Leksyon 9

Mga Pinadayag ug mga Pagpanglutos didto sa Ohio

Pasiuna ug Han-ay sa mga Panghitabo [Timeline]

Mibalik si Propeta Joseph Smith gikan sa Missouri ngadto sa Kirtland, Ohio, pagka-Agosto 1831. Pagka-Oktubre 1831, si Ezra Booth misugod sa pagmantala og mga sulat nga nanaway sa Propeta ug sa Simbahan. Panahon sa usa ka komperensya sa Simbahan nga gipahigayon sa Hiram, Ohio, pagka-Nobyembre 1831, si Joseph Smith ug ang ubang mga elder sa Simbahan naghisgot og mga plano sa pagmantala og usa ka libro nga gitawag nga Basahon sa mga Sugo, nga langkuban sa mga pinadayag nga gihatag sa Ginoo ngadto sa Propeta hangtud nianang panahona. Pagka-Pebrero 1832, samtang si Joseph Smith ug Sidney Rigdon padayon nga nagtrabaho sa paghubad sa Biblia, aduna silay panan-awon sa Langitnong Amahan, si Jesukristo, ug sa tulo ka gingharian sa himaya (tan-awa sa D&P 76). Mga usa ka bulan human niana, si Joseph ug Sidney bangis nga giataki, gibunalan, gibubuan og alkitran ug gipapilitan og mga balahibo sa panon sa mga manggugubot.

Oktubre 13, 1831Si Ezra Booth misugod sa pagmantala og mga sulat nga nanaway sa Propeta ug sa Simbahan.

Nobyembre 1–2, 1831Sa usa ka komperensya sa Simbahan, si Joseph Smith ug ang ubang mga elder sa Simbahan naghisgot og mga plano sa pagmantala sa Basahon sa mga Sugo.

Pebrero 16, 1832Si Joseph Smith ug Sidney Rigdon nakadawat og panan-awon sa Langitnong Amahan, ni Jesukristo, ug sa tulo ka gingharian sa himaya (tan-awa sa D&P 76).

Marso 24–25, 1832Si Joseph Smith ug Sidney Rigdon gipapilitan og alkitran ug mga balahibo sa masuk-anong panon sa mga manggugubot sa pagkatungang gabii.

Mga Basahunon sa Estudyante

Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018), mga kapitulo 13–14

Mga Sugyot alang sa Pagtudlo

Tabangi ang mga estudyante nga makaangkon og espirituhanong kahibalo

“Misaad ang Dios nga ipadayag ang kamatuoran diha sa atong mga hunahuna ug kasingkasing pinaagi sa Espiritu Santo kon makugihon kitang magtinguha Kaniya (tan-awa sa D&P 8:2–3). … Ang Langitnong Amahan mitudlo kanato unsaon sa pag-angkon og espirituhanong kahibalo. …Ang mosunod nga tulo ka baruganan makagiya kanato samtang magtinguha kita sa pagkat-on ug pagsabut og mahangturong kamatuoran ug sa pagsulbad sa mga pangutana o mga isyu: [1] Lihok uban sa pagtuo. [2] Susiha ang mga konsepto ug mga pangutana gamit ang mahangturong panglantaw. [3] Pagtinguha og dugang nga pagsabut pinaagi sa balaanong gitudlo nga mga tinubdan” (Doctrinal Mastery Core Document [2018], 3–4). Tabangi ang mga estudyante nga makasabut niini nga mga baruganan sa tibuok kurso pinaagi sa pagpakita niini diha sa imong pagtudlo.

Si Joseph Smith mibalik sa Ohio ug mipahigayon og usa ka komperensya aron hisgutan ang pagmantala sa mga pinadayag nga iyang nadawat

Ipangutana ang mosunod:

• Unsay inyong isulti aron matabangan ang usa ka tawo kinsa mibati og kasagmuyo human mahibalo sa mga kahuyang ni Joseph Smith o adunay mga pangutana mahitungod sa pipila sa iyang mga pagtulun-an?

Dapita ang mga estudyante sa pagpangita og mga kamatuoran panahon sa leksyon karong adlawa nga makatabang kon sila o ang ilang mga kaila adunay mga pangutana mahitungod sa mga pagtulun-an o binuhatan ni Joseph Smith ug ubang mga propeta sa Dios.

Pahinumdumi ang mga estudyante nga pagka-Hunyo 1831, ang Ginoo misugo ni Propeta Joseph Smith sa pag-adto sa Missouri, diin ang dapit sa dakbayan sa Zion ipadayag (tan-awa sa D&P 52:3–4). Pipila ka mga miyembro sa Simbahan—lakip ni Bishop Edward Partridge ug Ezra Booth—nanghinaway ni Joseph Smith ug sa mga instruksyon sa Ginoo mahitungod sa yuta sa Zion. Sa pipila ka okasyon, ang mga panaglalis miresulta sa panag-away tali sa pipila niining mga kalalakin-an ug sa Propeta (tan-awa sa D&P 64:1–7; tan-awa usab sa The Joseph Smith Papers, Documents, Volume 2: July 1831–January 1833, ed. Matthew C. Godfrey ug uban [2013], 61–62).

Dapita ang usa ka estudyante sa pagbasa og kusog sa mosunod nga parapo:

“Wala madugay human sa iyang pagbalik ngadto sa Ohio, si Ezra Booth mibiya sa Simbahan sa dayag kaayo nga paagi. Tungod kay ang iyang kasinatian wala motakdo sa iyang mga gilauman kon sa unsa angay tan-awon ang Zion o kon unsa angay ang linihokan ni Joseph Smith, nahuyang una ang iyang pagtuo ug dayon mibiya sa iyang pagtuo. Sugod niana nga Oktubre, ang Ohio Star, usa ka pamantalaan nga nahimutang sa Ravenna, Ohio, misugod sa pagmantala og nagsunod-sunod nga mga sulat nga gihimo ni Booth, nga hilabihan nga nanaway kang Joseph Smith ug sa Simbahan” (Matthew McBride, “Ezra Booth and Isaac Morley,” sa Revelations in Context, ed. Matthew McBride ug James Goldberg [2016], 134, o history.ChurchofJesusChrist.org).

• Base sa inyong pagbasa sa kapitulo 13 sa Mga Santos: Volume 1, sa unsang paagi ang gimantala nga mga sulat ni Ezra Booth nakatampo sa desisyon sa mga lider sa Simbahan sa pagmantala sa mga pinadayag sa Ginoo?

Kon gikinahanglan, ipasabut nga sa usa sa mga sulat nga gimantala ni Ezra Booth, giakusahan niya si Joseph Smith nga “mihimo og sayop nga mga panagna ug mitago sa iyang mga pagpadayag gikan sa publiko” (Mga Santos: Volume 1, 141). Aron tingali mapanghimakak kini nga pangangkon ug aron matubag ang mga hangyo sa mga miyembro sa Simbahan kinsa matinguhaon sa pagtuon sa mga pinadayag, “misugyot si Joseph nga imantala ang mga pinadayag diha sa usa ka basahon” (Mga Santos: Volume 1, 141).

Ipakita ang giandam nga hulagway, ug ipasabut nga usa kini ka hulagway sa panimalay ni John ug Elsa Johnson sa Hiram, Ohio, mga kwarentay otso ka kilometro sa habagatang silangan sa Kirtland.

Ipasabut nga sa dihang si Joseph Smith mibalik gikan sa Missouri, siya ug ang iyang pamilya mipuyo niini nga balay isip mga bisita sa mga Johnson. Sa sayong bahin sa Nobyembre 1831 mipahigayon si Joseph Smith og komperensya sa mga elder sa panimalay sa mga Johnson aron hisgutan ang pagmantala sa mga pinadayag. Usa sa mga elder nga nanambong mao si William E. McLellin.

Ipakita ang giandam nga hulagway ni William E. McLellin.

• Base sa inyong pagbasa sa kapitulo 13 sa Mga Santos: Volume 1, sa unsang paagi nahibaloan ni William McLellin ang katinuod sa gipahiuli nga ebanghelyo ug sa balaanong tawag ni Propeta Joseph Smith? (Si William nagtuon ug nag-ampo mahitungod sa Basahon ni Mormon ug nakadawat og pagpamatuod sa katinuod niini. Wala madugay, pinaagi sa usa ka pagpadayag ngadto ni Propeta Joseph Smith, ang Ginoo mihatag sa mga tubag sa lima ka pangutana nga pribadong gipangutana ni William sa Ginoo [tan-awa sa D&P 66, ulohan sa seksyon]. Kini nga kasinatian dugang nga milig-on sa pagpamatuod ni William.)

Pahinumdumi ang mga estudyante nga bisan tuod si William McLellin ug ang uban nga mitambong sa miting nakadawat og mga pagpamatuod nga ang Dios namulong pinaagi ni Propeta Joseph Smith, adunay managlahing opinyon mahitungod sa pagmantala sa mga pinadayag.

Hangyoa ang mga estudyante sa pagpakli ngadto sa kapitulo 13 sa Mga Santos: Volume 1. Dapita ang pipila ka estudyante nga magpuli-puli sa pagbasa og kusog gikan sa pahina 161, mosugod sa parapo nga nagsugod og “Ang konseho naghisgot niini nga butang …” ug motapos sa parapo diha sa pahina 162 nga nagsugod og “Human mamulong si Joseph …” Hangyoa ang klase sa pagpangita sa unsay nahitabo atol sa miting.

Ipasabut nga ang pasiuna sa Ginoo narekord karon diha sa seksyon 1 sa Doktrina ug mga Pakigsaad.

• Sumala sa kahimtang sa komperensya, unsa kaimportante ang deklarasyon sa Ginoo nga “bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38)?

• Nganong nagduha-duha man ang pipila sa mga elder sa pagpamatuod sa katinuod sa mga pinadayag?

Hangyoa ang mga estudyante nga magpares o moporma og gagmay nga mga grupo, ug hatagi ang matag estudyante og kopya sa giandam nga handout, “‘Usa ka Pagpamatuod sa Kamatuoran Niini nga mga Sugo’ (D&P 67:4).” Dapita sila sa pagsunod sa mga instruksyon diha sa handout ug sa paghisgot sa ilang mga tubag sa mga pangutana nga anaa sa handout.

“Usa ka Pagpamatuod sa Kamatuoran Niini nga mga Sugo” (D&P 67:4)

Basaha og dungan ang Doktrina ug mga Pakigsaad 67:4–9, nga mangita kon giunsa sa Ginoo pagtubag ang kabalaka sa mga elder mahitungod sa mga pinadayag nga nadawat ni Propeta Joseph Smith.

• Sumala sa bersikulo 5, unsa man ang gitutokan sa mga elder? Sa unsang paagi kini nakaapekto sa paagi sa ilang pagtan-aw sa mga pinadayag nga nadawat sa Propeta?

• Unsa ang giawhag sa Ginoo nga buhaton sa mga elder?

Basaha ang mosunod nga pamahayag gikan sa kasaysayan ni Joseph Smith mahitungod sa unsay nahitabo human nadawat ni Joseph ang pinadayag nga narekord diha sa Doktrina ug mga Pakigsaad 67:

“Si [William] E. McLellin, kinsa naghunahuna nga siya ang labing maalamong tawo, edukado apan kulang sa sagad nga panabut, naningkamot sa pagsulat og usa ka sugo nga sama niadtong usa sa labing ubos sa Ginoo, apan napakyas; dako kaayo nga responsibilidad nga mosulat ubos sa ngalan sa Ginoo. Ang mga elder, ug tanan nga anaa, nga nakasaksi niining napakyas nga pagsulay sa usa ka tawo sa pagsunod sa pinulongan ni Jesukristo, mibag-o sa ilang pagtuo sa kahingpitan sa ebanghelyo, ug sa kamatuoran sa mga sugo ug mga pinadayag nga gihatag sa Ginoo ngadto sa simbahan pinaagi sa akong pagkahiman; ug ang mga elder mipadayag og kaandam sa pagpamatuod sa kamatuoran niini ngadto sa tibuok kalibutan” (Manuscript History of the Church, vol. A-1, p. 162, josephsmithpapers.org).

• Sa unsang paagi ang pagtuo niini nga mga kamatuoran makatabang kanato sa pagpakita og mas dakong pagtuo diha sa mga pulong sa buhing mga propeta?

Human sa igong panahon, hangyoa ang mga estudyante sa pag-report sa mga kamatuoran nga ilang nahibaloan. Human sila motubag, isulat sa pisara ang mosunod nga kamatuoran: Ang Dios mopadayag sa kamatuoran pinaagi sa Iyang mga propeta bisan pa sa ilang mga kahuyang ug mga kasaypanan.

Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–44). Sa dili pa basahon ang pamahayag, ipasabut nga ang Propeta mihimo niini nga deklarasyon mga unom ka semana sa wala pa siya mamatay.

“Wala gayud ako moingon kaninyo nga perpekto ako; apan walay sayop sa mga pinadayag nga akong gipanudlo” (Mga Pagtulun-an sa mga Presidente sa Simbahan: Joseph Smith [2007], 632).

• Sa unsang mga paagi nga kini nga pagpamatuod ni Propeta Joseph Smith makahuluganon kaninyo?

Dapita ang pipila ka mga estudyante sa pagpaambit sa ilang mga pagpamatuod sa kamatuoran nga nasulat diha sa pisara. Mahimo ka usab nga mopaambit sa imong pagpamatuod kabahin niini nga kamatuoran.

Samtang mipadayon si Joseph Smith ug Sidney Rigdon sa paghubad sa Biblia, nakadawat sila og panan-awon sa Langitnong Amahan, ni Jesukristo, ug sa tulo ka ang-ang sa himaya

Ipasabut nga si Joseph Smith ug Sidney Rigdon mipadayon sa paghubad sa Bag-ong Tugon samtang nagpuyo sa panimalay ni John ug Elsa Johnson sa Hiram, Ohio. Samtang nagtrabaho sila, natataw nga “daghang mga importanting mga kasayuran mahitungod sa kaluwasan sa tawo natangtang gikan sa Biblia, o nawala sa wala pa kini mahugpong nga libro” (Mga Pagtulun-an: Joseph Smith, 259). Samtang namalandong sa mga kausaban nga nadasig sila sa paghimo diha sa Juan 5:29 kalabut sa doktrina sa pagkabanhaw, si Joseph Smith ug Sidney Rigdon nakadawat og talagsaong panan-awon nga narekord diha sa Doktrina ug mga Pakigsaad 76 (tan-awa sa D&P 76:15–19).

Pakit-a ang mga estudyante sa giandam nga hulagway sa usa ka lawak sa balay sa mga Johnson. Ipasabut nga dinhi nadawat ang pinadayag nga narekord diha sa Doktrina ug mga Pakigsaad 76.

Dapita ang usa ka estudyante sa pagbasa og kusog sa mosunod nga istorya sa miyembro sa Simbahan nga si Philo Dibble:

“Sa panahon nga si Joseph ug Sidney ubos sa gahum sa espiritu ug nakakita nga ang kalangitan naabli, dihay ubang mga tawo sa lawak, tingali napulog duha, diin naapil ako atol sa usa ka bahin sa panahon—tingali mga duha sa tulo ka bahin,—akong nakita ang himaya ug gibati ang gahum, apan wala makakita sa panan-awon. …

“Si Joseph, matag karon ug unya, moingon: ‘Unsay akong nakita?’ … Dayon iyang isulti unsay iyang nakita o unsay iyang gitan-aw. Dayon mitubag si Sidney, ‘Parehas ang akong nakita.’ Pagkahuman si Sidney moingon ‘unsay akong nakita?’ ug mosulti sa unsay iyang nakit-an o gitan-aw, ug motubag si Joseph, ‘Parehas ang akong nakita.’ …

“Si Joseph naglingkod nga walay lihok ug malinawon sa tibuok panahon taliwala sa halangdong himaya, apan si Sidney naglingkod nga walay umoy ug luspad, morag sama ka luyluy sa trapo, diin sa pagkakita niini, miingon si Joseph, nga nagpahiyom, ‘Dili anad si Sidney niini nga sama kanako’” (Philo Dibble, sa “Recollections of the Prophet Joseph Smith,” Juvenile Instructor, Mayo 1892, 303–4).

• Unsa ang labing impresibo alang kaninyo niini nga istorya?

• Base sa inyong pagbasa sa kapitulo 14 sa Mga Santos: Volume 1, sa unsang paagi ang mga kamatuoran nga gipadayag diha sa panan-awon lahi sa tradisyunal nga mga tinuohan mahitungod sa langit ug impyerno? (Diha sa panan-awon, ang Ginoo mipadayag nga ang tanang mga tawo gawas sa mga anak sa kapildihan sa katapusan maluwas diha sa usa ka gingharian sa himaya [tan-awa sa D&P 76:30–38, 43–44].)

Dapita ang usa ka estudyante sa pagbasa og kusog sa mosunod nga pamahayag ni Presidente Brigham Young (1801–77). Hangyoa ang klase sa pagpaminaw kon unsa ang reaksyon sa pipila ka mga miyembro sa Simbahan sa dihang nahibalo sila mahitungod sa panan-awon:

“Sa dihang gipadayag sa Dios ngadto ni Joseph Smith ug Sidney Rigdon nga dihay usa ka dapit nga giandam alang sa tanan, sumala sa kahayag nga ilang nadawat … , dako kini nga pagsulay alang sa kadaghanan, ug ang uban mibiya sa kamatuoran tungod kay ang Dios dili mopadala sa mga pagano ug mga masuso ngadto sa walay katapusan nga silot, apan adunay dapit sa kaluwasan, sa tukmang panahon, alang sa tanan, ug mopanalangin sa matinuoron ug mahiyason ug matinud-anon, bisan og sila nasakop sa bisan unsa nga simbahan o wala. Bag-o kini nga doktrina niini nga henerasyon, ug daghan ang wala modawat niini” (Mga Pagtulun-an sa mga Presidente sa Simbahan: Brigham Young [1997], 337).

• Sa unsang paagi kini nga pamahayag naghulagway sa kalisud nga masinati sa pipila ka mga tawo kon makat-on og mga kamatuoran nga supak sa ilang gituohan o mga pangagpas?

Dapita ang usa ka estudyante sa pagbasa og kusog sa mosunod nga pamahayag. Hangyoa ang klase sa pagpaminaw kon unsa ang personal nga gibati ni Presidente Young sa dihang una niyang nahibaloan ang mahitungod sa panan-awon.

“Ang akong mga tradisyon mao, nga sa una nakong pagkahibalo sa Panan-awon, supak gayud kini ug sukwahi sa akong kanhi edukasyon. Miingon ko, Hulat og kadiyut. Wala ko kini isalikway; apan wala ako makasabut niini” (Brigham Young, sa Journal of Discourses, 6:281).

• Unsa ang labing mahinungdanon alang kaninyo mahitungod sa tubag ni Presidente Young sa panan-awon?

Dapita ang usa ka estudyante sa pagbasa og kusog sa mosunod nga mga pamahayag ni Presidente Young. Hangyoa ang klase sa pagpaminaw kon sa unsang paagi siya nakakaplag og mga tubag sa iyang mga pangutana.

“[Kinahanglan] akong maghunahuna ug mag-ampo, mobasa ug maghunahuna, hangtud nga akong mahibaloan ug hingpit nga masabtan kini sa akong kaugalingon” (Brigham Young, sa Journal of Discourses, 6:281).

“Tinud-anay akong makasulti nga, sa akong opinyon, wala nay laing mahimayaon kaayo nga pinadayag ang nahatag sukad” (Brigham Young, sa Journal of Discourses, 8:153).

• Unsa nga mga baruganan ang atong makat-unan gikan sa istorya ni Presidente Young? (Ang mga estudyante mahimong moila og pipila ka mga baruganan, lakip sa mosunod: Kon magtinguha kita nga mas makasabut imbis nga mosalikway sa mga pulong nga gipadayag sa Ginoo pinaagi sa Iyang mga propeta, moabut ang panahon nga panghimatud-an Niya ang katinuod niini ngari kanato. Isulat kini nga baruganan diha sa pisara.)

• Ngano kaha nga importante nga atong mahibaloan ug magamit kini nga baruganan?

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:

“Usahay makadawat kita og tambag nga dili nato masabtan o nga daw dili magamit ngari kanato, bisan human sa mainampingong pag-ampo ug paghunahuna. Ayaw ibaliwala ang tambag, apan hupti kini pag-ayo. Kon usa ka tawo nga imong gisaligan mihatag kanimo og daw balas lamang uban ang saad nga kini adunay bulawan, maalamon tingali nga gunitan nimo kini diha imong kamot sa makadiyot, mouyog niini sa hinay. Sa matag higayon nga gibuhat ko kana sa tambag gikan sa usa ka propeta, sa wala madugay nakita nako ang bili niana nga panudlo ug nagmapasalamaton ko” (Henry B. Eyring, “Finding Safety in Counsel,” Ensign, Mayo 1997, 26).

Tabangi ang mga estudyante nga mobati sa kamatuoran ug sa importansya sa doktrina ug mga baruganan

Human mahibaloan ug masabtan sa mga estudyante ang doktrina ug mga baruganan sa ebanghelyo, kasagaran nga dili nila kini gamiton hangtud nga bation nila ang kamatuoran ug kaimportante niini pinaagi sa Espiritu ug mobati sa kadinalian sa paggamit niini nga mga kamatuoran diha sa ilang kaugalingong kinabuhi. Makatabang ka sa mga estudyante nga mobati sa kamatuoran ug kaimportante sa doktrina ug mga baruganan pinaagi sa pagdapit kanila sa pagpamalandong sa nangaging mga kasinatian nga nakapalig-on sa ilang pagpamatuod niadto nga mga kamatuoran.

• Kanus-a man gipamatud-an sa Ginoo nganha kaninyo ang kamatuoran sa usa ka butang nga gitudlo sa Iyang mga propeta human nga mapailubon kamong nagtinguha og mas dakong panabut? Unsay inyong nakat-unan gikan sa inyong kasinatian?

Dapita ang mga estudyante sa pagpamalandong kon aduna bay bisan unsa nga gipadayag sa Ginoo pinaagi sa Iyang mga propeta nga tingali naglisud sila sa pagsabut. Dapita ang mga estudyante sa pagsulat og mga paagi nga magtinguha sila og dugang nga panabut gikan sa Ginoo.

Si Propeta Joseph Smith ug Sidney Rigdon gibunalan, gibubuan og alkitran, ug gipapilitan og mga balahibo

Ipasabut nga ang pagsupak sa pinadayag mahitungod sa tulo ka ang-ang sa himaya nakatampo sa nagkadako nga kalagot nga gitumong ni Ezra Booth ug uban pang kanhi mga miyembro sa Simbahan ngadto ni Propeta Joseph Smith ug Sidney Rigdon.

Paghangyo og usa o sobra pa nga mga estudyante sa pag-summarize sa unsay ilang nakat-unan gikan sa ilang pagbasa sa kapitulo 14 sa Mga Santos: Volume 1 kalabut sa mga kasinatian ni Joseph Smith ug Sidney Rigdon sa dihang sila giataki, gibunalan, gibubuan og alkitran, ug gipapilitan og mga balahibo.

• Unsa kaha ang inyong gibati kon inyong nasinati ang matang sa oposisyon nga nasinati ni Emma ug Joseph?

Dapita ang usa ka estudyante sa pagbasa og kusog sa mosunod nga mga parapo. Hangyoa ang klase sa pagpaminaw kon unsay nahinumduman ni Propeta Joseph Smith mahitungod sa unsay nahitabo human sa pag-ataki ug sa pagkasunod buntag, nga mao ang adlaw nga Igpapahulay:

“Ang akong mga higala migahin sa kagabhion nga nanguskos ug nanangtang sa alkitran, ug gihugasan ug gilimpyohan ang akong lawas; nga nianang pagkabuntag ako andam na nga sininaan pag-usab.

“… Ang katawhan nagtigum alang sa miting sa naandan nga takna sa pagsimba, … ug uban kanila nangabut usab ang mga manggugubot. … Ang akong lawas napuno sa kinawrasan ug bun-og, sa gihapon ako nagsermon ngadto sa kongregasyon sama sa naandan, ug nianang pagkahapon sa maong adlaw nagbunyag og tulo ka tawo” (Mga Pagtulun-an sa mga Presidente sa Simbahan: Joseph Smith [2007], 274–275).

• Base niini nga istorya, unsay atong makat-unan gikan sa ehemplo ni Propeta Joseph Smith?

Dapita ang usa ka estudyante sa pagbasa og kusog sa mosunod nga pamahayag ni Presidente Wilford Woodruff (1807–98):

“Bisan [si Joseph] adunay tibuok kalibutan nga sagubangon nga kaatbang ug mga pagbudhi sa mga higalang mini nga pagabatukan, bisan og ang iyang tibuok kinabuhi usa ka talan-awon nga may kagubot ug kabalisa ug kahasol, apan bisan, sa tanan niya nga mga kasakit, sa iyang mga pagkabilanggo, mga pagpanggukod ug mangil-ad nga pagtagad nga iyang naagian, siya sa kanunay matinud-anon sa iyang Dios” (Wilford Woodruff, sa Mga Pagtulun-an sa mga Presidente sa Simbahan: Joseph Smith [2007], 275).

Tapusa pinaagi sa pagpaambit sa imong pagpamatuod mahitungod sa tawag ni Joseph Smith isip usa ka propeta sa Dios. Awhaga ang mga estudyante sa pagsunod sa mga propeta sa Ginoo ug sa pagtinguha nga makasabut ug magpuyo sumala sa ilang mga pulong.

Dapita ang mga estudyante nga mangandam alang sa sunod nga klase pinaagi sa pagbasa sa kapitulo 15 sa Mga Santos: Volume 1.