“Leksyon 5: Pagpahiuli sa Pagkapari [Priesthood] ug ang mga Saksi sa Basahon ni Mormon,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)

“Leksyon 5,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo

Leksyon 5

Pagpahiuli sa Pagkapari [Priesthood] ug ang mga Saksi sa Basahon ni Mormon

Pasiuna ug Han-ay sa mga Panghitabo [Timeline]

Niadtong Mayo 15, 1829, sila si Joseph Smith ug Oliver Cowdery miadto sa kakahoyan sa Harmony, Pennsylvania, aron sa pagpangutana sa Ginoo kon unsaon nila “nga makaangkon sa panalangin sa bunyag ug sa Espiritu Santo” (Oliver Cowdery, kinutlo sa Mga Pagtulun-an sa mga Presidente sa Simbahan: Joseph Smith [2007], 94). Agi og tubag sa ilang pag-ampo, si Juan Bautista nagpakita ug mitugyan sa Aaronic nga Pagkapari diha kanila. Paglabay sa pipila ka adlaw, ang mga Apostoles nga sila si Pedro, Santiago, ug Juan mitugyan sa Melchizedek nga Pagkapari [Priesthood] ngadto nila ni Joseph ug Oliver. Samtang nagkagrabe na ang pagpanggukod didto sa Harmony, Pennsylvania, sila si Joseph ug Oliver mibiyahe padulong sa Fayette, New York, diin sila nagpuyo uban sa pamilya ni Peter Whitmer Sr. ug nagpadayon sa paghubad sa Basahon ni Mormon. Agig katumanan sa saad sa Ginoo, si anghel Moroni mipakita sa bulawan nga mga palid ngadto nila ni Oliver Cowdery, David Whitmer, ug Martin Harris didto sa Fayette. Unya, si Joseph Smith mipakita sa bulawan nga mga palid ngadto sa laing walo ka mga tawo didto sa Manchester, New York.

Mayo 15, 1829Gitugyan ni Juan Bautista ang Aaronic nga Pagkapari [Priesthood] diha ni Joseph Smith ug Oliver Cowdery.

Mayo–Hunyo 1829Sila si Pedro, Santiago, ug Juan mitugyan sa Melchizedek nga Pagkapari diha ni Joseph Smith ug Oliver Cowdery.

Sayo sa Hunyo 1829Sila si Joseph Smith ug Oliver Cowdery miabut sa panimalay ni Peter Whitmer Sr. didto sa Fayette, New York, aron magpadayon sa paghubad sa Basahon ni Mormon.

Hunyo 1829Gipakita ni Moroni ang bulawan nga mga palid ngadto sa Tulo ka mga Saksi.

Hunyo 1829Gipakita ni Joseph Smith ang bulawang mga palid ngadto sa Walo ka mga Saksi.

Mga Basahunon sa Estudyante

Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 7

Mga Sugyot alang sa Pagtudlo

Ang Aaronic ug Melchizedek nga Pagkapari gipahiuli

Ipakita ang mosunod nga pangutana: Sa unsa nga mga paagi nga ang inyong kinabuhi lahi kon kamo walay magamit nga gahum ug mga panalangin sa pagkapari?

Dapita ang mga estudyante sa pagpamalandong sa ilang tubag niini nga pangutana. Ikonsiderar ang paghangyo og usa o duha ka estudyante sa pagpakigbahin sa ilang tubag uban sa klase kon sila mobati nga komportable nga mobuhat sa ingon.

Base sa inyong pagbasa sa kapitulo 7 sa Mga Santos: Volume 1, unsa ang nakaaghat nila ni Joseph Smith ug Oliver Cowdery sa pag-ampo ug pagpangutana sa Ginoo mahitungod sa awtoridad sa pagkapari?

Kon gikinahanglan, tabangi ang mga estudyante nga makasabut nga samtang sila si Joseph Smith ug Oliver Cowdery mihubad sa Basahon ni Mormon niadtong Mayo 1829, nasugatan nila ang istorya sa personal nga pagpangalagad sa Manluluwas diha sa mga Nephite. Sila si Joseph ug Oliver nakat-on nga ang Ginoo mihatag sa awtoridad ngadto sa Iyang mga disipulo aron sa pagpahigayon sa ordinansa sa bunyag alang sa kapasayloan sa mga sala. Kini nga awtoridad dugay na nga nawala gikan sa yuta tungod sa apostasiya.

Ipakita ang gisukip nga imahe, ug ipasabut nga nagpakita kini sa kakahoyan duol sa panimalay ni Joseph Smith sa Harmony, Pennsylvania, ang dapit diin sila si Joseph ug Oliver nag-ampo.

Dapita ang usa ka estudyante sa pagbasa og kusog sa pamahayag ni Oliver Cowdery. Hangyoa ang klase sa pagpaminaw unsay giampo nila ni Oliver ug Joseph.

“Ang among mga kalag nag-ampo pag-ayo … “nga makahibalo unsaon namo nga makaangkon sa mga panalangin sa bunyag ug sa Espiritu Santo, sumala sa paagi sa Dios, ug kami naningkamot alang sa katungod sa mga amahan ug sa awtoridad sa balaan nga pagkapari, ug sa gahum sa pagdumala sa sama” (Oliver Cowdery, kinutlo gikan sa Mga Pagtulun-an sa mga Presidente sa Simbahan: Joseph Smith [2007], 93–94).

Dapita ang pipila ka mga estudyante nga magpuli-puli sa pagbasa og kusog sa Joseph Smith—Kasaysayan 1:68–74. Hangyoa ang klase sa pagsunod, nga mangita kon sa unsa nga paagi nga ang pag-ampo nila ni Joseph ug Oliver natubag.

Base niini nga mga panghitabo ug sa mga pulong ni Juan Bautista, unsa nga mga kamatuoran ang atong mahibaloan mahitungod sa Aaronic nga Pagkapari? (Ang mga estudyante mahimong mohatag og pipila ka sakto nga mga tubag, lakip sa mosunod: Si Juan Bautista mitugyan sa Aaronic nga Pagkapari ngadto nila ni Joseph Smith ug Oliver Cowdery. Ang Aaronic nga Pagkapari “naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” [Joseph Smith—Kasaysayan 1:69; tan-awa usab sa D&P 13:1].)

Ipakita ang gisukip nga imahe, ug ipasabut nga kini nagpakita sa daplin sa Suba sa Susquehanna duol sa dapit diin sila si Joseph Smith ug Oliver Cowdery mabunyagi.

Unsa nga mga panalangin ang nasinati nila ni Joseph ug Oliver pagkahuman gyud og dawat nila sa Aaronic nga Pagkapari ug nabunyagan pinaagi sa tukma nga awtoridad? (Tan-awa sa Joseph Smith—Kasaysayan 1:73–74.)

Dapita ang usa ka estudyante sa pagbasa og kusog sa mosunod nga pamahayag. Hangyoa ang klase sa pagsunod, nga maminaw sa unsay nahitabo human gyud dayon sa pagpahiuli sa Aaronic nga Pagkapari.

Sila si “[Joseph Smith ug Oliver Cowdery] nagpadayon sa ilang buluhaton sa paghubad sa Basahon ni Mormon. Apan ang Propeta wala pa makadawat og importante nga panalangin—kadtong gikinahanglan sa dili pa niya ma-organisar ang Simbahan, ma-establisar ang mga katungdanan ug mga korum sa pagkapari [priesthood], ug motugyan sa gasa sa Espiritu Santo. Kinahanglan madawat niya ang Melchizedek nga Pagkapari.

“Sumala sa gisaad ni Juan Bautista, kini nga panalangin gihatag ngadto ni Joseph ug Oliver human dayon sa ilang pagdawat sa Aaronic nga Pagkapari. Ang karaang mga Apostoles nga sila si Pedro, Santiago, ug Juan nagpakita ngadto kanila sa hilit nga dapit duol sa Suba sa Susquehanna ug mitugyan sa Melchizedek nga Pagkapari diha kanila. Sa wala madugay si Joseph mipahayag nga siya nakadungog sa “tingog ni Pedro, Santiago, ug Juan sa kamingawan taliwala sa lalawigan sa Harmony, Susquehanna, ug sa lalawigan sa Colesville, Broome, diha sa suba sa Susquehanna, namahayag sa ilang mga kaugalingon nga naghupot sa mga yawe sa gingharian, ug sa dispensasyon sa kahingpitan sa mga panahon!’ (D&P 128:20)” (Mga Pagtulun-an sa mga Presidente sa Simbahan: Joseph Smith [2007], 119–121).

Ngano nga importante nga ang Melchizedek nga Pagkapari ipahiuli?

Dapita ang usa ka estudyante sa pagbasa og kusog sa Doktrina ug mga Pakigsaad 27:12–13. Hangyoa ang klase sa pagsunod, nga mangita unsay gipahayag sa Ginoo mahitungod sa pagbisita nila ni Pedro, Santiago, ug Juan ngadto nila ni Joseph Smith ug Oliver Cowdery.

Unsa ang gipahayag sa Ginoo mahitungod sa pagbisita nila ni Pedro, Santiago, ug Juan ngadto nila ni Joseph Smith ug Oliver Cowdery? (Kon gikinahanglan, itudlo nga ang mga pulong “pinaagi kang kinsa Ako mi-orden kaninyo” sa bersikulo 12 nagpasabut sa pagtugyan sa Melchizedek nga Pagkapari. Tabangi ang mga estudyante sa pag-ila sa mosunod nga mga kamatuoran: sila si Pedro, Santiago, ug Juan mitugyan sa Melchizedek nga Pagkapari ug sa mga yawe sa gingharian diha kang Joseph Smith ug Oliver Cowdery.)

Itudlo nga sila si Joseph Smith ug Oliver Cowdery balik-balik nga mipamatuod nga sila si Pedro, Santiago, ug Juan mitugyan sa Melchizedek nga Pagkapari diha kanila, bisan og wala marekord ang sakto nga petsa nga nahitabo kini. Hinoon, ang ebidensya sa kasaysayan nagsugyot nga kini nahitabo niadtong Mayo o Hunyo 1829, nga dunay pipila ka ebidensya nga nagsugyot nga sa tunga-tunga ngadto sa ulahing bahin sa Mayo 1829 nga mao ang panahon (tan-awa sa Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 30–47; tan-awa usab sa The Joseph Smith Papers, Documents, Volume 1: Hulyo 1828–Hunyo 1831, ed. Michael Hubbard MacKay ug ang uban [2013], xxxviii–xxxix).

Dapita ang mga estudyante sa pagpulipuli sa pagsulat sa pipila ka mga paagi nga sila ug ang ilang mga pamilya napanalanginan tungod sa pagpahiuli sa pagkapari. Hangyoa ang mga estudyante sa pagpakigbahin unsay ilang nasulat ngadto sa usa ka kauban sa klase. Mahimo usab nga imong ipakigbahin ang imong pagpamatuod sa daklit bahin sa pagpahiuli ug sa kaimportante sa Aaronic ug Melchizedek nga Pagkapari.

Sila si Joseph Smith ug Oliver Cowdery mibalhin ngadto sa Fayette, New York, aron sa pagpadayon sa paghubad sa Basahon ni Mormon

Ipasabut nga samtang sila si Joseph Smith ug Oliver Cowdery nagpadayon sa paghubad sa Basahon ni Mormon, ang mga tawo sa Harmony, Pennsylvania, nagkadugang ang kasuko ngadto kanila. Si Oliver misulat sa iyang higala, nga si David Whitmer, kabahin sa iyang pagpamatuod sa buhat ug sa mga kalisud nga giatubang niya ug ni Joseph samtang naghubad. Uban sa awhag sa iyang amahan, nga si Peter Whitmer Sr., gidapit ni David sila si Joseph ug Oliver sa pagpuyo uban kanila didto sa Fayette, New York, samtang ilang humanon ang paghubad. Sa dihang sila si Joseph ug Oliver (ug dayon si Emma) mibalhin ngadto sa panimalay sa Whitmer didto sa Fayette, New York, nakadugang kini sa kabug-at ug kabalaka ni Mary Whitmer, inahan ni David. Nagkapuliki na siya sa pagdumala sa balay, ug ang bag-ong nangabut nakadugang sa iyang trabaho.

Base sa inyong pagbasa sa Mga Santos: Volume 1, unsa nga kasinatian ang naangkon ni Mary nga nakapawala sa iyang problema? (Si Moroni nagpakita ngadto kaniya ug mipakita kaniya sa bulawan nga mga palid.)
Unsa sa inyong hunahuna nga kini nga sagrado nga kasinatian nakatabang ni Mary nga molahutay sa iyang mga problema ug kabalaka?

Ipakita ang mosunod nga istorya si David Whitmer, kinsa mihulagway og usa ka panahon sa dihang ang Propeta nawad-an sa iyang abilidad sa paghubad. Dapita ang usa ka estudyante sa pagbasa og kusog niini nga istorya.

“Usa ka buntag sa dihang si [Joseph] nangandam sa pagpadayon sa paghubad, dihay problema nga mitunga diha sa balay ug naglagot siya mahitungod niini. Usa ka butang nga nahimo ni Emma, nga iyang asawa. Si Oliver ug ako misaka sa taas, ug wala madugay si Joseph misaka aron sa pagpadayon sa paghubad, apan siya walay bisan unsa nga nahimo. Dili siya makahubad og bisan usa ka pulong. Mikanaog siya, miadto sa prutasan, ug nangamuyo ngadto sa Ginoo; [siya] nawala og mga usa ka oras, [ug dayon siya] mibalik ngadto sa balay, nangayo og pasaylo ni Emma, ug dayon misaka sa itaas diin kami mahimutang ug dayon ang paghubad natigayon ra” (David Whitmer, quoted in B. H. Roberts, A Comprehensive History of the Church, 1:131).

Ngano kaha nga si Joseph wala makahimo sa paghubad samtang nasuko pa siya ni Emma?

Ipakita ang mosunod nga panapos sa istorya ni David Whitmer, ug dapita ang usa ka estudyante sa pagbasa niini og kusog.

Si “[Joseph Smith] walay mahimo gawas kon siya magmapainubsanon ug magmatinud-anon” (David Whitmer, kinutlo sa B. H. Roberts, A Comprehensive History of the Church, 1:131).

Sa unsa nga paagi nga kini nga istorya makatabang sa pagpalig-on sa inyong pagpamatuod nga ang Basahon ni Mormon gihubad pinaagi sa gasa ug gahum sa Dios?

Ang Tulo ug Walo ka mga Saksi nakakita sa bulawan nga mga palid ug nagpamatuod sa katinuod sa Basahon ni Mormon

Pahibaloa ang mga estudyante nga wala makaabut og usa ka bulan human mibalhin si Joseph Smith ngadto sa Fayette, New York, sila si “Oliver Cowdery, David Whitmer, ug Martin Harris nadani pinaagi sa usa ka dinasig nga tinguha nga mahimo nga tulo ka talagsaon nga mga saksi” (D&P 17, ulohan sa seksyon). Mihangyo sila sa Propeta alang sa oportunidad nga mahimong mga saksi sa bulawan nga mga palid. Nahibaloan nila sa sayo pa gikan sa hubad sa Basahon ni Mormon nga tulo ka mga saksi ang itudlo nga makakita sa mga palid (tan-awa sa 2 Nephi 27:12; Ether 5:2–4; tan-awa usab sa D&P 5:11–15). Nangutana ang Propeta sa Ginoo ug nadawat ang pagpadayag nga narekord sa Doktrina ug mga Pakigsaad 17.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 17:1–6. Hangyoa ang klase sa pagsunod, nga mangita kon unsay gisulti sa Ginoo niining tulo ka tawo.

Sumala sa bersikulo 3, unsa nga responsibilidad ang anaa niining mga tawhana huma sila makakita sa mga palid?
Base sa sugo sa Ginoo sa bersikulo 3, unsa nga responsibilidad ang anaa nato human kita makabaton og saksi sa kamatuoran? (Human kita makabaton og saksi sa kamatuoran, kita adunay responsibilidad sa pagpamatuod sa kamatuoran ngadto sa uban. Isulat kini nga baruganan diha sa pisara.)

Hangyoa ang mga estudyante sa pagpangita sa kapitulo 7 sa Mga Santos: Volume 1. Dapita ang pipila ka estudyante sa pagpuli-puli sa pagbasa og kusog gikan sa pahina 73, sugod sa parapo [paragraph] nga nagsugod og “Sa ulahing bahin nianang adlawa, si Joseph migiya …” ug matapos sa parapo sa pahina 74 nga nagsugod sa “’Igo na! ’Igo na! …” Hangyoa ang klase sa pagsunod, nga mangita sa saksi nga nadawat niining tulo ka tawo.

Sa unsa nga paagi nga sila si Oliver Cowdery, David Whitmer, ug Martin Harris nakadawat og namatud-an nga saksi sa katinuod sa Basahon ni Mormon niini nga okasyon?

Pahibaloa ang mga estudyante nga human niining talagsaong kasinatian, si Joseph Smith ug ang Tulo ka mga Saksi mibalik ngadto sa balay ni Whitmer. Dapita ang usa ka estudyante sa pagbasa og kusog sa mosunod nga istorya sa inahan sa Propeta nga si Lucy Mack Smith:

Si “[Joseph ug ang Tulo ka mga Saksi] mipauli ngadto sa balay, … [ug] si Mrs. Whitmer [ug] Mr. Smith ug ako naglingkod sa usa ka kwarto. … Sa dihang misulod si Joseph mihigda siya tupad nako. ‘Papa! Mama!’ miingon siya. ‘Malipayon kaayo ko karon: ang Ginoo mitugot nga ang mga palid mapakita ngadto sa [tulo] pa gawas nako. [Sila] nakakita usab sa anghel ug kinahanglang mopamatuod sa [kamatuoran] sa unsay akong gisulti, kay sila nasayud alang sa ilang kaugalingon nga wala ako mangilad sa mga tawo, ug ingon og gibati nako nga nahuwasan sa grabe kaayo nga problema nga sobra na nga akong malahutay, … ug nalipay ang akong kalag nga ako wala na gayud mag-inusara sa kalibutan” (Lucy Mack Smith, “Lucy Mack Smith, History, 1844–1845,” book 8, pahina 11, josephsmithpapers.org).

Sa unsa nga mga paagi nga si Joseph Smith wala na “sa hingpit mag-inusara sa kalibutan”?
Ngano kaha nga ang pagbaton og tulo ka dugang nga mga saksi dako nga kahupayan ni Joseph?

Ipasabut nga sa pagsunod sa sugo sa Ginoo sa “pagpamatuod nga [sila] nakakita sa [mga palid]” (D&P 17:5), ang Tulo ka mga Saksi miisyu sa “Ang Pagpamatuod sa Tulo ka mga Saksi,” nga gilakip sa matag namantala nga kopya sa Basahon ni Mormon sukad sa pagkamatanla niini niadtong 1830. Unya, ang matag usa niini nga mga tawo na-excommunicate gikan sa Simbahan tungod sa personal nga apostasiya. Sa katapusan sila si Oliver Cowdery ug Martin Harris nabunyagan pag-usab ngadto sa Simbahan, apan si David Whitmer wala mobalik ngadto sa Simbahan.

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:

“Ang Tulo ka mga Saksi wala gayud molimud sa ilang pagpamatuod sa Basahon ni Mormon. Dili sila makahimo sa paglimud kay nasayud sila nga kini tinuod. Nagsakripisyo sila ug miatubang og mga kalisdanan nga labaw pa sa nahibaloan sa kadaghanan sa mga tawo. … Nga sila mipadayon sa pagmatuod sa unsay ilang nakita ug nadungog niadtong talagsaon nga kasinatian, sulod sa hataas nga panahon nga nabulag gikan sa Simbahan ug gikan kang Joseph, nakahimo sa ilang pagpamatuod nga mas gamhanan” (Henry B. Eyring, “Usa ka Malungtarung Pagpamatuod sa Misyon ni Propeta Joseph,” Liahona, Nob. 2003, 90).

Sa unsa nga paagi nga ang pagkahibalo nga ang Tulo ka mga Saksi nagpadayon sa paghatag sa ilang pagpamatuod bisan human sila ma-excommunicate gikan sa Simbahan nakapahimo sa ilang pagpamatuod nga mas gamhanan?

Ipasabut nga ang walo ka laing mga tawo gitudlo usab nga makakita ug magpamatuod sa mga palid. Dapita ang usa ka estudyante sa pag-summarize gikan sa ilang pagbasa sa Mga Santos: Volume 1 sa kasinatian sa Walo ka mga Saksi. (Kon gikinahanglan, makadapit ka og usa ka estudyante nga mobasa og kusog sa “Ang Pagpamatuod sa Walo ka mga Saksi” sa sinugdanan sa Basahon ni Mormon.)

Sa unsang paagi ang kasinatian sa Walo ka mga Saksi lahi gikan sa kasinatian sa Tulo ka mga Saksi?
Ngano kaha nga ang Ginoo mihatag og duha ka lain-laing matang sa mga kasinatian alang sa Tulo ug Walo ka mga Saksi? (Tabangi ang mga estudyante nga makasabut nga kon ang mga kritiko sa Simbahan moakusar sa Tulo ka mga Saksi sa paghanduraw sa ilang panan-awon, dili kana nagpasabut sa katinuod nga mao usab nga kasinatian sa Walo ka mga Saksi sa mga palid. Sa laing bahin, kon ang mga kritiko moakusar ni Joseph Smith nga gikopya lang ang bulawan nga mga palid aron ilaron ang Walo ka mga Saksi, dili kana nagpasabut sa kabalaan nga mao usab nga pagpakita nga nasinati sa Tulo ka mga Saksi.)

Ipunting ngadto sa baruganan diha sa pisara: Human kita makabaton og saksi sa kamatuoran, kita adunay responsibilidad sa pagpamatuod sa kamatuoran ngadto sa uban.

Giunsa ninyo pagkahibalo nga ang Basahon ni Mormon tinuod?
Unsay inyong nahimo karong bag-o sa pagpakigbahin sa inyong pagpamatuod sa Basahon ni Mormon ngadto sa uban?

Awhaga ang mga estudyante sa pagpangita og mga oportunidad sa pagpakigbahin sa ilang pagpamatuod sa Basahon ni Mormon ngadto sa uban.

Dapita ang mga estudyante sa pag-andam alang sa sunod nga klase pinaagi sa pagbasa sa mga kapitulo 8-9 sa Mga Santos: Volume 1.