Hugot nga pagtuo, Paglaum, ug Gugmang putli

Pasiuna

Ang mga hiyas sa hugot nga pagtuo, paglaum, ug gugmang putli gikinahanglan para sa tanan nga nanghinaot nga makapuyo sa presensya sa atong Amahan sa Langit. Kini nga mga hiyas mga gasa gikan sa Dios nga moabut niadtong magtinguha sa pagsunod sa ehemplo ni Jesukristo.

Background nga Basahunon

Dieter F. Uchtdorf, “Ang Walay Kinutuban nga Gahum sa Paglaum,” Liahona, Nob. 2008, 21–24.
Richard G. Scott, “Ang Makapausab nga Gahum sa Hugot nga Pagtuo ug Maligdong nga Kinaiya,” Liahona, Nob. 2010, 43–46.

Mga Sugyot alang sa Pagtudlo

Ether 12:28; Moroni 10:18–21

Ang hugot nga pagtuo, paglaum ug gugmang putli mga mahinungdanon alang sa kaluwasan

Hangyoa ang klase sa daklit nga pagngalan og mga hiyas nga sa ilang hunahuna importante nga mabatunan samtang nia pa sa mortalidad. Dayon ipapangita nila asa niana nga mga hiyas ang sa ilang hunahuna pinakaimportante aron makasulod sa gingharian sa Dios.

Pahinumdumi ang mga estudyante nga samtang gitapos ni Moroni ang iyang pagtrabaho sa bulawang mga palid, gisulat niya ang katapusang mga pulong sa pag-awhag niadtong ugma damlag mobasa sa rekord. Isip usa ka bahin sa iyang tambag gihatagan niya og gibug-aton ang tulo ka hiyas nga importante alang sa atong kaluwasan. Dapita ang usa ka estudyante sa pagbasa og kusog sa Moroni 10:18–21, ug ipapangita sa klase kining tulo ka hiyas.

Ngano kaha nga ang mga hiyas sa hugot nga pagtuo, paglaum, ug gugmang putli mahinungdanon man kaayo sa atong kaluwasan?

Aron matabangan ang mga estudyante sa pagtubag niini nga pangutana, dapita ang mga estudyante nga basahon ang Ether 12:28, ug hangyoa ang klase sa pag-ila sa doktrina nga gitudlo niini nga bersikulo.

Unsa nga doktrina ang girekord niini nga bersikulo? (Kinahanglang mahibaloan sa mga estudyante ang mosunod: Ang pagpalambo og hugot nga pagtuo, paglaum, ug gugmang putli magdala kanato ngadto kang Jesukristo.)

Dapita ang mga estudyante sa pagpangita og mga baruganan ug doktrina sa tibuok niini nga leksyon nga makatabang nila sa pagsabut ug pagpalambo niining importanting mga hiyas sa hingpit nga paagi.

Alma 32:26–29, 37–41; Moroni 7:21, 25–28, 33

Ang hugot nga pagtuo magtugot kanato nga “mohupot sa matag maayo nga butang”

Isulat sa pisara ang Pagpalambo sa atong Pagtuo kang Jesukristo.

Pahinumdumi ang mga estudyante nga si propeta Alma migamit og analohiya sa nagtubo nga binhi sa pagtudlo sa mga Zoramite kon unsaon nga mapalambo ang pagtuo kang Jesukristo. Dapita ang pipila ka estudyante nga magpuli-puli sa pagbasa og kusog sa Alma 32:26–29. Hangyoa ang mga estudyante sa pagpangita sa mga pulong nga naghulagway unsay atong mahimo aron molambo ang atong pagtuo.

Dapita ang pipila ka estudyante sa pagpaambit sa mga pulong nga ilang nakita ug sa pagpasabut unsay gitudlo sa mga pulong kon unsaon nato sa pagpalambo ang atong pagtuo. Samtang mangita ang mga estudyante sa mga pulong, pwede nimong isulat kini ubos sa ulohan nga naa sa pisara. Ang mga pulong pweding maglakip sa mosunod: mopukaw ug modasig sa inyong mga galamhan; [pag]eksperimento sa akong mga pulong; [mag]tinguha sa pagtuo; makahatag og luna, nga ang mga pulong [ang binhi] matanom sa inyong kasingkasing. Kon gikinahanglan, tabangi nga masabtan sa mga estudyante nga ang pulong nga galamhan nagpasabut sa atong abilidad sa paghunahuna ug pagbuhat.

Sa bersikulo 29, ngano kaha nga gitudlo man ni Alma nga ang atong pagtuo dili pa mahingpit human mahimo kini nga eksperimento?
Unsa pa kaha ang gikinahanglan aron mahingpit ang pagtuo?

Dapita ang pipila ka estudyante nga magpuli-puli sa pagbasa og kusog sa Alma 32:37-41, ug ipapangita sa klase kon unsay angay natong buhaton aron mapalambo ang atong pagtuo nga gikinahanglan sa pag-angkon og kinabuhing dayon.

Unsa nga baruganan ang gitudlo ni Alma dinhi sa mga bersikulo kon sa unsang paagi padayon natong malig-on ang atong pagtuo? (Kinahanglang mahibaloan sa mga estudyante ang mosunod nga baruganan: Kon magkugi kita sa pag-alima sa pulong sa Dios sa atong kasingkasing, ang atong pagtuo ni Jesukristo motubo. Isulat sa pisara kini nga kamatuoran.)
Unsa kaha ang buot ipasabut sa magkugi sa pag-alima sa pulong? Unsa ang pipila ka makanunayon nga buhat ang atong mahimo sa pag-amuma sa pulong sa Dios ug makatabang nga mohugot ang atong pagtuo sulod sa atong kasingkasing?

Aron matabangan ang mga estudyante sa pagsabut kon sa unsang paagi maalimahan ang pulong sa Dios, i-display ang mosunod nga pamahayag ni Presidente Henry B. Eyring sa Unang Kapangulohan, ug ipabasa kini og kusog sa usa ka estudyante samtang ang klase mangita sa mahinungdanong mga paagi sa pag-alima sa atong pagtuo:

“Bisan pa man sa dakong pagtuo sa pagsunod sa Dios nga anaa kanato karon, kinahanglan kitang padayong maglig-on niini ug kanunay kining palagsikon. Ato kanang mabuhat pinaagi sa pagdesisyon karon nga mahimong mas abtik sa pagtuman ug mas determinado nga molahutay. Ang pagkat-on sa pagsugod og sayo ug mahimong mapadayunon mao ang mga yawe ngadto sa espirituhanong pagpangandam. …

“… Nagpalambo kita sa pagtuo aron makapasar sa mga pagsulay sa pagkamasulundon sulod sa dugayng panahon ug pinaagi sa atong inadlaw-adlaw nga mga pagpili. Makahimo kita sa pagdesisyon karon sa pagbuhat og dali sa bisan unsa nga gisugo sa Dios kanato. Ug makahimo kita sa pagdesisyon nga mahimong makanunayon diha sa ginagmay nga mga pagsulay sa pagkamasulundon nga nagpalambo sa pagtuo nga magdala kanato agi sa dagkong mga pagsulay, nga siguradong moabut” (“Espirituhanong Pagkaandam: Pagsugod og Sayo ug Magmakanunayon,” Ensign, Nob. 2005, 38, 40).

Unsay gisulti ni Presidente Eyring nga kinahanglan natong buhaton sa paglig-on o pag-alima sa atong pagtuo?
Ngano kaha nga ang mapadayunon ug inadlawng kamasulundon sa pulong sa Dios importante kaayo sa pagpalambo sa atong pagtuo ug pagsalig Kaniya?

Dapita ang pipila ka estudyante sa pagpaambit kon sa unsang paagi ang pagsunod sa mga baruganan nga gitudlo ni Alma nakaapekto sa ilang pagtuo ni Jesukristo.

Sultihi ang mga estudyante nga si propeta Mormon mipamatuod sa mahangturong importansya sa pagtuo kang Jesukristo. Dapita ang pipila ka estudyante nga magpuli-puli sa pagbasa og kusog sa pagpamatuod ni Mormon diha sa Moroni 7:21, 25–28, 33 samtang pamalandungan sa klase unsay ilang mahimo aron molambo ang ilang pagtuo sa Ginoo ug“makahupot” sa mga panalangin nga giila ni Mormon.

Ether 12:4, 8–9; Moroni 7:40–42

Ang paglaum usa ka ankla sa kalag

Dapita ang usa ka estudyante sa pagbasa og kusog sa Ether 12:8–9 ug ang lain nga mobasa og kusog sa Moroni 7:40–42. Hangyoa ang mga estudyante sa pagpangita sa mga hiyas nga atong makab-ot kon magpalambo kita og pagtuo.

Sumala niini nga mga tudling, unsa nga mga hiyas ang moabut gumikan sa atong pagtuo?

Basaha ang mosunod nga duha ka pamahayag, ug hangyoa ang mga estudyante sa pag-ila sa mga kalainan tali niini: (1) Naglaum ko nga dili moulan karon. (2) Duna koy paglaum nga kon maghinulsol ko, mapasaylo ko pinaagi sa Pag-ula ni Jesukristo.

Sa unsang paagi kini nga mga ekspresyon sa paglaum magkalahi? (Ang una mao ang dili sigurado nga panghinaot sa butang nga dili nato makontrolar, ug ang ikaduha usa ka ekspresyon sa pagsalig nga mohatud sa pagbuhat.)

Aron matabangan ang mga estudyante nga makasabut sa kahulugan sa paglaum diha sa kasulatan, dapita ang usa ka estudyante sa pagbasa sa mosunod nga pamahayag ni Presidente Dieter F. Uchtdorf sa Unang Kapangulohan:

“Ang paglaum mao … ang kanunayng pagsalig nga ang Ginoo motuman sa Iyang saad ngari kanato. Kini ang kamasaligon nga kon kita magkinabuhi sigun sa mga balaod sa Dios ug sa mga pulong sa mga propeta karon, kita makadawat sa gitinguhang mga panalangin sa umaabut. Kini mao ang pagtuo ug pagdahum nga ang atong mga pag-ampo pagatubagon. Kini makita diha sa pagkamasaligon, positibo nga hunahuna, pagkamadasigon, ug mapailubon nga pagpadayon.” (“Ang Walay Kinutubang Gahum sa Paglaum,” Ensigno Liahona, Nob. 2008, 22).

Dapita ang mga estudyante sa pagbasa og hilum sa Moroni 7:41 ug sa pagpangita unsay angay natong lauman samtang magpalambo kita og pagtuo kang Kristo.

Unsa nga baruganan ang gitudlo ni Mormon mahitungod sa paglaum dinhi sa bersikulo? (Kinahanglang mahibaloan sa mga estudyante ang mosunod: Kon kita magpakita og hugot nga pagtuo kang Jesukristo, makabaton kita og paglaum pinaagi sa Iyang Pag-ula kita pagabayawon ngadto sa kinabuhing dayon.)
Ngano kaha nga ang pagtuo kang Jesukristo ug paglaum magkalambigit gayud?

Dapita ang usa ka estudyante sa pagbasa og kusog sa Ether 12:4, ug ipapangita sa klase kon giunsa ni Moroni sa paghulagway ang paglaum.

Sa unsang paagi ang paggamit ni Mormon og ankla nakatudlo kanato mahitungod sa paglaum? Sa unsang paagi ang tawo nga nagkulang sa pagtuo sama ra sa usa ka sakayan nga walay ankla?

Dapita ang pipila ka estudyante sa pagpamatuod bahin sa paglaum nga miabut sa atong kinabuhi tungod sa pagtuo kang Jesukristo.

Ether 12:33–34; Moroni 7:43–48

Ang gugma nga putli mao ang tiunay nga gugma ni Kristo

Dapita ang mga estudyante sa pagbasa og kusog sa Moroni 7:43–44, ug ipapangita sa mga estudyante kon unsa nga mga kinaiya ang gideklarar ni Mormon nga kinahanglan natong palamboon sa higayon nga may pagtuo na kita ug paglaum.

I-display ang mosunod nga pamahayag ni Presidente Ezra Taft Benson (1899–1994), ug dapita ang usa ka estudyante sa pagbasa niini og kusog:

“Kon tinuoray kitang magtinguha nga mas mahisama sa atong Manluluwas ug Agalon, sa ingon niana ang pagkat-on sa paghigugma sama sa Iyang paghigugma kinahanglan nga maoy atong pinakataas nga tumong. Gitawag ni Mormon ang gugmang putli og ‘labing mahinungdanon sa tanan’ (Moro. 7:46)” (“Godly Characteristics of the Master,” Ensign, Nob. 1986, 47).

Sa pagklaro nganong ang gugmang putli usa ka hiyas nga importanting tinguhaon, dapita ang pipila ka estudyante nga magpuli-puli sa pagbasa og kusog sa Moroni 7:45–47. Ipasabut nga kini nga mga bersikulo makatabang sa atong pagsabut sa gugmang putli pinaagi sa paglista kon unsa ang gugmang putli ug unsay dili.

Unsa nga mga pulong o hugpong sa mga pulong niini nga mga bersikulo ang naghisgot sa gugmang putli?
Unsa nga mga hunahuna o panabut ang inyong mapaambit mahitungod sa mga kinaiya sa gugmang putli nga nalista sa bersikulo 45?

Dapita ang usa ka estudyante sa pagbasa og kusog sa Moroni 7:48.

Unsay gitambag ni Mormon nga atong buhaton samtang magtinguha kita sa gasa sa gugmang putli? (Tabangi nga mahibaloan sa mga estudyante ang mosunod nga baruganan: Kon mag-ampo kita uban sa kusog sa atong kasingkasing ug mosunod ni Jesukristo, mapuno kita sa gugmang putli.)
Sa unsang paagi ang pagtinguha og gasa sa gugmang putli makatabang nato nga mas mahimong maayong mga sumusunod ni Jesukristo?

Dapita ang usa ka estudyante sa pagbasa og kusog sa Ether 12:33–34 samtang ang klase mangita sa relasyon tali sa gugmang putli ug sa Pag-ula ni Jesukristo.

Unsa ang relasyon tali sa gugmang putli ug sa Pag-ula?

Hangyoa ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Ang mas maayong depinisyon sa ‘tiunay nga gugma ni Kristo,’ … dili ang unsay atong gipaninguha isip mga Kristyanos nga sa kadaghanan napakyas ra sa pagpakita niini ngadto sa uban apan hinoon unsa ang hingpit nga kalampusan ni Kristo ang gipakita ngari kanato. Ang tinuod nga gugma nga putli nahibaloan lamang sa makausa. Kini gipakita sa hingpit ug sa lunsay nga paagi diha sa dili mapakyas, dili katupngan, ug maulaong gugma ni Kristo alang kanato. … Mao kini ang gugma ni Kristo alang kanato nga ‘mopailub sa tanang mga butang, motuo sa tanang mga butang, molaum sa tanang mga butang, moantus sa tanang mga butang.’ Mao kini sigun sa gipakita ni Kristo nga ‘ang gugma nga putli dili gayud [mapakyas].’ Mao kini ang gugma nga putli—iyang tiunay nga gugma alang kanato—kon wala kini kita walay kapuslanan, walay paglaum, sa tanan nga mga lalaki ug babaye mao ang labing alaut. Sa pagkatinuod, kadtong makita nga nagbaton niini nga mga panalangin sa iyang gugma sa katapusang adlaw—sa Pag-ula, sa Pagkabanhaw, kinabuhing dayon, mahangturong saad—siguradong maayo alang kanila” (Christ and the New Covenant [1997], 336).

Sa unsang paagi nakatabang si Elder Holland kaninyo sa pagsabut nganong “ang gugmamg putli dili [mapakyas]” ug kon ngano nga kini ang “pinakadako” sa tanang espiritwal nga gasa?
Unsa kaha ang inyong buhaton aron mapaambit ngadto sa uban ang gugma nga putli ni Jesukristo nga andam kaayo Niyang gipakigbahin kaninyo?

Hangyoa ang mga estudyante sa pagribyu sa Moroni 7:45 ug dayon magtakda og tumong sa pag-ampo ug pagbuhat aron mas mahingpit ang pagpalambo og usa ka kinaiya sa gugma nga putli. Ipamatuod ang balaang tabang nga inyong nadawat samtang naningkamot kamo sa pagpalambo og gugmang putli sa inyong kaugalingon.

Mga Basahunon sa Estudyante

Alma 32:26–29, 37–41; Ether 12:4, 8–9, 28, 33–34; Moroni 7:21, 25–28, 33, 40–48; 10:18–21.
Dieter F. Uchtdorf, “Ang Walay Kinutuban nga Gahum sa Paglaum,” Liahona, Nob. 2008, 21–24.
Richard G. Scott, “Ang Makapausab nga Gahum sa Hugot nga Pagtuo ug Maligdong nga Kinaiya,” Liahona, Nob. 2010, 43–46.