nga kaminyoon sa Nauvoo. Kon ang mga estudyante dunay mga pangutana mahitungod niini nga hilisgutan, mahimo nimo silang itudlo ngadto sa essay sa Gospel Topics nga “Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo]” (topics.ChurchofJesusChrist.org). Ang dinaghan nga kaminyoon hisgutan sa mas detalyadong paagi diha sa leksyon 24.
