Pagpakabuhing Matarung sa Dautang Kapanahunan

Pasiuna

Narekord sa Basahon ni Mormon ang pagkalaglag sa mga indibidwal ug sa mga katilingban nga mihangop sa kadautan ug mitugot nga motumaw ang tinago nga mga kalihokan. Sa samang panahon, ang Basahon ni Mormon nagtudlo usab nga pwede kitang magpakabuhi nga matarung sa dautan nga palibut. Niini nga leksyon, makat-unan sa mga estudyante unsay ilang mahimo aron magpabiling matarung sa kalibutan karon.

Background nga Basahunon

Quentin L. Cook, “Pag-ani sa mga Ganti sa Pagkamatarung,” Liahona, Hulyo 2015, 27–33.
Dennis B. Neuenschwander, “Ang Usa nga diha sa Nagdasok nga mga Tawo,” Liahona, Mayo 2008, 101–3.

Mga Sugyot alang sa Pagtudlo

Alma 37:21–22, 25–27; Helaman 6:20–26, 37–40; Ether 8:18–26

Ang tinago nga mga kalihokan makaguba sa kagawasan ug mga katilingban

Isulat sa pisara ang pulong teritoryo sa kaaway ug pangutan-a ang mga estudyante unsay ipasabut niini.

I-display ang mosunod nga pamahayg ni Presidente Boyd K. Packer (1924–2015) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Kamong mga batan-on nagdako sa teritoryo sa kaaway. Atong nasayran gikan sa mga kasulatan nga dihay gubat sa langit ug nga si Lucifer nakigbatok ug, uban sa iyang sumusunod, ‘gitambog ngadto sa yuta’ [Pinadayag 12:9]. Determinado siya sa pagbalda sa plano sa atong Langitnong Amahan ug nagtinguha sa pagkontrolar sa mga hunahuna ug lihok sa tanan” (“Tambag ngadto sa mga Kabatan-onan, ” Liahona, Nob. 2011, 16).

Sa unsang mga paagi nga ang atong pagpakabuhi niining panahona susama nga anaa kita sa teritoryo sa kaaway?

Ipasabut nga kini nga leksyon mosuta sa deskripsyon nga gihatag sa Basahon ni Mormon bahin sa dautang palibut diin nagpuyo ang mga matarung nga mga tawo. Dapita ang mga estudyante sa pagpangita sa mga baruganan ug mga doktrina nga ilang magamit samtang magtuon sila sa mga ehemplo sa mga tawo kinsa nagpabiling matinud-anon bisan gilibutan sila sa kadautan.

Pahinumdumi ang mga estudyante nga nasaksihan ni Moroni ang pagkalaglag sa tibuok Nephite nga sibilisasyon. Gihulagway niya ang pagkadautan nga maoy miganoy sa mga Nephite ug sa mga Jaredite ngadto sa kalaglagan. Dapita ang usa ka estudyante sa pagbasa og kusog sa Ether 8:18 ug 21 samtang mangita ang klase sa hinungdan niini nga pagkalaglag. Dapita ang mga estudyante sa pagpaambit unsay ilang nadiskubrihan.

Isulat sa pisara ang mosunod nga mga pakisayran sa kasulatan ug mga pangutana:

Alma 37:21–22, 25–27

Helaman 6:20–26

Ether 8:18–26

Unsa ang tinago nga mga kalihokan?

Unsa ang ilang mga tumong ug mga katuyoan?

Unsaon nila sa pagsiguro nga magpadayon ang ilang pagpakabuhi?

Ipabasa sa mga estudyante ang usa sa mga tudling nga naa sa pisara ug sa pagpangita og mga tubag sa mga gilista nga mga pangutana. Sultihi ang mga estudyante nga ang tudling nga ilang gipili tingali dili makatubag sa tanan nianang tulo ka pangutana, apan kinahanglang pangitaon nila sa unsay ilang mahimo. Human sa igong panahon, hisguti ang mga pangutana sa tibuok klase nga naa sa pisara. Dayon hisguti ang mosunod:

Gikan sa unsay inyong gibasa, unsa ang mga sangputanan sa pagtugot nga ang tinago nga mga kalihokan manaa ug modaghan? (Kinahanglang mahibaloan sa mga estudyante ang mosunod nga baruganan: Ang tinago nga mga kalihokan makaguba sa kagawasan, gobyerno, ug sa mga katilingban.)
Unsa kaha ang ubang mga ehemplo sa tinago nga mga kalihokan sa atong kapanahunan?

Aron matabangan ang mga estudyante sa pagtubag niini nga pangutana, i-display ang mosunod nga pamahayag ni Elder M. Russel Ballard sakop sa Korum sa Napulog Duha ka mga Apostoles ug ni Presidente Ezra Taft Benson(1899–1994). Dapita ang usa ka estudyante sa pagbasa niini og kusog.

“Kauban sa tinagong mga kalihokan karon mao ang mga gang, mga pagpayuhot og drugas, ug organisadong krimen sa mga pamilya. Ang tinago nga mga kalihokan sa atong panahon naglihok sama gayud sa mga tulisan ni Gadianton sa panahon sa Basahon ni Mormon. … Usa sa ilang mga katuyoan mao nga ‘makabuno, ug makapanglungkab, ug makapangawat, ug makabuhat sa malaw-ay nga mga buhat ug sa tanan nga matang sa pagkadautan’ [Helaman 6:23]” (M. Russell Ballard, “Standing for Truth and Right,” Ensign, Nob. 1997, 38).

“Mopamatuod ko nga ang pagkadautan paspas kaayong midaghan sa matag hut-ong sa atong katilingban. (Tan-awa sa D&P 1:14–16; 84:49–53.) Labihan kini ka-organisado, abtik sa pagtakuban, ug mas suportado kay sa kaniadto. Ang tinago nga mga kalihokan nga higal sa gahum, kwarta, ug himaya nanagsugwak. … (Tan-awa sa Ether 8:18–25.)” (Ezra Taft Benson, “I Testify,” Ensign, Nob. 1988, 87).

Ngano kaha nga gilakip man sa mga propeta sa Basahon ni Mormon sa ilang pagrekord ang impormasyon mahitungod sa tinagong mga kalihokan?

Dapita ang usa ka estudyante sa pagbasa og kusog sa Helaman 6:20, 37–40. Pasunda ang klase, nga mangita sa mga pagtandi tali sa mga Lamanite ug sa mga Nephite. (Pahinumdom: Ang pagtandi ug pagkumpara usa ka kahanas sa pagtuon sa kasulatan nga tingali imong hatagan og gibug-aton niini nga leksyon [tan-awa sa Gospel Teaching and Learning: A Handbook for Teachers and Leaders sa Seminaries and Institutes of Religion (2012), 22].)

Unsa may atong makat-unan gikan niini nga mga bersikulo mahitungod sa paagi sa pagwagtang sa kadautan ug sa tinago nga mga kalihokan?

Alma 62:41; 4 Nephi 1:42; Mormon 1:13–17, 19; 2:8, 14–15, 18–19; 3:2–3, 12, 22; Moroni 9:6, 22, 25–26

Pagpabiling matarung samtang gilibutan sa kadautan

Sultihi ang mga estudyante nga si propeta Mormon natawo sa palibut nga nagkagrabe ang kadautan nga gumikan niining tinago nga mga kalihokan. Hangyoa ang mga estudyante sa pagtuon sa mosunod nga mga tudling ug sa pagpangita ug pagmarka sa mga deskripsyon sa palibut ni Mormon: Mormon 1:13–14, 16–17, 19; 2:8, 14–15, 18. Dapita ang mga estudyante sa pag-report unsay ilang nakit-an, ug dayon ipangutana:

Unsa ang inyong mga kabalaka mahitungod sa pagpuyo sa ingon niana nga palibut?

Dapita ang usa ka estudyante sa pagbasa og kusog sa Mormon 1:15 ug sa 2:19.

Unsa ang atong makat-unan gikan sa ehemplo ni Mormon atol niini nga panahon sa kadautan? (Samtang motubag ang mga estudyante, isulat kini nga kamatuoran sa pisara: Mahimo kitang magpakabuhi nga matarung bisan gilibutan kita sa kadautan.)

Hatagi og panahon ang mga estudyante sa pagbasa sa Mormon 3:2–3, 12, 22 aron makita kon unsa pay pwede nilang makat-unan kon sa unsang paagi nahimo ni Mormon ang pagpakabuhing matarung sa dautan nga kapanahunan. Human mapaambit sa mga estudyante unsay ilang nakat-unan mahitungod ni Mormon, ipangutana ang mga mosunod:

Kinsa pa ang naa sa Basahon ni Mormon ang usa ka ehemplo sa pagpakabuhing matarung samtang gilibutan sa kadautan? (Ang mga tubag tingali maglakip kang Ether, Moroni, Abish, ug sa mga tawo nga mituo nga si Kristo matawo sigun sa narekord sa 3 Nephi 1.)
Unsa nga mga hagit ang atong atubangon kon maningkamot kita sa pagpakabuhing matarung sa dautan nga kalibutan?

Pahinumdumi ang mga estudyante nga ang anak ni Mormon, nga si Moroni, nagpuyo niining mao nga panahon sa nagkatap nga kadautan. Sa wala pa siya mamatay, misulat si Mormon kang Moroni nga narekord diha sa Moroni 9. Ipabasa sa usa ka estudyante ang Moroni 9:6, 22, 25–26. Dapita ang klase sa pagkonsiderar kon sa unsang paagi ang tambag ni Mormon niini nga mga bersikulo makatabang aron magpakabuhi kitang matarung sa dautan nga kalibutan.

Unsay atong makat-unan gikan niini nga mga bersikullo nga makatabang nato sa pagpakabuhing matarung sa kalibutan karon? (Tabangi nga masabtan sa mga estudyante ang mosunod nga baruganan: Kon may pagtuo kita kang Kristo ug sa Iyang Pag-ula, niana makaangkon kita og kalig-on sa pagpakabuhing matarung bisan gilibutan sa kadautan.)
Unsa nga mga ehemplo ang inyong nakita sa tawo nga nagpakabuhing matarung taliwala sa mga kadautan karon?
Sa unsang paagi ang pag-focus kang Jesukristo ug sa Iyang Pag-ula nakatabang ninyo nga makabarug batok sa dautan o sa lisud nga mga kahimtang?

Ipaambit ang mosunod nga mga pamahayag ni Sister Virginia U. Jensen, kanhi magtatambag sa kinatibuk-ang kapangulohan sa Relief Society, aron matabangan ang mga estudyante sa pagkonsiderar kon unsa pa kaha ang ilang mahimo aron makabarug nga lig-on diha sa pagtuo ug pagkamatarung:

“Aron mamintinar ang usa ka lig-ong baruganan sa atong kaugalingon ug makatabang sa uban sa pagbarug nga lig-on, ang mensahe sa gipahiuli nga ebanghelyo kinahanglang matisok nga lig-on sa atong kasingkasing ug matudlo sa atong panimalay. … Tudloi ang inyong mga minahal unsaon sa pag-angkon sa mga gahum sa langit pinaagi sa pagpuasa ug pag-ampo. Tudloi sila nga ang pagbalaan sa adlaw nga Igpapahulay mopanalipud kanila sa kalibutan. Tudloi sila sa pagkamasulundon. Tudloi sila nga tinguhaon ang pagtugot sa Dios ug dili ang sa tawo. Tudloi sila nga ang bugtong dalan balik sa atong langitnong panimalay mao ang paghigugma ug pagsunod sa Manluluwas ug pinaagi sa paghimo ug pagtuman sa sagradong mga pakigsaad ug mga sugo. Ang mga kamatuoran sa ebanghelyo ug kahibalo sa plano sa kaluwasan mao ang mga hinagiban nga magamit sa mga sakop sa inyong pamilya aron magmadaugon batok sa dautang pwersa ni Satanas” (“Stand Firm,” Ensign, Nob. 2001, 94).

Unsa ang naghatag kaninyo og determinasyon ug kalig-on aron magmasulundon sa Ginoo sa kalibutan nga nagtubo ang kadautan?

Ipasabut nga atol sa taas nga gubat tali sa mga Nephite ug mga Lamanite nga narekord sa basahon ni Alma, ang mga indibidwal kinahanglang mobarug batok sa mga pwersa sa dautan aron mapreserbar ang ilang kinabuhi. Dapita ang mga estudyante nga tun-an ang Alma 62:41 ug sa pagpangita sa nagkasukwahing mga paagi sa mga indibidwal sa pag-atubangsa mga kalisdanan ug kadautan. Dapita ang mga estudyante sa pagpaambit unsay ilang nadiskubrihan nga makatabang nila aron magpuyo nga matarung sa dautan nga kalibutan.

Ipabasa og kusog sa usa ka estudyante ang pamahayag ni Presidente James E. Faust (1920–2007) sa Unang Kapangulohan ang mahitungod niini nga tudling:

“Sa kalibutan nga nagkagrabe ang kawalay kaangayan aron mabuhi ug gani aron makakita og kalipay ug kasadya, bisan unsa pa may mahitabo, kinahanglan kitang mohimo sa atong pagpili nga walay pagduha-duha uban sa Ginoo. Kinahanglan kitang maningkamot nga mahimong matinud-anon kada oras sa matag adlaw aron nga ang atong pundasyon sa pagsalig diha sa Ginoo dili gayud matarug. …

“Dili ingon nga kon unsay mahitabo nato maoy mas bug-at kondili kon giunsa nato pag-atubang ang unsay nahitabo nato. Nakapahinumdom kana kanako sa usa ka tudling gikan sa Alma. Human sa dugay nga gubat ‘daghan ang nahimo nga tig-a,’ samtang ‘daghan ang nahumok tungod sa ilang mga kasakit’ [Alma 62:41]. Ang samang mga kahimtang nagpakita og mga nagsukwahing mga tubag. … Ang kada usa nato kinahanglan nga adunay kaugalingon natong punduhanan sa pagtuo nga motabang nato aron makasagubang sa mga kasamok nga kabahin na niining mortal nga pagsulay” (“Asa Man ko Maghimo og Pagpili?” Liahona, Nob. 2004, 18, 20).

Hangyoa ang mga estudyante nga gahinan og pipila ka minutos ang pagsulat sa mga tubag sa mosunod nga pangutana:

Unsa nga mga pasalig ang inyong gihimo aron mobarug “nga walay pagduhaduha ngadto sa Ginoo”?

Dayon awhaga ang mga estudyante nga pamalandugan ang mosunod nga mga pangutana:

Unsa nga mga pag-aghat ang inyong nadawat gikan sa Espiritu kon unsaon ninyo sa pagkahimong mas mapasaligon sa Ginoo?
Unsay inyong mahimo aron matabangan ang mga sakop sa inyong pamilya sa pagkahimong mas mapasaligon sa Ginoo?

Ipamatuod nga samtang magpadayon kita sa hugot nga pagtuo, panalanginan kita sa Ginoo ug tabangan kita nga makapuyo nga matarung taliwala sa kadautan.

Mga Basahunon sa Estudyante

Alma 37:21–22, 25–27; 62:41; Helaman 6:20–26, 37–40; 4 Nephi 1:42; Mormon 1:13–17, 19; 2:8, 14–15, 18–19; 3:2–3, 12, 22; Ether 8:18–26; Moroni 9:6, 22, 25–26.
Quentin L. Cook, “Pag-ani sa mga Ganti sa Pagkamatarung,” Liahona, Hulyo 2015, 27–33.