Paghinulsol ug Kapasayloan

Pasiuna

Aron malimpyo gikan sa sala, kinahanglan nga atong ipakita ang pagtuo kang Jesukristo pinaagi sa paghinulsol. Kon tinuoray ang atong paghinulsol, madawat nato ang kapasayloan sa atong mga sala, nga magdala og kalipay ug kalinaw sa konsensya sa atong kalag. Mapadayon nato ang pag-angkon og kapasayloan sa mga sala sa tibuok natong kinabuhi kon matinud-anon kitang nagtuman sa mga sugo sa Dios ug mohigugma ug moserbisyo sa usag usa.

Background nga Basahunon

D. Todd Christofferson, “Ang Balaanong Gasa sa Paghinulsol,” Liahona, Nob. 2011, 38–41.
Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 40–43.
Craig A. Cardon, “Ang Manluluwas Gusto nga Mopasaylo,” Liahona, Mayo 2013, 15–18.

Mga Sugyot alang sa Pagtudlo

Alma 34:15–17; 3 Nephi 9:13–14, 19–22

Ang pagpakita og pagtuo kang Kristo ngadto sa paghinulsol

Ipahunahuna sa mga estudyante nga gihangyo sila nga mamulong sa sakrament miting mahitungod sa paghinulsol. Dapita ang pipila ka estudyante sa pagpaambit kon unsa kaha ang ilang isulti aron matabangan nga makasabut ang mga miyembro niini nga doktrina. Human nila mapaambit ang ilang mga tubag, i-display ug basaha ang mosunod nga pamahayag ni Presidente Dieter F. Uchtdorf sa Unang Kapangulohan:

“Nagkinahanglan kita og lig-on nga pagtuo ni Kristo aron makahimo sa paghinulsol” (“Punto sa Luwas nga Pagbalik,” Ensign or Liahona, Mayo 2007, 100).

Nganong tinuod man kini nga pamahayag?

Dapita ang usa ka estudyante sa pagbasa og kusog sa Alma 34:15–17, nga nagrekord sa mga gipangtudlo ni Amulek sa mga Zoramite bahin sa paghinulsol. Awhaga ang klase sa pagsunod ug ipapangita kon unsay gitudlo ni Amulek nga atong gikinahanglan aron mapasaylo.

Unsa nga baruganan mahitungod sa pagkadawat og kapasayloan ang gitudlo niini nga mga bersikulo? (Samtang motubag ang mga estudyante, isulat sa pisara kini nga baruganan: Aron makadawat sa maloloy-ong mga panalangin sa pagpasaylo, kinahanglan kitang mopakita og hugot nga pagtuo ni Jesukristo ngadto sa paghinulsol. Ipasabut sa mga estudyante nga ang mga pulong nga “pagtuo ngadto sa paghinusol” gihisgutan sa upat ka higayon niini nga mga bersikulo. Usa kini ka oportunidad aron makahatag og gibug-aton sa kahanas sa pagtuon sa kasulatan bahin sa pag-ila sa mga pulong nga gibalik-balik.)
Nganong kinahanglan man nga mopakita kita og pagtuo kang Jesukristo aron makahinulsol ug mapasaylo? (Kinahanglan nga duna kitay pagtuo sa maulaon Niya nga sakripisyo aron moepekto sa atong kinabuhi kini nga sakripisyo. Pinaagi lamang sa Iyang Pag-ula kita mapasaylo aron mausab ang atong kasingkasing ug malimpyo gikan sa sala [tan-awa sa Mosiah 5:2].)

Aron matabangan ang mga estudyante nga mas masabtan kon unsaon nato sa pagduol sa Manluluwas ug maghinulsol, ipasabut nga human sa grabing pagkalaglag sa Amerika isip saksi sa Iyang Pagkalansang sa krus, gitudloan sa Manluluwas ang katawhan kon unsay angay nilang buhaton aron makahinulsol ug madawat ang pagpasaylo gikan Kaniya. Dapita ang mga estudyante sa pagtuon sa 3 Nephi 9:13–14, 19–22 nga may kaparis, nga mangita sa mga pulong nga naghulagway kon unsay gisulti sa Manluluwas nga angay natong buhaton aron makaduol Kaniya ug maghinulsol. Human sa igong panahon, dapita ang mga estudyante sa pagpaambit unsay ilang nadiskubrihan.

Unsa nga baruganan ang gitudlo sa Ginoo niini nga mga bersikulo mahitungod sa angay natong buhaton aron makahinulsol? (Bisan og mogamit og laing mga pulong ang mga estudyante, kinahanglan nga ilang makit-an ang mosunod nga baruganan: Kon moduol kita kang Kristo uban sa masulub-on nga kasingkasing ug mahinulsulon nga espiritu, Iya kitang dawaton ug tubson gikan sa atong mga sala.)
Sa unsang paagi ang pagdapit sa Manluluwas sa “[pagduol] ngari kanako ingon nga usa ka gamay nga bata” (bersikulo 22) ug “mobalik ngari kanako” (bersikulo 13) makatabang aron mas masabtan nato kon unsay ipasabut sa pagkaadunay masulub-on nga kasingkasing ug mahinulsulon nga espiritu?
Unsa nga mga kasinatian sa kinabuhi ang tingali maghimo sa usa ka tawo aron makabaton og masulub-on nga kasingkasing ug mahinulsulon nga espiritu?

Dapita ang usa ka estudyante sa pagbasa og kusog sa mosunod nga pamahayag ni Elder Bruce D. Porter sa Seventy. Ikonsiderar ang paghatag og kopya sa pamahayag ngadto sa mga estudyante. Awhaga ang mga estudyante nga paminawon ang mga panabut kon giunsa nato sa paghalad og usa ka masulub-on nga kasingkasing ug mahinulsulon nga espiritu kon maghinulsol kita.

“Unsa ang usa ka masulub-on nga kasingkasing ug mahinulsulon nga espiritu? … Ang hingpit nga pagpaubos sa Manluluwas sa Mahangturong Amahan mao ang hingpti nga ehemplo sa masulub-on nga kasingkasing ug mahinulsulon nga espiritu. Ang ehemplo ni Kristo nagtudlo kanato nga ang usa ka masulub-on nga kasingkasing usa ka kinaiya sa pagkadios. Kon ang atong mga kasingkasing masulub-on, hingpit kita nga bukas sa Espiritu sa Dios ug mahibalo sa atong pagsalig Kaniya sa tanan nga anaa kanato ug sa tanan nga kita mao. Ang sakripisyo nga gikinahanglan usa ka sakripisyo sa garbo sa tanan nga matang. Sama sa daling mahulma nga lapok sa mga kamot sa batid nga tighimo og banga, ang masulub-on og kasingkasing mahulma ug maporma sa mga kamot sa Agalon.

“Ang masulub-on nga kasingkasing ug mahinulsulon nga espiritu mga kinahanglanon usab sa paghinulsol [tan-awa sa 2 Nephi 2:6–7]. … “Kon kita makasala ug magtinguha og kapasayloan, ang usa ka masulub-on nga kasingkasing ug mahinulsulon nga espiritu nangahulugan sa pagsinati sa ‘diosnon nga kasubo [nga] mosangpot sa paghinulsol’ (2 Mga Taga-Corinto 7:10). Kini moabut kon ang atong tinguha nga malimpyo gikan sa sala gamhanan kaayo nga ang atong mga kasingkasing magsakit sa kasubo ug gusto kita nga mobati og kalinaw uban sa Amahan sa Langit. Kadtong adunay masulub-on nga kasingkasing ug mahinulsulon nga espiritu andam nga mobuhat sa bisan unsa ug sa tanan nga pangayoon sa Dios kanila, nga walay pagsupak. Mohunong kita sa pagbuhat sa kaugalingon natong paagi ug magkat-on sa paagi sa Dios. Niana nga kahimtang sa pagpaubos, ang Pag-ula moepekto ug ang tinuod nga paghinulsol mahimo” (“Usa ka Masulub-on nga Kasingkasing ug Mahinulsulon nga Espiritu,” Ensign o Liahona, Nob. 2007, 32).

Sumala ni Elder Porter, unsay buot ipasabut sa pagduol kang Kristo uban ang masulub-on nga kasingkasing ug mahinulsulon nga espiritu?

Dapita ang mga estudyante sa pagpamalandong kon unsay ilang mahimo aron mas hingpit ang ilang pagpakita og pagtuo kang Jesukristo pinaagi sa paghalad Kaniya og usa ka masulub-on nga kasingkasing ug mahinulsulon nga espiritu. Mahimo kang mohatag og pipila ka minutos aron isulat nila ang mga impresyon nga moabut kanila pinaagi sa Espiritu.

Ipamatuod nga ang puno sa kalooy nga gasa sa paghinulsol madawat natong tanan. Dapita ang pipila ka estudyante sa pagpaambit sa ilang mga pagbati mahitungod sa maulaon nga sakripisyo ug gasa sa paghinulsol.

Enos 1:4–8; Mosiah 4:1–3; Alma 19:29–30, 33–36; 36:19–21

Ang kapasayloan sa mga sala magdala og mga pagbati sa kalipay ug kalinaw

Unsaon kaha ninyo sa pagtubag ang mga tawo kinsa gustong mahibalo kon napasaylo na ba sila sa nangagi nilang mga sala?

Dapita ang mga estudyante sa pagsiksik sa Enos 1:4–8; Mosiah 4:1–3; ug sa Alma 36:19–21, nga mangita sa mga paagi nga ang katawhan mahibalo nga nadawat nila ang kapasayloan sa ilang mga sala.

Sumala niini nga mga bersikulo, unsaon nato sa pagkahibalo nga nakadawat kita og kapasayloan sa atong mga sala? (Tabangi nga makit-an sa mga estudyante ang mosunod nga baruganan: Kon tinuoray kitang maghinulsol ug makadawat og kapasayloan sa atong mga sala, mapapas ang atong kahasol sa hunahuna, mapuno kita sa Espiritu sa Ginoo, ug bation nato ang kalipay ug kalinaw. Kon giaghat sa Espiritu, mahimo nimong ipaambit ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles: “Alang niadtong kinsa tinuod nga mahinulsulon, apan daw wala mobati og kahupayan: padayon sa pagsunod sa mga sugo. Ako mosaad kaninyo, ang kahupayan moabut sa panahon nga gitakda sa Ginoo. Ang pagpaayo nagkinahanglan usab og panahon” [“Paghinulsol … Aron Ako Moayo Kaninyo,” Liahona, Nob. 2009, 42].)

Alang sa dugang pa nga paghulagway niini nga baruganan, ipabasa og kusog sa pipila ka estudyante ang pipila ka mga bersikulo nga naghulagway sa pagkakabig ni Haring Lamoni ug sa iyang katawhan, nga naa sa Alma 19:29–30, 33–36. Dapita ang klase sa pagpangita sa mga panalangin nga nadawat sa katawhan tungod sa ilang paghinulsol ug pagtuo.

Unsa ang piho nga mga panalangin ang nadawat ni Haring Lamoni, sa iyang asawa, ug sa daghan pang Lamanite tungod sa ilang paghinulsol ug pagtuo? (Nausab ang ilang kasingkasing, gipangalagaran sila sa mga anghel, nabunyagan sila, naestablisar ang Simbahan, ug ang Ginoo mibubu sa Iyang Espiritu ngadto kanila.)
Kanus-a kamo nakakita sa uban nga nakasinati og sama niining pipila ka panalangin tungod kay naghinulsol sila ug mipaduol sa Ginoo?

Aron matabangan ang mga estudyante nga mobati sa kamatuoran ug kaimportante sa baruganan nga naa sa ibabaw, ipabasa sa usa ka estudyante ang mosunod nga pagpamatuod gikan ni Presidente Boyd K. Packer (1924–2015) sa Korum sa Napulog Duha ka mga Apostoles:

“Ang mga sulat naggikan niadtong nakahimo og subo nga mga kasaypanan. Nangutana sila, ‘Mapasaylo ba gayud kaha ako?’

“Ang tubag oo!

“Ang ebanghelyo nagtudlo kanato nga ang kahupayan gikan sa kasakit ug kahasol sa konsensya maangkon pinaagi sa paghinulsol. Gawas niadtong pipila kinsa human mahibalo sa kahingpitan mibiya aron maalaot, walay kinaiya, walay pagkaadik, walay rebelyon, walay kalapasan, walay sayop gamay man o dako ang dili maapil sa saad sa hingpit nga kapasayloan.

“‘Umari kamo karon, ug usahan ta paghusay, nag-ingon ang Ginoo: bisan pa ang inyong mga sala mapula, sila pagapution ingon sa nieve; bisan pa sila lubos mapula, sila mahimong sama sa maputing balhibo sa karnero.’ Mao kana, mipadayon si Isaias, ‘kong kamo mobuot ug magmasinugtanon:’ [Isaias 1:18–19]” (“The Brilliant Morning of Forgiveness,” Ensign, Nob. 1995, 19).

Dapita ang mga estudyante sa paghunahuna og mga kasinatian dihang mibati sila og kalipay ug kalinaw sa konsensya nga nag-uban sa hingpit nga paghinulsol.

Mosiah 4:11–12, 26

Padayon nga pagbaton og kapasayloan sa atong mga ala

Ipabasa og kusog sa usa ka estudyante ang Mosiah 4:11–12, 26. Dapita ang mga estudyante sa pagpangita kon unsay gitudlo ni Haring Benjamin kon unsaon nga padayon kitang makabaton og kapasayloan sa atong mga sala.

Sumala sa mga pulong ni Haring Benjamin, unsaon nato nga padayon kitang makabaton og kapasayloan sa atong mga sala sa tibuok natong kinabuhi? (Kinahanglang mahibaloan sa mga estudyante ang mosunod nga baruganan: Kon hinumduman nato ang gugma ug kaayo sa Dios ngari kanato, nga mobarug nga makanunayon sa atong pagtuo, ug mohigugma ug moserbisyo sa uban, mabatunan nato ang padayong kapasayloan sa atong mga sala.)

Aron mapalawman pa ang panabut sa mga estudyante bahin niini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Ang paghinulsol nagpasabut og pagpaningkamot nga mausab. Bugal-bugal kini sa pag-antus sa Manluluwas sa Tanaman sa Getsemani ug didto sa krus nga kita magdahum nga Siya kinahanglang mousab nato ngadto sa pagkamatarung nga walay tinud-anay nga pagpaningkamot sa atong bahin. Hinoon, atong tinguhaon ang Iyang grasya nga mohingpit ug moganti sa atong labing makugihon nga paningkamot (tan-awa sa 2 Nephi 25: 23). Tingali sama sa atong pag-ampo alang sa kalooy, kita kinahanglang mag-ampo alang sa panahon ug oportunidad sa pagbuhat ug pagpaningkamot ug pagbuntog sa sala. Sigurado gayud nga ang Ginoo mopanalangin sa tawo nga nagtinguha nga takus nga moatubang sa hukmanan, kinsa determinadong naningkamot matag adlaw nga pulihan ang kahuyang og kalig-on. Ang tinuod nga paghinulsol, tinuod nga kausaban mahimong magkinahanglan og balik-balik nga pagsulay, apan adunay butang nga makapalunsay ug makapabalaan niana nga paningkamot” (“Ang Balaanong Gasa sa Paghinulsol,” Liahona, Nob. 2011, 39).

Unsa nga mga hunahuna ug pagbati ang naa ninyo samtang gikonsiderar ninyo nga ang Ginoo “mopanalangin” kaninyo kon hagoan ninyo ang pagbuntog sa sala ug ang mortal nga mga kahuyang?

Ipaambit ang imong pagpamatuod sa Pag-ula ni Jesukristo. Ipaniguro sa mga estudyante nga kon maghinulsol sila, masinati nila ang kalipay ug kalinaw sa konsensya. Awhaga ang mga estudyante sa pagsusi sa ilang kinabuhi ug pagpakita sa ilang pagtuo kang Jesukristo ngadto sa paghinulsol.

Mga Basahunon sa Estudyante

Enos 1:4–8; Mosiah 4:1–3, 11–12, 26; Alma 19:29–30, 33–36; 34:15–17; 36:19–21; 3 Nephi 9:13–14, 19–22.
Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 40–43.