Usa sa sentro nga katuyoan sa Basahon ni Mormon mao ang pagdapit sa tanang katawhan sa “[pag]duol ngadto kang Kristo, paghingpit diha kaniya” (Moroni 10:32). Kon mopakita kita og pagtuo ug “maghupot sa matag maayo nga butang,” mahimo kitang mga anak ni Kristo (tan-awa sa Moroni 7:19). Sa katapusan niini nga leksyon, dunay oportunidad ang mga estudyante sa paghatag og pagpamatuod kon sa unsang paagi ang Basahon ni Mormon nakatabang nila sa pagduol kang Kristo.
Background nga Basahunon
Jeffrey R. Holland, “Kasiguroan alang sa Kalag,”Liahona, Nob. 2009, 88–90.
“Kinabuhi nga Nakasentro kang Kristo,” kapitulo 24 sa Mga Pagtulun-an sa mga Presidente sa Simbahan: Ezra Taft Benson (2014), 353–65.
Nagdapit ang Basahon ni Mormon kanato sa pagduol ngadto kang Kristo
Dapita ang mga estudyante sa paghunahuna og usa ka panahon dihang midapit sila og tawo nga mobasa sa Basahon ni Mormon.
Nganong midapit kamo niining tawhana sa pagbasa sa Basahon ni Mormon?
Dapita ang mga estudyante sa paghunahuna nganong gitun-an nila ang Basahon ni Mormon. Pasabta nga samtang dunay daghang maayo nga rason nganong basahon ug tun-an ang Basahon ni Mormon, ang basahon mismo naglangkob sa binalik-balik nga mensahe mahitungod sa usa sa pinakaimportante niining mga katuyoan.
Isulat sa pisara ang mosunod nga mga pakisayran sa kasulatan:
Dapita ang mga estudyante sa pagbasa og hilum sa mga tudling, nga mangita sa gibalik-balik nga tema nga makita diha sa Basahon ni Mormon. (Mahimo nimong awhagon ang mga estudyante sa pag-cross reference niini nga mga tudling diha sa ilang mga kasulatan.)
Unsa ang gibalik-balik nga tema sa Basahon ni Mormon nga makita niini nga mga bersikulo?
Unsay buot ipasabut sa “[pag]duol ngadto kang Kristo”?
Unsay gitudlo niini nga mga bersikulo nga atong buhaton aron sa pagduol ngadto kang Kristo? (Ang mga tubag kinahanglang maglakip sa mosunod: “ihalad ang inyong tibuok nga mga kalag ingon nga usa ka paghalad ngadto kaniya,” magpuasa, mag-ampo, molahutay sa katapusan, maghinulsol, makabig, ug “maghupot diha sa matag maayo nga gasa.”)
Unsay buot ipasabut diha ninyo sa mga pulong nga “ihalad ang inyong tibuok nga mga kalag ingon nga usa ka paghalad ngadto Kaniya?
Aron matabangan nga mas masabtan pa sa mga estudyante kon unsay ipasabut sa pagduol ngadto kang Kristo, i-display ug hisguti ang mosunod nga pamahayag ni Elder Richard G. Scott sa Korum sa Napulog Duha ka mga Apostoles ug ni Elder Dennis B Neuenschwander sa Seventy:
Imahe
Elder Richard G. Scott
“Kon padayon kitang mag-ampo sa buntag ug gabii, magtuon sa kasulatan matag adlaw, mag-family home evening matag semana, ug motambong sa templo pirme, aktibo kitang mitubag sa Iyang pagdapit nga ‘moduol ngadto Kaniya’” (Richard G. Scott, “Himoa ang Paggamit sa Pagtuo nga Inyong Unang Prayoridad,”Liahona, Nob. 2014, 94).
Imahe
Elder Dennis B. Neuenschwander
“Mosaksi ko nga makaduol kita kang Kristo ug mahingpit diha Kaniya pinaagi sa takus natong pagpanginlabut sa sagradong mga ordinansa nga gipili sa Dios ug gipasiugdahan gikan pa sa katukuran sa kalibutan” (Dennis B. Neuenschwander, “Ordinances and Covenants,” Ensign, Ago. 2001, 26).
Ipasabut nga ang katapusang kapitulo sa Basahon ni Mormon, nagrekord sa mga tambag gikan ni propeta Moroni kon unsaon sa pagduol ngadto kang Kristo. Dapita ang usa ka estudyante sa pagbasa og kusog sa Moroni 10:32–33 samtang ang klase mangita kon sa unsang paagi gigamit ang mga pulong nga “kon” ug “niana”. Hangyoa ang klase sa pagpamalandong kon unsay gitudlo niini nga “kon-niana” nga mga pahayag mahitungod sa unsang paagi kita mapanalanginan sa grasya ni Kristo. (Pahinumdom: Ang pagpangita sa “kon-niana” nga mga pahayag makatabang sa mga estudyante sa pag-ila sa mga baruganan nga gitudlo sa mga kasulatan.)
Unsa nga mga baruganan ang atong makat-unan niini nga mga bersikulo kon sa unsang paagi kita mapanalanginan sa grasya ni Kristo kon moduol kita Kaniya? (Ang mga estudyante mahimong mogamit og lahi nga mga pulong, apan siguroa nga mahibaloan nila ang mosunod nga baruganan: Kon moduol kita kang Jesukristo ug ilimud ang atong kaugalingon sa tanan nga dili diosnon, niana mahingpit kita, mabalaan, ug mahimong balaan pinaagi sa Iyang grasya. Tan-awa usab sa Alma 5:33–35.)
Aron mapalawman ang panabut sa mga estudyante bahin niini nga baruganan, ipaambit ang mosunod nga pamahayag ni Elder Bruce C. Hafen sa Seventy. Dapita ang mga estudyante sa pagpaminaw kon sa unsang paagi ang grasya sa Ginoo makapanalangin kanato.
Imahe
Elder Bruce C. Hafen
“Ang grasya sa Ginoo, nga giablihan tungod sa Pag-ula, mohingpit sa atong mga pagkadili hingpit. ‘Pinaagi sa iyang grasya kamo mahimo nga hingpit diha kang Kristo.’ (Moroni 10:32.) Samtang daghan sa mga proseso sa pagkahingpit naglakip sa paglimpyo gikan sa sala ug kaligutgot, adunay dugang, positibo nga sukod diin kita makaangkon og Kristohanong kinaiya, sa pagkahimong hingpit sama nga ang Amahan ug ang Anak hingpit. …
“Ang kadaugan sa Manluluwas makabayad dili lang sa atong mga sala apan usab sa atong mga kakulangan; dili lang sa tinuyo natong mga sala apan usab sa atong mga sala nga nahimo gumikan sa pagkawalay alamag, atong mga sayop nga paghukom, ug sa dili malikayan natong mga imperpeksyon. Ang atong kinatas-an nga pangandoy mas labaw pa kay sa mapasaylo sa sala—tinguhaon nato ang pagkahimong balaan, nga matugahan sa tukma pinaagi sa Kristohanong mga hiyas, mahiusa kaniya, mahisama kaniya. Ang balaang grasya mao lamang ang tinubdan nga sa katapusan makatuman niana nga pangandoy, human sa tanan nga atong mabuhat” (The Broken Heart [1989], 16, 20).
Sumala ni Elder Hafen, sa unsang mga paagi ang grasya sa Ginoo mopanalangin kanato?
Dapita ang mga estudyante sa paghunahuna og panahon dihang mibati sila nga naningkamot nga moduol sila ngadto kang Jesukristo. Hangyoa sila sa pagtubag sa mosunod nga mga pangutana kon ang ilang mga kasinatian dili kaayo personal:
Nianang panahona, unsay inyong gihimo aron makaduol ngadto kang Kristo?
Unsa nga mga panalangin ang miabut sa inyong kinabuhi samtang gipaningkamutan ninyo ang pagduol ngadto kang Jesukristo?
Dapita ang mga estudyante sa pagpamalandong unsay ilang mahimo aron mas mahingpit ang pagpaduol ngadto kang Kristo aron mamahimo silang hingpit ug mabalaan pinaagi sa Iyang grasya. Awhaga sila sa pagsunod sa bisan unsang espiritwal nga pag-aghat nga ilang madawat.
Maghupot sa matag maayo nga butang aron mamahimong mga anak ni Kristo
Pahinumdumi ang mga estudyante nga diha sa Moroni 7, girekord ni propeta Moroni ang usa ka wali nga gipamulong sa iyang amahan, nga si Mormon, nga gihatag daghang katuigan nang milabay. Niini nga wali, gitudlo ni Mormon nga mahibaloan nato kon ang butang dinasig sa Dios kon kini nagdapit sa katawhan sa pagbuhat og maayo, sa pagtuo kang Jesukristo, ug paghigugma ug pag-alagad sa Dios.
Dapita ang usa ka estudyante sa pagbasa og kusog sa Moroni 7:18–19. Hangyoa ang klase sa pagsunod, nga mangita kon unsay gihangyo ni Mormon nga atong buhaton.
Sumala sa bersikulo 19, unsay mahitabo kanato kon mogamit kita sa Kahayag ni Kristo aron mahibalo sa maayo gikan sa dautan ug dayon “maghupot sa matag maayo nga butang”? (Mahimo kitang mga anak ni Kristo.)
Unsay ipasabut sa pagkahimong mga anak ni Kristo? (Ipasabut nga kita mga espiritu nga anak sa Langitnong Amahan ug mga anak usab sa atong yutan-ong mga ginikanan. Apan, sigun sa gitudlo ni Presidente Joseph Fielding Smith [1876–1972], si Jesukristo usab “mahimong atong Amahan, sa hinungdan nga kini nga termino gigamit sa mga kasulatan, tungod kay nagtanyag siya kanato og kinabuhi, kinabuhing dayon, pinaagi sa pag-ula nga iyang gibuhat alang kanato. [Tan-awa sa Mosiah 5:7.] … Mahimo kitang mga anak, mga anak nga lalaki ug babaye ni Jesukristo, pinaagi sa atong mga pakigsaad nga magmasulundon kaniya” [Doctrines of Salvation, comp. Bruce R. McConkie, 3 vols. (1954–56), 1:29].)
Ipabasa og hilum sa mga estudyante ang Moroni 7:20 ug sa pagpangita sa gipangutana ni Mormon. Dayon Ipares-pares ang mga estudyante, ug dapita sila nga tun-an ang Moroni 7:21–26, nga mangita sa unsay gihatag sa Ginoo kanato aron matabangan kita sa “paghupot sa matag maayo nga butang.” Human sa igong panahon, dapita ang mga estudyante sa pagpaambit sa ilang mga hunahuna, ug isulat sa pisara ang ilang mga tubag. Ang mga tubag pweding maglakip sa pagpangalagad sa mga anghel (bersikulo 22), mga propeta (bersikulo 23), ang mga kasulatan (bersikulo 25), [pagggamit] og pagtuo (bersikulo 25), ug pag-ampo (bersikulo 26).
Unsa ang gitudlo niini nga mga bersikulo kanato mahitungod sa kahulugan sa mga pulong nga “paghupot sa matag maayo nga butang”? (Kinahanglang tinguhaon nato ang matag butang nga maayo, ilabi na niadtong mga butang nga mosangput sa pagtuo kang Kristo ug kaluwasan pinaagi sa Iyang ngalan.)
Unsa ang maayong mga butang nga miabut sa inyong kinabuhi tungod sa usa ka item nga naa gisulat sa pisara?
Hangyoa ang mga estudyante sa pagpili og usa ka maayong butang nga masugdan nila sa paghimo, o mas ayuhon nila sa paghimo, aron makapaduol ngadto kang Kristo. Awhaga sila nga maghimo og tumong nga buhaton pinaagi sa paghupot niana nga maayong butang sa ilang kinabuhi.
Ipataas ang usa ka kopya sa Basahon ni Mormon ug hangyoa ang mga estudyante sa pagpamalandong kon sa unsang paagi ang Basahon ni Mormon nakatabang nila sa pagduol ngadto kang Kristo. Ipasabut nga mihatag si Moroni og usa ka pagdapit ug saad sa tanan kinsa mobasa ug magtuon sa Basahon ni Mormon.
Dapita ang usa ka estudyante sa pagbasa og kusog sa Moroni 10:3–5.
Sigun sa narekord sa bersikulo 3, unsay giawhag ni Moroni nga atong buhaton?
Dapita ang mga estudyante sa pagpamalandong og mga ehemplo gikan sa Basahon ni Mormon ug gikan sa kaugalingon nilang kinabuhi nga naghulagway “unsa ka maloloy-on ang Ginoo ngadto sa katawhan.” Hangyoa ang pipila ka estudyante nga ipaambit ang ilang mga hunahuna diha sa klase.
Unsa nga baruganan ang atong makat-unan gikan sa pagdapit ni Moroni ug sa saad nga naa niini nga mga bersikulo? (Kon mangutana kita sa Dios uban ang tinuod nga katuyoan, nga may hugot nga pagtuo kang Kristo, kon tinuod ba ang Basahon ni Mormon, makadawat kita og pagpamatuod sa katinuod niini pinaagi sa Espiritu Santo.)
Unsay ipasabut sa pagpangutana sa Dios sa “tinuod nga katuyoan, nga may hugot nga pagtuo kang Kristo”? (Nagpasabut kini nga duna kitay pagtuo nga ang Dios motubag sa atong mga pag-ampo ug nga maoy atong tuyo ang paglihok sa mga tubag nga Iyang gihatag kanato.)
Sa unsang paagi ang pagtuon ug pag-ampo mahitungod sa Basahon ni Mormon sa ingon niini nga paagi makatabang nga kita maduol ngadto kang Kristo?
Hangyoa ang mga estudyante sa pagpamalandong sa ilang mga kasinatian sa pagbasa sa Basahon ni Mormon ug sa pag-ampo aron masayud sa katinuod niini. Pangutan-a ang mga estudyante kon duna ba kanila ang gustong mopaambit sa ilang pagpamatuod bahin sa Basahon ni Mormon diha sa klase, ilabi na kon sa unsang paagi ang Basahon ni Mormon nakatabang nila sa pagduol ngadto kang Kristo. Awhaga ang mga estudyante nga ipadayon ang paggamit sa mga pulong ni Moroni aron makaangkon og pagpamatuod sa Basahon ni Mormon o aron sa paglig-on sa pagpamatuod nga anaa na kanila.