Leksyon 12

Ang Kampo sa Israel

Pasiuna ug Han-ay sa mga Panghitabo [Timeline]

Niadtong Pebrero 24, 1834, si Joseph Smith nakadawat og pinadayag gikan sa Ginoo nga nagsugo kaniya sa pag-organisar og grupo sa mga boluntaryo nga motabang sa nag-antus nga mga Santos sa Missouri (tan-awa sa D&P 103). Ang kapin sa 200 ka mga boluntaryo nailhan isip ang Kampo sa Israel (sa kaulahian ang Kampo sa Zion), ug mimartsa og gibana-bana nga 1400 ka kilometro aron sa pagtabang sa mga Santos sa Missouri nga mabawi ang ilang mga yuta. Human ang kampo miabut sa Missouri, ang Ginoo mipadayag kang Joseph Smith nga ang panahon sa katubsanan sa Zion wala pa moabut, ug ang kampo gibungkag (tan-awa sa D&P 105:9–11). Mga unom ka bulan human makabalik sa Kirtland, giorganisar ni Joseph Smith ang Korum sa Napulog Duha ka mga Apostoles ug ang Korum sa Seventy. Walo ka sakop sa Napulog Duha ug ang matag sakop sa Seventy nakamartsa uban sa Kampo sa Israel.

Pebrero 24, 1834Nakadawat si Joseph Smith og pinadayag nga nagsugo kaniya sa pag-organisar sa Kampo sa Israel (tan-awa sa D&P 103).

Mayo–Hulyo 1834Gipangulohan ni Joseph Smith ang Kampo sa Israel sa ilang pagmartsa padulong sa Missouri.

Hunyo 22, 1834Mipadayag ang Ginoo nga ang Zion dili tubson niining panahona (tan-awa sa D&P 105), ug misugod sa pagkabungkag ang Kampo sa Israel.

Agosto 1834Mibalik si Joseph Smith sa Kirtland, Ohio.

Pebrero 14, 1835Giorganisar ni Joseph Smith ang Korum sa Napulog Duha ka mga Apostoles.

Pebrero 28–Marso 1, 1835Giorganisar ni Joseph Smith ang Korum sa Seventy.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 18–19

Mga Sugyot alang sa Pagtudlo

Paglambo isip magtutudlo

Samtang magtinguha ka nga molambo ug padayon nga maningkamot sa pagtudlo sa paagi nga makapahimuot sa atong Langitnong Amahan, Siya modasig kanimo sa imong pagpangandam, molig-on sa imong relasyon ngadto sa mga estudyante, mopalambo sa imong mga paningkamot, ug mopanalangin kanimo sa Iyang Espiritu. Motabang Siya nga imong makita unsaon nimo sa paglambo samtang maningkamot ka nga makatudlo sa paagi nga magiyahan ang mga estudyante nga makasabut ug mosalig sa mga pagtulun-an ug sa Pag-ula ni Jesukristo.

Ang Ginoo mimando ni Joseph Smith sa pag-organisar sa Kampo sa Israel

Sa dili pa magklase, isulat sa pisara ang mosunod nga pangutana: Unsa ang pipila ka paagi nga mahimong dapiton kita sa pagserbisyo sa Ginoo sa mga sirkumstansya nga tingali hasol o lisud?

Hangyoa ang mga estudyante sa pagpaambit sa ilang mga tubag niini nga pangutana. Isulat sa pisara ang ilang mga tubag.

Dapita ang mga estudyante sa pagpangita sa mga baruganan ug doktrina diha sa leksyon karon nga makatabang kanila kon sila dapiton nga moserbisyo sa Ginoo sa hasol o lisud nga mga sirkumstanya.

Ipakita ang giandam nga mapa sa Missouri.

mapa sa Missouri

Pahinumdumi ang mga estudyante nga sa tinglarag sa 1833, ang mga Santos sa Distrito sa Jackson, Missouri, sinalbahis nga gipalayas gikan sa ilang mga yuta ug mga panimalay, ug kadaghanan kanila nakakaplag og temporaryong dangpanan tabok sa Suba sa Missouri sa Distrito sa Clay, Missouri.

Dapita ang usa ka estudyante sa pagbasa og kusog sa mosunod nga parapo:

Samtang ang mga lider sa Simbahan nangayo og tabang sa lokal ug sa estado nga mga opisyal, gipahibalo sila nga ang gobernador sa Missouri, si Daniel Dunklin, andam nga motawag sa militia sa estado sa pag-uban sa mga Santos balik ngadto sa ilang mga yuta sa Distrito sa Jackson. Hinoon, ang mga Santos kinahanglan nga moandam og ilang kaugalingong armadong kusog sa pagpanalipod sa mga miyembro sa Simbahan sa higayon nga mapahiuli na ang ilang yuta. Niadtong Pebrero 24, 1834, nadawat ni Propeta Joseph Smith ang pinadayag nga narekord sa Doktrina ug mga Pakigsaad 103, diin ang Ginoo misugo kaniya sa pag-organisar og grupo sa mga boluntaryo nga momartsa sa pagtabang sa mga Santos sa Missouri. Wala madugay human madawat ang pinadayag, si Joseph Smith, Sidney Rigdon, Parley P. Pratt, ug ubang mga lider sa Simbahan mibiyahe ngadto sa tanang mga branch sa Simbahan sa pagpangita og mga rekluta [recruit]. Kini nga mga boluntaryo ang miporma sa Kampo sa Israel (sa kaulahian nailhan isip Kampo sa Zion) ug gituyo nga motabang sa mga Santos sa Missouri sa pagbawi sa ilang mga yuta ug sa pagpugong sa dugang nga mga pag-ataki batok kanila sa higayon nga mobiya na ang militia sa estado. (Tan-awa sa The Joseph Smith Papers, Documents, Volume 3: February 1833–March 1834, ed. Gerrit J. Dirkmaat ug uban pa [2014], 458–59; The Joseph Smith Papers, Documents, Volume 4: April 1834–September 1835, ed. Matthew C. Godfrey ug uban pa [2016], xix–xxi.)

• Unsa kaha ang inyong mahunahuna ug bation kon gitawag kamo sa pag-apil sa Kampo sa Israel? Ngano?

Hangyoa ang mga estudyante sa pagpakli ngadto sa kapitulo 18 sa Mga Santos: Volume 1. Dapita ang pipila ka estudyante nga magpuli-puli sa pagbasa og kusog gikan sa pahina 225, mosugod sa parapo nga nagsugod og “Pagka-Abril 1834 …” ug motapos sa parapo diha sa pahina 227 nga nagsugod og “Sa nagkapundok na …” Hangyoa ang klase sa pagsunod, nga mangita sa mga rason nganong ang pag-apil sa Kampo sa Israel lisud alang sa pipila sa mga Santos.

• Sa unsang mga paagi ang tawag sa pag-adto sa Missouri misulay sa pagtuo sa pipila ka mga Santos?

Dapita ang usa ka estudyante sa pagbasa og kusog sa mosunod nga pamahayag ni Presidente Wilford Woodruff (1807–98). Hangyoa ang klase sa pagpaminaw kon nganong si Presidente Woodruff midawat sa imbitasyon nga moapil sa Kampo sa Israel.

batan-on nga Wilford Woodruff

“Gitawag ko sa pagrisgo sa akong kinabuhi ug moadto sa Missouri, ug gamay lang kami nga grupo nga miadto aron sa pagluwas sa among kaigsoonan. Kinahanglan gayud kaming mogamit og hugot nga pagtuo aron moadto. Ang akong mga silingan mitawag ug mihangyo nako nga dili moadto; miingon sila—‘Ayaw pag-adto, kon moadto ka mamatay ka.’ Miingon ko nila—‘Kon nasayud ko nga maigo ko sa bala diha sa akong kasingkasing sa una nakong lakang sa Estado sa Missouri moadto ko.’ … Mao kana ang akong gibati niadtong panahona kalabut sa buhat sa Dios, ug mao kana ang akong gibati karon. Nagtinguha ko sa kaluwasan ug kinabuhing dayon, ug dili ko gusto nga adunay bisan unsa nga makababag tali kanako ug nianang akong gitinguha” (Wilford Woodruff, sa Journal of Discourses, 17:246).

• Unsa nga mga baruganan ang atong makat-unan gikan niini nga pamahayag ni Presidente Woodruff? (Ang mga estudyante mahimong moila og pipila ka mga baruganan, lakip sa mosunod: Ang pagsunod sa mga hangyo sa Ginoo sa pagserbisyo Kaniya nagkinahanglan sa atong pagpakita og pagtuo diha Kaniya ug motabang kanato nga mouswag paingon sa kinabuhing dayon. Isulat kini nga baruganan diha sa pisara.)

• Sa unsang paagi kini nga mga hangyo sa pagserbisyo sa Ginoo nagkinahanglan sa atong pagpakita og pagtuo diha Kaniya?

• Ngano kaha nga makatabang ang pagtan-aw sa mga hangyo sa Ginoo sa pagserbisyo Kaniya isip mga oportunidad nga makauswag kita padulong sa kaluwasan ug kinabuhing dayon?

Ang Kampo sa Israel mimartsa padulong sa Missouri

Ipakita ang giandam nga mapa, “Agianan sa Kampo sa Zion, 1834,” sa agianan nga gisubay sa Kampo sa Israel.

Agianan sa Kampo sa Zion

Ipasabut nga samtang nangulo si Joseph Smith og usa ka grupo sa mga boluntaryo gikan sa Kirtland, Ohio, padulong sa Missouri, si Hyrum Smith ug Lyman Wight nangulo og laing grupo gikan sa Teritoryo sa Michigan ug mitipon sa grupo sa Propeta niadtong Hunyo 9, 1834. Sa kinatibuk-an, ang Kampo sa Israel naglangkob og sobra sa 200 ka lalaki, inubanan sa gibanabana nga mga 12 ka babaye ug 10 ka bata. (Tan-awa sa The Joseph Smith Papers, Documents, Volume 4: April 1834–September 1835, xx.)

Dapita ang usa ka estudyante sa pagbasa og kusog sa mosunod nga upat ka mga parapo:

Daghang mga miyembro sa Kampo sa Zion ang mahinamon nga miapil sa panaw ug positibo ang pagtan-aw sa kasinatian. Bisan pa niana, nakasugat usab sila og mga kalisud. Ang grupo mibiyahe og sobra sa 1400 ka kilometro tadlas sa lisud nga agianan. Kadaghanan naglakaw ra. Miantus sila sa kainit, kaalimuot, ulan, lapok, guba nga kasangkapan, sakit, nanakit ug nagdugo nga mga tiil, ug kakulang sa pagkaon ug tubig. Usa ka partisipante, si Nathan Baldwin, nahinumdom:

“Sa paglatas niining lagpad nga kasagbutan taliwala sa mga grupo sa kakahoyan, nag-antus kami usahay sa kakulang sa tubig; tungod kay wala maanad sa ingon nga dapit, wala kami makapangandam niini. Usahay manginom kami og yamug nga kinuha gikan sa kasagbutan pinaagi sa kalit nga pagkandus og plato diha sa mga sagbut, nga dunay napundo nga mga yamug nga masalud sa plato ug, human masala, andam na nga gamiton” (Nathan Bennett Baldwin, Account of Zion’s Camp, 1882, 11–12, Church History Library, Salt Lake City).

Si George A. Smith, kinsa 16 anyos pa dihang mimartsa siya uban sa Kampo sa Israel, sa kaulahian mirekord:

George A. Smith

“Grabe ang among pag-antus tungod sa kauhaw ug napugos sa pag-inom og tubig gikan sa Kalapukan nga puno sa buhi nga mga mananap—dinhi nakakat-on ko sa pagsala sa mga Pitu-pito [posibleng ulod sa mga lamok] gamit ang akong mga ngipon” (Memoirs of George A. Smith, circa 1860–1882, 19–20, Church History Library, Salt Lake City).

• Unsa kaha ang inyong buhaton niini nga mga kahimtang kon apil kamo sa Kampo sa Israel?

Dapita ang usa ka estudyante sa pagbasa og kusog sa mosunod nga istorya ni George A. Smith. Hangyoa ang klase sa pagpaminaw kon unsa ang reaksyon sa pipila ka mga sakop sa kampo sa mga kahimtang sa pagmartsa.

George A. Smith

“Si Propeta Joseph nakaambit sa kinatibuk-ang bahin sa mga kapaitan sa tibuok nga panaw. Dugang sa pag-asikaso sa panginahanglan alang sa Kampo ug sa pagdumala niini, siya naglakaw sa daghang higayon ug nakaangkon og paslot, dugoon, ug nagngulngol nga mga tiil, nga maoy natural nga resulta sa paglakaw og 40.23 ngadto sa 64.37 ka mga kilometro kada adlaw sa ting-init niining tuiga. Apan atol sa tibuok nga panaw siya wala gayud magtagawtaw o magbagulbol samtang ang kadaghanan sa mga sakop sa Kampo nagbagulbol ngadto kaniya sa ilang nagsakit nga mga tudlo sa tiil, sa mga nangapaslot nga mga tiil, sa taas nga mga biyahe, ang kadaginuton sa ilang mga kan-onon, sa dili maayo nga matang sa pan, sa bati nga harinang mais [mais nga pan], pan-os [nadaot] nga mantikilya, bahoon nga dugos, uloron nga kusahos ug keso, ug uban pa. Bisan ang usa ka iro dili kapaghot sa pipila ka tawo nga walay pagtagawtaw ngadto ni Joseph. Kon sila mapugos pagkampo sa lugar nga walay maayong tubig, kini ingon sa paingon na ngadto sa pagrebelde. Bisan og kami mao ang Kampo sa Zion, ug daghan kanamo ang dili mainampuon, walay maayong panghunahuna, walay pagmatngon, wala sa kaugalingon, buangon, o yawan-on, ug gani wala kami kabantay niini. Si Joseph nag-agwanta kanamo ug nagtudlo kanamo sama sa mga bata. Adunay daghan, hinoon, nga diha sa Kampo nga wala gayud magtagawtaw ug kinsa kanunay’ng andam ug buot mobuhat og unsay tinguha sa among lider” (George A. Smith, sa Mga Pagtulun-an sa mga Presidente sa Simbahan: Joseph Smith [2007], 348).

• Ngano kaha nga ang mga miyembro sa kampo managlahi kaayo og reaksyon sa samang mga kahimtang?

Ipasabut nga agig dugang sa pagsinati og kalisdanan sa pagpanaw, daghang mga sakop sa Kampo sa Israel miangkon usab nga ang mga anghel sa Ginoo ug ang Iyang presensya miuban kanila, nagtuman sa saad nga Iyang gihatag diha sa pinadayag nga nagpasiugda sa panaw (tan-awa sa D&P 103:20; Mga Pagtulun-an: Joseph Smith, 349).

Dapita ang usa ka estudyante sa pagbasa og kusog sa mosunod nga pamahayag ni Presidente Wilford Woodruff:

Wilford Woodruff

“Bisan tuod og ang among mga kaaway padayong nanganti og pagpanghulga og kasamok, kami wala mahadlok, wala gayud magpanuko sa pagpadayon sa among panaw, kay ang Dios nagauban kanamo, ug ang Iyang mga anghel nag-una kanamo, ug ang hugot nga pagtuo sa among gamay’ng grupo walay pagkatandog. Kami nahibalo nga ang mga anghel among kauban, kay kami nakakita kanila.” (Wilford Woodruff, sa Mga Pagtulun-an sa mga Presidente sa Simbahan: Joseph Smith [2007], 349).

• Base sa inyong pagbasa sa kapitulo 18 sa Mga Santos: Volume 1, unsa nga makapasagmuyo nga balita ang gihatud ni Parley P. Pratt ug Orson Hyde ngadto sa Kampo sa Israel human sila miabut sa Missouri? (Ilang gipahibalo ang Kampo sa Zion nga si Gobernador Daniel Dunklin dili motawag sa militia sa estado sa pagtabang sa mga Santos nga makabalik ngadto sa ilang mga yuta.)

• Unsa ang nahukman nga buhaton sa Kampo sa Israel human makadungog niini nga balita? (Nakahukom sila nga mopadayon sa ilang panaw uban sa paglaum nga matabangan ang “gipapahawa nga mga Santos diha sa Distrito sa Clay … sa pakigsabut og usa ka kompromiso uban sa mga tawo sa Distrito sa Jackson” [Mga Santos: Volume 1, 203].)

Suba sa Fishing, Missouri

Ipakita ang giandam nga hulagway, ug ipasabut nga usa kini ka litrato sa Suba sa Fishing sa Missouri.

Hangyoa ang mga estudyante sa pagpakli ngadto sa kapitulo 18 sa Mga Santos: Volume1. Dapita ang pipila ka estudyante nga magpuli-puli sa pagbasa og kusog gikan sa pahina 232, mosugod sa parapo nga nagsugod og “Ang Kampo sa Israel mitabok sa …” ug motapos sa parapo diha sa pahina 233 nga nagsugod og “Nagpabilin nga dako ang tubig sa mga suba …” Hangyoa ang klase sa pagsunod, nga mangita og ebidensya nga ang Dios nagbantay sa Kampo sa Israel.

Imbis nga mobasa mahitungod sa milagro sa Suba sa Fishing gikan sa Mga Santos: Volume 1, ikonsiderar ang pagpasalida sa video nga “Zion’s Camp” (18:43) gikan sa time code 8:01 hangtud 13:04. Kini nga video anaa sa ChurchofJesusChrist.org.

• Sa unsang mga paagi nga ang Dios mipanalipod ug mipanalangin sa Kampo sa Israel?

• Unsa nga mga kamatuoran ang atong makat-unan gikan sa mga kasinatian sa mga sakop sa Kampo sa Israel? (Ang mga estudyante mahimong moila og pipila ka mga kamatuoran, sama sa mosunod: Samtang atong ibutang ang atong pagtuo sa Dios, moluwas Siya kanato gikan sa malisud ug walay kasiguroan nga mga sitwasyon. Kon kita magmatinud-anon, mahimo natong makita ang mga panalangin sa Ginoo panahon sa atong mga pagsulay.)

Nabungkag ang Kampo sa Israel

Ipasabut nga tulo ka adlaw human sa unos, niadtong Hunyo 22, 1834, ang Ginoo mipadayag kang Joseph Smith nga ang “mga anciano kinahanglan nga mohulat sa mubo nga panahon alang sa katubsanan sa Zion” (D&P 105:9), nagpasabut nga ang Kampo sa Israel kinahanglang dili mopadayon sa tuyo niini nga misyon sa pagtabang sa mga Santos nga mabawi ang ilang mga yuta sa Distrito sa Jackson. Kini nga pinadayag miabut human si Gobernador Dunklin nagdumili sa paghatag og suporta nga militar sa mga Santos ug naklaro na nga adunay mahitabong gubat ug pag-agas sa dugo kon ang mga Santos mosulay sa pagsulod sa Distrito sa Jackson. Wala madugay human sa pagpadayag, ang Kampo sa Israel misugod sa pagbungkag.

Dapita ang usa ka estudyante sa pagbasa og kusog sa Doktrina ug mga Pakigsaad 105:9–13, 18–19. Hangyoa ang klase sa pagsunod, nga mangita kon unsay gisulti sa Ginoo mahitungod sa matinud-anon nga mga sakop sa Kampo sa Israel. Dapita ang pipila ka mga estudyante sa pagreport sa unsay ilang nakit-an.

• Sa unsang paagi kaha ang bersikulo 19 nakatabang sa mga sakop sa Kampo sa Israel nga makasabut sa katuyoan sa Ginoo alang sa maong panaw?

Ipasabut nga human makadungog sa pinadayag, daghang mga sakop sa kampo midawat niini isip pulong sa Ginoo, apan ang uban nasuko nga wala sila makaangkon sa kahigayunan nga makig-away. Si Heber C. Kimball (1801–68), usa ka sakop sa Kampo sa Israel kinsa sa kaulahian miserbisyo sa Korum sa Napulog Duha ka mga Apostoles ug sa Unang Kapangulohan, mirekord nga sa wala pa makasulod ang mga sakop sa kampo ngadto sa Missouri, si Propeta Joseph Smith mipasidaan kanila “nga adunay pagsulay nga moabut sa kampo agi og sangputanan sa mabingkilon ug gubot nga mga kinaiya nga mitumaw taliwala kanila, ug mangamatay sila sama sa karnero nga nasakit; hinoon kon maghinulsol sila ug magpaubos sa ilang kaugalingon atubangan sa Ginoo, ang pagsulay sa labing dakong bahin mahimong ipalayo” (sa Orson F. Whitney, Life of Heber C. Kimball [1888], 61–62).

Duha ka adlaw human ang pinadayag nga narekord diha sa Doktrina ug mga Pakigsaad 105 nadawat, ang kampo nakasinati sa pagdagsang sa kolera. Isip resulta, 68 ka mga tawo, lakip ni Propeta Joseph Smith, nag-antus sa sakit, ug 13 ka mga sakop sa kampo ug duha pa ka mga Santos sa Ulahing mga Adlaw kinsa nagpuyo sa Distrito sa Clay namatay (tan-awa sa Whitney, Life of Heber C. Kimball, 76; The Joseph Smith Papers, Documents, Volume 4: April 1834–September 1835, 72, note 334). Human ang nahabilin nga mga sakop sa kampo naulian, kadaghanan namauli ngadto sa ilang mga panimalay pagka-Agosto 1834.

Dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles.

David A. Bednar

“Tungod sa kapakyas sa pagpabalik sa mga Santos diha sa ilang mga kayutaan didto sa Distrito sa Jackson, ang Kampo sa Zion giisip sa pipila nga walay kalampusan ug walay kapuslanan nga paningkamot. Usa ka brother didto sa Kirtland—usa ka tawo nga kulang ang hugot nga pagtuo nga moboluntaryo sa pag-uban sa kampo—nakahimamat ni Brigham Young sa iyang pagpauli gikan sa Missouri ug nangutana, ‘Nan, unsa man ang inyong naangkon niining walay kapuslanan nga panaw ngadto sa Missouri uban ni Joseph Smith?’ ‘Among nahimo ang tanan,’ ang daling tubag ni Brigham Young. ‘Dili nako ikabaylo ang kasinatian nga akong naangkon niana nga panaw sa tanang bahandi sa Lalawigan sa Geauga,’ ang lalawigan diin nahisakop ang Kirtland [Brigham Young, sa B. H. Roberts, A Comprehensive History of the Church, 1:370–71]” (David A. Bednar, “Dapig sa Ginoo: Mga Leksyon gikan sa Kampo sa Zion,” Liahona, Hulyo 2017, 29).

• Unsa kaha ang gipasabut ni Brigham Young sa dihang siya mitubag nga “among nahimo ang tanan”? (Nakatuman sila sa unsay gitinguha sa Ginoo nga ilang tumanon.)

Dapita ang usa ka estudyante sa pagbasa og kusog sa mosunod nga pamahayag ni Presidente Wilford Woodruff. Hangyoa ang klase sa pagpaminaw kon unsay iyang gisulti mahitungod sa iyang kasinatian sa Kampo sa Israel.

Wilford Woodruff

“Kami nakabaton og kasinatian nga dili gayud unta namo mabatunan sa laing paagi. Kami may kahigayunan nga makakita sa panagway sa propeta, ug kami may kahigayunan sa pagbiyahe og liboan ka mga kilometro uban kaniya, ug nakasaksi sa mga gibuhat sa Espiritu sa Dios uban kaniya, ug sa mga padayag ni Jesukristo ngadto kaniya ug ang katumanan niadto nga mga padayag” (Wilford Woodruff, sa Mga Pagtulun-an sa mga Presidente Simbahan: Joseph Smith [2007], 342).

Ipasabut nga pagka-Pebrero 14, 1835, pipila ka bulan human ang mga sakop sa kampo mibalik sa Ohio, giorganisar ni Propeta Joseph Smith ang Korum sa Napulog Duha ka mga Apostoles. Paglabay sa duha ka semana, gi-organisar niya ang Korum sa Seventy. Mahimo nimong hangyoon ang mga estudyante kon makahinumdom sila sa mga ngalan niadtong gitawag nga moserbisyo sa Korum sa Napulog Duha ka mga Apostoles (tan-awa sa Mga Santos: Volume 1, 215–16).

Dapita ang usa ka estudyante sa pagbasa sa mosunod nga pamahayag ni Elder David A. Bednar. Hangyoa ang klase sa pagsunod, nga mangita sa nabuhat sa pagmartsa sa Kampo sa Israel diha sa pag-andam sa bag-ong natawag nga mga lider sa Simbahan alang sa ilang pagserbisyo.

David A. Bednar

“Makapaikag kaayo nga walo sa mga kaigsoonan natawag ngadto sa Korum sa Napulog Duha ka mga Apostoles niadtong 1835, ingon man usab ang tanan sa mga Seventy gitawag sa samang higayon, mga beterano sa Kampo sa Zion. Sa usa ka miting pagkahuman og tawag sa mga Seventy, si Propeta Joseph Smith namahayag:

“‘Mga kaigsoonan, ang uban ninyo nasuko kanako, tungod kay kamo wala na makig-away didto sa Missouri; apan ako mosulti kaninyo, ang Dios dili gusto nga makig-away kamo. Dili Niya maorganisar ang Iyang gingharian uban sa dose ka mga lalaki sa pag-abli sa pultahan sa ebanghelyo ngadto sa mga nasud sa yuta, ug uban sa kapitoan ka kalalakin-an ubos sa ilang direksyon sa pagsunod sa ilang lakang, gawas kon Siya midala kanila gikan sa usa ka pundok sa mga kalalakin-an kinsa mihalad sa ilang mga kinabuhi, ug kinsa mihimo og ingon ka dako nga sakripisyo sama sa gibuhat ni Abraham’ [Joseph Smith, sa Joseph Young Sr., History of the Organization of the Seventies (1878), 14; tan-awa usab sa History of the Church, 2:182]. …

“Ang mga kasinatian nga naangkon sa mga boluntaryo sa kasundalohan sa Ginoo mao ang usa ka pagpangandam alang sa mas dako nga mga paglalin sa mga miyembro sa Simbahan sa umaabut. Kapin sa 20 ka mga partisipante sa Kampo sa Zion ang nahimong mga kapitan ug mga tenyente sa duha ka dagkong pagpanlakaw—ang una upat lamang ka tuig sa umaabut, nga naglakip sa pagpapahawa sa mga 8,000 ngadto sa 10,000 ka mga tawo gikan sa Missouri ngadto sa Illinois; ug ang ikaduha, 12 ka tuig sa umaabut, ang dako nga pag-uswag sa kasadpan nga gibanabana nga anaa sa mga 15,000 ka Santos sa Ulahing mga Adlaw gikan sa Illinois ngadto sa Salt Lake ug uban pang mga walog sa Rocky Mountain. Isip usa ka pagpangandam nga pagbansay, ang Kampo sa Zion adunay hilabihan ka dako nga bili ngadto sa Simbahan” (David A. Bednar, “Dapig sa Ginoo: Mga Leksyon gikan sa Kampo sa Zion,” Liahona, Hulyo 2017, 30).

• Unsa nga baruganan ang atong makat-unan gikan sa pagmartsa sa Kampo sa Zion kon unsaon kita pag-andam sa Ginoo aron matuman ang Iyang buhat? (Ang mga estudyante kinahanglang moila og baruganan nga susama sa mosunod: Ang Ginoo mohatag kanato og mga kasinatian nga makatabang sa pag-andam kanato sa pagtuman sa Iyang buhat.)

• Ngano kaha nga importante man alang kanato nga makasabut niini nga baruganan?

• Sa unsang paagi ninyo nakita ang Ginoo nga miandam kaninyo o inyong kaila sa pagtuman sa Iyang buhat?

Ribyuha ang mga kamatuoran nga gihisgutan niini nga leksyon. Dapita ang mga estudyante sa pagsulat diha sa ilang mga study journal og usa ka butang nga mopasalig sila nga buhaton tungod sa unsay ilang nakat-unan o gibati diha sa klase. Ikonsiderar ang pagdapit og pipila ka mga estudyante sa pagpaambit sa ilang tubag ngadto sa klase.

Dapita ang mga estudyante nga mangandam alang sa sunod nga klase pinaagi sa pagbasa sa mga kapitulo 20–21 sa Mga Santos: Volume 1.