Leksyon 3

Pagkuha sa Rekord

Pasiuna ug Han-ay sa mga Panghitabo [Timeline]

Tungod kay si Joseph Smith nagpadayon sa pagpamatuod nga siya nakakita og panan-awon, gigukod siya atol sa tulo ka tuig nga gidugayon nga misunod sa Unang Panan-awon. Siya sa wala madugay miingon nga atol niini nga panahon, siya “nahulog ngadto sa daghan nga walay hinungdan nga mga kasaypanan, ug nagpakita sa [iyang] kahuyang sa kabatan-on” (Joseph Smith—Kasaysayan 1:28–29). Agig tubag sa pag-ampo ni Joseph sa gabii sa Septyembre 21, 1823, si anghel Moroni nagpakita ug misulti ni Joseph nga ang Dios mipasaylo kaniya ug adunay ipabuhat kaniya (tan-awa sa Joseph Smith, “History, Gibana-bana sa mga Ting-init sa 1832,” 4, josephsmithpapers.org). Gisultihan usab niya si Joseph nga usa ka karaang rekord nga gisulat diha sa bulawan nga mga palid ang gideposito sa usa ka bungtod duol sa panimalay sa Smith. Pagkasunod adlaw, si Joseph Smith mitan-aw sa mga palid, apan si Moroni midili kaniya sa pagdala niini. Atol sa misunod nga upat ka tuig, ang Ginoo miandam ni Joseph Smith alang sa panahon nga siya makahimo na sa pagkuha sa mga palid. Niadtong Septyembre 22, 1827, nadawat sa Propeta ang mga palid gikan ni anghel Moroni.

Septyembre 21–22, 1823Si anghel Moroni nagpakita ni Joseph Smith makalima ka higayon.

1823–27Ang Ginoo miandam ni Joseph Smith sa pagkuha sa bulawan nga mga palid.

Nobyembre 19, 1823Ang magulang nga igsoon ni Joseph Smith nga si Alvin, namatay.

Oktubre 1825Nahimamat ni Joseph Smith si Emma Hale didto sa Harmony, Pennsylvania, samtang nagtrabaho alang kang Josiah Stowell.

Enero 18, 1827Si Joseph Smith ug Emma Hale naminyo.

Septyembre 22, 1827Nadawat ni Joseph Smith ang bulawan nga mga palid gikan ni Moroni.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 3–4

Mga Sugyot alang sa Pagtudlo

Pagtudlo sa kasaysayan sa Simbahan

Samtang magtudlo ka sa kasaysayan sa Simbahan, buhata sa paagi nga mapalig-on ang pagtuo sa mga estudyante nga si Jesukristo mipahiuli sa Iyang Simbahan nganhi sa yuta sa katapusang mga adlaw. Tabangi ang mga estudyante nga makakita kon sa unsa nga paagi nga si Joseph Smith matinud-anong mituman sa iyang misyon isip propeta sa Pagpahiuli. Gamita ang balaan nga gitudlo nga mga kapanguhaan (sama sa mga kasulatan ug mga pulong sa mga propeta), sa gihatag nga mga materyal sa kurso, ug sa ubang kasaligang mga kapanguhaan aron matabangan ang mga estudyante nga makakita sa proseso sa Pagpahiuli gikan sa puno sa pagtuo nga mga panglantaw.

Si anghel Moroni mibisita ni Joseph Smith

Ipakita ang gisukip nga diagram:

Diagram sa Unang Panan-awon ug ni anghel Moroni

• Base sa inyong pagbasa sa kapitulo 3 sa Mga Santos: Volume 1 ug sa inyong kahibalo sa kinabuhi ni Joseph Smith, unsa nga matang sa mga hagit ang nasinati ni Joseph atol sa tulo ug tunga nga tuig tali sa iyang Unang Panan-awon ug sa iyang unang pagkakita ni anghel Moroni?

Dapita ang usa ka estudyante sa pagbasa og kusog sa Joseph Smith—Kasaysayan 1:28. Hangyoa ang klase sa pagsunod, nga mangita sa mga pulong nga gigamit ni Joseph Smith sa paghulagway sa pipila ka hagit ug mga pagbati nga iyang nasinati atol sa tulo ug tunga ka tuig human sa Unang Panan-awon.

• Unsa nga mga pulong diha sa bersikulo 28 ang naghulagway sa mga hagit ug mga pagbati nga nasinati ni Joseph Smith isip usa ka batan-on?

• Sa unsa nga paagi nga ang mga hagit ni Joseph susama sa mga hagit nga nasinati sa kabatan-on ug mga young adult sa Simbahan karon?

Dapita ang usa ka estudyante sa pagbasa og kusog sa Joseph Smith—Kasaysayan 1:29. Hangyoa ang klase sa pagpangita unsay gihimo ni Joseph Smith sa pagbuntog sa mga pagbati sa panghimaraut nga iyang nasinati. Hangyoa ang mga estudyante sa pag-report sa unsay ilang nakit-an.

Ipakita ang mosunod nga mga istorya nga narekord ni Propeta Joseph Smith (1805–44), ug dapita ang usa ka estudyante sa pagbasa og kusog niini. Hangyoa ang klase sa pagsunod, nga mangita kon giunsa paghulagway ni Joseph ang iyang kasinatian nianang gahiona.

Joseph Smith

“Sa dihang ako mga 17 anyos … , human ako mopahulay sa akong higdaanan, wala ako makatulog apan namalandong sa kinabuhi ug kasinatian. Nakahibalo kaayo ko nga ako wala makatuman sa mga sugo, ug ako sa kinasingkasing naghinulsol sa akong tanang mga sala ug kalapasan ug nagpaubos sa akong kaugalingon sa Iyang atubangan kansang mga mata anaa sa tanang mga butang” (Joseph Smith, Journal, 1835–1836, 24, josephsmithpapers.org).

“Mitawag ako pag-usab sa Ginoo ug gipakita niya ngari kanako ang langitnong panan-awon, kay tan-awa usa ka anghel sa Ginoo miabut ug mibarug sa akong atubangan, … ug gitawag ang akong ngalan, ug miingon siya nga ang Ginoo mipasaylo nako sa akong mga sala” (Joseph Smith, in “History, gibana-bana sa mga ting-init 1832,” 4, josephsmithpapers.org).

• Unsay atong makat-unan gikan sa Joseph Smith—Kasaysayan 1:29 ug gikan sa istorya ni Joseph nga nagpakita nga siya sinsero mahitungod sa iyang paghinulsol?

• Base sa tubag ni anghel Moroni ngadto sa pangamuyo ni Joseph, unsa nga baruganan ang atong makat-unan mahitungod sa sinsero nga paghinulsol? (Ang mga estudyante mahimong moila og baruganan sama sa mosunod: Kon sinsero kitang maghinulsol sa atong mga sala, ang Ginoo mopasaylo kanato. Isulat kini nga baruganan diha sa pisara.)

Aron matabangan ang mga estudyante nga makasabut niini nga baruganan, ipakita ang mosunod nga pamahayag ni Elder Dale G. Renlund sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

Dale G. Renlund

“Ang maayong balita sa ebanghelyo mao nga makahinulsol kita! Ang kasaypanan mahimong ‘makuha sa hingpit.’ Mahimo kitang mapuno sa hingpit nga kalipay, makadawat og kapasayloan sa atong mga sala, ug magbaton og ‘kalinaw sa tanlag.’ Makalingkawas kita sa mga pagbati sa kawalay paglaum ug sa pagkaulipon sa sala. Mahimo kitang mapuno sa kahibulongan nga kahayag sa Dios ug ‘[dili] na mag-antus.’ Ang paghinulsol dili lamang posible apan usab mahimayaon tungod sa atong Manluluwas” (Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 124).

Dapita ang mga estudyante sa paghunahuna og panahon sa dihang gibati nila nga ang Ginoo mipasaylo kanila human sila sinserong naghinulsol sa ilang mga sala.

Awhaga ang mga estudyante sa pagpadayon sa sinsero nga paghinulsol ug magtinguha sa kapasayloan sa Ginoo kon gikinahanglan sa ilang kinabuhi.

Si Moroni nagpakita ngadto ni Joseph Smith

Si Joseph Smith gibisitahan ni Moroni didto sa uma

Ipakita ang gisukip nga mga litrato, ug hangyoa ang usa ka estudyante sa pag-summarize sa unang upat ka pagbisita ni Moroni ngadto ni Joseph Smith niadtong Septyembre 21–22, 1823. Kon gikinahanglan, i-refer ang mga estudyante ngadto sa Joseph Smith—Kasaysayan 1:30–53.

• Unsa ang pipila ka instruksyon nga gihatag ni Moroni kang Joseph Smith atol niini nga mga pagbisita?

Ipasabut nga atol sa ikaduha ug ikatulo nga pagbisita ni Moroni, mihatag siya og instruksyon nga wala niya ihatag sa iyang unang pagbisita. Dapita ang usa ka estudyante sa pagbasa og kusog sa Joseph Smith—Kasaysayan 1:44–46. Hangyoa ang klase sa pagsunod, nga mangita og dugang nga mga instruksyon ni Moroni ngadto ni Joseph.

• Unsa nga dugang nga impormasyon ang gihatag ni Moroni kang Joseph niining sunod-sunod nga mga pagbisita?

• Ngano kaha nga importante alang ni Joseph nga mapasidan-an nga kinahanglan nga wala siyay laing motibo sa pagkuha sa mga palid kon dili ang pagtukod sa gingharian sa Dios?

Pahibaloa ang mga estudyante nga human gisultihan niya ang iyang amahan mahitungod sa anghel, si Joseph miadto sa Bungtod sa Cumorah. Ipakita ang mosunod nga pamahayag ni Oliver Cowdery, ug dapita ang usa ka estudyante sa pagbasa niini og kusog. Hangyoa ang klase sa pagsunod, nga mangita sa unsay nahitabo ngadto ni Joseph Smith samtang naglakaw siya padulong sa bungtod.

Oliver Cowdery

“Duha ka dili makita nga mga gahum ang naglihok sa iyang hunahuna atol sa iyang paglakaw gikan sa iyang pinuy-anan ngadto sa Cumorah, ug nga ang usa nag-awhag sa kasiguroan sa bahandi ug kasayon niini nga kinabuhi, gamhanan kaayong midani kaniya, nga ang importante nga butang nga mabinantayon ug talagsaong gisulti sa anghel, hingpit nga nawala sa iyang hunahuna” (Oliver Cowdery, “Letter VIII,” Latter Day Saints’ Messenger and Advocate, Okt. 1835, 197).

Hangyoa ang mga estudyante sa pagpangita sa kapitulo 3 sa Mga Santos: Volume 1. Dapita ang pipila ka estudyante sa pagpuli-puli og basa og kusog gikan sa pahina 25, sugod sa parapo [paragraph] nga nagsugod “Pag-abut sa bungtod …” ug matapos sa parapo sa pahina 26 nga nagsugod sa “Si Joseph milingi ug nakita si Moroni. …” Hangyoa ang mga estudyante sa pagsunod, nga mangita kon sa unsa nga paagi nga ang mga hunahuna ug mga tinguha ni Joseph Smith nakaimpluwensya sa iyang abilidad sa pagdawat sa mga palid.

• Sa unsa nga mga paagi si Joseph misupak sa mga sugo sa Ginoo?

Ipasabut nga sa dihang nakahibalo si Joseph nga dili niya makuha ang mga palid ug nagsugod sa pag-ampo, ang kalangitan nabukas ug nakita niya ang himaya sa Ginoo. Nakita usab niya ang yawa ug ang iyang mga anghel (tan-awa sa Oliver Cowdery, “Letter VIII,” 198). Ang pagtandi nakapadani pag-ayo ni Joseph. Ipakita ang mosunod nga pamahayag sa inahan ni Joseph, nga si Lucy Mack Smith, kinsa misulat mahitungod niini nga kasinatian, ug pagdapit og usa ka estudyante sa pagbasa niini og kusog. Hangyoa ang klase sa pagsunod, nga mangita unsay gipakita ngadto ni Joseph.

Lucy Mack Smith

“Ang anghel mipakita niya, pinaagi sa pagtandi, sa kalainan tali sa maayo ug dautan ug sa mga sangputanan nga [mo] sunod sa pagkamasulundon ug pagkamasinupakon ngadto sa mga sugo sa Dios, sa makapahibulong ug sa mapugsanon nga paagi nga ang impresyon kanunay nga tin-aw sa iyang panumduman hangtud sa katapusan sa iyang mga adlaw. Ug sa paghatag og kalabutan niini nga sirkumstansya, sa hapit na ang iyang kamatayon, miingon siya nga bisan pagkahuman andam siya sa pagtuman sa mga sugo sa Dios.

“… Ang anghel dugang nga misulti kaniya nga ang panahon alang sa mga palid nga dad-on ngadto sa kalibutan wala pa moabut; nga dili niya kini makuha gikan sa dapit diin kini gibutang hangtud siya makat-on sa pagtuman sa mga sugo sa Dios—dili lang andam, apan makabuhat niini” (Lucy Mack Smith, “Lucy Mack Smith, History, 1845,” 85, josephsmithpapers.org).

• Unsa ang gipakita ni Moroni ngadto ni Joseph nga adunay dakong epekto kaniya?

• Unsa nga baruganan ang atong makat-unan gikan niini nga istorya sa kasinatian ni Joseph didto sa Bungtod sa Cumorah? (Ang mga estudyante mahimong mohatag og pipila ka sakto nga mga tubag, lakip sa mosunod: Pinaagi sa Iyang mga sulugoon, ang Ginoo makatabang nato nga makasabut sa mga sangputanan sa atong maayo ug dili maayo nga mga pagpili. Isulat kini nga baruganan diha sa pisara.)

• Sa unsa nga mga paagi nga kini makatabang kanato nga makasabut sa mga sangputanan sa atong mga pagpili?

• Unsa ang pipila ka mga ehemplo sa atong panahon kon sa unsa nga paagi nga ang Ginoo, pinaagi sa Iyang mga sulugoon, makatabang nato nga makasabut sa mga sangputanan sa atong mga pagpili? (Mga ehemplo maglakip sa patriyarkal nga mga panalangin, tambag gikan sa lokal nga mga lider sa Simbahan, ug mga pasidaan ug mga pagtulun-an gikan sa mga General Authority ug mga Opisyales sa Simbahan, ilabi na sa buhi nga mga propeta, mga manalagna, ug mga tigpadayag.)

Ang Ginoo miandam ni Joseph Smith alang sa panahon nga siya makahimo na sa pagkuha sa bulawan nga mga palid

Ipasabut nga atol sa misunod nga upat ka tuig, ang Ginoo miandam ni Joseph sa daghang mga paagi sa pagkuha sa rekord ug pagtuman sa gipabuhat sa Ginoo kaniya. Si Joseph mibalik ngadto sa bungtod matag tuig sa Septyembre 22 aron matudloan ni anghel Moroni. Niining panahona, si Joseph nakadawat usab og “daghang pagbisita gikan sa mga anghel sa Dios nga nagpakita sa kaharianon ug himaya sa mga hitabo nga moabut sa ulahing mga adlaw” (Mga Pagtulun-an sa mga Presidente sa Simbahan: Joseph Smith [2007], 69).

Tabangi ang mga estudyante nga makasabut nga ang sunod nga upat ka tuig nakahatag usab og mga kausaban sa kinabuhi ni Joseph, lakip sa iyang dapit nga kapuy-an ug katrabahoan. Ipakita ang gisukip nga mapa, “Ang dapit sa New York, Pennsylvania, ug Ohio sa USA,” ug hangyoa ang mga estudyante sa pagpangita sa Manchester, New York, ug balangay sa Harmony, Pennsylvania (tan-awa usab sa mapa sa kasaysayan sa Simbahan 3, “Ang Dapit sa New York, Pennsylvania, ug Ohio sa USA”).

Mapa sa dapit sa New York, Pennsylvania, ug Ohio

• Sumala sa inyong pagbasa sa Mga Santos: Volume 1, ngano nga si Joseph Smith mitrabaho alang ni Josiah Stowell didto sa Harmony, Pennsylvania? (Si Mr. Stowell mipatrabaho ni Joseph aron sa pagtabang kaniya sa pagpangita sa bahandi sa Katsila nga sa iyang pagtuo gilubong sa Harmony. Daghang mga tawo sa dapit ingon og nagtuo mahitungod sa gilubong nga bahandi ug adunay susama nga mga pagtuo sa panahon ni Joseph.)

Itudlo nga si Joseph Smith sa katapusan mikombinser ni Josiah Stowell sa paghunong sa pagpangita sa bahandi (tan-awa sa Joseph Smith—Kasaysayan 1:56).

Si Joseph ug Emma Smith

Ipakita ang gisukip nga imahe. Ipasabut nga atol niining importante nga panahon sa pagpangandam, samtang si Joseph nagtrabaho alang ni Josiah Stowell, nahimamat niya si Emma Hale. Human mangulitawo kapin gamay sa usa ka tuig, naminyo sila niadtong Enero 18, 1827. Si Emma Smith usa ka positibo nga impluwensya ni Joseph. Siya adunay importante nga tahas sa Pagpahiuli dili lamang pinaagi sa pagsuporta ug pagtabang sa iyang bana sa nagkalain-laing mga paagi (tan-awa sa D&P 25:5–6) apan usab pinaagi sa iyang personal nga debosyon ug kaisug sa atubangan sa kanunay nga grabe nga mga pagsulay.

Ipasabut nga human sa ilang kasal, si Emma ug Joseph mibalhin ngadto sa panimalay ni Lucy ug Joseph Smith Sr. sa Manchester, New York. Usa ka gabii sa sayong bahin sa Enero 1827, dugay nga nauli si Joseph kay sa gipaabut.

Ipakita ang mosunod nga pamahayag ni Lucy Mack Smith, ug dapita ang usa ka estudyante sa pagbasa niini og kusog. Hangyoa ang klase sa pagsunod, nga mangita sa unsay gisulti ni Moroni ni Joseph Smith.

Lucy Mack Smith

“Sa pagsulod, milingkod si [Joseph] sa lingkuranan, klaro nga gikapoy. Ang akong bana … diha-diha mituaw, ‘Joseph, nganong dugay kang miabut? Aduna bay nahitabo kanimo? Nabalaka na kaayo mi nimo sulod sa milabayng tulo ka oras.’ Tungod kay wala motubag si Joseph nagpadayon siya sa iyang mga pangutana hangtud ako sa katapusan miingon, ‘Karon, Papa … papahulaya siyag kadiyot—ayaw siyag samuka—ania na siya nga luwas, ug gikapoy kaayo siya, mao nga palihug hulat og kadiyot.’ … Sa wala madugay si [Joseph] mipahiyom ug miingon sa kalma kaayo nga tingog, ‘Nakadawat ako karon sa labing grabe nga pagpanton nga sukad akong nasinati sa akong kinabuhi.’ Ang akong bana, nagtuo nga gikan sa pipila sa mga silingan, nasuko gyud ug miingon, ‘Gusto ko nga masayud unsay labut ni bisan kinsa nga mangita man og sayop nimo!’

“‘Hunong, papa, hunong,’ miingon si Joseph, ‘ang anghel kadto sa Ginoo—sa akong pag-agi sa bungtod sa Cumorah, diin gitago ang mga palid, nakigkita nako ang anghel ug miingon nga ako wala maningkamot pag-ayo sa buhat sa Ginoo; nga ang panahon miabut na nga [ma]kuha na ang rekord; ug nga ako kinahanglan aktibong maningkamot ug andamon ang akong kaugalingon sa mga butang nga gisugo sa Dios nga akong buhaton’” (Lucy Mack Smith, “Lucy Mack Smith, History, 1845,” mga pahina 103–4, josephsmithpapers.org).

• Unsa ang importante nganha kaninyo niini nga pagbadlong ni Moroni nga gihatag ngadto ni Joseph?

• Unsa nga baruganan ang atong makat-unan gikan sa mensahe ni Moroni ngadto ni Joseph? (Ang mga estudyante mahimong makahibalo og baruganan sama sa mosunod: Aron makadawat og mga oportunidad ug mga panalangin nga giandam sa Gioo kanato, kinahanglan nga aktibo kitang mohimo sa Iyang buhat. Isulat kini nga baruganan diha sa pisara.)

• Unsa ang pipila ka mga paagi nga aktibo natong mahimo ang buhat sa Ginoo aron kita angayan sa mga panalangin ug mga oportunidad nga Iyang giandam alang kanato?

Nakuha ni Joseph Smith ang bulawang mga palid

Dapita ang usa ka estudyante sa pagbasa og kusog sa Joseph Smith—Kasaysayan 1:59. Hangyoa ang klase sa pagsunod, nga mangita sa unsay nahitabo atol sa ikaupat nga tinuig nga pagbisita ni Joseph sa Bungtod sa Cumorah.

• Sumala sa katapusan sa bersikulo 59, unsa nga saad ang gihatag ni Moroni kang Joseph?

• Nganong importante man alang ni Joseph nga makahibalo nga ang Ginoo motabang kaniya sa pagpanalipod sa mga palid?

Ipasabut nga sa dihang gidala ni Joseph ang mga palid sa ila, dihay mga tawo nga nagtago sa kalasangan determinado nga mokuha sa mga palid gikan kaniya. Bisan og giataki siya makatulo ka higayon sa iyang pagpauli, nakaeskapo siya gikan sa iyang mga tig-ataki matag higayon ug miluwas sa mga palid. Sa pag-abut sa ilang balay, ang iyang pamilya gusto kaayong makakita kaniya.

Dapita ang usa ka estudyante sa pagbasa og kusog sa mosunod nga pamahayag sa igsoong lalaki ni Joseph nga si William. Hangyoa ang klase sa pagsunod, nga mangita sa unsay gihangyo sa amahan ni Joseph kaniya ug giunsa niya sa pagtubag.

William Smith

“Sa dihang ang mga palid gisulod sa balay giputos kini sa sapnot nga panaptong delana. Ang akong papa mibutang dayon niini sa punda sa unlan. Miingon si Papa, ‘Unsa, Joseph, dili ba kami makatan-aw niini?’ [Mitubag si Joseph:] ‘Dili. Masinupakon ako sa unang higayon, apan gusto ko nga magmatinud-anon niining higayuna” (William Smith, “The Old Soldier’s Testimony,” The Saints’ Herald, vol. 31, nu. 40 [Okt. 4, 1884], 643–44).

• Sa unsa nga paagi nga ang tubag ni Joseph nagpakita nga siya andam na karon sa pagdawat sa mga palid?

Ribyuha ang mga baruganan nga gilista diha sa pisara ug pangutana:

• Unsa kaha kini nga mga baruganan nakaandam ni Joseph Smith sa pagkuha sa bulawan nga mga palid?

Ipakita ang mosunod nga pangutana, ug dapita ang mga estudyante sa pagrekord sa ilang mga tubag sa ilang mga study journal: Sa unsa nga paagi nga ang paggamit sa mga baruganan nga atong gihisgutan karon makatabang sa pag-andam kaninyo alang sa buhat nga giandam sa Dios alang kaninyo?

Awhaga ang mga estudyante sa pagsunod sa mga baruganan nga imong gihisgutan.

Dapita ang mga estudyante sa pag-andam alang sa sunod nga klase pinaagi sa pagbasa sa mga kapitulo 5–6 sa Mga Santos: Volume 1.