Pagpanalipud sa Atong Kaugalingon batok sa Sayop nga mga Doktrina sa Katapusang mga Adlaw

Pasiuna

Agig dugang sa pagtudlo “sa kahingpitan sa ebanghelyo ni Jesukristo” (D&P 20:9), ang Basahon ni Mormon molig-on sa mga sumusunod ni Kristo batok sa sayop nga mga pagtulun-an ug mga ideya nga nagdagsang sa katapusang mga adlaw. Usa ka paagi nga matuman kini mao ang pagbutyag kon kinsa ang mga kaaway ni Kristo ug pag-ila sa sayop nga gipakatap nilang mga doktrina. Samtang tun-an sa mga estudyante ang mga istorya sa mini nga mga magtutudlo diha sa Basahon ni Mormon, makakat-on sila sa pag-ila tali sa mga kamatuoran sa ebanghelyo ug sa mga sayop nga konsepto sa kalibutan.

Background nga Basahunon

Dallin H. Oaks, “Ayaw Kamo Pagpalimbong,” Liahona, Nob. 2004, 43–46.
Dallin H. Oaks, “As He Thinketh in His Heart” (gabii kauban ni Elder Dallin H. Oaks, Peb. 8, 2013), lds.org/broadcasts.
Neil L. Andersen, “Espirituhanong mga Alimpulos,” Liahona, Mayo 2014, 18–21.

Mga Sugyot alang sa Pagtudlo

2 Nephi 28:3–9, 12–15; Jacob 7:1–12; Alma 1:2–6; 30:12–18, 39–44; Joseph Smith—Mateo 1:22

Pag-ila ug pagpanalipud sa atong kaugalingon batok sa sayop nga mga doktrina

Ipakonsiderar sa mga estudyante ang managlahing opinyon nga ania sa kalibutan mahitungod sa mga isyu sama sa mosunod: Hinatag sa Dios nga kamatuoran batok sa mausab-usab nga baruganan sa moral (ang hunahuna nga walay universal nga eksakto o sayop), kagawasan sa relihiyon batok sa katungod sa mga grupong gusto nga makita nga sila espesyal, ug ang katungod nga ipakuha ang batang gisabak batok sa katungod nga mabuhi. Samtang hisgutan ninyo kini nga mga isyu, ikonsiderar ang pagsulat niini diha sa pisara. Hatagi og pipila ka gutlo ang mga estudyante aron makahisgot nganong angay nga magmatngon kita aron mahangop ang mga ideya nga eksakto.

Ipasabut nga dapit sa katapusan sa Iyang kinabuhi, gipanagna ni Jesukristo ang peligrusong espiritwal nga mga kahimtang nga motungha sa katapusang mga adlaw. Dapita ang usa ka estudyante sa pagbasa sa Joseph Smith—Mateo 1:22. Mahimo nimong ipasabut nga ang mga pulong nga “pinili sumala sa pakigsaad” nagpasabut sa mga miyembro sa Simbahan ni Jesukristo.

Unsa nga mga hulga ang mamugna sa “mga mini nga Kristo” ug “mini nga mga propeta” sa atong panahon?

I-display ug basaha ang mosunod nga pamahayag ni Presidente Ezra Taft Benson (1899–1994):

“Ang Basahon ni Mormon nagbutyag sa mga kaaway ni Kristo. Kini mobuntog sa bakak nga mga doktrina ug mopahunong sa panagbingkil. (Tan-awa sa 2 Ne. 3:12.) Kini molig-on sa mapainubsanong mga sumusunod ni Kristo batok sa dautang mga desinyo, mga taktika, ug mga doktrina sa yawa sa atong panahon. Ang matang sa mga mibiya sa kamatuoran [miapostasiya] diha sa Basahon ni Mormon sama sa matang nga kita aduna karon. Ang Dios, uban sa iyang walay kinutubang kahibalo, miumol pag-ayo sa Basahon ni Mormon aron kita makakita sa sayop ug mahibalo unsaon sa pakigbatok sa sayop nga mga konsepto sa edukasyon, sa politika, relihiyon, ug sa pilosopiya sa atong panahon” (Mga Pagtulun-an sa mga Presidente sa Simbahan: Ezra Taft Benson [2014], 158–59).

Unsay gitudlo niining pamahayag mahitungod sa paagi nga ang pagtuon sa Basahon ni Mormon makapanalipud kanato gikan sa sayop nga mga pagtulun-an? (Siguroa nga mahibaloan sa mga estudyante kini nga baruganan: Samtang magtuon kita sa Basahon ni Mormon ug mogamit sa mga pagtulun-an niini, malig-on kita batok sa yawa ug sa sayop nga mga pagtulun-an ug mga konsepto sa atong panahon.)
Unsay maanaa nga bintaha sa pagkat-on mahitungod sa mga taktika ni Satanas sa dili pa ninyo kini masugatan?

Papuli-puliha sa pagbasa og kusog ang pipila ka estudyante sa 2 Nephi 28:3–9 samtang ang klase mangita sa sayop nga mga ideya nga gisulti ni Nephi nga modagsang sa atong panahon. Mahimo nimong awhagon ang mga estudyante sa pagmarka sa importanting mga pulong. Dapita ang mga estudyante sa pagpaambit unsay ilang na-idenfify, ug dayon ipangutana:

Unsa ang pipila ka modernong adlaw nga mga ehemplo bahin niining sayop nga mga ideya? (Ang mga ehemplo pweding maglakip sa mosunod: mausab-usab nga baruganan bahin sa moral; magtuo nga tungod sa dakong gugma sa Dios kanato ang sala dili niya silutan; ug dili patas nga paghukom batok sa mga Kristiyanos, kinsa sa kasagaran makita nga mga tawo nga dili makiangayon o panatiko.)

Aron makatabang sa pagtubag niini nga pangutana ipaambit ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles. Hangyoa ang mga estudyante nga paminawon ang mga sayop nga pagtulun-an nga ilang nasugatan.

“Ang mini nga mga propeta ug mini nga mga magtutudlo mao kadtong moingon nga si Propeta Joseph Smith usa ka malipaton nga tiglimbong; dili sila motuo sa Unang Panan-awon nga usa ka tinuod nga kasinatian. Ipamahayag nila nga ang Basahon ni Mormon ug ang ubang opisyal nga nakatala sa kasulatan dili karaang mga rekord sa kasulatan. Paningkamutan usab nila ang pag-usab sa depinisyon sa kinaiyahan sa Dios nga kapangulohan, ug gilimud nila nga ang Dios mihatag ug padayong pagpadayag karon sa Iyang giorden ug gipaluyohan nga mga propeta …

“Tingali ang pinakagrabe, gilimud nila ang Pagkabanhaw ug Pag-ula ni Kristo, makiglalis nga walay Dios nga makaluwas kanato. Isalikway nila ang panginahanglan sa usa ka Manluluwas. Sa ato pa, kini sila nga tigbutang-butang mosulay sa paghubad og usab sa mga doktrina sa Simbahan aron mohaum sa kaugalingon nilang mga hunahuna, ug sa ngadto-ngadto ilimud si Kristo ug ang Iyang mesiyanikanhong tahas.

“Ang mini nga mga propeta ug mini nga mga magtutudlo mao usab kadtong mosulay sa pag-usab sa hinatag sa Dios nga mga doktrina nga gibase sa kasulatan nga nanalipud sa kabalaan sa kaminyoon, sa balaang kinaiyahan sa pamilya, ug sa mahinungdanong doktrina sa personal nga moralidad. Giusab nila ang depinisyon sa moralidad aron mahatagan og katarungan ang pakighilawas sa dili minyo, panapaw, ug homosexual nga mga relasyon” (“Beware of False Prophets and False Teachers,”Ensign, Nob. 1999, 63–64).

Ipa-search sa mga estudyante ang 2 Nephi 28:12–15, nga mangita sa mga sangputanan sa pagtuo sa sayop nga mga pagtulun-an.

Unsa ang ubang mga sangputanan sa pagtuo og sayop nga mga pagtulun-an ug mga ideya?

I-display ang mosunod nga pamahayag ni Elder Ulisses Soares sa Kapangulohan sa Seventy, ug ipabasa kini og kusog sa usa ka estudyante:

“Dili kita makatugot sa atong mga kaugalingon nga malibug sa popular nga mga mensahe nga dali rang dawaton sa kalibutan ug nga supak sa doktrina ug sa tinuod nga mga baruganan sa ebanghelyo ni Jesukristo. Kadaghanan niining kalibutanon nga mga mensahe walay laing girepresentahan kondili ang pagsulay sa atong katilingban sa paghatag og kaangayan sa sala” (“Oo, Kita Makahimo ug Modaug Gayud” Liahona, Mayo 2015, 75).

Unsa ang gisulti ni Elder Soares nga maoy katuyoan sa daghang popular nga mga mensahe nga misukwahi sa ebanghelyo ni Jesukristo? (Tabangi ang mga estudyante sa pag-ila niini nga kamatuoran: Si Satanas mogamit og sayop nga mga doktrina aron sa pagdani kanato sa pagpakasala. Mahimo kang mo-refer ngadto sa Alma 30:53 para sa dugang nga impormasyon mahitungod niini nga kamatuoran.)

Bahina ang klase ngadto sa tulo ka grupo. Isulat sa pisara ang mosunod nga mga tudling sa kasulatan, ug i-assign ang matag grupo sa pagtuon sa usa sa mga tudling: Jacob 7:1–7; Alma 1:2–6; or Alma 30:12–18. Hangyoa ang mga estudyante sa pag-ila sa pipila ka sayop nga mga pagtulun-an nga gitudlo ni Sherem, Nehor, ug Korihor ug ipasulat kini sa pisara ubos sa tukma nga mga ulohan.

Sherem (Jacob 7:1–7)

Nehor (Alma 1:2–6)

Korihor (Alma 30:12–18)

Sa unsang paagi ninyo nakita nga nakaapekto sa mga miyembro sa Simbahan karon ang sayop nga mga pagtulun-an o mga ideya sama sa nalista sa pisara?

Dapita ang mga estudyante sa pagkumpara sa Jacob 7:5, 8–12 ug sa Alma 30:39–44 sa pagsuta kon unsay nakalig-on ni Jacob ug Alma batok sa sayop nga mga pagtulun-an ni Sherem ug ni Korihor. (Pahinumdom: Ang pagkumpara usa ka kahanas sa pagtuon sa kasulatan. Ang pagkamatngon sa mga pagkaparehas “tali sa mga pagtulun-an, katawhan, o mga hitabo magdala sa mga kamatuoran sa ebanghelyo ngadto sa mas sigurado kaayo nga tumong” [Gospel Teaching and Learning: A Handbook for Teachers and Leaders in Seminaries and Institutes of Religion (2012), 22].)

Unsa ang naglig-on ni Jacob ug Alma batok sa sayop nga mga pagtulun-an? (Ang mga tubag kinahanglang maglakip sa mosunod: kanhi mga kasinatiang espiritwal, kahibalo sa mga kasulatan, kahibalo nga naangkon gikan sa Espiritu Santo, ug ang pagpamatuod kang Kristo.)
Unsa nga baruganan ang atong makat-unan gikan sa mga tubag ni Jacob ug Alma niining sayop nga mga pagtulun-an? (Tabangi ang mga estudyante sa pag-ila niini nga baruganan: Kon mosalig kita sa atong mga pagpamatuod kang Kristo ug tinguhaon ang giya sa Espriitu Santo, mabuntog nato ang mga hagit sa atong pagtuo.)
Sa unsang paagi ang inyong pagpamatuod milig-on kaninyo batok sa sayop nga mga pagtulun-an o pagsaway sa inyong mga gituohan?

Awhaga ang mga estudyante sa pagpaambit unsay ilang gipanghimo aron maprotektahan ang ilang kaugalingon sa sayop nga mga pagtulun-an nga pweding moguba sa ilang pagtuo kang Jesukristo ug sa Iyang gipahiuli nga ebanghelyo.

2 Nephi 26:29; 3 Nephi 18:24; 27:27

Pag-ila sa mga peligro sa mga pangilad sa pagkapari

Sultihi ang mga estudyante nga ang pipila ka espiritwal nga mga peligro sa Simbahan naggikan ra sa mga miyembro sulod sa Simbahan. Ipabasa og kusog sa usa ka estudyante ang 2 Nephi 26:29 samtang mangita ang klase sa gihulagway ni Nephi nga mga espiritwal nga peligro.

Sumala niini nga tudling, unsa ang pangilad sa mga pagkapari? (Kon magsangyaw ang mga tawo sa ebanghelyo para sa personal nga kabantug o katigayunan kay sa kaayuhan para sa mga anak sa Dios.)
Sa unsang mga paagi ang pangilad sa mga pagkapari magmugna og espiritwal nga mga peligro para sa mga miyembro sa Simbahan?

Aron matabangan ang mga estudyante sa pagtubag niini nga mga pangutana, dapita ang mga estudyante sa pagbasa sa mosunod nga pamahayag ni Elder M. Russell Ballard:

“Magbantay kita sa mini nga mga propeta ug mini nga mga magtutudlo, mga lalaki ug babaye, kinsa nagtudlo lang sa kaugalingon nga mga tigpamahayag sa mga doktrina sa Simbahan ug kinsa nagtinguha sa pagpakatap sa ilang sayop nga ebanghelyo ug modani og mga sumusunod pinaagi sa pagpasiugda og mga symposium, mga libro, ug mga journal kansang mga sulod [content] mohagit sa sukaranang mga doktrina sa Simbahan. Pagbantay niadtong mamulong ug momantala batok sa tinuod nga mga propeta sa Dios ug aktibong mokabig sa uban pinaagi sa pagbaliwala sa mahangturong kaayohan niadtong ilang giagni” (“Beware of False Prophets and False Teachers,”Ensign, Nob. 1999, 63).

Sa unsang paagi ninyo maprotektahan ang inyong kaugalingon gikan sa pangilad sa mga pagkapari?
Unsaon ninyo sa pagpanalipud ang mga doktrina sa Simbahan kon mamulong ang uban supak sa mga propeta sa Dios sa ulahing mga adlaw?

Sultihi ang mga estudyante nga gitudloan sa Manluluwas ang Iyang mga disipulo sa unsang paagi motudlo ug moimpluwensya sa uban kadtong nagrepresentar Kaniya. Ipa-search og hilum sa mga estudyante ang 3 Nephi 18:24 ug ang 3 Nephi 27:27, nga mangita kon unsay nakalahi sa tinuod nga pagserbisyo sa ebanghelyo gikan sa pangilad sa pagkapari.

Sa unsang paagi ang mga motibo ug mga buhat sa mga magtutudlo ug lider nga matarung nalahi gikan sa mga motibo ug mga aksyon niadtong sad-an sa pangilad sa pagkapari? (Kinahanglang mahibaloan sa mga estudyante ang mosunod nga kamatuoran: Ang mga disipulo ni Jesukristo nagtinguha sa pagserbisyo ug pagpanalangin sa uban pinaagi sa pagpatutok nila ngadto Kaniya.)

Moroni 7:12–17; Ether 4:11–12

Pag-ila sa kamatuoran ug sa sayop

Hangyoa ang mga estudyante sa paghunahuna og panahon nga dunay tawo nga mikwestyon o misaway sa ilang mga gituohan. Dapita ang usa o duha ka mga estudyante sa pagpakigbahin sa ilang mga kasinatian.

Dapita ang pipila ka estudyante nga magpuli-puli sa pagbasa og kusog sa Moroni 7:12–17 ug Ether 4:11–12 samtang magsunod ang klase, nga mangita kon unsaon sa pag-ila kon ang usa ka butang gikan ba sa Ginoo o sa yawa.

Unsay nakat-unan ninyo gikan niini nga tudling kon unsaon nato sa paghukom tali sa maayo ug sa dautan? (Siguroha nga masabtan sa mga estudyante ang mosunod nga mga kamatuoran: Ang tanang butang nga iya sa Dios nagdapit kanato sa pagbuhat og maayo, nga motuo kang Jesukristo, ug paghigugma ug pag-alagad sa Dios.)

Dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson:

“Mosugyot ko og tulo ka mubo nga test aron malikay sa pagkalingla. …

“1. Unsa ang gisulti sa sumbanang mga basahon mahitungod niini?. …

“2. Ang ikaduha nga giya mao: unsay isulti sa mga Presidente sa Simbahan bahin niini nga hilisgutan—ilabi na sa buhi nga Presidente?. …

“3. Ang ikatulo ug katapusang test mao ang Espiritu Santo—ang test bahin sa Espiritu. … Kini nga test mahingpit lamang ang kaepektibo kon ang usa ka channel sa komunikasyon uban sa Dios limpyo ug mahiyason ug wala mabulingi sa sala” (sa Conference Report, Okt. 1963, 16–17).

Sa pagtapos, hangyoa ang mga estudyante sa pagpamalandong kon sa unsang paagi mas magamit nila sa maayong paagi ang mga kasulatan, mga pulong sa mga propeta, ug ang Espiritu Santo sa pag-ila sa sayop nga mga pagtulun-an ug malikay sa pagkalingla. Mahimo nimo silang awhagon nga tun-an ang Jacob 7, Alma 1, ug Alma 30 sa mas detalyadong paagi ug pamalandungan sa unsang paagi kini nga mga kapitulo makatabang nila nga mas makaila tali sa kamatuoran ug sa sayop.

Mga Basahunon sa Estudyante

2 Nephi 26:29; 28:3–9, 12–15; Jacob 7:1–12; Alma 1:2–6; 30:12–18, 39–44; 3 Nephi 18:24; 27:27; Ether 4:11–12; Moroni 7:12–17; Joseph Smith—Mateo 1:22.
Neil L. Andersen, “Espirituhanong mga Alimpulos,” Liahona, Mayo 2014, 18–21.