Ang nabanhaw nga si Jesukristo midapit sa Iyang mga disipulo sa pagsunod sa Iyang ehemplo. Pinaagi sa pagtuon sa mga baruganan nga Iyang gitudlo sa mga Nephite sa templo sa Bountiful, atong makat-unan sa unsang paagi kita mahisama Kaniya. Nag-ampo ang Manluluwas nga ang tanan nga motuo Kaniya makasinati og panaghiusa uban Kaniya ug sa atong Langitnong Amahan. Gidesinyo kini nga leksyon aron matabangan ang mga estudyante sa pagkasabut kon unsay ilang mahimo aron mas mahisama kang Jesukristo.
Background nga Basahunon
Henry B. Eyring, “Ang Atong Hingpit nga Ehemplo,”Liahona, Nob. 2009, 71-73.
Lynn G. Robbins, “Unsa nga Matang sa mga Lalaki ug mga Babaye Kamo Mahisama?”Liahona, Mayo 2011, 103–5.
Sugdi ang klase pinaagi sa pag-display sa mosunod nga pamahayag ni Elder Lynn G. Robbins sa Seventy, ug dapita ang usa ka estudyante sa pagbasa niini og kusog:
Imahe
Elder Lynn G. Robbins
“Daghan kanato naglista sa mga angay buhaton sa pagpahinumdom kanato sa mga butang nga gusto natong matuman. Apan tagsa ra ang mga tawo ang adunay lista sa pagkahimong maayo. Ngano? Ang mga buhatunon mao ang mga kalihokan o mga panghitabo ug mahimo rang markahan sa listahan kon mabuhat na. Ang pagkahimong maayo, bisan pa, wala gayud mabuhat. Wala kay mamarkahan og tsek diha sa mga pagkahimong maayo. Mahimo nakong dalhon ang akong asawa alang sa matahum nga kagabhion karong Biyernes, kini usa ka buhatunon. Apan ang pagkahimong maayo nga bana dili usa ka panghitabo; nagkinahanglan kini sa pagkahimong bahin sa akong kinaiyahan—akong kinaiya, o si kinsa ako” (“Unsa nga Matang sa mga Lalaki ug mga Babaye Kamo Mahisama?”Liahona, Mayo 2011, 104).
Unsa kaha ang gusto sa Ginoo nga atong maabut isip mga miyembro sa Iyang Simbahan?
Dapita ang mga estudyante sa pagbasa og hilum sa 3 Nephi 27:21, -22, 27 ug pagpangita sa mga instruksyon nga gihatag ni Jesukristo sa Iyang mga Nephite nga disipulo.
Unsa ang gisugo sa Manluluwas nga buhaton sa Iyang mga tinun-an ug abton? (Isulat sa pisara ang mosunod nga kamatuoran: Ang Ginoo mihangyo sa Iyang mga disipulo sa paghimo sa Iyang mga buhat ug mahimong sama Kaniya.)
Sa unsang paagi kita mas mahimong sama sa Manluluwas?
Unsa ang pipila sa Iyang mga buhat ang inyo nang nahimo?
Dapita ang mga estudyante sa paghisgot sa unsang paagi ang mga pagtulun-an sa Basahon ni Mormon makatabang kanato sa pagkahimong sama ni Jesukristo. Ikonsiderar ang pagsulat sa mga tubag sa mga estudyante diha sa pisara. Ipaambit ang imong pagpamatuod nga ang pagtuon sa Basahon ni Mormon ug paggamit niini nga mga pagtulun-an makatabang aron mas mahisama kita sa Manluluwas.
Ang wali ni Kristo sa templo sa Bountiful nagtudlo kanato sa unsang paagi mahisama kita Kaniya
I-display ang mosunod nga pamahayag ni Presidente Ezra Taft Benson (1899–1994), ug ipabasa kini og kusog sa usa ka estudyante:
Imahe
Presidente Ezra Taft Benson
“Labing talagsaon ug labing bulahan ug malipayon ang tawo kansang kinabuhi duol kaayo sa sundanan ni Kristo. Wala kini kalabutan sa yutan-ong katigayunan, gahum, o dungog. Ang bugtong tinud-anay nga sukdanan sa kamaayo, kabulahan, ug kamalipayon mao ang kon unsa ka duol ang kinabuhi nga nahisama sa Agalon, nga si Jesukristo. Siya ang matarung nga dalan, ang hingpit nga kamatuoran, ug ang abunda nga kinabuhi” (“Jesus Christ—Gifts and Expectations,” Ensign, Dis. 1988, 2).
Sumala ni Presidente Benson, unsay mahitabo kon pilion nato nga himoon si Jesukristo nga sundanan sa atong kinabuhi?
Pahinumdumi ang mga estudyante nga sa dihang mipakita ang nabanhaw nga Manluluwas sa Iyang katawhan didto sa templo sa Bountiful, mihatag siya og wali nga susama sa Iyang biblikanhon nga Wali Ibabaw sa Bungtod. Ang sagradong baruganan nga gitudlo sa Manluluwas sa Wali Ibabaw sa Bungtod ug sa templo sa Bountiful gidesinyo alang sa pagtabang nato nga mahimong sama Kaniya.
I-display ang mosunod nga pamahayag ni Presidente Harold B. Lee (1899–1973). Kon gikinahanglan, ipasabut nga ang pulong nga sundanan [blueprint] nagpasabut sa mga plano nga gamiton sa pagtukod og building.
Imahe
Presidente Harold B. Lee
“Sa iyang Wali Ibabaw sa Bungtod ang Magtutudlo naghatag kanato ingon og usa ka pagpadayag sa iyang kaugalingong kinaiya, nga hingpit, … ug sa pagbuhat sa ingon naghatag kanato sa usa ka sundanan alang sa atong kaugalingon nga mga kinabuhi” (Mga Pagtulun-an sa mga Presidente sa Simbahan: Harold B. Lee [2000], 246).
Isulat sa pisara ang mosunod nga mga pakisayran sa kasulatan:
I-assign ang matag estudyante sa pagbasa og usa sa mga tudling ug sa pag-ila og usa ka baruganan nga makatabang nila nga mas mahisama ni Jesukristo. Mahimo nimong awhagon ang mga estudyante sa pagmarka o pag-higlight niini nga mga baruganan diha sa ilang mga kasulatan. Dapita sila sa pagkonsiderar kon may nailhan ba silang tawo nga maayong ehemplo sa baruganan nga ilang nahibaloan.
Human sa igong panahon, dapita ang mga estudyante sa pagpaambit unsay ilang nakit-an. Sigun sa panginahanglan ug kon giaghat sa Espiritu, pwede kang modugang sa pagpangutana sama sa mosunod:
Sa unsang paagi ang padayon nga pagsunod niini nga baruganan makatabang ninyo sa pagkahimong mas sama kang Kristo?
Unsa ang inyong mga kasinatian nga naghulagway sa kaimportante sa baruganan nga inyong nahibaloan?
Dapita ang mga estudyante sa paghimo og tumong sa pagkahimong mas sama sa Manluluwas pinaagi sa pagtingob sa usa o duha niini nga mga baruganan sa ilang kinabuhi.
Ipasabut nga atol sa Iyang pagbisita ngadto sa mga Nephite, nag-ampo si Jesukristo alang sa napulog duha ka mga disipulo nga Iyang pinili ug para sa tanan nga motuo sa ilang mga pulong. Dapita ang pipila ka estudyante sa pagbasa og kusog sa 3 Nephi 19:19–23, 28–29. Ipapangita sa mga estudyante ang mga panalangin nga giampo ni Jesus nga itugyan ngadto sa mga motuo Kaniya.
Unsa kaha ang baruganan nga atong makat-unan gikan sa pag-ampo sa Manluluwas para kanato sa pagkahiusa uban sa Amahan ug sa Anak? (Kinahanglang mahibaloan sa mga estudyante ang mosunod nga baruganan: Pinaagi sa hugot nga pagtuo, malimpyo kita ug mahiusa uban ni Jesukristo, sama nga Siya nahiusa uban sa Amahan.)
Aron matabangan ang mga estudyante nga makasabut niini nga baruganan, ipasabut nga ang pag-ampo nga susama sa gihalad ni Kristo didto sa templo sa Bountiful narekord sa Bag-ong Tugon. Ipa-cross-reference sa mga estudyante kini nga mga bersikulo ngadto sa Juan 17:9–11, 20–23. Dapita sila sa pagbasa og hilum sa mga bersikulo ug pagkonsiderar kon sa unsang paagi kini magamit kanato.
Sa unsang paagi nakaapektar kaninyo ang pagkahibalo nga nag-ampo si Jesus sa Amahan alang kaninyo?
Sa unsang mga paagi kita makasinati sa kahiusahan nga anaa tali sa Amahan ug sa Anak?
Hangyoa ang usa ka estudyante sa pagbasa og kusog sa mosunod nga pamahayag ni Elder D.°Todd Christofferson sa Korum sa Napulog Duha ka mga Apostoles. Dapita ang mga estudyante sa pagpangita kon unsay angay natong buhaton aron mahimong usa uban ni Jesukristo ug sa Langitnong Amahan.
Imahe
Elder D. Todd Christofferson
“Si Jesus nakakab-ot sa hingpit nga panaghiusa ngadto sa Amahan pinaagi sa pagtugyan sa Iyang kaugalingon, sa unod ug sa espiritu, ngadto sa kabubut-on sa Amahan. Ang Iyang pangalagad kanunay nga tataw nga nakapokus tungod kay wala siyay mga hunahuna o mga tinguha nga wala mahiuyon sa Amahan . Nagpasabut sa Iyang Amahan, si Jesus miingon, ‘Sa kanunay ginabuhat ko man ang makapahimuot kaniya’ (Juan 8:29). …
“Sa pagkatinuod dili kita mahiusa sa Dios ug ni Kristo hangtud nga atong himoon ang Ilang kabubut-on ug kagustohan nga maoy atong pinakadakong tinguha. Ang ingon ka pagkamanunuton dili mahitabo sa usa ka adlaw, apan pinaagi sa Balaang Espiritu, ang Ginoo maoy motudlo kanato kon kita mouyon hangtud, sa pagdagan sa panahon, mamahimong tukma ang pag-ingon nga Siya anaa kanato ingon nga ang Amahan anaa Kaniya” (“Aron nga Sila Mausa Ngari Kanato,” Liahona, Nob. 2002, 71-73).
Sumala ni Elder Christofferson, unsay angay natong buhaton aron mahimong usa sa Amahan ug sa Anak?
Isulat sa pisara ang mosunod nga mga pangutana, ug dapita ang mga estudyante sa paggahin og pipila ka minutos sa pagsulat sa ilang mga tubag:
Sa unsang mga paagi gipakita ni Jesus nga hingpit Siyang matugyanon ngadto sa kabubut-on sa Langitnong Amahan?
Unsa ang ubang paagi nga kamo mahimong magmatugyanon ngadto sa kabubut-on sa Langitnong Amahan?
Tapusa pinaagi sa pagpaambit sa imong pagpamatuod nga ang pagkahimong matugyanon ngadto sa kabubut-on sa Amahan maghimong posible nga mas mahisama kita sa Manluluwas nga si Jesukristo.