Paglig-on sa Atong Pagtuo ug Pagpamatuod

Pasiuna

Ang pagtuo kang Jesukristo ug sa Iyang ebanghelyo magdala og kalig-on ug espiritwal nga proteksyon sa mga anak sa Dios. Ang Basahon ni Mormon mihulagway sa mga kinaiya ug batasan nga maghatud sa mga indibidwal sa pagkunhod ngadto sa pagkawalay pagtuo. Mipahimangno ang mga propeta sa Basahon ni Mormon bahin niini nga mga batasan ug kinaiya ug gitudlo ang mga baruganan sa ebanghelyo nga maoy makalig-on ug makapahugot sa atong pagtuo ug pagpamatuod.

Background nga Basahunon

Neil L. Andersen, “Espirituhanong mga Alimpulos,” Liahona, Mayo 2014, 18–21.
L. Whitney Clayton, “Pagpili nga Motuo,” Liahona, Mayo 2015, 36–39.
Larry S. Kacher, “Ayaw Pagtiaw-tiaw sa Sagradong mga Butang,” Liahona, Nob. 2014, 104-6.

Mga Sugyot alang sa Pagtudlo

2 Nephi 1:10–11; 9:28; Mosiah 2:36–37; 26:1–4; Alma 12:9–11; 31:8–11; 46:7–8; Helaman 4:11–13; 13:24–26; Mormon 9:7–8

Mga kinaiya ug batasan nga mopahuyang sa pagtuo ug pagpamatuod

I-display ang mosunod nga pangutana ug dapita ang mga estudyante sa daklit nga pagtubag:

Sa unsang paagi nga posible alang niadtong nakasinati sa mga panalangin sa ebanghelyo nga mawala ang ilang pagtuo ug pagpamatuod?

Pahinumdumi ang mga estudyante nga mipasidaan si Propeta Lehi nga ang iyang kaliwatan sa moabut nga adlaw mawad-an sa pagtuo kang Jesukristo ug sa Iyang ebanghelyo. Dapita ang usa ka estudyante sa pagbasa og kusog sa 2 Nephi 1:10–11, ug ipapangita sa mga estudyante ang katapusang epekto niana nga pagkawalay pagtuo sa kaliwatan ni Lehi. (Tingali makatabang ang pagpasabut nga ang mga pulong nga “mokunhod ngadto sa pagkawalay pagtuo” nagpasabut sa espirituhanong pagkunhod tungod sa kawalay pagtuo.)

Unsa ang epekto sa katapusan sa pagkawala sa pagtuo sa mga kaliwatan ni Lehi?

Ipasabut nga samtang dunay daghang aspeto nga maghatud sa pagkalaglag sa Nephite nga sibilisasyon, ang pinakahinungdan nga mihuyang ang mga Nephite mao ang pagkawala sa ilang pagtuo kang Jesukristo ug sa Iyang ebanghelyo. Alang niini nga rason, ang mga tigsulat sa Basahon ni Mormon balik-balik nga mipasidaan bahin sa mga batasan ug mga kinaiya nga mopahuyang sa ilang pagtuo sa Ginoo kon unsaon sa pagpalambo ug paglig-on ang pagpamatuod.

Ipabasa og kusog sa usa ka estudyante ang Mosiah 26:1–4, ug awhaga ang klase sa pagpangita sa mga kinaiya ug batasan nga mipahuyang sa pagtuo sa ubang indibidwal atol sa paghari ni Haring Mosiah.

Dapita ang mga estudyante sa pag-ila sa usa ka baruganan nga gitudlo niini nga mga bersikulo kon unsay mahitabo sa mga tawo kinsa mopili nga dili motuo ug mobuhat sa kamatuoran. Tali sa mga baruganan ipapangita sa mga estudyante ang mosunod: Kon pilion sa mga tawo ang dili pagtuo ug pagbuhat sa mga kamatuoran nga gitudlo kanila, mogahi ang ilang mga kasingkasing ug dili nila matagamtam ang mga panalangin sa pagtuo ug pagpamatuod.

Kon pilion sa mga tawo ang dili pagtuo ug pagbuhat sa mga kamatuoran nga gitudlo kanila, ngano kaha nga mogahi ang ilang mga kasingkasing ngadto sa Espiritu?

Aron matabangan ang mga estudyante sa pag-ila sa mga kinaiya ug batasan nga mosangput sa pagkawala sa pagtuo ug pagpamatuod, isulat sa pisara ang mosunod nga mga tudling sa kasulatan. I-assign ang matag estudyante sa pagribyu og usa o duha ka tudling, ug siguroa nga ma-assign ang matag tudling. Hangyoa ang mga estudyante sa pagsiksik sa na-assign nilang mga tudling para sa mga kinaiya o batasan nga mosangput sa pagkawala sa pagtuo ug pagpamatuod sa mga tawo.

Human sa igong panahon, hangyoa ang mga estudyante nga ipaambit ang nakita nilang mga kinaiya ug batasan ug sa pagpasabut sa unsang paagi kini makapahuyang sa pagtuo ug pagpamatuod. I-summarize diha sa pisara ang tubag sa mga estudyante tupad sa katugma nga mga tudling.

Asa niini nga mga kinaiya o batasan ang sa imong hunahuna pinakapeligro para sa mga young adult nga mga miyembro sa Simbahan karon? Ngano man?

Hangyoa ang mga estudyante sa pagpili og kinaiya o batasan nga nalista sa pisara ug sa pagpasabut kon unsay atong mahimo aron makapanalipud batok niana nga kinaiya o batasan.

Hatagi ang mga estudyante og panahon sa pagpamalandong kon asa sa mga kinaiya o batasan ang mihulga sa kaugalingon nilang pagtuo ug pagpamatuod ug unsay ilang mahimo sa paglig-on sa ilang kaugalingon.

2 Nephi 28:21–23; Mormon 5:16–18

Mga sangputanan sa pagkawala sa pagtuo ug pagpamatuod

Pahinumdumi ang mga estudyante nga sa dihang si propeta Mormon nangulo sa mga kasundaluhang Nephite, dunay panahon nga nabantayan niya ang kadautan ug ang wala nay paglaum nga kahimtang sa iyang katawhan. Hangyoa ang mga estudyante sa pagtuon sa Mormon 5:16–18, nga mangita sa deskripsyon ni Mormon bahin sa espiritwal nga kondisyon sa katawhan.

Unsa kaha ang ipasabut sa giingon nga mopuyo nga “walay Kristo ug Dios niini nga kalibutan”?
Unsa nga baruganan ang atong makat-unan gikan sa mga pulong ni Mormon mahitungod niadtong mawad-an sa pagtuo sa Ginoo ug magdumili sa paghinulsol? (Bisan og mogamit sila og lain-laing mga pulong, kinahanglang mahibaloan sa mga estudyante ang mosunod nga baruganan: Kon tugutan nato nga mawad-an sa pagtuo ang atong kaugalingon ug magdumili kita sa paghinulsol, ang Espiritu mopahawa gikan kanato ug mawad-an kita sa giya sa Ginoo.)
Sumala sa bersikulo 18, unsa ang gipasidaan ni Mormon nga epekto sa pagkawala sa giya sa Ginoo?

Ipasabut nga mitudlo si Nephi nga ang proseso sa pagkawala sa Espiritu ug pagkaulipon sa yawa sa kasagaran hinay-hinay ra ug anam-anam. Dapita ang pipila ka estudyante nga magpuli-puli sa pagbasa og kusog sa 2 Nephi 28:21-23, ug hangyoa ang klase sa pagpangita sa mga pulong ug hugpong sa mga pulong nga naghulagway niining anam-anam nga espiritwal nga pagkahuyang.

Unsa nga mga kinaiya ang nahibaloan ni Nephi ang modala sa tawo ngadto sa espiritwal nga pagkahuyang?
Ngano kaha nga kining mga kinaiyaha delikado man ilabi na sa atong pagtuo?

Hangyoa ang usa ka estudyante sa pagbasa og kusog sa istorya ni Presidente Henry B. Eyring sa Unang Kapangulohan:

“Sama sa kamatuoran nga gihatag ngari kanato pagtulun-an human sa usa ka pagtulun-an ug sa kahayag nga anam-anam nga nagdan-ag kon kita motuman, mao usab, kon dili kita motuman, ang atong pagpamatuod sa kamatuoran mokunhod nga daw dili nato mamatngunan, sa ginagmay, ug ang kangitngit hinay kaayong mowagtang sa atong panabut diin ang mga mapahitas-on dali rang dili moangkon nga nagkausab ang butang.

“Nadungog na nako kana nga panghambog gikan sa tawo kinsa mipalayo sa Simbahan sa hinay-hinay nga paagi. Una mihunong ra siya sa pagtudlo og Sunday School class, dayon mipalayo Siya sa Simbahan, ug dayon nakalimot na siya sa pagbayad og ikapulo matag karon ug unya. … Wala siya makamatikod sa kalainan, apan ako nakamatikud. Nagkakisdom ang kahayag sa iyang mga mata ug bisan gani ang kasanag sa iyang panagway. Wala siya makamatikod, kay ang usa sa mga epekto sa pagsupak sa Dios sa pagkawala sa esprituhanong pagbati daw og igo ra gyud kaayo nga dili nato mamatikdan nga nalayo na diay kita sa Dios. Dili lang kay ang pagpamatuod sa kamatuoran ang hinay-hinay nga mohuyang, apan bisan ang mga panumduman kon unsa ang pagbati nga naa ka sa kahayag magsugod nga para niya usa kini ka pagpakabuang” (“A Life Founded in Light and Truth” [Brigham Young University devotional, Aug. 15, 2000], 3, speeches.byu.edu).

Unsa kaha ang pipila ka mga timailhan nga nagsugod ang usa ka tawo nga mawad-an sa iyang pagtuo ug pagpamatuod?

1 Nephi 15:7–11; 2 Nephi 25:28–29; Mosiah 4:11–12; 15:11; Helaman 15:7–8

Paglig-on sa pagtuo ug pagpamatuod

I-display ug dapita ang usa ka estudyante sa pagbasa sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

“Sa kalikupan, ang mga kahoy nga nagtubo sa hanginon nga palibut mas lig-on. Samtang ang hangin mohuros sa linghod nga tanom, ang pwersa sa sulod sa kahoy mohimo og duha ka butang. Una, moaghat kini sa mga gamot nga mas mopaspas og tubo ug mas mokatay. Ikaduha, ang mga pwersa diha sa kahoy magmugna og mga cell structure nga mas mopabaga ug mas mopalig-on sa lawas ug mga sanga sa kahoy aron mas makasugakod sa huros sa hangin. Kining mas lig-on nga mga gamot ug mga sanga moprotekta sa kahoy gikan sa hangin nga siguradong mobalik.

“Kamo mas bililhon gayud ngadto sa Dios kay sa kahoy. Kamo Iyang mga anak. Siya mihimo sa inyong espiritu nga lig-on ug dili mabali sa mga alimpulos sa kinabuhi. Ang mga alimpulos sa inyong kabatan-on, sama sa mga hangin nga mohuros sa linghod nga kahoy, makapalambo sa inyong espirituhanong kalig-on, mag-andam kaninyo alang sa katuigan nga moabut” (“Espirituhanong mga Alimpulos,” Liahona, Mayo 2014, 18–19).

Unsay atong mabuhat aron makaangkon og espirituhanong kalig-on ug makabarug sa mga hagit sa atong pagtuo ug pagpamatuod?

Pahinumdumi ang mga estudyante nga ang Basahon ni Mormon naglangkob sa mga baruganan sa ebanghelyo nga makagiya sa mga indibidwal kinsa naningkamot nga makabaton og mas lig-ong pagtuo ug lig-ong pagpamatuod.

Hangyoa ang usa ka estudyante sa pagbasa og kusog sa 2 Nephi 25:28–29, ug ipasabut nga kini nga mga bersikulo nag-summarize sa impluwensyal nga sermon nga gihatag ni Nephi ngadto sa iyang katawhan kon unsaon nato sa pagkaluwas. Ipapangita sa mga sakop sa klase kon unsay gitudlo ni Nephi nga pinakaimportanting desisyon nga atong buhaton sa atong kinabuhi.

Unsa ang gitudlo ni Nephi nga pinakaimportanting desisyon nga atong buhaton sa atong kinabuhi? (Tabangi nga mahibaloan sa mga estudyante ang mosunod nga baruganan: Kon pilion nato ang pagtuo kang Jesukristo ug pagsimba Kaniya sa tibuok natong gahum, hunahuna, ug kusog, niana magpabilin kitang lig-on sa espiritwal nga paagi ug dili isalikway.)

I-display ang mosunod nga pamahayag ni Elder L. Whitney Clayton sa Seventy, ug ipabasa kini sa usa ka estudyante:

“Ang mga propeta sa tibuok kasaysayan nag-awhag kanato ug gani naghangyo kanato nga motuo ni Kristo. … Ang desisyon nga motuo mao ang pinakaimportanting pagpili nga atong himoon. Kini naghulma sa tanan natong desisyon. …

“Ang gituohan ug ang pagpamatuod ug ang hugot nga pagtuo aktibo nga mga baruganan. Dili kini basta lang moabut kanato. Ang gituohan usa ka butang nga atong gipili—lauman nato kini, lihukon nato kini, ug sakripisyuhan nato kini. Dili sulagma nga kita motuo sa Manluluwas ug sa Iyang ebanghelyo kay sa kita sulagmang nag-ampo o nagbayad sa ikapulo. Kita aktibong mopili nga motuo, sama nga kita mopili nga mosunod sa ubang mga sugo” (“Pagpili nga Motuo,” Liahona, Mayo 2015, 38).

Unsa kaha ang ipasabut sa giingon nga “ang gituohan ug ang pagpamatuod ug ang hugot nga pagtuo aktibo nga mga baruganan”?
Ngano kaha nga ang pagpaningkamot nga magpakabuhi sa mga baruganan sa ebanghelyo usa man sa pinakamaayong paagi aron malig-on ang atong pagtuo ug pagpamatuod?

Aron matabangan ang mga estudyante nga makadiskobre sa pipila ka mga paagi nga mahimo ra nato ang pagpaningkamot sa paglig-on sa atong pagtuo ug pagpamatuod, isulat sa pisara ang mosunod nga mga tudling ug ipabasa og hilum sa matag estudyante ang pinakaminos usa niini. Dapita sila sa pagpangita og mga baruganan nga makatabang nato aron malig-on ang atong pagtuo kang Jesukristo ug sa Iyang ebanghelyo.

Dapita ang mga estudyante sa pagpaambit og mga panabut nga ilang nakit-an dinhi sa mga tudling sa kasulatan. Mahimo nimong dapiton ang mga estudyante sa paghatag sa ilang pagpamatuod kon sa unsang paagi nila gigamit kini o ang ubang baruganan sa ilang kinabuhi ug napanalanginan og nalig-on nga pagtuo kang Jesukristo ug sa Iyang ebanghelyo. Awhaga ang mga estudyante sa paghimo og mga paningkamot nga gikinahanglan aron malig-on ang ilang pagtuo sa Ginoo.

Mga Basahunon sa Estudyante

1 Nephi 15:7–11; 2 Nephi 1:10–11; 9:28; 25:28–29; 28:21–23; Mosiah 2:36–37; 4:11–12; 15:11; 26:1–4; Alma 12:9–11; Alma 31:8–11; 46:7–8; Helaman 4:11–13; 13:24–26; 15:7–8; Mormon 5:16–18; 9:7–8.
L. Whitney Clayton, “Pagpili nga Motuo,” Liahona, Mayo 2015, 36–39.
Larry S. Kacher, “Ayaw Pagtiaw-tiaw sa Sagradong mga Butang,” Liahona, Nob. 2014, 104-6.