Leksyon 24

Mga Kalamboan sa Doktrina didto sa Nauvoo

Pasiuna ug Han-ay sa mga Panghitabo [Timeline]

Samtang mibisita kang Benjamin ug Melissa Johnson sa ilang panimalay sa Ramus, Illinois, niadtong Mayo 16, 1843, si Propeta Joseph Smith mitudlo nga ang pagsulod ngadto sa bag-o ug walay katapusan nga pakigsaad sa kaminyoon gikinahanglan alang sa kahimayaan (tan-awa sa D&P 131:1–4) ug dayon misilyo sa magtiayon alang sa kahangturan. Paglabay sa mga duha ka semana, si Joseph ug Emma Smith gisilyo alang sa kahangturan diha sa Red Brick Store ni Joseph Smith sa Nauvoo, Illinois. Niining panahona, si Joseph mipadayon usab sa pagsunod sa sugo sa Ginoo sa pagtuman sa dinaghan nga kaminyoon. Misugot si Emma sa pipila sa dinaghang kaminyoon ni Joseph apan nanglimbasug sa pagdawat sa mao nga buhat. Nianang higayuna, ang pinadayag nga nadawat kaniadto ni Joseph Smith gikan sa Ginoo kalabut sa dinaghan nga kaminyoon wala pa marekord. Si Hyrum Smith, nagtuo nga iyang makombinser si Emma nga ang dinaghan nga kaminyoon iya sa Dios, mihangyo ni Joseph sa pagrekord og pinadayag mahitungod sa dinaghan nga kaminyoon. Niadtong Hulyo 12, 1843, gidiktar ni Joseph Smith ang pinadayag nga karon narekord diha sa Doktrina ug mga Pakigsaad 132, nga nagpasabut sa mga baruganan sa mahangturong kaminyoon ug sa buhat sa dinaghan nga kaminyoon.

Mayo 16, 1843Samtang mibisita sa Ramus, Illinois, si Joseph Smith mitudlo nga ang mahangturon nga kaminyoon gikinahanglan alang sa kahimayaan (tan-awa sa D&P 131).

Mayo 28, 1843Sila si Joseph ug Emma Smith gibugkos sa kahangturan.

Ulahing bahin sa Hunyo 1843Ang mga opisyales misulay sa pagdakop ni Joseph Smith ug sa pagdala kaniya sa Missouri aron husayon kalabut sa bakak nga mga pasangil.

Hulyo 12, 1843Si Joseph Smith midiktar og pinadayag kalabut sa mahangturong kaminyoon ug sa buhat sa dinaghan nga kaminyoon (tan-awa sa D&P 132).

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 40–41

Mga Sugyot alang sa Pagtudlo

Gideklarar ni Joseph Smith nga ang mahangturong kaminyoon importante alang sa kahimayaan

Ipasabut nga kadaghanan sa Kristiyano nga mga relihiyon, sa panahon ni Joseph Smith ug sa karon, nagtuo sa usa sa duha ka mga konsepto sa langit. Usa ka tinuohan mao nga human sa kamatayon ang usa ka matarung nga tawo mahimong anghel kinsa mosimba sa Dios apan dili makasinati og mga relasyon sa pamilya. Kini nga tinuohan nangangkon nga ang yutan-on nga mga relasyon temporaryo ug matapos sa kamatayon. Ang laing tinuohan mao nga agig dugang sa pagsimba sa Dios, kadtong namatay mopadayon sa mga relasyon sa mga sakop sa pamilya ug mga higala. (Tan-awa sa Jed Woodworth, “Mercy Thompson and the Revelation on Marriage,” sa Revelations in Context, 282, ed. Matthew McBride ug James Goldberg [2016], o history.ChurchofJesusChrist.org.)

Dapita ang usa ka estudyante sa pagbasa og kusog sa mosunod nga parapo nga nag-summarize sa unsay giistoryahan ni Phebe Woodruff ug sa iyang bana, si Wilford, niadtong 1843 samtang nagserbisyo si Wilford og misyon:

“Samtang anaa sa layo si Wilford, misulat si Phebe ngadto kaniya, nangutana kon naghunahuna ba siya nga ang ilang gugma magkabulag ba gayud sa kahangturan. Gitubag niya pinaagi sa usa ka balak nga nagpahayag sa iyang paglaum nga ang ilang gugma molahutay lapas pa sa lubnganan” (Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 [2018], 580).

• Ngano kaha nga daghang mga tawo, sama ni Phebe ug Wilford Woodruff, nagtinguha nga ang ilang mga relasyon molungtad lapas niining kinabuhia?

Dapita ang mga estudyante sa pagpangita og mga baruganan ug doktrina atol niini nga leksyon nga makatabang nila nga mas makasabut sa kamatuoran mahitungod sa mga relasyon sa kaminyoon lapas pa niining kinabuhia.

Pagsensitibo sa mga kasinatian ug mga pagbati sa mga estudyante

Ang ubang mga estudyante tingali maglisud sa paghisgot mahitungod sa mahangturong kaminyoon. Kini nga hilisgutan mahimong lisud kanila kon ang ilang mga ginikanan nagdiborsyo, kon ang usa o duha sa ilang mga ginikanan dili miyembro sa Simbahan, kon kabahin sila sa nasagol nga mga pamilya [ang mga ginikanan dunay mga anak gikan sa kanhi mga relasyon], kon nabalaka sila nga tingali dili gayud sila maminyo, o tungod sa uban pa nga mga rason. Samtang ikaw nagtudlo sa doktrina sa mahangturong kaminyoon, pagmabination sa mga panginahanglan ug mga kabalaka niining mga estudyante.

Ipakita ang giandam nga hulagway ni Benjamin F. Johnson. Ipasabut nga si Benjamin ug ang iyang asawa, si Melissa, naminyo na sulod sa dul-an 17 ka bulan sa dihang si Propeta Joseph Smith mibisita kanila sa ilang panimalay sa Ramus, Illinois, niadtong Mayo 1843.

Ipakita ang mosunod nga pagsugilon ni Benjamin F. Johnson, ug dapita ang usa ka estudyante sa pagbasa niini og kusog.

“Sa pagkagabii [si Joseph Smith] mitawag kanako ug sa akong asawa sa pagduol ug paglingkod, kay gusto niyang mokasal kanamo sumala sa Balaod sa Ginoo. Abi nako og pasiaw kadto, ug miingon nga dili nako minyoan pag-usab ang akong asawa, gawas kon siya manguyab kanako, kay ako ang mihimo niining tanan sa unang higayon. Gibadlong niya ang akong pagtiaw-tiaw, gisultihan ko nga seryuso siya, ug mao gayud diay, kay mibarug kami ug gisilyo” (Benjamin F. Johnson, My Life’s Review [1947], 96).

• Kon mas nakasabut pa si Benjamin sa unsay gihisgutan sa Propeta, sa unsang paagi kaha nga tingali lahi ang iyang reaksyon?

Ipasabut nga si William Clayton, usa ka tigsulat ni Joseph Smith, mirekord sa mga pagtulun-an sa Propeta ngadto sa mga Johnson mahitungod sa mahangturon nga kaminyoon (tan-awa sa Matthew McBride, “Our Hearts Rejoiced to Hear Him Speak,” sa Revelations in Context, ed. Matthew McBride ug James Goldberg [2016], 279–80, o history.ChurchofJesusChrist.org). Ang pipila niining mga pagtulun-an narekord sa Doktrina ug mga Pakigsaad 131:1–4.

Dapita ang usa ka estudyante sa pagbasa og kusog sa Doktrina ug mga Pakigsaad 131:1–4. Hangyoa ang klase sa pagsunod, nga mangita sa unsay gitudlo ni Propeta Joseph Smith mahitungod sa mahangturong kaminyoon.

• Unsa nga baruganan ang atong mailhan gikan sa mga bersikulo 1–2 mahitungod sa kamahinungdanon sa mahangturong kaminyoon diha sa plano sa Langitnong Amahan alang sa kaluwasan? (Ang mga estudyante kinahanglang moila sa mosunod nga doktrina: Aron makaangkon sa labing taas nga ang-ang sa celestial nga gingharian, kinahanglan gayud kitang mosulod sa bag-o ug walay katapusan nga pakigsaad sa kaminyoon.)

Ipasabut nga niini nga konteksto ang pulong nga bag-o nagpasabut nga ang pakigsaad bag-ong gipahiuli sa atong dispensasyon; ang walay katapusan nagpasabut nga ang pakigsaad, lakip sa mga panalangin niini, mahangturon. Mosulod kita sa bag-o ug walay katapusan nga pakigsaad sa kaminyoon karon kon atong madawat ang ordinansa sa pagsilyo sa kaminyoon diha sa templo.

• Sa unsang paagi ang pagkahibalo niini nga kamatuoran makaapekto sa atong pagtan-aw sa kaminyoon?

Dapita ang usa ka estudyante sa pagbasa og kusog sa mosunod nga pamahayag ni Elder Parley P. Pratt (1807–57) sa Korum sa Napulog Duha ka mga Apostoles, kinsa nakakat-on sa doktrina sa mahangturong kaminyoon niadto pang 1839. Hangyoa ang klase sa pagsunod, nga mangita sa mga pulong o hugpong sa mga pulong nga nagpakita kon unsay gibati ni Elder Pratt human masayud nga ang mga relasyon sa kaminyoon mahimong mahangturon.

“Gikan kadto ni [Joseph Smith] nga akong nakat-unan nga ang asawa nga akong gimahal mahimo nga mahiusa kanako sa karon ug hangtud sa kahangturan; ug nga ang lunsay nga mga simpatiya ug mga pagbati nga nakahimo namo sa paghigugmaay sa usag usa nagagikan sa tubod sa balaanon nga mahangturong gugma. Gikan kadto kaniya nga akong nakat-unan nga mahimo kitang makaugmad niini nga mga pagbati, ug motubo ug molambo sa gihapon hangtud sa kahangturan; samtang ang resulta sa atong walay katapusan nga panaghiusa mao ang mga anak nga sama sa gidaghanon sa mga bitoon sa langit, o sa mga balas sa baybayon sa dagat. …

“Nahigugma ako kaniadto, apan wala ko masayud kon ngano. Apan karon nahigugma ako—uban sa kaputli—hilabihan ka taas, nahimaya nga pagbati, nga mobayaw sa akong kalag gikan sa temporaryo nga mga butang niining ubos og kahimtang nga kalibutan ug mopalapad niini sama sa kadagatan. … Sa laktud, ako karon makahigugma uban sa espiritu ug uban usab sa pagsabut” (Autobiography of Parley P. Pratt, ed. Parley P. Pratt Jr. [1938], 297–98).

• Sa unsang paagi ang pagkat-on sa doktrina sa mahangturong kaminyoon nakaimpluwensya ni Elder Pratt?

Ipasabut nga si Propeta Joseph Smith nasayud nga sa higayon nga ang Templo sa Nauvoo makompleto, ang ordinansa sa pagsilyo mahimong mapahimuslan sa tanang takus nga miyembro sa Simbahan. Sa wala pa mahuman ang templo, ang Ginoo mitugot ni Joseph sa pagtudlo sa doktrina sa mahangturong kaminyoon ngadto sa pipila ka matinud-anong mga miyembro sa Simbahan ug sa pagsilyo kanila. Niadtong Mayo 28, 1843, si Joseph ug Emma Smith gisilyo alang sa kahangturan sa usa ka kwarto sa ibabaw sa Red Brick Store sa Nauvoo.

Si Joseph Smith midiktar og pinadayag mahitungod sa mahangturon ug dinaghan nga kaminyoon

Pagtabang sa mga estudyante sa pagtubag og lisud nga mga pangutana

Ang mga estudyante pangutan-on og lisud nga mga pangutana mahitungod sa Simbahan sa tibuok nilang kinabuhi. Ang paghatag sa mga estudyante og husto nga impormasyon ug pagtabang kanila nga makakita og kasaligan nga mga tinubdan makatabang nila sa paghunahuna ug sa pagpasabut sa lisud nga mga hilisgutan sa matinuurong paagi. Ang pagtugot sa mga estudyante nga maghisgot ug magpraktis sa pagtubag og lisud nga mga pangutana sa usa ka palibut nga puno sa pagtuo makalig-on sa ilang pagsalig sa pakig-istorya sa uban mahitungod sa ebanghelyo.

Ipasabut nga agig dugang sa pagtudlo kabahin sa mahangturong kaminyoon, si Propeta Joseph Smith mipadayon usab sa pagtudlo sa pipila ka mga miyembro sa Simbahan mahitungod sa dinaghan nga kaminyoon. Pahinumdumi ang mga estudyante nga si Joseph nagpanagana nga misunod sa sugo sa Ginoo sa pagtuman sa dinaghan nga kaminyoon human sa pabalik-balik nga mga pasidaan gikan sa anghel (tan-awa sa “Plural Marriage in Kirtland and Nauvoo,” Gospel Topics, topics.ChurchofJesusChrist.org; tan-awa usab sa leksyon 21). Ang pagbuhat ni Joseph sa dinaghan nga kaminyoon lisud alang kaniya ug sa iyang asawa nga si Emma. Misugot si Emma sa pipila sa dinaghang kaminyoon ni Joseph apan nanglimbasug sa pagdawat sa mao nga buhat. Pagka-Hulyo 1843, ang igsoon sa Propeta nga si Hyrum miboluntaryo nga makig-istorya kang Emma aron mosulay sa pagkumbinsir kaniya sa katinuod sa baruganan sa dinaghan nga kaminyoon. Nianang higayuna, ang pinadayag nga nadawat kaniadto ni Joseph Smith gikan sa Ginoo mahitungod sa dinaghan nga kaminyoon wala pa marekord (tan-awa sa William Clayton, affidavit, Salt Lake City, Teritoryo sa Utah, Peb. 16, 1874, sa Affidavits about Celestial Marriage, Church History Library, Salt Lake City).

Hangyoa ang mga estudyante sa pagpangita sa kapitulo 41 sa Mga Santos: Volume 1. Dapita ang pipila ka mga estudyante nga magpuli-puli sa pagbasa og kusog gikan sa pahina 571, sugod sa parapo nga nagsugod og “Usa ka buntag sa …” ug matapos sa parapo sa pahina 573 nga nagsugod og “Sa dihang nahuman na si Joseph …” Hangyoa ang klase sa pagsunod, nga mangita kon unsay gipadayag sa Ginoo mahitungod sa pakigsaad sa kaminyoon. Ipasabut nga kini nga pinadayag narekord diha sa Doktrina ug mga Pakigsaad 132.

• Unsa ang gikinahanglan aron ang kaminyoon magpadayon human sa kamatayon? (Ang usa ka magtiayon kinahanglang gikasal sa tukma nga awtoridad sa pagkapari, ang ilang pakigsaad kinahanglang gisilyo sa Balaang Espiritu sa Saad, ug kinahanglan silang magpabilin nga matinud-anon sa ilang mga pakigsaad [tan-awa sa D&P 132:19]).

• Unsa nga mga panalangin ang gisaad sa Ginoo niadtong motuman niini nga mga kinahanglanon? (Madawat nila ang mga panalangin sa kahimayaan, nga naglakip sa pagkahimong sama sa Dios ug sa pagkaangkon og mahangturong paglambo [tan-awa sa D&P 132:19–20].)

• Sumala niini nga pinadayag nga gihatag ngadto kang Propeta Joseph Smith, unsa ang pipila ka mga rason nganong ang Ginoo misugo sa dinaghan nga kaminyoon? (Sa pagpasanay og mga anak diha sa matarung nga mga pamilya ug sa pagpahinabo sa ilang kahimayaan [tan-awa sa D&P 132:63]. Ipasabut nga ang ubang mga rason sa dinaghan nga kaminyoon nga gihisgutan diha sa pinadayag naglakip sa “[pag]pahiuli sa tanan nga mga butang” [tan-awa sa D&P 132:40, 45] ug sa paghatag og paagi sa mga Santos nga mapamatud-an o masulayan, sama ni Abraham [tan-awa sa D&P 132:51].)

Dapita ang pipila ka mga estudyante nga magpuli-puli sa pagbasa og kusog gikan sa pahina 573 sa Mga Santos: Volume 1, sugod sa parapo nga nagsugod og “Mibalik si Hyrum …” ug matapos sa parapo nga nagsugod og “Si Joseph ug Emma nanghilak …” Hangyoa ang klase sa pagsunod, nga mangita kon giunsa pagtubag ni Emma sa dihang gipresentar ni Hyrum ang pinadayag ngadto kaniya.

• Ngano kaha nga importante man nga dili nato hukman si Emma Smith sa iyang reaksyon sa buhat sa dinaghan nga kaminyoon?

Ipakita ang mosunod nga paghinumdom ni Helen Mar Kimball Whitney, kinsa nasilyo ngadto sa Propeta, ug dapita ang usa ka estudyante sa pagbasa niini og kusog:

“Miingon ang Propeta nga ang buhat sa [dinaghan nga kaminyoon] mao ang pinakalisud nga pagsulay nga maangkon sa mga Santos aron masulayan ang ilang pagtuo” (Helen Mar Whitney, “Scenes and Incidents in Nauvoo,” Woman’s Exponent, Nob. 1, 1881, 83).

Ipasabut nga ang dinaghan nga kaminyoon usa ka lisud sundon nga sugo alang sa kadaghanan, ug si Propeta Joseph Smith misaad niadtong kinsa gisugo sa pagsunod niini nga kon magtinguha sila og espirituhanong kumpirmasyon nga ang dinaghan nga kaminyoon gisugo sa Dios, makadawat sila niini.

Bahina ang mga estudyante ngadto sa gagmay nga mga grupo, ug hatagi sila og mga kopya sa giandam nga handout, “Mga Pagpamatuod Nga ang Dinaghan nga Kaminyoon Gisugo sa Dios.” Kini nga handout naglakip og mga istorya ni Phebe Woodruff, Zina Diantha Huntington Young, ug Lorenzo Snow, nga pulos naapektuhan sa sugo sa pagtuman sa dinaghan nga kaminyoon. Hangyoa ang mga estudyante nga magdungan sa pagbasa sa mga istorya ug hisgutan ang ilang mga tubag sa mga pangutana nga anaa sa handout.

Mga Pagpamatuod Nga ang Dinaghan nga Kaminyoon Gisugo sa Dios

Samtang basahon ninyo kini nga mga istorya, pangitaa kon unsay gibuhat niining mga tawhana nga nakatabang kanila nga makadawat og espirituhanong kumpirmasyon nga ang dinaghan nga kaminyoon gisugo sa Dios.

“Sa dihang unang gitudlo ang baruganan sa dinaghan nga kaminyoon akong nahunahunaan nga kini ang labing dautan nga butang nga akong nadunggan sukad; agig sangputanan misupak ako niini kutob sa akong mahimo, hangtud nga nasakit ko ug nahimong miserable. Hinoon, sa higayon nga nakombinser ko nga nagsugod kini isip usa ka pinadayag gikan sa Dios pinaagi ni Joseph, ug nasayud nga siya usa ka propeta, hugtanon akong mihangyo sa akong Langitnong Amahan diha sa mainiton nga pag-ampo, nga giyahan sa husto nianang importante kaayo nga higayon sa akong kinabuhi. Ang tubag miabut. Gihatagan og kalinaw ang akong hunahuna. Nasayud ko nga kabubut-on kadto sa Dios” (Phebe Woodruff, sa Edward W. Tullidge, The Women of Mormondom [1877], 413).

“Akong gisiksik ang mga kasulatan ug pinaagi sa mapainubsanong pag-ampo ngadto sa akong Langitnong Amahan, nakabaton ko og pagpamatuod alang sa akong kaugalingon nga ang Dios nagsugo nga kana nga han-ay [sa dinaghan nga kaminyoon] i-establisar diha sa iyang simbahan. Mihimo ako og mas dakong sakripisyo kay sa paghatag sa akong kinabuhi, kay wala na gayud ako magdahum nga tan-awon pa isip dungganon nga babaye niadtong akong gimahal pag-ayo. [Unsaon] nako pagkompromiso sa tanlag [ug] isalikway ang siguradong pagpamatuod sa espiritu sa Dios alang sa Himaya niini nga kalibutan?” (Zina Diantha Huntington Young, mubong kasaysayan sa kaugalingong kinabuhi, Zina Card Brown Family Collection, Church History Library, Salt Lake City).

“Personal nako nga kaila si Joseph Smith, ang Propeta, sulod sa napulog duha o napulog upat ka tuig, nga maoy unang mitudlo kanako niini nga doktrina, ug nasayud nga siya usa ka tawo sa kamatuoran ug dungog. Bisan pa, wala ako magsalig sa iyang pulong alang sa akong kahibalo sa dinaghan nga kaminyoon; ang Ginoo mihatag kanako og balaan nga pagpamatuod nga nagkumpirma sa Iyang mga pagtulun-an, nga walay tawo nga makahatag ni makabawi” (Lorenzo Snow, sa Eliza R. Snow, Biography and Family Record of Lorenzo Snow [1884], 405).

• Unsa ang pipila ka matinud-anong mga lakang nga gihimo niini nga mga indibidwal sa dihang nasayud sila mahitungod sa dinaghan nga kaminyoon?

• Sa unsang paagi ang pagbaton og saksi nga si Joseph Smith usa ka dinasig nga propeta nakaimpluwensya niini nga mga indibidwal sa pagsunod niini nga sugo?

• Sa unsang paagi kaha nga makatabang kini nga mga kasinatian sa usa ka tawo kinsa adunay mga pangutana kon si Joseph Smith naglihok ba isip usa ka dinasig nga propeta sa Dios sa dihang giimplementar niya ang buhat sa dinaghan nga kaminyoon?

Kon mahuman na ang mga estudyante sa ilang diskusyon, dapita ang pipila ka estudyante sa pagpaambit sa ilang mga tubag sa mga pangutana nga anaa sa handout.

• Unsa nga baruganan ang atong makat-unan gikan niini nga mga indibidwal mahitungod sa unsay atong mabuhat kon mag-atubang kita og lisud nga mga pangutana mahitungod sa mga pagtulun-an o kasaysayan sa Simbahan? (Ang mga estudyante mahimong mosulti og susama sa mosunod: Samtang mainampoon kitang magtinguha sa giya sa Ginoo, mopanalangin Siya kanato og mga kasiguroan nga makatabang kanato sa pagpadayon uban sa hugot nga pagtuo.)

Dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

“Ang pagtuo dili gayud mangayo og tubag sa matag pangutana apan magtinguha sa kasiguroan ug kaisug sa pagpadayon, usahay sa pag-ila nga, ‘Wala ko masayud sa tanan, apan nasayud ko og igo aron magpadayon diha sa dalan sa pagkadisipulo’” (Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 66).

• Sa unsang paagi kini nga pamahayag makatabang sa usa ka tawo kinsa adunay mga pangutana mahitungod sa buhat sa dinaghan nga kaminyoon sa sayong bahin sa Simbahan?

Ipasabut nga ang buhat sa dinaghan nga kaminyoon gihunong sa katapusan agig tubag sa usa ka pinadayag nga gihatag ngadto ni Presidente Wilford Woodruff (tan-awa sa Opisyal nga Pahayag 1). Bisan tuod wala kita gihangyo karon sa pagsunod sa balaod sa dinaghan nga kaminyoon, importante nga makadawat kita og kasiguroan nga si Joseph Smith nagsunod sa kabubut-on sa Ginoo sa dihang gisunod ug gitudlo niya kining lisud nga sugo.

Dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen:

“Ang mga pangutana bahin ni Propeta Joseph Smith dili bag-o. … Ngadto sa tanang anaa sa pagtuo kinsa, uban sa kahibalo gikan sa ika-21 nga siglo, nga matinuorong nangutana bahin sa panghitabo o mga pamahayag ni Propeta Joseph gikan sa dul-an 200 ka tuig na ang milabay, mopakigbahin ko og mahigalaong tambag: Sa pagkakaron, ayaw kaayo hukmi si Brother Joseph! Sa umaabut nga adlaw, makabaton kamo og 100 ka pilo nga dugang nga impormasyon kay sa makita karon sa tanang mga search engine sa Internet, ug masaligan gayud kini. Hunahunaa ang tibuok niyang kinabuhi—natawo sa kakabus ug gamay ra og pormal nga edukasyon, nahubad ni Joseph ang Basahon ni Mormon nga wala kaabut og 90 ka adlaw. Mga liboan ka matinuoron, mapahinunguron nga mga lalaki ug babaye ang mihangup sa kawsa sa Pagpahiuli. Sa edad nga 38, gisilyuhan ni Joseph ang iyang pagsaksi pinaagi sa iyang dugo. Ako mopamatuod nga si Joseph Smith usa ka propeta sa Dios. Tuohi kini, ug ayaw na kabalak-i ang uban pang butang!” (Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 66).

• Ngano kaha nga importante nga atong tuohan nga si Joseph Smith usa ka dinasig nga propeta sa Dios?

• Unsa ang pipila ka mga butang nga atong mahimo aron sa paglig-on sa atong pagtuo diha sa propetikanhong tawag ug misyon ni Joseph Smith?

• Sa unsang paagi ang inyong pagpamatuod ug kasiguroan sa propetikanhong misyon ni Joseph Smith nakatabang kaninyo nga mopadayon uban sa pagtuo sa dihang nag-atubang kamo og lisud nga mga pangutana?

Ipamatuod nga si Joseph Smith usa ka dinasig nga propeta sa Dios kinsa matinud-anon ngadto sa mga sugo sa Ginoo. Awhaga ang mga estudyante sa pagtinguha sa ilang kaugalingong mga kasiguroan gikan sa Ginoo aron makapadayon sila uban sa pagtuo.

Dapita ang mga estudyante nga mangandam alang sa sunod nga klase pinaagi sa pagtuon sa mga kapitulo 42–43 sa Mga Santos: Volume 1.

Dugang nga Ideya sa Pagtudlo

Pagpasalida sa video—“Acquiring Spiritual Knowledge: Madison’s Story”

Aron mapakita sa mga estudyante ang usa ka modernong ehemplo sa tawo nga nagtinguha og giya gikan sa Ginoo aron mobati og kalinaw mahitungod sa buhat sa dinaghan nga kaminyoon sa nag-unang mga Santos, ikonsiderar ang pagpasalida sa video “Acquiring Spiritual Knowledge: Madison’s Story” (8:35), nga anaa sa ChurchofJesusChrist.org. Dapita ang mga estudyante sa pagpangita kon unsay gibuhat ni Madison aron mobati og kalinaw mahitungod sa buhat sa dinaghan nga kaminyoon sa mga Santos ug sa paghunahuna kon sa unsang paagi sila makalihok sa samang paagi samtang magtinguha sila og mga tubag sa ilang kaugalingong mga pangutana.

Dugang nga impormasyon mahitungod sa dinaghan nga kaminyoon

Ang mga estudyante nga adunay dugang nga mga pangutana kalabut sa buhat sa dinaghan nga kaminyoon sa nag-unang mga Santos kinahanglang mogamit og kasaligan nga mga tinubdan sa pagpangita og impormasyon. Itudlo ang mga estudyante ngadto sa essay sa Gospel Topics “Plural Marriage in Kirtland and Nauvoo” (topics.ChurchofJesusChrist.org).