Ang Gahum sa Pulong

Pasiuna

Ang mga propeta sa Basahon ni Mormon naningkamot gayud aron makapagawas ug makapreserbar og kasulatan nga mopanalangin kanato sa atong panahon. Niini nga leksyon, mapahinumduman ang mga estudyante nga kon magtuon sila ug mosunod sa mga pulong sa mga propeta, makadawat sila og gahum sa pagbuntog ni Satanas, mosuhid sa ilang dalan sa tibuok mortalidad, ug sa katapusan makaangkon og kinabuhing dayon.

Background nga Basahunon

Richard G. Scott, “Ang Gahum sa Kasulatan,” Liahona, Nob. 2011, 6–8.
D. Todd Christofferson, “Ang Panalangin sa Kasulatan,” Liahona, Mayo 2010, 32–35.
“Ang Gahum sa Pulong kapitulo 8 sa Mga Pagtulun-an sa mga Presidente sa Simbahan: Ezra Taft Benson (2014), 137–50.

Mga Sugyot alang sa Pagtudlo

1 Nephi 3:19–20; 5:21–22; Omni 1:14–17; Mosiah 1:3–5; Alma 37:3–4, 8

Ang kaimportante sa kasulatan

I-display ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug pangutan-a ang mga estudyante unsaon nila sa pagtubag ang iyang gipangutana:

“Gani kita tingali utangan og mas dako pa niadtong kinsa matinud-anong mitala ug mitipig sa pulong sulod sa tanang katuigan, kasagaran inubanan sa makugihong paningkamot ug sakripisyo—ni Moises, Isaias, Abraham, Juan, Pablo, Nephi, Mormon, Joseph Smith, ug daghan pang uban. Unsa man ang ilang nahibaloan kabahin sa kaimportante sa mga kasulatan nga kinahanglan usab natong mahibaloan?” (“Ang mga Panalangin sa Kasulatan,” Liahona, Mayo 2010, 32).

Unsa kaha ang nahibaloan niini nga mga tigsulat mahitungod sa kaimportante sa mga kasulatan nga angay usab natong mahibaloan?

Pahinumdumi ang mga estudyante nga si Nephi ug ang iyang mga igsoon gisugo sa Ginoo sa pagbalik sa Jerusalem aron makuha ang mga palid nga tumbaga. Dapita ang mga estudyante nga magpuli-puli sa pagbasa og kusog sugod sa 1 Nephi 3:19–20 ug 5:21–22 samtang ang klase mangita sa mga rason nganong importante kaayo ang mga palid nga tumbaga para kang Lehi ug sa iyang pamilya.

Sumala niini nga mga bersikulo, nganong importante kaayo ang mga kasulatan? (Kinahanglang mahibaloan sa mga estudyante ang mosunod nga kamatuoran: Ang mga kasulatan nagpreserbar sa mga pulong sa Dios ug mga sugo nga gisulti pinaagi sa Iyang mga propeta.)

Aron mahatagan og gibug-aton kini nga kamatuoran, pahinumdumi ang mga estudyante nga mga gatusan ka tuig human miabut ang pamilya ni Lehi sa yutang saad, nakasugat ang ilang kaliwatan og mga tawo sa Zarahemla (mga Mulekites), kinsa mibiyahe gikan sa Jerusalem wala madugay human mibiya ang pamilya ni Lehi.

Dapita ang mga estudyante sa pagbasa og hilum sa Omni 1:14–17 ug sa Mosiah 1:3–5 ug timan-i ang kalainan tali niadtong dunay mga kasulatan (mga Nephites) ug niadtong wala (mga Mulekites). (Pahinumdom: Aron makakat-on mahitungod sa “pagkumpara ug pagsukwahi” sa kahanas sa pagtuon, tan-awa sa Gospel Teaching and Learning: A Handbook for Teachers and Leaders sa Seminaries and Institutes of Religion [2012], 22.)

Unsa ang nasinati nga mga sangputanan sa mga Mulekite tungod kay wala silay mga kasulatan? (Tan-awa usab sa 1 Nephi 4:13.)
Unsa ang miabut nga mga panalangin sa mga Nephite tungod kay duna silay mga kasulatan?

Dapita ang usa ka estudyante sa pagbasa og kusog sa Alma 37:3–4, 8 samtang ang klase mangita sa mga panalangin nga nadawat sa mga Nephite gikan sa mga palid nga tumbaga.

Sumala sa bersikulo 8, unsa ang ubang nadawat nga mga panalangin sa mga Nephite gikan sa mga palid nga tumbaga?
Unsa kaha ang buot ipasabut ni Alma dihang miingon siya nga ang mga kasulatan “mipatubo sa mga panumduman niini nga mga katawhan”?

Aron matabangan nga maklaro ang kahulugan niini nga mga pulong, ipabasa og kusog sa usa ka estudyante ang mosunod nga pamahayag ni Elder D. Todd Christofferson samtang ang klase mangita og dugang nga mga panabut kon sa unsang paagi mipadako sa atong panumduman ang mga kasulatan:

“Ang mga kasulatan mopatubo sa atong panumduman pinaagi sa pagtabang kanato aron kanunayng mahinumduman ang Ginoo ug sa atong relasyon ngadto Kaniya ug sa Amahan. Kini nagpahinumdom kanato kon unsa ang atong nasayran sa atong kinabuhi sa wala pa sa yuta. Ug kini nagpatubo sa atong panumduman sa laing bahin pinaagi sa pagtudlo kanato kabahin sa kapanahunan, katawhan, ug mga panghitabo, nga kita mismo wala makasinati. …

“Ang mga kasulatan usab nagpatubo sa atong panumduman pinaagi sa pagtabang kanato nga dili makalimot unsa ang nakat-unan nato ug sa nag-unang mga katigulangan. Kinsa kadtong wala motuo o mibaliwala sa narekord nga pulong sa Dios sa ngadto-ngadto mohunong sa pagtuo Kaniya ug makalimot sa katuyoan sa ilang pagpakabuhi” (“Ang Panalangin sa Kasulatan,” 33).

Unsa ang pipila ka paagi diin ang mga kasulatan mopatubo sa atong panumduman?
Unsa nga mga doktrina, baruganan, o mga istorya diha sa mga kasulatan ang mipatubo o midugang sa inyong panumduman bahin sa Ginoo ug sa inyong relasyon Kaniya?

1 Nephi 8:21–24, 29–30; 15:23–24; 2 Nephi 3:12; 32:3; 33:4–5; Jacob 2:8; 7:10–11; Alma 5:10–13; 31:5; 37:2, 8–10; Helaman 3:29–30; 15:7–8

Ang Pulong sa Dios nagdala og panalangin

Dapita ang usa ka estudyante sa pag-summarize og kadali sa panan-awon ni Lehi sa kahoy sa kinabuhi (tan-awa sa 1 Nephi 8). Dayon pangutan-a ang klase kon unsay girepresentaran sa gunitanan nga puthaw ug nganong importante man kaayo kadto nga bahin sa panan-awon. Kon gikinahanglan, dapita ang mga estudyante sa pagbasa sa 1 Nephi 8:21–24, 29–30.

Hangyoa ang mga estudyante sa pagsiksik sa 1 Nephi 15:23–24 ug pagpangita sa mga panalangin nga moabut niadtong hugot nga manggunit sa pulong sa Dios. Mahimo nimong awhagon ang mga estudyante nga markahan ang unsay ilang nakit-an.

Unsa kaha ang buot ipasabut sa “hugot nga manggunit” sa pulong sa Dios?
Sumala niini nga mga bersikulo, unsa nga mga panalangin ang atong madawat pinaagi sa hugot nga pagpanggunit sa pulong sa Dios? (Kinahanglang mahibaloan sa mga estudyante ang mosunod nga baruganan: Kon hugot kitang manggunit sa pulong sa Dios, dili gayud malaglag ang atong pagka-espiritwal ug ang kaaway dili makabuntog kanato.)

I-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles ug dapita ang usa ka estudyante sa pagbasa og kusog niini:

“Pasugyuta ko nga ang hugot nga paggunit sa gunitanan nga puthaw naglakip, labi na gayud, sa mainampoon, makanunayon, ug kinasingkasing nga paggamit sa balaang mga kasulatan isip sigurado nga tinubdan sa gipadayag nga kamatuoran ug isip masaligan nga giya sa panaw diha sa higpit ug pig-ot nga dalan paingon ngadto sa kahoy sa kinabuhi—gani ngadto ni Ginoong Jesukristo” (“Damgo ni Lehi: Hugot nga Paggunit sa Gunitanan,” Liahona, Okt. 2011, 36).

Ipasabut nga ang pipila ka mga propeta sa Basahon ni Mormon mitudlo og dugang nga mga panalangin nga moabut niadtong hugot nga manggunit sa pulong sa Dios. Isulat sa pisara ang mosunod nga mga pakisayran. Dapita ang matag estudyante nga tun-an ang usa o duha, mangita aron madiskubrihan ang mga panalangin nga moabut gumikan sa pagtuon sa pulong sa Dios. Dayon ipasulat sa mga estudyante diha sa pisara ang mga panalangin nga ilang nailhan tupad sa katugma nga pakisayran:

Kanus-a kamo nakasinati og usa niini nga mga panalangin?

Dapita ang mga estudyante sa paghulagway unsay mahimo sa usa ka young single adult sa inadlawng kinabuhi aron hugot nga makapanggunit sa gunitanan nga puthaw.

Pangutan-a ang mga estudyante kon ang ilang paggamit sa mga kasulatan mahulagway ba usab nga hugot nga paggunit sa gunitanan nga puthaw.

Dapita ang mga estudyante nga ikonsiderar ang pagsulat og pihong mga butang nga ilang mahimo aron hugot silang makagunit sa gunitanan nga puthaw ug mas madawat sa hingpit kini nga mga panalangin.

Alma 37:38–46

Ang pulong sa Dios mogiya ngadto sa kinabuhing dayon

Pahinumdumi ang mga estudyante nga si propeta Lehi nakadawat og instrumento gikan sa Ginoo nga gitawag og Liahona. Dapita ang usa ka estudyante sa pagbasa og kusog sa Alma 37:38–42 samtang ang klase mangita kon sa unsang paagi mipanalangin ang Liahona sa pamilya ni Lehi.

Sa unsang paagi ang Liahona mipanalangin sa pamilya ni Lehi?
Unsa ang gikinahanglan sa pamilya ni Lehi aron molihok og tarung ang Liahona? (Ang kompas molihok lamang kon mosunod sila sa mga instruksyon ug mopakita og pagtuo ug pagkugi. Tan-awa usab sa 1 Nephi 16:28.)

Ipasabut nga mitudlo si Alma nga ang paggamit sa Liahona usa ka “sumbanan” ug “pagkasama”—buot ipasabut usa ka simbolo—kon unsaon nato sa paggamit ang pulong sa Dios. Ipabasa og kusog sa usa ka estudyante ang Alma 37:43–46 samtang mangita ang klase sa mga pagkasusama nga gihisgutan ni Alma tali sa Liahona ug sa mga pulong sa Dios.

Unsa nga baruganan kabahin sa mga pulong ni Kristo ang gitudlo ni Alma niini nga mga bersikulo? (Kinahanglang mahibaloan sa mga estudyante ang mosunod nga baruganan: Kon patalinghugan nato ang mga pulong ni Kristo, magiyahan kita sa tul-id nga dalan padulong sa kinabuhing dayon. Mahimo nimong awhagon ang mga estudyante nga markahan ang pulong nga kon diha sa mga bersikulo 45–46. Sultihi ang mga estudyante nga ang pagkat-on unsaon sa pag-ila ang hinungdan-ug-epekto nga relasyon usa ka importante nga kahanas nga maoy makapalambo sa ilang pagtuon sa mga kasulatan.)
Unsa kaha ang ipasabut sa magiyahan sa “tul-id nga agianan” padulong sa kinabuhing dayon?
Unsa ang pipila ka butang nga atong mahimo aron mahimo nato ang lapas pa kay sa magbasa lang sa mga pulong ni Kristo ug masugdan ang “pagpatalinghug” niini?

Tapusa ang leksyon pinaagi sa pag-display sa mosunod nga pamahayag ni Elder David A. Bednar, ug dapita ang mga estudyante sa pagbasa niini ug pagpamalandong sa mga pangutana ni Elder Bednar.

“Ang kanunay nga pag-agas sa buhi nga tubig mas maayo kaayo kay sa panagsa nga pag-inom.

“Kamo ba ug ako nagbasa ba matag adlaw, nagtuon, ug nagsiksik sa mga kasulatan sa paagi nga kita hugot nga makapanggunit sa gunitanan nga puthaw … ? Kamo ba ug ako nagpadayon padulong sa tuburan sa buhi nga tubig—nga misalig sa pulong sa Dios? Importante kini nga mga pangutana aron makapamalandong sa mainampoong paagi ang matag usa kanato” (“A Reservoir of Living Water” [fireside sa Church Educational System alang sa mga young adult, Peb. 4, 2007], 7, lds.org/broadcasts).

Pangutan-a kon duna bay mga estudyante ang gustong mopaambit sa ilang mga pagpamatuod kon sa unsang paagi ang pagtuon sa pulong sa Dios mipanalangin kanila. Awhaga ang mga estudyante nga ipadayon ang pagpamalandong sa mga gipangutana ni Elder Bednar, ug dapita sila sa pagsunod uban sa mga panghunahuna ug mga impresyon nga ilang nadawat atol sa leksyon aron himoon nga mas epektibo ug makahuluganon ang ilang pagtuon sa pulong sa Dios.

Mga Basahunon sa Estudyante

1 Nephi 3:19–20; 5:21–22; 8:21–24, 29–30; 15:23–24; 2 Nephi 3:12; 32:3; 33:4–5; Jacob 2:8; 7:10–11; Omni 1:14–17; Mosiah 1:3–5; Alma 5:10–13; 31:5; 37:2–4, 8–10, 38–46; Helaman 3:29–30; 15:7–8.
Richard G. Scott, “Ang Gahum sa Kasulatan,” Liahona, Nob. 2011, 6–8.