Mga Seminary ug mga Institute
Leksyon 15: Ang Pagkahimong mga Instrumento diha sa mga Kamot sa Dios

15

Ang Pagkahimong mga Instrumento diha sa mga Kamot sa Dios

Pasiuna

Ang ebanghelyo ni Jesukristo usa ka mensahe sa kalinaw sa gubot nga kalibutan. Kadtong mamahimong mga instrumento sa mga kamot sa Dios makapaambit sa ebanghelyo ug makatabang sa uban aron makabig. Niini nga leksyon, tun-an sa mga estudyante ug gamiton ang mga baruganan gikan sa mga istorya sa Basahon ni Mormon bahin sa mga misyonaryo nga nahimong mga instrumento sa mga kamot sa Dios ug mitabang sa uban aron makadawat og kinabuhing dayon.

Background nga Basahunon

  • M. Russell Ballard, “Ibutang ang Inyong Pagsalig diha sa Ginoo,” Liahona, Nob. 2013, 43–45.

  • Don R. Clarke, “Ang Pagkahimong mga Instrumento diha sa mga Kamot sa Dios,” Liahona, Nob. 2006, 97–99.

Mga Sugyot alang sa Pagtudlo

1 Nephi 13:37; Mosiah 15:14–19, 26–28

Gisaad ang mga panalangin alang niadtong mopaambit sa ebanghelyo

Sa pisara, isulat ang mosunod nga pamahayag ni Propeta Joseph Smith (1805–44) gikan sa Mga Pagtulun-an sa mga Presidente sa Simbahan: Joseph Smith (2007), 397:

“Human sa tanan nga nasulti, ang pinakadako ug pinaka importante nga katungdanan mao ang pagsangyaw sa Ebanghelyo.” (Si Propeta Joseph Smith)

Dapita ang mga estudyante sa hilum nga pagbasa sa pamahayag. Dayon ipangutana:

  • Nganong pinakaimportante man sa atong katungdanan ang pagpaambit sa ebanghelyo ngadto sa uban?

  • Unsa nga mga panalangin ang inyong nadawat tungod sa pagdawat ug pagtuman niini nga katungdanan?

Ipasabut nga nakita nang daan ni Nephi ang Pagpahiuli sa ebanghelyo ug ang pagtungha sa Basahon ni Mormon (tan-awa sa 1 Nephi 13:34–36). Gihulagway usab niya ang mga panalangin nga madawat niadtong mosangyaw sa ebanghelyo ug motabang sa uban sa pagduol kang Kristo.

Dapita ang mga estudyante sa pagbasa og hilum sa 1 Nephi 13:37, ug awhaga sila sa pagmarka ug pag-highlight sa mga panalangin nga gisaad para niadtong maningkamot nga makapaambit sa ebanghelyo sa katapusang mga adlaw.

  • Unsa nga mga panalangin ang moabut niadtong maningkamot nga maestablisar ang Zion ug mamantala ang kalinaw? (Kinahanglang masabtan sa mga estudyante ang mosunod nga baruganan: Kon maningkamot kita nga makapaambit sa ebanghelyo, mapanalanginan kita sa Espiritu Santo ug maluwas sa gingharian sa Dios.)

Sultihi ang mga estudyante nga si Abinadi mikutlo sa Isaias ug pasabta kon unsay ipasabut sa pagmantala og kalinaw ug kon nganong kinahanglan nga maningkamot kita nga makapaambit sa ebanghelyo (tan-awa sa Isaias 52:7). Dapita ang pipila ka estudyante sa pagbasa og kusog sa Mosiah 15:14–19, 26–28 samtang mangita ang klase sa unsay gitudlo ni Abinadi.

  • Unsay ipasabut sa pagmantala og kalinaw ug kaluwasan? (tan-awa sa bersikulo 14).

  • Nganong gikinahanglan nga ang kaluwasan masangyaw ngadto sa tanang kanasuran, kaliwatan, pinulongan, ug katawhan?

Aron matabangan ang mga estudyante nga makasabut sa mga pulong ni Abinadi, dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Elder Jeffrey R. Holland

“Ang kalinaw ug ang maayong balita; ang maayong balita ug ang kalinaw. Usa kini sa kinatas-ang mga panalangin nga gidala sa ebanghelyo ni Jesukristo sa gubot nga kalibutan ug sa gubot nga katawhan nga nanagpuyo niini, mga solusyon sa personal nga mga panglimbasug ug tawhanong kamasalaypon, tinubdan sa kalig-on alang sa mga panahon sa kaluya ug mga oras sa tinuorayng kadesperado. … Ang Bugtong Anak sa Dios Mismo maoy mihatag kanato niini nga tabang ug paglaum. …

“Ang pagpangita sa kalinaw usa sa kinatas-ang tinguha sa tawo. … Dunay mga panahon sa tibuok natong kinabuhi diin ang labihang kasubo o pag-antus o kahadlok o pag-inusara modala kanato sa pagpangamuyo og kalinaw diin ang Dios lamang ang makahatag. Mga panahon kini diin grabe ang espiritwal nga kagutom nga bisan ang pinakamahal natong higala dili makatabang nato sa hingpit” (“The Peaceable Things of the Kingdom,” Ensign, Nob. 1996, 82).

  • Sa unsang mga paagi ang ebanghelyo ni Jesukristo usa ka mensahe sa kalinaw?

Aron matabangan sa pagtubag niini nga pangutana, ikonsiderar ang paghisgot sa mosunod nga pamahayag ni Presidente Marion G. Romney (1897–1988) sa Unang Kapangulohan:

President Marion G. Romney

“Ang pagdala og kalinaw nagkinahanglan sa pagwagtang sa impluwensya ni Satanas. Kon asa man siya, wala gayud ang kalinaw. Dugang pa, ang malinawon nga pagpakig-uban kaniya imposible. … Wala siyay laing pasiugdahan kondili ang mga buhat sa unod. …

“Isip pasiuna sa kalinaw, kinahanglan, ang impluwensya ni Satanas hingpit nga mabuntog. …

“Samtang ang mga buhat sa unod dunay malukpanon nga paggamit, mao usab ang ebanghelyo sa kalinaw. Kon sundon kini sa tawo, may kalinaw sulod sa iyang kaugalingon. Kon sundon kini sa duha ka tawo, silang duha may kalinaw sulod sa ilang kaugalingon ug sa usag usa. Kon ang mga lungsuranon mosunod niini, ang nasud dunay kaugalingong kalinaw. Kon dunay igong mga nasud nga nagtagamtam sa bunga sa Espiritu sa pagkontrolar sa mga kalihokan sa kalibutan, niana, ug kana lamang gayud, ang makapahunong sa tinguha sa pakiggubat” (“The Price of Peace,” Ensign, Okt. 1983, 4, 6).

  • Kanus-a kamo nakakita nga ang ebanghelyo nagdala og kalinaw sa kinabuhi sa tawo?

  • Unsa ang pipila ka paagi diin epektibo kita nga mapaambit sa ebanghelyo?

Awhaga ang mga estudyante sa pagkonsiderar kon may nailhan ba sila nga pwede nilang katabangan aron makasinati og kalinaw gikan sa ebanghelyo. Dapita sila nga sugdan ang pagplano nga ipaambit ang ebanghelyo nianang tawhana, ug awhaga sila sa paghunahuna kon unsaon nila sa paggamit ang mga baruganan nga ilang nakat-unan samtang magpadayon ang leksyon.

Mosiah 28:3; Alma 17:2–3, 6, 9–12, 16, 25; 18:10; 21:16; 22:1, 12–14; 26:11–12, 26–29; 31:30–34

Ang pagkahimong mga instrumento sa mga kamot sa Dios

babay nga nag-play og violin
set sa mga liyabe
instrumento sa eksaminasyon sa medical

Ikonsiderar ang pagpakita sa mga estudyante sa usa o sa tanang litrato nga naa sa ibabaw (violin, mga tools sa shop, mga instrumento sa medikal) o mga litrato nga sama niini. Dayon ipangutana:

  • Unsay mahimo niini nga mga butang sa mga kamot sa tawo nga batid sa paggamit niini?

  • Unsa kaha ang ipasabut sa pagkahimong instrumento diha sa mga kamot sa Dios?

Dapita ang mga estudyante sa pagbasa og kusog sa Alma 17:2–3, 9–11. Hangyoa ang mga estudyante sa pagpangita kon unsay gihimo sa mga anak ni Mosiah aron mahimong mga instrumento sa mga kamot sa Dios.

  • Unsa ang atong makat-unan gikan sa ehemplo sa mga anak ni Mosiah kon unsaon sa pagkahimong mga instrumento diha sa mga kamot sa Dios? (Samtang motubag ang mga estudyante, isulat sa pisara ang mosunod nga baruganan: Kon mag-ampo kita, magpuasa, magsiksik sa mga kasulatan, ug mopakita og maayong ehemplo para sa uban, mamahimo kitang mga instrumento sa mga kamot sa Dios.)

Ipasabut nga ang Basahon ni Mormon naglangkob og daghang ehemplo kon unsay gipanghimo sa mga anak ni Mosiah aron mamahimong epektibo nga mga instrumento sa mga kamot sa Dios. Isulat sa pisara ang mosunod nga mga pakisayran sa kasulatan (ayaw ilakip ang kaubang mga summary nga anaa sa parentheses). Pag-assign og usa o daghang tudling ngadto sa matag estudyante. Ipapangita sa mga estudyante kon unsay gihimo sa mga sulugoon sa Ginoo nga nakatampo sa ilang kalampusan sa pagpaambit sa ebanghelyo.

Mosiah 28:3 (Nagtinguha nga ipahayag ang kaluwasan aron walay malaglag nga kalag.)

Alma 17:6 (Andam nga talikdan ang kalibutanong pasidungog aron magsangyaw sa ebanghelyo.)

Alma 17:11–12 (Mapailubon, maisugon, ug maayong panig-ingnan.)

Alma 17:16 (Nagtinguha nga maghinulsol ang uban ug makakat-on sa plano sa katubsanan.)

Alma 17:25; 18:10 (Nagtinguha nga mahimong sulugoon.)

Alma 21:16; 22:1 (Gigiyahan pinaagi sa Espiritu.)

Alma 22:12–14 (Nagtudlo gikan sa mga kasulatan mahitungod kang Kristo ug sa plano sa katubsanan.)

Alma 26:11–12 (Nagmapainubsanon, miila sa Dios isip tinubdan sa ilang kusog.)

Alma 26:26–29 (Wala mohunong bisan nawad-an sila sa paglaum. Andam sa mapailubong pag-antus para sa kawsa ni Kristo. Mitudlo sa ebanghelyo sa lahi-lahing kahimtang.)

Alma 31:30–34 (Nag-ampo og tabang sa pagdala sa uban kang Kristo.)

Human sa igong panahon, hangyoa nga ipaambit sa mga estudyante unsay ilang nakat-unan. Ikonsiderar ang pag-summarize sa tubag sa mga estudyante pinaagi sa pagsulat diha sa pisara sa mga summary sa tudling. Mahimo nimong awhagon ang mga estudyante nga isulat kini nga mga pakisayran sa kasulatan ug unya, human sa klase, maghimo og scripture chain nga sulatan sa “Importanting mga elemento bahin sa pagpaambit sa ebanghelyo.”

  • Kon may oportunidad na kamo nga nakapaambit sa ebanghelyo ngadto sa uban, pwede bang mopaambit kamo og kasinatian o mopamatuod kon sa unsang paagi kini nga mga elemento nakatampo sa inyong kalampusan?

  • Sa unsang paagi ang mga baruganan nga narekord dinhi niini nga mga tudling magamit sa ubang calling o sa pagkamaayong higala o silingan?

  • Kanus-a kamo dunay oportunidad nga makatabang sa uban isip usa ka instrumento sa mga kamot sa Dios?

Alma 18:33–35; 23:5–6; 26:2–5, 15; 29:9–10

Pagtabang aron makabig ang uban

Pahinumdumi ang mga estudyante nga gawas sa pagtudlo kanato nga mamahimo kitang mga instrumento sa mga kamot sa Dios, nagtudlo usab ang Basahon ni Mormon mahitungod sa mahimo natong epekto ngadto sa uban isip mga instrumento.

Dapita ang usa ka estudyante sa pagbasa og kusog sa Alma 18:33–35 samtang mangita ang klase sa unsay angay himoon ni Ammon isip instrumento sa mga kamot sa Dios. Dapita ang mga estudyante sa pag-summarize unsay nadiskubrihan nila nga usa ka pamahayag sa baruganan. (Tabangi nga mahibaloan sa mga estudyante ang mosunod: Kon mahimo na kitang mga instrumento sa mga kamot sa Dios, ihatag Niya kanato ang gahum sa pagtabang sa uban aron masayud sa kamatuoran.)

Aron matabangan ang mga estudyante nga makita ang epekto sa pagtabang sa uban aron mahibalo sa kamatuoran, dapita ang klase sa pagbasa og hilum sa Alma 23:5–6. Ipapangita sa klase kon unsay nahitabo sa mga Lamanite dihang nasayud na sila sa kamatuoran.

  • Unsa nga mga pulong o hugpong sa mga pulong ang naghulagway sa epekto niana nga pagsangyaw sa ebanghelyo ngadto sa mga Lamanite?

  • Unsa nga baruganan ang atong makat-unan mahitungod sa unsay mahitabo kon madala nato ang uban sa kahibalo sa kamatuoran? (Kinahanglang mahibaloan sa mga estudyante ang mosunod nga kamatuoran: Kon madala nato ang uban ngadto sa kahibalo sa kamatuoran, gitabangan nato sila nga makabig sa Ginoo.)

Ipasabut nga si Ammon ug si Alma mipamatuod niini nga mga kamatuoran. Hangyoa ang pipila ka estudyante nga magpuli-puli sa pagbasa og kusog sa Alma 26:2–5, 15 ug Alma 29:9–10 samtang mangita ang klase sa mahimo natong impluwensya ngadto sa uban kon mopaambit kita sa ebanghelyo isip mga instrumento sa mga kamot sa Dios.

  • Unsa ang nakadani kaayo ninyo mahitungod sa mga pagbati nga gi-summarize ni Ammon ug ni Alma?

Dapita ang mga estudyante nga ipaambit unsay ilang nasinati sa ilang pagpaambit sa ebanghelyo ngadto sa uban.

Awhaga ang mga estudyante nga pamalandungan nila ang mga oportundidad sa pagtabang sa uban sa pagkat-on sa ebanghelyo ug makabig. Dapita sila sa pagkonsiderar kon sa unsang paagi malakip nila ang mga baruganan ug mga pamaagi nga ilang nakat-unan niini nga leksyon ngadto sa ilang inadlaw nga paningkamot sa pagpaambit sa ebanghelyo.

Mga Basahunon sa Estudyante