Mga Seminary ug mga Institute
Leksyon 4: Ang Pagkapukan ni Adan ug ang Gasa sa Kabubut-on

4

Ang Pagkapukan ni Adan ug ang Gasa sa Kabubut-on

Pasiuna

Ang Pagkapukan ni Adan mahinungdanon nga bahin sa plano sa Dios. Nagdala kini sa mga kahimtang nga makaanhi kita sa kalibutan ug masulayan. Ang plano usab sa Dios naglakip sa Iyang paghatag og kabubut-on sa Iyang mga anak (tan-awa sa 2 Nephi 2:27). Niini nga leksyon, makat-unan sa mga estudyante nga ang yawe sa maayong pagkagamit sa atong kabubut-on mao ang pagtinguha sa kabubut-on sa Dios, nga mao ang pagsunod sa gipakita ni Jesukristo nga ehemplo.

Background nga Basahunon

  • Robert D. Hales, “Kabubut-on: Mahinungdanon sa Plano sa Kinabuhi,” Liahona, Nob. 2010, 24–27.

  • Jeffrey R. Holland, “Asa ang Hustisya, Gugma, ug Kalooy Mag-abut,” Liahona, Mayo 2015, 104–6.

Mga Sugyot alang sa Pagtudlo

2 Nephi 2:19–26, 28; Alma 42:6–10, 14; Moises 5:5–9

Ang Pagkapukan ni Adan

I-display ang mosunod nga pamahayag ni Elder Bruce C. Hafen sa Seventy, ug ipabasa kini og kusog sa usa ka estudyante:

Elder Bruce C. Hafen

“Sukad pa sa ikalima nga siglo, ang Kristiyanismo nagtudlo nga ang Pagkapukan ni Adan ug ni Eva usa ka masulob-on nga kasaypanan. … Kana nga pagtuo sayop. … Ang Pagkapukan dili dautang panghitabo. Kadto dili sayop o usa ka aksidente. Kadto tinuyo nga bahin sa plano sa kaluwasan” (“Ang Pag-ula: Ang Tanan alang sa Tanan,” Liahona, Mayo 2004, 97).

  • Ngano kaha nga importanting masabtan nga ang Pagkapukan dili usa ka sayop o aksidente apan usa ka tinuyo nga bahin sa plano sa kaluwasan?

Dapita ang mga estudyante nga tun-an ang 2 Nephi 2:19–25 ug sa paghimo og lista sa mga epekto sa Pagkapukan—ang mga butang nga nahitabo kang Adan ug Eva human sila mikaon sa gidili nga bunga. Dayon ipasulat sa mga estudyante diha sa pisara ang mga butang gikan sa ilang mga lista. (Pahinumdom: Ang pagtan-aw sa lista diin naa ang scripture passage usa ka kahanas sa pagtuon sa kasulatan nga mahimo nimong itudlo uban niini nga tudling; tan-awa sa Gospel Teaching and Learning [2012], 23.) Ang lista kinahanglang maglakip sa mosunod: Gipalayas si Adan ug si Eva sa Tanaman sa Eden; nanganak sila; nahiagom sila og usa ka kahimtang sa pagsulay; nawala sila ug nagkinahanglang maghinulsol; ug nakasinati sila og oposisyon, nga nagtugot nga masinati nila ang maayo ug dautan ug migamit sa ilang kabubut-on sa maalamong paagi.

  • Sa unsang paagi ang lista nga naa sa pisara makatabang sa pagpasabut nganong ang Pagkapukan ni Adan usa ka kinahanglanong bahin sa plano sa Langitnong Amahan? (Posibling mohatag og lain-laing mga tubag ang mga estudyante nga ma-summarize niini nga baruganan: Naghimong posible ang Pagkapukan aron makasulod kita sa mortalidad ug mouswag padulong sa kinabuhing dayon.)

  • Unsay buot ipasabut sa “tanan nga mga tawo … nahisalaag” tungod sa Pagkapukan? (2 Nephi 2:21).

Aron makatabang og tubag niini nga pangutana, dapita ang pipila ka estudyante nga magpuli-puli sa pagbasa og kusog sa Alma 42:6–10, 14 samtang mangita ang klase sa dugang pang mga epekto sa Pagkapukan. Samtang magpaambit ang mga estudyante unsay ilang nakit-an, mahimo nimong idugang ang ilang mga tubag sa lista diha sa pisara.

  • Unsay ipasabut sa “gipahimulag … gikan sa atubangan sa Ginoo”?

I-display ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

Elder Jeffrey R. Holland

“[Si Adan ug si Eva] nakalapas sa sugo sa Dios nga kinahanglang mobiya sila sa tanamang dapit apan nagtugot kanila sa pagbaton og mga anak sa dili pa mamatay. Aron pagdugang og kaguol ug kalisud sa ilang kahimtang, ang ilang kalapasan usab dunay espirituhanong sangputanan, mipahimulag kanila gikan sa presensya sa Dios hangtud sa kahangturan. Tungod kay natawo kita sa napukan nga kalibutan ug tungod kay kita usab molapas sa mga balaod sa Dios, kita usab gihukman og sama nga silot nga giatubang ni Adan ug Eva. …

“… Gikan sa higayon nga kadtong unang mga ginikanan migawas sa Tanaman sa Eden, ang Dios ug ang Amahan natong tanan, nga nakita na ang desisyon ni Adan ug Eva, mipadala sa mga anghel sa langit aron sa pagpahayag ngadto kanila—ug tadlas sa kapanahunan ngari kanato—nga kining tanan gidesinyo alang sa atong mahangturong kalipay. Kabahin sa Iyang balaang plano, nga mihatag og usa ka Manluluwas, ang Anak sa Dios Mismo—ang laing ‘Adan,’ nga maoy tawag ni Apostol Pablo Kaniya [tan-awa sa 1 Mga Taga-Corinto 15:45]—nga moabut sa tunga-tunga sa panahon aron motubos sa kalapasan sa unang Adan. Ang Pag-ula hingpit nga mobuntog sa pisikal nga kamatayon. … Sa kalooy kini mohatag usab og kapasayloan sa personal nga mga sala sa tanan, gikan ni Adan hangtud sa katapusan sa kalibutan, sumala sa paghinulsol ug pagkamasulundon sa balaan nga mga sugo” (“Asa ang Hustisya, Gugma, ug Kalooy Mag-abut,” Liahona, Mayo 2015, 105–6).

  • Nganong “gisentensyahan man kita og parehong mga silot nga giatubang ni Adan ug ni Eva”? (Natawo kita sa napukan nga kalibutan, ug nakalapas kita sa mga balaod sa Dios.)

Dapita ang pipila ka mga estudyante nga magpulipuli sa pagbasa og kusog sa 2 Nephi 2:26, 28 ug Moises 5:5–9, samtang mangita ang klase kon sa unsang paagi ang mga epekto sa Pagkapukan mahimong mabuntog sa atong kinabuhi.

  • Sumala niini nga mga tudling, sa unsang paagi matubos kita gikan sa espiritwal nga mga epekto sa Pagkapukan? (Ang mga tubag kinahanglang maglakip sa mosunod nga baruganan: Kon maghinulsol ug motawag kita sa Dios alang sa kapasayloan, matubos kita gikan sa atong mga sala pinaagi sa Pag-ula ni Jesukristo.)

Dapita ang mga estudyante nga pamalandungan ang tahas sa Pagkapukan diha sa plano sa kaluwasan ug sa unsang paagi kini “gidesinyo alang sa atong mahangturon nga kalipay.” Hangyoa ang usa o duha ka estudyante nga mopakigbahin sa ilang mga hunahuna uban sa klase.

2 Nephi 2:14, 16, 26–29; Helaman 14:30–31; 3 Nephi 27:13

Ang gasa sa kabubut-on

I-display ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

President Russell M. Nelson

“Nahimong mortal si Adan ug si Eva [pinaagi sa Pagkapukan]. Makalipay para nato, manganak usab sila ug makatuman sa mga katuyoan sa paglalang sa kalibutan. … Ang uban pang mga panalangin miabut kanato pinaagi sa Pagkapukan. Gipalihok niini ang gidugang nga duha ka kauban nga mga gasa gikan sa Dios, hapit masusama ka bililhon sa kinabuhi mismo—kabubut-on ug pagkamay-tulubagon” (“Constancy amid Change,” Ensign, Nob. 1993, 34, mga italic gidugang).

  • Sa unsang mga paagi ang kabubut-on ug pagkamay-tulubagon “may susamang kabililhon sa kinabuhi mismo”?

Hangyoa ang mga estudyante nga tun-an ang 2 Nephi 2:14, 16, ug 26, nga mangita kon unsay gitudlo niini nga mga bersikulo kon sa unsang paagi nalahi ang mga anak sa Dios gikan sa uban pa Niyang mga gilalang.

  • Unsa ang gi-higlight nga mga kalainan niini nga mga bersikulo tali sa mga anak sa Dios ug sa uban pa Niyang mga gilalang? (Kinahanglang mahibaloan sa mga estudyante ang mosunod nga doktrina: Gilalang ang mga anak sa Dios aron molihok sa iyang kaugalingon kay sa aghaton sa pagpalihok.)

  • Unsay buot ipasabut nga gilalang kita sa Dios aron molihok kay sa aghaton sa pagpalihok?

  • Ngano nga importanting masayran nga ang mga anak sa Dios gilalang aron molihok sa ilang kaugalingon ug dili aghaton pa sa pagpalihok?

Aron makatabang sa pagtubag niini nga pangutana, mahimo nimong hisgutan ang mosunod nga pamahayag ni Presidente Boyd K. Packer (1924–2015) sa Korum sa Napulog Duha ka mga Apostoles:

President Boyd K. Packer

“Ang karaan nga panultihon nga, ‘Ang Ginoo mobotar alang kanako, ug si Lucifer mobotar batok kanako, apan ang akong boto maoy mahinungdanon’ naghulagway og usa ka doktrinal nga kasiguroan nga ang atong kabubut-on mas gamhanan kaysa kabubut-on sa yawa. Ang kabubut-on bililhon. Kita sa binuang, sa binuta nga paagi mohatag niini, apan dili kini mapugos sa pagkuha gikan kanato.

“Usab adunay karaan na kaayo nga pangatarungan: ‘Gipugos man gud ko sa yawa nga buhaton kadto.’ Dili kaayo! Siya makalingla kaninyo ug makalipat kaninyo, apan siya walay gahum nga mopugos kaninyo o ni bisan kinsa sa paglapas” (“Paghinlo sa Pinakasulod sa Templo,” Liahona, Nob. 2010, 74).

Ipabasa sa pipila ka estudyante ang 2 Nephi 2:26–29 ug ang uban mobasa sa Helaman 14:30–31. Awhaga nga i-higlight sa mga estudyante ang mga pulong nga nagpakita sa umaabut nga mga sangputanan sa mga pagpili nga gihimo nato karon. Dapita ang mga estudyante nga ipaambit ang pipila ka mga pulong nga ilang gi-highlight.

  • Unsa ang makat-unan nato nga kamatuoran gikan niini nga mga tudling mahitungod sa mga epekto sa atong mga pagpili? (Kinahanglang mahibaloan sa mga estudyante ang mosunod nga kamatuoran: Ang pamaagi sa paggamit nato sa atong kabubut-on motino sa atong espiritwal nga pag-uswag ug sa mahangturong mga panalangin.)

Aron matabangan ang mga estudyante nga makasabut niini nga kamatuoran, dapita ang usa ka estudyante sa pagbasa sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:

Elder Robert D. Hales

“Sa higayon nga kita mopili sa pagbuhat sa kabubut-on sa atong Langitnong Amahan, ang atong kabubut-on mapreserbar, ang atong mga oportunidad managhan, ug kita mouswag. … Ang sukwahi tinuod usab: sa higayon nga kita dili mosunod sa mga sugo o mosunod sa mga pag-aghat sa Espiritu Santo, ang atong mga oportunidad mokunhod; ang atong mga abilidad sa pagbuhat ug pag-uswag mapupos. … Ang pagkamasulundon sa mga sugo sa katapusan makapanalipud sa atong kabubut-on” (“Kabubut-on: Mahinungdanon sa Plano sa Kinabuhi,” Liahona, Nob. 2010, 25–26).

  • Unsa ang pipila ka sangputanan nga moabut tungod sa sayop nga paggamit sa kabubut-on?

  • Sa unsang paagi ang pagsunod sa mga sugo sa Dios mopanalipud sa atong kabubut-on?

  • Ngano nga ang paggamit sa atong kabubut-on “sa pagbuhat sa kabubut-on sa atong Langitnong Amahan” mao man ang yawe sa espiritwal nga pag-uswag?

Ipabasa og hilum sa mga estudyante ang 3 Nephi 27:13 ug sa paghunahuna sa ehemplo ni Jesukristo bahin sa matarung nga paggamit sa gasa sa kabubut-on.

  • Sa unsang mga paagi ang mga pulong sa Manluluwas nga “Ako mianhi … sa pagbuhat sa kabubut-on sa akong Amahan” makatabang aron magamit nato sa maalamong paagi ang gasa sa kabubut-on?

Ipaambit ang mosunod nga pamahayag ni Elder Richard G. Scott sa Korum sa Napulog Duha ka mga Apostoles aron matabangan ang mga estudyante nga makasabut sa dagkong panalangin nga moabut tungod sa matarung nga paggamit sa atong kabubut-on:

Elder Richard G. Scott

“Tuyo sa Ginoo nga makita ang inyong personal nga pagtubo ug paglambo. Kana nga paglambo mokusog kon andam kamong motugot nga Siya mogiya kaninyo sa matag kasinatian sa pagtubo nga inyong masinati, bisan kon kini sa sinugdanan inyo bang indibidwal nga kagustohan o dili. Kon mosalig kamo sa Ginoo, kon andam kamo nga masentro ang inyong kasingkasing ug hunahuna sa Iyang kabubut-on, ug kon mangayo kamo nga magiyahan sa Espiritu sa paghimo sa Iyang kabubut-on, makasiguro kamo sa kinadak-ang kalipay diha sa inyong agianan ug sa makatagbaw kaayo nga kalampusan niining mortal nga kasinatian. Kon magduhaduha kamo sa tanang butang nga gisugo kaninyo, o maisugong mosupak sa matag dili maayo nga hagit, naghimo kamo niini nga mas malisud alang sa Ginoo sa pagpanalangin kaninyo. [Tan-awa sa 1 Nephi 3:7.]

“Ang inyong kabubut-on, ang katungod sa paghimo og mga pagpili, wala ihatag aron makuha ninyo ang inyong gusto. Kining balaan nga gasa gihatag aron makapili kamo unsay gusto sa Langitnong Amahan alang kaninyo. Nianang paagiha makagiya Siya ninyo aron maabut ninyo ang tanan nga maoy tuyo Niya nga inyong maabut. [Tan-awa sa D&P 58:26–32.]” (“Finding Joy in Life,” Ensign, Mayo 1996, 25).

Pahunahunaa ang mga estudyante og mga panahon dihang nakahimo sila og mga desisyon sa paglihok nga matarung. Dapita ang pipila ka estudyante nga ipaambit sa unsang paagi ang mga sangputanan niana nga mga desisyon nagdala og panalangin diha nila.

Awhaga ang mga estudyante nga pamalandungan unsaon nga mas masunod nila ang ehemplo ni Jesukristo sa paghimo sa kabubut-on sa Langitnong Amahan. Ipaambit ang imong pagpamatuod nga ang saktong paggamit sa kabubut-on modala kanato sa kinabuhing dayon.

Mga Basahunon sa Estudyante