Leksyon 26: Ang Pagkamartir ni Joseph ug Hyrum Smith
“Leksyon 26: Ang Pagkamartir ni Joseph ug Hyrum Smith,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)
“Leksyon 26,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo
Leksyon 26
Ang Pagkamartir ni Joseph ug Hyrum Smith
Pasiuna ug Han-ay sa mga Panghitabo [Timeline]
Niadtong Hunyo 7, 1844, ang miapostasiya nga mga miyembro sa Simbahan ug mga kaaway ni Joseph Smith mimantala sa una ug bugtong nga isyu sa Nauvoo Expositor, usa ka pamantalaan nga kontra sa Mormon nga midaut sa Propeta ug misaway sa pipila ka mga pagpadayag, mga pagtulun-an, ug mga binuhatan nga miabut pinaagi kaniya. Paglabay sa tulo ka adlaw, ang konseho sa siyudad sa Nauvoo ug si Joseph Smith, naglihok isip mayor sa Nauvoo, mideklarar nga ang pamantalaan nakasamok sa publiko ug mimando nga gub-on kini. Human naguba ang makina sa pagmantala, ang mga kaaway sa Propeta mikiha kaniya ug sa mga sakop sa konseho sa siyudad sa pagpanghulhog og kagubot. Si Joseph ug ang iyang igsoong si Hyrum milayas dayon sa Nauvoo aron malikayan ang pagkaaresto. Human makahukom nga itugyan ang ilang mga kaugalingon, si Joseph, Hyrum, ug ang uban, mibiyahe ngadto sa Carthage, Illinois, aron moatubang og husay sa korte. Niadtong Hunyo 27, 1844, ang panon sa mga manggugubot mipusil ug mipatay ni Joseph ug Hyrum Smith sa Carthage Jail.
Hunyo 10, 1844Ang konseho sa siyudad sa Nauvoo mideklarar nga ang Nauvoo Expositor nakasamok sa publiko ug mimando nga gub-on kini.
Hunyo 22, 1844Si Joseph Smith ug ang mga sakop sa konseho sa siyudad giakusahan nga mihimo og kagubot atol sa pagguba sa makina sa Nauvoo Expositor.
Hunyo 23, 1844Si Joseph ug Hyrum Smith mitabok sa Suba sa Mississippi aron makalikay sa pagka-aresto.
Hunyo 24, 1844Si Joseph Smith ug ang uban mibiya sa Nauvoo padulong sa Carthage, Illinois, aron moatubang og husay sa korte.
Hunyo 27, 1844Si Joseph ug Hyrum Smith gimartir didto sa Bilanggoan sa Carthage.
Mga Basahunon sa Estudyante
Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 44
Mga Sugyot alang sa Pagtudlo
Si Joseph Smith ug ang uban nakahukom nga moadto sa Carthage aron sa pagtubag sa mga pasangil batok kanila
“Si Joseph ug Hyrum patay na. Si [John] Taylor samaran. … Maayo ra ko”(sulat ni Willard Richards ngadto ni Thomas Ford, Emma Smith, ug sa uban, Hunyo 27, 1844, Church History Library, Siyudad sa Salt Lake).
Ipasabut nga kini nga mga pulong maoy usa ka bahin sa mensahe nga gipadala gikan ni Willard Richards ngadto ni Emma Smith ug sa ubang mga Santos sa Nauvoo mga oras human si Joseph ug Hyrum Smith mabangis nga gipatay sa Bilanggoan sa Carthage sa Illinois niadtong Hunyo 27, 1844. Si Willard Richards ug John Taylor personal nga nakasaksi sa pagkamartir.
Hunahunaa nga kauban kamo sa pamilya ug mga higala ni Joseph ug Hyrum Smith didto sa Nauvoo. Unsa kaha ang inyong mga hunahuna ug pagbati human madungog kining makalilisang nga balita?
Awhaga ang mga estudyante sa pagpamalandong bahin sa ilang mga hunahuna ug mga pagpamatuod kalabut ni Propeta Joseph Smith samtang magkat-on sila mahitungod sa katapusang mga adlaw sa kinabuhi sa Propeta.
Ipasabut nga niadtong ting-init sa 1844, ang kalagut ug oposisyon ngadto ni Joseph Smith ug sa Simbahan nagkakusog tungod sa nagtubo nga politikanhon ug ekonomikanhong impluwensya sa mga Santos, mga sayop nga pagsabut kalabut sa doktrina sa kahimayaan ug sa buhat sa dinaghan nga kaminyoon, ug ang mga pagpangtuis sa miapostasiya nga mga miyembro kalabut sa Simbahan.
Isulat ang Nauvoo Expositor diha sa pisara. Ipasabut nga niadtong Hunyo 7, 1844, ang miapostasiya nga mga miyembro sa Simbahan mimantala sa una ug bugtong nga isyu niining pamantalaan nga kontra sa Mormon uban sa tuyo nga mohulhog sa publiko batok ni Propeta Joseph Smith.
Base sa inyong pagbasa sa kapitulo 43 sa Mga Santos: Volume 1, unsa ang nahitabo sa Nauvoo Expositor ug ngano? (Nahadlok nga ang pamantalaan mahimong hinungdan sa kabangis sa mga manggugubot batok sa mga Santos, ang konseho sa siyudad sa Nauvoo mideklarar niini nga nakasamok sa publiko ug mimando sa pagguba sa makina sa pagmantala.)
Unsa nga mga problema ang miresulta gikan niini nga desisyon alang kang Joseph Smith ug sa mga Santos? (Misamot ang mga kalagut batok sa mga Mormon, ug dunay gipasaka nga legal nga mga akusasyon batok ni Joseph Smith ug sa konseho sa siyudad.)
Ipasabut nga tulo ka adlaw human sa pagguba sa makina sa pagmantala sa Nauvoo Expositor, ang Propeta nakadawat og report nga adunay armado nga mga manggugubot nga nagpundok sa Carthage, Illinois, sa tuyo nga moataki sa mga Santos sa Nauvoo. Si Joseph Smith, isip mayor sa Nauvoo, mibutang sa siyudad ubos sa martial law ug mitawag sa militia sa Nauvoo sa pagpanalipod sa siyudad ug sa pagpatuman sa balaod ug kahusay. Ang Propeta misulat usab ngadto sa gobernador sa Illinois nga si Thomas Ford aron sa pagpahibalo kaniya mahitungod sa sitwasyon. Si Gobernador Ford miawhag kang Joseph Smith ug sa mga sakop sa konseho sa siyudad sa pag-adto sa Carthage aron sa pagtubag sa legal nga mga akusasyon batok kanila, misaad nga mosiguro sa ilang kaluwasan.
Hangyoa ang mga estudyante sa pagpakli ngadto sa kapitulo 44 sa Mga Santos: Volume 1. Dapita ang pipila ka estudyante nga magpuli-puli sa pagbasa og kusog gikan sa pahina 614, mosugod sa parapo nga nagsugod og “Nasayud nga ang Carthage …” ug motapos sa parapo diha sa pahina 615 nga nagsugod og “Nianang gabhiuna, human manamilit …” Hangyoa ang klase sa pagpangita kon unsa ang nahukman sa Propeta nga iyang buhaton.
Ngano kaha nga naghunahuna ang Propeta nga labing maayo ang pagbiya sa Nauvoo?
Ipasabut nga pipila ka mga tawo miabut gikan sa Nauvoo aron makigkita ni Joseph, lakip ang miyembro sa Simbahan nga si Reynolds Cahoon, kinsa nagdala og sulat gikan ni Emma nga nag-awhag kang Joseph sa pagpauli. Ang pipila sa mga lalaki mihangyo sa Propeta sa pagtugyan sa iyang kaugalingon, mipahibalo kang Joseph nga “tuyo sa gobernador nga paokupahan og mga tropa ang Nauvoo hangtud nga siya ug ang iyang igsoon nga si Hyrum motahan” (Mga Santos: Volume 1, 615). Ang uban pa gani kanila miakusar ni Joseph og pagkatalawan.
Ipakita ang mosunod nga pamahayag nga gihimo ni Reynolds Cahoon ngadto sa Propeta, ug dapita ang usa ka estudyante sa pagbasa niini og kusog:
“Kanunay ka nga misulti nga kon ang simbahan makig-unong kanimo, nga ikaw makig-unong sa simbahan, karon adunay kagubot nga miabut [ug] ikaw ang una nga midagan” (sa Wandle Mace, Autobiography, circa 1890, 105, Church History Library, Siyudad sa Salt Lake).
Kon kamo ang anaa sa sitwasyon sa Propeta, unsa kaha ang inyong bation sa pagkadungog niini nga mga pulong?
Dapita ang usa ka estudyante sa pagbasa og kusog sa mosunod nga pamahayag gikan sa kasaysayan ni Propeta Joseph Smith. Hangyoa ang klase sa pagpaminaw sa tubag ni Joseph.
“Mitubag si Joseph, ‘kon ang akong kinabuhi wala nay bili ngadto sa akong mga higala, wala na usab kini bili sa akong kaugalingon.’
“… Milingi dayon si Joseph ngadto kang Hyrum … ug miingon, ‘igsoong Hyrum, ikaw ang kinamagulangan, unsay atong buhaton?’ Miingon si Hyrum, ‘mobalik ta ug atong itahan ang atong kaugalingon, ug atong tan-awon kon unsay mahitabo.’ Human maghunahuna og pipila ka gutlo si Joseph miingon, ‘kon … mobalik ka mouban ko nimo, apan bangis kita nga pamatyon’” (Manuscript History of the Church, vol. F-1, p. 148, josephsmithpapers.org).
Ipasabut nga si Joseph, Hyrum, ug ang uban miadto sa Carthage sa buntag sa Hunyo 24, 1844. Dapita ang usa ka estudyante sa pagbasa og kusog sa mosunod nga pamahayag sa miyembro sa Simbahan nga si Dan Jones, kinsa kauban sa Propeta samtang nangandam siya nga mobiyahe padulong sa Carthage. Hangyoa ang klase sa pagpaminaw kon unsa ang gipadayag sa mga pulong ni Joseph Smith mahitungod sa iyang kinaiya.
Imahe
Dan Jones
“Dili gayud nako makalimtan kadto nga talan-awon sa dihang [ang Propeta] nagbarug sa tunga, ug mitan-aw libut kaniya, dayon diha sa siyudad ug sa mga lumulupyo niini kinsa bililhon kaayo kaniya, miingon siya, ‘Kon dili ako moadto [sa Carthage], ang resulta mao ang pagkagun-ob niining siyudad ug sa mga lumulupyo niini; ug dili ako makaako sa paghunahuna nga ang akong minahal nga mga kaigsoonan ug ang ilang mga anak mag-antus na usab sa kahimtang sa Missouri dinhi sa Nauvoo; dili, mas maayo nga ang inyong igsoon, si Joseph, mamatay alang sa iyang kaigsoonan, tungod kay ako andam nga mamatay alang kanila. Nahuman na ang akong buhat; ang Ginoo nakadungog na sa akong mga pag-ampo ug misaad nga kita makaangkon og kapahulayan gikan sa ingon nga mga kabangis sa dili madugay, ug busa ayaw ako pugngi sa inyong mga paghilak mahitungod sa akong pagbiya ug pagkamatay.’ Human migakos sa iyang gagmayng mga anak kinsa nanggunit sa iyang sinina ug human mihatag og malumong panamilit sa iyang asawa kinsa iyang gimahal pag-ayo, nga naghilak usab, ug human mihatag sa katapusang paghupay sa iyang tigulang, buotan nga inahan, namulong siya ngadto sa tanan uban sa dakong impluwensya, nag-awhag kanila nga magmatinud-anon sa paagi ug sa relihiyon nga iyang gitudlo kanila” (Dan Jones, “The Martyrdom of Joseph Smith and His Brother, Hyrum!” sa Ronald D. Dennis, “The Martyrdom of Joseph Smith and His Brother Hyrum by Dan Jones,” BYU Studies, bol. 24, nu. 1 [1984], 85–86).
Unsa ang gipakita sa mga pulong ug mga lihok sa Propeta mahitungod sa iyang kinaiya?
Isip kabahin sa inyong diskusyon, dapita ang mga estudyante sa pagpakli ngadto sa Juan 15:13. Ipasabut nga ang Manluluwas namulong sa mga pulong niini nga bersikulo ngadto sa Iyang mga disipulo sa hapit na ang Iyang kaugalingong kamatayon. Hangyoa ang mga estudyante sa pagbasa og hilum sa Juan 15:13 ug sa pagkonsiderar kon sa unsang paagi kini nga mga pulong naghulagway sa Manluluwas nga si Jesukristo. Dapita ang mga estudyante sa pagreport unsay ilang nakit-an.
Giunsa ni Joseph Smith pagsunod ang ehemplo sa gugma sa Manluluwas?
Ipasabut nga samtang ang Propeta mibiyahe uban sa ubang tawo padulong sa Carthage, nanagna na usab siya sa iyang pagkamartir. Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–44):
Imahe
Joseph Smith
“Ako moadto sama sa usa ka karnero ngadto sa ihawanan; apan ako malinawon ingon sa kabuntagon sa ting-init; Ako adunay tanlag nga walay sala ngadto sa Dios, ug ngadto sa tanan nga mga tawo” (D&P 135:4).
Sa unsang paagi kaha ang pagbaton og “tanlag nga walay sala ngadto sa Dios, ug ngadto sa tanan nga mga tawo” makatabang sa Propeta sa pag-atubang kon unsay anaa sa unahan uban sa kalinaw ug hugot nga pagtuo?
Si Joseph Smith ug ang uban gibilanggo sa Bilanggoan sa Carthage
Ipasabut nga sa dihang si Joseph Smith ug ang iyang mga kauban miabut sa Carthage, ang lungsod anaa sa gubot nga kahimtang. Ang mga pundok sa masuk-anon nga mga tawo, lakip sa gubot nga mga sakop sa militia, gusto nga makakita og daklit sa Propeta ug sa iyang igsoon. Pagkasunod buntag, si Joseph, Hyrum, ug ang mga sakop sa konseho sa siyudad sa Nauvoo gibuhian pinaagi sa pagpiyansa aron maghulat sa husay sa kaso nga pagpanghulhog og kagubot. Sa wala pa makabiya sa lungsod si Joseph ug Hyrum, gikasuhan sila og pagbudhi batok sa estado tungod sa pagdeklarar og martial law sa Nauvoo. Tungod kay ang pagbudhi usa ka sala nga dili mapiyansahan, ang Propeta ug ang iyang igsoon gitanggong sa bilanggoan sa Carthage, ug ang pipila sa ilang mga kauban mipili nga magpabilin uban kanila didto sa bilanggoan.
Ipakita ang giandam nga hulagway sa Bilanggoan sa Carthage.
Dapita ang usa ka estudyante sa pagbasa og kusog sa mosunod nga pamahayag ni Dan Jones, kinsa uban ni Joseph ug Hyrum Smith sa Bilanggoan sa Carthage. Hangyoa ang mga estudyante sa pagpaminaw kon unsa ang gibuhat ni Joseph ug Hyrum Smith didto sa Carthage Jail sa gabii sa Hunyo 26, 1844.
Imahe
Dan Jones
“Sa pagka-gabii ang Patriyarka [Hyrum Smith] mibasa ug mikomentaryo kalabut sa daghang mga kinutlo nga mga bersikulo gikan sa Basahon ni Mormon, ang pagkabilanggo ug pagkaluwas sa mga sulugoon sa Dios tungod sa Ebanghelyo; si Joseph mihatag og gamhanang pagpamatuod ngadto sa mga guwardiya mahitungod sa balaan nga katinuod sa Basahon ni Mormon—sa pagpahiuli sa Ebanghelyo, sa pagpangalagad sa mga anghel, ug nga ang Gingharian sa Dios anaa na usab sa yuta” (Dan Jones, The Martyrdom of Joseph and Hyrum Smith, 1855, 9, Church History Library, Siyudad sa Salt Lake).
Unsa nga mga baruganan ang atong makat-unan gikan sa mga lihok ni Joseph ug Hyrum Smith sa Bilanggoan sa Carthage? (Ang mga estudyante mahimong moila og pipila ka mga baruganan, apan siguroha nga moila sila sa mosunod: Atol sa mga panahon sa kalisud, makakaplag kita og kahupayan diha sa pagtuon sa Basahon ni Mormon. Makahimo kita sa paghatag sa atong pagpamatuod sa kamatuoran sa bisan unsang kahimtang nga maanaa kita.)
Nganong mahinungdanon man kaayo nga si Joseph ug Hyrum Smith mihatag og gamhanang pagpamatuod sa Basahon ni Mormon sa dihang ang ilang mga kinabuhi nameligro?
Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Jeffrey R. Holland
“Sultihi ko kon kining mga orasa sa kamatayon niining duha ka tawo makasulod ba sa presensya sa ilang Mahangturon nga Maghuhukom nga nagkutlo ug nagkaplag og kahupayan gikan sa usa ka basahon nga, kon dili gayud kini pulong sa Dios, matawag silang mga impostor ug mga tigpakaaron-ingnon hangtud sa katapusan sa panahon? Sila dili gayud mobuhat niana! Andam silang mamatay kay sa ilimod ang balaanong gigikanan sa mahangturong kamatuoran sa Basahon ni Mormon” (Jeffrey R. Holland, “Kasiguroan alang sa Kalag,” Liahona, Nob. 2009, 89).
Ipasabut nga pipila ka adlaw sa wala pa mabilanggo si Joseph ug Hyrum, samtang si Hyrum nangandam sa pagbiya padulong sa Carthage, mibasa siya sa Ether 12:36–38 (tan-awa sa D&P 135:4–5). Dapita ang pipila ka estudyante nga magpuli-puli sa pagbasa og kusog sa Ether 12:36–38. Hangyoa ang klase sa pagsunod, nga mangita sa mga pulong nga tingali nakahupay ni Hyrum.
Unsa kaha nga mga pulong ug mga pagtulun-an gikan niini nga tudling sa kasulatan ang nakahupay ni Hyrum niining lisud nga panahon?
Dapita ang mga estudyante sa pagpamalandong sa mga kasinatian nga ilang naangkon diin ang pagtuon sa Basahon ni Mormon mihatag kanila og kahupayan ug kalinaw sa mga panahon sa kalisud. Dapita ang pipila ka estudyante sa pagpakigbahin sa ilang mga kasinatian.
Awhaga ang mga estudyante sa pagsunod sa ehemplo ni Joseph ug Hyrum Smith pinaagi sa paggahin og panahon sa kanunay nga pagtuon ug pagpamalandong sa mga pagtulun-an sa Basahon ni Mormon ug sa pagpaambit sa ilang mga pagpamatuod niini ngadto sa uban.
Si Joseph ug Hyrum Smith gimartir didto sa Bilanggoan sa Carthage
Ipasabut nga pagka-Hunyo 27, 1844, mibiya si Gobernador Thomas Ford sa Carthage aron mamulong sa mga Santos sa Nauvoo. Sa miagi nga adlaw, ang gobernador nakigkita ni Propeta Joseph Smith ug misaad nga iyang dad-on si Joseph ug Hyrum uban kaniya kon mobiya siya sa Carthage. Ang gobernador nasayud nga dunay mga tawo nga mihulga sa pagsulong sa bilanggoan ug sa pagpatay sa mga binilanggo, apan mibiya siya sa Nauvoo nga wala gidala si Joseph ug Hyrum, wala motuman sa iyang saad ngadto sa Propeta. Wala madugay human sa alas 5:00 sa hapon, ang pundok sa mga manggugubot nga mga 100 ka tawo mipalibut sa bilanggoan.
Aron matabangan ang mga estudyante sa paghanduraw sa mga panghitabo sa pagkamartir, ipakita ang giandam nga mga hulagway. Ipasabut nga ang una nga hulagway mao ang kwarto sa Bilanggoan sa Carthage diin si Joseph ug Hyrum Smith, John Taylor, ug Willard Richards gibutang.
Bahina ang klase ngadto sa mga grupo nga adunay duha o tulo ka estudyante. Hangyoa ang mga estudyante sa pagpakli ngadto sa kapitulo 44 sa Mga Santos: Volume 1. Dapita ang mga estudyante sa pagbasa og kusog diha sa ilang mga grupo gikan sa pahina 625, mosugod sa parapo nga nagsugod og “Pipila ka minutos ang milabay …” ug mopadayon hangtud sa katapusan sa kapitulo. Hangyoa ang klase sa paghanduraw kon sama sa unsa kaha ang talan-awon kon uban pa sila sa propeta didto sa Bilanggoan sa Carthage.
Isulat diha sa pisara ang mosunod nga pangutana, ug dapita ang mga estudyante sa paghisgot niini diha sa ilang grupo:
Unsa ang inyong mga pagbati samtang inyong ikonsiderar ang sakripisyo nga gihimo sa Propeta ug sa iyang igsoong si Hyrum alang sa ilang mga pagpamatuod sa gipahiuli nga ebanghelyo?
Ipasabut nga atol sa pag-atake, ang bugtong angol ni Willard Richards mao nga natapsingan sa bala ang iyang wala nga dalunggan. Ang kasaysayan ni Joseph Smith nagrekord nga nagtuman kini sa usa ka panagna nga gihimo kaniadto ni Joseph Smith “nga ang panahon moabut nga ang mga bala manglupad sa palibut [ni Willard Richards] sama sa unos, ug iyang makita ang iyang mga higala nga mangahagsa sa wala ug sa tuo, apan dili mabuslotan ang iyang saput” (Manuscript History, vol. F-1, p. 183).
Dapita ang usa ka estudyante sa pagbasa og kusog sa Doktrina ug mga Pakigsaad 135:3. Hangyoa ang klase sa pagsunod, nga mangita sa pasidungog nga nahisulat mahitungod ni Propeta Joseph Smith.
Unsa nga kamatuoran ang atong maila kalabut sa natampo ni Joseph Smith ngadto sa kaluwasan sa mga anak sa Dios? (Ang mga estudyante kinahanglang moila og kamatuoran nga susama sa mosunod: Mas daghan pa og nahimo si Joseph Smith alang sa kaluwasan sa mga tawo niining kalibutan kay ni bisan kinsa gawas ni Jesukristo.)
Unsa ang pipila ka mga butang nga nahimo ni Propeta Joseph Smith alang sa atong kaluwasan nga labing mahinungdanon kaninyo? Ngano?
Pagdapit og pipila ka mga estudyante nga mopaambit sa ilang mga pagpamatuod mahitungod ni Propeta Joseph Smith diha sa klase.
Tapusa pinaagi sa pagpaambit sa imong pagpamatuod sa propetikanhong misyon ni Joseph Smith.
Dapita ang mga estudyante nga mangandam alang sa sunod nga klase pinaagi sa pagbasa sa kapitulo 45 sa Mga Santos: Volume 1.
