Ang Walay Kinutuban nga Pag-ula ni Jesukristo

Pasiuna

Ang Pag-ula ni Jesukristo—ang pinakatalagsaong hitabo sukad—naghimong posible nga ang tanang tawo mapasaylo gikan sa sala ug makapuyo uban sa Langitnong Amahan ug ni Jesukristo hangtod sa kahangturan. Tungod sa Pag-ula, ang tanan mabanhaw ug makabalik sa presensya sa Dios aron mahukman. Tungod kay ang Pag-ula nagkinahanglan nga mag-antus si Jesukristo sa dili maihap nga mga paagi, duna Siyay hingpit nga pagbati sa matag usa kanato.

Background nga Basahunon

Boyd K. Packer, “Ang Pag-ula,” Liahona, Nob. 2012, 75–78.
D. Todd Christofferson, “Katubsanan,” Liahona, Mayo 2013, 109–12.

Mga Sugyot alang sa Pagtudlo

Mosiah 3:5–11; Alma 34:8–12

Si Jesukristo lamang ang makatuman sa walay kinutubang Pag-ula

I-display ug dapita ang usa ka estudyante sa pagbasa og kusog sa mosunod nga pamahayag ni Presidente James E. Faust (1920–2007) sa Unang Kapangulohan:

“Gusto kong mamulong mahitungod sa pinakatalagsaong hitabo sa tanang kasaysayan. Kana nga nag-inusarang hitabo mao ang dili ikakumpara nga Pag-ula sa atong Ginoo ug Manluluwas, nga si Jesukristo. Kadto ang dili hilabwan nga buhat nga sukad nahitabo” (“The Atonement: Our Greatest Hope,” Ensign, Nob. 2001, 18).

Dapita ang duha o tulo ka estudyante nga magpuli-puli sa pagbasa og kusog sa Alma 34:8–12 samtang magmarka ang klase sa mga key word ug mga pulong nga naghulagway nganong usa ka pinakatalagsaong hitabo sa kasaysayan ang Pag-ula.

Ngano nga ang Pag-ula ni Jesukristo pinakatalagsaon man nga hitabo sukad? (Ipasabut og maayo kini nga kamatuoran: Walay kinutuban ug mahangturon ang Pag-ula ni Jesukristo, naghimong posible sa kaluwasan para sa tanang katawhan.)

Ikonsiderar ang pagpaambit sa mosunod nga pamayahag ni Presidente Russell M. Nelson sa Korum sa Napulog Duha ka mga Apostoles:

“Ang usa ka pag-ula nga walay kinutuban maoy gikinahanglan aron sa pagtubos ni Adan, Eva, ug sa tanan nilang kaliwatan. … Sumala sa mahangturong balaod, kadto nga pag-ula nagkinahanglan og personal nga pagsakripisyo sa usa ka imortal nga binuhat nga dili ulipon sa kamatayon. Gani gikinahanglan Siyang mamatay ug mopabangon pag-usab sa Iyang kaugalingong lawas. Ang Manluluwas lamang ang bugtong tawo nga makatuman niini. Gikan sa Iyang inahan napanunod Niya ang gahum nga mamatay. Gikan sa Iyang Amahan nakaangkon Siya og gahum batok sa kamatayon” (“Constancy amid Change,” Ensign, Nob. 1993, 34).

Ngano nga si Jesukristo lamang ang makatubos sa tanang katawhan? (Kay imortal Siya nga binuhat nga dili mamatay.)
Sa unsang mga paagi walay kinutuban ug mahangturon ang matubsanong sakripisyo ni Jesukristo?

Aron makatabang sa pagtubag niini nga pangutana, i-display ang mosunod nga pamahayag ni Presidente Russel M. Nelson, ug ipabasa kini og kusog sa usa ka estudyante:

“Ang Pag-ula ni [Jesukristo] walay kinutuban—walay katapusan. Wala usab kini kinutuban nga niana ang tanang katawhan maluwas gikan sa walay katapusang kamatayon. Wala kini kinutuban gumikan sa dili masukod Niya nga pag-antus. … Wala kini kinutuban sa gidak-on—kinahanglan kining pagahimuon sa usa ka higayon alang sa tanan. Ug ang grasya sa Pag-ula modangat dili lang sa walay kinutubang gidaghanon sa katawhan, apan ngadto usab sa walay kinutubang gidaghanon sa mga kalibutan nga Iyang gilalang. Wala kini kinutuban lapas sa bisan unsang matang sa sukdanan o mortal nga panabut” (“The Atonement,” Ensign, Nob. 1996, 35).

Ipasabut nga dapit sa katapusan sa iyang paghari, gitudloan ni Haring Benjamin ang iyang katawhan nga ang anghel mipahayag kaniya sa mensahe bahin sa “malipayon nga mga balita sa dako nga kalipay” nga maghimo sa katawhan nga “mapuno uban sa hingpit nga kalipay” (Mosiah 3:2–4). Papuli-puliha sa pagbasa og kusog ang pipila ka mga estudyante sa Mosiah 3:5–11 samtang magsunod ang klase, nga mangita sa “malipayon nga mga balita ” nga gihulagway ni Haring Benjamin.

Unsa kaha ang mga mensahe niini nga mga bersikulo ang maoy hinungdan nga napuno sa hingpit nga kalipay ang katawhan ni Haring Benjamin? (Samtang motubag ang mga estudyante, ipasabut og maayo nga gihimong posible ni Jesukristo ang kaluwasan.)
Unsang mga pulonga ang naghulagway sa kantidad nga gibayad ni Jesukristo para sa atong kaluwasan?

Dapita ang usa ka estudyante sa pagbasa og kusog sa mosunod nga pamahayag ni Elder James E. Talmage (1862–1933) sa Korum sa Napulog Duha ka mga Apostoles:

“Ang paghigwaos ni Kristo didto sa tanaman dili matugkad sa may kinutubang hunahuna, ang hilabihang kasakit niini ug ang hinungdan. … Nanglimbasog ug nag-agulo Siya tungod sa gibug-aton nga walay laing binuhat nga mipuyo sa yuta ang makahimo sa pagtuo nga kini posible. Dili kadto usa ka pisikal nga kasakit, o mental nga kapait lamang, nga nakapahimo Kaniya nga nag-antus sa ingon nga kasakit nga nakahimo sa pag-agas sa dugo gikan sa matag lungag sa panit; apan usa ka espirituhanong paghingutas sa kalag nga ang Dios lamang ang makahimo sa pagsinati. Walay laing tawo, bisan unsa pa ka dako sa iyang mga gahum sa pisikal o sa mental nga paglahutay, ang makaantus sa ingon” (Jesus the Christ, 3rd ed. [1916], 613).

Unsay imong nahunahuna ug pagbati dihang namalandong ka sa grabe nga pag-antus ni Jesukristo para kanato?

2 Nephi 9:6–12, 20–22

Gibuntog ni Jesukristo ang pisikal ug espiritwal nga kamatayon

Ipahunahuna sa mga estudyante kon unsa unta ang mahitabo kon wala ang Pag-ula. Aron matabangan ang mga estudyante nga ma-visualize ang kahimtang sa katawhan kon wala ang Pag-ula, ipabasa og kusog sa usa ka estudyante ang 2 Nephi 9:6–9. Hangyoa ang klase sa pagsunod, nga mangita sa mga pulong nga naghulagway kon unsa kaha ang atong dangatan kon wala ang Pag-ula.

Sumala ni propeta Jacob, unsay mahitabo sa atong lawas kon wala ang Pag-ula? Unsay mahitabo sa atong mga espiritu?

Pahinumdumi ang mga estudyante nga ang sentro nga mensahe sa ebanghelyo mao nga tungod sa Pag-ula ni Jesukristo dili na kinahanglang mosinati pa kita niining grabe nga kahimtang.

Papuli-puliha sa pagbasa og kusog ang duha ka estudyante gikan sa 2 Nephi 9:10–12, 20–22 samtang mangita ang klase sa mga paagi nga giluwas kita gikan sa espiritwal ug pisikal nga kamatayon.

Unsa ang gihatag kanatong mga paagi aron makalingkawas gikan sa espiritwal ug pisikal nga kamatayon? (Tabangi nga ma-summarize sa mga estudyante kini nga doktrina: Pinaagi sa Iyang Pag-ula, gibuntog ni Jesukristo ang mga epekto sa pisikal ug espiritwal nga kamatayon.)
Unsa ang gitudlo niini nga mga bersikulo mahitungod sa mga panalangin sa Pagkabanhaw? (Ang atong pisikal nga lawas ug atong espiritu pagahiusahon pag-usab para sa kahangturan. Madala kita og balik sa presensya sa Dios alang sa paghukom.)

I-display ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug ipabasa kini og kusog sa usa ka estudyante:

“Pinaagi sa Iyang Pag-ula ug Pagkabanhaw, si Jesukristo nakabuntog sa tanang aspeto sa Pagkapukan. Ang pisikal nga kamatayon temporaryo lang, ug gani ang espirituhanong kamatayon adunay katapusan, kay kitang tanan mobalik ngadto sa presensya sa Dios, maayo kay temporaryo lang, aron pagahukman” (“Ang Pagkabanhaw ni Jesukristo,” Liahona, Mayo 2014, 112).

Kanus-a man ninyo gibati ang pagpasalamat nga si Jesukristo mibuntog sa pisikal ug espiritwal nga kamatayon?

Mosiah 3:11, 16; 15:7–9; Alma 7:11–13; Moroni 8:8–12; Doktrina ug mga Pakigsaad 137:7–9

Pinaagi sa Iyang Pag-ula, gitanyag ni Jesukristo ang katubsanan sa tanang katawhan

Pahinumdumi ang mga estudyante nga agig dugang sa pagpalingkawas sa tanang katawhan gikan sa pisikal ug espirituhanong kamatayon nga resulta sa Pagkapukan, si Jesukristo makapalingkawas kanato gikan sa espirituhanong kamatayon nga miresulta tungod sa kaugalingon natong mga sala. Dapita ang usa ka estudyante sa pagbasa og kusog sa Mosiah 15:7–9 samtang ang klase mangita kon sa unsang paagi gihimong posible ni Kristo nga kita matubos sa atong mga sala.

Unsa man ang gitudlo niini nga mga bersikulo kon sa unsang paagi gihimong posible ni Kristo nga kita matubos sa atong mga sala? (Ipasabut og maayo kini nga doktrina: Pinaagi sa Pag-ula, gibugto ni Jesukristo ang mga higot sa kamatayon ug gidala sa Iyang Kaugalingon ang atong mga sala, nagtagbaw sa gipangayo sa hustisya ug sa pag-angkon og gahum nga mahimo Niya ang pagpangamuyo para kanato.)
Unsa ang ipasabut sa pulong nga pagpangamuyo? Ang (pagpangamuyo mao ang buhat sa pagpataliwala tali sa mga pundok aron matabangan nga magkauliay sila sa ilang mga problema. Niini nga sitwasyon, nagpataliwala si Jesus kanato ug sa Dios aron makig-uli sa naguba nga relasyon gumikan sa atong mga sala.)

Pasabta nga ang Basahon ni Mormon magtabang nga atong masabtan sa unsang paagi ang Pag-ula ni Jesukristo moluwas sa gagmayng mga bata ug sa mga tawo nga nangamatay nga wala makadawat sa ebanghelyo o wala mabunyagi.

Ipabasa og hilum sa usa ka grupo sa klase ang Mosiah 3:16 ug i-cross-reference kini sa Moroni 8:8–12. Ipabasa og hilum sa laing grupo ang Mosiah 3:11 ug i-cross-reference kini sa Doktrina ug mga Pakigsaad 137:7–9.

Unsa ang gitudlo niini nga mga bersikulo mahitungod sa kaluwasan sa mga bata kinsa namatay sa wala pa mabunyagi?
Unsa ang gitudlo niini nga mga bersikulo mahitungod sa kaluwasan niadtong kinsa “namatay nga walay kasayuran sa kabubut-on sa Dios”? (Mosiah 3:11).

Sultihi ang mga estudyante nga pinaagi sa Pag-ula nakaangkon ang Manluluwas og perpektong pagbati nga makasabut kanato ug motabang kanato latas sa mga hagit sa mortalidad. Ipa-search sa mga estudyante ang Alma 7:11–13, nga mangita sa mga pulong nga naghulagway sa mga hagit sa pagka-mortal nga gisinati ni Jesukristo isip kabahin sa Pag-ula. Samtang magreport ang mga estudyante sa ilang mga nakita, ilista sa pisara ang mosunod nga mga pulong: mga kasakit, mga balatian, mga tintasyon, mga sakit, kamatayon, ug mga kahuyang (mga kaluya o kakulangan), ug mga sala. Ipasabut ang pulong nga “sa matag matang” nga naa sa Alma 7:11, ug hangyoa ang mga estudyante sa pagpaambit og mga ehemplo sa managlahing kahimtang nga gilista sa pisara.

Ipasabut nga ang mga pulong nga “modala diha kaniya” gibalik-balik sa daghang higayon diha sa bersikulo 11–13. (Pahinumdom: Ang pag-ila sa mga gibalik-balik usa ka kahanas sa pagtuon sa kasulatan nga pwede nimong hatagan og gibug-aton dinhi. Ang pagkamatikud sa mga gibalik-balik sa kasulatan makatabang sa mga tigkat-on nga makaila sa mahinungdanong mga punto nga hatagan og gibug-aton.)

Sumala sa mga bersikulo 11–12, nganong si Jesukristo “midala diha kaniya” sa atong mga kasakit, mga sakit, mga balatian, ug ubang mga kondisyon nga gilista diha sa pisara? (Tabangi nga mahibaloan sa mga estudyante kini nga baruganan: Ang Manluluwas midala diha sa Iyang kaugalingon sa atong mga kasakit, mga sakit, ug mga balatian aron Siya makatabang nato sa atong pag-atubang sa mga hagit sa pagkamortal.)

I-display ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Ako nagpamatuod nga ang Pag-ula sa Manluluwas motangtang gikan kanato dili lang kay sa gibug-aton sa atong mga sala, apan usab sa gibug-aton sa atong mga kapakyasan ug kagul-anan, sa atong kasakit ug ka walay paglaum [tan-awa sa Alma 7:11–12]. Gikan sa sinugdanan, ang pagsalig niana nga pagtabang nakahatag nato og hinungdan ug paagi nga molambo, usa ka pagdasig sa paglikay sa atong kaugalingon gikan sa mga sala ug maninguha sa atong kaluwasan” (“Mga Butang nga Guba Mahimong Ayuhon,” Liahona, Mayo 2006, 70–71).

Sa unsang paagi ang pagsalig sa Pag-ula sa Manluluws makaapekto sa inyong mga buhat ug sa inyong mahangturong panglantaw?
Sa unsang paagi ang pagsabut sa Alma 7:11–13 makatabang kaninyo kon nag-atubang kamo og mga hagit?

Dapita ang mga estudyante sa pagpaambit og mga kasinatian dihang gibati nila ang gahum sa Pag-ula ni Jesukristo sa ilang kinabuhi (pasidan-i sila nga dili nila ipaambit ang bisan unsa nga sagrado o personal kaayo).

Dapita ang mga estudyante nga isulat unsay ilang mahimo aron mas maggamit ang makaayo ug makalig-on nga gahum sa Pag-ula sa Manluluwas diha sa kaugalingon nilang kinabuhi. Dapita sila nga lihukon nila kana nga mga impresyon.

Mga Basahunon sa Estudyante

2 Nephi 9:6–12, 20–22; Mosiah 3:5–11, 16; 15:7–9; Alma 7:11–13; 34:8–12; Moroni 8:8–12; Doktrina ug mga Pakigsaad 137:7–9.
Boyd K. Packer, “Ang Pag-ula,” Liahona, Nob. 2012, 75–78.
D. Todd Christofferson, “Katubsanan,” Liahona, Mayo 2013, 109–12.