Ang Basahon ni Mormon ug ang Biblia

Pasiuna

Isip kauban sa Biblia, ang Basahon ni Mormon usa ka saksi sa kabalaan ni Jesukristo ug sa Iyang tahas isip Manluluwas sa kalibutan. Ang Basahon ni Mormon nagpahiuli sa yano ug bililhong mga kamatuoran nga nangawala sa Biblia. Kon tun-an nato ang Basahon ni Mormon, mahatagan og katin-awan ang atong panabut sa mga doktrina nga naa sa Biblia.

Background nga Basahunon

Russell M. Nelson, “Mga Saksi sa Kasulatan,” Liahona, Nob. 2007, 43–46.
Tad R. Callister, “Ang Basahon ni Mormon—Basahon gikan sa Dios,” Liahona, Nob. 2011, 74–76.

Mga Sugyot alang sa Pagtudlo

Ezequiel 37:15–19; 2 Nephi 3:11–12; 29:3–10

Ang Biblia ug ang Basahon ni Mormon nagkahiusang mga saksi ni Jesukristo

Pangutan-a ang mga estudyante kon unsa kahay ilang isulti sa tawo nga nagduha-duha mahitungod sa Basahon ni Mormon tungod kay gihatagan man kita sa Dios og Biblia.

Dapita ang mga estudyante sa pagbasa og hilum sa 2 Nephi 29:3–10 ug pagmarka sa mga pulong nga nagpasabut sa mga rason sa Ginoo sa paghatag og dugang pa nga usa ka basahon sa kasulatan.

Unsay gisulti sa Ginoo mahitungod niadtong may mga pagduha-duha sa kasulatan agig dugang sa Biblia?
Sumala sa bersikulo 8, unsa ang gisulti sa Ginoo nga Iyang katuyoan sa pagpadayag og dugang pa nga kasulatan sa Biblia? (Posibling mohatag og lain-laing tubag ang mga estudyante , apan kinahanglang mahibaloan nila ang mosunod nga kamatuoran: Ang Biblia ug ang Basahon ni Mormon parehong nagsaksi kang Jesukristo.)
Unsa ang nakat-unan ninyo niini nga tudling nga nakatabang aron masabtan ninyo ang kaimportante sa pagkaadunay dugang nga mga saksi diha sa kasulatan?

Aron mapalawman pa ang panabut sa mga estudyante kon sa unsang paagi ang Biblia ug ang Basahon ni Mormon nagpamatuod kang Jesukristo, i-display ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles, ug ipabasa kini og kusog sa usa ka estudyante:

“Ang mga saksi sa kasulatan nagpamatuod sa usag usa. Kini nga konsepto gipasabut dugay na dihang ang usa ka propeta misulat nga ang ‘Basahon ni Mormon gisulat aron kamo motuo sa [Biblia]; ug kon kamo motuo [sa Biblia] kamo usab motuo [sa Basahon ni Mormon’ [Mormon 7:9]. Ang matag basahon nagpasabut sa usag-usa. Ang matag basahon nagbarug nga ebidensya nga ang Dios buhi ug mamulong ngadto sa Iyang mga anak pinaagi sa Iyang mga propeta.

“Ang gugma alang sa Basahon ni Mormon mopadako sa gugma sa usa ka tawo alang sa Biblia ug mao sab ang Biblia alang sa Basahon ni Mormon. Ang mga kasulatan sa Pagpahiuli wala makigkompetensya sa Biblia, kini nagkomplimento sa Biblia” (“Mga Saksi sa Kasulatan,” Liahona, Nob. 2007, 43).

Unsay inyong namatikdan sa deskripsyon ni Presidente Nelson bahin sa relasyon tali niining duha ka basahon, ug ngano?

Pahinumdumi ang mga estudyante nga ang propeta sa Daang Tugon nga si Ezequiel nanagna nga ang sungkod ni Judah ug ang sungkod ni Joseph pagausahon. Ipasabut nga ang “sungkod” nagpasabut nga usa ka kahoy nga tableta o linukot nga gilukot libut sa mga kahoy nga tuod (tan-awa sa Boyd K. Packer, “Scriptures,” Ensign, Nob. 1982, 51). Dapita ang usa ka estudyante sa pagbasa og kusog sa Ezequiel 37:15–19.

Unsa ang girepresentaran niini nga mga sungkod? (Kon gikinahanglan, ipasabut nga ang “sungkod ni Judah” nagpasabut sa Biblia ug ang “sungkod ni Ephraim” sa Basahon ni Mormon.)
Unsa kaha ang buot ipasabut nga kining duha ka sungkod o mga basahon sa kasulatan “mahimo nga usa ka sungkod diha sa imong kamot”? (mga bersikulo 17, 19).

Aron makatabang sa pagtubag niini nga pangutana, ipaambit ang mosunod nga pamahayag ni Presidente Boyd K. Packer, (1924–2015) sa Korum sa Napulog Duha ka mga Apostoles. Ipasabut nga wala madugay human gipamahayag kini ni Presidente Packer, gimantala sa Simbahan ang bag-ong mga edisyon sa Basahon ni Mormon ug sa Biblia. Ang matag basahon giapilan og mga footnotes ug uban pang tabang sa kasulatan nga nag-refer ngadto sa ubang basahon, nga sa ingon niana naghiusa sa duha sa bag-ong paagi. Dapita ang mga estudyante sa pagpaminaw sa mga panalangin nga anaa niadtong magtuon gamit ang Biblia ug ang Basahon ni Mormon.

“Ang sungkod o rekord ni Judah … ug ang sungkod o rekord ni Ephraim … naghiusa na karon sa paagi nga kon tun-an ninyo sa mainampingong paagi ang usa niini dad-on ka ngadto sa usa, kon magkat-on ka sa usa mahayagan ka sa usa. Sa pagkatinuod usa ra kini sa atong mga kamot. Ang panagna ni Ezequiel karon natuman na.

“Uban sa paglabay sa mga katuigan, kini nga mga kasulatan magbunga og sumpay-sumpay nga matinud-anong Kristiyanong mga henerasyon kinsa nakaila ni Ginoong Jesukristo ug dayag nga nagsunod sa Iyang kabubut-on. …

“… Maabli ang mga pagpadayag ngadto sa [bag-ong mga henerasyon] nga wala sa ubang kasaysayan sa kalibutan. Sa ilang mga kamot anaa na ang mga sungkod ni Joseph ug ni Judah. Mapalambo nila ang panabut sa ebanghelyo lapas sa unsay nakab-ot sa ilang mga katigulangan. Maangkon nila ang pagpamatuod nga si Jesus mao ang Kristo ug mahimong takus nga mosangyaw Kaniya ug manalipud Kaniya” (“Scriptures,” Ensign, Nob. 1982, 53).

Unsay anaa nga mga panalangin kon tun-an nato og dungan ang Basahon ni Mormon ug ang Biblia? (Kinahanglang mahibaloan sa mga estudyante ang mosunod nga baruganan: Kon tun-an nato og dungan ang Biblia ug ang Basahon ni Mormon, makadawat kita og mas dako nga pagsaksi nga si Jesus mao ang Kristo.)
Sa unsang paagi ang pagdungan og tuon sa Basahon ni Mormon ug sa Biblia mopalawom sa inyong kahibalo ug pagpamatuod ni Jesukristo?

Ipabasa sa usa ka estudyante ang 2 Nephi 3:11–12. (Makatabang ang pagklaro nga kabahin kini nga mga bersikulo sa panagna ni Joseph sa Ehipto. Gihisgutan ni Joseph dinhi sa mga bersikulo ang duha ka basahon—ang basahon nga sinulat sa mga kaliwatan ni Joseph mao ang Basahon ni Mormon, ug ang basahon nga sinulat sa mga kaliwatan ni Judah mao ang Biblia.)

Unsay mahimong epekto sa Basahon ni Mormon ug sa Biblia sa kalibutan samtang “maghiusa” kining duha ka basahon? (Kinahanglang mahibaloan sa mga estudyante kini nga mga ideya: Ang mga basahon mosupak sa mga sayop nga doktrina, ug motapos sa panagbingkil, ug mopahiluna sa kalinaw.)

Hangyoa ang mga estudyante sa pagpamalandong kon unsaon nila sa paggamit ang Basahon ni Mormon ug ang Biblia sa paglig-on sa ilang mga pagpamatuod ug pagtuo sa Langitnong Amahan ug ni Jesukristo. Dapita ang mga estudyante nga ipaambit ang ilang mga hunahuna ug mga impresyon. Dapita usab sila nga sundon ang mga pag-aghat nga ilang madawat.

1 Nephi 13:23–29, 35–36, 38–41

Ang yano ug bililhong mga kamatuoran napahiuli

Pahinumdumi ang mga estudyante nga gisugo si Propeta Joseph Smith sa Ginoo sa paghimo og dinasig nga rebisyon sa King James nga Bersyon sa Biblia. Kini nga rebisyon nailhan nga Hubad ni Joseph Smith. I-display ug basaha ang mosunod nga pamahayag ni Propeta Joseph Smith (1805–44):

“Mituo ako sa Biblia nga tinuod kon nagagikan kini sa pluma [pen] sa orihinal nga mga tigsulat. Ignorante nga mga maghuhubad, dili mabinantayon nga mga magsusulat, o malinglahon ug kurakot nga mga pari ang nakahimo og daghang mga kasaypanan” (Mga Pagtulun-an sa mga Presidente sa Simbahan: Joseph Smith [2007], 248).

Nganong gikinahanglan man ang dinasig nga rebisyon sa Biblia?

Pahinumdumi ang mga estudyante nga dunay panan-awon si Nephi bahin sa pag-abut sa Biblia. Dapita ang usa ka estudyante sa pagbasa og kusog sa 1 Nephi 13:23–25. Hangyoa ang klase sa pagpangita sa deskripsyon ni Nephi mahitungod sa Biblia dihang gisulat kini sa orihinal.

Unsa ang gitudlo sa anghel kang Nephi mahitungod sa Biblia dihang una pa kining gihimo? (Kini “naglangkob sa mga pakigsaad sa Ginoo,” kadto “dako og bili,” ug kini “naglangkob sa kahingpitan sa ebanghelyo sa Ginoo.”)

Dapita ang mga estudyante sa pagbasa sa 1 Nephi 13:26–28, nga mangita kon unsay nahibaloan ni Nephi nga mahitabo sa Biblia ug sa unsang mga rason.

Unsa ang gihimo sa gamhanan ug salawayon nga simbahan sa Biblia? (Ipasabut gayud nga ang gamhanan ug salawayon nga simbahan wala isulti unsa nga simbahan o organisasyon apan hinoon usa ka tiningub nga termino nga nag-refer ngadto sa tanan kinsa makigbatok kang Kristo [tan-awa sa 1 Nephi 13:4–9; 14:10].)
Sumala sa bersikulo 27, ngano nga gipangtangtang man kining yano ug bililhong mga bahin?

Dapita ang usa ka estudyante sa pagbasa og kusog sa 1 Nephi 13:29 samtang mangita ang klase sa mga resulta sa pagpanangtang sa yano ug bililhong mga bahin gikan sa Biblia.

Unsay nahitabo isip resulta sa pagpanangtang sa yano ug bililhong mga pagtulun-an sa Ginoo gikan sa Biblia?
Unsa nga ebidensya ang nakita ninyo sa kalibutan karon nga “hilabihan kadaghan kaayo ang mapandol” isip resulta sa kakulang sa yano ug bililhong mga kamatuoran?

Dapita ang pipila ka mga estudyante nga magpuli-puli sa pagbasa og kusog sa 1 Nephi 13:35–36, 38–41 samtang mangita ang klase sa sulbad sa Ginoo niini nga problema.

Unsay buhaton sa Ginoo aron mabuntog ang mga problema tungod sa pagpanangtang sa yano ug bililhong mga kamatuoran gikan sa Biblia?
Agig dugang sa Basahon ni Mormon, unsa ang “lain pang mga basahon” nga gipagawas sa Ginoo isip kabahin sa Pagpahiuli? (Awhaga ang mga estudyante nga maghimo sila og pahinumdom diha sa ilang mga kasulatan nga ang “lain pang mga basahon” maglakip sa Doktrina ug mga Pakigsaad, sa Perlas nga Labing Bililhon, ug sa Hubad ni Joseph Smith sa Biblia.)
Sumala sa bersikulo 40, sa unsang paagi ang Basahon ni Mormon ug ang “lain pang mga basahon” mosulbad sa mga problema nga miresulta sa pagpanangtang sa yano ug bililhong mga bahin sa Biblia? (Kinahanglang masabtan sa mga estudyante ang mosunod nga kamatuoran: Ang Basahon ni Mormon ug ang ulahing adlaw nga mga kasulatan magtabang nga maestablisar ang kamatuoran sa Biblia ug magpahiuli sa yano ug bililhong mga butang nga gipanangtang gikan niini.)

Aron mahulagway sa unsang paagi ang Basahon ni Mormon mokumpirmar sa atong panabut sa doktrina ug mga baruganan nga naa sa Biblia, ipaambit ang mosunod nga pamahayag ni Elder Tad R Callister, nga nagserbisyo sa Kapangulohan sa Seventy:

“Ang Biblia usa ka saksi ni Jesukristo; ang Basahon ni Mormon lain nga saksi. Ngano nga ang ikaduhang saksi importante kaayo? Ang mosunod nga paghulagway makatabang: Pila ka tul-id nga linya ang inyong ma-drowing sa usa ka tuldok diha sa papel? Ang tubag walay katapusan. Sa makadiyot, ibutang ta nga ang usa ka tuldok nagrepresentar sa Biblia ug ang gatusan ka tul-id nga linya nga madrowing agi niana nga tuldok nagrepresentar sa lain-laing paghubad sa Biblia ug ang kada hubad nagrepresentar og laing simbahan.

“Unsay mahitabo, kon nianang piraso sa papel adunay ikaduha nga tuldok nga nagrepresentar sa Basahon ni Mormon? Pila man ka tul-id nga linya ang inyong madrowing tali niining duha ka mga tuldok: ang Biblia ug ang Basahon ni Mormon? Usa lang. Usa lang ka hubad sa mga doktrina ni Kristo ang makuha sa pagpamatuod niining duha ka mga saksi.

“Sa kanunay ang Basahon ni Mormon maoy magpamatuod, moklaro, mohiusa nga saksi sa doktrina nga gitudlo sa Biblia” (“Ang Basahon ni Mormon—Basahon gikan sa Dios,” Liahona, Nob. 2011, 75).

Nganong importante nga dunay Basahon ni Mormon ug Biblia isip mga saksi sa mga doktrina sa ebanghelyo ni Jesukristo?

Dapita ang mga estudyante sa pagpamatuod ug pagpaambit og mga ehemplo kon sa unsang paagi ang Basahon ni Mormon nakatabang nila nga mas masabtan ang Biblia o mas mapaduol sa Manluluwas.

Mga Basahunon sa Estudyante

Ezequiel 37:15–19; 1 Nephi 13:20–41; 2 Nephi 3:11–14; 29:1–14.
Russell M. Nelson, “Mga Saksi sa Kasulatan,” Liahona, Nob. 2007, 43–46.
Tad R. Callister, “Ang Basahon ni Mormon—Basahon gikan sa Dios,” Liahona, Nob. 2011, 74–76.