Leksyon 6: Ang Basahon ni Mormon Gisulat alang sa Atong Panahon
6
Ang Basahon ni Mormon Gisulat Alang sa Atong Panahon
Pasiuna
Ang Basahon ni Mormon ug ang gipahiuli nga ebanghelyo ni Jesukristo mga kabahin sa “kahibulongan nga buhat ug usa ka katingalahan” nga mainampingong giandam sa Dios sa katapusang mga adlaw (2 Nephi 25:17). Kay ang Basahon ni Mormon naglangkob sa kahingpitan sa ebanghelyo, nagdala kini sa mahinungdanong tahas sa pagbuntog sa apostasiya ug madala og balik ang mga kalag ngadto kang Kristo. Kini nga leksyon nagpasabut gayud nga kining sagrado nga rekord gisulat sa dinasig nga mga tigsulat kinsa nakakita sa atong panahon.
Background nga Basahunon
Jeffrey R. Holland, “Kasiguroan alang sa Kalag,”Liahona, Nob. 2009, 88–90.
“Pagpuno sa Yuta ug sa Atong mga Kinabuhi sa Basahon ni Mormon,” kapitulo 10 sa Mga Pagtulun-an sa mga Presidente sa Simbahan: Ezra Taft Benson (2014), 163–74.
Ang tahas sa Basahon ni Mormon sa ulahing mga adlaw
Pasabta ang mga estudyante nga ang Basahon ni Mormon nagrekord sa mga panagna nga dunay kadautan ug apostasiya sa kalibutan sa ulahing mga adlaw (tan-awa sa 2 Nephi 27:1, 4–5). Nagrekord usab ang Basahon ni Mormon sa mga sulbad sa Ginoo alang niini nga mga problema. Ipabasa og kusog sa usa ka estudyante ang 2 Nephi 27:6, 29–30, 35 samtang mangita ang klase sa mga sulbad sa Ginoo.
Sumala niini nga mga bersikulo, unsay buhaton sa Ginoo sa katapusang mga adlaw aron mabatukan ang mga kadautan ug apostasiya?
Sa unsang mga paagi ang Basahon ni Mormon naghatag og sulbad sa mga kadautan sa ulahing mga adlaw?
Sultihi ang mga estudyante nga nagrekord si Mormon og panagna mahitungod sa dugang tahas sa Basahon ni Mormon sa katapusang mga adlaw. Hatagi og pipila ka minutos nga makatuon ang mga estudyante sa 3 Nephi 29:1–2 ug mangita niana nga panagna. Mahimo nimong ipasabut nga ang mga pulong nga “kini nga mga pamahayag” nagpasabut sa Basahon ni Mormon.
Unsang importante nga buhat ang magsugod tungod sa pag-abut sa Basahon ni Mormon? (Ang pagpundok sa Israel.)
Ipasabut nga gihulagway ni Presidente Ezra Taft Benson (1899–1994) ang tumong gayud sa Basahon ni Mormon sa Pagpahiuli sa ebanghelyo ug sa pagsugod sa buhat sa Ginoo sa katapusang mga adlaw. Dapita ang usa ka estudyante sa pagbasa og kusog sa mosunod nga pamahayag:
Imahe
President Ezra Taft Benson
“[Ang Basahon ni Mormon] namantala mga pipila lamang ka adlaw sa wala pa matukod ang Simbahan. Ang mga Santos gihatagan og Basahon ni Mormon aron basahon sa wala pa sila mahatagi sa mga pagpadayag nga naglatid sa talagsaong mga doktrina sama sa tulo ka gingharian sa himaya, celestial nga kaminyoon, o buhat alang sa mga patay. Miabut kini sa wala pa ang organisasyon sa mga korum sa priesthood ug sa Simbahan. Dili ba kini adunay buot nga ipaabut ngari kanato kon sa unsang paagi gilantaw sa Ginoo kining sagradong buhat?” (“The Book of Mormon—Keystone of Our Religion,” Ensign, Nob. 1986, 4).
Ngano kaha nga ang pag-abut sa Basahon ni Mormon giunhan og daghan kaayong importante nga panghitabo sa Pagpahiuli ug mao gayud ang sentro sa buhat sa Ginoo sa pagpundok sa Israel ug pagbuntog sa kadautan niining katapusang mga adlaw?
Aron matabangan nga matubag kini nga pangutana, ipabasa og kusog sa usa ka estudyante ang Joseph Smith—Kasaysayan 1:34. Dapita ang klase sa pagpangita kon unsay anaa sa Basahon ni Mormon.
Unsa man ang anaa sa Basahon ni Mormon? (Tabangi nga mahibaloan sa mga estudyante ang mosunod nga kamatuoran: Ang Basahon ni Mormon naglangkob sa kahingpitan sa ebanghelyo ni Jesukristo.)
Unsa ang kahulugan sa pamahayag ni Moroni nga ang Basahon ni Mormon naglangkob sa “kahingpitan sa walay katapusang Ebanghelyo”?
Aron matabangan nga matubag kini nga pangutana, i-display ang mosunod nga pamahayag ni Presidente Ezra Taft Benson, ug ipabasa kini sa usa ka estudyante:
Imahe
President Ezra Taft Benson
“Ang Ginoo Mismo nagpahayag nga ang Basahon ni Mormon naglangkob sa ‘kahingpitan sa ebanghelyo ni Jesukristo’ (D&P 20:9). Kana wala magpasabut nga naglangkob kini sa tanang pagtulun-an, sa tanang doktrina nga gipadayag. Hinoon, kini nagpasabut nga diha sa Basahon ni Mormon atong makit-an ang kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug sayon nga paagi” (Mga Pagtulun-an sa mga Presidente sa Simbahan: Ezra Taft Benson [2014], 157).
Unsa ang ubang “mga doktrina nga gikinahanglan para sa atong kaluwasan” nga anaa sa Basahon ni Mormon? (Kini nga mga doktrina naglakip sa Pag-ula, pagtuo kang Jesukristo, paghinulsol, bunyag, ug gasa sa Espiritu Santo.)
Ipasabut nga gitudloan sa Ginoo ang propeta nga si Enoch mahitungod sa kamahinungdanon sa Basahon ni Mormon sa katapusang mga adlaw. Dapita ang usa ka estudyante sa pagbasa og kusog sa Moises 7:62. (Mahimo nimong isulat sa pisara nga ang “pagkamatarung [ipakanaog] gikan sa langit” nagpasabut sa mga pagpadayag nga naghimong posible sa Pagpahiuli ug ang “pagkamatarung [ipadala] sa yuta” nagpasabut sa Basahon ni Mormon. Awhaga ang mga estudyante nga isulat kini nga mga depinisyon sa kilid sa ilang mga kasulatan o maghimo og note diha sa ilang mga electronic nga mga kasulatan.)
Sumala niini nga bersikulo, sa unsang paagi magamit ang Basahon ni Mormon sa ulahing mga adlaw? (Alang sa pagtabang og pundok sa mga pinili sa Dios ngadto sa Simbahan gikan sa upat ka suok sa kalibutan.)
Kanus-a kamo nakakita nga ang Basahon ni Mormon nakatabang og tawo nga nakabig sa ebanghelyo ug mipasakop sa Simbahan sa Ginoo?
Unsa ang ubang mga paagi nga kita “mosilhig sa yuta” pinaagi sa pagkamatarung ug sa mensahe sa Basahon ni Mormon “ingon sa usa ka lunop”?
Dapita ang mga estudyante nga ipasalig ang “pagpalunop” og mensahe sa Basahon ni Mormon diha sa ilang mga kasingkasing, sa ilang mga balay, ug sa kalibutan atol sa semana.
Ang kamatuoran sa Basahon ni Mormon mobatok sa oposisyon
Pahunahunaa ang mga estudyante og usa ka panahon dihang gidepensahan nila ang Basahon ni Mormon o ang mensahe sa Pagpahiuli sa ebanghelyo batok sa oposisyon.
Dapita ang usa ka estudyante sa pagbasa og kusog sa 3 Nephi 21:9–11. Sa dili pa magsugod og basa ang estudyante, pasabta nga si Elder Jeffrey R. Holland sa Korum sa Napulog Duha ka mga Apostoles miila sa “sulugoon” dinhi sa bersikulo nga mao si Propeta Joseph Smith (tan-awa sa Christ and the New Covenant [1997], 287–88).
Sa unsang paagi haum si Propeta Joseph Smith sa gihulagway diha niana nga mga bersikulo?
Sumala niini nga mga bersikulo unsa man ang ipakita sa Manluluwas sa mga tawo nga misupak ni Joseph Smith ug sa Basahon ni Mormon sa ulahing mga adlaw? (Tabangi nga mahibaloan sa mga estudyante ang mosunod nga doktrina: Mas labaw ang kaalam sa Dios kay sa pagpangliput sa yawa.)
Sa unsang paagi makatabang ang Basahon ni Mormon sa pagpakita nga “mas labaw ang kaalam sa Dios kay sa pagpangliput sa yawa”?
I-display ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Sa [kapin sa 180] ka tuig kini nga basahon gihiling og maayo ug giatake, gilimod ug gustong bungkagon, gitabangan og saway ug gibugal-bugalan nga wala pay laing basahon ang gibuhatan sa ingon sa modernong kasaysayan sa relihiyon—tingali wala pa mabuhat sa laing basahon sa bisan unsang kasaysayan sa relihiyon. Ug padayon kining mibarug. Ang pakyas nga teyoriya kabahin sa gigikanan niini ningtumaw og gibalik-balik ug nawala. … Wala niining subo nga prangka nga mga tubag alang niini nga basahon ang nakabarug sa pagtuki-tuki tungod kay walay laing tubag kay sa tubag nga gihatag ni Joseph isip batan-ong walay kinaadman nga tighubad niini. Niini mosuporta ako sa kaugalingon nakong apohan, nga yanong miingon, ‘Walay dautang tawo ang makasulat og ingon nga basahon sama niini; ug walay buotan nga tawo ang mosulat niini, gawas lang kon kini tinuod ug kon siya gisugo sa Dios sa paghimo niini” (“Kasiguroan alang sa Kalag,”Liahona, Nob. 2009, 89).
Ngano kahang daghan man kaayo ang mobatok sa Basahon ni Mormon?
Unsa nga kasinatian ang nakatudlo ninyo nga ang Basahon ni Mormon makabarug sa mga mobatok niini?
Unsay inyong gibati ug unsay inyong nakat-unan samtang gitudloan ninyo ang uban mahitungod sa Basahon ni Mormon o sa pagdepensa sa pagkatinuod niini?
Ang Basahon ni Mormon gisulat alang sa atong panahon
Pahinumdumi ang mga estudyante nga nasaksihan ni Moroni ang pagkalaglag sa iyang sibilisasyon. Ipabasa sa mga estudyante ang Mormon 8:1–5 ug ipahunahuna kon unsa kaha ang gikinahanglang buhaton ni Moroni aron mapanalipdan ang bulawang mga palid.
Hunahunaa nga ikaw si Moroni. Unsa ang pipila ka rason nga gusto man nimo nga mabasa sa uban ang imong rekord?
Ipabasa sa mga estudyante ang Mormon 8:26–35, nga mangita kon unsay gipanagna ni Moroni mahitungod sa mga kahimtang sa panahon kon ipagawas na ang Basahon ni Mormon. Mahimo nimong awhagon ang mga estudyante nga markahan ang unsay ilang nakit-an.
Giunsa sa paghulagway ni Moroni ang panahon kon ipagawas na ang Basahon ni Mormon? (Kapanahunan kini sa apostasiya ug kadautan.)
Unsa ang mahimo nimong mga konklusyon kon basihan ang bersikulo 35? (Mahimo nimong ipasabut nga agig dugang kang Moroni, may uban pang mga propeta lakip ni Nephi, Jacob, ug Mormon miingon nga nagsulat sila para sa umaabut nga mga henerasyon. Ikonsiderar ang pagpa-cross-reference sa mga estudyante sa bersikulo 35 ngadto sa 2 Nephi 25:21–22 ug Mormon 7:1.)
Nganong importante man kahang mahibaloan nga ang ubang mga tigsulat sa Basahon ni Mormon nasayud sa mga problema nga atong atubangon karon? (Samtang hisgutan nimo kini nga pangutana, hatagi og gibug-aton ang mosunod nga kamatuoran: Ang mga pagtulun-an sa Basahon ni Mormon dako kaayo og bili kanato karon tungod kay ang mga tigsulat nasayud man sa mga problema nga atong atubangon.)
Aron matabangan ang mga estudyante nga makasabut niini nga kamatuoran, dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benzon:
Imahe
President Ezra Taft Benson
“Ang Basahon ni Mormon … gisulat alang sa atong panahon. Ang mga Nephite sukad wala makabaton sa basahon; ni ang mga Lamanite sa karaang mga panahon. Kini gigahin alang kanato. Si Mormon misulat sa hapit na sa pagtapos sa sibilisasyon sa Nephite. Ubos sa inspirasyon sa Dios, kinsa nakakita sa tanang mga butang gikan sa sinugdanan, iyang gipamubo ang mga rekord sa daghang mga siglo, nagpili sa mga istorya, mga pakigpulong, ug mga panghitabo nga labing makatabang kanato.
“Ang pinakaimportanting mga tigsulat sa Basahon ni Mormon nagpamatuod nga siya misulat alang sa umaabut nga mga henerasyon. … Kon ilang nakita ang atong panahon ug mipili niadtong mga butang nga labing bililhon kaayo alang kanato, dili ba ingon niana unsaon nato ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, “Ngano nga ang Ginoo nagdasig ni Mormon (o Moroni o Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpuyo niining panahona?’” (Mga Pagtulun-an sa mga Presidente sa Simbahan: Ezra Taft Benson,167-168).
Sa unsang paagi kaha ang paghinumdom nga ang Basahon ni Mormon gisulat alang sa atong panahon makausab sa pamaagi sa atong pagbasa niini?
Dapita ang mga estudyante sa paghatag og mga ehemplo kon sa unsang paagi ang Basahon ni Mormon mihatag kanila og direksyon, kalig-on, ug tubag sa mga pangutana, o mga solusyon sa mga problema.
Jeffrey R. Holland, “Kasiguroan alang sa Kalag,”Liahona, Nob. 2009, 88–90.
“Pagpuno sa Yuta ug sa Atong mga Kinabuhi sa Basahon ni Mormon,” kapitulo 10 sa Mga Pagtulun-an sa mga Presidente sa Simbahan: Ezra Taft Benson (2014), 163–74.