Mga Seminary ug mga Institute
Leksyon 3: Ang Pagkamasulundon Makahatag og mga Panalangin

3

Ang Pagkamasulundon Makahatag og mga Panalangin

Pasiuna

Ang atong pagkamasulundon sa mga sugo sa Dios usa ka paagi nga atong ikapakita ang atong pasalamat sa talagsaon Niyang mga panalangin. Ang Manluluwas usa ka hingpit nga ehemplo sa kamasulundon. Mouswag ang atong tinguha nga magmasulundon kon motubo ang atong gugma sa Dios. Ang kamasulundon sa mga sugo naghimong posible nga mahatag sa Dios ang tabang nga atong gipangita aron matuman ang mga buluhaton nga lisud.

Background nga Basahunon

  • Thomas S. Monson, “Ang Pagkamasulundon Makahatag og mga Panalangin,” Liahona, Mayo 2013, 89–92.

  • Robert D. Hales, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Mayo 2014, 35–38.

Mga Sugyot alang sa Pagtudlo

1 Nephi 2:2–4, 9–13, 16, 19–20; Mosiah 2:20–24, 41

Pinaagi sa atong kamasulundon, ikapakita nato ang atong pasalamat sa Dios ug madawat ang Iyang pinakadakong mga panalangin

I-display ang mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

Elder Joseph B. Wirthlin

“Unsaon man nato sa pagbayad sa atong nautang ngadto sa Manluluwas? Mibayad Siya sa utang nga wala Niya mautang aron sa pagluwas kanato gikan sa utang nga dili gayud nato mabayran. Tungod Kaniya, mabuhi kita hangtud sa kahangturan. Tungod sa Iyang walay katapusang Pag-ula, ang atong mga sala mawala, nga nagtugot nato nga makasinati sa pinakaimportante sa tanang mga gasa sa Dios: ang kinabuhing dayon.

“Ang mao ba nga gasa adunay bili? Makabayad ba kita alang sa maong gasa?” (“Yutan-ong mga Utang, Langitnong mga Utang” Liahona, Mayo 2004, 43).

Hatagi og panahon ang mga estudyante nga mahisgutan ang posibling mga tubag sa katapusang pangutana ni Elder Wirthlin. Awhaga ang mga estudyante nga mangita sa mga baruganan ug mga doktrina atol sa leksyon nga makatabang sa pagtubag niini nga pangutana.

Dapita ang mga estudyante sa hilum nga pagbasa sa Mosiah 2:20–24. Ipapangita nila kon unsay gitudlo ni Haring Benjamin kon unsaon nato sa pagtan-aw ang atong kaugalingon kalabut sa Dios.

  • Ngano kaha nga gitudlo man ni Haring Benjamin nga bisan unsay atong buhaton, kita sa gihapon “dili mapuslanon nga mga sulugoon” sa Dios?

  • Bisan og dili gayud kita makabayad sa atong utang sa Dios, unsa may gisugyot niining mga bersikuloha nga atong mabuhat aron ikapakita nato ang atong pasalamat sa tanan nga Iyang nahimo kanato? (Tabangi nga mahibaloan sa mga estudyante ang mosunod nga baruganan: Kon atong mahibaloan ang walay katapusan natong utang sa Dios, magtinguha kita sa pagserbisyo Kaniya ug motuman sa Iyang mga sugo.)

Sultihi ang mga estudyante nga usa sa talagsaong mga istorya sa pagkamasulundon sa Dios makita sa sinugdanan sa Basahon ni Mormon, nga nagrekord giunsa sa pagsanong ni propeta Lehi ug sa iyang pamilya dihang gipabuhat sila sa Dios og butang nga lisud kaayo. Ipabasa og kusog sa usa ka estudyante ang 1 Nephi 2:2–4.

  • Nganong lisud man kaha unta sa pamilya ni Lehi ang pagsunod sa sugo sa Dios nga mobiya sa Jerusalem?

Dapita ang mga estudyante nga tun-an ang 1 Nephi 2:9–13, 16, nga mangita sa mga kalainan tali sa mga kinaiya ug batasan ni Laman ug Lemuel ug kang Nephi agig tubag niini nga sugo. (Pahinumdom: Kini nga kalihokan makaawhag sa mga estudyante para ma-praktis ang importante nga kahanas sa pagtuon sa kasulatan mahitungod sa pagtandi ug pagkumpara.)

  • Unsa nga mga pulong ang naghulagway sa tubag ni Laman ug Lemuel? (Mga tikig sila og liog, nagbagulbol sila, ug wala sila mahibalo sa mga pamaagi sa Dios.)

  • Giunsa sa pagtubag ni Nephi ang sugo nga mobiya sa Jerusalem? (Mapaubsanon siya, tinguha niya nga mahibalo sa mga butang sa Dios; may pagtuo siya sa mga pulong sa iyang amahan, kinsa usa ka propeta, ug nag-ampo siya.)

  • Nganong lahi man ang pagtubag ni Nephi sa mga pulong sa iyang amahan kay sa iyang mga igsoon?

Hatagi og panahon ang mga estudyante sa pagpamalandong kon sama ba sila ni Laman o sama ba ni Nephi dihang gihangyo sila sa Ginoo o sa mga lider sa Iyang Simbahan sa paghimo og butang nga lisud.

Dapita ang usa ka estudyante sa pagbasa og kusog sa 1 Nephi 2:19–20. Hangyoa ang klase sa pagsunod ug pag-ila sa gisaad sa Ginoo kang Nephi.

  • Unsa nga pamahayag niini nga mga bersikulo ang nag-summarize kon unsay gisaad sa Ginoo kang Nephi? (Siguroa nga masabtan sa mga estudyante ang mosunod nga baruganan: Kon motuman kita sa mga sugo, mouswag kita sa yuta. Mahimo nimong ipasabut nga usa kini sa kanunayng gibalik-balik nga mga tema sa Basahon ni Mormon. Mahimo nimong awhagon ang mga estudyante, samtang magtuon sila sa Basahon ni Mormon, nga panid-an nila ang daghang paagi sa pagbalik-balik niini nga tema.)

  • Unsa nga mga kalidad ang gidayeg sa Ginoo kang Nephi? Ngano kaha nga importante man kini nga mga kalidad para natong tanan sa atong relasyon sa Ginoo?

  • Bisan og ang pagkamasulundon dili kanunay moresulta sa temporal nga pag-uswag, unsa man ang malauman natong mga panalangin agig resulta sa pagkamasulundon sa Ginoo? (Aron matabangan ang mga estudyante nga matubag kining pangutana, ikonsiderar ang pagbasa sa Mosiah 2:41.)

2 Nephi 31:6–10, 15–16; Mosiah 15:7; 3 Nephi 11:11; 12:19–20, 48

Ang pagsunod sa ehemplo sa Manluluwas bahin sa kamasulundon makatabang nga makaduol kita Kaniya ug sa Amahan

I-display ang mosunod nga pamahayag ni Elder Robert D. Hales sa Korum sa Napulog Duha ka mga Apostoles:

Elder Robert D. Hales

“Sa tanang leksyon nga atong nakat-unan gikan sa kinabuhi sa Manluluwas, walay laing mas tin-aw ug gamhanan kay sa leksyon sa pagkamasulundon” (“Kon Nahigugma Kamo Kanako Inyong Pagatumanon ang Akong Sugo,” Liahona, Mayo 2014, 35).

  • Unsa nga mga ehemplo sa kinabuhi sa Manluluwas ang naghulagway sa Iyang kamasulundon?

Aron matabangan nga makahisgot pa og dugang ang mga estudyante, ipabasa nila ang Mosiah 15:7 ug ang 3 Nephi 11:11, nga mangita unsay andam nga buhaton ni Jesus aron masunod ang Iyang Amahan.

Dapita ang mga estudyante nga magpuli-puli sa pagbasa og kusog sa 2 Nephi 31:6–10, 15–16 samtang mangita ang klase kon unsay atong makat-unan gikan sa ehemplo sa Manluluwas mahitungod sa kaimportante sa pagkamasulundon ug mga panalangin nga moabut gumikan sa pagkamasulundon.

  • Unsa ang atong makat-unan gikan sa ehemplo sa Manluluwas mahitungod sa kaimportante sa kamasulundon? Unsa man ang atong makat-unan gikan sa Iyang ehemplo mahitungod sa mga panalangin nga moabut gumikan sa pagkamasulundon? (Siguroa nga mahibaloan sa mga estudyante kini nga baruganan: Kon sundon nato ang ehemplo sa Manluluwas sa pagkamasulundon sa Iyang Amahan, magpabilin kita sa dalan padulong sa kaluwasan.)

I-display ang mosunod nga pamahayag ni Elder Robert D. Hales, ug ipabasa kini og kusog sa usa ka estudyante:

Elder Robert D. Hales

“Ang hingkod nga espirituhanong pagkamasulundon mao ‘ang pagsunod sa Manluluwas.’ Gidumala kini sa tinuod nga gugma alang sa Langitnong Amahan ug sa Iyang Anak. … Ang atong gugma sa Manluluwas mao ang yawe sa pagkamasulundon sama sa Manluluwas” (“Kon Nahigugma Kamo Kanako, Inyong Pagatumanon ang Akong mga Sugo,” 36–37).

  • Ngano nga ang gugma sa Langitnong Amahan ug ni Jesukristo “mao ang yawe” sa pagsunod sa mga sugo?

Ipasabut nga ang nabanhaw nga si Jesukristo mitudlo sa mga Nephite sa mga katuyoan sa pagsunod sa mga sugo. Ipabasa og hilum sa mga estudyante ang 3 Nephi 12:19–20, 48 aron madiskubrihan kini nga mga katuyoan.

  • Sumala niini nga mga bersikulo, unsay gisulti sa Manluluwas nga mga hinungdan nganong kita gihatagan og mga sugo? (Kinahanglang mahibaloan sa mga estudyante ang mosunod nga baruganan: Kon moduol kita kang Kristo ug motuman sa mga sugo, mahimo kitang sama Kaniya ug sa atong Amahan sa Langit, ug maluwas kita.)

  • Sa unsang paagi ang inyong kamasulundon nakatabang nga maduol kamo sa Manluluwas?

Hatagi ang mga estudyante og panahon sa pagpamalandong kon unsay ilang buhaton aron mas magmasulundon sa mga sugo sa Langitnong Amahan para mas mahisama sila Kaniya ug sa Iyang Anak.

1 Nephi 3:4–7, 15–16; 4:1–2; 7:12; 17:1–31; 18:1–4

Mohatag og tabang ang Ginoo niadtong mga nagmasulundon

Dapita ang mga estudyante sa paghunahuna og panahon dihang ang pagtuman sa usa ka piho nga sugo sa Dios maingon og lisud o dihang ang pagtuman sa calling sa Simbahan o assignment daw lisud. Pahinumdumi ang mga estudyante nga si Nephi ug ang iyang mga igsoon nag-atubang og peligro ug posibling mamatay dihang gisugo sila sa Dios nga mobalik sa Jerusalem aron kuhaon ang mga palid nga bronse. Ipabasa sa mga estudyante ang 1 Nephi 3:4–7 ug sa hangyoa sa pag-ila sa baruganan nga ilang makat-unan gikan sa ehemplo ni Nephi nga makapalambo sa kaugalingon nilang kapasidad sa pagkamasulundon.

  • Unsa nga baruganan ang atong makat-unan gikan sa tubag ni Nephi sa lisud nga sugo gikan sa Dios? (Isulat sa pisara ang mosunod nga baruganan samtang mangita ang mga estudyante niini: Kon tinguhaon nato ang pagbuhat sa unsay gisugo sa Ginoo, mag-andam Siya og paagi para matuman nato kini.)

Aron matabangan ang mga estudyante nga masabtan kini nga baruganan, isulat sa pisara ang mosunod nga mga reference ug hatagi og oras ang mga estudyante sa pag-search niini, nga mangita kon giunsa sa pagsanong ni Nephi dihang gitinguha niya ang pagtuman sa lisud nga mga butang nga gipabuhat kaniya: 1 Nephi 3:15–16; 4:1–2; 7:12. Human mapaambit sa mga estudyante unsay ilang nadiskubrihan, ipasabut nga gihulagway ni Nephi sa wala madugay ang pipila ka paagi diin tabangan sa Ginoo kadtong motuman sa Iyang mga sugo. Ipabasa sa mga estudyante ang 1 Nephi 17:1–4 ug ilhon nila ang mga paagi sa pagtabang kanato sa Ginoo. Ipa-highlight usab sa mga estudyante ang mga pulong ni Nephi “ug sa ingon kami nakakita,” nga gigamit sa tibuok Basahon ni Mormon aron maandam ang tigbasa sa paghatag og piho nga atensyon sa mga pulong nga nagsunod.

Samtang ipaambit sa mga estudyante ang ilang mga tubag, isulat sa pisara ang mosunod nga mga pulong:

Moamuma

Molig-on

Mohatag og paagi

Dapita ang mga estudyante sa paggahin og pipila ka minutos sa pagpakli sa istorya diha sa 1 Nephi 17:5–31; 18:1–4, nga mangita sa mga ehemplo kon sa unsang paagi miamuma ang Ginoo, milig-on, o mihatag og paagi sa pamilya ni Lehi.

  • Sa unsang mga paagi ang Ginoo miamuma o milig-on sa pamilya ni Lehi? Giunsa Niya sa paghatag og paagi aron matabangan sila?

  • Unsang mga panalangin ang gihatag sa Ginoo sa pamilya ni Lehi nga susama sa mga panalangin nga karon atong gikinahanglan?

  • Kanus-a kamo nakasinati sa tabang sa Ginoo sama niining paagiha dihang naningkamot kamo sa pagsunod Kaniya?

Pahinumdumi ang mga estudyante nga gihangyo sa Ginoo ang atong pagkamasulundon aron mahatagan kita sa buhong nga mga panalangin sa atong paningkamot nga mahisama Kaniya. Ipaambit ang mosunod nga pamahayag ni Presidente Harold B. Lee (1899–1973):

President Harold B. Lee

“Ang labing importante sa tanang mga sugo sa Dios mao kana ang pinakalisud ninyong sundon karon. … Buntuga kana ug dayon sugdi ninyo ang sunod nga pinakalisud ninyong sundon. Mao kana ang paagi sa pagkabalaan sa inyong kaugalingon pinaagi sa pagsunod sa mga sugo sa Dios” (Mga Pagtulun-an sa mga Presidente sa Simbahan: Harold B. Lee [2000], 36).

Dapita ang mga estudyante sa paghunahuna bahin sa usa ka sugo nga nakita nilang lisud sundon. Awhaga sila sa paghimo og plano nga mahimong mas masulundon aron mas hingpit nga mahimong mas angayan sa pagdawat sa tabang sa Ginoo.

Mga Basahunon sa Estudyante