Mga Seminary ug mga Institute
Leksyon 14: Ang Gahum sa Dios sa Pagluwas

14

Ang Gahum sa Dios sa Pagluwas

Pasiuna

Ang Basahon ni Mormon naglangkob og daghang mga istorya bahin sa mga indibidwal ug mga katilingban nga gipang-ulipon sa pipila ka matang. Daghan niini nga mga istorya naghulagway nga si Jesukristo mao ang Talagsaong Tigluwas ug ang tinubdan sa tanang tabang kon ang pag-eskapo o pagluwas daw imposible. Kon magpaduol kita sa Ginoo pinaagi sa paghinulsol, pagpaubos, ug pag-ampo, mas andam kita sa espiritwal nga paagi aron madawat ang gahum sa Dios sa pagluwas.

Background nga Basahunon

  • L. Tom Perry, “Ang Gahum sa Pagluwas,” Liahona, Mayo 2012, 94–97.

  • Dallin H. Oaks, “Iyang Papahulayon ang Nag-antus,” Liahona, Nob. 2006, 6–9.

  • David A. Bednar, “Makadaug sa Ilang mga Alantuson uban sa Kasayon,” Liahona, Mayo 2014, 87–90.

Mga Sugyot alang sa Pagtudlo

1 Nephi 1:20; Alma 36:1–3, 27–29

Dunay gahum ang Dios nga motugot sa pagluwas

Dapita ang mga estudyante sa paghunahuna kon kanus-a sila nadasig tungod sa kaisug ug sa kalig-on sa usa ka tawo nga nakaatubang og dagkong mga hagit o mga kalisdanan. Hangyoa sila nga ipaambit sa daklit kon unsay ilang naobserbahan.

Hangyoa ang mga estudyante sa hilum nga pagbasa sa 1 Nephi 1:1, nga mangita kon unsay gisulti ni Nephi mahitungod sa mga kalisdanan nga iyang nasinati sa kinabuhi.

  • Giunsa sa pag-summarize ni Nephi ang iyang mga pagbati human makasinati og “daghang mga kasakit”?

  • Nganong makaingon man ka nga ang tawo mobati nga “gipangga sa Ginoo” bisan nagsinati og mga hagit o kalisdanan?

Sultihi ang mga estudyante sa pag-cross-reference sa 1 Nephi 1:1 ngadto sa 1 Nephi 1:20 ug pagpangita og usa ka rason nganong gihulagway ni Nephi ang pagbati nga “gipangga sa Ginoo.”

  • Unsa ang baruganan dinhi sa bersikulo nga tingali makatabang sa tawo aron mobati og paglaum kon magsinati og mga hagit o mga kalisdanan? (Kinahanglang mahibaloan sa mga estudyante ang mosunod nga baruganan: Kon gamiton nato ang pagtuo kang Jesukristo, madawat nato ang kalooy sa Dios ug pagluwas.)

Ipasabut nga ang pulong nga “Ako, si Nephi, mopakita kaninyo” nagsugyot nga gituyo ni Nephi ang pagrekord sa mga ehemplo sa gahum sa Dios sa pagluwas. Dapita ang mga estudyante sa pagpakli sa 1 Nephi kapitulo 1–8 ug 16–18, nga mangita sa mga ehemplo gikan sa kinabuhi ni Nephi nga naghulagway sa gahum sa Dios sa pagluwas. Dapita ang mga estudyante sa pagpaambit sa daklit sa mga ehemplo nga ilang nakita. Kon maglisud sa pagpangita ang mga estudyante og mga ehemplo, mahimo nimo silang paukabon sa usa o daghan sa mosunod nga mga tudling: 1 Nephi 3:23–31; 4:1–18; 7:16–19; 8:7–12; 16:10, 18–31, 36–39; 17:48–55; ug 18:1–3, 11–21.

Basaha og kusog ang mosunod nga pamahayag ni Elder L. Tom Perry (1922–2015) sa Korum sa Napulog Duha ka mga Apostoles:

Elder L. Tom Perry

“Daghang istorya sa Basahon ni Mormon mga istorya sa pagkaluwas. Ang pag-adto ni Lehi sa kamingawan uban sa iyang pamilya naghisgot sa pagkaluwas gikan sa kalaglagan sa Jerusalem. Ang istorya sa mga Jaredite usa ka istorya sa pagkaluwas, sama sa istorya sa Mulekites. Si Alma nga Batan-on naluwas gikan sa sala. Ang batan-ong manggugubat ni Helaman naluwas sa gubat. Si Nephi ug Lehi naluwas gikan sa prisohan. Ang tema kabahin sa pagkaluwas makita sa tibuok Basahon ni Mormon” (“Ang Gahum sa Pagluwas,” Liahona, Mayo 2012, 94).

Isip usa ka ehemplo sa espiritwal nga pagkaluwas, ipasabut nga gihulagway ni Alma ngadto sa iyang anak nga si Helaman ang iyang pagkaluwas gikan sa sala. Ipabasa og kusog sa usa ka estudyante ang Alma 36:1–3, ug pagdapit og laing estudyante nga mobasa og kusog sa Alma 36:27–29 (timan-i nga ang Alma 5:1–12 naglangkob og susama nga tambag). Hangyoa ang klase sa pagsunod, nga mangita og mga panabut nga tingali makatabang og tawo kinsa nagsagubang og mga kasakit o kalisdanan.

  • Unsa nga mga panabut ang inyong nakita dinhi sa mga tudling nga tingali makatabang og tawo nga nag-atubang og pisikal o espiritwal nga mga kalisdanan?

  • Unsa nga matang sa pisikal og espiritwal nga pagkaulipon ang giatubang sa mga tawo karon? (Ang mga ehemplo maglakip sa kakulang sa kahimsug, pagkaadik sa druga ug pornograpiya, kakabus, abuso, dikriminasyon, sala, kawalay pagtuo, ug rebelyon.)

I-display ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Elder Jeffrey R. Holland

“Aduna ka bay pakigbugno sa kadautan sa pagka-adik—tabako o drugas o sugal, o ang makaamong karong pagkaylap sa pornograpiya? Ang inyong kaminyoon aduna bay kagubot o ang inyong anak anaa sa kakuyaw? Naglibug ka ba sa imong pagkatawo [gender] o nagpangita ka ba og kaugalingong kalipay? Ikaw ba—o imong minahal—nag-antus og sakit o kalisud o kamatayon? Bisa’g unsa pang mga lakang nga kinahanglan nga imong buhaton aron pagsulbad niining mga suliran, duola og una ang ebanghelyo ni Jesukristo. Salig sa mga saad sa langit. Kabahin niana nga pagpamatuod ni Alma ako nagpamatuod,’ Ako nasayud nga kinsa ang mobutang sa ilang pagsalig diha sa Dios pagabuligan sa ilang mga pagsulay ug sa ilang mga kasamok, ug sa ilang mga kasakit’ [Alma 36:3]” (“Mga Butang Guba Mahimong Ayuhon,” Liahona, Mayo 2006, 70).

  • Unsay gisulti ni Elder Holland nga makatabang aron makasugod kita sa pagsulbad sa atong mga problema ug mga hagit?

1 Nephi 6:4; Mosiah 21:2–5, 14–16; 23:23–24; 24:13–15, 21; Alma 34:9; Helaman 5:9

Si Jesukristo ang tinubdan sa pagkaluwas

Dapita ang mga estudyante nga ihulagway ang managlahing mga rason nganong nadasig sa pagsulat og libro ang usa ka tagsulat. (Sama pananglit, ang usa ka tagsulat tingali gustong mosugilon og usa ka istorya, mopaambit og kahanas bahin sa hilisgutan, o himoong panginabuhian.) Human mapaambit sa pipila ka estudyante ang ilang mga ideya sa klase, dapita ang mga estudyante sa pagbasa og hilum sa 1 Nephi 6:4, nga mangita sa usa sa mga rason nganong nadasig si Nephi sa pagsulat.

  • Unsay gisulti ni propeta Nephi nga maoy iyang katuyoan sa pagsulat sa iyang rekord? (Tinguha niya ang pag-awhag sa katawhan aron moduol sa Dios ug maluwas.)

Ipamatuod sa mga estudyante nga ang gahum sa Dios nga moluwas mao ang gahum sa pagluwas.

Kopyaha ang mosunod diha sa pisara, ug pasabta ang mga estudyante nga kini nga mga tudling naghulagway sa katawhan nga nagkinahanglan nga maluwas:

Katawhan ni Limhi

Katawhan ni Alma

Tanang katawhan

Mosiah 21:2–5, 14–16

Mosiah 23:23–24; 24:21

Alma 34:9; Helaman 5:9

Ipabasa og hilum sa mga estudyante ang mga tudling sa pisara, nga mangita kon unsay gitudlo sa matag tudling mahitungod sa tinubdan sa pagkaluwas gikan sa mga hagit ug mga kalisdanan.

  • Unsay inyong nakat-unan gikan niini nga mga tudling mahitungod sa tinubdan sa pagkaluwas? (Samtang motubag ang mga estudyante, hatagi og gibug-aton ang mosunod nga doktrina: dunay gahum si Jesukristo sa pagluwas kanato gikan sa atong nawala ug napukan nga kahimtang ug gikan sa ubang mga hagit sa mortalidad.)

I-display ang mosunod nga pamahayag ni Presidente Henry B. Eyring sa Unang Kapangulohan, ug ipabasa kini og kusog sa usa ka estudyante:

President Henry B. Eyring

“Gusto nakong saksihan ang gahum sa Dios sa pagluwas. Sa pipila ka punto sa atong kinabuhi tanan kita nagkinahanglan niana nga gahum. Ang tanang tawo nga nagpakabuhi anaa taliwala sa pagsulay. … Duha ka butang ang susama ra gihapon para kanatong tanan. Mga kabahin kini sa plano sa mortal nga kinabuhi.

“Una, ang mga pagsulay usahay mag-aghat kanato sa pagpaningkamot igo nga bation nato ang pagpanginahanglan og tabang lapas sa atong kaugalingon. Ug, ikaduha, ang Dios sa Iyang kamabination ug kaalam mihimo nga maanaa kanato ang gahum sa pagluwas” (“The Power of Deliverance” [Brigham Young University devotional, Ene. 15, 2008], 1; speeches.byu.edu).

  • Kanus-a kamo nakadawat og “tabang lapas [sa inyong] kaugalingon” atol sa mga kalisdanan?

Kon itugot pa sa panahon, mahimo nga mo-refer ka sa istorya sa katawhan ni Alma diha sa Mosiah 24:13–15 aron mahulagway ang ideya nga ang kaluwasan sa Dios wala kanunay magpasabut nga matangtang ang atong palas-anon, kondili, ang Dios sa kasagaran luwason kita pinaagi sa paglig-on sa atong abilidad aron mapas-an ang atong palas-anon. Ang pagpailub ug paglahutay gikinahanglan niini nga mga sitwasyon, sama kon ang problema sa kahimsug magpadayon sa kinabuhi sa usa ka tawo. Ang pagkaluwas moabut sa kaugalingong pamaagi sa Dios ug sigun sa Iyang panahon.

Mosiah 7:33; 29:20; Alma 58:10–11; 3 Nephi 4:33

Pag-akses sa gahum sa pagluwas

Ipamatuod nga dunay paglaum para sa matag usa kon makita nato ang atong kaugalingon nga anaa sa mga kahimtang diin ang pag-eskapo o pagkaluwas nga daw imposible. Pahinumdumi ang mga estudyante nga ang mga kasulatan naglangkob og mga instruksyon kon unsaon sa pag-akses sa gahum sa Manluluwas sa pagluwas.

Isulat sa pisara ang mosunod nga mga reference. (Ayaw ilakip ang impormasyon nga naa sa parentheses, nga para sa magtutudlo lamang.) Dapita ang mga estudyante sa pagbasa sa matag tudling, nga mangita sa mga buhat nga makatabang aron atong ma-akses ang gahum sa Manluluwas sa pagluwas.

Mosiah 7:33 (Moduol sa Ginoo uban ang hingpit nga katuyoan sa kasingkasing, ug mosalig Kaniya, moalagad Kaniya sa kakugi)

Mosiah 29:20 (Magpaubos, mangamuyo sa hilabihan ngadto sa Dios)

Alma 58:10–11 (Ibu-bu ang usa ka kalag diha sa pag-ampo, maglaum nga maluwas)

3 Nephi 4:33 (Maghinulsol, magpaubos)

Human sa igo nga panahon, dapita ang mga estudyante sa pagpaambit ug paghisgot og bisan unsang mga buhat nga ilang nakitá, ug isulat sa pisara ang tubag sa mga estudyante. Hatagi og gibug-aton ang mosunod nga baruganan: Kon moduol kita sa Dios uban ang hingpit nga katuyoan sa kasingkasing ug mag-ampo alang sa Iyang tabang, magbaton og espiritu sa paghinulsol ug pagpaubos, ma-akses nato ang Iyang gahum sa pagluwas.

I-display ang mosunod nga pamahayag ni Presidente Henry B. Eyring:

President Henry B. Eyring

“Gusto kanunay sa Ginoo nga tultulan kita ngadto sa pagkaluwas pinaagi sa pagkahimo natong mas matarung. Nagkinahanglan kana og paghinulsol. Ug gikinahanglan ang pagpaubos. Mao nga ang pamaagi sa pagkaluwas nagkinahanglan kanunay og pagpaubos aron makahimo ang Ginoo sa pag-agak kanato pinaagi sa kamot kon asa man kita gusto Niyang dad-on latas sa mga kasamok ug ngadto sa pagkabalaan” (“The Power of Deliverance” [Brigham Young University devotional, Enero. 15, 2008], 4; speeches.byu.edu).

  • Sa unsang paagi ang paghinulsol, pagpaubos, ug pag-ampo makatabang nga atong ma-akses ang gahum sa Ginoo sa pagluwas?

  • Kanus-a kamo o ang tawo nga inyong nailhan miduol sa Ginoo para maluwas ug nakadawat niini? Sa unsang paagi kini nga kasinatian midugang sa inyong pagsalig kang Jesukristo?

Awhaga ang mga estudyante nga pamalandungan ang usa ka panahon dihang nasinati nila ang gahum sa Ginoo sa pagluwas sa ilang kinabuhi. Awhaga sila sa pagrekord sa ilang mga kasinatian para sa umaabut nga panumduman. Ikonsiderar ang pagdapit sa mga estudyante nga ipaambit ang ilang dili kaayo sagrado o personal kaayo nga mga kasinatian.

Mga Basahunon sa Estudyante