Niini nga leksyon, makakat-on ang mga estudyante gikan sa Basahon ni Mormon nga ang pagbaton og hugot nga pagtuo kang Jesukristo maghimong posible nga ang Dios mohimo og mga milagro para ug tungod kanato. Ang paggamit og pagtuo makaandam usab nato sa pagdawat og espiritwal nga mga saksi sa kamatuoran.
Background nga Basahunon
Robert D. Hales, “Nagpangita aron Makaila sa Dios, Atong Langitnong Amahan, ug sa Iyang Anak, si Jesukristo,”Liahona, Nob. 2009, 29–32.
David A. Bednar, “Pangayo pinaagi sa Hugot nga Pagtuo,”Liahona, Mayo 2008, 94–97.
Neil L. Andersen, “Kamo Igo nga Nasayud,”Liahona, Nob. 2008, 13–14.
Hangyoa ang mga estudyante sa pagngalan og mga ehemplo diha sa kasulatan diin ang Dios mihimo og mga milagro para sa Iyang mga anak sumala sa ilang pagtuo Kaniya. (Ang mga ehemplo pweding maglakip sa pag-ayo ni Jesus sa masakiton ug pagbuhi sa patay, ni Moises nga mibahin sa Pulang Dagat, ug ni Kristo nga mihikap sa mga bato nga isuga sa mga sakayan sa Jaredite.)
Unsa kaha ang inyong isulti sa tawo nga dili motuo nga ang Dios padayon sa paghimo og mga milagro karon?
Dapita ang usa ka estudyante sa pagbasa og kusog sa 2 Nephi 27:23 ug ang laing estudyante sa pagbasa og kusog sa Mormon 9:9, 18–20. Hangyoa ang klase sa pagpangita kon nganong naa gihapon ang mga milagro karon.
Sumala niini nga mga bersikulo, nganong pwede man kitang magmasaligon nga ang mga milagro mahitabo sa kalibutan karon? (Kinahanglang mahibaloan sa mga estudyante ang mosunod nga doktrina: Tungod kay ang Dios sama kagahapon, karon, ug sa kahangturan, padayon Siya nga mohimo og mga milagro sumala sa pagtuo sa Iyang mga anak.)
Ngano kaha nga gikinahanglan man sa Ginoo kanato ang pagbaton og pagtuo sa dili pa Siya mohimo og mga milagro?
Aron mahulagway ang koneksyon sa kasulatan tali sa pagtuo ug mga milagro, dapita ang pipila ka mga estudyante nga magpuli-puli sa pagbasa og kusog sa 3 Nephi 17:5-9. Ipapangita sa klase kon unsay giila sa nabanhaw nga Kristo isip igo na sa wala pa Niya himoa ang mga milagro para sa katawhan.
Sumala sa bersikulo 8, unsa ang nagtugot sa Manluluwas aron ayuhon Niya ang masakiton ug may balatian?
Dapita ang usa ka estudyante sa pagbasa og kusog sa 3 Nephi 17:20–24.
Unsa pa ang ubang sagrado nga mga hitabo ang nasinati sa katawhan tungod sa ilang pagtuo?
Sa unsang paagi ang kaandam ni Kristo sa paghatag niini nga mga milagro makapalambo sa atong pagtuo nga Siya makagamit sa gahum sa pagtabang kanato sa atong panginahanglan?
Dapita ang usa ka estudyante sa pagbasa og kusog sa mosunod nga pamahayag ni Sister Sydney S. Reynolds, kanhi magtatambag sa kinatibuk-ang kapangulohan sa Primary:
Imahe
Sydney S. Reynolds
“Sama ka importante sa … ‘dagko nga mga milagro’ mao ang mas gagmay nga ‘pribadong mga milagro’ nga nagtudlo sa matag usa kanato nga magbaton og hugot nga pagtuo sa Ginoo. Moabut kini samtang kita moila ug mopatalinghug sa mga pag-aghat sa Espiritu sa atong kinabuhi. …
“Mituo ko nga kitang tanan makapamatuod niining gagmay nga mga milagro. Nakaila kita og mga bata kinsa nag-ampo alang sa panabang sa pagpangita sa nawala nga butang ug nakit-an kini. Nakaila kita og mga batan-on kinsa nakakuha og kaisug nga mobarug isip saksi sa Dios ug mibati sa Iyang matinabangon nga kamot. Nakaila kita og mga higala kinsa mibayad sa ilang ikapulo sa katapusan nilang kwarta ug dayon, pinaagi sa usa ka milagro, nakabayad pa gihapon sa ilang bayrunon sa eskwelahan o sa ilang abangan o bisan gani may pagkaon pa alang sa ilang pamilya. Makapaambit kita og mga kasinatian sa mga pag-ampo nga natubag ug mga panalangin sa priesthood nga nakahatag og kaisug, nakadala og kahupayan, o nakapahiuli og maayong lawas. Kini nga inadlawng mga milagro mipakita kanato sa kamot sa Ginoo sa atong kinabuhi” (“A God of Miracles,”Ensign, Mayo 2001, 12).
Hangyoa ang mga estudyante nga ikonsiderar ang mga panahon dihang sila o ang tawo nga ilang nailhan nakasinati sa mga milagro sa Dios sa ilang kinabuhi. Kon dili man kaayo sagrado o personal, dapita ang mga estudyante sa pagpaambit sa ilang mga kasinatian nga nagkumpirma diha nila nga ang Dios sa gihapon usa ka Dios sa mga milagro.
Ang pagtuo makaandam kanato sa pagdawat og espiritwal nga mga saksi
Dapita ang mga estudyante sa paghunahuna og usa ka kamatuoran diin gusto nila nga pinaagi niini makadawat sila og espiritwal nga pagsaksi o mas lig-on nga pagpamatuod. Ipasabut nga ang ubang tawo mopili sa dili pagtuo o pagpakabuhi sumala sa baruganan sa ebanghelyo hangtud nga makita nila ang ebidensya nga kini tinuod.
Dapita ang mga estudyante sa pagbasa og hilum sa Ether 12:6, nga mangita kon unsay gitudlo niini nga bersikulo mahitungod sa proseso sa pagkadawat og espiritwal nga pagsaksi.
Unsa nga baruganan ang atong makat-unan gikan sa Ether 12:6 mahitungod sa pagkadawat og espiritwal nga pagsaksi? (Kinahanglan mahibaloan sa mga estudyante ang mosunod nga baruganan: Sa dili pa kita makadawat og espiritwal nga pagsaksi, kinahanglan nga kita mopakita una sa pagtuo kang Jesukristo.)
Unsa kaha ang buot ipasabut sa mga pulong nga “pagsulay sa inyong pagtuo”?
Ipasabut nga ang pagkaangkon og pagsulay sa pagtuo wala kanunay magpasabut og pagsinati og kalisdanan. I-display ug ipabasa og kusog sa usa ka estudyante ang mosunod nga mga pamahayag mahitungod sa tambag ni Moroni sa Ether 12:6 pinaagi ni Elder Richard G. Scott sa Korum sa Napulog Duha ka mga Apostoles ug ni Sister Bonnie L. Oscarson, kinatibuk-ang presidente sa Young Women:
Imahe
Elder Richard G. Scott
“Makakat-on kamo sa paggamit sa hugot nga pagtuo sa mas epektibong paagi pinaagi sa paggamit niini nga baruganan nga gitudlo ni Moroni: ‘… kay kamo dili makadawat og saksi hangtud human sa pagsulay sa inyong hugot nga pagtuo’ [Ether 12:6; emphasis gidugang]. Mao nga, matag higayon nga inyong sulayan ang inyong hugot nga pagtuo, buot pasabut nga, takus nga mobuhat sa usa ka impresyon, makadawat kamo sa mapamatud-anong ebidensya sa Espiritu” (Richard G. Scott, “Ang Maabagon nga Gahum sa Hugot nga Pagtuo sa Walay Kasigurohan nga mga Panahon,”Liahona, Mayo 2003, 76).
Imahe
Bonnie L. Oscarson
“Sa atong kalibutan diin ang diha-diha nga kalipay mao ang gipaabut, kita kasagaran sad-an sa pagdahum og ganti nga wala nato trabahoi. Nagtuo ko nga si Moroni nagsulti kanato nga kita kinahanglang motrabaho una ug magbansay og hugot nga pagtuo pinaagi sa pagsunod sa ebanghelyo, ug dayon kita makadawat og saksi nga kini tinuod. Ang tinuod nga pagkakabig mahitabo samtang kamo magpadayon sa pagtuman sa mga doktrina nga inyong nahibaloan nga tinuod ug sa pagsunod sa mga sugo, matag adlaw, matag bulan” (Bonnie L. Oscarson, “Magpakabig Kamo,”Liahona, Nob. 2013, 77).
Sa unsang paagi ang pamaagi sa pagkadawat og saksi sa kamatuoran nga gihulagway ni Elder Scott ug ni Sister Oscarson lahi kaysa pamaagi niadtong gusto una og ebidensya sa dili pa sila motuo o molihok?
Kanus-a ug sa unsang paagi ninyo nakita nga tinuod kini nga baruganan?
Dapita ang pipila ka mga estudyante nga magpuli-puli sa pagbasa og kusog sa Ether 12:7, 12, 19, ug sa 31. Awhaga ang klase sa pagtimaan sa mga pulong nga “human sila dunay hugot nga pagtuo” ug “hangtud sila adunay hugot nga pagtuo” niini nga mga bersikulo (mahimo usab nimong isugyot nga markahan sa mga estudyante kini nga mga pulong sa ilang mga kasulatan).
Sumala niini nga mga bersikulo, unsa nga mga panalangin ang gihatag sa Ginoo niining mga tawhana human sila migamit og hugot nga pagtuo? Unsa nga matang sa espirituhanong pagsaksi sa kamatuoran ang inyong nadawat isip resulta sa inyong pagtuo?
Ipamatuod nga susama kaayo sa mga milagro, ang espirituhanong mga pagsaksi dili moabut hangtud ipakita nato una ang pagtuo. Aron mahatagan og gibug-aton kini nga punto, ikonsiderar ang pagpaambit sa mosunod nga pamahayag ni Presidente Boyd K. Packer (1924–2015) sa Korum sa Napulog Duha ka mga Apostoles:
Imahe
Presidente Boyd K. Packer
Sa pipila ka dapit sa inyong pagpangita og espirituhanong kahibalo, anaa kana nga ‘dakong pagtuo,’ nga maoy tawag sa mga philosopher niini. Mao kini ang gutlo dihang miabut ka sa tumoy sa kahayag ug mitikang ngadto sa kangitngit aron sa pagdiskobre nga ang dalan pipila na lang ka lakang sa unahan may suga diay” (“The Quest for Spiritual Knowledge,” New Era, Ene. 2007, 6).
Dapita ang usa ka estudyante sa paghulagway sa mga hagit nga giatubang sa igsoon nga lalaki ni Jared samtang naghimo siya og kasko [barko] nga modala sa iyang pamilya ngadto sa yutang saad ug sa pag-summarize unsay iyang gihimo sa pagsulbad sa mga hagit (tan-awa sa Ether 2:16–25; 3:1–5).
Sa unsang paagi ang igsoon ni Jared mipakita og hugot nga pagtuo kang Jesukristo?
Papuli-puliha sa pagpabasa og kusog ang mga estudyante gikan sa Ether 3:6–13, 17–20.
Sa unsang paagi mipanalangin ang Ginoo sa igsoon ni Jared tungod sa iyang pagtuo?
Ipabasa og kusog sa usa ka estudyante ang pamahayag ni Elder Jeffrey R. Holland sa Korum sa Napulog Duha ka mga Apostoles. Dapita ang klase sa pagpangita sa mga kinaiya sa pagtuo sa igsoon ni Jared:
Imahe
Elder Jeffrey R. Holland
“Ang hingpit nga pagtuo, usa ka pagtuo nga makapalihok og bukid, pagtuo nga susama sa igsoong lalaki ni Jared, mag-una sa milagro ug sa kahibalo. Kinahanglan siyang motuo sa dili pa mamulong ang Dios. Kinahanglan siyang molihok sa wala pa maklaro ang abilidad sa pagkompleto niana nga buhat. Kinahanglan siyang mopasalig daan sa kompleto nga kasinatian bisan pa gani sa unang hugna sa katumanan niini. Ang hugot nga pagtuo mao ang pag-uyon nga walay kondisyon—ug ang pag-uyon daan—sa bisan unsang kondisyon nga pangayuon sa Dios sa maduol ug malayo nga panahon sa umaabut” (Christ and the New Covenant: The Messianic Message of the Book of Mormon [1997], 18–19).
Unsaon ninyo sa pag-summarize ang deskripsyon ni Elder Holland bahin sa pagtuo sa igsoon ni Jared?
Unsa ang pipila ka ehemplo sa mga buhat nga atong magamit sa pagpakita sa atong pagtuo sa Ginoo?
Hatagi og panahon nga makatuon ang mga estudyante sa Ether 4:13–15, ug sa pagpangita kon unsay gisulti ni Moroni nga angay natong buhaton aron makadawat og kahibalo ug sa mga pagpadayag gikan sa Espiritu.
Unsa kaha ang gipasabut sa “mogisi [sa] tabil sa pagkawalay pagtuo”? Sa unsang paagi ang pagbuhat niini may kalabutan sa proseso sa paggamit og hugot nga pagtuo? (Makatabang ang pagpasabut nga ang mogisi nagpasabut sa paglaslas o pagkabahin ug ang tabil nagpasabut sa butang nga nagtabon o nagtago.)
Unsay gitambag ni Moroni nga atong buhaton aron “mogisi sa tabil sa pagkawalay pagtuo”?
I-display ang mosunod nga pamahayag ni Propeta Joseph Smith (1805–44), ug ipabasa kini og kusog sa usa ka estudyante:
Imahe
Prophet Joseph Smith
Si Propeta Joseph Smith (1805–44) mitudlo, “Ang Dios wala magpadayag bisag unsa ngadto ni Joseph, apan unsay Iyang buot nga mapahibalo ngadto sa Napulog-Duha, ug bisan sa pinakaubos nga Santos nga mahibalo sa tanang mga butang nga ingon ka dali kutob sa iyang mahimo sa pagdawat sa tanan, kay ang adlaw moabut nga dili na kinahanglan sa tawo nga motudlo ngadto sa iyang silingan, moila ka sa Ginoo; kay ang tanan makaila Kaniya … gikan sa labing timawa ngadto sa labing inila [tan-awa sa Jeremias 31:34]” (Mga Pagtulun-an sa mga Presidente sa Simbahan: Joseph Smith [2007], 323).
Sa unsang paagi kini nga pamahayag ni Propeta Joseph Smith nagtabang nga masabtan ninyo ang inyong potensyal sa pagkadawat og pagpadayag?
Hagita ang mga estudyante sa pagpamalandong kon unsa nga mga pagsulay sa pagtuo ang kasamtangan nilang giatubang, ug dapita sila sa pagkonsiderar unsay ilang mahimo aron mapalig-on ug makagamit sa ilang pagtuo. Ipaambit ang inyong pagpamatuod nga mihatag ang Dios sa matinud-anon Niyang mga sumusunod og padayong mga saksi sa kamatuoran samtang mogamit sila sa ilang pagtuo.