Leksyon 12: Ang Atong Panginahanglan sa Espirituhanong Pagpakatawo Pag-usab
12
Ang Atong Panginahanglan sa Espirituhanong Pagpakatawo Pag-usab
Pasiuna
Gikan sa Basahon ni Mormon atong nakat-unan nga “ang kinaiyanhon nga tawo mao ang usa ka kaaway sa Dios” (Mosiah 3:19). Niini nga leksyon, gitudloan ang mga estudyante nga pinaagi sa paghinulsol ug paggamit sa pagtuo kang Jesukristo, mabuntog nato ang kinaiyanhong pagkatawo, “matawo pag-usab,” ug makasinati og dakong kausaban sa kasingkasing. Kini nga kausaban gikinahanglan aron makasulod sa gingharian sa Dios.
Background nga Basahunon
David A. Bednar, “Ang Pag-ula ug ang Panaw sa Pagka-mortal,” Liahona, Abr. 2012, 12–19.
D. Todd Christofferson, “Natawo Pag-usab,”Liahona, Mayo 2008, 76–79.
Sa pisara, isulat ang mosunod nga pamahayag ni Presidente Ezra Taft Benson (1899–1994), nga gikutlo gikan sa “To ‘the Rising Generation,’” New Era, Hunyo 1986, 5:
“Dili mahimo nga mobuhat kamo og sayop ug mobati nga husto. Imposible kini!” (Presidente Ezra Taft Benson)
Nganong imposible man ang magmalipayon kon maghimo og sayop nga mga pagpili?
Ipabasa og kusog sa usa ka estudyante ang Alma 41:10–11 samtang mangita ang klase sa mga sangputanan sa kadautan. (Hatagi og gibug-aton ang mosunod nga kamatuoran: Ang kadautan dili mahitabo nga kalipay.)
Unsa ang pipila ka mga pagpanglimbong nga gigamit ni Satanas sa pagdani kanato nga ang pagsupak sa mga sugo mosangput sa kalipay?
Sumala sa bersikulo 11, unsay ipasabut nga maanaa sa “kahimtang sa kinaiyanhon”? (“Pagkaanaa sa kalibutanon nga kahimtang,” “sa apdo sa kapaitan ug gapos sa kadautan,” ug “walay Dios sa kalibutan.”)
Sa unsang paagi ang Alma 41:10–11 nakatabang sa pagpasabut nganong ang pagpakasala dili mosangput sa kalipay? (Sukwahi kini sa kinaiyahan sa Dios, ug ang “kinaiyahan sa Dios” mao “ang kinaiyahan sa kalipay.”)
Pahinumdumi ang mga estudyante nga tanan kita nakapanunod sa mga epekto sa Pagkapukan ni Adan. Ipabasa og kusog sa usa ka estudyante ang Mosiah 16:2–5 samtang mag-ila ang klase sa mga pulong nga naghulagway sa napukan nga kahimtang sa tawo.
Unsa nga mga pulong ang gigamit ni Abinadi sa paghulagway sa napukan nga kahimtang sa tawo?
Unsa ang kahulugan sa pulong nga “magpadayon” sa bersikulo 5? (Pahinumdom: Ang pag-ila sa mga mahinungdanong mga pulong importante nga kahanas sa pagtuon sa kasulatan nga pwede nimong pilion nga hatagan og emphasis dinhi.)
Unsa ang naghimong posible para matubos kita gikan sa masalaypon ug napukan nga kahimtang?
Ipabasa og hilum sa mga estudyante ang Mosiah 3:19 ug sa pag-ila unsaon nato nga mabuntog ang atong napukan nga kahimtang.
Unsay buot ipasabut sa “motugyan ngadto sa mga pagdani sa Balaang Espiritu”?
Unsay angay natong buhaton sa “[pagsalikway] sa kinaiyanhon nga pagkatawo”? (Kinahanglang mahibaloan sa mga estudyante ang mosunod nga baruganan: Kon sundon nato ang mga pag-aghat sa Balaang Espiritu ug maangkon ang gahum sa Pag-ula, atong masalikway ang kinaiyanhon nga pagkatawo.)
Dapita ang mga estudyante sa paghunahuna og ebidensya diin nakita nila nga ang Manluluwas nakausab kanato ngadto sa pagkamaayong tawo kay sa atong maabut sa atong kaugalingon. Hangyoa ang pipila ka mga estudyante nga ipaambit ang ilang mga panabut.
Dapita ang mga estudyante sa hilum nga pagtubag sa mosunod nga mga pangutana:
Unsay inyong mabuhat aron mas hingpit ang “[pagtugyan] ngadto sa mga pagdani sa Balaang Espiritu”?
Unsa nga mga hiyas sa usa ka bata nga gilista diha sa Mosiah 3:19 ang gikinahanglan kaayo ninyo nga palamboon?
Ipalista sa mga estudyante ang mga ngalan sa mga tawo nga naa sa Basahon ni Mormon kinsa nakasinati og kausaban sa ilang kinaiyahan tungod sa Pag-ula ni Jesukristo.
Pahinumdumi ang mga estudyante nga si Alma nga Batan-on ug ang mga anak ni Mosiah, sulod sa panahon, lakip sa mga dili matuohon sa Zarahemla kinsa milutos sa mga miyembro sa Simbahan (tan-awa sa Mosiah 27:8). Human sa pagbisita sa anghel, si Alma nahutdan sa kusog ug dili na makasulti. Human sa tulo ka adlaw, nabalik ang kusog ni Alma ug mipamatuod siya sa milagrusong kausaban nga nahitabo sa sulod kaniya (tan-awa sa Mosiah 27:11–24).
Ipabasa og kusog sa usa ka estudyante ang Mosiah 27:24-26 samtang mangita ang klase kon giunsa ni Alma sa paghulagway kining milagruso nga kausaban.
Unsa nga mga pulong dinhi sa mga bersikulo ang makatabang sa pagpasabut kon unsa ang matawo pag-usab?
Sa unsang paagi ang bersikulo 26 nakatabang sa pagpasabut nganong gikinahanglan nato nga matawo pag-usab? (Siguroha nga nasabtan sa mga estudyante kini nga kamatuoran: Pinaagi lamang sa pagkahimong bag-ong nilalang ni Kristo kita makasulod sa gingharian sa Dios.)
Aron matabangan ang mga estudyante sa pagsabut unsay mahitabo kon matawo kita pag-usab sa espiritwal nga paagi, ipabasa og kusog sa usa ka estudyante ang Mosiah 5:1–5, 8. Ipapangita sa klase ang mga pulong nga nagpasabut nga ang katawhan ni Haring Benjamin nakasinati og espiritwal nga pagkatawo pag-usab.
Unsa nga ebidensya ang inyong nakita nga ang katawhan ni Haring Benjamin nakasinati og espiritwal nga kausaban? (Kinahanglang maglakip ang mga tubag sa mosunod: wala na sa ilang kinaiya ang paghimo og dautan, tinguha na nila ang padayon nga paghimo og maayo, nahayagan ang ilang mga hunahuna, ug napuno sila sa kalipay ug andam nang mopakigsaad sa Ginoo.)
Sumala sa bersikulo 2 ug 4, unsa ang gikinahanglan aron makadawat og “dako nga kausaban sa kasingkasing”? (Kinahanglang mahibaloan sa mga estudyante kini nga baruganan: kon magpakita kita og pagtuo kang Jesukristo ug modawat sa Balaang Espiritu, makasinati kita og dako nga kausaban sa kasingkasing.)
I-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles. Ipabasa og kusog sa usa ka estudyante samtang mangita ang klase kon giunsa ni Elder Bednar sa paghulagway ang dako nga kausaban sa kasingkasing.
Imahe
Elder David A. Bednar
“Palihug timan-i nga ang pagkakabig nga gihulagway sa [Mosiah 5] dako, dili gamay—usa ka espirituhanong pagkatawo pag-usab ug sa sukaranang kausaban sa unsay atong gibati ug gitinguha, unsay gihunahuna ug gibuhat ug unsa kita. Sa pagkatinuod, ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa ‘maayo nga buhat, ug kalooy, ug grasya sa Balaan nga Mesiyas’ (2 Nephi 2:8)” (“Kinahanglang Matawo Kamo Pag-usab,”Liahona, May 2007, 20).
Unsay namatikdan ninyo diha sa gihulagway ni Elder Bednar bahin sa dako nga kausaban sa kasingkasing?
Dapita ang mga estudyante nga hisgutan kon unsay atong buhaton aron mapadayon sa pagsinati ang dako nga kausaban sa kasingkasing.
Ipabasa og hilum sa mga estudyante ang Mosiah 5:7 ug ipapangita sa unsang paagi mausab ang atong relasyon kang Jesukristo kon matawo kita pag-usab.
Sa unsang paagi mahimo kitang mga anak ni Jesukristo?
Dapita ang mga estudyante sa paghunahuna sa kamahinungdanon sa pagkahimong “mga anak ni Kristo,” ug dapita sila sa pagpaambit sa unsang paagi kini makadasig kanila samtang maningkamot kita nga matawo pag-usab.
Ang espirituhanong pagpakatawo pag-usab nagkinahanglan og panahon ug paningkamot
Dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles samtang maminaw ang klase kon giunsa niya sa paghulagway ang proseso sa pagkadawat og kausaban sa kasingkasing:
Imahe
Elder D. Todd Christofferson
“Kamo makapangutana, Ngano nga kining dako nga kausaban dili dayon mahitabo kanako? Kinahanglang hinumduman ninyo ang talagsaong mga ehemplo sa mga katawhan ni Haring Benjamin, si Alma ug ang uban sa kasulatan ingon lamang niana—talagsaon ug dili kasagaran. Alang sa kadaghanan kanato, ang mga kausaban, mas hinayhinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas labaw nga proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal.
“Sa samang higayon kinahanglan nga dili kita mangatarungan sa atong kaugalingon sa dili tininuod nga paningkamot. Kinahanglang dili kita makontento nga ipabilin ang pipila ka kinaiya sa pagbuhat og dautan. Kinahanglang takus kitang moambit sa sakrament matag semana ug magpadayon sa pagtawag sa Balaan nga Espiritu nga mokuha sa katapusang mga lama sa pagkadili putli nga anaa kanato. Ako mopamatuod nga samtang kamo mopadayon diha sa dalan sa espirituhanon nga pagkatawo pag-usab ang maulaon nga grasya ni Jesukristo mokuha sa inyong mga sala ug sa lama niadto nga mga sala ninyo, ang tintasyon mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan” (“Natawo Pag-usab,”Liahona, Mayo 2008, 78).
Sumala ni Elder Christofferson, ngano nga ang pagpakatawo pag-usab mas labaw nga proseso kay sa usa ka hitabo?
Sa unsang paagi ang proseso sa espiritwal nga pagpakatawo pag-usab magtabang nga mahimo kitang balaan sama sa Langitnong Amahan ug sa Iyang Anak, si Jesukristo? (Tabangi nga mahibalaon sa mga estudyante kini nga kamatuoran: Pinaagi sa grasya ni Jesukristo, mapasaylo kita ug makadawat og tabang aron makapadayon sa dalan sa espirituhanong pagpakatawo pag-usab.)
Aron matabangan nga mas masabtan sa mga estudyante ang kahulugan sa grasya, ikonsiderar ang pagpaambit niini nga pamahayag gikan sa Bible Dictionary:
“… pinaagi sa grasya sa Ginoo ang mga indibidwal, pinaagi sa hugot nga pagtuo sa Pag-ula ni Jesukristo ug paghinulsol sa ilang mga sala, makadawat og kalig-on ug tabang sa paghimo og maayong mga buhat nga dili unta nila mahimong mapadayon kon mapasagdan lang sa ilang kaugalingong mga paagi. Kini nga grasya mao ang makaabag nga gahum nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa labing maayo nga paningkamot” (Bible Dictionary, “Grace”).
Dapita ang mga estudyante sa pagbasa og hilum sa Alma 5:14, 26–27 ug pagpangita sa unsay gitudlo ni Alma niadtong mga nagsugod na sa proseso sa espirituhanong pagpakatawo pag-usab ug nakasinati og kausaban sa kasingkasing. Dapita ang mga estudyante sa pagpamalandong kon unsaon nila sa pagtubag ang mga pangutana ni Alma.
Sumala sa bersikulo 27, unsay angay natong buhaton human makadawat og kausaban sa kasingkasing? (Kinahanglang padayon kitang maglakaw nga walay mantsa atubangan sa Dios, magpaubos, ug magtinguha og kapasayloan sa atong mga sala.)
Ngano kaha nga mitudlo man si Alma nga ang pagpaubos usa ka importante nga bahin aron mapadayon ang atong kausaban sa kasingkasing?
Sultihi ang mga estudyante nga gitudloan si Ether sa Ginoo nganong importante kaayo ang gahum sa pagpaubos samtang magtinguha kita og kausaban sa kasingkasing. Pahinumdumi ang mga estudyante nga ang mga baruganan sa kasulatan kasagaran mogamit sa mga pulong nga kon ug niana, ug dapita dayon sila sa pagribyu og hilum sa Ether 12:27, nga mangita og mga baruganan nga “kon-niana”. Hisguti ang mosunod nga mga baruganan samtang pangitaon kini sa mga estudyante: Kon moduol kita kang Jesukristo, niana ipakita Niya ang atong kahuyang. Kon magpaubos kita sa atong kaugalingon ug magpakita og pagtuo sa Ginoo, niana Siya mohimo sa mahuyang nga mga butang nga mahimong lig-on ngari kanato.
Ngano kaha nga importante alang kanato ang pag-ila sa atong mga kahuyang?
Unsa kaha ang gipasabut sa mga pulong nga “ang akong grasya igo alang sa tanan … kinsa magpaubos sa ilang kaugalingon sa akong atubangan”?
I-display ang mosunod nga pamahayag ni Elder Bruce C. Hafen sa Seventy, ug dapita ang usa ka estudyante sa pagbasa niini og kusog:
Imahe
Elder Bruce C. Hafen
“Kon kamo adunay mga problema sa inyong kinabuhi, ayaw hunahunaa nga adunay sayop diha kaninyo. Ang pagpaningkamot uban nianang mga problemaha mao ang kinauyokan nga katuyoan sa kinabuhi. Samtang kita mopaduol sa Dios, Siya mopakita sa atong mga kahuyang, ug tungod niini makapahimo kanato nga mas maalamon, mas malig-on. Kon kamo dugang nga nakamatikod sa inyong mga kahuyang, kana tingali nagpasabut nga kamo mas nagpaduol ngadto sa Dios, wala magpalayo” (“Ang Pag-ula: Ang Tanan alang sa Tanan: ”Liahona, Mayo 2004, 97).
Unsa kahay atong buhaton aron malikayan ang pagkawala sa paglaum kon mamatikdan nato ang atong mga kahuyang?
Ipaambit ang imong pagpamatuod nga ang grasya ni Jesukristo makatabang nga atong mabuntog ang atong mga kahuyang kon tinguhaon nato ang espirituhanong pagpakatawo pag-usab.