“Leksyon 14: Apostasiya sa Kirtland,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo (2018)
“Leksyon 14,” Kasaysayan sa mga Santos sa Ulahing mga Adlaw: 1815–1846 Materyal sa Magtutudlo
Leksyon 14
Apostasiya sa Kirtland
Pasiuna ug Han-ay sa mga Panghitabo [Timeline]
Sa mga tunga-tungang bahin sa 1836, ang mga lider sa Simbahan sa Kirtland, Ohio adunay utang nga kinahanglan dayong bayaran isip resulta sa pagtukod sa Templo sa Kirtland, sa pagpalit og yuta alang sa bag-ong nangabut nga mga Santos, ug mga problemang pinansyal sa pag-establisar sa Zion didto sa Missouri. Ang mga lider sa Simbahan miestablisar sa Kirtland Safety Society, usa ka institusyon nga sama sa bangko, nanghinaut nga mamahimo kining usa ka tinubdan sa gikinahanglan kaayo nga kwarta. Hinoon, wala kini molampus. Wala kaabut og usa ka tuig human sa pagsugod, nasira ang Kirtland Safety Society, sa dakong bahin tungod sa oposisyon gikan sa pipila ka mga lumulupyo nga dili Mormon ingon man usab sa lisud nga ekonomikanhong sitwasyon nga may kalabutan sa pinansyal nga problema sa tibuok nasud. Sugod sa ulahing bahin sa 1836, usa ka kinaiya sa pag-apostasiya ug pagpangita og sayop sa uban mitubo diha sa Simbahan, ug pagka-1837 mipadayon kini sa pagkaylap taliwala sa daghang mga Santos, lakip sa ubang mga lider sa Simbahan. Bisan tuod kadaghanan sa mga miyembro sa Simbahan miresponde uban ang hugot nga pagtuo atol niining lisud nga panahon, ang uban dayag nga misupak kang Joseph Smith—ug ang uban mitawag pa gani kaniya nga napukan nga propeta.
Sayong bahin sa Enero 1837Ang Kirtland Safety Society misugod sa pagnegosyo.
Mayo 1837Mikusog ang pagkuyanap sa pinansyal nga problema sa Estados Unidos, nga maoy hinungdan sa pagkahapay sa daghang mga bangko ug mga negosyo.
Ting-init sa 1837Si Joseph Smith miluwat sa iyang posisyon isip tresurero sa Kirtland Safety Society.
Ulahing bahin sa ting-init sa 1837Ang Kirtland Safety Society nanira.
Disyembre 1837Daghan nga mga masupilon sa Ohio, lakip sa ubang mga lider sa Simbahan, gipahimulag [excommunicated].
Enero 12, 1838Gisugo pinaagi sa pinadayag, si Joseph Smith ug Sidney Rigdon mibiya sa Kirtland ug mibalhin ngadto sa Missouri.
Mga Basahunon sa Estudyante
Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 22–23
Pahinumdom: Bisan tuod ang basahunon sa estudyante alang niini nga leksyon mao ang mga kapitulo 22–23 sa Mga Santos: Volume 1, kini nga leksyon naglakip og impormasyon gikan sa mga kapitulo 24–25 sa Mga Santos: Volume 1.
Mga Sugyot alang sa Pagtudlo
Human makasinati og panahon sa kauswagan ang mga Santos sa Kirtland, Ohio, gipasidan-an sila sa ilang mga sala
Ipakita ang mosunod nga pamahayag ni Presidente Brigham Young (1801–77), ug ipasabut nga gihulagway niya ang kahimtang sa Simbahan sa Kirtland, Ohio, niadtong 1837:
Imahe
Brigham Young
“Ang hugot nga pagtuo sa daghang pinakalig-on nga mga tawo sa simbahan nagduha-duha na” (Brigham Young, sa Mga Pagtulun-an sa mga Presidente sa Simbahan: Joseph Smith [2007], 384).
Base sa inyong pagbasa sa mga kapitulo 22–23 sa Mga Santos: Volume 1, unsay nakaaghat ni Brigham Young sa paghimo niini nga pamahayag?
Unsa ang pipila ka rason nga ang usa ka miyembro sa Simbahan karon tingali magduha-duha sa iyang pagtuo ug pagpamatuod?
Dapita ang mga estudyante sa pagpangita og mga baruganan sa leksyon karong adlawa nga makatabang nato nga magpabiling matinud-anon ngadto sa Ginoo ug sa Iyang Simbahan atol sa lisud nga mga panahon.
Ipasabut nga sa mga bulan human sa pagpahinungod sa Templo sa Kirtland niadtong tingpamulak sa 1836, ang Kirtland mipadayon sa paspas nga pag-uswag samtang ang mga kinabig nangabut aron makig-uban sa kinadak-ang pundok sa mga Santos. Ang mga umahan gipamalit ug bag-ong mga panimalay ug mga negosyo gitukod. Panahon sa ting-init sa 1836, ang mga sakop sa Korum sa Napulog Duha ka mga Apostoles miserbisyo og mga misyon sa amihanang silangang mga bahin sa Estados Unidos ug sa Canada.
Dapita ang usa ka estudyante sa pagbasa og kusog sa mosunod nga istorya ni Presidente Heber C. Kimball (1801–68) sa Unang Kapangulohan. Si Heber C. Kimball usa ka sakop sa Korum sa Napulog Duha ka mga Apostoles sa dihang mibalik siya sa Kirtland gikan sa iyang misyon niadtong Oktubre 1836:
Imahe
Heber C. Kimball
“Naguol kami pag-ayo … sa among pag-abut sa Kirtland, nga makita ang kinaiya sa pagpangagpas [kaandam nga moapil sa mga negosyo nga taas og risgo] nga komon kaayo diha sa Simbahan. Ang pagpamalit ug pagpamaligya daw maoy nakaangkon sa panahon ug pagtagad sa mga Santos. … Ang pipila ka mga tawo, kinsa, sa dihang mibiya ko, naglisud nga makakaon, nakita nako sa akong pagbalik nga nahimong mga tawo nga gituohan nga adunay daghang bahandi; gani ang tanan diha sa dapit daw padulong sa dakong pag-uswag, ug ang tanan daw determinado nga mahimong adunahan” (Heber C. Kimball, sa Orson F. Whitney, The Life of Heber C. Kimball [1888], 111).
Ngano kaha nga “naguol” man si Heber C. Kimball sa dihang mibalik siya sa Kirtland?
Dapita ang usa ka estudyante sa pagbasa og kusog sa mosunod nga pamahayag ni Sister Eliza R. Snow (1804–87), kinsa sa wala madugay miserbisyo isip Kinatibuk-ang Presidente sa Relief Society. Gihulagway ni Eliza ang iyang naobserbahan nga nahitabo atol niining samang panahon sa Kirtland, Ohio:
Imahe
Eliza R. Snow
“Daghan kaniadto kinsa nagmapailubon ug matinud-anon sa pagpahigayon sa matag katungdanan—andam nga moadto ug mobuhat sa matag tawag sa Pagkapari [Priesthood]—nagmapagarbuhon sa ilang mga espiritu, ug nagpataas sa garbo sa ilang mga kasingkasing. Samtang ang mga Santos midawat sa gugma ug espiritu sa kalibutan, ang Espiritu sa Ginoo mipalayo sa ilang mga kasingkasing” (Eliza R. Snow, sa Mga Pagtulun-an sa mga Presidente sa Simbahan: Joseph Smith [2007], 383; tan-awa usab sa Eliza R. Snow Smith, Biography and Family Record of Lorenzo Snow [1884], 20).
Unsa ang gibuhat sa pipila ka mga Santos sa Kirtland nga misangput sa pagkawala sa Espiritu sa Ginoo gikan kanila?
Ipasabut nga mitipig si Wilford Woodruff og mga sulat ug mga panumduman sa unsay nahitabo panahon sa mga miting sa Simbahan nga gipahigayon sa ulahing bahin sa 1836 ug sayong bahin sa 1837.
Ipakita ang mosunod nga mga istorya ni Presidente Wilford Woodruff (1807–98) gikan sa iyang personal nga mga rekord sa mga miting sa Simbahan. Ipares-pares ang mga estudyante, ug hangyoa sila nga magdungan sa pagbasa sa mga istorya. Hangyoa ang mga estudyante sa pagpangita og mga mensahe nga gibalik-balik dinhi niini nga mga miting.
Imahe
Wilford Woodruff
Disyembre 11, 1836: “Miadto ko sa balay sa Dios aron sa pagsimba ug oh, pagkaanindot nga miting. Hinaut nga masilsil kini sa akong kasingkasing sa kahangturan. Kay karong adlawa ang Dios sa Israel kusganong misaway niining stake sa Zion [sa Kirtland] pinaagi sa mga propeta ug mga apostoles tungod sa tanan namong mga sala ug pagbalik ngadto sa ngil-ad nga mga gawi ug usab usa ka tukma sa panahon nga pasidaan aron makalingkawas kami sa mga Paghukom sa Dios nga mapahamtang unta kanamo” (Wilford Woodruff’s Journal, ed. Scott G. Kenney [1983], 1:111).
Enero 10,1837: “Nakigkita ako sa Korum sa mga Seventy diha sa Balay sa Ginoo. … Duna kami espirituhanon nga miting. Si Elder Brigham Young, usa sa Napulog Duha, mihatag kanamo og makapaikag nga pag-awhag ug mipasidaan kanamo nga dili magbagulbol batok ni Moises (o) ni Joseph o sa mga pangulo sa Simbahan” (Wilford Woodruff’s Journal, 1:121).
Pebrero 19, 1837: “Mibalik si Joseph sa Kirtland, ug niining buntaga mibarug sa pulpito. … Sa iyang pagbarug siya miingon, ‘Ako pa gihapon ang Presidente, Propeta, Manalagna, Tigpadayag, ug Lider sa simbahan ni Jesukristo.[’] … Maisugon siya nga mibadlong sa mga tawo tungod sa ilang mga sala, sa kangitngit ug sa ka walay pagtuo; ang gahum sa Dios mikunsad diha kaniya, ug mihatag og pagpamatuod nga ang iyang gipanulti tinuod” (“History of Wilford Woodruff (from His Own Pen),” Deseret News, Hulyo 14, 1858, 85).
Abril 9, 1837: “Si [Presidente] Smith namulong pagkahapon, ug miingon diha sa ngalan sa Ginoo nga ang paghukom sa Dios mokunsad niadtong mga tawo kinsa miangkon nga iyang mga higala … apan mitalikod ug nagluib kaniya, ug sa mga interes sa gingharian sa Dios, ug mihatag og gahum ngadto sa mga kamot sa atong mga kaaway batok kanato” (“History of Wilford Woodruff,” 86).
Human sa igo nga panahon, pangutan-a:
Unsa nga mga mensahe ang gibalik-balik niini nga mga miting?
Base sa unsay naobserbahan ni Wilford Woodruff, unsa nga mga baruganan ang atong makat-unan mahitungod sa tahas sa buhing mga propeta ug mga apostoles? (Ang mga estudyante mahimong moila og usa o sobra pa sa mosunod nga mga baruganan: Ang Ginoo nagpasidaan kanato sa mga kakuyaw pinaagi sa mga propeta ug mga apostoles. Kon mopatalinghug kita sa mga pasidaan nga gihatag sa mga propeta ug mga apostoles sa Ginoo, makalingkawas kita sa mga paghukom sa Dios.)
Ipakita ang mosunod nga pamahayag ni Presidente Henry B. Eyring sa Unang Kapangulohan, ug hangyoa ang usa ka estudyante sa pagbasa niini og kusog:
Imahe
Henry B. Eyring
“Tungod kay ang Dios mabination, Siya mitawag og mga sulugoon aron sa pagpasidaan sa katawhan sa kuyaw. Kana nga tawag sa pagpasidaan nahimong mas kusog ug mas importante tungod sa kamatuoran nga ang labing bililhon nga mga pasidaan mao ang mahitungod sa mga kuyaw nga wala pa mahunahuna sa mga katawhan nga mga tinuod” (Henry B. Eyring, “Atong Ipasaka ang Atong Tingog sa Pagpasidaan,” Liahona, Ene. 2009, 3).
Unsa ang pipila ka mga pasidaan nga gihatag sa mga sulugoon sa Ginoo sa atong panahon?
Ipakita ang giandam nga hulagway, ug ipasabut nga usa kini ka ehemplo sa kwarta gikan sa Kirtland Safety Society.
Dapita ang usa ka estudyante sa pagbasa og kusog sa mosunod nga parapo:
Sa Kirtland, si Joseph Smith ug ang ubang mga lider sa Simbahan miestablisar og usa ka kompaniya nga gitawag og Kirtland Safety Society, usa ka institusyon nga susama sa usa ka bangko, sa panghinaut nga makatabang kini sa bag-ong nangabut nga mga miyembro sa pagpalit og yuta alang sa mga panimalay ug makatabang sa pagpangita og kwarta nga ikabayad sa mga utang sa Simbahan, lakip ang utang nga naangkon gikan sa pagtukod sa Templo sa Kirtland. Hinoon, nasira ang Kirtland Safety Society wala kaabut og usa ka tuig human sa pagpangabli niini tungod sa oposisyon sa pipila ka mga lumulupyo nga dili Mormon ingon man usab sa ekonomikanhong kalisdanan nga may kalabutan sa pinansyal nga problema sa tibuok nasud. Daghan nga mga namuhunan [investor] nawad-an sa ilang kwarta, lakip ni Joseph Smith nga nakaangkon sa labing dako nga pagkaalkanse. Bisan og ang Kirtland Safety Society wala butangi og puhunan sa Simbahan, ang ubang mga Santos mikonsiderar niini nga usa ka bangko sa Simbahan ug mibasol ni Joseph Smith sa ilang pinansyal nga mga problema.
Ipasabut nga ang kinaiya sa pagpanaway nakapahimo sa ubang mga Santos nga makigbatok sa propeta sa Ginoo. Dapita ang mga estudyante sa pagpakli ngadto sa kapitulo 24 sa Mga Santos: Volume1. Hangyoa ang usa ka estudyante sa pagbasa og kusog gikan sa pahina 315, mosugod sa parapo nga nagsugod og “Sa hinapos sa Hunyo …” ug motapos sa parapo nga nagsugod og “Ang mga pulong ni Parley nakapasakit ni Mary …”
Ipasabut nga si Elder Parley P. Pratt bag-ohay lang miuli gikan sa misyon sa Canada, diin iyang gitudloan ug gibunyagan si John Taylor ug ang iyang asawa, si Leonora. Samtang mibisita si John Taylor sa Kirtland, si Parley miduol ni John ug mipahayag og pagduha-duha mahitungod ni Propeta Joseph Smith.
Bahina ang mga estudyante ngadto sa gagmayng mga grupo, ug hatagi sila og mga kopya sa giandam nga handout, “Tubag ni John Taylor ngadto ni Parley P. Pratt.” Hangyoa ang matag grupo sa pagbasa sa tubag ni John Taylor ngadto ni Parley Pratt ug sa paghisgot sa ilang mga tubag sa mga pangutana nga anaa sa handout.
Tubag ni John Taylor ngadto ni Parley P. Pratt
Basaha ang mosunod nga tubag ni John Taylor, nga kaniadto usa ka bag-ong kinabig, ngadto ni Parley P. Pratt, kinsa mitudlo ug mibunyag ni John usa ka tuig ang milabay apan karon namulong na batok ni Propeta Joseph Smith:
Imahe
John Taylor
“Ako nakalitan sa pagkadungog kanimo nga nagsulti sa ingon, Brother Parley. Sa wala pa ikaw mobiya sa Canada ikaw mihatag og lig-on nga pagpamatuod mahitungod ni Joseph Smith nga usa ka Propeta sa Dios, ug sa kamatuoran sa buhat nga iyang gipasiugdahan; ug ikaw miingon nga ikaw nasayud niini nga mga butang pinaagi sa pagpadayag, ug sa gasa sa Espiritu Santo. Ikaw mihatag kanako og usa ka higpit nga panudlo nga nagsulti nga bisan ikaw o usa ka anghel gikan sa langit magpahayag og lain nga mga butang dili ako motuo niini. Karon Brother Parley, dili tawo ang akong gisunod, apan ang Ginoo. Ang mga baruganan nga imong gitudlo kanako midala kanako ngadto Kaniya, ug ako karon adunay sama nga pagpamatuod nga diha kanimo nianang higayona. Kon ang buhat tinuod unom ka mga bulan kaniadto, tinuod kini karon; kon si Joseph Smith usa ka propeta kaniadto, siya propeta karon” (Mga Pagtulun-an sa mga Presidente sa Simbahan: John Taylor [2001], 95–97).
Nganong wala man maapektuhi ang pagpamatuod ni John Taylor sa dihang si Parley P. Pratt mipaambit sa iyang mga pagduha-duha mahitungod ni Propeta Joseph Smith?
Unsa nga mga baruganan ang atong makat-unan gikan sa tubag ni John Taylor nga makatabang niadtong tingali nanlimbasug og mga pangutana, mga pagduha-duha, o mga kabalaka?
Human sa igong panahon, dapita ang pipila ka estudyante sa pagpaambit sa mga baruganan nga ilang nailhan. Tingali makatabang ang pag-summarize sa ilang mga tubag pinaagi sa pagsulat sa mosunod nga baruganan diha sa pisara: Ang pagsalig diha sa espiritwal nga mga saksi nga ato nang nadawat makatabang kanato sa mga panahon sa kalisud o pagduha-duha.
Ipakita ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Jeffrey R. Holland
“Sa mga higayon sa kahadlok o pagduha-duha o sa malisud nga mga panahon, gamita ang hugot nga pagtuo nga napalambo na ninyo, bisan og limitado kini. … Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (Jeffrey R. Holland, “Nagatuo Ako,” Liahona, Mayo 2013, 94).
Unsa ang atong mahimo aron sa paghinumdom sa nangaging espiritwal nga mga saksi kon mag-atubang kita og lisud nga mga kahimtang?
Hangyoa ang mga estudyante sa paghunahuna og usa ka kasinatian dihang ang ilang pagpamatuod mihatag og kaisug ug kalig-on atol sa makahasol nga panahon. Dapita sila sa paggahin og panahon sa pagsulat mahitungod niana nga kasinatian diha sa ilang mga study journal. Ang mga estudyante mahimo usab nga morekord sa unsay ilang buhaton aron mahinumdom ug mosalig sa ilang pagpamatuod kon makasinati sila og mga kalisdanan sa umaabut. Mahimo nimong dapiton ang pipila ka mga estudyante sa pagpaambit sa unsay ilang gisulat ngadto sa klase, kon komportable sila nga mobuhat niini.
Ipakita ang giandam nga hulagway sa sulod sa Templo sa Kirtland.
Ipasabut nga niadtong 1837, ang kinaiya sa pakigsumpaki ug apostasiya mikaylap sa daghang mga Santos, lakip sa Tulo ka mga Saksi sa Basahon ni Mormon ug sa mga sakop sa Korum sa Napulog Duha ka mga Apostoles.
Dapita ang mga estudyante sa pagpakli ngadto sa kapitulo 25 sa Mga Santos: Volume 1. Hangyoa ang usa ka estudyante sa pagbasa og kusog gikan sa pahina 324, mosugod sa parapo nga nagsugod og “Mibiyahe si Joseph nianang samang ting-init …” ug motapos sa parapo diha sa pahina 325 nga nagsugod og “Nagkaguliyang sa templo …”
Sa unsang paagi kini nga panghitabo matandi ngadto sa ubang mga miting sa Simbahan nga gipahigayon kalabut sa pagpahinungod sa templo usa ka tuig na ang milabay, sa tingpamulak sa 1836?
Sa unsang paagi kini nga panghitabo nagpakita nga ang ubang mga Santos napakyas sa pagpatalinghug sa pasidaan nga gihatag sa mga propeta ug mga apostoles?
Ipakita ang mosunod nga pamahayag ni Brigham Young kabahin sa usa ka miting diin ang ubang mga lider sa Simbahan naghisgot kon unsaon sa pagtangtang kang Joseph Smith isip Presidente sa Simbahan ug pulihan siya. Dapita ang usa ka estudyante sa pagbasa og kusog sa pamahayag, ug hangyoa ang klase sa pagpaminaw kon giunsa pagtubag ni Brigham Young ang mga masupilon.
Imahe
Brigham Young
“Sa usa ka okasyon pipila sa Napulog Duha, mga saksi sa Basahon ni Mormon, ug uban sa mga Awtoridad sa Simbahan, mipahigayon og usa ka konseho didto sa ibabaw nga lawak sa Templo. Ang ilang gihisgutan mao ang pagtino kon unsaon pagtangtang si Propeta Joseph, ug itudlo si David Whitmer nga Presidente sa Simbahan. Si Father John Smith, brother Heber C. Kimball ug ang uban nanambong, kinsa supak sa mao nga mga kalihokan. Mibarug ako, ug sa yano ug sa kusganong paagi misulti kanila nga si Joseph usa ka Propeta ug ako nasayud niini, ug nga sila tingali motamay ug mobutang-butang ingon sa ilang ikalipay, [apan] dili gayud sila makaguba sa pagkatudlo sa Propeta sa Dios; makaguba lamang sila sa ilang kaugalingong awtoridad, moputol sa unsay nagsumpay kanila ngadto sa Propeta ug sa Dios, ug magpakaunlod sa ilang kaugalingon sa impyerno” (Brigham Young, sa “History of the Church,” Juvenile Instructor, Mar. 1871, 37).
Unsay ipasabut nga ang mga tawo dili “makaguba sa pagkatudlo sa Propeta sa Dios?”
Unsa ang mahitabo niadtong mopili nga “moputol sa unsay [nagsumpay] kanila ngadto sa Propeta ug sa Dios?” (Ang mga tubag nga ihatag sa mga estudyante mahimong i-summarize ngadto sa usa ka baruganan, sama sa: Kadtong mopahimulag sa ilang kaugalingon gikan sa propeta sa Ginoo mawad-an sa mga panalangin sa gipahiuli nga ebanghelyo.)
Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring:
Imahe
Henry B. Eyring
“Adunay mga panahon, sama sa mga panahon sa Kirtland, nga kita magkinahanglan sa pagtuo ug kaligdong sa usa ka Brigham Young sa pagbarug sa dapit diin ang Ginoo mitawag kanato, maunungon sa Iyang propeta ug sa mga lider nga Iyang gitawag” (Henry B. Eyring “Ang Ginoo Mangulo sa Iyang Simbahan,” Liahona, Nob. 2017, 84).
Tapusa pinaagi sa pagpaambit sa imong pagpamatuod sa mga kamatuoran nga inyong nahisgutan, ug awhaga ang mga estudyante sa paglihok sumala niadto nga mga kamatuoran.
Dapita ang mga estudyante nga mangandam alang sa sunod nga klase pinaagi sa pagbasa sa mga kapitulo 24–25 sa Mga Santos: Volume 1.
Komentaryo ug Background nga Impormasyon
Ang mga propeta gidasig sa pagtuman sa buhat sa Ginoo apan dili perpekto
Si Elder D. Todd Christofferson sa Korum sa Napulog Duha ka mga Apostoles mitudlo nga bisan og si Joseph Smith adunay mga kahuyang sama sa ubang mga tawo, siya tinuod nga propeta ug matinud-anong mipahigayon sa buhat nga gipabuhat kaniya sa Ginoo:
Imahe
D. Todd Christofferson
“Kinahanglang magmatngon kita nga dili mangangkon nga perpekto si Joseph Smith kay siya mismo miingon nga dili siya perpekto. Dili kinahanglan nga dili gayud siya masayop aron mahimong instrumento sa mga kamot sa Dios nga maoy atong pagkaila kaniya. Niadtong Mayo 1844 si Joseph Smith namahayag, ‘Wala gayud ako moingon kaninyo nga perpekto ako; apan walay sayop sa mga padayag nga akong gipanudlo’ [Mga Pagtulun-an sa mga Presidente sa Simbahan: Joseph Smith (2007), 632]. Ug una na siyang mikomentaryo: ‘Bisan nakahimo ako og sayop, wala nako mahimo kana nga mga sayop nga gipasangil kanako: nakahimo ako og sayop tungod sa kahuyang sa tawhanong kinaiyahan, sama sa ubang mga tawo. Walay tawo nga nabuhi nga walay sayop. Nagtuo ba kamo nga bisan si Jesus, kon ania pa Siya dinhi, nabuhi nga walay sayop sa inyong mga mata? Ang iyang mga kaaway namulong sa tanang klase sa dautan batok Kaniya—silang tanan nagbantay sa mga ngil-ad diha Kaniya’ [Mga Pagtulun-an: Joseph Smith, 632]. Si Joseph usa ka mortal nga tawo nga naningkamot sa pagtuman sa usa ka bug-at, gihatag sa Dios nga misyon bisan sa lisud kaayo nga mga kahimtang. Ang katingalahan lang dili nga wala siya magpakita og tawhanong mga kapakyasan, apan nga siya nagmalampuson sa iyang misyon. Ang mga resulta sa iyang buhat dili ikalimud ug walay sama” (D. Todd Christofferson, “The Prophet Joseph Smith” [debosyonal sa Brigham Young University–Idaho, Sept. 24, 2013], byui.edu).
Imahe
Handout nga Tubag ni John Taylor ngadto ni Parley P. Pratt
