Leksyon 27

Ang Korum sa Napulog Duha ka mga Apostoles Gipaluyohan aron Mangulo sa Simbahan

Pasiuna ug Han-ay sa mga Panghitabo [Timeline]

Sa ting-init sa 1844, ang mga Santos sa Nauvoo, Illinois, nagbangutan sa kamatayon ni Joseph ug Hyrum Smith. Human mahibalo mahitungod sa pagkamartir, ang mga Apostoles ug ang uban nga nagserbisyo og mga misyon sa silangang bahin sa Estados Unidos misugod sa pagbiyahe pabalik sa Nauvoo. Si Sidney Rigdon, kinsa nagpuyo sa estado sa Pennsylvania aron motabang sa kampanya sa pagka-presidente ni Joseph Smith, mibiyahe usab pabalik sa Nauvoo. Miabut siya pagka-Agosto 3, 1844, ug mitanyag nga mogiya sa Simbahan isip “magbalantay” tungod kay wala na si Joseph. Wala madugay niana, ang pipila ka mga sakop sa Korum sa Napulog Duha ka mga Apostoles nakabalik, ug ang mga miting gipahigayon diin si Sidney Rigdon ug Brigham Young, kinsa mao ang presidente sa Napulog Duha, namulong ngadto sa mga Santos. Samtang namulong si Brigham Young, gipakita sa Ginoo kinsa ang angay nga mangulo, ug ang mga Santos mipaluyo sa Korum sa Napulog Duha ka mga Apostoles nga mangulo sa Simbahan.

Hunyo 27, 1844Si Joseph ug Hyrum Smith gimartir didto sa Carthage, Illinois.

Agosto 3, 1844Si Sidney Rigdon miabut sa Nauvoo ug nangangkon nga kinahanglan nga siya ang mahimong magbalantay sa Simbahan.

Agosto 6, 1844Si Brigham Young ug ang upat pa ka mga Apostoles miabut sa Nauvoo gikan sa ilang mga misyon sa silangang dapit sa Estados Unidos.

Agosto 7, 1844Si Brigham Young ug si Sidney Rigdon namulong ngadto sa mga konseho sa Simbahan mahitungod sa umaabut nga pagpangulo sa Simbahan.

Agosto 8, 1844Liboan ka mga Santos sa Nauvoo mipaluyo sa Korum sa Napulog Duha ka mga Apostoles nga mangulo sa Simbahan.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), kapitulo 45

Mga Sugyot alang sa Pagtudlo

Pagtudlo pinaagi sa Espiritu

Isip usa ka magtutudlo sa ebanghelyo, kinahanglan imong tinguhaon ang giya sa Espiritu Santo sa imong pagpangandam sa pagtudlo. “Ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (D&P 42:14).

Mga miyembro sa Simbahan nagbangutan sa kamatayon ni Joseph ug Hyrum Smith, ug nakaamgo si Brigham Young nga ang mga yawe sa pagkapari wala mawala

Ipakita ang mosunod nga kinutlo gikan sa usa ka artikulo nga gimantala sa Weekly Herald, usa ka pamantalaan sa New York, niadtong Hulyo 13, 1844, ug dapita ang usa ka estudyante sa pagbasa niini og kusog:

“Among nadawat gahapon pinaagi sa koreo ang mosunod nga mga detalye sa kamatayon ni Joe Smith ang Propeta, ug sa iyang igsoon nga si Hiram.

“Silang duha gipamusil. …

“Sa ingon natapos ang Mormonismo” (“Important from Nauvoo—Death of Joe and Hiram Smith—Terrible Excitement at the West,” Weekly Herald, Hulyo 13, 1844, 220–21).

• Ngano kaha nga ang ubang mga tawo nagtuo nga ang Simbahan dili makapadayon human sa kamatayon ni Joseph ug Hyrum Smith?

Ipasabut nga ang mga miyembro sa Simbahan adunay lain-laing mga reaksyon ngadto sa kamatayon ni Joseph ug Hyrum Smith. Dapita ang pipila ka estudyante nga magpuli-puli sa pagbasa og kusog sa mosunod nga tulo ka istorya. Hangyoa ang klase sa pagpaminaw kon unsa ang reaksyon sa pipila ka mga tawo sa kamatayon ni Joseph ug Hyrum Smith.

1. Si Lucy Mack Smith mihulagway sa nahitabo human giuli ang mga lawas ni Joseph ug Hyrum balik sa Nauvoo:

Lucy Mack Smith

“Human mahugasi ug masul-oban og panglubong ang mga patayng lawas gitugutan kami sa pagtan-aw niini. Dugay na nakong giandam ang matag parte sa akong kaugalingon, migamit sa tanang kusog sa akong kalag, ug mitawag sa Dios sa paglig-on kanako; apan sa dihang misulod ko sa kwarto, ug nakita ang akong mga anak nga gipatay, nga nanagbuy-od sa akong atubangan; ug nadungog ang mga pagbakho ug pag-agulo sa akong pamilya—ang mga singgit nga ‘Papa! Bana! Mga igsoon!’ gikan sa mga baba sa ilang mga asawa, mga anak, mga igsoon, sobra ra kini kaayo—hinay ko nga miatras nga naghilak ngadto sa Ginoo sa tumang kaguol sa akong kalag, ‘ Akong Dios! Akong Dios! “Nganong gibiyaan mo man kining pamilyaha?” Usa ka tingog ang mitubag, ‘Gikuha ko sila ngari kanako aron makapahulay sila sa mga pag-antus niini nga kalibutan.’ Gidala si Emma balik sa iyang kwarto nga halos walay umoy. Ang iyang kinamagulangang anak nga lalaki miduol sa patayng lawas ug miluhod, ug [midap-ig] sa iyang aping ngadto sa aping sa iyang amahan; dayon mihalok kaniya, misinggit siya, ‘Oh, akong amahan! akong amahan!!’” (Lucy Mack Smith, “Lucy Mack Smith, History, 1845,” mga pahina 312–13, josephsmithpapers.org).

2. Ang miyembro sa Simbahan nga si Warren Foote mirekord sa mosunod:

Warren Foote

“Si Elihu Allen ug ako nagtrabaho sa anihanan nga umahan nga namutol sa iyang mga trigo sa dihang sa mga alas tres sa hapon ang akong asawa migawas ug misulti kanamo sa balita nga si Joseph Smith ug ang iyang Igsoon, si Hyrum gipusil didto sa Bilanggoan sa Carthage kagahapon sa hapon. Miingon dayon ko ‘nga dili kana mahitabo.’ … Mibati kaming tanan nga daw nakabuntog ang gahum sa kangitngit ug nga ang Ginoo misalikway sa Iyang katawhan. Ang among propeta ug patriyarka wala na. Kinsa man karon ang mangulo sa mga Santos?” (Warren Foote, Kasaysayan sa kaugalingong kinabuhi ug mga journal, 1837–1903, 29, Church History Library, Siyudad sa Salt Lake).

3. Ang mga Apostoles nga si Brigham Young ug Wilford Woodruff didto sa Boston, Massachusetts, sa adlaw sa pagkamartir. Nahinumdom si Wilford Woodruff nga siya ug si Brigham Young parehong nakasinati og pagbati nga “nasanapan og panganod sa kangitngit ug kasubo,” bisan tuod wala sila makasabut ngano hangtud nga milabay ang pipila ka semana, sa dihang ilang nasayran nga si Joseph ug Hyrum Smith gipatay (Wilford Woodruff, “The Keys of the Kingdom,” Millennial Star, Sept. 2, 1889, 545).

• Kon naapil kamo sa nag-unang mga Santos niining higayona, unsa kaha nga mga hunahuna o mga pagbati ang anaa kaninyo human madawat ang balita nga si Joseph ug Hyrum Smith gipamatay? Ngano?

Dapita ang usa ka estudyante sa pagbasa og kusog sa reaksyon ni Presidente Brigham Young (1801–77) sa dihang nadawat niya ang balita nga gipatay ang Propeta:

Brigham Young

“Sa dihang nadawat namo kadto nga sulat, didto si Orson Pratt ug ako ug mibasa kami sa sulat. Gibati nako niadto ang wala pa gayud nako mabati sa akong kinabuhi. … Hilabihan ka sakit ang akong ulo nga nagtuo [ko] nga moliki kini. … Wala na ba ang Pagkapari sa yuta? Si Joseph ug Hyrum Smith wala na. [Dayon] kalit kini nga miabut sa akong hunahuna. Miabut kini kanako sama sa Pagpadayag—ang mga yawe sa gingharian ania dinhi” (Brigham Young, sa Historian’s Office general Church minutes, Peb. 12, 1849, 2, Church History Library, Siyudad sa Salt Lake).

• Unsa ang nakahatag og kahupayan kang Brigham Young human siya makahibalo sa kamatayon ni Joseph Smith?

Ipakita ang mosunod nga mga pamahayag ni Propeta Joseph Smith (1805–44) ug ni Presidente Boyd K. Packer (1924–2015) sa Korum sa Napulog Duha ka mga Apostoles, ug dapita ang usa ka estudyante sa pagbasa og kusog sa matag pamahayag. Hangyoa ang klase sa pagsunod, nga mangita kon unsa ang gitudlo sa Propeta ug ni Presidente Packer mahitungod sa mga yawe sa gingharian sa Dios. (Sa dili pa basahon ang pamahayag ni Joseph Smith, ipasabut nga gihimo niya kini nga pamahayag ngadto sa mga sakop sa Korum sa Napulog Duha niadtong tingpamulak sa 1844.)

Joseph Smith

“Kaigsoonan, ang Ginoo miingon kanako nga dalion ang buluhaton diin kita nahiapil. … Ang pipila sa importante nga mga talan-awon duol na nga mahitabo. Basin tingali ang akong mga kaaway mopatay kanako. Ug kon ugaling buhaton gayud nila, ug ang mga yawe ug gahum nga ania kanako dili mahatag diha kaninyo, mawala kini sa kalibutan. Apan kon magmalampuson man ako sa pagbutang niini diha sa inyong mga ulo, diha mahimo na akong mahulog nga usa ka biktima ngadto sa mamumuno nga mga kamot kon itugot na kini sa Dios, ug makabiya ako uban sa tanang kalipay ug katagbawan, sa kasayuran nga ang akong buluhaton natuman na, ug ang pundasyon natukod diin ang gingharian sa Dios pagatukuron niini nga dispensasyon sa kahingpitan sa panahon.

“Diha sa mga abaga sa Napulog Duha kinahanglan ang responsibilidad sa pagpangulo sa simbahan anaa dayon mopatong hangtud nga kamo mopili og lain nga mosunod kaninyo” (gikutlo diha sa Mga Pagtulun-an sa mga Presidente sa Simbahan: Joseph Smith [2007], 646–47).

Boyd K. Packer

“Isip mga indibidwal ug isip usa ka grupo, ang Napulog Duha naghupot sa mga yawe” (Boyd K. Packer, “The Shield of Faith,” Ensign, Mayo 1995, 7).

• Base niini nga mga pamahayag, unsa nga kamatuoran ang atong makat-unan mahitungod sa awtoridad niadtong giordinahan isip mga Apostoles? (Ang mga estudyante kinahanglang moila sa mosunod nga kamatuoran: Ang mga Apostoles naghupot sa tanang mga yawe sa pagkapari nga gikinahanglan aron sa pagpangulo sa Simbahan. [Tan-awa usab sa D&P 27:12–13; 112:30–32.])

• Nganong importante man nga ang matag sakop sa Napulog Duha makadawat sa tanang yawe sa gingharian sa Dios nga gikinahanglan sa pagpangulo sa Simbahan sa dihang siya i-orden isip Apostol?

Dapita ang usa ka estudyante sa pagbasa og kusog sa mosunod nga instruksyon gikan sa kasaysayan ni Propeta Joseph Smith:

“Ang Napulog Duha dili ubos ni bisan kinsa gawas sa unang kapangulohan, … ug kon wala na ako, walay unang kapangulohan; nga modumala sa napulog duha” (Manuscript History of the Church, vol. B-1, p. 691, josephsmithpapers.org).

• Unsa ang atong makat-onan gikan niini nga pamahayag kon unsa ang mahitabo sa Unang Kapangulohan kon ang Presidente sa Simbahan mamatay?

Ang mga miyembro sa Simbahan mipaluyo sa Korum sa Napulog Duha ka mga Apostoles nga mangulo sa Simbahan

Ipasabut nga human sa kamatayon ni Joseph Smith adunay kalibug taliwala sa mga Santos kon kinsa ang mangulo sa Simbahan.

Bahina ang klase ngadto sa mga grupo nga adunay duha ngadto sa upat ka estudyante, ug hatagi ang matag estudyante og kopya sa giandam nga handout, “Importante nga mga Higayon Padulong sa Pagpuli sa Pagpangulo sa Simbahan.” Hangyoa ang mga grupo nga magdungan sa pagbasa sa handout, mangita sa pipila ka mga panghitabo nga nahitabo sa wala pa mapulihi ang pagpangulo sa Simbahan. Dapita sila nga hisgutan usab ang ilang mga tubag sa mga pangutana nga anaa sa handout.

Importante nga mga Higayon Padulong sa Pagpuli sa Pagpangulo sa Simbahan

Sidney Rigdon

Sidney Rigdon

Agosto 3, 1844. Si Sidney Rigdon miabut sa Nauvoo. Didto siya sa Pennsylvania aron mangandam alang sa kampanya sa pagka-presidente ni Joseph Smith sa dihang nakahibalo siya sa kamatayon ni Joseph Smith. Sa adlaw human sa iyang pag-abut, si Sidney mitanyag sa publiko nga mangulo sa Simbahan isip “magbalantay” sa pagkawala ni Joseph.

Agosto 5, 1844. Si James J. Strang, mga lima ka bulan nga kinabig, namulong sa pundok sa mga Santos didto sa Florence, Michigan. Panahon sa miting, si James mipresentar og tinumo-tumo nga sulat nga giangkon niya nga gisulat ni Joseph Smith, nga nag-ila kang James isip puli sa Propeta.

Agosto 6, 1844. Si Elder Brigham Young, Heber C. Kimball, Lyman Wight, Orson Pratt, ug Wilford Woodruff sa Korum sa Napulog Duha ka mga Apostoles miabut sa Nauvoo gikan sa ilang mga misyon sa silangang bahin sa Estados Unidos.

Agosto 7, 1844. Ang mga lider sa Simbahan nag-abut sa Nauvoo. Si Sidney Rigdon, kinsa nahimo nga usa ka magtatambag ni Joseph sa Unang Kapangulohan, namulong sa grupo. Si Sidney nangangkon nga nakakita siya og panan-awon ug nga “walay tawo nga makapuli ni Joseph”, apan misugyot siya nga mahimo siyang “magbalantay” sa Simbahan (sa “History of Joseph Smith,” Millennial Star, Abr. 4, 1863, 215).

Si Brigham Young, kinsa nangulo sa Napulog Duha, namulong usab og kadiyot, nag-ingon:

Brigham Young

“Wala koy panginlabot kon si kinsa ang mangulo sa Simbahan, … apan usa ka butang ang kinahanglan nakong mahibaloan, ug kana kon unsay gisulti sa Dios mahitungod niini. … Si Joseph mitugyan dinhi sa among mga ulo sa tanang mga yawe ug mga gahum nga konektado sa pagka-apostol diin gihuptan niya mismo sa wala pa siya kuhaa, ug walay tawo o pundok sa katawhan nga makaharang tali ni Joseph ug sa Napulog Duha niini nga kalibutan o sa kalibutan nga moabut” (Brigham Young, sa Manuscript History of the Church, vol. F-1, p. 296, josephsmithpapers.org).

• Unsa kaha ang inyong reaksyon ngadto niini nga mga panghitabo kon miyembro kamo sa Simbahan atol niining panahona?

• Sa unsang paagi ang pagkasayud nga gitugyan ni Joseph Smith ang mga yawe sa gingharian ngadto sa mga sakop sa Korum sa Napulog Duha ka mga Apostoles nakatabang sa mga Santos nga makasabut sa kabubut-on sa Dios niining butanga?

Handout: Importante nga mga Higayon Padulong sa Pagpuli sa Pagpangulo sa Simbahan

Human sa igong panahon, dapita ang pipila ka mga estudyante sa pagpaambit sa ilang mga tubag sa mga pangutana diha sa handout.

Isulat diha sa pisara ang mosunod nga petsa: Agosto 8, 1844.

Ipasabut nga sa buntag sa Agosto 8, 1844, si Sidney Rigdon namulong ngadto sa pundok sa liboan ka mga Santos ug sa makausa pa mitanyag nga mahimo siyang magbalantay sa Simbahan. Wala madugay nianang adlawa, usa ka espesyal nga komperensya ang gipahigayon diin si Brigham Young namulong sa mga Santos sa sobra sa usa ka oras.

Dapita ang usa ka estudyante sa pagbasa og kusog sa mosunod nga kinutlo gikan sa pakigpulong ni Brigham Young sa komperensya:

Brigham Young

“Daghan na ang nasulti mahitungod ni Presidente Rigdon nga mao ang Presidente sa Simbahan ug mangulo sa katawhan, isip mao ang pangulo. … “Kon gusto sa mga tawo nga si Presidente Rigdon ang mangulo kanila, mahimo silang mosunod kaniya; apan moingon ko kaninyo nga ang Korum sa Napulog Duha mao ang naghupot sa mga yawe sa Gingharian sa Dios sa tibuok kalibutan. Ang Napulog Duha mga tinudlo sa Dios” (Brigham Young, sa Manuscript History of the Church, vol. F-1, p. 298, josephsmithpapers.org).

• Base sa inyong pagbasa sa kapitulo 45 sa Mga Santos: Volume 1, unsa ang nasinati sa daghang mga miyembro sa Simbahan samtang nagtan-aw ug naminaw sila nga namulong si Brigham Young? (Daghan sa mga Santos ang nakadawat og espirituhanong mga pagpakita nga si Brigham Young, Presidente sa Korum sa Napulog Duha ka mga Apostoles, gitawag sa Dios aron mangulo sa Simbahan. Ang uban sa kaulahian mireport nga dunay higayon nga si Brigham Young daw susama ni Joseph Smith sa panagway, pinulongan, ug linihokan.)

Dapita ang duha ka estudyante sa pagbasa og kusog sa mosunod nga mga istorya sa mga miyembro sa Simbahan nga si Emily Smith Hoyt ug Presidente George Q. Cannon (1827–1901), kinsa sa kadugayan miserbisyo sa Unang Kapangulohan. Hangyoa ang klase sa pagpaminaw kon giunsa niining mga indibidwal sa paghulagway kon unsay nahitabo samtang si Presidente Brigham Young namulong sa mga Santos.

“Ang paagi sa pagpangatarungan, ang ekspresyon sa nawong, ang tono sa tingog nakalipay sa tibuok nakong kalag. Ang akong kaugalingong mga mata nakakita sa gipatay nga lawas ni Joseph. Ang akong kaugalingong mga kamot, nakabatyag sa iyang bugnaw, patay nga lawas. Nasayud ko nga patay na si Joseph. Apan nakugang ako kanunay ug wala tuyoa nga motan-aw sa pulpito aron makita kon dili ba kadto si Joseph. Dili gayud, si Brigham Young kadto ug kon adunay magduhaduha sa katungod ni Brigham sa pagdumala sa mga responsibilidad alang sa mga Santos, ang ako lamang masulti kanila mao kini. Angkona ang espiritu sa Dios ug sayri sa inyong kaugalingon. Ang Ginoo mosangkap alang sa iyang kaugalingon” (Emily Smith Hoyt, sa Lynne Watkins Jorgensen ug BYU Studies Staff, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, nu. 4 [1996–97], 164).

George Q. Cannon

“Si Brigham Young … mibarug ug namulong sa katawhan. … Kadtong nanambong niana nga okasyon dili gayud makalimot sa impresyon nga miabut kanila! Kon si Joseph nabuhi gikan sa pagkamatay ug namulong pag-usab kanila, ang hitabo dili unta kaayo hilabihan nga ikatingala kay sa nahitabo ngadto sa daghan nga mitambong niadto nga miting. Tingog gayud kadto ni Joseph mismo; ug dili lang kadto nga tingog ni Joseph ang nadungog; apan sa panan-aw sa mga tawo ang tawo nga nagbarug sa ilang atubangan daw mao gayud si Joseph. Wala nay laing nadungog nga talagsaon ug milagrusong hitabo kay sa nahitabo nianang adlawa sa presensya niana nga kongregasyon. Ang Ginoo mihatag sa Iyang katawhan og usa ka pagpamatuod diin walay luna nga gibilin alang sa pagduha-duha kon si kinsa ang tawo nga Iyang gipili nga mangulo kanila. Nakita nila ug nadungog sa ilang natural nga mga mata ug dalunggan, ug dayon ang mga pulong nga gilitok miabut, inubanan sa makadani nga gahum sa Dios, ngadto sa ilang kasingkasing, ug napuno sila sa Espiritu ug hilabihang kalipay. Adunay kasubo, ug tingali sa ubang kasingkasing, pagduha-duha ug kawalay kasiguroan; apan karon klaro sa tanan nga ania ang tawo nga gitugyanan sa Ginoo sa gikinahanglang awtoridad aron molihok sa ilang taliwala isip puli ni Joseph” (George Q. Cannon, “Joseph Smith, the Prophet,” Juvenile Instructor, Okt. 29, 1870, 174–75).

• Unsa man ang mahinungdanon kaninyo niining duha ka istorya?

Ipasabut nga pagkahuman sa pakigpulong ni Brigham Young sa miting niadtong Agosto 8, 1844, mihangyo siya og botasyon. Ang mga Santos mipaluyo sa Korum sa Napulog Duha ka mga Apostoles, nga si Brigham Young ang presidente niini, isip ang nagdumala nga grupo sa Simbahan. Ang Simbahan miuswag ubos sa pagpangulo ug direksyon sa Napulog Duha sulod sa sobra tulo ka tuig hangtud nga ang Unang Kapangulohan giorganisar pag-usab ug si Brigham Young gipaluyohan isip Presidente sa Simbahan niadtong Disyembre 1847.

Dapita ang usa ka estudyante sa pagbasa og kusog sa Moroni 10:5. Hangyoa ang klase sa pagsunod ug pagkonsiderar kon sa unsang paagi kini nga bersikulo makatabang sa usa ka tawo kinsa nagtinguha og pagpamatuod nga kadtong nangulo sa Simbahan gitawag sa Dios.

• Sa unsang paagi kaha ang pagtulun-an ni Moroni niini nga bersikulo makatabang sa usa ka tawo kinsa nagtinguha og pagpamatuod nga kadtong nangulo sa Simbahan gitawag sa Dios? (Human makatubag ang mga estudyante, isulat ang mosunod nga baruganan diha sa pisara: Pinaagi sa Espiritu Santo, makadawat kita og pagpamatuod nga kadtong nangulo sa Simbahan gitawag sa Dios.)

• Ngano kaha nga importante nga ang matag usa kanato makaangkon og pagpamatuod nga ang Simbahan gipangulohan karon niadtong gitawag sa Dios?

Hatagi og panahon ang mga estudyante nga maghunahuna

Kon mangutana ka, hatagi og panahon ang mga estudyante sa paghunahuna mahitungod sa ilang mga tubag. Ang epektibo nga mga pangutana sa kasagaran mosangput sa paghunahuna ug pagpamalandong, ug ang mga estudyante mahimong magkinahanglan og panahon sa paghan-ay og makahuluganong mga tubag.

• Kanus-a kamo nakadawat og pagsaksi gikan sa Espiritu Santo nga kadtong nangulo sa Simbahan sa atong panahon gitawag sa Dios?

Ipamatuod nga kadtong migiya ug karon naggiya sa Ang Simbahan ni Jesukristo sa mga Santos sa Ulahing mga Adlaw gitawag sa Dios. Awhaga ang mga estudyante sa pag-angkon o paglig-on sa ilang pagpamatuod niini nga kamatuoran.

Dapita ang mga estudyante nga mangandam alang sa katapusang klase niini nga kurso pinaagi sa pagbasa sa kapitulo 46 sa Mga Santos: Volume 1.

Dugang nga Ideya sa Pagtudlo

Ang balaanong gitakda nga sundanan sa pagpuli sa pagpangulo sa Simbahan

Kon ang mga estudyante adunay mga pangutana mahitungod sa sundanan sa pagpuli sa pagpangulo sa Simbahan, mahimo nimong dapiton ang usa ka estudyante sa pagbasa og kusog sa mosunod nga pamahayag nga gipagawas sa Unang Kapangulohan niadtong Enero 2018:

“Kon ang Presidente sa Simbahan mamatay, ang Unang Kapangulohan awtomatik nga mabungkag. Ang kalalakin-an nga kanhi nagserbisyo isip mga magtatambag mobalik sa ilang mga pwesto sa Korum sa Napulog Duha ka mga Apostoles, ug kana nga korum mopadayon nga mamuno sa Simbahan, nga diin ang senior nga Apostol ang nangulo. Sa dili madugay human sa kamatayon sa Presidente sa Simbahan, ang mga sakop sa Korum sa Napulog Duha managtigom diha sa templo sa pagkonsiderar sa pagporma og usab sa Unang Kapangulohan. Sa tibuok natong kasaysayan, ang senior nga Apostol kanunayng maoy mosunod nga Presidente sa Simbahan. …

“Ang bag-ong Presidente i-set apart sa Apostol nga sunod sa senioridad [gidugayon sa pagka Apostol], apilan sa tanang sakop sa korum pinaagi sa pagpandong sa mga kamot. Giniyahan sa balaan nga inspirasyon nga iyang madawat, ang Presidente moplili sa iyang mga magtatambag ug dayon, uban sa laing mga Apostoles, i-set apart sila. Human maorganisar pag-usab ang Unang Kapangulohan, ang Apostol nga ikaduhang labing dugay nga nagserbisyo i-set apart isip Presidente sa Korum sa Napulog Duha. Kon ang ikaduhang pinakadugay nang nagserbisyo nga Apostol matawag ngadto sa Unang Kapangulohan, ang Apostol nga sunod sa senioridad mao ang itudlo nga Akting nga Presidente sa Napulog Duha” (D. Todd Christofferson, “Usa Ka Mensahe gikan sa Unang Kapangulohan” [sibya sa pagpaila sa bag-ong Unang Kapangulohan, Ene. 16, 2018], ChurchofJesusChrist.org).

• Sa unsang paagi ang pagsabut niining balaanong dinasig nga proseso makatabang sa mga miyembro sa Simbahan sa paglikay sa kalibug kon mamatay ang Presidente sa Simbahan?

Mahimo nimong ipasabut nga ang Unang Kapangulohan dili kanunay nga maorganisar pag-usab diha-diha dayon human sa kamatayon sa Presidente sa Simbahan. Sama pananglit, human sa pagkamatay ni Propeta Joseph Smith, ang Korum sa Napulog Duha ka mga Apostoles nangulo sa Simbahan sulod sa tulo ug tunga ka tuig sa wala pa maorganisar pag-usab ang Unang Kapangulohan. Sa samang paagi, ang Napulog Duha nangulo sa Simbahan sa sobra og gamay sa tulo ka tuig human sa pagkamatay ni Presidente Brigham Young ug sa dul-an duha ka tuig human sa pagkamatay ni Presidente John Taylor. Hinoon, dihang si Presidente Wilford Woodruff namatay niadtong Septyembre 2, 1898, ang Ginoo midasig ni Lorenzo Snow ug sa ubang mga sakop sa Napulog Duha nga i-organisar pag-usab ang Unang Kapangulohan paglabay lamang sa 11 ka adlaw, niadtong Septyembre 13 (tan-awa sa George Q. Cannon, “Remarks,” Deseret Weekly, Okt. 8, 1898, 514). Sukad nianang panahona, ang Korum sa Napulog Duha ka mga Apostoles nangulo sa Simbahan kasagaran sa mubo lamang nga panahon sa dili pa ma-set apart ang bag-ong Presidente sa Simbahan ug maorganisar pag-usab ang Unang Kapangulohan.

Handout: Importante nga mga Higayon Padulong sa Pagpuli sa Pagpangulo sa Simbahan