Ang Pag-anhi ni Jesukristo

Pasiuna

Ang mga kahimtang ug panghitabo inubanan sa pagbisita ni Jesukristo sa Amerika nagsilbi nga usa ka sundanan sa Iyang Ikaduha nga Pag-anhi. Kini nga leksyon makatabang sa mga estudyante nga magamit ang mga baruganan gikan sa Basahon ni Mormon aron mas maandam alang sa “mahinungdanon ug makalilisang nga adlaw” (3 Nephi 25:5) kon moanhi na og balik si Kristo.

Background nga Basahunon

Dallin H. Oaks, Pagpangandam alang sa Ikaduhang Pag-anhi,” Liahona, Mayo 2004, 7–10.
Jeffrey R. Holland, “Pagpangandam alang sa Ikaduhang Pag-anhi,” Liahona, Dis. 2013, 48-51.

Mga Sugyot alang sa Pagtudlo

Helaman 14:20–30; 16:1–5; 3 Nephi 9:1–5, 12–14; 10:12

Gihatag ang mga timailhan aron matabangan kita nga motuo ug makaandam para sa Ikaduhang Pag-anhi sa Ginoo

Dapita ang mga estudyante sa pagpaambit og mga ehemplo sa panghitabo o mga kalihokan sa ilang kinabuhi nga nagkinahanglan og pagpangandam (sama pananglit, sa misyon). Dayon ipangutana:

Unsa ang kalainan nga nahimo sa inyong pagpangandam diha sa tibuok ninyong kasinatian?
Unsa kaha ang kalainan sa kasinatian kon wala kamo mangandam?

I-display ang mosunod nga pamahayag ni Presidente Ezra Taft Benson (1899–1994), ug dapita ang usa ka estudyante sa pagbasa niini og kusog. Hangyoa ang klase sa pagpaminaw sa unsay gitudlo ni Presidente Benson nga ang Basahon ni Mormon makatabang sa atong pagpangandam alang sa:

“Diha sa Basahon ni Mormon kita makakita og sumbanan sa pagpangandam alang sa Ikaduhang Pag-anhi. Usa ka dakong bahin sa basahon nagtumong sa pipila ka mga dekada sa wala pa ang pagbisita ni Kristo sa Amerika. Pinaagi sa mabinantayon nga pagtuon niana nga panahon, kita makatino nganong ang uban gilaglag diha sa ngilngig nga mga paghukom sa wala pa ang Iyang pag-abut ug unsa ang nakapahimo sa uban nga mobarug sa templo didto sa yuta sa Bountiful ug mihikap sa mga samad sa Iyang mga kamot ug tiil” (Mga Pagtulun-an sa mga Presidente sa Simbahan: Ezra Taft Benson [2014], 168).

Sumala ni Presidente Benson, nganong kinahanglan nga magmainampingon kita sa pagtuon sa mga istorya sa Basahon ni Mormon bahin sa pagbisita ni Jesukristo sa Iyang katawhan sa Amerika? (Siguroa nga masabtan sa mga estudyante nga pinaagi sa pagtuon sa mga istorya sa Basahon ni Mormon bahin sa mga panghitabo nga naglibut sa pagbisita ni Jesukristo sa America, makakat-on kita og usa ka sundanan sa pagpangandam alang sa Ikaduhang Pag-anhi.)

Dapita ang mga estudyante sa pagpangita sa mga baruganan ug doktrina samtang tun-an nila ang istorya bahin sa pagbisita sa Manluluwas ngadto sa Amerika nga makatabang nila aron maandam para sa Ikaduhang Pag-anhi.

Pahinumdumi ang mga estudyante nga sa wala pa matawo ang Manluluwas, gitagna ni Samuel nga Lamanite ang mga timailhan nga mag-uban sa pagkatawo ug kamatayon sa Manluluwas. Hangyoa ang mga estudyante sa pagpakli sa Helaman 14:20–27 ug sa pag-ila sa mga timailhan sa kamatayon ni Kristo.

Unsa ang pipila ka mga timailhan nga gisulti ni Samuel ngadto sa mga Nephite nga mag-uban sa kamatayon ni Jesukristo?

I-assign ang katunga sa mga estudyante nga mobasa sa Helaman 14:28–30 samtang ang laing katunga mobasa sa Helaman 16:4–5. Ipapangita nila ang mga rason nganong ihatag kini nga mga timailhan ngadto sa mga Nephite. Mahimo nimong awhagon ang mga estudyante sa paghatag og atensyon sa mga pulong “sa tuyo nga …”

Sumala niini nga mga bersikulo, nganong mihatag man ang Ginoo og mga timailhan? (Tabangi ang mga estudyante sa pag-ila sa mosunod nga doktrina: Ang Ginoo mihatag og mga timailhan ug mga katingalahan aron motuo kita Kaniya ug maluwas. Ikonsiderar ang pagsulat niini nga kamatuoran diha sa pisara.)
Unsa ang gipasabut sa Helaman 14:29 nga mahitabo niadtong dili motuo sa mga timailhan ug mga katingalahan? (Usa ka matarung nga paghukom ikapahamtang kanila.)

Ipasabut nga sa istorya nga naa sa 3 Nephi, ang gisaad nga mga timailhan ug mga katingalahan—lakip ang pagkalaglag nga nagtagna sa kamatayon sa Manluluwas—nagsugod na sa pagkatuman. Hangyoa ang pipila ka estudyante nga magpuli-puli sa pagbasa og kusog sa 3 Nephi 9:1–5, 12–14; 10:12 samtang mangita ang klase unsay nahitabo niadtong mga mituo sa mga mensahe ni Samuel ug ni Nephi ingon man unsay nahitabo niadtong wala motuo.

Sumala niini nga mga bersikulo, nganong ang uban niining mga tawhana nangalaglag? Nganong ang uban naluwas?

Ipasabut nga ang mga sumusunod ni Jesukristo karon natudloan sa pagbantay sa mga timailhan nga mag-una sa Iyang Ikaduha nga Pag-anhi. Hangyoa ang mga estudyante sa paghisgot kon sa unsang paagi ang pagsabut ug pag-ila sa mga timailhan sa Ikaduhang Pag-anhi, nga gipanagna sa mga propeta, makatabang sa mga miyembro sa Simbahan karon nga mas maandam sa Ikaduha Niya nga pag-anhi.

3 Nephi 11:1–17

Pagpangandam sa pagsugat sa Manluluwas

I-display ang imahe ni Jesukristo nga mipakita sa mga Nephite. Samtang ribyuhon sa mga estudyante ang istorya bahin sa pagbisita sa Manluluwas sa mga Nephite, awhaga sila sa pagpangita sa mga panalangin nga nadawat niadtong mituo sa mga timailhan sa kamatayon sa Ginoo ug nag-andam alang sa Ikaduha Niya nga pag-anhi.

Dapita ang pipila ka estudyante nga magpuli-puli sa pagbasa og kusog sa 3 Nephi 11:1–12.

Sa unsang paagi ang pagtuo sa gisaad nga mga timailhan sa pag-anhi sa Ginoo makaandam sa mga tawo alang niini nga kasinatian?
Sa unsang paagi kini nga mga bersikulo makapahinumdom sa kaugalingon natong panginahanglan sa pagpangandam?

Dapita ang mga estudyante nga magpuli-puli og basa og kusog sa 3 Nephi 11:13–17 ug ipahunahuna kon unsa kaha ang pagbati kon didto ka niana nga okasyon.

Sa unsang paagi kaha kini nga kasinatian nagrepresentar kon unsay tinguha sa Ginoo nga si Jesukristo sa matag usa kanato? (Ang mga tubag kinahanglang mohaum sa mosunod nga kamatuoran: Gidapit ni Jesukristo ang tanang tawo sa pagduol Kaniya ug sa pagdawat og pagpamatuod nga Siya ang Dios sa tibuok yuta.)
Sa unsang mga paagi nga kining panghitabo susama ra sa inyong nahibaloan mahitungod unsay mahitabo sa Ikaduhang Pag-anhi ni Jesus?
Unsa kaha ang inyong mahimo aron masunod ang imbitasyon sa Manluluwas aron maandam kamo nga mobarug ugma damlag sa Iyang atubangan?

Tapusa pinaagi sa pag-display sa mosunod nga pamahayag ni Elder Dallin H. Oaks, sa Korum sa Napulog Duha ka mga Apostoles:

“Unsa kaha kon moabut Siya ugma? Kon kita nahibalo nga makigkita kita sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abut—unsa may atong buhaton karon? Unsa nga mga pagkumpisal ang atong buhaton? Unsa nga mga binuhatan ang atong undangon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipaambit?

“Kon kita mobuhat niining mga butanga nan, nganong dili man karon? Nganong dili man mangita og kalinaw samtang maangkon pa ang kalinaw?” (“Pagpangandam alang sa Ikaduhang Pag-anhi,” Liahona, Mayo 2004, 9).

Nganong importante nga maandam ang atong kaugalingon sama nga ang pag-anhi sa Ginoo ugma na?

Dapita ang mga estudyante sa pagtinguha ug pagsanong sa mga pag-aghat sa Espiritu samtang mangandam sila sa pagpakigkita sa Ginoo.

Mga Basahunon sa Estudyante

Helaman 14:20–30; 16:1–5; 3 Nephi 9:1–5, 12–14; 10:12; 11:1–17.
Dallin H. Oaks, Pagpangandam alang sa Ikaduhang Pag-anhi,” Liahona, Mayo 2004, 7–10.
Jeffrey R. Holland, “Pagpangandam alang sa Ikaduhang Pag-anhi,” Liahona, Dis. 2013, 48-51.