Ang Basahon ni Mormon Lain Pang Tugon ni Jesukristo

Pasiuna

Kadtong magtuon sa mga pagtulun-an ug doktrina sa Basahon ni Mormon masayud nga si Jesus mao ang Kristo. Niini nga leksyon, makat-unan sa mga estudyante nga ang nag-unang mga tagsulat mga nakasaksi gayud sa Anak sa Dios ug ang ilang mga pulong magtabang nga mapalawman pa ang atong panabut ug pagpamatuod mahitungod ni Jesukristo ug sa Iyang ebanghelyo.

Background nga Basahunon

Gordon B. Hinckley, “A Testimony Vibrant and True,” Ensign, Ago. 2005, 2–6.
“Ang Basahon ni Mormon—Sukaranang Bato sa Atong Tinuohan,” kapitulo 9 sa Mga Pagtulun-an sa mga Presidente sa Simbahan: Ezra Taft Benson (2014), 151–62.

Mga Sugyot alang sa Pagtudlo

1 Nephi 13:40; 2 Nephi 25:17–18; Alma 33:22–23

Ang Basahon ni Mormon usa ka tugon ni Jesukristo

I-display ang mosunod nga pamahayag ni Propeta Joseph Smith (1805–44), ug ipabasa kini og kusog sa usa ka estudyante:

“Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (pasiuna sa Basahon ni Mormon).

Hain sa mga gipahayag sa Propeta mahitungod sa Basahon ni Mormon diin kamo dunay pagpamatuod, ug ngano?
Sa unsang paagi ang pamahayag sa Propeta midugang sa inyong kadasig nga tun-an ang Basahon ni Mormon?

Dapita ang mga estudyante sa pag-highlight niini nga pamahayag diha sa kaugalingon nilang mga kasulatan sa ikaunom nga paragraph sa pasiuna sa Basahon ni Mormon, ug isugyot nga isulat nila sa tupad niini ang mga cross-reference sa 1 Nephi 13:40 ug 2 Nephi 25:17–18. (Pahinumdom: Ang pag-cross reference usa ka kahanas sa pagtuon nga pwede nimong pilion nga hatagan og gibug-aton hangtud mahuman ang kurso. Samtang palamboon sa mga estudyante ang ilang mga kahanas sa pagtuon sa kasulatan, mas mahimo silang self-reliant sa espiritwal nga paagi.)

Dapita ang pipila ka estudyante nga magpuli-puli sa pagbasa og kusog gikan sa 1 Nephi 13:40 ug 2 Nephi 25:17–18 samtang ang klase mangita sa nag-unang katuyoan sa Basahon ni Mormon.

Sigun niini nga mga bersikulo, unsa man ang usa sa nag-unang mga katuyoan sa Basahon ni Mormon? (Kinahanglang mahibaloan sa mga estudyante ang mosunod nga kamatuoran: Ang Dios mipagawas sa Basahon ni Mormon sa katapusang mga adlaw alang sa pagkumbinser sa tanang katawhan nga si Jesus mao ang Kristo. [Tan-awa usab sa ulohang pahina sa Basahon ni Mormon.])
Sa unsang paagi makakumbinser ang Basahon ni Mormon sa katawhan nga si Jesus mao ang Kristo?

I-display ang mosunod nga pamahayag ni Presidente Ezra Taft Benson (1899–1994), ug dapita ang mga estudyante sa pagbasa og hilum niini:

“Kadaghanan karon sa Kristiyanong kalibutan nagsalikway sa kabalaan sa Manluluwas. Ilang gikwestyon ang Iyang milagruso nga pagkatawo, Iyang hingpit nga kinabuhi, ug ang katinuod sa Iyang mahimayaong pagkabanhaw. Ang Basahon ni Mormon nagtudlo sa yano ug dili sayop nga mga pulong kabahin sa kamatuoran sa tanan niadtong mga butanga. Kini naghatag usab sa labing kompleto nga pagpasabut sa doktrina sa Pag-ula. Sa tinuoray, kining balaanong dinasig nga basahon mao ang sukaranang bato sa pagpamatuod ngadto sa kalibutan nga si Jesus mao ang Kristo” (Mga Pagtulun-an sa mga Presidente sa Simbahan: Ezra Taft Benson [2014], 156).

Unsa ang ubang mga reyalidad sa kinabuhi ug pangalagad ni Jesukristo nga gipamatud-an diha sa Basahon ni Mormon?

Dapita ang usa ka estudyante sa pagbasa og kusog sa mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:

“Akong nabasa sa makadaghang higayon [ang Basahon ni Mormon]. Daghan usab ako og nabasa nga nasulat mahitungod niini. Ang ubang mga tagsulat nag-focus sa mga sugilanon, mga paghulagway sa kasaysayan niini. Ang uban naintriga tungod sa estraktura sa pinulongan o sa mga rekord niini mahitungod sa mga hinagiban, hiyograpiya, kinabuhi sa hayop, mga teknik sa pagpangtukod, o mga sistema sa timbang ug mga sukod.

“Bisan og makadani man kining mga butanga, ang pagtuon sa Basahon ni Mormon maoy pinakamagantihon kaayo kon ang tawo mag-focus sa nag-unang katuyoan niini—sa pagpamatuod mahitungod ni Jesukristo. Pinaagi sa pagkumpara, ang tanang uban pa nga mga isyu dili kaayo importante.

“Kon mobasa kamo sa basahon ni Mormon, tutuki ang nag-unang mga tawo diha sa basahon—sugod sa unang kapitulo hangtud sa katapusan—ang Ginoong si Jesukristo, Anak sa Buhi nga Dios” (“A Testimony of the Book of Mormon,” Ensign, Nob. 1999, 69).

Diha sa tanang mensahe sa Basahon ni Mormon, ngano kahang importante man kaayo ang pag-focus sa mensahe mahitungod ni Jesukristo?

Pasabta ang mga estudyante nga human natudloan ni propeta Alma ang mga Zoramite mahitungod sa pangalagad sa Manluluwas (tan-awa sa Alma 33:22), gidapit niya ang iyang mga tigpaminaw nga itanom ang pulong sa Dios sa ilang kasingkasing aron motubo kini. Dapita ang mga estudyante sa hilum nga pagbasa sa Alma 33:22–23 ug sa pag-ila sa mga kamatuoran nga maoy giawhag ni Alma sa iyang mga tigbasa nga “itanom” sa ilang kasingkasing.

Unsa nga mensahe ang gusto ni Alma nga itanom sa kasingkasing sa mga tigpaminaw?
Unsa nga mga resulta ang gisaad ni Alma kon ila kining itanom ug maalimahan kini nga mga gituohan mahitungod ni Jesukristo? (Motubo ang ilang mga pagpamatuod “ngadto sa walay katapusang kinabuhi”; mogaan ang ilang mga palas-anon.)
Sa unsang paagi ang pagtuon sa Basahon ni Mormon nakatabang nga madawat nimo ang mga panalangin nga gihulagway ni Alma?

1 Nephi 6:4; 2 Nephi 11:2–3; Jacob 1:7–8; Mormon 1:15; 3:20–22; Ether 12:38–39, 41

Ang mga tigsulat sa Basahon ni Mormon nakasaksi gayud kang Jesukristo

Ipasabut nga ang Basahon ni Mormon una sa tanan gisulat pinaagi sa upat ka nag-unang mga tagsulat: Nephi, Jacob, Mormon, ug Moroni. (Gawas sa mga basahon ni Enos, Jarom, ug Omni.)

Ibutang sa pisara ang mosunod nga tsart. Aron matabangan ang mga estudyante nga makakat-on mahitungod niining upat ka nag-unang mga tigsulat, dapita sila sa pagpili ug hilum nga pagbasa sa usa sa mosunod nga mga tudling. Ipapangita nila kon unsay naghimong kwalipikado sa tigsulat aron mahimong impluwensyal nga saksi kang Jesukristo.

Tigsulat	Kasinatian
1. Nephi	2 Nephi 11:2
2. Jacob	2 Nephi 11:3
3. Mormon	Mormon 1:15
4. Moroni	Ether 12:38–39

Tuguti nga mopaambit ang mga estudyante unsay ilang nakat-unan gikan sa tanang upat ka mga tudling. Dayon ipangutana:

Nganong importante ang pagsabut nga ang nag-unang mga tigsulat sa Basahon ni Mormon nakasaksi gayud ni Jesukristo? (Samtang hisgutan nimo kini nga pangutana, tabangi nga mahibaloan sa mga estudyante ang mosunod nga kamatuoran: Pinaagi sa pagtuon sa Basahon ni Mormon, makakat-on kita mahitungod ni Jesukristo ug sa Iyang misyon gikan niadtong mga nakakita ug nakaila Kaniya. Pwede nimong ipasabut nga ang tighubad sa Basahon ni Mormon, si Joseph Smith, usa usab ka nakasaksi gayud kang Jesukristo.)

Dugangi og ikatulo nga kolum ang tsart diha sa pisara, sama sa gipakita:

Tigsulat	Kasinatian	Katuyoan
1. Nephi	2 Nephi 11:2	1 Nephi 6:4
2. Jacob	2 Nephi 11:3	Jacob 1:7–8
3. Mormon	Mormon 1:15	Mormon 3:20–22
4. Moroni	Ether 12:38–39	Ether 12:41

Ipabasa og hilum sa matag estudyante ang usa sa mga tudling nga naa sa ikatulo nga kolum, nga mangita sa mga rason nganong girekord sa matag tigsulat ang iyang mensahe.

Ngano nga ang mga tigsulat sa Basahon ni Mormon mirekord man sa ilang mga mensahe?
Ngano kaha nga kining mga tigsulat dako man kaayo ang tinguha sa pagdapit sa uban sa pagduol kang Kristo?
Sa unsang paagi ang ilang mga pagdapit sa pagduol kang Kristo ma-apply diha ninyo sa personal? Unsay inyong mga hunahuna ug pagbati samtang namalandong mo niining mga pagdapit?

2 Nephi 33:1–2, 4–5, 10–11

Ang Basahon ni Mormon makatabang kanato sa pagtuo kang Jesukristo

Ipasabut nga samtang ang kinabuhi sa dili maihap nga mga indibidwal nausab pinaagi sa ilang mga pagpamatuod mahitungod sa Basahon ni Mormon, ang uban naglisud dala ang pagduhaduha mahitungod sa pagkatinuod ug katukma.

Unsay inyong itambag aron makatabang nga malig-on ang usa ka tawo o makaangkon og pagpamatuod sa Basahon ni Mormon?

Ipabasa og kusog sa usa ka estudyante ang 2 Nephi 33:1–2 samtang ilhon sa klase ang gahum nga nagtugot sa mensahe sa Basahon ni Mormon nga mosulod sa kasingkasing sa usa ka tawo.

Unsa nga gahum ang giingon ni Nephi nga magtugot sa iyang mensahe nga makasulod sa kasingkasing sa usa ka tawo? (Ang gahum sa Espiritu Santo.)
Unsay gisulti ni Nephi nga makapugong sa pipila ka tawo sa pagkadawat sa Espiritu Santo?

Dapita ang mga estudyante sa pagsulti ug paghisgot og baruganan nga gitudlo niini nga mga bersikulo. (Tabangi nga mahibaloan sa mga estudyante kini nga baruganan: Makahatud ang Espiritu Santo sa mensahe sa Basahon ni Mormon sulod sa mga kasingkasing kon dili kita magpatig-a sa atong kasingkasing batok sa Espiritu Santo. Ikonsiderar nga isulat sa pisara kini nga baruganan.)

Hatagi og panahon nga makatuon ang mga estudyante sa 2 Nephi 33:4–5, nga mangita sa dugang pa nga mga panalangin nga atong madawat pinaagi sa pagtuon sa Basahon ni Mormon. Hangyoa nga ipaambit sa mga estudyante unsay ilang nakita.

I-display ang mosunod nga pamahayag ni Elder L. Whitney Clayton sa Seventy, ug ipabasa kini og kusog sa usa ka estudyante:

“[Kita] mopili usab sa pag-abli sa atong kasingkasing sa balaang reyalidad sa Manluluwas. … Dili kita pugson sa Dios nga motuo. Hinoon Siya nagdapit nato nga motuo pinaagi sa pagpadala og buhing mga propeta ug mga apostoles sa pagtudlo nato, pinaagi sa mga kasulatan, ug pag-agni kanato pinaagi sa Iyang Espiritu. … Ang desisyon nga motuo mao ang pinakaimportanting pagpili nga atong himoon. Kini naghulma sa tanan natong desisyon” (“Pagpili nga Motuo,” Liahona, Mayo 2015, 38).

Sa unsang paagi ang pagdawat sa gihimong pagdapit sa mga tigsulat sa Basahon ni Mormon nga ang pagtuo kang Jesukristo mohulma sa tanan natong desisyon?

Ipadayon pinaagi sa pagdapit og usa ka estudyante nga mobasa og kusog sa 2 Nephi 33:10–11 samtang mangita ang mga estudyante kon giunsa ni Nephi sa paghulagway ang relasyon tali sa pagtuo sa iyang mga pulong ug sa pagtuo kang Jesukristo.

Sumala ni Nephi, unsa ang relasyon tali sa pagtuo sa iyang mga pulong ug sa pagtuo kang Jesukristo?
Unsay giingon ni Nephi nga mahitabo “sa katapusang adlaw” ngadto sa mosalikway sa iyang mga pulong?

Dapita ang mga estudyante sa pagpaambit sa ilang mga pagpamatuod kon sa unsang paagi nakatabang ang Basahon ni Mormon nga maduol sila kang Jesukristo.

Mga Basahunon sa Estudyante

1 Nephi 6:4; 13:40; 2 Nephi 11:2–3; 25:17–18; 33:1–2, 4–5, 10–11; Jacob 1:7–8; Alma 33:22–23; Mormon 1:15; 3:20–22; Ether 12:38–39, 41.
“Ang Basahon ni Mormon—Sukaranang Bato sa Atong Tinuohan,” kapitulo 9 sa Mga Pagtulun-an sa mga Presidente sa Simbahan: Ezra Taft Benson (2014), 151–62.