Aron mapanalipdan ang ilang kaugalingon human sa pagkamatay ni Lehi, si Nephi ug ang ubang matarung nga mga sakop sa pamilya ni Lehi gisugo sa Ginoo nga mobulag gikan ni Laman ug Lemuel ug sa ilang mga sumusunod. Human niana, ang mga panagbingkil ug mga gubat sa kasagaran maoy naghulagway sa relasyon tali sa mga Nephite ug mga Lamanite. Kini nga leksyon naghisgot kon sa unsang paagi ang ebanghelyo ni Jesukristo mopatigbabaw sa relihiyuso, pundok sa lumad nga kaliwatan, kultural, ug ubang panaglahi aron mahiusa ang mga anak sa Dios.
Background nga Basahunon
Dallin H. Oaks, “Tanang Tawo sa Tanang Dapit,”Liahona, Mayo 2006, 77–80.
Howard W. Hunter, “The Gospel—A Global Faith,” Ensign, Nob. 1991, 18–19.
Hangyoa ang mga estudyante sa pagkonsiderar og pipila ka relihiyuso, lumad nga pundok sa kaliwatan, o kultural nga pundok sa kalibutan ug maghunahuna mahitungod sa mga kinaiya sa ubang tawo para sa mga miyembro sa ubang grupo.
Pahinumdumi ang mga estudyante nga human sa pagkamatay ni Lehi, ang iyang kaliwatan nabahin ngadto sa duha ka grupo: ang mga Nephite ug mga Lamanite (tan-awa sa 2 Nephi 5:1-7). Human niini nga pagkabahin, ang duha ka grupo nagsugod sa panagbingkil ug panag-away (tan-awa sa 2 Nephi 5:34). Ang mga kasinatian niining duha ka grupo naghulagway nga kon ang mga tawo walay kahibalo o dili mosunod sa mga sugo sa Dios, sa kasagaran hatagan nila og gibug-aton ang kalainan tali sa ilang kaugalingon ngadto sa uban, nga mosangput sa pagkabulag gikan sa uban ug mga pagbati sa pagdumot ngadto nila. Ipasabut nga sa pagkumpara, ang Langitnong Amahan ug si Jesukristo gusto nga ang tanang tawo mobati sa gugma para sa usag usa ug mahiusa.
Dapita ang pipila ka estudyante nga magpuli-puli sa pagbasa og kusog sa 2 Nephi 26:23–28, 33. Hangyoa ang klase sa pagbantay kon giunsa ni Nephi sa paggamit ang mga pulong nga wala, bisan kinsa, ug tanan. Ikonsiderar ang pag-awhag sa mga estudyante sa pagmarka niini nga mga pulong diha sa ilang mga kasulatan.
Unsa ang makat-unan nato nga mahinungdanong doktrina gikan niini nga mga bersikulo? (Bisan og mogamit sila og lain-laing mga pulong, kinahanglang mahibaloan sa mga estudyante ang mosunod nga doktrina: Gihigugma ni Jesukristo ang tanang katawhan ug gidapit ang tanan sa pagduol Kaniya ug pag-ambit sa Iyang kaluwasan. Mahimo nimong isulat sa pisara kini nga doktrina. Mahimo usab nga awhagon nimo ang mga estudyante sa pag-cross reference sa 2 Nephi 26:33 ngadto sa Alma 5:33–34 ug sa Alma 19:36.)
Hatagi ang mga estudyante og pipila ka minutos sa hilum nga pagbasa sa Jacob 7:24 ug sa Enos 1:11, 20, nga mangita sa tinguha sa mga Nephite alang sa mga Lamanite atol sa kapanahunan nila ni propetang Jacob ug Enos.
Unsa ang sayop nga mga tradisyon ang mipugong sa mga Lamanite sa pagdawat sa imbitasyon sa pagduol ngadto kang Jesukristo?
Nahibalo nga ang mga Lamanite kanunay nga may pagdumot sa mga Nephite, unsa kaha ang mga kinaiya o mga tradisyon nga sayop ang gikinahanglan sa mga Nephite sa pagbuntog aron makapaambit sa ebanghelyo ngadto kanila?
Dapita ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Ang Basahon ni Mormon nagsaad nga ang tanan kinsa nakadawat og mosunod diha sa pagdapit sa Ginoo aron ‘maghinulsol ug motuo sa iyang Anak’ mahimo nga ‘mga katawhan sa pakigsaad sa Ginoo’ (2 Nephi 30:2). Kini mao ang usa ka lig-on nga pahinumdom nga walay mga katigayunan ni kaliwatan ni bisan unsa nga katungod sa pagkatawo ang makahimo nga mopatuo kita nga kita ‘mas labaw nga maayo kay sa uban’ (Alma 5:54; tan-awa usab sa Jacob 3:9). Sa pagkatinuod, ang Basahon ni Mormon nagsugo, ‘kamo dili motamud sa usa ka tawo nga labaw sa uban, o ang usa ka tawo dili mohunahuna sa iyang kaugalingon nga labaw sa uban’ (Mosiah 23:7)” (“Tanang Tawo sa Tanang Dapit,”Liahona, Mayo 2006, 79).
Dapita ang mga estudyante sa paggahin og panahon ug pagpamalandong sa ilang kinaiya sa mga indibidwal nga naggikan sa managlahing kaagi kay sa ilaha. Awhaga sila sa pagsunod sa ehemplo sa Manluluwas pinaagi sa pagpaningkamot nga higugmaon ang tanang anak sa Dios, lakip kadtong lahi sa atoa og kaliwat, kultura, o relihiyon.
Ang pag-angkon og tinguha sa pagpaambit sa ebanghelyo ngadto sa tanang anak sa Dios
Pahinumdumi ang mga estudyante nga ang Basahon ni Mormon nagrekord og mahinungdanong mga kasinatian sa mga Nephite samtang nagsangyaw sa ebanghelyo sa mga Lamanite. Pahinumdumi ang mga estudyante sa talagsaong pagkakabig sa mga anak ni Mosiah (tan-awa sa Mosiah 27), dayon ipabasa og kusog sa usa ka estudyante ang Mosiah 28:1–3. Hangyoa ang klase sa pagpangita sa mga rason nganong ang mga anak ni Mosiah nagtinguha sa pagsangyaw sa ebanghelyo ngadto sa mga Lamanite.
Sa mga rason nga inyong nadiskubrihan, asa man niana ang makahuluganon kaayo kaninyo samtang maghunahuna kamo sa pagpaambit sa ebanghelyo ngadto sa uban?
Asa nga pulong sa bersikulo 1 ang nagpahayag kon unsay pagtan-aw sa mga anak ni Mosiah sa mga Lamanite?
Sa unsang paagi maapektuhan ang tinguha sa pagpaambit sa ebanghelyo kon tan-awon nato kadtong naa sa laing relihiyon, mga kaliwat, o pundok sa lumad nga kaliwatan isip atong mga igsoon? (Samtang motubag ang mga estudyante, tabangi sila sa pag-ila sa mosunod nga baruganan: Kon tan-awon nato ang uban isip atong mga igsoon, ang atong tinguha sa pagpaambit sa ebanghelyo molambo.)
Dapita ang usa ka estudyante sa pagbasa og kusog sa mosunod nga pamahayag ni Presidente Howard W. Hunter (1907–95):
Imahe
Presidente Howard W. Hunter
“Ang tanang katawhan wala lamang magbaton og pisikal nga sumpay sa kaliwatan balik kang Adan ug ni Eva, nga ilang unang yutan-ong mga ginikanan, apan usa usab ka espirituhanong panulundon nga magsumpay balik sa Dios nga Mahangturong Amahan. Sa ingon, ang tanang tawo sa kalibutan sa tinuoray managsoon sa pamilya sa Dios.
“Anaa sa pagsabut ug pagdawat niining malukpanon nga pagkaamahan sa Dios nga ang tanang tawo makapasalamat sa kamahunahunaon sa Dios kanila ug sa ilang relasyon sa usag usa. Mensahe kini sa kinabuhi ug gugma nga mabinationg mobatok sa tanang kinaraan kaayong tradisyon basi sa kaliwat, pinulongan, sa ekonomikanhon o politikanhong kahimtang, sa edukasyon, o kultural nga kaagi, kay kitang tanan managsama ra og espirituhanong kagikan” (Mga Pagtulun-an sa mga Presidente sa Simbahan: Howard W. Hunter [2015], 142).
Unsay inyong mahunahuna sa pagkadungog ninyo niining mga pulonga gikan ni Presidente Hunter?
Hatagi ang mga estudyante og pipila ka minuto sa pagbasa sa Helaman 6:1–8. Ipasabut nga ang mga kahimtang nga gihulagway niini nga mga bersikulo nahitabo mga 50 ka tuig human ang mga anak ni Mosiah miserbisyo sa ilang mga misyon ngadto sa mga Lamanite. Pahunahunaa ang mga estudyante kon unsay relasyon tali sa mga Nephite ug Lamanite niadtong panahona sa misyon ug sa pagpangita kon sa unsang paagi nausab ang relasyon sulod sa 50 ka tuig.
Unsa ang nausab nga relasyon tali sa mga Nephite ug sa mga Lamanite? Nganong nausab ang relasyon?
Unsay atong makat-unan mahitungod sa pagpaambit sa ebanghelyo gikan sa kinaiya sa mga anak ni Mosiah ug sa mga resulta sa ilang misyon?
Ang ebanghelyo ni Jesukristo mopatigbabaw sa mga panaglahi tali sa katawhan
Dapita ang mga estudyante nga pamalandungan ang mosunod nga pangutana ug dayon sa pagpaambit sa ilang mga hunahuna:
Ngano kaha nga ang mga indibidwal gikan sa nagkalainlaing mga kaagi magkatagbo man diha sa diwa sa kalinaw ug paghigugmaay sa Simbahan? Unsa ang naghiusa sa mga miyembro sa Simbahan?
Tungaa ang klase. Dapita ang katunga nga tun-an ang Alma 27:1–2, 20–24 ug mangita kon unsay gihimo sa mga Nephite sa pagtabang sa katawhan sa Anti-Nephi-Lehi. Dapita ang laing katunga nga tun-an ang Alma 53:10–11, 13–17 ug mangita kon unsay gihimo sa katawhan sa Anti-Nephi-Lehi (katawhan ni Ammon) sa mga Nephite. Human sa igong panahon, dapita ang mga estudyante sa pagpaambit unsay ilang nakit-an.
Unsa kaha ang hinungdan nga kining duha ka grupo mibati man og ingon niana nga gugma ug kabalaka sa usag usa? (Isip kabahin niini nga diskusyon, tabangi ang mga estudyante sa pag-ila sa mosunod nga baruganan: Kon hangupon sa katawhan ang mga pagtulun-an ni Jesukristo, mahiusa sila sa usag usa.)
Ipasabut nga ang usa ka talagsaong paghulagway niini nga baruganan narekord sa 4 Nephi. Ipabasa og kusog sa usa ka estudyante ang 4 Nephi 1:1–2. Ipasabut og maayo nga human mibisita ang Manluluwas sa Amerika, ang tanan nga Nephite ug Lamanite naghinulsol, nagpabunyag, nakadawat sa Espiritu Santo ug nakabig ngadto sa Ginoo. I-assign ang mga estudyante sa pagsiksik sa 4 Nephi 1:3, 11–13, 15–18, nga mangita sa mga panalangin nga nasinati sa katawhan dihang ang tanan nakabig sa ebanghelyo.
Unsa nga mga pulong o hugpong sa mga pulong ang naghulagway sa katawhan nianang panahona?
Ngano nga ang pagpakabuhi sa ebanghelyo ni Jesukristo moresulta sa ingon niini nga mga panalangin?
Dapita ang usa ka estudyante sa pagbasa og kusog sa 4 Nephi 1:17.
Unsa kaha ang buot ipasabut sa wala nay “pundok sa mga [ites]”? (Ang katawhan wala na mailhi sa ilang kaugalingong tawag nga Nephites o Lamanites. Gibuntog nila ang bisan unsang mga panaglahi nga anaa tali kanila ug nagpuyo sa paghiusa ug kalinaw.)
Sa unsang paagi nakita ninyo ang ebanghelyo nga mipaminus sa panaglahi tali sa katawhan sa managlahi nga kaagi?
Aron mapalawman pa ang panabut sa mga estudyante kon sa unsang paagi ang pagsunod sa ebanghelyo makahiusa sa katawhan nga may managlahing kaagi, ipaambit ang mosunod nga pamahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Gidestino kamo sa Langitnong Amahan nga matawo ngadto sa piho nga kaliwat diin inyong nadawat ang inyong panulundon sa kaliwat, kultura, ug mga tradisyon. Kana nga kaliwatan makahatag og buhong nga panulundon ug talagsaong mga rason sa paglipay. Gani may responsibilidad kamo sa pagtino kon duna bay parte niana nga panulundon ang kinahanglang wagtangon tungod kay sukwahi kini sa plano sa Ginoo sa kalipay. …
“Mopamatuod ko nga matangtang ninyo ang mga babag sa kalipay ug makaplagan ang mas dakong kalinaw kon buhaton ninyo ang una ninyong panumpa sa pag-unong sa Simbahan ni Jesukristo, ug ang Iyang mga pagtulun-an inyong buhaton nga pundasyon sa inyong kinabuhi. Kon magkasungi ang mga tradisyon sa pamilya o nasyunal nga tradisyon o mga kustombre sa mga pagtulun-an sa Dios, ipadaplin kana. Kon magkauyon ang mga tradisyon ug mga kustombre sa Iyang mga pagtulun-an, kinahanglan nga alimahan kini ug sundon aron mapreserbar ang inyong kultura ug panulundon” (“Removing Barriers to Happiness,” Ensign, Mayo 1998, 86–87).
Ngano kaha nga ang mga kalainan tali sa katawhan sa managlahi nga kaagi mominus man kon kining mga tawhana mohimo na sa una nilang panumpa sa pag-unong sa ebanghelyo ni Jesukristo?
Sa unsang paagi ang pagka miyembro sa Simbahan nakatabang nga mobati kamo nga nahiusa sa mga miyembro sa Simbahan kinsa dunay mga kaagi nga lahi sa inyoha?
Tapusa pinaagi sa pagpamatuod nga ang Bashon ni Mormon naglangkob sa tinuod nga mga ehemplo kon sa unsang paagi ang katawhan gikan sa managlahing kaagi nagpakabuhi sa ebanghelyo ni Jesukristo ug mibuntog sa ilang mga panaglahi. Ang Pag-ula ug ang ebanghelyo ni Jesukristo mopatigbabaw sa mga panaglahi sa kaliwat, pundok sa lumad nga kaliwatan, kultura, edad, ug sekso sa paghiusa sa mga anak sa Dios.
Awhaga ang mga estudyante sa pagkonsiderar sa unsang paagi ang ebanghelyo ni Jesukristo makatabang nga mabuntog nila ang bisan unsang mga sayop nga tradisyon o mga ideya nga nakat-unan gikan sa mga sakop sa pamilya o mga higala, o pagsulbad sa bisan unsang panaglahi sa tawo nga ilang nailhan. Awhaga sila sa pagpangita og mga paagi aron mas mahiusa sa mga miyembro sa ilang lokal nga kongregasyon.