Ang Pakigsaad sa Bunyag, ang Igpapahulay, ug ang Sakrament

Pasiuna

Pinaagi sa ordinansa sa bunyag, makigsaad ang mga sumusunod ni Jesukristo sa pagdala diha kanila sa Iyang ngalan. Niini nga leksyon, makat-unan sa mga estudyante nga gitudlo sa Basahon ni Mormon nga ang mga miyembro sa Simbahan ni Kristo kinahanglang magpundok sa adlawng Igpapahulay ug motagamtam sa sagradong pribilehiyo sa pag-ambit sa sakrament. Kon moambit kita sa sakrament, mobag-o kita sa atong mga pakigsaad sa bunyag ug modapit sa Espiritu Santo sa pakig-uban kanato.

Background nga Basahunon

L. Tom Perry, “Ang Adlaw nga Igpapahulay ug ang Sakrament,” Liahona, Mayo 2011, 6–9.
Russell M. Nelson, “Ang Igpapahulay Usa ka Kahimut-an,” Liahona, Mayo 2015, 129–32.
Dallin H. Oaks, “Ang Miting sa Sakrament ug ang Sakrament,” Liahona, Nob. 2008, 17–20.

Mga Sugyot alang sa Pagtudlo

Mosiah 18:8–10; 25:23–24

Pagdala sa atong kaugalingon sa ngalan ni Kristo

Hangyoa ang pipila ka estudyante sa paghulagway og butang nga makahuluganon nga ilang mahinumduman mahitungod sa ilang bunyag—sama pananglit, sa serbisyo sa pagbunyag, sa ordinansa, o sa mga hunahuna ug sa ilang mga gibati. Dayon hatagi og panahon nga makapamalandong ang mga estudyante kon unsa kamaayo ang ilang pagtuman sa ilang mga pakigsaad sa bunyag.

Pahinumdumi ang mga estudyante nga nanudlo si Alma mahitungod sa pakigsaad sa bunyag didto sa Katubigan sa Mormon, ug dayon ipabasa og kusog sa usa ka estudyante ang Mosiah 18:8–10. Hangyoa ang klase sa pagsunod, nga mangita kon unsay gipakigsaad natong buhaton kon bunyagan kita.

Sa pisara, isulat ang mosunod:

Kon bunyagan kita, makigsaad kita sa …

Unsay atong ipakigsaad nga buhaton kon bunyagan kita? (Samtang motubag ang mga estudyante, ilista sa pisara ang ilang mga tubag sa pagkompleto sa doktrinal nga pamahayag: Kon bunyagan kita, makigsaad kita nga mopas-an sa usag usa nga palas-anon, mobarug nga mga saksi sa Dios, moserbisyo Kaniya, ug motuman sa Iyang mga sugo.)

Tabangi nga masabtan sa mga estudyante ang konteksto sa sunod nga scripture passage pinaagi sa pagpasabut nga human si Alma ug ang iyang katawhan nakig-uban sa mga tumutuo sa Zarahemla, miestablisar si Alma og daghang kongregasyon sa mga tumutuo. Dapita ang pipila ka estudyante nga magpuli-puli sa pagbasa og kusog sa Mosiah 25:23-24, ug papangitaa ang klase og dugang nga panabut sa pakigsaad sa bunyag. Human makahisgot ang mga estudyante unsay ilang nahibaloan, ipangutana:

Sa unsa nga paagi ang katawhan napanalanginan agig resulta sa pagpabunyag ug pagpasakop sa Simbahan sa Dios? (Tabangi nga makit-an sa mga estudyante ang mosunod nga baruganan: Samtang dad-on nato sa atong kaugalingon ang ngalan ni Jesukristo ug magpakabuhi sumala niana, ibu-bu sa Ginoo ang Iyang Espiritu ngari kanato.)
Samtang nagpakabuhi kamo sumala sa inyong mga pakigsaad sa bunyag, sa unsang paagi naapektuhan ang inyong kinabuhi gumikan sa pagbu-bu sa Espiritu sa Ginoo diha kaninyo?

Dapita ang mga estudyante nga pamalandungan kon sa unsang paagi ang mga pakigsaad sa bunyag makalig-on sa ilang pasalig nga mahimong sumusunod ni Jesukristo pinaagi sa ilang mga desisyon ug mga buhat.

Exodo 31:13, 16–17; Mosiah 18:17, 23–25; Moroni 6:4–6

Pagsimba atol sa adlawng Igpapahulay

Ipasabut nga ang Basahon ni Mormon naghulagway og pipila ka pamaagi diin ang mga miyembro sa Simbahan ni Kristo makatuman sa mga pakigsaad sa bunyag.

I-assign ang katunga sa klase sa pagtuon sa Mosiah 18:17, 23–25 samtang ang laing katunga magtuon sa Moroni 6:4–6. Isugyot nga markahan sa mga estudyante ang mga pulong nga naghulagway sa naandang pagsimba nga gihimo sa mga sumusunod ni Kristo. Dayon dapita sila sa pagpaambit unsay ilang nakit-an.

Unsa ang ubang mga rason sa kanunay nga panagtigum sa mga miyembro? (Kinahanglang mahibaloan sa mga estudyante ang mosunod nga mga kamatuoran: Kon mamiyembro kita sa Simbahan ni Kristo, gisugo kita sa pagtuman sa adlawng Igpapahulay ug pagbalaan niini. Isip mga miyembro sa Simbahan, kinahanglang magkatigum kita kanunay aron maalimahan sa maayong pulong sa Dios, sa pagpuasa, pag-ampo, paglig-on sa usag usa, ug pag-ambit sa sakrament.)

Basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Kadaghanan sa mga tawo wala moanha sa simbahan sa pagpangita lamang og pipila ka bag-ong mga kamatuoran sa ebanghelyo o sa pakigkita og daang mga higala, bisan tuod kanang tanan importante. Sila mianha nga nagpangita og espirituhanong kasinatian. Gusto sila og kalinaw. Gusto sila nga ang ilang pagtuo malig-on ug ang ilang paglaum mabag-o. Sa laktud, gusto nila nga, maamumahan sa maayong pulong sa Dios, nga malig-on pinaagi sa mga gahum sa langit” (“A Teacher Come from God,” Ensign, Mayo 1998, 26).

Sa unsang paagi ang pakigpundok kauban sa ubang mga miyembro sa Simbahan atol sa Igpapahulay makatabang nimo nga mobati “nga nalig-on pinaagi sa mga gahum sa langit”?
Unsay gihimo ninyo sa Simbahan aron mas maduol ug makahimo og tukmang pagsimba sa Langitnong Amahan ug ni Jesukristo?

Aron matabangan ang mga estudyante nga makasabut og dugang nganong gisugo ang mga miyembro sa Simbahan sa pagsimba sa adlawng Igpapahulay ug pagbalaan niini, dapita sila sa pagbasa sa Exodo 31:13, 16–17 ug pag-cross-reference niini ngadto sa Mosiah 18:23.

Unsay ipasabut nga ang Igpapahulay usa ka “timaan” tali kanato ug sa Ginoo?

Basaha ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:

“Unsaon nato sa pagbalaan ang adlaw nga Igpapahulay? Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug ang mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan. Ubos nianang pagsabut, wala na ko magkinahanglan og listahan sa angay buhaton ug dili angay buhaton. Kon kinahanglan kong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay” (“Ang Igpapahulay usa ka Kahimut-an,”Liahona, Mayo 2015, 130).

Sa unsang paagi ang pagpangutana sa atong kaugalingon nga “Unsa nga timailhan ang gusto nakong ihatag sa Dios?” ang makatabang nato sa paghimo og mas maayong mga pagpili kon unsay atong buhaton sa Igpapahulay?
Sa unsang paagi kaha ang inyong mga paningkamot sa pagtuman sa adlawng Igpapahulay makaapekto sa ubang adlaw sa semana?

Dapita ang mga estudyante nga timbang-timbangon nila ang ilang kaugalingong paningkamot sa pagbalaan sa adlawng Igpapahulay. Hangyoa sila nga ikonsiderar kon ang ilang mga hunahuna ug mga buhat nagpakita ba og sinserong pagsimba sa Amahan nianang adlawa. Dapita ang mga estudyante sa pagtakda og piho nga tumong aron mapalambo ang ilang pagsimba sa adlawng Igpapahulay.

3 Nephi 18:1–11; 20:3–9; Moroni 4:3; 5:2

Pag-ambit sa Sakrament

Sa pisara, isulat ang mosunod nga mga pamahayag ni Elder L. Tom Perry (1922–2015) sa Korum sa Napulog Duha ka mga Apostoles (gikan sa “Sa Atong Pagkalawat Karon sa Sakramento,” Liahona, Mayo 2006, 39):

“Ang pag-ambit sa sakrament maghatag kanato og sagradong gutlo sa balaan nga dapit.” (Elder L. Tom Perry.)

Sa unsang paagi kaha kining ideya nga “sagradong gutlo” ug “sagradong dapit” makaimpluwensya sa atong hunahuna ug mga buhat samtang moambit kita sa sakrament?

Pahinumdumi ang mga estudyante nga ang nabanhaw nga Manluluwas si Jesukristo mibuhat sa sakrament dihang gibisita Niya ang mga Nephite sa Bountiful. Dapita ang pipila ka mga estudyante nga magpuli-puli sa pagbasa og kusog sa 3 Nephi 18:1–11 samtang mangita ang klase unsay gitudlo sa Manluluwas mahitungod sa katuyoan sa sakrament.

Unsa ang baruganan nga gitudlo sa Manluluwas mahitungod sa katuyoan sa sakrament? (Samtang motubag ang mga estudyante, isulat sa pisara ang mosunod nga baruganan: Kon moambit kita sa sakrament ug mohinumdom kanunay ni Jesukristo, mabatunan nato ang Espiritu nga magauban kanato.)
Unsay inyong gihimo aron mahinumdom sa Manluluwas samtang nag-ambit sa sakrament ug atol sa tibuok semana?

Pahinumdumi ang mga estudyante nga girekord ni Moroni ang mga pulong nga gigamit sa mga sumusunod ni Jesukristo dihang nanalangin sa sakrament. Ikonsiderar ang pagdapit sa mga estudyante nga paklion ang Moroni 4:3 ug 5:2 para sa mga pag-ampo sa sakrament ug pabadlisi ang mga pulong nga may kalabutan sa baruganan nga gisulat sa pisara.

Unsa kaha ang resulta kon pakyas kita sa “kanunay nga paghinumdom kaniya”? (Moroni 4:3; 5:2).

Pahinumdumi ang mga estudyante nga dihang mibisita si Jesukristo sa mga Nephite sa adlaw human Niya gihimo ang sakrament, gipangalagad na usab niya ang ordinansa ngadto kanila. Dapita ang pipila ka estudyante nga magpuli-puli sa pagbasa og kusog sa 3 Nephi 20:3–9. Ipapangita sa klase ang dugang pa nga mga panalangin nga moabut gumikan sa pag-ambit sa sakrament.

Unsay ipasabut sa giingon nga ang atong mga kalag “dili gayud gutumon ni uhawon, apan pagatagbawon”?
Sa unsang mga paagi ang pag-ambit sa sakrament mitagbaw sa inyong espiritwal nga kagutom ug kauhaw?
Sa unsang paagi ang pag-ambit sa sakrament uban sa pagpaubos ug pasalamat makatabang nga mas mahinumduman nato ang Manluluwas atol sa tibuok semana?

Dapita ang mga estudyante sa paghunahuna sa ilang kinaiya atol sa serbisyo sa sakrament samtang basahon og kusog sa usa ka estudyante ang mosunod nga pamahayag ni Elder Dallin H. Oaks:

“Panahon sa miting sa sakrament—ug ilabi na atol sa pagpahigayon sa sakrament—kinahanglan nga kita maghunahuna og maayo sa pagsimba ug molikay gikan sa tanang lain nga mga kalihokan, ilabi na sa pamatasan nga makabalda sa pagsimba sa uban. … Ang miting sa sakrament dili panahon sa pagbasa og mga libro o magasin. Mga batan-on dili kini panahon alang sa paghinunghungay og sulti diha sa mga cell phone o pag-text og mensahe sa mga tawo didto sa laing mga dapit. Kon moambit kita sa sakrament, naghimo kita og sagrado nga pakigsaad nga kita kanunay nga mahinumdom sa Manluluwas. Unsa ka subo nga maglantaw sa mga tawo nga klarong naglapas nianang pakigsaad diha gayud sa miting diin sila mihimo niini” (“Ang Miting sa Sakrament ug ang Sakrament,” Liahona, Nob. 2008, 18–19).

Samtang ikonsiderar nimo ang mga panginahanglan sa imong mga estudyante ug ang mga pag-aghat sa Espiritu, mahimo nimong basahon ang Marcos 14:37 uban nila ug ipasabut nga ang usa ka paggamit niini nga bersikulo mao nga kita mosalikway sa tanang makabalda ug ihatag ngadto sa Ginoo ang hingpit nga pagtagad matag semana sa atong pagsimba sa miting sa sakrament.

Dapita ang mga estudyante nga ikonsiderar unsay ilang mahimo aron makabaton sila og mas sagradong kasinatian kon mag-ambit sa sakrament. Pangutan-a kon duna ba kanila ang gustong mopaambit sa ilang pagpamatuod sa kaimportante sa adlawng Igpapahulay ug sa sakrament. Ipaambit ang imong pagpamatuod nga mopanalangin ang Ginoo kanato pinaagi sa Iyang Espiritu kon tahuron nato ang atong mga pakigsaad sa bunyag ug paningkamutan ang kanunay nga paghinumdom Kaniya.

Mga Basahunon sa Estudyante

Exodo 31:13, 16–17; Mosiah 18:8–10, 23; 25:23–24; 3 Nephi 18:1–11; 20:3–9; Moroni 4:3; 5:2; 6:4–6.
Russell M. Nelson, “Ang Igpapahulay Usa ka Kahimut-an,” Liahona, Mayo 2015, 129–32.