Pagpangandam alang sa Katapusang Adlaw sa Paghukom

Pasiuna

Ang mortal nga kinabuhi mao ang panahon para maandam kita sa pagsugat sa Dios. Mipasabut ang Basahon ni Mormon unsay mahitabo sa atong mga espiritu sa tunga-tunga sa kamatayon ug sa Pagkabanhaw. Human ang atong mga espiritu ipahiuli ngadto sa atong imortal nga lawas, mobarug kita atubangan sa hukmanan sa Dios, diin ang atong mga binuhatan ug tinguha sa atong kasingkasing motino sa mahangturon nato nga ganti.

Background nga Basahunon

Dallin H. Oaks, “Resurrection,” Ensign, Mayo 2000, 14–16.
D. Todd Christofferson, Ang Pagkabanhaw ni Jesukristo,” Liahona Mayo 2014, 111–14.
“Pagsabut sa Kamatayon ug Pagkabanhaw,” hugna 37 sa Mga Pagtulun-an sa mga Presidente sa Simbahan: Brigham Young (1997), 315-22.

Mga Sugyot alang sa Pagtudlo

Alma 34:32–34; 40:6–7, 11–14

Human sa kamatayon, ang mga matarung moadto sa paraiso ug ang mga dautan moadto sa bilanggoan sa espiritu

Sa dili pa magsugod ang klase, isulat sa pisara ang mosunod nga pangutana:

Sa unsang paagi kaha ang mga tawo nga wala makasabut sa katuyoan sa ilang mortal nga kinabuhi ug wala motuo sa kinabuhi human sa kamatayon lahi og puy-an gikan sa mga tawo kinsa nakasabut niining mga butanga?

Dapita ang mga estudyante sa pagtubag niini nga pangutana. Dayon pahinumdumi sila nga ang Basahon ni Mormon magtabang nga atong masabtan ang katuyoan sa kinabuhi dinhi sa yuta ug magtudlo kanato nga ang kinabuhi magpadayon human sa kamatayon.

Dapita ang usa ka estudyante sa pagbasa og kusog sa Alma 34:32–34 samtang ang klase mangita sa unsay gitudlo ni Amulek sa katawhan sa Ammoniha mahitungod sa katuyoan sa kinabuhi.

Unsa ang importante nga doktrina ang gitudlo ni Amulek mahitungod sa katuyoan sa kinabuhi dinhi sa yuta? (Kinahanglang mahibaloan sa mga estudyante ang pipila ka doktrina niini nga tudling, lakip ang mosunod: Kini nga kinabuhi mao ang panahon alang kanato sa pagpangandam sa pagsugat sa Dios.)
Sa unsang mga paagi kini nga doktrina makatabang aron inyong masabtan kon unsaon sa pagpanginabuhi sa inadlaw ninyong kinabuhi dinhi sa mortalidad?

Aron mas matabangan ang mga estudyante sa pagsabut niini nga doktrina, ikonsiderar ang pagpaambit sa mosunod nga pamahayag ni Presidente Thomas S. Monson:

“Atong nasabtan nga mianhi kita sa yuta aron makakat-on, aron magpakabuhi, aron mouswag sa atong mahangturon nga panaw padulong sa pagkahingpit. Ang uban nakapuyo sa yuta apan sa makadiyot lamang, samtang ang uban nagpuyo og dugay dinhi sa yuta. Ang pagsukod dili mag-agad kon unsa ka dugay ang atong pagpuyo apan kon sa unsa ka maayo ang atong pagpakabuhi” (“He Is Risen,” Ensign, Nob. 1981, 18).

Nganong si Amulek mipasidaan kanato sa dili paglangay sa adlaw sa atong paghinulsol?

I-display ang mosunod nga pamahayag ni Presidente Henry B. Eyring sa Unang Kapangulohan, ug ipabasa kini og kusog sa usa ka estudyante samtang ang klase mangita kon nganong dunay kakuyaw sa paglangay:

“Delikado ang pulong nga sa umaabut nga adlaw [unya nalang] kon ang ipasabut niini ‘dili karong adlawa.’ ‘Sa umaabut nga adlaw maghinulsol ko.’ ‘Sa umaabut nga adlaw ako siyang pasayloon.’ ‘Sa umaabut nga adlaw [unya na lang ko] makig-istorya ko sa akong higala mahitungod sa Simbahan.’ ‘Sa umaabut nga adlaw magsugod ko og bayad sa akong ikapulo.’ ‘Sa umaabut nga adlaw mobalik ra unya ko sa templo.’ ‘Sa umaabut nga adlaw …’ Ang mga kasulatan nagtataw sa kapeligro sa paglangay-langay [tan-awa sa Alma 34:33–34]. … Karong adlawa usa ka bililhong gasa sa Dios. Ang hunahuna nga ‘ Sa umaabut nga adlaw ako unya [unya na lang]’ mahimong mosakmit sa mga kahigayunan ug sa mga panalangin sa kahangturan” (“Karong Adlawa,” Liahona, Mayo 2007, 89).

Dapita ang pipila ka estudyante nga magpuli-puli sa pagbasa og kusog sa Alma 40:6–7, 11–14. Hangyoa ang klase sa pagsunod, nga mangita kon unsay gitudlo ni Alma sa iyang anak nga si Corianton sa unsay mahitabo sa atong espiritu human kita mamatay. (Tingali makatabang ang pagpasabut nga sa dihang migamit si Alma sa mga pulong nga “kawanangan sa kangitngit,” wala siya magpasabut sa katapusang kahimtang ni Satanas ug niadtong mga gipanghimaraut. Hinoon, ang gipasabut niya mao ang kahimtang sa dautan sa tunga-tunga sa panahon sa ilang kamatayon ug sa panahon sa ilang pagkabanhaw. Sa kasagaran kini nga kahimtang gitawag nato og bilanggoan sa espiritu.)

Unsa ang kalainan tali sa kahimtang sa mga matarung ug sa kahimtang sa mga dautan human sa kamatayon? (Bisan og mogamit sila og lahi-lahi nga mga pulong, kinahanglang mahibaloan sa mga estudyante ang mosunod nga doktrina Sa tunga-tunga sa kamatayon ug pagkabanhaw, ang mga espiritu sa matarung magpuyo sa paraiso ug ang mga espiritu sa dautan magpuyo sa bilanggoan sa espiritu.)
Ngano nga importanting mahibaloan nga ang mortal natong mga binuhatan makaapekto sa unsay atong masinati human sa kamatayon?

2 Nephi 9:12–13; Mosiah 15:21–26; 16:6–11; Alma 11:40–45; 40:4–5, 19–24

Ang atong espiritu ipahiuli ngadto sa atong lawas atol sa Pagkabanhaw

Pahinumdumi ang mga estudyante nga dihang gitudloan ni Abinadi si Haring Noah ug ang iyang mga pari, gihulagway niya unsay mahitabo kanato human sa kamatayon. Kini nga mga doktrina nga iyang gitudlo naghulagway sa unsay mahitabo human sa atong panahon unya didto sa kalibutan sa espiritu, sa paraiso man o sa bilanggoan sa espiritu. Dapita ang pipila ka estudyante nga magpuli-puli sa pagbasa og kusog sa Mosiah 16: 6-11 samtang mangita ang klase sa unsay gitudlo ni Abinadi.

Unsa nga doktrina ang gitudlo ni Abinadi mahitungod sa mahitabo kanato human sa atong panahon sa kalibutan sa espiritu? (Ipasabut og maayo ang mosunod nga mga kamatuoran: Tungod kay gibugto ni Jesukristo ang mga higot sa kamatayon, kitang tanan mabanhaw ug makadawat og imortal nga lawas. Mapanununod sa mga matarung ang walay katapusang kalipay, ug ang mga dautan ihatud ngadto sa walay katapusan nga silot.)

Sultihi ang mga estudyante nga daghan sa mga propeta sa Basahon ni Mormon ang mipamatuod sa Pagkabanhaw ug mipasabut kon unsa kini. Isulat sa pisara ang mosunod nga mga scripture passage (nga walay kaubang mga summary) ug i-assign ang matag estudyante sa pagbasa og usa sa mga tudling. Siguroha nga maasign ang tanan nga tudling. Ipabasa og hilum sa mga estudyante ang ilang mga tudling, nga mangita og dugang mga detalye mahitungod sa Pagkabanhaw.

2 Nephi 9:12–13 (Ang paraiso motugyan sa mga espiritu sa mga matarung, ug ang bilanggoan sa espiritu motugyan sa mga espiritu nga dautan. Ang mga espiritu ipahiuli ngadto sa ilang lawas ug mamahimong mga kalag nga imortal.)

Mosiah 15:21–26 (Mobangon ang mga matarung sa Unang Pagkabanhaw, mao usab kadtong nangamatay nga walay alamag ug ang gagmayng mga bata. Walay luna ang mga dautan sa Unang Pagkabanhaw.)

Alma 11:40–45 (Ang tanang tawo, dautan ug matarung, ang ilang espiritu ug ang lawas magkauban og balik sa hingpit nga porma ug mobarug atubangan sa Dios aron hukman sumala sa ilang mga buhat.)

Alma 40:4–5, 19–24 (Dunay panahon tunga-tunga sa kamatayon ug sa Pagkabanhaw nga ang espirtu moadto sa kalibutan sa mga espiritu. Human niana, moabut ang panahon nga ang espiritu sa tanang tawo ipahiuli sa kahangturan ngadto sa ilang hingpit nga lawas ug mobarug atubangan sa Dios aron mahukman.)

Hatagi ang mga estudyante og panahon sa pagpasabut unsay ilang nakat-unan mahitungod sa Pagkabanhaw gikan sa gi-assign sa ilaha nga tudling. Ikonsiderar nga isulat sa pisara ang pipila sa ilang mga panabut tupad sa katugma nga mga tudling. Kon gikinahanglan, ipangutana ang usa o daghang pangutana sama sa mosunod aron mapalawman ang panabut sa mga estudyante bahin niini nga mga tudling:

Sa unsang paagi ang mga kamatuoran makalig-on sa inyong pagtuo nga ang Pagkabanhaw tinuod ug importante nga bahin sa plano sa Langitnong Amahan?

Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang paagi ang pagpamatuod sa Pagkabanhaw makapanalangin kanato dinhi sa mortalidad.

“Si Apostol Pedro mipasabut sa kamatuoran nga ang Dios nga Amahan, sa dako Niya nga kalooy ‘kita iyang gianak pag-usab ngadto sa usa ka buhing paglaum pinaagi sa pagkabanhaw ni Jesukristo gikan sa mga patay’ (1 Ped. 1:3; tan-awa usab sa 1 Mga Taga-Tes. 4:13–18).

Ang ‘buhing paglaum’ nga ihatag kanato pinaagi sa pagkabanhaw mao ang atong kombiksyon nga ang kamatayon dili mao ang katapusan sa atong pagkatawo apan kinahanglanon nga lakang sa proseso sa kausaban gikan sa pagka-mortal ngadto sa pagka-imortal. Kini nga paglaum makapausab sa tibuok nga panglantaw sa mortal nga kinabuhi. …

“Ang kasiguroan sa pagkabanhaw naghatag kanato sa kalig-on ug panglantaw sa paglahutay sa mortal nga mga hagit nga giatubang sa matag usa kanato ug niadtong atong gihigugma, mga butang sama sa pisikal, mental, o emosyonal nga kakulangan nga dala sa atong pagkatawo o atong nakuha panahon sa mortal nga kinabuhi. Tungod sa pagkabanhaw, kita nasayud nga kining mortal nga mga kakulangan temporaryo lamang!

“Ang kasiguroan sa pagkabanhaw naghatag usab kanato og usa ka gamhanan nga pagdasig sa pagsunod sa mga sugo sa Dios panahon sa atong mortal nga kinabuhi. …

“Ang atong sigurado nga kahibalo bahin sa pagkabanhaw ngadto sa pagka-imortal naghatag usab og kaisug nga maatubang ang kaugalingon natong kamatayon—gani kamatayon nga gitawag nato og wala sa panahon. …

“Ang kasiguroan sa imortalidad magtabang usab nga atong masagubang ang pagkabulag sa mortal lakip ang kamatayon sa atong mga minahal. … Tanan kita kinahanglang modayeg sa Dios tungod sa gipaniguro nga pagkabanhaw nga naghimo sa mortal nga pagkabulag nga temporaryo ug naghatag kanato og paglaum ug kalig-on nga magpadayon” (“Resurrection,” Ensign, Mayo 2000, 15–16).

Kanus-a ang kasiguroan sa Pagkabanhaw mihatag kaninyo og kalig-on o midasig kaninyo sa mas matarung nga pagpakabuhi?

Ipaambit ang imong pagpamatuod mahitungod sa katinuod sa Pagkabanhaw.

Alma 5:15–21; 7:21–25; 41:2–6

Pagpangandam alang sa Katapusang Paghukom

Ipasabut nga giawhag ni Alma ang mga miyembro sa Simbahan sa Zarahemla nga mangandam alang sa Katapusang Paghukom pinaagi sa paghangyo nila nga hunahunaon ang ilang kaugalingon nga nagbarug atubangan sa Dios aron mahukman. Dapita ang pipila ka estudyante nga magpuli-puli sa pagbasa og kusog sa Alma 5:15–21. Hangyoa ang klase sa pagpangita unsay gihangyo ni Alma nga ikonsiderar sa mga tigpaminaw.

Asa sa mga pangutana ni Alma ang makahuluganon kaninyo, ug ngano?
Unsa nga baruganan ang atong makat-unan gikan sa pagpamatuod ni Alma diha sa bersikulo 21 mahitungod sa unsay angay natong buhaton aron maluwas? (Tabangi ang mga estudyante sa pag-ila sa mosunod nga baruganan: Dili kita maluwas gawas kon mahugasan kita nga limpyo pinaagi sa makatubos nga dugo ni Ginoong Jesukristo.)

Aron matabangan nga mas masabtan sa mga estudyante kini nga baruganan, i-display ang mosunod nga pamahayag ni Presidente Joseph Fielding Smith, ug dapita ang usa ka estudyante sa pagbasa niini og kusog:

“Wala koy nahibaloan nga mas importante o gikinahanglan niining panahona kay sa isangyaw ang paghinulsol, bisan sa mga Santos sa Ulahing mga Adlaw, ug ako nagtawag kanila … sa pagpatalinghug sa pulong sa atong Manunubos. Karon tataw kaayo ang iyang giingon nga walay mahugaw nga makasulod sa iyang presensya. Kadto lang nga napamatud-an sa ilang kamatinud-anon ug nahugasan ang ilang mga saput sa iyang dugo pinaagi sa ilang pagtuo ug paghinulsol—walay lain ang makakaplag sa gingharian sa Dios” (Mga Pagtulun-an sa mga Presidente sa Simbahan: Joseph Fielding Smith [2013], 103).

Hangyoa ang mga estudyante pagtuon sa hilum sa Alma 7:21–25, ug dapita sila nga pangitaon ug markahan ang mga kalidad nga angay sa atong pagtinguha nga molambo aron ang atong mga saput makaplagan nga walay lama.

Unsa nga mga hiyas o kalidad ang inyong nakita dinhi sa mga tudling nga importante nga atong mapalambo samtang mangandam kita nga hukman sa Ginoo?

Awhaga ang mga estudyante sa pagkonsiderar kon ang ilang mga buhat ug tinguha sa ilang mga kasingkasing nag-andam ba nila sa pagsugat sa Dios sa Katapusang Paghukom. Awhaga sila sa paghimo og bisan unsang gikinahanglan nga mga kausaban aron mahimo ang Adlaw sa Paghukom nga makapalipay nga butang.

Mga Basahunon sa Estudyante

2 Nephi 9:12–13; Mosiah 15:21–26; 16:6–11; Alma 5:15–21; 7:21–25; 11:40–45; 16:6–11; 34:32–34; 40:4–7, 11–14, 19–24; 41:2–6.
Dallin H. Oaks, “Resurrection,” Ensign, Mayo 2000, 14–16.