Leksyon 8: Moabut ang Kaluwasan pinaagi ni Jesukristo
8
Moabut ang Kaluwasan pinaagi ni Jesukristo
Pasiuna
Ang atong paningkamot sa pagsunod ni Jesukristo ug pagtuman sa Iyang mga sugo gikinahanglan apan dili pa igo para kita makwalipikado sa kaluwasan. Nahimong posible ang atong kaluwasan pinaagi lamang sa maayong mga buhat, kalooy, ug grasya ni Jesukristo. Ang doktrina ni Kristo makatabang aron atong masabtan nga pinaagi sa Iyang grasya, makakat-on kita sa ebanghelyo, makadawat sa mga ordinansa, ug magpadayon sa dalan padulong sa kinabuhing dayon.
Background nga Basahunon
Dieter F. Uchtdorf, “Ang Gasa sa Grasya,”Liahona, Mayo 2015, 107–10.
L. Tom Perry, “Ang Ebanghelyo ni Jesukristo,”Liahona, Mayo 2008, 44–46.
I-display ug basaha ang mosunod nga pamahayag ni Elder L. Tom Perry (1922–2015) sa Korum sa Napulog Duha ka mga Apostoles:
Imahe
Elder L. Tom Perry
“Daghan nga mga tawo ang naghunahuna,‘Diin kita gikan? Ngano nga ania kita dinhi? Asa kita paingon?’ Ang atong Mahangturong Amahan wala magpadala kanato sa kalibutan sa usa ka walay paingnan, walay hinungdan nga panaw. Siya mihatag kanato og usa ka plano nga pagasundon. Siya ang tigpasiugda niana nga plano. Kini gitumong alang sa kauswagan sa tawo ug hingpit nga kaluwasan ug kahimayaan” (“Ang Plano sa Kaluwasan,”Liahona, Nob. 2006, 69–70).
Kon madiskubrihan sa mga tawo nga dili sila pasagdan sa Dios nga mag-inusara sa paglakaw niining mortal nga kinabuhi apan mihatag og plano para sa ilang kaluwasan, unsa kaha ang ilang bation?
Dapita ang mga estudyante sa pagbasa sa 2 Nephi 2:6–9, nga mangita kon unsay gisulti ni propeta Lehi nga maghimo sa kaluwasan nga posible.
Sumala ni Lehi, unsa man ang naghimo sa kaluwasan nga posible diha sa plano sa Dios? (Kinahanglang sa mga estudyante ang mosunod: Maluwas lamang kita pinaagi sa maayong mga buhat, kalooy ug grasya ni Jesukristo. Pwede nimong ipaambit ang mosunod nga depinisyon sa kon unsay ipasabut sa pagkaluwas o pagkadawat og kaluwasan: “Ang kaluwasan sa tinuod ug kompletong kahulugan susama ra sa pagkahimaya o kinabuhing dayon ug naglakip sa pag-angkon og kinatas-ang luna sa tulo ka langit sulod sa celestial nga gingharian. Uban sa pipila ka mga eksepsyon mao kini ang kaluwasan nga gihisgutan sa kasulatan” [Bruce R. McConkie, Mormon Doctrine, 2nd ed. (1966), 670].)
Unsa ang buot ipasabut sa maayong mga buhat, kalooy, ug grasya ni Jesukristo? (Ang mga maayo nga buhat ni Jesukristo mao ang matarung Niyang mga buhat, ilabi na ang Iyang Pag-ula. Ang kalooy nagpasabut sa kompasyon ug pailub nga iyang gipakita kanato bisan pa sa atong mga sala. Ang grasya nagpasabut sa tabang nga Iyang gihimo kanato pinaagi sa kalooy, gugma, kamabination, ug sa makaimpluwensya nga gahum diin nagtugot nga madawat nato ang kinabuhing dayon ug kahimayaan human nato mahimo ang tanan natong paningkamot. Tan-awa usab sa Giya ngadto sa mga Kasulatan, “Grasya.”)
Aron makatabang nga mapalawman pa ang panabut sa mga estudyante niini nga doktrina, i-display ang mosunod nga pamahayag ni Presidente Dieter F. Uchtdorf, ug ipabasa kini og kusog sa usa ka estudyante:
Imahe
President Dieter F. Uchtdorf
“Dili kita makaangkon sa atong agianan ngadto sa langit; ang gipangayo sa hustisya nagbarug isip babag, diin kita walay gahum sa pagbuntog sa atong kaugalingon.
“Apan ang tanan wala mawagtang.
“Ang grasya sa Dios mao ang atong importante ug walay katapusan nga paglaum.
“Pinaagi sa sakripisyo ni Jesukristo, ang plano sa kalooy nagtagbaw sa mga gipangayo sa hustisya [tan-awa sa Alma 42:15]” (“Ang Gasa sa Grasya,”Liahona, Mayo 2015, 108).
Ngano nga ang kaugalingong pagkamatarung sa usa ka tawo dili man igo nga makakab-ot sa “mga gipangayo sa hustisya” ug pag-angkon og kinabuhing dayon? (Bisan og sa dagan sa panahon makat-unan nato sa hingpti ang pagsunod sa mga sugo, walay tawo nga nagpuyo og hingpit nga kinabuhi gawas sa Manluluwas [tan-awa sa Mga Taga-Roma 3:23]. Bisan og mohunong kita sa pagpakasala, dili nato mapapas ang peligro o ang pagbati nga sad-an sa nanglabay natong mga binuhatan. Mao kana nganong ang Pag-ula ug ang grasya gikinahanglan.)
Pahinumdumi ang mga estudyante nga samtang maluwas lamang kita pinaagi sa mga maayong buhat, kalooy, ug grasya ni Jesukristo, ang mga propeta sa Basahon ni Mormon mitudlo unsay angay natong buhaton aron madawat ang matubsanong gahum sa Manluluwas.
Dapita ang usa ka estudyante sa pagbasa og kusog sa Mosiah 4:6–8, ug ipapangita sa klase kon unsay gitudlo ni Haring Benjamin nga angay natong buhaton aron madawat ang kaluwasan pinaagi sa Pag-ula ni Jesukristo.
Sumala ni Haring Benjamin, unsay angay natong buhaton aron madawat ang kaluwasan pinaagi sa Pag-ula? (Mag-angkon og kahibalo sa Dios ug bahin sa Pag-ula, mobutang sa atong pagsalig sa Dios, magkugi sa pagtuman sa mga sugo, ug matinud-anong magpadayon hangtud sa katapusan sa atong kinabuhi.)
Hangyoa ang mga estudyante sa pagbasa sa 2 Nephi 25:23.
Unsa nga doktrina ang gitudlo ni Nephi bahin sa atong kaluwasan? (Kinahanglang mahibaloan sa mga estudyante ang mosunod nga doktrina: Tungod sa Pag-ula ni Jesukristo, maluwas kita pinaagi sa grasya human sa tanan natong mabuhat. Tabangi nga masabtan sa mga estudyante nga pinaagi lamang ni Jesukristo kita mamahimong balaan ug sama sa atong Amahan sa Langit.)
Aron matabangan ang mga estudyante nga mas masabtan kini nga doktrina, dapita ang usa ka estudyante sa pagbasa og kusog sa pamahayag ni Presidente Ezra Taft Benzon (1899–1994):
Imahe
President Ezra Taft Benson
“Ang ‘human sa tanan natong mabuhat’ naglakip sa paghatag sa pinakamaayo natong paningkamot. Naglakip kini sa pagsunod sa iyang mga sugo.
“Ang ‘human sa tanan natong mabuhat’ naglakip sa paghigugma sa atong isigkatawo ug pag-ampo para niadtong nag-isip kanato nga ilang kaaway. Nagpasabut kini nga sininaan ang mga hubo, pagpakaon sa gigutom, pagbisita sa masakiton, ug ‘motabang niadtong nagkinahanglan sa [atong] tabang’ (Mosiah 4:16)—mohinumdom nga ang gibuhat nato bisan sa usa ngadto sa mga anak sa Dios, atong gibuhat ngadto kaniya.
“Ang ‘human sa tanan natong mabuhat’ nagpasabut sa pagpakabuhing putli, limpyo, lunsay nga kinabuhi, hingpit ang kamatinuoron sa tanan natong mga buhat ug pagtagad sa uban nga maoy gusto natong itagad sa uban ngari kanato” (“Redemption through Christ after All We Can Do,” Liahona, Dis. 1988, 5).
Sa unsang mga paagi nimo nasinati nga ang grasya sa Manluluwas nagtabang ninyo lapas sa inyong kaugalingong mga abilidad samtang gibuhat ninyo ang tanang paningkamot aron makaduol Kaniya?
Gamita ang mosunod nga pamahayag, usab ang kang Presidente Ezra Taft Benson, aron makatabang sa mga estudyante nga makapamalandong niini nga pangutana sa dili pa sila motubag:
Imahe
President Ezra Taft Benson
“Kitang mga miyembro, miuyon kita ni Nephi, kinsa miingon, ‘Pinaagi sa grasya [kita] maluwas, human sa tanan nga atong mabuhat.’ (2 Nephi 25:23.) …
“Pinaagi sa grasya, natuman sa Manluluwas ang iyang maulaong sakripisyo aron makab-ot sa tanang katawhan ang pagka-imortal.
“Pinaagi sa grasya, ug sa atong pagtuo sa iyang pag-ula ug paghinulsol sa atong mga sala, madawat nato ang kalig-on sa paghimo sa mga buluhaton nga gikinahanglan nga dili nato mahimo sa kaugalingon lang natong gahum.
“Pinaagi sa iyang grasya matugahan kita og panalangin ug espiritwal nga kalig-on nga sa katapusan motultol kanato sa kinabuhing dayon kon molahutay kita sa katapusan.
“Pinaagi sa iyang grasya mas mahimo kitang sama sa balaan niyang personalidad” (“Redemption through Christ after All We Can Do,” 4–5).
Unsa kaha ang atong mahimo aron ikapakita nato ang atong pasalamat sa unsay gihimong posible ni Jesukristo?
Ipamatuod nga pinaagi lamang sa grasya nga gihimong posible tungod sa Pag-ula ni Jesukristo atong mabuntog ang mga epekto sa Pagkapukan ni Adan ug ni Eva, makabaton og kapasayloan sa mga sala, mabuntog ang mga kakulangan, ug mouswag ngadto sa pagkahingpit. Awhaga ang mga estudyante nga pamalandungan kon naghimo ba sila sa tanan nilang mahimo aron madawat ang mga panalangin sa grasya sa Ginoo.
I-assign ang usa ka pundok sa klase nga magtuon sa 2 Nephi 31:2, 10–21, ang ikaduhang pundok sa klase magtuon sa 3 Nephi 11:31–40, ug ang ikatulong pundok sa klase magtuon sa 3 Nephi 27:13–22. Sa dili pa sugdan sa mga estudyante, pasabta nga kini nga mga tudling naglangkob og mga termino nga “doktrina ni Kristo,” “akong doktrina,” o “akong ebanghelyo.” Ipasabut nga ang doktrina o ebanghelyo ni Kristo naglangkob sa unsay nahimo ni Jesukristo ug padayong gihimo aron maduol kita sa Amahan. Naglangkob usab kini sa unsay angay natong buhaton aron makuha ang mga panalangin sa Pag-ula ni Jesukristo. Dapita ang matag grupo sa pag-ila ug pagmarka kon unsay gitudlo sa na-assign sa ilaha nga mga bersikulo mahitungod sa doktrina ni Kristo—unsay nahimo ni Kristo ug unsay angay natong buhaton.
Human mahatagan ang mga estudyante og pipila ka minutos sa pagtuon sa na-assign sa ilaha nga mga tudling, ipalista nila sa pisara unsay ilang nakit-an sa kilid sa matag reference. Dayon ipangutana:
Unsay nahimo ni Jesukristo aron maduol kita sa Amahan?
Unsa ang pipila ka butang nga kinahanglan natong buhatn aron madawat ang mga panalangin sa Pag-ula ni Kristo? (Kinahanglan nga duna kitay pagtuo, maghinulsol, mabunyagan, makadawat sa gasa sa Espiritu Santo, makalahutay hangtud sa katapusan, ug makadawat ug motuman sa personal nga pagpadayag.)
Unsaon man ninyo sa pag-summarize ang kaimportante sa pagsunod sa doktrina o ebanghelyo ni Jesukristo? (Kinahanglang mahibaloan sa mga estudyante ang usa ka baruganan sama sa mosunod: Kon magpakabuhi kita subay sa doktrina ni Kristo, atong madawat ang mga panalangin sa Pag-ula ug madawat ang kinabuhing dayon.)
Sigun sa mga panginahanglan sa imong mga estudyante, ikonsiderar ang pagpangutana sama sa mosunod aron matabangan sila sa padayong pag-analisar sa mga scripture passage nga ilang gibasa:
Unsa nga mga pulong diha sa 2 Nephi 31:20 ang dunay partikular nga kahulugan kaninyo, ug sa unsang paagi kini nakatabang nga inyong madawat ang mga panalangin sa Pag-ula?
Sigun sa gitudlo sa 2 Nephi 31:13–14, 17, unsay ipasabut sa pagpabunyag “pinaagi sa kalayo”? (Ang usa ka tawo makadawat og kapasayloan sa mga sala ug sa makalimpyo nga gahum nga moabut pinaagi sa Espiritu Santo.)
Sumala sa 3 Nephi 11:39–40, nganong importante man kaayo nga ang matag tawo modawat sa doktrina ni Kristo? (Mahimo nimong dapiton ang mga estudyante sa pag-cross-reference niini nga tudling ngadto sa Helaman 5:12.)
Sumala sa 3 Nephi 27:14–16, unsay mahitabo kanato kon magpakabuhi kita sumala sa doktrina o ebanghelyo ni Jesukristo?
Tapusa pinaagi sa pag-display sa mosunod nga pamahayag gikan sa Isangyaw ang Akong Ebanghelyo: Usa ka Giya sa Misyonaryo nga Pangalagad. Dapita ang mga estudyante sa pagbasa niini ug sa pagpangita og mga paagi diin ang pagsunod sa doktrina ni Kristo makapanalangin sa tibuok nilang kinabuhi.
“Ang mga indibidwal ug mga pamilya magsugod sa pagsunod kang Kristo samtang sila magbaton og hugot nga pagtuo Kaniya ug maghinulsol sa ilang mga sala. Sila makadawat og kapasayloan sa mga sala pinaagi sa bunyag ug pinaagi sa pagdawat sa gasa sa Espiritu Santo gikan sa tawo nga adunay katungod gikan sa Dios sa paghimo niini nga mga ordinansa. Sila dayon molahutay hangtud sa katapusan, o, sa ato pa, sila mopadayon sa tibuok nilang kinabuhi sa pagbaton og hugot nga pagtuo kang Jesukristo, maghinulsol, ug magbag-o sa mga pakigsaad nga ilang gihimo. Kini dili lamang mga lakang nga ilang masinati kausa sa ilang kinabuhi; apan, kon balik-balikon sa tibuok nilang kinabuhi kini nga mga lakang mamahimong magkanindot nga sumbanan sa pagpuyo. Gani, mao lamang kini ang paagi sa pagpuyo nga makadala og kalinaw sa konsensya ug makahimo sa mga anak sa Langitnong Amahan sa pagbalik sa pagpuyo sa Iyang presensya” (Isangyaw ang Akong Ebanghelyo [2004], 7).
Sa unsang mga paagi ang pagsunod sa mga doktrina ni Kristo “nagkaanam ka magantihon nga sundanan sa pagpakabuhi” para kaninyo?
Awhaga ang mga estudyante sa pagpamalandong unsa kamaayo ang ilang gihimong pagsunod sa doktrina ni Kristo. Hangyoa sila sa paghunahuna kon unsa kahay mas maayo nilang mahimo aron madawat ang mga panalangin sa pagsunod sa doktrina ni Kristo.