Pasiuna sa Manwal sa Magtutudlo sa Mga Pagtulun-an ug Doktrina sa Basahon ni Mormon (Religion 275)

Unsa ang gilauman sa usa ka magtutudlo sa relihiyon?

Samtang mangandam ka sa pagtudlo, importante nga masabtan ang Katuyoan sa Seminaries and Institutes of Religion:

“Ang atong katuyoan mao ang pagtabang sa mga batan-on ug mga young adult nga makasabut ug makasalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], x).

Makab-ot nimo kini nga katuyoan pinaagi sa makugihong pagsunod sa ebanghelyo, sa epektibong pagtudlo sa ebanghelyo ngadto sa imong mga estudyante, ug sa tukmang pagpangalagad sa imong klase o programa. Samtang mag-andam ka ug magtudlo sa ebanghelyo niining paagiha, mo-qualify ka sa impluwensya sa Espiritu Santo (tan-awa sa D&P 42:14).

Imong oportunidad ang pagtabang sa mga estudyante aron makakat-on pinaagi sa Espiritu aron mapalig-on nila ang ilang pagtuo ug mapalawman ang ilang pagkakabig. Matabangan nimo ang mga estudyante sa pagtuman niini samtang giyahan nimo sila aron mahibaloan, masabtan, mabatyagan ang kamatuoran ug kaimportante ug ma-apply ang makahuluganong mga doktrina ug baruganan sa ebanghelyo ni Jesukristo.

Ang handbook sa Pagtudlo sa Ebanghelyo ug Pagkat-on usa ka mahinungdanong kapanguhaan para masabtan ang proseso sa pagtudlo ug pagkat-on kon unsaon sa pagkahimong malampuson sulod sa classroom.

Unsa man ang mga tumong ug katuyoan niini nga kurso?

Nalantawan nang daan nga daghan sa mga estudyante sa institute nakatuon na sa miagi sa Basahon ni Mormon sa sunod-sunod nga paagi—gikan sa sinugdanan hangtud sa katapusan—diha sa seminary, sa balay, o sa misyon. Kini nga kurso, Mga Pagtulun-an ug Doktrina sa Basahon ni Mormon (Religion 275), gidesinyo aron matabangan ang mga estudyante nga makagamit og lain-laing pamaagi sa pagtuon sa Basahon ni Mormon. Ang mga leksyon nga anaa niini nga kurso magtutok sa nailhan na kaayong mga tema sa doktrina nga gihatagan og gibug-aton sa dinasig nga mga tigsulat sa Basahon ni Mormon.

Si Presidente Ezra Taft Benson (1899–1994) midapit sa mga tigbasa sa Basahon ni Mormon sa pagsentro sa ilang atensyon diha sa doktrina nga anaa niini:

Imahe
President Ezra Taft Benson

“Ang Basahon ni Mormon gisulat alang sa atong panahon. … Apan dili lamang ang kasaysayan ug mga makadasig sa pagtuo nga mga sugilanon nga naa niini ang kinahanglan natong mahibaloan, apan kinahanglan nga masabtan nato ang mga pagtulun-an niini. Kon buhaton gayud nato ang atong homework ug tun-an ang Basahon ni Mormon sa doktrinal nga pamaagi, makaila kita sa mga sayop ug makita ang mga kamatuoran aron mabatukan ang kasamtangan nga daghang sayop nga teyoriya ug pilosopiya sa katawhan” (“Jesus Christ—Gifts and Expectations,” Ensign, Dis. 1988, 4).

Sa kinatibuk-an niini nga kurso, tun-an sa mga estudyante ang propetikanhong mga sinulat ug pagtulun-an nga anaa sa Basahon ni Mormon nga naghatag og gibug-aton sa plano sa Langitnong Amahan ug sa pinakaimportanting tahas sa Iyang Anak, nga si Jesukristo. Mas masabtan sa mga estudyante ang Basahon ni Mormon isip usa lain pa nga saksi ni Jesukristo ug mapalawman ang ilang gugma ug pagpamatuod bahin Kaniya. Molambo ang ilang abilidad sa pagtuon sa mga doktrina sa ebanghelyo diha sa konteksto sa kasulatan, nga mosangput sa mas dakong panabut ug personal nga pagkadisipulo. Maandam sila nga mopasabut ug mopamatuod sa kaimportante ug kabalaan sa gigikanan sa Basahon ni Mormon ug sa doktrina niini.

Unsa man ang gilauman gikan sa mga estudyante?

Aron madawat ang credit para maka-graduate sa institute, gikinahanglan ang mga estudyante nga mobasa sa mga tudling sa kasulatan, mga pakigpulong sa kinatibuk-ang komperensya, ug uban pang mga materyal nga gilista diha seksyon nga Mga Basahunon sa Estudyante nga anaa sa matag leksyon. Kinahanglan nga makab-ot sa mga estudyante ang mga requirement sa attendance ug ipakita ang abilidad sa paggamit sa materyal sa kurso pinaagi sa pagkompleto sa assessment.

Sa unsang paagi nahimo ang mga leksyon dinhi niini nga manwal?

Kini nga kurso gidesinyo nga usa ka tibuok semester nga kurso nga may 28 ka nasulat nga leksyon para sa 50-minutos nga class period. Kon mag-abut ang inyong klase kaduha sa usa ka semana, itudlo ang usa ka leksyon sa matag class period. Kon mag-abut ang inyong klase kausa ra sa matag semana sulod sa 90 ngadto sa 100 ka minutos, tinguba ug itudlo ang duha ka leksyon sa matag class period. Ang matag outline sa leksyon naglangkob og upat ka seksyon:

Pasiuna
Background nga Basahunon
Mga Sugyot alang sa Pagtudlo
Mga Basahunon sa Estudyante

Pasiuna

Kini nga seksyon naghatag og mubo nga pasiuna sa mga hilisgutan ug mga katuyoan sa leksyon.

Background nga Basahunon

Kini nga seksyon nagsugyot og mga kapanguhaan sama sa mga mensahe gikan sa mga propeta sa ulahing mga adlaw ug sa ubang mga lider sa Simbahan, nga makatabang aron mas masabtan nimo ang mga doktrina, mga baruganan, ug mga kamatuoran sa ebanghelyo nga gihisgutan diha sa outline sa leksyon.

Mga Sugyot alang sa Pagtudlo

Ang seksyon nga Mga Sugyot alang sa Pagtudlo naglakip sa materyal aron masabtan nimo ang unsay itudlo ug unsaon sa pagtudlo niini (tan-awa usab sa mga seksyon 4.3.3 ug sa 4.3.4 sa Gospel Teaching and Learning handbook). Ang gisugyot nga mga kalihokan sa pagkat-on gidesinyo aron matabangan ang mga estudyante sa pag-ila, pagsabut, pagbati sa kamatuoran ug kaimportante ug pag-apply sa sagradong mga kamatuoran. Mahimo nimong pilion ang pagpahiangay sa pipila o tanang mga gisugyot aron ipahaum sa imong kaugalingon nga estilo sa pagtudlo ug aron makab-ot ang mga panginahanglan ug kahimtang sa imong mga estudyante. Samtang imong ikonsiderar unsaon nga mapahiangay ang mga materyal sa leksyon, sunda kini nga tambag gikan ni Elder Dallin H. Oaks sa Korum sa Napulog Duha ka mga Apostoles:

Imahe
Elder Dallin H. Oaks

“Si Presidente Packer kanunay nakong nadungog nga nagtudlo, nga una atong hangupon, dayon atong ipahiangay. Kon tinud-anay kitang nakatutok sa gitakda nga leksyon nga atong ihatag, nan makasunod kita sa Espiritu aron mopahiangay niini. Apan dunay tintasyon, kon hisgutan nato ang mahitungod sa pagka-flexible, sa pagsugod pinaagi sa pagpahiangay kaysa paghangop. Usa kini ka pagbalanse. Padayon kini nga hagit. Apan ang pamaagi nga himoon og una ang paghangop ug dayon ipahiangay maoy usa ka mas maayong paagi nga magpabilin diha sa maanindot nga dapit” (“A Panel Discussion with Elder Dallin H. Oaks” [Seminaries and Institutes of Religion Satellite Broadcast, Ago. 7, 2012]; si.lds.org).

Kini nga kurso naglakip sa mga pamahayag sa mga lider sa Simbahan nga maggamit na sa daghang pinulongan. Samtang mag-andam ka sa pagtudlo, ipahiangay ang mga leksyon pinaagi sa paggamit sa anaa nga mga pamahayag sa mga lider sa Simbahan nga tukma sa hilisgutan.

Ang seksyon nga Mga Sugyot para sa Pagtudlo naglangkob og pinakaminus usa ka pamahayag sa doktrina o baruganan, nga makita nga naka-bold. Samtang madiskubrihan sa mga estudyante kini nga mga doktrina ug baruganan ug ipaambit ang ilang nakat-unan, magkalahi ang ilang mga pulong kaysa sa mga pulong nga naa sa manwal. Kon mahitabo kini, matnguni nga dili ka magpasabut nga sayop ang ilang mga tubag. Hinoon, kon ang pamahayag mahimong mas tukma pa, sa mainampingong paagi tabangi nga maklaro ang pagkasabut.

Kini nga kurikulum nagpakita unsaon nga matingub ang mga sukaranan sa pagtudlo sa ebanghelyo ug pagkat-on ngadto sa tema sa kurso (tan-awa sa Gospel Teaching and Learning, 10, 23–31, 38–41).

Si Elder David A. Bednar sa Korum sa Napulog Duha ka mga Apostoles mihulagway sa pipila ka mga benipisyo nga moabut pinaagi sa pagtuon sa ebanghelyo uban sa tema:

Imahe
Elder David A. Bednar

Samtang ang pagbasa sa basahon sa kasulatan sugod sa sinugdanan hangtud sa katapusan maghatag og mahinungdanon nga panabut sa kahibalo, ang pinasubay sa hilisgutan nga pagtuon mopalambo sa gilawmon sa atong kahibalo. Ang pag-search sa mga pagpadayag para sa mga koneksyon, mga pattern, ug mga tema, makalig-on ug makadugang sa espiritwal natong kahibalo … ; mopalapad sa atong panglantaw ug panabut sa plano sa kaluwasan.

“Sa akong hunahuna, ang makugihong pag-search aron madiskubrihan ang mga koneksyon, mga pattern, ug mga tema usa ka bahin sa gipasabut nga ‘magbusog’ sa mga pulong ni Kristo. Kini nga pamaagi aron makaagi ang bul-og gikan sa espiritwal nga punduhanan, molamdag sa atong salabutan pinaagi sa Iyang Espiritu, ug makapasalamat og dako sa balaang mga kasulatan ug sa gidak-ong sukod sa espiritwal nga komitment nga dili madawat sa laing paagi. Ang sama niana nga pag-search magtugot nga makatukod kita ibabaw sa bato sa atong Manunubos ug makabarug sa mga huros sa kadautan niining ulahing mga adlaw” (“A Reservoir of Living Water” [Brigham Young University nga fireside, Peb. 4, 2007], 3, speeches.byu.edu).

Mga Basahunon sa Estudyante

Kini nga seksyon naglista sa mga tudling sa kasulatan ug pakigpulong sa mga general authority sa Simbahan nga makapalambo sa panabut sa mga estudyante mahitungod sa mga hilisgutan nga anaa sa mga leksyon. I-assign ug awhaga ang mga estudyante sa pagbasa niini nga mga materyal sa dili pa sila moadto sa klase. Samtang tun-an nila kining dinasig nga mga materyal, dili lang kay mas maandam sila sa pag-apil sa diskusyon sa klase, apan maangkon usab nila ang mas lapad ug mas lawom nga panabut sa mga hilisgutan sa kurso. Hatagi ang mga estudyante og lista sa tanang Mga Basahunon sa Estudyante sa pagsugod sa semester.

Unsaon man nako aron maandam sa pagtudlo?

Abagan ka sa Ginoo samtang mangandam ka sa pagtudlo. Samtang mangandam ka, makita nimo nga makatabang ang pagpangutana sa imong kaugalingon sa mga mosunod:

Naningkamot ba ko nga magpakabuhing takus aron makadawat ko sa Espiritu sa akong pagpanudlo?
Nag-ampo ba ko aron madawat ang giya sa Espiritu Santo? (Tan-awa sa D&P 42:14.)
Gitun-an ba nako ang gi-assign nga scripture block ug ang background nga basahunon?
Nabasa ba nako ang kurikulum ug gitino kon duna pa bay kinahanglan nakong ipahiangay o i-adjust aron mohaum sa panginahanglan sa mga estudyante?
Sa unsang paagi nako ma-follow up aron masiguro nga daghan og nakat-unan ang mga estudyante sa gi-assign nga ilang mga basahunon?
Unsaon nako sa pagtabang ang matag usa sa akong estudyante aron moapil gayud sa leksyon?

Makatabang usab ang mosunod nga mga rekomendasyon:

Awhaga ang mga estudyante sa pagbasa sa gi-assign nga mga tudling sa kasulatan ug mga artikulo sa dili pa magklase.
Laumi nga tumanon sa mga estudyante ang ilang tahas isip mga tigkat-on.
Hatagi kanunay ang mga estudyante og mga oportunidad nga makapasabut sa mga doktrina ug mga baruganan gamit ang kaugalingon nilang mga pulong, mopaambit og haum nga mga kasinatian, ug mopamatuod kon unsay ilang nahibaloan ug gibati.
Usab-usaba ang mga kalihokan sa pagkat-on ug mga paagi nga imong gamiton sa matag klase ug sa matag adlaw usab.
Paghimo og palibut sa pagkat-on nga makadapit sa Espiritu diin mahatagan ang mga estudyante og kahigayunan ug responsibilidad nga makatudlo ug makakat-on gikan sa usag usa (tan-awa sa D&P 88:78,122).
Sa tibuok nga kurso dunay mga reference sa mga kahanas sa pagtuon sa kasulatan. Pahimusli kini nga mga oportunidad aron matabangan ang mga estudyante nga mahimong mas self-reliant sa ilang pagtuon sa kasulatan ug mas mapahinunguron sa tibuok kinabuhi nga pagkat-on gikan sa mga kasulatan.

Si Elder Richard G. Scott sa Korum sa Napulog Duha ka mga Apostoles mitudlo:

Imahe
Elder Richard G. Scott

“Ipaniguro nga dunay daghang moapil tungod kay kana nga paggamit sa kabubut-on sa usa ka estudyante nagtugot sa Espiritu Santo sa pagtudlo. … Samtang isulti sa mga estudyante ang mga kamatuoran, mapahimatud-an kini diha sa ilang mga kalag ug mopalig-on sa ilang personal nga mga pagpamatuod” (“To Understand and Live Truth” [evening with Elder Richard G. Scott, Peb. 4, 2005], 3, si.lds.org).

Sa unsang paagi akong ikapahiangay ang mga leksyon ngadto sa dunay mga kakulangan?

Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. I-adjust ang mga kalihokan ug mga ekspektasyon aron matabangan sila nga molampus. Pangita og paagi aron matabangan silang mobati nga gihigugma, gidawat, ug naapil. Pasiugdahi ang usa ka relasyon sa pagsalig.

Alang sa dugang nga mga ideya ug mga kapanguhaan, konsultaha ang Disability Resources page nga naa sa disabilities.lds.org ug ang manwal sa polisiya nga seksyon sa Seminaries and Institutes of Religion nga giulohan og “Gipahiangay nga mga Klase ug mga Programa alang sa mga Estudyante nga dunay mga Kakulangan [Adapted Classes and Programs for Students with Disabilities].”